36-زەرتتەۋ ماقالاسى
ەحوبانىڭ حالقى ادىلدىكتى سۇيەدى
«ادىلدىكتى اڭساعاندار باقىتتى» (مات. 5:6).
9-ٵن ەحوبا — ٴبىزدىڭ پاتشامىز!
اڭداتپا *
1. ٴجۇسىپ قانداي سىناققا كەزىكتى جانە ول قالاي ارەكەت ەتتى؟
جاقىپتىڭ ۇلى ٴجۇسىپ ٴبىر قيىن جاعدايعا تاپ بولدى. قوجايىنى پوتيفاردىڭ ايەلى وعان: «مەنىمەن جات»،— دەدى. بىراق ٴجۇسىپ بۇل ۇسىنىستان باس تارتتى. كەيبىرەۋلەر: «ٴجۇسىپ نەگە باس تارتتى؟ پوتيفار ۇيدە جوق ەدى عوي. ونىڭ ۇستىنە، ٴجۇسىپ نەبارى سول ٷيدىڭ قۇلى ەدى. قوجايىنىنىڭ ايەلىنىڭ بەتىن قايتارسا، كەيىن ول ٴجۇسىپتىڭ ٶمىرىن كومىر قىلىپ جىبەرەدى عوي»،— دەپ ويلايتىن شىعار. بىراق ول ايەل كوندىرۋگە قانشا تىرىسسا دا، ٴجۇسىپ ەش كونبەدى. نەگە دەيسىز بە؟ ٴجۇسىپ: «قالايشا مەن وسىنداي اۋىر قىلمىس جاساپ، قۇداي الدىندا كۇناعا باتپاقپىن؟!»— دەدى (مۇس. 1-ج. 39:7—12).
2. ٴجۇسىپ ازعىندىقتىڭ قۇدايدىڭ الدىندا كۇنا ەكەنىن قايدان بىلگەن؟
2 «نەكە ادالدىعىن بۇزبا» دەپ جازىلعان مۇسا زاڭى ٴجۇسىپتىڭ زامانىنان شامامەن 200-جىلدان كەيىن جازىلعان (مۇس. 2-ج. 20:14). سوندا، قۇداي ازعىندىقتى «اۋىر قىلمىس» دەپ قاراستىراتىنىن ٴجۇسىپ قايدان بىلگەن؟ ول ەحوبانىڭ نيەتىنە ساي، نەكە تەك ٴبىر ەركەك پەن ٴبىر ايەلدىڭ اراسىندا عانا قۇرىلۋ كەرەكتىگىن جاقسى بىلگەن. سونداي-اق ۇلكەن اجەسى سارانىڭ ارى تاپتالماق بولعان ەكى جاعدايدا ەحوبا اراشا ٴتۇسىپ، ونىڭ ابىرويىن ساقتاپ قالعانىن ەستىسە كەرەك. ەحوبا ٴدال سولاي ٴجۇسىپتىڭ اجەسى رابيعانى دا قورعاپ قالعان بولاتىن (مۇس. 1-ج. 2:24؛ 12:14—20؛ 20:2—7؛ 26:6—11). وسى جاعدايلار تۋرالى ويلانىپ، ٴجۇسىپ ەحوبانىڭ نەنى جاقسى، ال نەنى جامان دەپ ەسەپتەيتىنىن ۇعىپ العان. ول قۇدايدى دا، ونىڭ ادىلدىككە قاتىستى نورمالارىن دا جاقسى كورگەن، سوندىقتان ولاردى بەرىك ۇستانعان.
3. بۇل ماقالادا نە جايلى قاراستىرامىز؟
3 ٴسىز ادىلدىكتى سۇيەسىز بە؟ ارينە، سۇيەتىنىڭىزدە داۋ جوق. بىراق ٴبارىمىز كەمەلسىز بولعاندىقتان، اباي بولۋىمىز كەرەك، ويتكەنى بىزگە وسى دۇنيەنىڭ ادىلدىككە قاتىستى تۇسىنىگى اسەر ەتىپ كەتۋى مۇمكىن (يشايا 5:20؛ ريم. 12:2). سوندىقتان وسى ماقالادا ادىلدىكتىڭ نە ەكەنىن جانە وسى قاسيەتتى سۇيسەك، وزىمىزگە قاي جاعىنان پايدالى ەكەنىن قاراستىرامىز. سونداي-اق ەحوبانىڭ نورمالارىنا دەگەن سۇيىسپەنشىلىگىمىزدى نىعايتۋدىڭ قانداي ٷش جولى بار ەكەنىن تالقىلايمىز.
ادىلدىك دەگەن نە؟
4. ادامداردىڭ ادىلدىككە قاتىستى كوزقاراستارى قالاي بۇرمالانعان؟
4 يسانىڭ كەزىندەگى ٴدىني جەتەكشىلەر وزدەرىن ٵدىلمىز دەپ ويلاعان. بىراق ولار ادامداردى سىناپ-مىنەيتىن جانە نە جاقسى، نە جامان ەكەندىگىنە قاتىستى نورمالاردى وزدەرى ورناتاتىن. سوندىقتان يسا ولاردى قاتتى ايىپتاعان (ۋاع. 7:16؛ لۇقا 16:15). قازىرگى كەزدىڭ ادامدارى دا سونداي. ولار ٴبىز جامان ەشتەڭە جاساپ جاتقان جوقپىز دەپ ايتادى، بىراق نە جاقسى، نە جامان ەكەنىن ولار وزدەرى شەشىپ العان. ولار ادەتتە باسقالاردى سىناپ-مىنەيدى، وزدەرىن وزگەلەردەن ٵدىل دەپ ەسەپتەيدى. بىراق بۇدان شىنايى ادىلدىكتىڭ ٴيىسى دە شىقپايدى. ونداي قاسيەتتەر ەحوباعا جەككورىنىشتى.
5. كيەلى كىتاپقا ساي، ادىلدىك دەگەن نە؟ مىسال كەلتىرىڭىز.
5 ادىلدىك — وتە ادەمى قاسيەت. ٴبىر اۋىز سوزبەن ايتقاندا، ادىلدىك دەگەن — ەحوبا دۇرىس دەپ ەسەپتەيتىن نارسەنى ىستەۋ. كيەلى كىتاپتاعى «ادىلدىك» ۇعىمى ەحوبانىڭ جوعارعى نورمالارىمەن ٶمىر ٴسۇرۋ دەگەن ويدى قامتيدى. مىسالى، ەحوبا ساۋداگەرلەردەن «ولشەۋىش ىدىستارىڭ تۋرا بولسىن» دەپ تالاپ ەتكەن (مۇس. 5-ج. 25:15). مۇنداعى «تۋرا» دەپ اۋدارىلعان ەۆرەي ٴسوزىن «ٵدىل» دەپ تە بەرۋگە بولادى. دەمەك، قۇدايدىڭ الدىندا ٵدىل بولعىسى كەلەتىن ٴماسىحشى بارلىق ىسكەرلىك ماسەلەدە تۋرا ارەكەت ەتىپ، شىنشىل بولادى. سونداي-اق ادىلدىكتى سۇيەتىن ادام وزگەلەردىڭ ادىلەتسىزدىكتەن جاپا شەككەنىن جەك كورەدى. وعان قوسا، ول «بارلىق جاعىنان [ەحوباعا] ۇنامدى» بولۋ ٷشىن، ٵربىر شەشىمىن ەحوبامەن ساناسا وتىرىپ قابىلدايدى (قول. 1:10).
6. ەحوبانىڭ جاقسى مەن جامانعا قاتىستى تالاپتارىنىڭ دۇرىستىعىنا نە ٷشىن سەنىمدىمىز؟ (يشايا 55:8، 9)
6 كيەلى كىتاپتان ەحوبا ادىلدىكتىڭ قاينارى ەكەنىن بىلەمىز. سوندىقتان ول «ادىلدىكتىڭ مەكەنى» دەپ اتالعان (ەرم. 50:7). جاراتۋشىمىز بولعاندىقتان، تەك ەحوبا عانا جاقسى مەن جامانعا قاتىستى تالاپتاردى ورناتا الادى. كەمەلسىز ٵرى كۇناكار پەندەلەردەن ايىرماشىلىعى — ول دۇرىس پەن بۇرىستى ٴدوپ باسىپ ايتا الادى (ناق. س. 14:12؛ يشايا 55:8، 9 وقىڭىز). بىراق ٴبىز قۇدايعا ۇقساس بولىپ جاراتىلعاندىقتان، ونىڭ ادىلدىك نورمالارىنا ساي ٶمىر سۇرە الامىز (مۇس. 1-ج. 1:27). بۇلاي ەتۋ بىزگە ۇنايدى دا. ويتكەنى اكەمىزدى سۇيەمىز ٵرى وعان بارىنشا ەلىكتەگىمىز كەلەدى (ەفەس. 5:1).
7. قۇدايدىڭ ورناتقان نورمالارى بىزگە نە ٷشىن قاجەت؟ مىسال كەلتىرىڭىز.
7 ەحوبانىڭ دۇرىس پەن بۇرىسقا قاتىستى نورمالارىمەن ٶمىر ٴسۇرۋ بارلىق جاعىنان پايدالى. نەگە ولاي دەيمىز؟ ەلەستەتىپ كورىڭىزشى، ٵر قالانىڭ ٶز جول ەرەجەلەرى بولسا، جاعداي قانداي بولادى؟ بۇكىل ەلدە بەيبەرەكەتسىزدىك، تارتىپسىزدىك ورىن الىپ، جۇيەدەن شىعىپ كەتەدى. نەمەسە دارىگەرلەر ناۋقاستاردى ەمدەۋگە ارنالعان ارنايى ەرەجەلەردى ۇستانباسا، نە بولادى؟ بۇل ادام ولىمىنە اكەپ سوعۋى مۇمكىن. شىنىندا دا، دالەلدەنگەن ٵرى سەنىمدى نورمالار ٶمىرىمىزدى ساقتايدى. سول سياقتى، قۇدايدىڭ دا جاقسى مەن جامانعا قاتىستى نورمالارى — ٴبىز ٷشىن قورعان.
8. ادىلدىكتى سۇيەتىندەردى قانداي باتالار كۇتىپ تۇر؟
8 ەحوبانىڭ ادىلدىك نورمالارىمەن ٶمىر سۇرۋگە ۇمتىلاتىنداردىڭ بارىنە ول باتاسىن بەرەدى. ول: «ادىلدەر جەردى مۇرا ەتەدى، وندا ماڭگى باقي ٶمىر سۇرەدى»،— دەپ ۋادە ەتەدى (ٴزاب. 37:29). جەر بەتىندەگى ٵربىر ادام ەحوبانىڭ تالاپتارىن ۇستانعاندا، ٶمىر قانداي بولاتىنىن ويلاپ كورىڭىزشى! بۇكىل ادامزات بىرلىك پەن تىنىشتىقتا باقىتتى عۇمىر كەشەرى انىق. ەحوبا ٴسىزدىڭ سونداي جەردە ٶمىر سۇرگەنىڭىزدى قالايدى. ولاي بولسا، ادىلدىكتى سۇيگەنىمىز قانشالىقتى ماڭىزدى دەسەڭىزشى! وسى قاسيەتتى ٵرى قاراي دا جاقسى كورە تۇسۋگە نە كومەكتەسەدى؟ قازىر بۇنىڭ ٷش جولىن قاراستىرايىق.
ەحوبانىڭ نورمالارىنا سۇيىسپەنشىلىگىڭىزدى دامىتىڭىز
9. ادىلدىكتى سۇيۋگە نە كومەكتەسەدى؟
9 1-جولى: ادىلدىك نورمالارىن ورناتقان تۇلعانى ٴسۇيىڭىز. ادىلدىكتى سۇيگىمىز كەلسە، نەنىڭ جاقسى، نەنىڭ جامان ەكەندىگىنە قاتىستى نورمالاردى ورناتقان تۇلعانى ٴسۇيۋىمىز كەرەك. ەحوبانى قاتتىراق سۇيگەن سايىن، ونىڭ ادىلدىك نورمالارىنا ساي ٶمىر ٴسۇرۋدى دە قاتتىراق قالايتىن بولامىز. مىسالعا ادام مەن حاۋانى الايىقشى. ولار ەحوبانى سۇيگەندە، ونىڭ ٵدىل زاڭىنان ەشقاشان اتتاماس ەدى (مۇس. 1-ج. 3:1—6، 16—19).
10. ىبىرايىم قالايشا ەحوبانى تاني ٴتۇستى؟
10 ەشقايسىسىمىز دا ادام مەن حاۋا جاساعان قاتەلىكتى قايتالاعىمىز كەلمەس ەدى. سوندىقتان ەحوبانى تانىپ-بىلە بەرەيىك، قاسيەتتەرىن باعالايىق جانە وي قالپىن تۇسىنۋگە تىرىسايىق. سوندا ونى بۇرىنعىدان بەتەر جاقسى كورەتىن بولامىز. ەحوبانى شىن جاقسى كورگەن ادامداردىڭ ٴبىرى — ىبىرايىم. ول ەحوبانىڭ كەيبىر شەشىمدەرىن تۇسىنبەي قالعاندا، قارسى شىقپاعان. قايتا، ونى جاقسىراق تانىپ-بىلۋگە تىرىسقان. مىسالعا ەحوبانىڭ سودوم مەن عومورانى جويامىن دەپ شەشكەن كەزىن الايىقشى. بۇنى بىلگەندە، ىبىرايىم «قالاي عانا بۇكىل الەمنىڭ تورەشىسى زۇلىمدارمەن بىرگە ٵدىل ادامداردى جويىپ جىبەرمەكشى» دەپ قورقىپ كەتەدى. وسى جاعداي اقىلىنا سيماي، ول ەحوبانىڭ الدىنا كەلىپ، كوپ سۇراق قويادى. ەحوبا ونىڭ ٵربىر سۇراعىنا شىدامدىلىقپەن جاۋاپ بەرەدى. اقىرىندا ىبىرايىم ەحوبانىڭ ٵربىر ادامنىڭ جۇرەگىن كورە الاتىنىنا جانە ٵدىلدى ادىلەتسىزبەن بىرگە ەشقاشان جويمايتىنىنا كوزى جەتىپ، جۇرەگى ورنىنا تۇسەدى (مۇس. 1-ج. 18:20—32).
11. ىبىرايىم ەحوبانى جاقسى كورەتىنىن جانە وعان سەنىم ارتاتىنىن قالاي كورسەتتى؟
11 ىبىرايىمعا سودوم مەن عومورا قالالارى تۋرالى ەحوبامەن سويلەسكەن اڭگىمەسى قاتتى اسەر ەتىپ، ونىڭ كوكتەگى اكەسىنە دەگەن سۇيىسپەنشىلىگى مەن قۇرمەتى ارتا ٴتۇستى. ٴبىراز جىل وتە ىبىرايىمنىڭ ەحوباعا قانشالىقتى سەنىم ارتاتىنى قاتتى سىنالعان ٴبىر جاعداي بولدى. ەحوبا ودان اياۋلى ۇلى ىسقاقتى قۇرباندىققا شالۋدى سۇرادى. بىراق ىبىرايىم قۇدايىن جاقسى تانىپ-بىلگەندىكتەن، بۇل جولى ەشقانداي سۇراق قويماي، بىردەن ورىنداۋعا كىرىستى. ارينە، بۇل تاپسىرما وعان وڭايعا سوقپادى، جانىن سىزداتتى. بىراق ول ەحوبا تۋرالى وسى ۋاقىتقا دەيىن بىلگەندەرى جايلى تەرەڭ وي جۇگىرتسە كەرەك. ونىڭ ەشقاشان ادىلەتسىزدىك جاسامايتىنىن، تاسجۇرەكتىككە بارمايتىنىن ىبىرايىم ٴبىلدى. ەلشى پاۋىلدىڭ سوزدەرىنەن بىلەتىنىمىزدەي، ول ەحوبانىڭ ىسقاقتى تىرىلتە الاتىنىنا دا سەندى (ەۆر. 11:17—19). ونىڭ ۇستىنە، ەحوبا ىسقاقتان حالىق تارايتىنىن ۋادە ەتكەن ەدى. ال ول كەزدە ىسقاقتىڭ ٵلى بالاسى جوق بولاتىن. ىبىرايىم كوكتەگى اكەسىن قاتتى جاقسى كورگەندىكتەن، ونىڭ ادىلدىگىنە ەش كۇماندانبادى. ەڭ قيىن سىناقتا دا ىبىرايىم سەنىمىنىڭ ارقاسىندا مويىنسۇندى (مۇس. 1-ج. 22:1—12).
12. ىبىرايىمعا قالاي ەلىكتەسەك بولادى؟ (ٴزابۇر 73:28)
12 ىبىرايىمعا قاي جاعىنان ەلىكتەسەك بولادى؟ ول سياقتى ٴبىز دە ەحوبانى جاقسىراق تاني تۇسەيىك، سوندا وعان جاقىنداي تۇسەمىز جانە ونى ودان سايىن جاقسى كورەتىن بولامىز (ٴزابۇر 73:28 وقىڭىز). سونداي-اق ار-ۇجدانىمىز ونىڭ وي قالپىنا ساي جۇمىس ىستەيتىن بولادى (ەۆر. 5:14). سوندا دۇرىس ەمەس ارەكەت ەتۋگە ازعىرىلعاندا، ٴبىز بۇدان بىردەن باس تارتامىز. اكەمىزدىڭ جۇرەگىن اۋىرتاتىن، ونىمەن دوستىعىمىزدى بۇزاتىن نارسەنى ىستەمەك تۇگىل، سول تۋرالى ويلاۋدىڭ وزىنەن تىتىركەنەتىن بولامىز. ادىلدىكتى سۇيەتىنىمىزدى كورسەتۋدىڭ تاعى قانداي جولدارى بار؟
13. ادىلدىككە قالاي ۇمتىلساق بولادى؟ (ناقىل سوزدەر 15:9)
13 2-جولى: ادىلدىككە دەگەن سۇيىسپەنشىلىگىڭىزدى كۇندە دامىتىپ وتىرىڭىز. ەحوبانىڭ ادىلدىك نورمالارىنا دەگەن سۇيىسپەنشىلىگىمىزدى نىعايتۋدى دەنە بۇلشىق ەتىمىزدى نىعايتۋمەن سالىستىرۋعا بولادى. ەكەۋى دە كۇندەلىكتى كۇش سالىپ، تالماي جاتتىعۋدى تالاپ ەتەدى. الايدا ەحوبا — پاراساتتى قۇداي. ول ەشقاشان شامامىز كەلمەيتىن نارسەنى تالاپ ەتپەيدى (ٴزاب. 103:14). كيەلى كىتاپتا: «ەحوبا... ادىلدىككە ۇمتىلعانداردى جاقسى كورەدى»،— دەلىنگەن (ناقىل سوزدەر 15:9 وقىڭىز). مىسالى، قىزمەتىمىزدە قانداي دا ٴبىر ماقساتقا ۇمتىلعاندا، سوعان جەتۋ ٷشىن ايانباي كۇش سالامىز. ادىلدىككە ۇمتىلۋ دا ٴدال سونداي. ەحوبا بىزگە وسى جاعىنان كۇننەن-كۇنگە جاقسارا بەرۋگە شىدامدىلىقپەن كومەكتەسەتىنىنە سەنىمدى بولايىق (ٴزاب. 84:5، 7).
14. «ادىلدىك ساۋىتى» دەگەن نە جانە ونى نە ٷشىن كييۋىمىز كەرەك؟
14 ٴسۇيۋشى اكەمىز ەحوبا ٶزىنىڭ ورناتقان ادىلدىك نورمالارى بىزگە اۋىرتپالىق ەمەس ەكەنىن ايتادى (جوح. 1-ح. 5:3). قايتا، ولار ٴبىزدى قورعايدى. ال بۇنداي قورعانىش بىزگە كۇندە قاجەت. ەلشى پاۋىل سيپاتتاپ كەتكەن رۋحاني ساۋىت-سايمان ەسىڭىزدە مە؟ (ەفەس. 6:14—18). سونىڭ قاي بولىگى جۇرەگىمىزدى قورعايتىن؟ ول — «ادىلدىك ساۋىتى». ساۋىت جاۋىنگەردىڭ جۇرەگىن ساقتايتىنداي، ەحوبانىڭ جاقسى مەن جامانعا قاتىستى تالاپتارى دا بەينەلى جۇرەگىمىزدى، ياعني جان دۇنيەمىزدى ساقتايدى. ەندەشە، رۋحاني ساۋىت-سايمانىڭىزدىڭ ىشىندە ادىلدىك ساۋىتىن كييۋدى ەشقاشان ۇمىتپاڭىز (ناق. س. 4:23).
15. ادىلدىك ساۋىتىن كييۋ دەگەن نەنى بىلدىرەدى؟
15 ادىلدىك ساۋىتىن كييۋ نەنى بىلدىرەدى؟ بۇل كۇندەلىكتى تاڭداۋلارىمىز بەن شەشىمدەرىمىزدە قۇدايدىڭ تالاپتارىن ەسكەرۋدى بىلدىرەدى. قانداي اڭگىمە قوزعايتىنىڭىزدى، نە كورىپ، نە تىڭدايتىنىڭىزدى، قانداي كىتاپ وقيتىنىڭىزدى شەشپەس بۇرىن، بىلاي دەپ ويلانىڭىز: «مەن جۇرەگىمدى نەمەن تولتىرماقشىمىن؟ ونى ەحوبا قۇپتاي ما؟ الدە ول ازعىندىق، جاۋىزدىق، اشكوزدىك، وزىمشىلدىك سياقتى، ەحوبا دۇرىس ەمەس دەپ ەسەپتەيتىن نارسەلەردى ناسيحاتتاي ما؟» (ٴفىلىپ. 4:8). قابىلداعان شەشىمىڭىز ەحوبانىڭ ەركىنە ساي بولسا، دەمەك، ونىڭ ادىلدىك نورمالارى جۇرەگىڭىزدى قورعاپ تۇر.
ادىلدىگىڭىز «تەڭىز تولقىندارىنداي» بولا الادى (16، 17-ابزاستاردى قاراڭىز)
16، 17. ەحوبانىڭ تالاپتارىن ماڭگى ۇستانا الاتىنىمىزعا يشايا 48:18 قالاي كوزىمىزدى جەتكىزەدى؟
16 ٴسىز: «مەن كۇندەر وتە، جىلدار وتە ەحوبانىڭ ادىلدىك نورمالارىنان تايماي جۇرە الامىن با؟»— دەپ ۋايىمدايسىز با؟ يشايا 48:18 دە (وقىڭىز) ەحوبانىڭ بويىمىزعا جىگەر قۇياتىن كەرەمەت ۋادەسى بار. «ادىلدىكتەرىڭ تەڭىز تولقىندارىنداي بولادى»،— دەيدى ول. شەتىنە كوز جەتپەيتىن شالقار تەڭىز جاعاسىندا تۇرعانىڭىزدى ەلەستەتىڭىزشى. ٴبىر-ٴبىرىن قۋالاعان تولقىندار جاعاعا ۇزدىكسىز كەلىپ سوعىپ جاتىر. سول ٴبىر مامىراجاي كورىنىسكە قاراپ تۇرىپ، وسى تولقىندار ٴبىر كۇنى توقتاپ قالادى دەپ ۋايىمدايسىز با؟ البەتتە، جوق! بۇل تەڭىزدىڭ تولقىندارى مىڭداعان جىلدان بەرى سوعىپ كەلەدى، ٵرى الدا دا ولار تولاستاماي سوعا بەرەتىنىنە ٴسىز ەش كۇماندانبايسىز.
17 ٴسىزدىڭ دە ادىلدىگىڭىز وسى تولقىندارداي بولا الادى! قالاي دەيسىز بە؟ قانداي دا ٴبىر تاڭداۋ جاساپ، شەشىم قابىلداردا: «ەحوبا نە ىستەگەنىمدى قالايدى؟»— دەپ ويلانىپ الىڭىز. سوسىن، سوعان ساي ارەكەت ەتىڭىز. الدىڭىزدا قانداي قيىن ماسەلە تۇرماسىن، ٴسۇيۋشى اكەڭىز ٵردايىم قاسىڭىزدان تابىلىپ، سىزگە كۇش بەرەدى جانە ونىڭ ادىلدىك نورمالارىنا كۇندە ساي بولۋىڭىزعا كومەكتەسەدى (يشايا 40:29—31).
18. وزگەلەردى ٶز تالاپتارىمىز بويىنشا ايىپتاۋدان نەگە اۋلاق بولۋىمىز كەرەك؟
18 3-جولى: ايىپتاۋدى ەحوباعا تاپسىرىڭىز. ەحوبانىڭ ادىلدىك نورمالارىن بارىنشا ۇستانا ٴجۇرىپ، ٶزىمىزدى باسقالاردان جوعارى ساناۋدان، ولاردى ٶز تالاپتارىمىز بويىنشا سوتتاۋدان اۋلاق بولۋىمىز كەرەك. وزگەنىڭ ٵدىل ارەكەت ەتىپ جۇرگەن-جۇرمەگەنىن شەشىپ، سوتتايتىن — ٴبىز ەمەس، «بۇكىل الەمنىڭ تورەشىسى» ەحوبا (مۇس. 1-ج. 18:25). ول بىزگە باسقالاردى ايىپتايتىن قۇزىر بەرگەن جوق. يسا بىزگە: «وزدەرىڭ ايىپتالماس ٷشىن، وزگەلەردى ايىپتاۋدى دوعارىڭدار»،— دەپ بۇيىرعانىن ۇمىتپايىق (مات. 7:1) *.
19. ٴجۇسىپ ەحوبانىڭ تورەلىگىنە سەنىم ارتقانىن قايدان بىلەمىز؟
19 ٵدىل ادام ٴجۇسىپتىڭ مىسالىنا قايتا ورالايىقشى. ول ٴتىپتى وعان جاماندىق جاساعان ادامداردى دا ايىپتاۋدان اۋلاق بولعان. جاس كەزىندە وعان ٶز اعالارى تاپ بەرىپ، قۇلدىققا ساتىپ جىبەرەدى دە، اكەلەرىنە ونى ٶلدى دەپ وتىرىك ايتىپ بارادى. كوپ جىلدان كەيىن ٴجۇسىپ وتباسىمەن قايتا قاۋىشادى. ول كەزدە قولىندا زور بيلىك بولعاندىقتان، ٴجۇسىپ اعالارىنان كەك الىپ، جازالاسا بولار ەدى. ولار دا ونى وسىلاي ەتەدى دەپ قورىقتى. بىراق ىستەرىنە شىن جۇرەكتەن وكىنگەن باۋىرلارىنا ٴجۇسىپ: «قورىقپاڭدار، سەندەردى سوتتايتىنداي مەن قۇداي ەمەسپىن عوي!»— دەپ، كوڭىلدەرىن ورنىقتىردى (مۇس. 1-ج. 37:18—20، 27، 28، 31—35؛ 50:15—21). ول كىشىپەيىلدىلىك تانىتىپ، سوتتاۋدى ەحوباعا تاپسىردى.
20، 21. ٶزىمىزدى وزگەدەن ٵدىل ساناماۋعا نە كومەكتەسەدى؟
20 ٴجۇسىپ سياقتى ٴبىز دە وزگەلەردى سوتتاۋدى ەحوباعا تاپسىرامىز. مىسالى، بىرەۋ جايلى «ونىڭ بۇل نارسەنى قانداي نيەتپەن ىستەگەنىن بىلەمىن» دەپ ويلاپ، سىرتىنان تون پىشپەيمىز. ٴبىز ەشكىمنىڭ جۇرەگىن وقي المايمىز، نيەتتى تەكسەرەتىن — تەك ەحوبا (ناق. س. 16:2). قانداي ورتادان، قانداي مادەنيەتتەن شىقپاسىن — ەحوبا بارلىق ادامدى جاقسى كورەدى. ول ٴبىزدى دە: «جۇرەكتەرىڭدى ايقارا اشىڭدار»،— دەپ شاقىرادى (قور. 2-ح. 6:13). ٴبىز رۋحاني وتباسىمىزداعى باۋىرلاستاردى ايىپتاۋعا ەمەس، سۇيۋگە اسىق بولعىمىز كەلەدى.
21 ٴبىز قاۋىمنان تىس ادامداردى دا سوتتاماۋىمىز كەرەك (ٴتىم. 1-ح. 2:3، 4). ٴسىز كۋاگەر ەمەس تۋىسىڭىزعا «مىناۋ ەشقاشان شىندىقتى قابىلدامايدى» دەپ ۇكىم شىعارار ما ەدىڭىز؟ جوق، ارينە. بۇلاي ٵدىلسىنىپ، ٶزىمىزدى وزگەدەن جوعارى ساناعىمىز كەلمەس ەدى. ويتكەنى ەحوبا «جەر-جەردى مەكەندەيتىن ادامداردىڭ» بارىنە وكىنۋگە ٵلى دە مۇمكىندىك بەرىپ وتىر (ەل. ٸس. 17:30). ەندەشە، مىنانى ٵردايىم ەستە ۇستايىق: ٶزىن وزگەدەن ٵدىلمىن دەپ سانايتىن ادامدى ەحوبا ٵدىل دەپ سانامايدى.
22. ادىلدىكتى سۇيۋگە نە ٷشىن بەكىندىڭىز؟
22 ەحوبانىڭ ادىلدىك نورمالارىن سۇيسەك، باقىتتى بولامىز. بۇنى كورگەندەر بىزگە دە، ەحوبا قۇدايىمىزعا دا جاقىنداي تۇسەدى. ولاي بولسا، «ادىلدىككە اشىعىپ، سۋساۋدى» ەشقاشان دوعارمايىق (مات. 5:6 ٴسىلت.). ادىلدىككە ۇمتىلىپ، دۇرىس ارەكەت ەتۋگە كۇش سالىپ جۇرگەنىڭىزدى ەحوبا باعالايتىنىنا سەنىمدى بولىڭىز. ال مىنا دۇنيە ادىلەتسىزدىككە بەلشەسىنەن باتىپ، ودان سايىن بۇزىلىپ بارا جاتقانىنا ەڭسەڭىز تۇسپەسىن! «ەحوبا ٵدىل جانداردى جاقسى كورەتىنىن» ەشقاشان ۇمىتپاڭىز (ٴزاب. 146:8).
139-ٵن جۇماقتا جۇرگەنىڭدى ەلەستەت
^ مىنا دۇنيە زۇلىمدىققا تولى بولسا دا، ەحوبانىڭ ادىلدىگىمەن ٶمىر سۇرەتىن ميلليونداعان ادام بار. سول ادىلدىك جولىنا تۇسكەندەردىڭ ٴبىرى ٴسىزسىز. ويتكەنى ٴسىز ەحوبانى جاقسى كورەسىز. ال ەحوبا ادىلدىكتى جاقسى كورەدى. ال ادىلدىك دەگەن نە؟ بۇل قاسيەتتى جاقسى كورسەك، وزىمىزگە قاي جاعىنان پايدالى؟ ادىلدىككە دەگەن سۇيىسپەنشىلىگىمىزدى قالاي دامىتا الامىز؟ بۇل ماقالادا وسى سۇراقتارعا جاۋاپ الامىز.
^ كەيدە قاۋىم اقساقالدارىنا بىرەۋدىڭ اۋىر كۇناسىنا جانە وكىنگەن-وكىنبەگەنىنە قاتىستى سوت جۇرگىزۋ كەرەك بولادى (قور. 1-ح. 5:11؛ 6:5؛ جاق. 5:14، 15). سوندايدا ولار ادامنىڭ جۇرەگىن وقي المايتىندارىن جانە ەحوبانىڭ اتىنان تورەلىك ەتىپ جاتقاندارىن ەستە ۇستايدى (شەجىرەلەر 2-جازبا 19:6 سالىستىرىڭىز). ولار قۇدايدىڭ پاراساتتىلىققا، ادىلدىككە، مەيىرىمدىلىككە تولى نورمالارىن جان-جاقتى قاراستىرا وتىرىپ شەشىم شىعارادى.
