وقىرمان ساۋالدارى
2020-جىلى ماۋسىم ايىنداعى «كۇزەت مۇناراسىندا» باسىلعان «سەنىڭ ەسىمىڭ كيەلى بولسىن!» دەگەن ماقالاعا ساي، ەحوبانىڭ اتى مەن بۇكىلالەمدىك بيلىگىنە قاتىستى تۇسىنىگىمىز قالاي تەرەڭدەدى؟
سول ماقالادان بىلگەنىمىزدەي، سانالى جاراتىلىستاردىڭ بارلىعىنا قاتىسى بار ەڭ ماڭىزدى ماسەلە بىرەۋ عانا، ول — ەحوبانىڭ ۇلى اتىنىڭ كيەلى تۇتىلۋى. ال ەحوبانىڭ بۇكىلالەمدىك بيلىگىنىڭ دۇرىستىعىنا جانە ادامداردىڭ مىنسىزدىگىنە قاتىستى ماسەلەلەر وسى ٴبىر ۇلكەن ماسەلەنىڭ ەكى قىرى.
نەلىكتەن ٴبىز ەڭ باستى ماسەلە — ەحوبانىڭ اتى مەن ونىڭ كيەلى تۇتىلۋى دەيمىز؟ بۇنىڭ ٷش سەبەبىن قاراستىرايىق.
ەدەم باعىنداعى بۇلىكتەن بەرى شايتان ەحوبانىڭ اتىنا جالا جاۋىپ كەلەدى
بىرىنشىدەن، شايتان ەدەم باعىندا ەحوبانىڭ اتىنا، ياعني ابىرويىنا ٴتيىستى. ول حاۋاعا: «قۇداي سەندەرگە باقتاعى ەشبىر اعاشتىڭ جەمىسىن جەمەڭدەر دەپ شىنىمەن ايتتى ما؟»— دەگەن قۋ سۇراق قويدى. وسىلايشا ەحوبانى پەيىلى تار ٵرى ٶزىنىڭ جاراتىلىستارىنا ادىلەتسىز تالاپتار قوياتىن قۇداي دەپ مەڭزەدى. ال كەيىن ەحوبانىڭ سوزدەرىن جوققا شىعارىپ، ونى وتىرىكشى ەتىپ كورسەتتى. مىنە، وسىلاي شايتان ەحوبانىڭ اتىن قارالاپ، جالا جاپتى. ال ٶزى «جالاقور» دەگەندى بىلدىرەتىن «ىبىلىسكە» اينالدى (جوح. 8:44). ونىڭ سوزىنە ەرگەن حاۋا بولسا ەحوبانىڭ ٴتىلىن الماي، بۇكىلالەمدىك بيلىگىنە قارسى شىقتى (مۇس. 1-ج. 3:1—6). ٵلى كۇنگە دەيىن شايتان ەحوبا تۋرالى نەشە ٴتۇرلى وتىرىكتى تاراتىپ، جاماناتتى قىلىپ كەلەدى. ال ونىڭ وتىرىگىنە سەنەتىن ادامداردىڭ، ارينە، ەحوبانىڭ ٴتىلىن الۋى ەكىتالاي. ەحوبانىڭ قاسيەتتى ەسىمىنە وسىلاي جالا جابىلعانى — ونىڭ حالقى ٷشىن ەڭ سوراقى ادىلەتسىزدىك. الەمدەگى بۇكىل قايعى-قاسىرەت پەن زۇلىمدىقتىڭ تۇپكى سەبەبى — وسى.
ەكىنشىدەن، ەحوبا ٶز اتىن بارلىق جالادان تازارتىپ، اقتاۋعا نىق بەكىنگەن ٵرى بۇل بۇكىل جاراتىلىستاردىڭ يگىلىگىنە اسادى. ەحوبا ٷشىن ەسىمىنىڭ كيەلى تۇتىلۋىنان اسقان ماڭىزدى نارسە جوق. سوندىقتان ول: «ۇلى ەسىمىمدى مىندەتتى تۇردە كيەلى ەتەمىن»،— دەگەن (ەزەك. 36:23). يسا دا دۇعادا قۇدايدىڭ «ەسىمىنىڭ كيەلى تۇتىلۋىن» سۇراڭدار دەۋىمەن، ٴبىزدىڭ ەڭ باستى تىلەگىمىز وسى بولۋ كەرەكتىگىن كورسەتكەن (مات. 6:9). كيەلى كىتاپتا ەحوبانىڭ ەسىمى داڭقتالۋ كەرەكتىگىنە قايتا-قايتا ەكپىن تۇسىرىلەدى. سونداي تارماقتاردىڭ كەيبىرى مىنالار: «ەحوبانى ەسىمىنە لايىق دارىپتەڭدەر» (شەج. 1-ج. 16:29؛ ٴزاب. 96:8)؛ «ۇلى ەسىمىن ماداقتاپ، ٵن سالىڭدار» (ٴزاب. 66:2)؛ «ماڭگىلىك بويى ەسىمىڭدى ماداقتايمىن» (ٴزاب. 86:12). سونداي-اق ەحوبانىڭ ٶزى كوكتەن سويلەگەن جاعدايلاردىڭ بىرەۋىن الايىقشى. يەرۋساليمدەگى عيباداتحانادا يسا: «اكە، ەسىمىڭدى داڭقتاي كور»،— دەگەندە، ەحوبا كوكتەن: «مەن ونى داڭقتادىم، تاعى دا داڭقتايمىن»،— دەپ جاۋاپ بەرگەن (جوح. 12:28) a.
ۇشىنشىدەن، ەحوبانىڭ نيەتى بويىنشا، ونىڭ اتى ماڭگى باقي داڭقتالا بەرۋ كەرەك. ماسەلەن، ٴماسىحتىڭ مىڭجىلدىق بيلىگىنىڭ سوڭىندا اقىرعى سىناقتان كەيىن نە بولاتىنىن ەلەستەتىپ كورەيىك. ەحوبانىڭ ەسىمىنىڭ كيەلى تۇتىلۋى سانالى جاراتىلىستار اراسىندا ەڭ ۇلكەن ماسەلە بولىپ قالا بەرە مە؟ بۇل سۇراققا جاۋاپ بەرۋ ٷشىن وسى ماسەلەنىڭ ەكى قىرىن، ياعني ادامداردىڭ مىنسىزدىگىمەن جانە بۇكىلالەمدىك بيلىكپەن نە بولاتىنىن قاراستىرايىق. ول كەزدە ادال ادامدارعا مىنسىزدىكتەرىن ٵرى قاراي دا دالەلدەۋدىڭ قاجەتى بولمايدى، ويتكەنى ولار كەمەلدىلىككە جەتىپ، تولىق سىنالىپ قويعان. الدا ولار ماڭگى ٶمىر سۇرەدى. ال ەحوبانىڭ بۇكىلالەمدىك بيلىگىنە كەلەر بولساق، سانالى جاراتىلىستار اراسىندا ول ەندى داۋعا سالىنىپ، ماسەلە بولىپ كوتەرىلمەيدى. ويتكەنى ەحوبانىڭ بيلىگى بارىنەن ۇستەم ٵرى دۇرىس ەكەنى ٴبىرجولاتا مويىندالادى. ال ەحوبانىڭ اتىمەن نە بولادى؟
سول كەزدە ونىڭ اتى بارلىق جالادان تازارىپ، تولىقتاي كيەلى تۇتىلادى. الايدا ەحوبانىڭ اتى ونىڭ بۇكىل سانالى جاراتىلىستارى ٷشىن ەڭ باستى نارسە بولىپ قالا بەرەدى. نەلىكتەن؟ ويتكەنى ەحوبانىڭ ٴبىز ٷشىن جاسايتىن تاڭعاجايىپ جاقسىلىقتارى ەش تاۋسىلمايدى، ماڭگىلىككە سوزىلادى. وسى ويدى ٴبىراز تارقاتىپ كورەيىكشى. ٶز مەرزىمى اياقتالعاندا يسا بار بيلىكتى ەحوبانىڭ قولىنا تاپسىرىپ، «قۇداي بىردەن-ٴبىر بيلەۋشى بولادى» (قور. 1-ح. 15:28). سودان كەيىن ادامزات «قۇداي بالالارىنىڭ سالتاناتتى بوستاندىعىنا جەتىپ»، سونىڭ راقاتىن كورەدى (ريم. 8:21). سول كەزدە ەحوبانىڭ كوك پەن جەردەگىلەردىڭ ٴبارىن بىرىكتىرىپ، ۇلكەن ٴبىر وتباسى قىلامىن دەگەن ٵۋ باستاعى نيەتى تولىقتاي جۇزەگە اسادى (ەفەس. 1:10).
وسى وزگەرىستەر ەحوبانىڭ كوكتەگى جانە جەردەگى جاراتىلىستارىنان تۇراتىن وتباسىنا قالاي اسەر ەتەدى؟ ولاردىڭ ەحوبانىڭ كوركەم ەسىمىنە ماداق جاۋدىرا بەرۋگە دەگەن قالاۋى تاسىپ تۇرادى. «ەحوبا ماداقتالسىن! ونىڭ ۇلى ەسىمى ماڭگى دارىپتەلسىن»،— دەپ ٴداۋىت جازىپ كەتكەندەي، ٴبىز ونىڭ اتىن ماڭگى دارىپتەي بەرمەكپىز (ٴزاب. 72:18، 19). ويتكەنى ول ٴبىزدى ٵردايىم جاڭا ٴبىر نارسەمەن تامساندىرىپ وتىرماق.
سايىپ كەلگەندە، ەحوبانىڭ اتى ول تۋرالى بارلىق نارسەنى دە قامتيدى. ەحوبا دەگەندە، ٴبىز اسىرەسە ونىڭ سۇيىسپەنشىلىگىن ويعا الامىز (جوح. 1-ح. 4:8). ول ٴبىزدى سۇيىسپەنشىلىكپەن جاراتقانىن، سۇيگەندىكتەن تولەم قۇرباندىعىن بەرگەنىن جانە ٶز بيلىگىن ەڭ دۇرىس جولمەن جانە سۇيىسپەنشىلىكپەن جۇرگىزەتىنىن ٴبىز ەشقاشان دا ۇمىتپايمىز. دەسە دە ٴبىز ەحوبانىڭ بىزگە قالاي مەيىر-ماحابباتىن توگەتىنىن ٵرى قاراي دا كورە بەرەمىز. ناتيجەسىندە، ماڭگى باقي اكەمىزگە جاقىنداي ٴتۇسىپ، ونىڭ ۇلى ەسىمىنە ماداق ٵنىن جاۋدىرا بەرەمىز (ٴزاب. 73:28).
