باسقالارمەن جاقسى قىزمەتتەسەسىز بە؟
«ونىڭ قاسىندا شەبەر جۇمىسشى بولدىم... الدىندا ٵردايىم شاتتانىپ ٴجۇردىم» (ناق. س. 8:30). بۇل سوزدەر كوكتە سان عاسىرلار بويى اكەسىمەن بىرگە جۇمىس ىستەگەن يسا جايىندا. قۇدايمەن قىزمەتتەسكەنى ونى قانداي سەزىمگە بولەگەنىن بايقادىڭىز با؟ ول «ٵردايىم شاتتانىپ جۇرگەن».
يسا كوكتە اكەسىنەن ۇيرەنگەننىڭ ارقاسىندا جەرگە كەلگەندە باسقالارمەن جاقسى قىزمەتتەستى. ٴقازىر ونىڭ ۇلگىسىن قاراستىرا وتىرىپ، ٷش پرينسيپكە نازار اۋدارامىز. بۇل پرينسيپتەر بىزگە وزگەلەرمەن جۇمىلا ٵرى جاقسى قىزمەتتەس بولۋعا كومەكتەسەدى.
ەحوبا مەن يسانىڭ ۇلگىسىن ويدا ۇستاپ، تاجىريبەڭىزبەن جانە بىلىمىڭىزبەن بولىسۋگە دايار بولىڭىز
1-پرينسيپ: «ٴبىر-بىرىڭە قۇرمەت كورسەتىڭدەر»
وزگەلەرمەن جاقسى قىزمەتتەسەتىن ادام كىشىپەيىل بولادى. ول ارىپتەستەرىن باعالايدى جانە وزىنە نازار اۋدارتۋعا تىرىسپايدى. يسا كىشىپەيىل بولۋدى اكەسىنەن ۇيرەنگەن. ەحوبا «جاراتۋشى» دەگەن اتقا ٶزى عانا لايىق بولسا دا، يسانىڭ دا ماڭىزدى ٴرول اتقارعانىنا نازار اۋدارعان. بۇنى ونىڭ: «وزىمىزگە ۇقساس ەتىپ ادام جاراتايىق»،— دەگەن سوزدەرىنەن بايقايمىز (مۇس. 1-ج. 1:26). ەحوبانىڭ وسى سوزدەرى مەن كىشىپەيىلدىلىگىن يسا باعالاعانى ٴسوزسىز (ٴزاب. 18:35).
يسا دا جەردە جۇرگەن كەزىندە ەحوبا سياقتى كىشىپەيىل بولعان. ادامدار ىستەگەن جاقسىلىقتارى ٷشىن ونى ماقتاعاندا، ول ماداققا تەك قۇداي عانا لايىق ەكەنىن ايتىپ وتىرعان (مار. 10:17، 18؛ جوح. 7:15، 16). شاكىرتتەرى يسانىڭ جانىندا وزدەرىن ەركىن ٵرى جايلى سەزىنگەن. يسا ولارعا قۇل دەپ ەمەس، دوستارىم دەپ قاراعان (جوح. 15:15). ٴتىپتى اياقتارىن جۋىپ، كىشىپەيىلدىلىككە ۇيرەتكەن (جوح. 13:5، 12—14). ٴبىز دە وزىمىزبەن قىزمەتتەس باۋىرلاستاردى باعالاساق جانە ولاردىڭ مۇددەلەرىن وزىمىزدىكىنەن جوعارى قويساق، يساعا ەلىكتەيمىز. ماقتاۋ-ماراپاتقا كىم يە بولاتىنىن ويلاماي، ٴبىر-بىرىمىزگە قۇرمەت كورسەتسەك، ەڭبەگىمىز الدەقايدا جەمىستى بولادى (ريم. 12:10).
كىشىپەيىل ادام «كەڭەسشى كوپ بولسا، [جوسپار] جۇزەگە اساتىنىن» تۇسىنەدى (ناق. س. 15:22). تاجىريبەلى، قابىلەتتى بولساق تا، بىلمەيتىن نارسەمىز كوپ ەكەنىن مويىنداۋىمىز كەرەك. ٴتىپتى يسا دا كەيبىر نارسەنى بىلمەيتىنىن ايتقان (مات. 24:36). ول كەمەلدى بولسا دا، كەمەلسىز شاكىرتتەرىنىڭ ويلارىن سۇراپ وتىرعان (مات. 16:13—16). يسامەن قىزمەتتەسكەن ادام ٶزىن وتە جايلى سەزىنگەنىندە كۇمان جوق! ٴبىز دە باسقالارمەن قىزمەتتەسكەندە، وسال جاقتارىمىزدى مويىنداساق جانە وزگەلەرگە ۇلەس قوسۋعا مۇمكىندىك بەرسەك، ارامىزدا بىرلىك بولادى. سونداي-اق «جوسپارىمىز جۇزەگە اسادى».
اسىرەسە اقساقالدار ٶزارا قىزمەتتەسكەندە يسانىڭ كىشىپەيىلدىلىگىنە ەلىكتەگەندەرى ماڭىزدى. ولار كيەلى رۋحتىڭ اقساقالدار كەڭەسىندە كەز كەلگەن اقساقالعا اسەر ەتە الاتىنىن ۇمىتپاۋلارى كەرەك. سوندىقتان ولار ٵرقايسىسى ٶز ويىن ەركىن ايتا الاتىنداي جاعداي جاساسا، وندا بۇكىل قاۋىمعا پايدالى بولاتىن شەشىم قابىلداي الادى.
2-پرينسيپ: «يلىككىش ەكەندەرىڭدى جۇرتتىڭ ٴبارى كورەتىن بولسىن»
وزگەلەرمەن جاقسى قىزمەتتەسەتىن ادام يلىككىش بولادى. يسا كوكتەگى اكەسىنىڭ كوپ جاعدايدا يلىككىشتىك تانىتقانىن كورگەن. مىسالى، ادامدار ولىمگە لايىق بولسا دا، ولاردى قۇتقارۋ ٷشىن ەحوبا تولەم بەردى (جوح. 3:16).
يسا دا ورىندى جاعدايلاردا يلىككىش بولعان. مىسالى، ول يسرايل حالقىنا جىبەرىلگەن بولسا دا، بىردە فينيكيالىق ايەلگە كومەكتەسكەن (مات. 15:22—28). شاكىرتتەرىمەن ٶزارا قارىم-قاتىناسىندا دا ول يلىككىش بولعان. جاقىن دوسى پەتىر ودان جۇرت الدىندا باس تارتقاندا، يسا ونى كەشىردى. ٴتىپتى كەيىنىرەك وعان ۇلكەن ىستەردى سەنىپ تاپسىردى (لۇقا 22:32؛ جوح. 21:17؛ ەل. ٸس. 2:14؛ 8:14—17؛ 10:44، 45). يسانىڭ ۇلگىسىنەن تۇسىنەتىنىمىز: ٴبىزدىڭ يلىككىش ەكەنىمىز جۇرتتىڭ بارىنە ارەكەتتەرىمىزدەن كورىنۋى كەرەك (ٴفىلىپ. 4:5 ٴسىلت.).
يلىككىش ادام ٵرتۇرلى ادامدارمەن دە قىزمەتتەسىپ، ولارعا بەيىمدەلە الادى. يسا دا حابارىنا قۇلاق اسقان ٴتۇرلى ادامدارعا بەيىمدەلگەن. جاۋلارى قىزعانىپ، ول جايىندا: «ٶزى سالىقشىلار مەن كۇناكارلاردىڭ دوسى ەكەن»،— دەگەن (مات. 11:19). ٴبىز دە ٵرتۇرلى ادامدارمەن يسا سياقتى قىزمەتتەسەمىز بە؟ لۋيس دەگەن ەر باۋىرلاس اۋداندىق باقىلاۋشى بولعاندا جانە بەتەلدە قىزمەت ەتكەندە، ٴتۇرلى ورتادان شىققان باۋىرلاستارمەن ارالاسقان. ول بىلاي دەيدى: «مەن ٴتۇرلى ادامدارمەن قىزمەتتەسكەندە، پىشىندەرى ٵرتۇرلى تاستاردان قابىرعا تۇرعىزىپ جاتقانداي بولاتىنمىن. ولاردى ٴبىر-بىرىنە قالاۋ ٷشىن كۇش سالۋ كەرەكتىگى راس، ٴبىراق قابىرعانى ٴتۇزۋ قىلىپ شىعارۋعا بولادى. باۋىرلاستارمەن بىرلەسە اتقارعان ەڭبەگىمىز جەمىستى بولۋ ٷشىن، مەن دە يلىككىش بولۋعا كوپ كۇش سالدىم».
جاقسى قىزمەتتەسەتىن ادام «بىلگەنىممەن بولىسسەم، ٶز ىقپالىمنان ايىرىلىپ قالامىن» دەپ قورىقپايدى
جەرگىلىكتى قاۋىمدا قانداي ىستەردە قىزمەتتەستىك رۋحىن تانىتساق بولادى؟ مىسالى، ۋاعىزدايتىن توبىمىزبەن قىزمەت ەتكەندە. ٴبىزدىڭ توپتاعى جاريالاۋشىلاردىڭ وتباسىلىق جاۋاپكەرشىلىكتەرى نەمەسە جاستارى ٵرتۇرلى شىعار. ولار قىزمەتتەن كوبىرەك قۋانىش الۋلارى ٷشىن، سولاردىڭ جىلدامدىعىنا جانە تاڭداعان قىزمەت تۇرىنە بەيىمدەلە الاسىز با؟
3-پرينسيپ: «بولىسۋگە دايار بولىڭىز»
باسقالارمەن جاقسى قىزمەتتەسەتىن ادام «بولىسۋگە دايار» (ٴتىم. 1-ح. 6:18). يسا اكەسىمەن قىزمەتتەسكەندە، ونىڭ اتقارىپ جاتقان ٸسىن جاسىرماي، اشىق جاسايتىنىن بايقاسا كەرەك. ەحوبا «اسپاندى دايىنداعاندا»، يسا «سوندا بولىپ»، ودان ۇيرەنگەن (ناق. س. 8:27). كەيىن ول «اكەسىنەن ەستىگەندەرىنىڭ ٴبارىن» شاكىرتتەرىنە دە قۋانا ۇيرەتكەن (جوح. 15:15). ٴبىز دە باۋىرلاستارمەن بىلىمىمىزبەن جانە تاجىريبەمىزبەن بولىسۋگە اسىق بولۋىمىز كەرەك. ٴبىز «باسقالار دا ٴبىلۋى كەرەك نەمەسە ولارعا پايدالى بولاتىن مالىمەتتى ايتا بەرسەم، كەيىن ٶز بيلىگىمنەن، ورنىمنان ايىرىلىپ قالامىن عوي» دەپ ويلامايمىز. قايتا، بىلگەنىمىزبەن ٴبولىسىپ، ولارعا كومەكتەسۋگە قۋانىشتىمىز.
قىزمەتتەس باۋىرلاستارىمىزعا جىگەرلى سوزدەر ايتىپ وتىرۋ دا ماڭىزدى. بىرەۋ ەڭبەگىمىزدى بايقاپ، شىن جۇرەكتەن العىس ٴبىلدىرىپ جاتسا، وتە ريزا بولىپ قالامىز، سولاي ەمەس پە؟! يسا دا شاكىرتتەرىنىڭ جاقسى ىستەرىن بايقاپ، ماقتاپ وتىرعان (ماتاي 25:19—23؛ لۇقا 10:17—20 سالىستىرىڭىز). ول ٴتىپتى شاكىرتتەرىنىڭ وزىنىكىنەن دە «زور ىستەر جاسايتىنىن» ايتقان (جوح. 14:12). ولەر الدىنداعى ٴتۇنى ول ادال ەلشىلەرىن: «قيىندىققا ۇشىراعان كەزدەرىمدە مەنىمەن بىرگە بولعان سەندەرسىڭدەر»،— دەپ ماقتاعان (لۇقا 22:28). بۇل سوزدەر بويلارىنا قانات ٴبىتىرىپ، ودان دا كوپ جاقسىلىق ىستەۋگە تالپىندىرعانى ٴسوزسىز! ٴبىز دە ۋاقىت ٴبولىپ، قىزمەتتەس باۋىرلاستارىمىزدى ماقتاپ وتىرساق، قۋانىشتارى ارتىپ، ال ەڭبەكتەرى ونىمدىرەك بولا تۇسەدى.
ٴسىز جاقسى قىزمەتتەس بولا الاسىز!
كايود دەگەن ەر باۋىرلاس بىلاي دەيدى: «جاقسى قىزمەتتەسۋ ٷشىن كەمەلدى بولۋدىڭ قاجەتى جوق. ٴبىراق اينالامىزعا شۋاق شاشىپ، اۋىر جۇمىستى وزگەلەر ٷشىن جەڭىلدەتە الامىز». ٴسىز وسىنداي قىزمەتكەرسىز بە؟ بۇنى ٴبىلۋ ٷشىن ٴماسىحشى ارىپتەستەرىڭىزدىڭ ويلارىن سۇراپ كورسەڭىز بولادى. ولار وزدەرىن ٴسىزدىڭ قاسىڭىزدا يسامەن قىزمەتتەسكەن شاكىرتتەر سياقتى سەزىنسە، ٴسىز دە پاۋىل سياقتى بىلاي ايتا الاسىز: «قۋانىشتى بولۋلارىڭ ٷشىن وزدەرىڭمەن قىزمەتتەسىپ ٴجۇرمىز» (قور. 2-ح. 1:24).
