33-زەرتتەۋ ماقالاسى
ەحوبا ٶز حالقىنا نازار تىگەدى
«ەحوبا وزىنەن قورقاتىندارعا... نازارىن تىگەدى» (ٴزاب. 33:18).
4-ٵن «ەحوبا — مەنىڭ باعۋشىم»
اڭداتپا *
1. يسا نەگە اكەسىنەن: «ٸزباسارلارىمدى قورعاي كور»،— دەپ سۇرادى؟
يسا ولەر الدىنداعى ٴتۇنى اكەسىنە ٴبىر وتە ماڭىزدى ٶتىنىش ايتتى. ول: «ٸزباسارلارىمدى قورعاي كور»،— دەپ سۇرادى (جوح. 17:15، 20). الايدا ەحوبا ولاردى ونسىز دا بۇرىننان قورعاپ، قامدارىن جاساپ كەلدى ەمەس پە؟! ەندەشە، يسا نەگە ولاي سۇرادى؟ ويتكەنى ول ٸزباسارلارىن شايتان اياۋسىز قۋعىندايتىنىن بىلگەن. ٸزباسارلارى شايتاننىڭ زۇلىم شابۋىلدارىنا تويتارىس بەرۋ ٷشىن، ولارعا ەحوبانىڭ كومەگى قاجەت بولاتىنىن يسا جاقسى ٴتۇسىندى.
2. ٴزابۇر 33:18—20-تارماقتاردان كورەتىنىمىزدەي، سىناقتان نەگە قورىقپاۋىمىز كەرەك؟
2 شايتان بيلەپ-توستەگەن مىنا دۇنيە ماسىحشىلەردى جان-جاقتان قىسپاقتاپ، اۋىر سالماق سالىپ جاتىر. ٴبىر قيىندىقتار ساعىمىزدى سىندىرسا، باسقالارى ەحوباعا دەگەن ادالدىعىمىزدى سىناۋى مۇمكىن. بىراق ۋايىمداپ، قورقۋعا ەش نەگىز جوق. ويتكەنى ەحوبا بىزگە نازارىن تىگەدى، ياعني قانداي سىناققا كەزىگىپ جاتقانىمىزدى كورىپ، قول ۇشىن بەرۋگە دايىن. قازىر «ەحوبا وزىنەن قورقاتىندارعا... نازارىن تىگەتىنىنە» دالەل بولار كيەلى كىتاپتاعى ەكى مىسالدى قاراستىرايىق (ٴزابۇر 33:18—20 وقىڭىز).
ٶزىمىزدى جالعىز سەزىنگەندە
3. قانداي جاعدايدا ٶزىمىزدى جالعىز سەزىنۋىمىز مۇمكىن؟
3 ٴبىزدىڭ ۇلكەن رۋحاني وتباسىمىز بولسا دا، ٶزىمىزدى جالعىز سەزىنەتىن كەزدەر بولادى. مىسالى، مەكتەپتە وقيتىن جاس باۋىرلاس بۇكىل سىنىپتىڭ الدىندا ٴبىر ٶزى تۇرىپ سەنىمىن قورعاعاندا نەمەسە جاڭا قاۋىمعا اۋىسقاندا ٶزىن جالعىز سەزىنەتىن شىعار. كەيبىرەۋىمىز كۇيزەلىپ، سول جاعىمسىز سەزىمدەرمەن جالعىز كۇرەسىپ جاتقانداي بولامىز. «مەنى باسقالار تۇسىنبەيدى» دەپ ويلاپ، ولارعا سەزىمدەرىمىز جايلى ايتۋدان تارتىناتىن شىعارمىز. ٴتىپتى «مەن ەشكىمگە كەرەك ەمەسپىن» دەپ ويلاۋىمىز مۇمكىن. قانداي سەبەپتەن تۋسا دا، جالعىزدىق ادامنىڭ جانتىنىشتىعىن بۇزادى، دارمەنسىز كۇيگە تۇسىرەدى. بىراق ەحوبا ٴبىزدىڭ بۇنداي كۇي كەشكەنىمىزدى قالامايدى. نەگە بۇلاي دەيمىز؟
4. نەگە ٸلياس: «جالعىز مەن عانا قالدىم»،— دەگەن؟
4 ادال پايعامبار ٸلياستىڭ باسىنان وتكەن ٴبىر جاعدايدى ەلەستەتەيىكشى. ەزابەل ونى ولتىرەمىن دەپ انت-سۋ ىشكەننەن كەيىن، ونىڭ باسساۋعالاپ قاشىپ جۇرگەنىنە، مىنە، 40 كۇننەن استى (پات. 1-ج. 19:1—9). سوسىن ٸلياس ٴبىر ۇڭگىرگە كىردى دە، ەحوباعا: «[پايعامبارلاردىڭ ىشىنەن] جالعىز مەن عانا قالدىم»،— دەپ جىلاپ جىبەردى (پات. 1-ج. 19:10). بىراق باسقا دا پايعامبارلار بولدى عوي. مىسالى، اباديا 100 پايعامباردى ەزابەلدىڭ سەمسەرىنەن ساقتاپ قالعان بولاتىن (پات. 1-ج. 18:7، 13). وندا نەگە ٸلياس ٶزىن جالعىز قالدىم دەپ ايتتى؟ ول الگى 100 پايعامباردى ەزابەل ٴبارىبىر تاۋىپ الىپ، ٶلتىرىپ تاستادى دەپ ويلادى ما؟ يا بولماسا كارميل تاۋىندا ەحوبا ٶزىنىڭ شىنايى قۇداي ەكەنىن دالەلدەسە دە، ەشكىم ونىڭ جاعىنا شىقپاعانىنا كوڭىلى ٴتۇستى مە؟ الدە «ەشكىمنىڭ مەنىمەن شارۋاسى جوق، ٶلىپ قالامىن با دەپ قورقىپ، قاشىپ جۇرگەنىمدى ەشكىم ٴبىلىپ تە جاتقان جوق» دەپ ويلادى مە ەكەن؟ كيەلى كىتاپتا بۇلارعا قاتىستى ناقتى ەش نارسە ايتىلمايدى. بىراق ٴبىر بىلەرىمىز — ەحوبا ٸلياستىڭ جانىن جاقسى تۇسىنگەن جانە وعان قالاي كومەكتەسۋ كەرەكتىگىن دە جاقسى بىلگەن.
ٶزىمىزدى جالعىز سەزىنگەندە، ەحوبانىڭ ٸلياسقا كومەكتەسكەنىنەن قانداي جۇبانىش الامىز؟ (5، 6-ابزاستاردى قاراڭىز)
5. ەحوبا ٸلياسقا ٶزىن جالعىز سەزىنبەۋگە قالاي كومەكتەستى؟
5 ەحوبا ٸلياسقا ٴتۇرلى جولمەن كومەكتەستى. مىسالى، ودان ەكى رەت: «ٸلياس، مۇندا نە ىستەپ ٴجۇرسىڭ؟»— دەپ سۇراپ، ونى اڭگىمەگە تارتتى (پات. 1-ج. 19:9، 13). ەكى جاعدايدا دا ٸلياس ىشىندەگىسىن جايىپ سالعاندا، ەحوبا ونى مۇقيات تىڭدادى. سوسىن وعان جاۋاپ بەرىپ، ونىڭ قاسىندا ەكەنىن ٴبىلدىردى جانە قۇدىرەتتى كۇشىن كورسەتتى. بۇدان كەيىن وعان عيبادات ەتەتىن باسقا دا يسرايلدىكتەر بار ەكەنىن ايتتى (پات. 1-ج. 19:11، 12، 18). ەحوباعا مۇڭىن شاققاننان كەيىن جانە ونىڭ جاۋابىن تىڭداعاننان كەيىن، ٸلياس اجەپتەۋىر جەڭىلدەپ قالسا كەرەك. سوسىن ەحوبا وعان بىرنەشە تاپسىرما بەردى، اتاپ ايتقاندا، حازاەلدى سيريانىڭ پاتشاسى ەتىپ، يقۋدى ٴيسرايلدىڭ پاتشاسى ەتىپ، ال ەلىشەنى پايعامبار ەتىپ تاعايىنداۋدى تاپسىردى (پات. 1-ج. 19:15، 16). وسىلاي ەحوبا ونىڭ ويىن جاقسى جاققا بۇردى. سونداي-اق قاسىنا سەرىك ەتىپ ەلىشەنى قوسىپ بەردى. ال ٴسىز ٶزىڭىزدى جالعىز سەزىنگەندە، ەحوبا سىزگە دە كومەكتەسۋ ٷشىن نە ىستەسەڭىز بولادى؟
6. جالعىزسىراعاندا نە دەپ دۇعا ايتساڭىز بولادى؟ (ٴزابۇر 62:8)
6 ەحوبا ٴسىزدى وعان دۇعا ەتۋگە شاقىرادى. ول ٴسىزدىڭ قانداي قيىندىقتان ٶتىپ جاتقانىڭىزدى بىلەدى جانە كەز كەلگەن ۋاقىتتا دۇعالارىڭىزعا قۇلاق اسۋعا ٵزىر (سال. 1-ح. 5:17). قىزمەتشىلەرىنىڭ دۇعالارىن تىڭداعان وعان وتە ۇنايدى (ناق. س. 15:8). ەندەشە، بويىڭىزدى جالعىزدىق بيلەگەندە، وعان ٸلياس سياقتى شەر تارقاتىڭىز (ٴزابۇر 62:8 وقىڭىز). نە نارسەنى ۋايىمدايتىنىڭىزدى، نە سەزىنەتىنىڭىزدى وعان اشىق ايتىڭىز جانە سول سەزىمدەرمەن كۇرەسۋگە كومەكتەسۋىن سۇراڭىز. مىسالى، سەن مەكتەپتە وقيتىن بولساڭ، بۇكىل سىنىپتىڭ الدىندا كۋالىك ەتۋگە قورقىپ، جالعىز قالعانداي سەزىنگەندە، ەحوبادان باتىل جۇرەك سۇراساڭ بولادى. سەنىمىڭدى ىلتيپاتپەن تۇسىندىرە الۋ ٷشىن ودان دانالىق تا سۇراي الاسىڭ (لۇقا 21:14، 15). ال ەگەر جاعىمسىز سەزىمدەردەن قينالىپ، كۇيزەلىپ جۇرگەن باۋىرلاس بولساڭىز، ەحوباعا «تولىسقان باۋىرلاسپەن سويلەسۋگە كومەكتەسشى» دەپ دۇعا ايتىڭىز. دۇعادا «ول باۋىرلاس مەنىڭ جانىمدى ٴتۇسىنسىنشى» دەپ تە سۇراڭىز. سونىمەن، ەحوباعا ىشىڭىزدەگىنىڭ ٴبارىن ايتىپ، سوسىن ونىڭ جاۋابىن كورۋگە تىرىسىڭىز. باسقالاردىڭ ۇسىنعان كومەگىنەن دە باس تارتپاڭىز. سوندا بۇرىنعىداي قاتتى جالعىزسىرامايتىن بولاسىز.
قىزمەت اياسىن كەڭەيتىپ، باسقالارمەن قىزمەتتەسۋدىڭ جولدارىن ىزدەيسىز بە؟ (7-ابزاستى قاراڭىز)
7. ماۋريسيودان نە ۇيرەندىڭىز؟
7 ەحوبا بارىمىزگە دە ماعىنالى ٸس تاپسىرعان. ول ٴسىزدىڭ قاۋىمدا جانە قىزمەتتە اتقارىپ جاتقان ٸسىڭىزدىڭ ٴبارىن بايقايدى ٵرى باعالايدى (ٴزاب. 110:3). جالعىزسىراعاندا سول ىستەردى قۇلشىنا اتقارعانىڭىز كومەك بولادى. بۇنىڭ قالاي ەكەنىن ماۋريسيو دەگەن جاس ەر باۋىرلاستىڭ مىسالىنان كورەمىز *. ول شومىلدىرۋ راسىمىنەن وتكەننەن كەيىن كوپ ۇزاماي ٴبىر جاقىن دوسى بىرتە-بىرتە سۋىپ، شىندىقتان كەتىپ قالادى. ماۋريسيو بىلاي دەيدى: «ول ەحوبانى تاستاپ كەتكەندە، ٶز-وزىمە دەگەن سەنىمدىلىگىم شايقالدى. مەن باعىشتالعانىما ساي ٶمىر سۇرە الامىن با، ەحوبانىڭ وتباسىندا قالا الامىن با دەپ ۋايىمدادىم. ٶزىمدى جالعىز سەزىندىم جانە ەشكىم مەنى تۇسىنبەيدى دەپ ويلادىم». وزىنە نە كومەكتەسكەنى جايلى ول بىلاي دەيدى: «مەن قىزمەت اياسىن كەڭەيتتىم، سونىڭ ارقاسىندا ٶزىمدى عانا ويلاي بەرمەيتىن بولدىم. جاعىمسىز سەزىمدەرىمدى جۇگەندەۋدى ۇيرەندىم. باۋىرلاستارمەن قىزمەت ەتكەندە، قۋانىپ قايتامىن جانە بۇرىنعىداي جالعىزسىرامايمىن». بالكىم، ٴبىز باۋىرلاستارمەن جۇزبە-ٴجۇز كورىسىپ، قىزمەتكە بۇرىنعىداي شىعا الماي جۇرگەن شىعارمىز. دەسە دە ولارمەن بىرگە تەلەفونمەن ۋاعىزداعاندا نە حات جازعاندا كادىمگىدەي نىعايىپ قالامىز. ماۋريسيوعا تاعى نە كومەكتەستى؟ «قاۋىمدا وقۋشىلارعا ارنالعان تاپسىرما العاندا، وعان بار كۇشىمدى جۇمىلدىرىپ، جاقسىلاپ ورىنداۋعا تىرىسامىن. سوندا ٶزىمنىڭ ەحوباعا دا، باۋىرلاستارعا دا كەرەك ەكەنىمدى، باعالى ەكەنىمدى ٴتۇسىنىپ قالامىن»،— دەيدى ول.
اۋىر سىناق تۇڭىلتكەندە
8. اۋىر سىناقتاردا قانداي كۇي كەشۋىمىز مۇمكىن؟
8 ٴبىز سوڭعى كۇندەرى ٶمىر قيىن بولاتىنىن بىلەمىز (ٴتىم. 2-ح. 3:1). الايدا اياق استىنان ويلاماعان سىناققا كەزىككەندە ەسەڭگىرەپ قالامىز. مىسالى، كۇتپەگەن جەردەن جوقشىلىققا ۇشىراۋىمىز، جاقىنىمىزدان ايىرىلۋىمىز مۇمكىن نەمەسە بىزگە قاتەرلى ٴبىر دەرتتىڭ دياگنوزى قويىلاتىن شىعار. وسىنداي كەزدەرى شاراسىز كۇي كەشىپ، ەڭسەمىز ەزىلىپ، تۇڭىلەمىز. كەيبىرىمىز اۋىر جاعدايدىڭ بىرىنەن سوڭ بىرىنە ۇشىراپ جاتساق، ال باسقالارىمىز ٴبىر دەگەندە قيىندىقتىڭ سان اتاسىن كورۋىمىز مۇمكىن. بىراق مىنانى جادىمىزدان شىعارمايىق: ٴبىز ەحوبانىڭ نازارىندامىز جانە ونىمەن بىرگە كەز كەلگەن سىناقتان سەنىممەن وتە الامىز.
9. ٵيۇپتىڭ باسىنا قانداي قاسىرەت تۇسكەنىن ايتىپ بەرىڭىز.
9 ەحوبا ادال قىزمەتشىسى ايۇپكە قالاي دەم بەرگەنىن قاراستىرايىقشى. قىسقا ۋاقىتتىڭ ىشىندە ونىڭ ٴبىر باسىنا بىرنەشە قاسىرەت ٴتۇستى. ٴبىر كۇننىڭ ىشىندە ول بىرىنەن سوڭ ٴبىرى ىلەسكەن سۋىق حابار الىپ جاتتى: مالىنىڭ ٴبىرتالايى ۇرلانسا، قالعانى قىرىلىپ قالدى، قىزمەتشىلەرىن ٶلتىرىپ كەتتى، ال ەڭ سوراقىسى — بالالارى تۇگەل قازا بولدى (ٵيۇپ 1:13—19). وسىلاي جۇرەگى تىلگىلەنىپ، قايعى جۇتىپ وتىرعاندا، جانىن دا، ٴتانىن دە سىزداتاتىن اۋرۋعا شالدىعىپ، ٴتىرى ادام تانىماستاي بولىپ كەتتى (ٵيۇپ 2:7). قينالعانى سونشا، ٵيۇپ: «ومىردەن جيرەنەمىن، بۇدان ٵرى ٴتىرى جۇرگىم كەلمەيدى»،— دەدى (ٵيۇپ 7:16).
ەحوبا ٵيۇپتى سۇيەتىنىنە جانە قامقورلايتىنىنا سەندىرىپ، ٶز جاراتىلىستارىنىڭ قامىن قالاي جاسايتىنىن ايتىپ بەردى (10-ابزاستى قاراڭىز).
10. ەحوبا ايۇپكە قاسىرەتىنە توتەپ بەرۋگە قالاي كومەكتەستى؟ (مۇقاباداعى سۋرەتتى قاراڭىز.)
10 ەحوبا ايۇپكە نازارىن سالىپ، قامقورلادى. ول ٵيۇپتى جاقسى كورگەندىكتەن، سىناققا توتەپ بەرىپ، ادال بولىپ قالۋىنا كومەكتەستى. وعان ٴتىل قاتىپ، ٶزىنىڭ اسقان دانالىعىن جانە جاراتىلىستارىن ايالاپ، قامقورلايتىنىن ەسىنە سالدى. سونداي-اق عاجايىپ جانۋارلار الەمىنە نازار اۋداردى (ٵيۇپ 38:1، 2؛ 39:9، 13، 19، 27؛ 40:15؛ 41:1، 2). ەليحۋ دەگەن ادال جاس جىگىت ارقىلى وعان دەم بەردى، جانىن جۇباتتى. ەليحۋ ٵيۇپتى قيىندىققا توزگەن قىزمەتشىلەرىن ەحوبا مىندەتتى تۇردە جارىلقايتىنىنا سەندىردى. سونىمەن قاتار ەحوبا ەليحۋدى قولدانىپ، ٵيۇپتى تۇزەتۋ كەرەك جەرىندە جۇمساقتىقپەن تۇزەتتى. ەليحۋ پەندەدەن الدەقايدا ۇلى، كۇللى عالامنىڭ يەسىنە نازار اۋدارىپ، ٵيۇپتى ٶزىنىڭ وي-سەزىمدەرىنىڭ شەڭبەرىنەن شىعۋعا تالپىندىردى (ٵيۇپ 37:14). سونداي-اق ەحوبا وعان تاپسىرما دا بەردى. ول ايۇپكە كۇناعا باتقان ٷش دوسى ٷشىن دۇعا ايتۋدى تاپسىردى (ٵيۇپ 42:8—10). ٴبىزدىڭ باسىمىزعا دا ازاپتى كۇندەر تۇسكەندە، ەحوبا قالاي كومەكتەسەدى؟
11. سىناق كەزىندە قۇداي ٴسوزى ٴبىزدى قالاي جۇباتادى؟
11 ارينە، ەحوبا بىزبەن ايۇپپەن سويلەسكەندەي تىكەلەي سويلەسپەيدى. بىراق ول بىزگە كيەلى كىتاپ ارقىلى ٴتىل قاتادى (ريم. 15:4). ول بولاشاققا ٷمىت بەرىپ، ٴبىزدى جۇباتادى. ونىڭ سوزىنەن سىناق كەزىندە جانىمىزعا جالاۋ بولاتىن كەيبىر ويلاردى قاراستىرايىقشى. مىسالى، ەحوبا قانداي اۋىر سىناق بولماسىن، ٴبىزدى ونىڭ سۇيىسپەنشىلىگىنەن ەش نارسە ايىرا المايتىنىنا سەندىرەدى (ريم. 8:38، 39). سونداي-اق ول «ٶزىن شاقىراتىنداردىڭ ٴبارىنىڭ قاسىندا» بولامىن دەپ ۋادە ەتەدى (ٴزاب. 145:18). ەحوبا ٴبارىمىزدى وعان ارقا سۇيەۋگە شاقىرادى. سوندا كەز كەلگەن سىناقتان وتە الاتىنىمىزدى، ٴتىپتى قۋانىشتى بولىپ قالا الاتىنىمىزدى ايتادى (قور. 1-ح. 10:13؛ جاق. 1:2، 12). بۇعان قوسا، كيەلى كىتاپ ٴبىزدى كۇتىپ تۇرعان ماڭگىلىك باتالارمەن سالىستىرعاندا، قازىرگى قيىنشىلىقتار ۋاقىتشا ٵرى قىسقا ەكەنىن ەسكە سالادى (قور. 2-ح. 4:16—18). سونداي-اق ەحوبا ازاپتارىمىزدىڭ ٶزىن عانا ەمەس، كوزىن دە قۇرتاتىنىنا سەندىرەدى: ول شايتان ٸبىلىس پەن وعان ەرگەن زۇلىمداردىڭ ٴبارىن جويادى (ٴزاب. 37:10). ەندەشە، ٴسىز الداعى سىناقتا وزىڭىزگە دەمەۋ بولاتىن كيەلى كىتاپ تارماقتارىن جاتتادىڭىز با؟
12. كيەلى كىتاپتىڭ تولىق پايداسىن كورۋىمىز ٷشىن، ەحوبا نە ىستەگەنىمىزدى قالايدى؟
12 ەحوبا بىزدەن ۋاقىت ٴبولىپ، كيەلى كىتاپتى وقيدى، ۇستىنەن تەرەڭ وي جۇگىرتەدى دەپ كۇتەدى. ال سول بىلگەنىمىزگە ساي ارەكەت ەتكەندە، سەنىمىمىز نىعايىپ، كوكتەگى اكەمىزگە جاقىنداي تۇسەمىز. وسىنىڭ ارقاسىندا بويىمىزدا سىناققا توتەپ بەرەتىن كۇش پايدا بولادى. كيەلى كىتاپقا جۇگىنەتىن قىزمەتشىلەرىنە ەحوبا كيەلى رۋحىن دا بەردى. كيەلى رۋح بىزگە «ادام كۇشىنەن اسقان كۇش» دارىتىپ، ناتيجەسىندە كەز كەلگەن سىناقتى ەڭسەرە الامىز (قور. 2-ح. 4:7—10).
13. «ادال دا اقىلدى قۇل» بەرەتىن رۋحاني اس-سۋ سىناققا توتەپ بەرۋگە قالاي كومەكتەسەدى؟
13 ەحوبانىڭ ارقاسىندا «ادال دا اقىلدى قۇل» سەنىمىمىزدى قايراپ، رۋحاني سەرگەك جۇرۋگە كومەكتەسەتىن ماقالالاردى، ۆيدەولار مەن اۋەندەردى كول-كوسىر قىلىپ شىعارىپ جاتىر (مات. 24:45). ۋاقتىلى كەلىپ جاتقان وسى رۋحاني اس-سۋدى بارىنشا كادەمىزگە جاراتايىق. جاقىندا اقش-تاعى ٴبىر ايەل باۋىرلاسىمىز رۋحاني اس-سۋعا دەگەن جىلى لەبىزىن ٴبىلدىردى. ول بىلاي دەيدى: «مەن ەحوباعا 40-جىلدان بەرى قىزمەت ەتىپ كەلەمىن. وسى ۋاقىت ارالىعىندا مىنسىزدىگىم سان مارتە سىنعا الىندى». ونىڭ اتاسى ٴبىر ماس جۇرگىزۋشىنىڭ كەسىرىنەن قازا بولدى. اتا-اناسى بىردەي قاتەرلى اۋرۋعا شالدىعىپ، كوز جۇمدى جانە وزىنە دە قاتەرلى ىسىكپەن ەكى رەت كۇرەسۋگە تۋرا كەلدى. ول وسىنداي ىزعارلى كەزەڭنەن قالاي ٶتتى؟ «ەحوبا مەنى قاناتىنىڭ استىنا الىپ، قامقورلاپ ٴجۇردى. ادال دا اقىلدى قۇل دايىنداعان رۋحاني اس-سۋ ماعان كوپ كۇش بەرەدى. سونىڭ ارقاسىندا ٶزىمدى ٵيۇپ سياقتى سەزىنەمىن. مەن دە ولە-ولگەنشە مىنسىزدىگىمنەن تايماسپىن!»— دەيدى ول (ٵيۇپ 27:5).
قاۋىمداعىلار ٷشىن باتا بولا الاسىز با؟ (14-ابزاستى قاراڭىز)
14. قيىندىققا كەزىككەنىمىزدە، ەحوبا باۋىرلاستاردى قالاي قولدانادى؟ (سالونيكالىقتارعا 1-حات 4:9)
14 ەحوبا ٶزىنىڭ حالقىن ٴبىر-ٴبىرىن سۇيۋگە، قيىن شاقتا جۇبانىش بولۋعا ۇيرەتىپ كەلەدى (قور. 2-ح. 1:3، 4؛ سالونيكالىقتارعا 1-حات 4:9 وقىڭىز). ەليحۋ سياقتى، ٴبىزدىڭ باۋىرلاستار دا قيىندىققا كەزىككەنىمىزدە ادال بولىپ قالۋعا كومەكتەسەدى (ەل. ٸس. 14:22). مىسالى، ديانا باۋىرلاستىڭ كۇيەۋى اۋىر دەرتكە شالدىققاندا، قاۋىمى وعان جىگەر بەرىپ، رۋحاني مىقتى بولىپ قالۋعا كومەكتەستى. ديانا بىلاي دەيدى: «بىزگە وتە قيىن بولدى. بىراق ەحوبا بىزگە كۇش بەردى، ايالى الاقانىن توستى، قاۋىمداعى باۋىرلاستار كومەكتەرىن ايامادى. ولاردىڭ ۇيگە كەلىپ، ٴبىزدى قۇشاقتاپ، تەلەفون سوعىپ تۇرعاندارىنىڭ ارقاسىندا قيىندىقتا ەش مويىمادىق. كولىك ايدامايتىنىمدى بىلگەندىكتەن، باۋىرلاستار مەنى كەزدەسۋلەرگە اپاراتىن جانە قىزمەتكە شىعا الاتىن كەزدەرىمدە وزدەرىمەن الىپ كەتەتىن». سۇيىسپەنشىلىگى تاسىپ تۇرعان وسىنداي رۋحاني وتباسىمىزدىڭ بولعانى نەتكەن باقىت!
ەحوبانىڭ قامقورلىعىنا شەكسىز ريزامىز!
15. قيىندىقتارعا توتەپ بەرە الاتىنىمىزعا نەگە سەنىمدىمىز؟
15 قاي-قايسىسىمىز دا ايتەۋىر ٴبىر سىناققا كەزىگەتىنىمىز راس. الايدا ٴبىز جالعىز ەمەسپىز، قاسىمىزدا اسقار تاۋداي اكەمىز بار. ول بىزگە نازارىن سالىپ، قامقورلايدى. جالبارىنعان ٷنىمىزدى ەستىپ، كۇش بەرەدى (يشايا 43:2). ول بىزگە قيىندىققا توتەپ بەرۋىمىزگە قاجەتتىنىڭ ٴبارىن مولىنان سيلادى. بىزدە دۇعا ەتۋ مارتەبەسى، كيەلى كىتاپ، رۋحاني اس-سۋ جانە سۇيىسپەنشىلىگى مول باۋىرلاستارىمىز بار. وسىنىڭ ارقاسىندا سىناقتا سىنبايتىنىمىزعا سەنىمدىمىز.
16. ەحوبانىڭ قاناتىنىڭ استىندا جۇرە بەرۋ ٷشىن نە ىستەۋىمىز كەرەك؟
16 كوكتەن بىزگە نازارىن سالاتىن اكەمىز بار ەكەنىنە وتە ريزامىز! «ونى ويلاپ جۇرەگىمىز قۋانىشقا تولادى» (ٴزاب. 33:21). ەحوبانىڭ ايالى قامقورلىعىن باعالاپ، ۇسىنىپ وتىرعان كومەگىنىڭ ٴبارىن قابىلدايىق. ونىڭ قاناتىنىڭ استىندا جۇرە بەرۋ ٷشىن ٶز تاراپىمىزدان دا كۇش سالايىق. بىلايشا ايتقاندا، ەحوباعا مويىنسۇنىپ، ٵدىل ارەكەت ەتۋ ٷشىن بارىمىزدى سالا بەرەيىك، سوندا ماڭگى ونىڭ نازارىندا بولامىز! (پەت. 1-ح. 3:12)
30-ٵن ەحوبا، قۇدايىمسىڭ، ادال دوسىم
