11-زەرتتەۋ ماقالاسى
قيىندىقتا جازبالاردان كۇش الايىق
«تاباندىلىق... بەرەتىن قۇداي» (ريم. 15:5).
94-ٵن قۇداي ٴسوزى ٷشىن ريزاشىلىق
اڭداتپا *
1. ەحوبانىڭ حالقى قانداي قيىندىقتارعا كەزىگىپ ٴجۇر؟
ٴسىز قانداي قيىندىققا كەزىگىپ ٴجۇرسىز؟ بالكىم، قاۋىمداعى ٴبىر باۋىرلاس ٴسىزدى قاتتى رەنجىتكەن بولار (جاق. 3:2). يا بولماسا ەحوبا كۋاگەرى بولعانىڭىز ٷشىن مەكتەپتە نە جۇمىستا ٴسىزدى كۇلكى ەتىپ، مازاقتايتىن شىعار (پەت. 1-ح. 4:3، 4). نەمەسە تۋىسقاندارىڭىز سىزگە «مىنا ٴدىنىڭدى قوي، ۋاعىزىڭدى دوعار» دەپ ۇرساتىن شىعار (مات. 10:35، 36). كەيدە قيىندىقتاردان قاجىپ كەتەتىنىڭىز سونشا، «بولدى، بۇدان ٵرى كۇرەسكىم كەلمەيدى» دەرسىز. ٴبىراق مىناعان سەنىمدى بولىڭىز: باسىڭىزعا قانداي قيىندىق تۋماسىن، ەحوبا سىزگە دانالىق پەن كۇش بەرەدى.
2. ريمدىكتەرگە 15:4 كە ساي، قۇداي ٴسوزى بىزگە قالاي اسەر ەتە الادى؟
2 ەحوبا ٶز قىزمەتشىلەرىنىڭ قيىندىقتارمەن قالاي كۇرەسكەنىن كيەلى كىتاپقا بۇگە-شىگەسىنە دەيىن جازدىرعانى بەكەر ەمەس. ٴبىز سول وقيعالاردان كوپ ساباق الا الامىز. سوندىقتان دا پاۋىل كيەلى رۋحتىڭ جەتەلەۋىمەن ريمدىكتەرگە 15:4 تەگى (وقىڭىز) سوزدەردى جازعان. بۇل سوزدەر بويىمىزعا جىگەر قۇيىپ، ٷمىت وتىن جاعادى. ٴبىراق كيەلى كىتاپتى وقىپ قانا قويۋ جەتكىلىكسىز. ونىڭ تولىق پايداسىن كورۋ ٷشىن جازبالاردىڭ سانامىز بەن جۇرەگىمىزگە اسەر ەتۋىنە جول بەرۋىمىز كەرەك. مىسالى، كەزىگىپ جۇرگەن قيىندىعىمىزدىڭ كۇرمەۋىن شەشۋ ٷشىن مىنا 4 ٵدىستى قولدانساق بولادى: دۇعا ەتۋ، ەلەستەتۋ، وي جۇگىرتۋ، قولدانۋ. قازىر وسىلاردىڭ ٵرقايسىسىنا توقتالىپ وتەيىك *. سوسىن وسى 4 ٵدىستىڭ كومەگىمەن ٴداۋىت پاتشا مەن ەلشى پاۋىلدىڭ وقيعاسىنان نە ۇيرەنەتىنىمىزدى كورەمىز.
1. دۇعا ەتىڭىز
كيەلى كىتاپتى وقىماس بۇرىن دۇعا ەتىپ، وقىعانىمنان وزىمە پايدالى ٴبىر وي تابايىنشى دەپ سۇراڭىز (3-ابزاستى قاراڭىز)
3. كيەلى كىتاپتى وقىماس بۇرىن نە ىستەۋ كەرەك جانە نەگە؟
3 1) دۇعا ەتىڭىز. كيەلى كىتاپتى وقىماس بۇرىن دۇعا ەتىپ، ەحوبادان وقىعاندارىمنان ٴبىر نارسەگە ۇيرەنە الايىنشى دەپ سۇراڭىز. كۇرەسىپ جۇرگەن قيىندىقتارىڭىز بولسا، سولاردى شەشۋگە كومەكتەسەتىن پرينسيپتەردى كورە الايىنشى دەپ سۇراڭىز (ٴفىلىپ. 4:6، 7؛ جاق. 1:5).
2. ەلەستەتىڭىز
كيەلى كىتاپتى وقىعاندا، ٶزىڭىزدى سونداعى باس كەيىپكەردىڭ ورنىنا قويىپ كورىڭىز (4-ابزاستى قاراڭىز)
4. كيەلى كىتاپتى قالاي جان ٴبىتىرىپ وقۋعا بولادى؟
4 2) ەلەستەتىڭىز. ەحوبا بىزگە ەلەستەتۋ قابىلەتىن بەرگەن. بۇل — وتە كەرەمەت سي. كيەلى كىتاپتى وقىعاندا سول وقيعانى كوز الدىڭىزعا كەلتىرىپ، وعان جان ٴبىتىرىڭىز. ٶزىڭىزدى سونداعى باس كەيىپكەرمىن دەپ ويلاپ، ول كورگەندى كورىپ، ول سەزىنگەندى سەزىنىڭىز.
3. وي جۇگىرتىڭىز
وقىعانىڭىزدى وي ەلەگىنەن وتكىزىپ، ٶز جاعدايىڭىزعا قاتىستىرىڭىز (5-ابزاستى قاراڭىز)
5. وي جۇگىرتۋ دەگەن نە جانە وي جۇگىرتۋگە نە كومەكتەسەدى؟
5 3) وي جۇگىرتىڭىز. وي جۇگىرتۋ دەگەنىمىز — مالىمەتتى وي ەلەگىنەن وتكىزىپ، ونى ٶز جاعدايىمىزعا قاتىستىرۋ. بۇل سىزگە ويلاردىڭ ٶزارا بايلانىسىن كورۋگە، تاقىرىپتى تەرەڭ تۇسىنۋگە كومەكتەسەدى. وي جۇگىرتۋ ٴدامدى تاماق جەپ، تامسانۋمەن بىردەي. ال كيەلى كىتاپتى وي جۇگىرتپەي وقىساق، سول استىڭ قۇرامىنا كىرەتىن ازىق-تۇلىكتى شيكىلەي، بولەك-بولەك جەگەن سياقتى بولامىز. وي جۇگىرتۋگە مىنا سۇراقتار كومەكتەسەدى: وقيعاداعى باس كەيىپكەر قيىندىقتارىن شەشۋ ٷشىن نە ىستەدى؟ ال ەحوبا وعان قالاي كومەكتەستى؟ ٶز قيىندىقتارىما توتەپ بەرۋ ٷشىن مەن بۇل وقيعادان نە ۇيرەنەمىن؟
4. قولدانىڭىز
وقىپ-بىلگەندەرىڭىزدى قولدانىڭىز، سوندا جاقسى شەشىمدەر قابىلدايسىز، جۇرەگىڭىزدە تىنىشتىق بولادى، سەنىمىڭىز قاتايادى (6-ابزاستى قاراڭىز)
6. بىلگەنىمىزدى قولدانۋ نە ٷشىن ماڭىزدى؟
6 4) قولدانىڭىز. يسا ايتقانداي، بىلگەندەرىمىزدى قولدانبايتىن بولساق، ٷيىن قۇمعا تۇرعىزعان كىسىگە ۇقساپ قالامىز. ول بار كۇشىن جۇمساپ، ٷي سوعادى. ٴبىراق سەل ٴجۇرىپ، داۋىل تۇرعاندا، ٷيدىڭ نەگىزى قۇمعا قالانعاندىقتان قۇلاپ قالادى. ٴسۇيتىپ، بار ەڭبەگى دالاعا كەتەدى (مات. 7:24—27). سول سياقتى دۇعا ەتىپ، ەلەستەتىپ، وي جۇگىرتكەنمەن، بىلگەندەرىمىزدى قولدانبايتىن بولساق، بۇدان ەش پايدا جوق. قۋعىن-سۇرگىن، سىناق كەزىندە سەنىمىمىز شايقالىپ قالادى. ال ەگەر وقىپ-بىلگەندەرىمىزدى قولدانساق، قاتەلىك جاساۋدان اۋلاق بولامىز، دۇرىس شەشىمدەر قابىلدايمىز. جۇرەگىمىزدە تىنىشتىق بولادى جانە سەنىمىمىز قاتايادى (يشايا 48:17، 18). ەندەشە، قازىر وسى 4 ٵدىستى قولدانىپ، ٴداۋىتتىڭ ومىرىندە بولعان ٴبىر جاعدايدى قاراستىرىپ كورەيىك.
ٴداۋىت پاتشادان ۇيرەنەرىمىز
7. قازىر كىمنىڭ وقيعاسىن قاراستىرامىز؟
7 ٴسىزدىڭ دوسىڭىز يا تۋىسىڭىز سەنىمىڭىزدى اقتاماي، جانىڭىزعا جارا سالعان با؟ ٴداۋىت پاتشا دا ٶز ۇلىنان قيانات كورگەن. ۇلى ابەسسالوم وعان ساتقىندىق جاساپ، تاعىن تارتىپ الماق بولعان (سام. 2-ج. 15:5—14، 31؛ 18:6—14).
8. ەحوبا سىزگە كومەكتەسۋ ٷشىن نە ىستەي الاسىز؟
8 1) دۇعا ەتىڭىز. داۋىتپەن بولعان وسى وقيعانى ويدا ۇستاي وتىرىپ، ەحوباعا دۇعا ەتىڭىز. جانىڭىز قالاي جارالانعانىن، قانداي ادىلەتسىزدىك كورگەنىڭىزدى، نە سەزىنىپ جاتقانىڭىزدى بۇكپەي، ٴبارىن اشىق ايتىڭىز (ٴزاب. 6:6—9). سوسىن، وسى قيىن ماسەلەدەن الىپ شىعاتىن پرينسيپتەردى كورۋگە كومەكتەسۋىن سۇراڭىز.
9. ٴداۋىت جانە ابەسسالوممەن بولعان جاعدايدى ايتىپ بەرىڭىز.
9 2) ەلەستەتىڭىز. وسى وقيعانىڭ قالاي وربىگەنىن كوز الدىڭىزعا كەلتىرىپ، ٴداۋىتتىڭ قانداي كۇي كەشكەنىن ەلەستەتىپ كورىڭىز. ابەسسالوم زىميان جوسپار قۇرىپ، بىرنەشە جىل بويى حالىقتىڭ كوڭىلىن اۋلاپ، جاعىنۋعا تىرىسادى (سام. 2-ج. 15:7). ٴساتى تۋدى دەگەندە، ول يسرايلدىڭ تۇكپىر-تۇكپىرىنە ٶز تىڭشىلارىن جىبەرىپ، حالىقتى ونى جاڭا پاتشا دەپ قابىلداۋعا دايىندايدى. ول ٴتىپتى ٴداۋىتتىڭ جاقىن دوسى، اقىلشىسى احيتوپەلدى دە وزىنە قاراتىپ الادى. كەيىن ابەسسالوم ٶزىن پاتشا دەپ جاريالاپ، ٴداۋىتتى ٶلتىرۋ ٷشىن ونىڭ سوڭىنا تۇسەدى. ال ٴداۋىت ول كەزدە ناۋقاستانىپ، اۋىر حالدە بولعان كورىنەدى (ٴزاب. 41:1—9). ٴبىراق ول ابەسسالومنىڭ زىميان جوسپارىن ٴبىلىپ قويىپ، يەرۋساليمنەن قاشىپ كەتەدى. سوڭىندا ابەسسالومنىڭ اسكەرى مەن ٴداۋىتتىڭ اسكەرى شايقاسقا ٴتۇسىپ، بۇلىكشىلەر جاعى ويسىراي جەڭىلەدى. ابەسسالوم سول شايقاستا قازا تابادى.
10. ٴداۋىت پاتشا نەدەن اۋلاق بولدى؟
10 سۇيىكتى ۇلى ابەسسالومنىڭ جانە سەنگەن دوسى احيتوپەلدىڭ قارسى شىققانى داۋىتكە قالاي اۋىر تيگەنى جايلى ويلاپ كورىڭىزشى. ەكەۋىنىڭ وپاسىزدىعى، ٴتىپتى ولتىرگىسى كەلگەنى ٴداۋىتتىڭ جانىنا قانداي ازاپ سالدى دەسەڭىزشى. ٴداۋىت «بۇلار وسىلاي ىستەسە، وندا باسقا دوستارىمنان نە ٷمىت، نە قايىر، ولار دا ابەسسالومنىڭ جاعىنا شىعىپ كەتكەن شىعار» دەپ ويلاسا بولار ەدى. ول ٶزىن عانا ويلاپ، ەلدەن جالعىز ٶزى قاشىپ كەتسە دە بولار ەدى. نەمەسە قاتتى ٴتۇڭىلىپ، قايعىعا باتىپ كەتسە بولار ەدى. ٴبىراق ٴداۋىت بۇلاي ەتۋدەن اۋلاق بولىپ، قيىندىقتارىمەن دۇرىس كۇرەستى. ٴداۋىت كۇرەسۋگە كۇشتى قايدان الدى؟
11. قيىن شاقتا ٴداۋىت قالاي ارەكەت ەتتى؟
11 3) وي جۇگىرتىڭىز. بۇل وقيعادان قانداي پرينسيپتەردى كورۋگە بولادى؟ الدىمەن، «ٴداۋىت قيىندىقتارىن شەشۋ ٷشىن نە ىستەدى؟» دەگەن سۇراققا جاۋاپ بەرەيىك. ٴداۋىت ساسقالاقتاپ، اسىعىس شەشىمدەر قابىلداپ اقىماقتىق جاسامادى. نەمەسە ۇرەيگە بەرىلىپ، قول قۋسىرىپ تا وتىرا بەرمەدى. قايتا، ول ەحوباعا دۇعا ەتىپ كومەك سۇرادى. سونداي-اق ادال دوستارىنان دا كومەك ىزدەدى. ونىڭ جانى قاتتى جارالانسا دا، اشىنىپ، اينالاسىنداعىلاردىڭ بارلىعىنا كۇمانمەن قاراپ كەتپەدى. كەرىسىنشە، ەحوباعا جانە دوستارىنا ٵرى قاراي دا سەنىم ارتتى.
12. ەحوبا داۋىتكە قالاي كومەكتەستى؟
12 ەحوبا داۋىتكە قالاي كومەكتەستى؟ ەگەر قوسىمشا ىزدەنىس جۇرگىزسەڭىز، سول قيىن شاقتا ەحوبانىڭ ٴداۋىتتى قالاي نىعايتقانىن كورەسىز (ٴزاب. 3:1—8؛ كىرىسپە). ول ٴداۋىتتىڭ قابىلداعان شەشىمدەرىنە باتاسىن بەردى. ونىڭ ادال دوستارىن دا قولداپ، پاتشالارى ٷشىن شايقاسۋعا كۇش بەردى.
13. بىرەۋ ٴسىزدى قاتتى رەنجىتكەندە، داۋىتكە قالاي ەلىكتەي الاسىز؟ (ماتاي 18:15—17)
13 4) قولدانىڭىز. داۋىتكە قالاي ەلىكتەسەم بولادى دەپ ويلانىڭىز. تۋىنداعان پروبلەمانى بىردەن شەشۋگە تىرىسىڭىز. بولعان جاعدايعا قاراي ٴسىز ماتاي كىتابىنىڭ 18-تاراۋىندا جازىلعان قادامدار بويىنشا ارەكەت ەتسەڭىز بولادى. نەمەسە سونداعى ٴپرينسيپتى قولدانساڭىز بولادى (ماتاي 18:15—17 وقىڭىز). ٴبىراق سەزىمنىڭ جەتەگىندە كەتىپ، اسىعىس شەشىم قابىلداۋدان اۋلاق بولىڭىز. ەحوباعا دۇعا ايتىپ، ودان سابىرلىق، دانالىق بەرۋىن سۇراڭىز. دوستارىڭىزعا سەنبەي، تەرىس اينالىپ كەتپەڭىز. كەرىسىنشە، ۇسىنعان كومەكتەرىن قابىلداۋعا ىقىلاستى بولىڭىز (ناق. س. 17:17). ال ەڭ باستىسى، ەحوبانىڭ كيەلى كىتاپتا بەرگەن اقىل-كەڭەسىنە قۇلاق اسىڭىز (ناق. س. 3:5، 6).
ەلشى پاۋىلدان ۇيرەنەرىمىز
14. تىموتەگە 2-حات 1:12—16؛ 4:6—11، 17—22 تارماقتار كىمدەردى جىگەرلەندىرە الادى؟
14 ٴسىز شىندىق ٷشىن وتباسىڭىزدان قىسىم كورىپ ٴجۇرسىز بە؟ نەمەسە ەحوبا كۋاگەرلەرىنىڭ ىسىنە شەكتەۋلەر قويىلعان نە ٴتىپتى تيىم سالىنعان ەلدە تۇراتىن شىعارسىز؟ ولاي بولسا، سىزگە پاۋىلدىڭ تۇرمەدە وتىرعاندا جازعان سوزدەرى جىگەر بەرە الادى. بۇل سوزدەردى ٴبىز تىموتەگە 2-حات 1:12—16؛ 4:6—11، 17—22 تارماقتاردان وقي الامىز *.
15. نە تۋرالى دۇعا ايتساڭىز بولادى؟
15 1) دۇعا ەتىڭىز. وسى تارماقتاردى وقىماس بۇرىن ەحوباعا قيىندىعىڭىزدى جانە بۇل قيىندىق سىزگە قالاي اسەر ەتىپ جاتقانىن اشىق ايتىڭىز. سوسىن، ەحوبادان پاۋىلدىڭ سىناقتارى تۋرالى وقىعاندا، ٶز قيىندىقتارىما كومەك بولاتىن پرينسيپتەردى كورە الايىنشى دەپ سۇراڭىز.
16. پاۋىلدىڭ جاعدايىن ايتىپ بەرىڭىز.
16 2) ەلەستەتىڭىز. ٴبىر ٴسات ويلانىپ، ٶزىڭىزدى پاۋىلدىڭ ورنىنا قويىپ كورىڭىزشى. پاۋىل ريمدە تۇرمەدە وتىر. قولدارى شىنجىرمەن بۇعاۋلانعان. ول بۇعان دەيىن دە تۇرمەدە وتىرعان. ٴبىراق بۇل جولى ول ٶلىم جازاسىنا كەسىلمەك. ونىڭ ۇستىنە، كەيبىر سەرىكتەستەرى ونى تاستاپ كەتتى (ٴتىم. 2-ح. 1:15). ال ٶزى بولسا ٵلى قۇرىپ، ابدەن شارشاعان.
17. ەلشى پاۋىل نەدەن اۋلاق بولدى؟
17 پاۋىل «كەزىندە باسقاشا ارەكەت ەتكەندە، قازىر تۇتقىندا وتىرماس ەدىم» دەپ وتكەندى ويلاي بەرمەدى. پاۋىلدىڭ ونى تاستاپ كەتكەن ازيا ايماعىنداعى ماسىحشىلەرگە دە اشۋلانىپ، قاتۋلانىپ كەتۋى، سودان باسقا دوستارىنا دا سەنىم ارتپاي قويۋى مۇمكىن ەدى. ٴبىراق پاۋىل ولاي ەتپەدى. سوندا وعان سەنىمىن دە، ٷمىتىن دە سوندىرمەۋگە نە كومەكتەستى؟
18. سىناق كەزىندە پاۋىل قالاي ارەكەت ەتتى؟
18 3) وي جۇگىرتىڭىز. پاۋىل قيىندىقتارىمەن قالاي كۇرەستى دەپ ويلانىپ كورىڭىز. ول ٶلىم جازاسىنا كەسىلگەلى جاتسا دا، ەڭ ماڭىزدى نارسەنى، ياعني ەحوبانى داڭقتاۋدى ۇمىتپادى. ول وزگەلەردى قالاي جىگەرلەندىرسەم ەكەن دەپ ويلادى. دۇعا ەتىپ، ەحوباعا ارقا سۇيەۋدى دە دوعارمادى (ٴتىم. 2-ح. 1:3). پاۋىل ونى تاستاپ كەتكەندەر جايلى قايتا-قايتا ويلاي بەرمەدى. ودان دا كومەك كورسەتىپ، قولداپ جۇرگەن ادال دوستارىنا شەكسىز ريزاشىلىعىن ٴبىلدىرۋدى ويلادى. بۇعان قوسا، ول قۇداي ٴسوزىن ۇزبەي زەرتتەي بەردى (ٴتىم. 2-ح. 3:16، 17؛ 4:13). ال ەڭ باستىسى، ەحوبا مەن يسا ونى قاتتى جاقسى كورەتىنىنە جانە ەشقاشان تاستاپ كەتپەيتىنىنە نىق سەنىمدى بولدى. ولار پاۋىلدىڭ ادال ەڭبەگىن باعالاپ، بولاشاقتا بۇل ٷشىن مىندەتتى تۇردە سي بەرمەك ەدى.
19. ەحوبا پاۋىلعا قالاي كومەكتەستى؟
19 ەحوبا پاۋىلدى ٴماسىحشى بولعانى ٷشىن قۋعىن-سۇرگىن كورەتىنىن الدىن الا ەسكەرتتى (ەل. ٸس. 21:11—13). ول پاۋىلعا قالاي كومەكتەستى؟ ەحوبا پاۋىلدىڭ دۇعالارىنا جاۋاپ بەرىپ، قاجەت كەزدە كۇش بەرىپ وتىردى (ٴتىم. 2-ح. 4:17). سونداي-اق ەحوبا وعان بار كۇشىمەن ۇمتىلعان سيىنا مىندەتتى تۇردە يە بولاتىنىن ايتتى. ەحوبا پاۋىلعا ادال دوستارى ارقىلى دا كومەكتەسىپ، قاجەتىمەن قامدادى.
20. پاۋىلدىڭ ريمدىكتەرگە 8:38، 39 دا بىلدىرگەن سەنىمىن ٴبىز قالاي ۇلگى ەتە الامىز؟
20 4) قولدانىڭىز. مەن ەلشى پاۋىلعا قالاي ەلىكتەي الامىن دەپ ويلانىڭىز. پاۋىل سياقتى ٴبىز دە سەنىمىمىز ٷشىن قۋعىندالۋعا دايىن بولۋىمىز كەرەك (مار. 10:29، 30). سىناقتا ادالدىق ساقتاپ قالۋ ٷشىن ەحوباعا دۇعا ەتىپ، ارقا سۇيەۋىمىز جانە ونىڭ ٴسوزىن وقىپ-زەرتتەۋدى دوعارماۋىمىز قاجەت. ٴبىز ٷشىن ومىردە ەڭ ماڭىزدى جايتتاردىڭ ٴبىرى — ەحوبانى داڭقتاۋ ەكەنىن دە ۇمىتپاعانىمىز ٴجون. سونىمەن قاتار مىناعان نىق سەنىمدى بولايىق: ەحوبا ٴبىزدى ەشقاشان تاستاپ كەتپەيدى، ٵرى ونىڭ سۇيىسپەنشىلىگىنەن ٴبىزدى ەشكىم ايىرا المايدى (ريمدىكتەرگە 8:38، 39 وقىڭىز؛ ەۆر. 13:5، 6).
قۇدايدىڭ وزگە دە ادال قىزمەتشىلەرىنەن ۇيرەنەيىك
21. ايا مەن گەكتورعا قيىندىقتارىمەن كۇرەسۋگە نە كومەكتەستى؟
21 قانداي قيىندىققا كەزىكپەيىك، كيەلى كىتاپتاعى كەيىپكەرلەردىڭ وقيعالارى بىزگە كۇش بەرە الادى. مىسالى، جاپونيادا تۇراتىن ايا دەگەن ٸزاشار كوپشىلىك ورىنداردا ۋاعىزداۋعا قاتتى قورىققان. وسى قورقىنىشىن جەڭۋگە وعان ٴجۇنىستىڭ وقيعاسى كومەكتەسكەن ەكەن. يندونەزيادا تۇراتىن گەكتور ەسىمدى جاس جىگىتتىڭ اتا-اناسى ەحوباعا قىزمەت ەتپەگەن. ٴبىراق وعان رۋتتىڭ وقيعاسى اسەر ەتكەندىكتەن، ەحوبا تۋرالى ٴبىلىم الۋدى، وعان قىزمەت ەتۋدى شەشكەن.
22. كيەلى كىتاپ درامالارىنىڭ نەمەسە «سەنىمىن سەرىك ەتكەندەر» ايدارىنداعى ماقالالاردىڭ بارىنشا پايداسىن كورۋ ٷشىن نە ىستەي الاسىز؟
22 بىزگە ۇلگى بولاتىن كيەلى كىتاپ كەيىپكەرلەرى جايلى كوبىرەك مالىمەتتى قايدان تاپساق بولادى؟ بىزدە كيەلى كىتاپ وقيعالارىنا جان بىتىرەتىن كوپتەگەن بەينەماتەريالدار مەن اۋديودرامالار بار. «سەنىمىن سەرىك ەتكەندەر» دەگەن ايدارىمىز دا بار *. جان-جاقتى زەرتتەلىپ، دايىندالعان وسى مالىمەتتەردى وقىپ، تىڭداپ، كورمەس بۇرىن، ەحوباعا دۇعا ايتىڭىز. ماعان كومەك بولاتىن تۇستارىن كورە الايىنشى دەپ سۇراڭىز. ٶزىڭىزدى سول وقيعاداعى كەيىپكەردىڭ ورنىنا قويىپ كورىڭىز. سول ادال قىزمەتشىلەر قيىندىقتارىنا توتەپ بەرۋ ٷشىن نە ىستەگەنى جانە ەحوبا ولارعا قالاي كومەكتەسكەنى تۋرالى ويلانىڭىز. كەيىن، وسى تۇيگەندەرىڭىزدى ومىردە قولدانىڭىز. ەحوباعا كومەكتەسىپ كەلە جاتقانى ٷشىن العىس ايتىڭىز. ونىڭ كومەگىن باعالايتىنىڭىزدى باسقا ادامدارعا كومەكتەسىپ، تىرەك بولۋىڭىزبەن كورسەتىڭىز.
23. يشايا 41:10، 13 كە ساي، ەحوبا بىزگە نەنى ۋادە ەتەدى؟
23 شايتان بيلەگەن مىنا دۇنيە ەشكىمگە وڭاي سوعىپ جاتقان جوق. كەيدە قيىنشىلىقتاردان ٴتىپتى باس كوتەرە الماي قالامىز (ٴتىم. 2-ح. 3:1). ٴبىراق ۋايىمعا سالىنىپ، ۇرەيگە بوي الدىرۋدىڭ قاجەتى جوق. ويتكەنى ەحوبا قانداي كۇي كەشىپ جۇرگەنىمىزدىڭ ٴبارىن كورىپ تۇر. قۇلاپ قالساق، ول مىقتى وڭ قولىمەن ٴبىزدى سۇيەمەلدەيدى (يشايا 41:10، 13 وقىڭىز). ەحوبادان جانە جازبالاردان الاتىن كۇشتىڭ ارقاسىندا ٴبىز كەز كەلگەن قيىندىقتان وتە الاتىنىمىزعا نىق سەنىمدىمىز!
96-ٵن قۇدايدىڭ بەرگەن قازىناسى
^ 5-ابزاس كيەلى كىتاپتاعى كوپ وقيعادان ەحوبا ٶز قىزمەتشىلەرىن جاقسى كورەتىنىن جانە قيىن شاقتا ٵردايىم كومەكتەسەتىنىن بىلۋگە بولادى. سول وقيعالاردان ۇيرەنۋ ٷشىن جەكە زەرتتەۋدى قالاي جاساۋعا بولاتىنىن كورەيىك.
^ 2-ابزاس وسى ماقالادا كيەلى كىتاپتى زەرتتەۋدىڭ ٴبىر عانا ۇلگىسى ۇسىنىلعان. باسقا ۇلگىلەرىن كورۋ ٷشىن «ەحوبا كۋاگەرلەرىنىڭ ىزدەنىس قۇرالىنا» (حانزۇشا) كىرىپ، «كيەلى كىتاپ» دەگەن تاقىرىپتاعى «كيەلى كىتاپتى وقۋ جانە ٴتۇسىنۋ» دەگەن تاقىرىپشانى قاراڭىز.
^ 14-ابزاس بۇل تارماقتاردى قاۋىمدا «كۇزەت مۇناراسىن» زەرتتەپ جاتقاندا وقۋدىڭ قاجەتى جوق.
^ 22-ابزاس JW.ORG تور بەكەتىمىزدەگى «سەنىمىن سەرىك ەتكەندەر. كيەلى كىتاپتاعى ەرلەر مەن ايەلدەر» دەگەن ماقالالار توپتاماسىن قاراڭىز (كيەلى كىتاپ تالىمدەرى > قۇدايعا دەگەن سەنىم دەگەن جەردە).
