35-زەرتتەۋ ماقالاسى
ٴبىر-ٴبىرىڭدى نىعايتا بەرىڭدەر!
«ٴبىر-ٴبىرىڭدى جۇباتىپ، نىعايتىپ جۇرگەندەرىڭدەي، ٵرى قاراي دا سولاي ەتە بەرىڭدەر» (سال. 1-ح. 5:11).
90-ٵن ٴبىر-ٴبىرىمىزدى جىگەرلەندىرەيىك
اڭداتپا *
1. سالونيكالىقتارعا 1-حات 5:11 گە ساي، بارلىعىمىز قانداي جوباعا قاتىسىپ ٴجۇرمىز؟
قاۋىممەن بىرگە پاتشالىق سارايىنىڭ قۇرىلىس جوباسىنا قاتىسقان كەزىڭىز بولعان با؟ سۋ جاڭا پاتشالىق سارايىندا باۋىرلاستارمەن بىرگە جينالىپ ٵن ايتقاندا، جۇرەگىمىز تولقىپ، كوزىمىزگە جاس كەلگەن شىعار. ٴبارىمىز جۇمىلا تۇرعىزعان بۇل عيمارات ەحوباعا ماداق اكەلەتىنى ٴسوزسىز! بىراق بىلەسىز بە، ەحوبانى بۇدان دا اسقان ماداققا بولەيتىن تاعى ٴبىر «قۇرىلىس» جوباسى بار. ەلشى پاۋىل سالونيكالىقتارعا 1-حات 5:11 دە ماسىحشىلەردى وسىنداي جوباعا قاتىسۋعا شاقىرعان (وقىڭىز). ول: «ٴبىر-ٴبىرىڭدى... نىعايتىپ جۇرگەندەرىڭدەي، ٵرى قاراي دا سولاي ەتە بەرىڭدەر»،— دەگەن. مۇنداعى «نىعايتۋ» ٴسوزى گرەك تىلىندە «سوعۋ»، «تۇرعىزۋ» دەگەن ماعىنانى دا بىلدىرەدى.
2. وسى ماقالادا نەنى قاراستىرامىز؟
2 ەلشى پاۋىل باۋىرلاستارعا جاناشىر بولۋدىڭ، ولاردى نىعايتۋدىڭ جاقسى ۇلگىسىن قالدىرىپ كەتكەن. وسى ماقالادا پاۋىل باۋىرلاستارعا 1) قيىندىققا توتەپ بەرۋگە، 2) ٶزارا تاتۋ بولۋعا قالاي كومەكتەسكەنىن جانە 3) ەحوباعا دەگەن سەنىمدەرىن قالاي نىعايتقانىن كورەمىز. سوندا ٴبىز دە ەلشى پاۋىلعا ەلىكتەپ، باۋىرلاستارىمىزدى نىعايتا الامىز (قور. 1-ح. 11:1).
پاۋىل باۋىرلاستارعا قيىندىققا توتەپ بەرۋگە كومەكتەستى
3. قالاي پاۋىل تەپە-تەڭدىك ساقتاعان؟
3 ەلشى پاۋىل باۋىرلاستارىن قاتتى جاقسى كورگەن. قيىندىققا كەزىككەندەرىن اياپ، ولارعا جانى اشىعان، سەبەبى ٶزى دە تالاي قيىندىق كورگەن. مىسالى، ونىڭ اقشاسى تاۋسىلىپ قالىپ، ٶزىن جانە قاسىنداعى سەرىكتەرىن قاجەتىمەن قامتاماسىز ەتۋ ٷشىن جۇمىس تابۋ كەرەك بولعان (ەل. ٸس. 20:34). ونىڭ كاسىبى شاتىر جاساۋ ەدى. پاۋىل قورىنت قالاسىنا كەلگەندە، اقيلا جانە پريسكيلامەن بىرگە شاتىر جاساپ، جۇمىس ىستەپ ٴجۇردى. بىراق ول «ٵر دەمالىس كۇنى» ياھۋديلەر مەن گرەكتەرگە ۋاعىزدايتىن. ال كەيىن قاستارىنا سيلاس پەن تىموتە كەلگەندە، «پاۋىل ٶزىن تولىعىمەن قۇداي ٴسوزىن ۋاعىزداۋعا ارنادى» (ەل. ٸس. 18:2—5). ومىرىندە قانداي جاعداي بولماسىن، ول ٶزىنىڭ ەڭ نەگىزگى ماقساتىن — ەحوباعا قىزمەت ەتۋدى ۇمىتپادى. سوندىقتان پاۋىل باۋىرلاستاردى «نەنىڭ ماڭىزدىراق ەكەنىن» ۇمىتپاۋعا ەركىن تالپىندىرا الدى. ول ٶمىردىڭ اۋىرتپالىعىن كوتەرەمىن دەپ جانە وتباسىن اسىرايمىن دەپ، عيباداتتى ىسىرىپ تاستاماۋدى ەسكەرتكەن (ٴفىلىپ. 1:10).
4. پاۋىل مەن تىموتە قۋعىنعا كەزىككەن باۋىرلاستاردى قالاي نىعايتتى؟
4 سالونيكا قالاسىندا قاۋىم قۇرىلعان سوڭ، ونداعى شىندىققا جاڭادان كەلگەن باۋىرلاستار اياۋسىز قۋدالاندى. اشۋعا مىنگەن قالىڭ توبىر پاۋىل مەن سيلاستى تاپپاعان سوڭ، كەيبىر باۋىرلاستاردى قالا اكىمدەرىنە سۇيرەپ اپارىپ: «بۇلاردىڭ ٴبارى يمپەراتوردىڭ جارلىقتارىنا قارسى شىعىپ ٴجۇر»،— دەپ ايقايلايدى (ەل. ٸس. 17:6، 7). ٶز قالاسىنىڭ تۇرعىندارى وزدەرىنە تاپ بەرگەندە، الگى شىندىققا جاڭادان كەلگەن باۋىرلاستاردىڭ نە سەزىنگەندەرىن ويلاپ كورىڭىزشى! پاۋىل ولاردىڭ قورقىپ، جاسىپ، قىزمەتتەرىن باسەڭدەتكەندەرىن قالامادى. سيلاس ەكەۋى ول جەردەن كەتىپ قالسا دا، پاۋىل جاس قاۋىمنىڭ قاناتىن قاتايتۋدى ويلادى. سوندىقتان ولارعا: «قۇدايدىڭ قىزمەتشىسى تىموتەنى سەنىمدەرىڭ بەرىك بولۋ ٷشىن سەندەردى نىعايتسىن، جۇباتسىن دەپ جىبەردىك. سوندا وسى قيىندىقتار ەشقايسىسىڭدى شايقالتپايدى»،— دەپ جازدى (سال. 1-ح. 3:2، 3). كەزىندە تىموتەنىڭ تۋعان قالاسى ليسترادا باۋىرلاستار قۋعىندالعاندا، اراسىندا تىموتە دە بولسا كەرەك. ول كەيىن پاۋىلدىڭ باۋىرلاستاردى قالاي نىعايتقانىن جانە ەحوبا بۇعان قالاي باتاسىن بەرگەنىن كوردى. وسىنىڭ ٴبارىن باستان وتكەرگەندىكتەن، تىموتە سالونيكاداعى باۋىرلاستاردى جاعدايلارى وڭالاتىنىنا سەندىرە الدى (ەل. ٸس. 14:8، 19—22؛ ەۆر. 12:2).
5. ٴبىر اقساقالدىڭ كومەگى براينت باۋىرلاسقا قالاي اسەر ەتتى؟
5 ەلشى پاۋىل باۋىرلاستارىن تاعى قانداي جولمەن نىعايتتى؟ ليسترا، يقونيا مەن انتيوحياعا قايتا بارعاندا، پاۋىل مەن بارنابا «ٵر قاۋىمعا اقساقالدار تاعايىندادى» (ەل. ٸس. 14:21—23). ٴبىزدىڭ كەزىمىزدەگى اقساقالدار ىسپەتتى، سول تاعايىندالعان باۋىرلاستار دا ٶز قاۋىمدارى ٷشىن ناعىز جۇبانىش بولدى. وسىنداي جۇبانىشتى سەزىنگەن براينت دەگەن ٴبىر ەر باۋىرلاس بىلاي دەيدى: «ون بەس جاسىمدا اكەم ٴبىزدى تاستاپ كەتتى. ال انام بولسا قاۋىمنان شىعارىلدى. جانىم سىزداپ اۋىرىپ، ٶزىمدى تاستاندى بالا سەزىندىم. بىراق قاۋىمداعى توني دەگەن ٴبىر اقساقال قاۋىم كەزدەسۋىندە دە، باسقا كەزدە دە مەنى اڭگىمەگە تارتىپ، كوڭىل ٴبولىپ ٴجۇردى. ول ماعان قيىندىققا كەزىككەندە دە باقىتتى بولا بىلگەن ادامدار جايلى ايتىپ بەردى. مىسالى، ٴزابۇر 27:10 دى كورسەتىپ، ەزەكيا جايلى ايتاتىن. اكەسى جاقسى ۇلگى كورسەتپەسە دە، ەزەكيا ەحوباعا ادال بولىپ قالعان». مۇنداي كومەك براينت باۋىرلاسىمىزعا قالاي اسەر ەتتى؟ «تونيدىڭ جىگەر بەرگەنىنىڭ ارقاسىندا مەن تولىق ۋاقىتتى قىزمەت ەتۋدى باستادىم. بۇل ٸس ماعان ۇلكەن قاناعات سيلايدى»،— دەيدى ول. قىمباتتى اقساقالدار، براينت سياقتى «جاقسى سوزگە» مۇقتاج جاندارعا كومەكتەسۋگە اسىق بولىڭىزدار (ناق. س. 12:25).
6. پاۋىل باۋىرلاستارىن تاعى قالاي نىعايتتى؟
6 پاۋىل ەحوبانىڭ كۇشىمەن ٴتۇرلى قيىنشىلىقتارعا توتەپ بەرگەن «بۇلت ىسپەتتى كوپ كۋاگەر» جايلى ايتقان (ەۆر. 12:1). ويتكەنى ولاردىڭ وقيعالارى باۋىرلاستاردىڭ بويىنا باتىلدىق قۇياتىنىن جانە «ٴتىرى قۇدايدىڭ قالاسىنا» نازار تىگۋگە كومەكتەسەتىنىن بىلگەن (ەۆر. 12:22). راسىندا دا، ەحوبا گەدەون، باراق، ٴداۋىت پەن سامۋيل سياقتى قىزمەتشىلەرىنە قالاي كومەكتەسكەنىن وقىعاندا، ٴبارىمىز دە جىگەرلەنىپ قالامىز (ەۆر. 11:32—35). ال ٴبىزدىڭ كەزىمىزدەگى ادال كۋاگەرلەردىڭ ۇلگىسى جايلى نە ايتۋعا بولادى؟ ولاردىڭ ٶمىرباياندارىن وقىعاننان كەيىن كوپ باۋىرلاستاردىڭ سەنىمى اجەپتەۋىر نىعايىپ قالعان. مۇنى باس باسقارماعا جان-جاقتان كەلىپ ٴتۇسىپ جاتقان ريزاشىلىق حاتتارى راستايدى.
پاۋىل تاتۋلىق ساقتاۋىمەن ۇلگى بولدى
7. پاۋىلدىڭ ريمدىكتەرگە 14:19—21-تارماقتاردا جازىلعان كەڭەسىنەن نە ۇيرەندىڭىز؟
7 قاۋىمنىڭ تاتۋلىعىنا سوزىمىزبەن دە، ىسىمىزبەن دە ۇلەس قوساتىن بولساق، باۋىرلاستاردى نىعايتامىز. كەيدە ويىمىز ٴبىر جەردەن شىقپاي جاتادى. بىراق بۇنىڭ بىرلىگىمىزدى بۇزۋىنا جول بەرمەيمىز. ەگەر وزگەنىڭ كوزقاراسى كيەلى كىتاپ پرينسيپتەرىنە قايشى بولماسا، ٶز دەگەنىمىزدە قاتىپ تۇرىپ المايمىز. ٴبىرىنشى عاسىردا ريم قالاسىنداعى قاۋىمدا بولعان جاعدايدى الايىقشى. بۇل قاۋىم ياھۋديلەردەن جانە باسقا ۇلت ادامدارىنان قۇرالعان ەدى. مۇسا زاڭى كۇشىن جويعاندىقتان، ەۆرەي باۋىرلاستاردىڭ كەيبىرى تاعامداردىڭ بارلىق ٴتۇرىن جەي باستايدى. ال باسقالارى بولسا كەزىندە مۇسا زاڭى تيىم سالعان تاعامداردى جەۋدى ٵلى دە دۇرىس ەمەس دەپ ەسەپتەيتىن (مار. 7:19). قاۋىم وسىلايشا ەكىگە ٴبولىنىپ كەتتى. سول كەزدە پاۋىل: «ەندەشە ەت جەمەگەنىڭ، نە شاراپ ىشپەگەنىڭ، نە باۋىرلاسىڭدى سۇرىندىرەتىن باسقا دا نارسەلەردى ىستەمەگەنىڭ جاقسى»،— دەپ تاتۋلىقتىڭ الدەقايدا ماڭىزدى ەكەنىن كورسەتتى (ريمدىكتەرگە 14:19—21 وقىڭىز). وسىلاي ول داۋ-دامايدىڭ جەكە باۋىرلاستارعا دا، بۇكىل قاۋىمعا دا زياندى ەكەنىن تۇسىندىرگىسى كەلدى. باسقالاردى سۇرىندىرمەس ٷشىن پاۋىلدىڭ ٶزى دە وزگەرۋگە دايىن بولعان (قور. 1-ح. 9:19—22). جەكە كوزقاراسىمىز بەن تالعامدارىمىزعا بولا داۋلاسپايتىن بولساق، قاۋىمىمىز نىعايىپ، تاتۋلىعىمىزدىڭ قايماعى بۇزىلمايدى.
8. قاۋىمنىڭ تاتۋلىعىنا قاۋىپ تونگەندە، پاۋىل قالاي ارەكەت ەتتى؟
8 ٴبىرىنشى عاسىرداعى قاۋىمدا ٴبىر ۇلكەن ماسەلەگە قاتىستى كەلىسپەۋشىلىك تۋىنداعاندا، پاۋىل ونى قالاي تاتۋلىق ساقتاي وتىرىپ شەشكەنىن كورەيىك. كەيبىر ماسىحشىلەر جۇرتتىڭ سوزىنەن قورقىپ، ەۆرەي ەمەس باۋىرلاستار سۇندەتتەلسىن دەپ تالاپ ەتتى (عال. 6:12). بۇنىمەن ٷزىلدى-كەسىلدى كەلىسپەسە دە، پاۋىل ٶز دەگەنىندە تۇرىپ الماي، بۇل ماسەلەنى يەرۋساليمدەگى اقساقالدار مەن ەلشىلەرگە تاپسىردى (ەل. ٸس. 15:1، 2). ونىڭ وسىنداي كىشىپەيىلدىلىگىنىڭ ارقاسىندا قاۋىمنىڭ تاتۋلىعى بۇزىلماي، باۋىرلاستار دا قۋانىشتارىن ساقتاپ قالدى (ەل. ٸس. 15:30، 31).
9. ەلشى پاۋىلعا قالاي ەلىكتەسەك بولادى؟
9 ٴبىزدىڭ ارامىزدا دا كۇردەلى كەلىسپەۋشىلىك تۋىنداعاندا، ەحوبا قاۋىمدى قامقورلاۋ ٷشىن تاعايىنداعان اقساقالدارعا جۇگىنسەك، قاۋىمدا تاتۋلىق بولادى. سونداي-اق ٴبىز كيەلى كىتاپقا نەگىزدەلگەن اقىل-كەڭەستى ادەبيەتتەرىمىزدەن نە ۇيىم بەرىپ جاتقان باسشىلىقتان تابا الامىز. ٶز ويىمىزدى العا تارتپاي، سول نۇسقاۋلاردى ۇستانساق، قاۋىمنىڭ ىنتىماق-بىرلىگى ارتادى.
10. قاۋىمنىڭ ىنتىماعى بەرىك بولۋ ٷشىن پاۋىل تاعى نە ىستەدى؟
10 پاۋىل قاۋىمداعى تاتۋلىقتىڭ ۇيىتقىسى بولۋ ٷشىن تاعى نە ىستەدى؟ ول باۋىرلاستاردىڭ قاتەلىكتەرىنەن گورى جاقسى جاقتارىن كوبىرەك ايتتى. مىسالى، ريمدىكتەرگە جازعان حاتىن الايىقشى. حاتىنىڭ سوڭىندا ول كوپ باۋىرلاستاردىڭ ەسىمدەرىن اتاپ، ولار تۋرالى جىلى دا جاعىمدى سوزدەر ايتقان. پاۋىلعا ەلىكتەپ، ٴبىز دە باۋىرلاستاردىڭ جاقسى جاقتارىن ايتۋعا اسىق بولايىق. سوندا باۋىرلاستار ٴبىر-ٴبىرىن ودان سايىن جاقسى كورىپ، دوستىقتارى نىعايادى.
11. ارامىزدا كەلىسپەۋشىلىكتەر تۋعاندا نە ىستەۋىمىز قاجەت؟
11 كەيدە تولىسقان ماسىحشىلەر دە ٶزارا كەلىسپەي، سوزگە كەلىپ قالۋى مۇمكىن. وسىنداي جاعداي پاۋىل مەن بارنابانىڭ اراسىندا بولدى. بۇل ەكى دوس ەندىگى ميسسيونەرلىك ساپارلارىندا مارقانى وزدەرىمەن بىرگە الامىز-المايمىز دەپ قاتتى داۋلاسىپ قالدى. سودان «ٴبىر-بىرىنە قاتتى اشۋلانىپ»، ەكەۋى ەكى جاققا كەتتى (ەل. ٸس. 15:37—39). بىراق كەيىن مارقا ۇشەۋى قاۋىمنىڭ بىرلىگىن جوعارى قويىپ، دوستىقتارىن قايتا قالپىنا كەلتىردى. بۇعان پاۋىلدىڭ بارنابا مەن مارقا جايلى ايتقان جاقسى سوزدەرى دالەل (قور. 1-ح. 9:6؛ قول. 4:10). ٴبىز دە باۋىرلاستارمەن ارامىزدا قانداي كەلىسپەۋشىلىك بولماسىن — بارلىعىن شەشىپ، ولاردىڭ جاقسى قاسيەتتەرىنە نازار اۋدارا بەرەيىك. سوندا بىرلىگى مەن ىنتىماعى جاراسقان قاۋىم بولامىز (ەفەس. 4:3).
پاۋىل باۋىرلاستاردىڭ سەنىمىن نىعايتتى
12. باۋىرلاستار قانداي قيىندىقتارعا كەزىگىپ ٴجۇر؟
12 باۋىرلاستاردى نىعايتۋدىڭ تاعى ٴبىر جولى — ولاردىڭ ەحوباعا دەگەن سەنىمىن ٶسىرۋ. ويتكەنى كەيبىر باۋىرلاستارىمىز ۇيدە، مەكتەپتە، جۇمىستا سەنىمدەرىنە بولا كەلەكە-مازاققا ۇشىرايدى. باسقالارىنىڭ سەزىمدەرى جارالى نەمەسە اۋىر سىرقاتتارى بار. ال شىندىقتا جۇرگەنىنە ٴبىرتالاي جىل بولعان باۋىرلاستار بولسا وسى دۇنيەنىڭ سوڭىن كۇتە-كۇتە سارعايعان شىعار. بۇل جاعدايلار ماسىحشىلەر ٷشىن ناعىز سىناق بولۋى مۇمكىن. ٴبىرىنشى عاسىرداعى قاۋىمدا دا وسىنداي قيىندىقتار بولعان. ەندەشە ەلشى پاۋىل ولاردىڭ سەنىمدەرىن قالاي نىعايتقانىن قاراستىرايىق.
ەلشى پاۋىلدان ۇلگى الىپ، باۋىرلاستاردى قالاي نىعايتساق بولادى؟ (13 ابزاستاردى قاراڭىز) *
13. پاۋىل باۋىرلاستارعا ٶز سەنىمدەرىن قورعاپ سويلەۋگە قالاي كومەكتەستى؟
13 پاۋىل باۋىرلاستاردىڭ سەنىمىن نىعايتۋ ٷشىن جازبالاردى قولدانعان. ٴبىرىنشى عاسىرداعى ەۆرەي باۋىرلاستار ٴيۋدايزمدى ۇستاناتىن تۋىستارىنىڭ تاراپىنان قارسىلىققا ۇشىراعان. تۋىستارى ماسىحشىلىكتى سىناپ-مىنەپ، قارسى پىكىر جاۋدىرىپ جاتقاندا، ولار نە ايتارلارىن بىلمەي ساسىپ قالعان شىعار. بىراق پاۋىلدىڭ ەۆرەيلەرگە جازعان حاتى ولاردىڭ سەنىمىن قاتايتىپ تاستاعانى ٴسوزسىز (ەۆر. 1:5، 6؛ 2:2، 3؛ 9:24، 25). باۋىرلاستار حاتتاعى قيسىندى ويلار مەن مىقتى دالەلدەردى پايدالانىپ، قارسى جاقتىڭ پىكىرلەرىن تالقانداي العان. ٴبىزدىڭ باۋىرلاستار دا قيسىندى دالەلدەرمەن سەنىمدەرىن قورعاي الۋلارى ٷشىن، ولارعا كيەلى كىتاپقا نەگىزدەلگەن ادەبيەتتەردى قولدانۋدى ۇيرەتە الامىز. مىسالى، مەكتەپتە وقيتىن جاس باۋىرلاسىمىزدى ەۆوليۋسياعا ەمەس، قۇدايعا سەنەتىنى ٷشىن كۇلكى ەتەتىن بولار. سونداي دا ٴبىز وعان «تىرشىلىك وزدىگىنەن پايدا بولدى ما؟» جانە «تىرشىلىكتىڭ باستاۋى. بەس ماڭىزدى سۇراق» كىتاپشالارىنان قاجەتتى اقپاراتتى تابۋعا كومەكتەسە الامىز. سوندا جاس باۋىرلاسىمىز ٶز سەنىمىن باتىل تۇسىندىرە الادى.
ەلشى پاۋىلدان ۇلگى الىپ، باۋىرلاستاردى قالاي نىعايتساق بولادى؟ (14 ابزاستاردى قاراڭىز) *
14. ٴتالىم بەرۋ مەن ۋاعىز ىسىندە كوپ ەڭبەكتەنسە دە، پاۋىل نەنى ۇمىتپاعان؟
14 پاۋىل باۋىرلاستاردى «يگى ىستەرىمەن» سۇيىسپەنشىلىك كورسەتۋگە تالپىندىردى (ەۆر. 10:24). ونىڭ ٶزى دە ٸس جۇزىندە كومەك كورسەتۋىمەن ۇلگى بولعان. مىسالى، ياھۋدەيادا اشتىق جايلاعاندا، پاۋىل سول جەردەگى ماسىحشىلەرگە كەرەك-جاراعىن جەتكىزگەن (ەل. ٸس. 11:27—30). ۋاعىزداۋ مەن ٴتالىم بەرۋ ىسىنەن قولى بوساماسا دا، ول مۇقتاج باۋىرلاستارعا جاردەم بەرۋگە ٵرقاشان ۋاقىت تاپقان (عال. 2:10). وسىلايشا، ەحوبا قامدارىن ويلايتىنىنا دەگەن سەنىمدەرىن نىعايتقان. ٴبىز دە ۋاقىتىمىز، كۇشىمىز بەن قابىلەتتەرىمىزدى اياماي، ٴتۇرلى اپاتتاردان زارداپ شەككەن باۋىرلاستارعا كومەكتەسسەك، ولاردىڭ سەنىمدەرىن نىعايتامىز. بۇنى دۇنيەجۇزىلىك ىسكە ساداقا جاساۋ ارقىلى دا ىستەي الامىز. باۋىرلاستار وسى جانە باسقا دا يگى ىستەرىمىزدى كورىپ، ەحوبا ەشقاشان تاستامايتىنىنا ودان سايىن سەنىمدى بولادى.
ەلشى پاۋىلدان ۇلگى الىپ، باۋىرلاستاردى قالاي نىعايتساق بولادى؟ (15، 16 ابزاستاردى قاراڭىز) *
15، 16. سەنىمى السىرەگەن جاندارعا قالاي كومەكتەسسەك بولادى؟
15 پاۋىل سەنىمى السىرەپ قالعانداردان ٷمىتىن ۇزبەگەن. پاۋىل ولارعا جاناشىرلىقپەن قاراپ، كوڭىلدەرىن جايلاندىراتىنداي جىلى ۇنمەن سويلەگەن (ەۆر. 6:9؛ 10:39). مىسالى، ەۆرەيلەرگە جازعان حاتىندا ول «ٴبىز» دەگەن ٴسوزدى كوپ قولدانعان. وسىلاي سول جەردەگى كەڭەستەردىڭ وزىنە دە قاتىستى ەكەنىن كورسەتكەن (ەۆر. 2:1، 3). ەلشى پاۋىلدى ۇلگى تۇتىپ، ٴبىز دە سەنىمى السىرەگەندەردەن كۇدەر ۇزبەيىك. ولاردىڭ جاعدايلارىن ٴبىلىپ، شىن جۇرەكتەن كوڭىل بولەيىك. نە ايتساق تا، جىلى، جۇمساق ۇنمەن جەتكىزەيىك. سوندا سەنىمدەرىن نىعايتامىز جانە ولاردى ٵلى دە جاقسى كورەتىنىمىزدى كورسەتەمىز.
16 پاۋىل باۋىرلاستاردىڭ جاقسى ىستەرىن ەحوبا بىلەتىنىنە جانە ۇمىتپايتىنىنا سەندىرگەن (ەۆر. 10:32—34). سەنىمى السىرەگەن باۋىرلاسقا كوڭىل ٴبولىپ جۇرگەندە، ٴبىز دە وسىلاي ىستەسەك بولادى. ودان شىندىققا قالاي كەلگەنى جانە ەحوبانىڭ قولداۋىن سەزىنگەن كەزدەرى جايلى ايتىپ بەرۋدى سۇرايىق. وسى اڭگىمەنى پايدالانىپ: «ەحوبانى قالاي جاقسى كورگەنىڭدى ول ەشقاشان ۇمىتپايدى جانە الدا دا سەنى ەش تاستامايدى»،— دەپ سەندىرەيىك (ەۆر. 6:10؛ 13:5، 6). وسىلاي اياۋلى باۋىرلاسىمىزدىڭ ەحوباعا ٵرى قاراي دا قىزمەت ەتۋگە ىقىلاسىن وياتا الامىز.
«ٴبىر-ٴبىرىڭدى نىعايتا... بەرىڭدەر»
17. ٴبىز قاي جاعىنان جاقسارا تۇسسەك بولادى؟
17 قۇرىلىستا جۇرگەن سايىن قابىلەتىمىز شىڭدالا بەرەتىنىندەي، باۋىرلاستاردى نىعايتۋ جاعىنان دا شىڭدالا الامىز. قينالىپ جۇرگەن باۋىرلاستارعا بۇرىندا قيىندىققا توتەپ بەرگەندەردىڭ مىسالىن كەلتىرىپ، ولاردى جىگەرلەندىرەيىك. ٴبىر-ٴبىرىمىزدىڭ جاقسى جاقتارىمىزدى ايتىپ، قاۋىمنىڭ تاتۋلىعىن نىعايتايىق. ال تاتۋلىعىمىزعا قاۋىپ تونگەندە، ونى كوزىمىزدىڭ قاراشىعىنداي ساقتاپ قالايىق. ويىمىز ٴبىر جەردەن شىقپاي، كەلىسپەي قالعان بولساق، تاتۋلىقتى تەز قالپىنا كەلتىرەيىك. سونداي-اق جازبالارداعى ويلار ارقىلى، ٸس جۇزىندە كومەك بەرۋ ارقىلى جانە رۋحاني السىرەپ قالعانداردى دەمەۋ ارقىلى باۋىرلاستاردىڭ سەنىمدەرىن نىعايتايىق.
18. ٴسىز نە نارسەگە بەكىندىڭىز؟
18 تەوكراتيالىق قۇرىلىس جوباسىنا قاتىسۋ باقىت پەن قاناعات اكەلەدى. ٴدال سولاي، قاۋىمداعى «قۇرىلىس جوباسىنا» قاتىسقانىمىز، ياعني باۋىرلاستاردى نىعايتقانىمىز بىزگە باقىت پەن قاناعات سيلايدى. الايدا ۋاقىت وتە ەسكىرىپ قالاتىن عيماراتتاردان ايىرماشىلىعى — ٴبىز اتقارعان ٸسىمىزدىڭ ناتيجەسىن ماڭگى كورەمىز. ەندەشە، «ٴبىر-ٴبىرىمىزدى جۇباتىپ، نىعايتا بەرۋگە» تاستاي بەكىنەيىك! (سال. 1-ح. 5:11).
100-ٵن قوناقجاي بولىڭدار
^ مىنا قيىن زاماندا ٶمىر ٴسۇرۋ كىم-كىمگە دە وڭاي ەمەس. ٴتۇرلى قيىنشىلىقتار باۋىرلاستاردىڭ القىمىنان الىپ، جان-جاقتان قىسپاقتاۋدا. ولاردى جىگەرلەندىرۋدىڭ امالىن تاپساق، كومەگىمىزگە شەكسىز ريزا بولارى ٴسوزسىز. وسى ورايدا، ەلشى پاۋىل بىزگە قانداي ۇلگى قالدىرعانىنا نازار اۋدارايىق.
^ سۋرەت سيپاتتاماسى: اكەسى ادەبيەتتەرىمىزدەگى ويلاردى پايدالانىپ، جاڭا جىلدى نە ٷشىن تويلامايتىنىمىزدى قالاي تۇسىندىرۋگە بولاتىنىن قىزىنا ايتىپ جاتىر.
^ سۋرەت سيپاتتاماسى: ورتادا: ٴبىر ەرلى-زايىپتى باسقا ەلدە اپاتتان زارداپ شەككەندەرگە كومەكتەسىپ ٴجۇر.
^ سۋرەت سيپاتتاماسى: ٴبىر اقساقال سەنىمى السىرەپ قالعان ەر باۋىرلاسپەن سويلەسىپ وتىر. وعان ىزاشارلىق قىزمەت مەكتەبىندە وقىعان كەزدەرىندە تۇسكەن سۋرەتتەردى كورسەتىپ، بىرگە وتكىزگەن باقىتتى شاقتارىن ەسىنە ٴتۇسىردى. ەر باۋىرلاس ەحوباعا قىزمەت ەتكەندەگى قۋانىشىن اڭساپ، كەيىن قاۋىمعا قايتا كەلە باستادى.
