53-زەرتتەۋ ماقالاسى
جاس ەر باۋىرلاستار، قالاي رۋحاني تولىسقان ەر ازامات بولا الاسىڭدار؟
«سەن كۇشتى دە باتىل ەر ازامات بول!» (پات. 1-ج. 2:2، «جاڭا ٶمىر» باسپاسى).
135-ٵن ەحوبانىڭ شاقىرۋى: «اقىلدى بول، بالام»
اڭداتپا a
1. ەر باۋىرلاس جەتىستىككە جەتۋ ٷشىن نە ىستەۋ قاجەت؟
ٴداۋىت پاتشا ۇلى سۇلەيمەنگە: «كۇشتى دە باتىل ەر ازامات بول!»— دەپ وسيەت ەتكەن (پات. 1-ج. 2:1—3، «جاڭا ٶمىر» باسپاسى). بارلىق ەر باۋىرلاستارىمىز وسى سوزدەرگە ساي بولعانى ٴجون. بۇل ٷشىن ولار قۇداي زاڭدارىن ۇستانىپ، ٶمىردىڭ ٵر سالاسىندا كيەلى كىتاپ پرينسيپتەرىنە ساي ارەكەت ەتۋدى ۇيرەنۋ قاجەت (لۇقا 2:52). قاۋىمداعى جاس جىگىتتەرىمىزدىڭ نەلىكتەن رۋحاني تولىسقان ەر ازاماتقا اينالعانى ماڭىزدى؟
2، 3. نەگە جاس ەر باۋىرلاستىڭ رۋحاني تولىسقان ەر ازامات بولعانى ماڭىزدى؟
2 ٴماسىحشى ەر ازاماتتىڭ وتباسىندا بولسىن، قاۋىمدا بولسىن اتقاراتىن ٴرولى تاۋداي. جاس ەر باۋىرلاستار، سەندەر بولاشاقتا مويىندارىڭا الاتىن جاۋاپكەرشىلىكتەر جايلى ويلانىپ جۇرگەن بولارسىڭدار. مىسالى، تولىق ۋاقىتتى قىزمەتشى، قىزمەت كومەكشىسى، كەيىن اقساقال بولامىن دەگەن ماقساتتارىڭ بار شىعار. سونداي-اق ۇيلەنىپ، اكە بولۋدى دا قالايتىن شىعارسىڭدار (ەفەس. 6:4؛ ٴتىم. 1-ح. 3:1). وسى ماقساتتارىڭا جەتۋ ٷشىن ٵرى سولاردى جاقسى اتقارۋ ٷشىن رۋحاني تولىسقاندارىڭ b اسا ماڭىزدى.
3 ال ٴماسىحشى رەتىندە ٴپىسىپ-جەتىلۋ ٷشىن نە ىستەسەڭ بولادى؟ بويىڭا بەلگىلى ٴبىر قاسيەتتەر مەن قابىلەتتەردى ٴسىڭىرىپ الۋىڭ ٴتيىس. ەندەشە، سول بولاشاقتاعى مىندەتتەرىڭە دايىندالىپ، سولاردى جاقسى اتقارۋ ٷشىن نە ىستەي الاسىڭ؟
رۋحاني تولىسا ٴتۇسۋ ٷشىن...
يسانىڭ تاماشا قاسيەتتەرىنە ەلىكتەسەڭ، رۋحاني تولىسقان ەر ازامات بولا الاسىڭ (4-ابزاستى قارا)
4. كىمدەردەن ۇلگى-ونەگە الساڭ بولادى؟ (سۋرەتتى دە قارا.)
4 ۇلگى بولارلىق ەرلەرگە ەلىكتە. كيەلى كىتاپتا جاس جىگىتتەرگە ۇلگى قالدىرىپ كەتكەن ەر كىسىلەر وتە كوپ. ولار قۇدايدى سۇيگەن ٵرى ونىڭ حالقىنىڭ قامى ٷشىن ٴتۇرلى مىندەتتەر اتقارعان. ٶز ۇيىڭدەگى نە قاۋىمداعى تولىسقان ەر باۋىرلاستاردان دا ۇيرەنسەڭ بولادى (ەۆر. 13:7). ونىڭ ۇستىنە، يسانىڭ كورسەتكەن كەمەلدى ۇلگىسى بار (پەت. 1-ح. 2:21). ولاردىڭ قاي قاسيەتتەرىنە تامسانا قارايسىڭ؟ (ەۆر. 12:1، 2). وسى جايلى ويلانىپ، ولارعا ناقتى قالاي ەلىكتەيتىنىڭدى قاراستىر.
5. سانالى بولۋدى قالاي ۇيرەنە الاسىڭ جانە نەگە بۇل ماڭىزدى؟ (ٴزابۇر 119:9)
5 «سانالىلىقتى» دامىتىپ، ساقتا (ناق. س. 3:21). سانالى ادام بىردەڭە ىستەمەس بۇرىن جاقسىلاپ ويلانىپ الادى. سوندىقتان سانالىلىققا ۇيرەنىپ، ودان ايىرىلماۋعا بارىنشا كۇش سال. نەگە بۇلاي ەتكەنىڭ ماڭىزدى؟ ويتكەنى مىنا دۇنيەدە كوپتەگەن جاس جىگىتتەر تەك ٶزىنىڭ اقىل-ساناسىنا سۇيەنەدى نەمەسە ەموسياسىنىڭ جەتەگىمەن ارەكەت ەتەدى (ناق. س. 7:7؛ 29:11). قازىرگى اقپارات قۇرالدارى دا ساعان قاتتى ىقپال ەتۋى مۇمكىن. ەندەشە، سانالىلىقتى قايدان ۇيرەنسەڭ بولادى؟ الدىمەن كيەلى كىتاپ پرينسيپتەرىن جانە ولاردىڭ نەلىكتەن پايدالى ەكەنىن ٴبىلىپ ال. كەيىن سول پرينسيپتەردى ومىرىڭدە قولدانىپ، ەحوباعا ۇنامدى شەشىمدەر قابىلداپ ۇيرەن (ٴزابۇر 119:9 وقى). بۇل سەنىڭ رۋحاني تولىسقان ەر ازامات بولۋىڭا كومەكتەسەتىن وتە ماڭىزدى ادەت (ناق. س. 2:11، 12؛ ەۆر. 5:14). ال قازىر سانالىلىق ساعان مىنا ەكى سالادا قالاي كومەك بولارىن بىلەيىك: 1) قىز باۋىرلاستارمەن ارالاسقاندا، 2) سىرت كورىنىسىڭە كەلگەندە.
6. سانالى جاس ەر باۋىرلاس قىز باۋىرلاستارعا قالاي قۇرمەت تانىتادى؟
6 ەحوبا سياقتى ويلانۋدى ۇيرەنگەن ەر ازامات ايەل زاتىن قۇرمەتتەيدى. جاس ەر باۋىرلاس ٴبىر قىز باۋىرلاسپەن جاقىنىراق ارالاسقىسى كەلسە، بۇل تابيعي جايت جانە وندا تۇرعان ەشتەڭە جوق. ٴبىراق جىگىتتىڭ قىزعا ۇيلەنۋگە شىن نيەتى بولماسا، ول قىزدا كوڭىلى بارداي وي قالدىراتىن ەشتەڭە ايتپايدى دا، جازبايدى دا، ىستەمەيدى دە. وسىلاي ول سانالى ارەكەت ەتەدى (ٴتىم. 1-ح. 5:1، 2). ال ەگەر قىز باۋىرلاسپەن كەزدەسىپ جۇرگەن بولسا، ول ونىڭ ابىرويىن ويلاپ، ەشقاشان ونىمەن جالعىز قالمايدى، ٷشىنشى ادامدى ەرتىپ جۇرەدى (قور. 1-ح. 6:18).
7. كيىم مەن شاش ۇلگىسىن تاڭداعاندا جاس ەر باۋىرلاس قالاي سانالى بولا الادى؟
7 سونداي-اق سانالىلىق دامىتقان جاس جىگىت كيىم مەن شاش ۇلگىسىن اقىلمەن تاڭدايدى. بۇگىندە ٴساندى ترەندتەردى شىعارىپ، جارنامالايتىن ادامداردىڭ دەنى ەحوبانى قاستەرلەمەيدى يا ونەگەسىز ٶمىر كەشەدى. وسىنداي كوزقاراستاعى ادامدار ەرلەردىڭ كيىم ۇلگىلەرىن دەنەگە جابىسىپ تۇراتىن نە ايەلدەردىكىنە ۇقساس ەتىپ شىعارادى. سوندىقتان تولىسقان ٴماسىحشى بولۋعا ۇمتىلاتىن جاس ەر باۋىرلاس كيىم تاڭداعاندا كيەلى كىتاپ پرينسيپتەرىن ۇستانادى ٵرى قاۋىمداعى ۇلگىلى باۋىرلاستارعا ەلىكتەيدى. ول ٶزىن بىلاي دەپ تەكسەرسە بولادى: «مەنىڭ سىرت كورىنىسىمنەن پاراساتتىلىعىم مەن وزگەلەردىڭ سەزىمىن ەسكەرەتىنىم بايقالا ما؟ كيگەن كيىمىمنەن قۇدايعا قىزمەت ەتەتىن ادام ەكەنىم بىردەن كورىنە مە؟» (قور. 1-ح. 10:31—33؛ تيت. 2:6). سانالىلىقپەن ارەكەت ەتەتىن جىگىت باۋىرلاستارىنىڭ عانا ەمەس، كوكتەگى اكەسى ەحوبانىڭ دا سي-قۇرمەتىنە بولەنەدى.
8. جاس ەر باۋىرلاس قالاي سەنىمدى ادام بولۋدى ۇيرەنەدى؟
8 سەنىمدى اقتايتىن ادام بول. سەنىمدى اقتاي بىلەتىن جاس جىگىت بۇكىل جاۋاپكەرشىلىكتەرىن ۇقىپتى اتقارادى (لۇقا 16:10). مىسالى، يسا ەشقاشان دا جاۋاپسىز بولىپ، مىندەتىنە ٵتۇستى قاراماعان. ول ەحوبانىڭ تاپسىرعان ٸسىن، ٴتىپتى قيىنعا سوققان كەزدە دە، اتقارىپ شىققان. ول ادامداردى، اسىرەسە ٶز شاكىرتتەرىن، جاقسى كورگەن جانە ولار ٷشىن ٶمىرىن قيعان (جوح. 13:1). سەن دە يساعا ەلىكتەپ، وزىڭە جۇكتەلگەن كەز كەلگەن تاپسىرمانى تياناقتى اتقارۋعا بارىڭدى سال. ال ەگەر تاپسىرمانى قالاي ورىنداۋدى بىلمەي جاتساڭ، كىشىپەيىلدىلىك تانىتىپ، تولىسقان ەر باۋىرلاستاردىڭ كومەگىنە جۇگىن. «ايتەۋىر جوقتان جاقسى عوي» دەپ، ٴتيىپ-قاشىپ ىستەي سالما (ريم. 12:11). قايتا، «ادامدار ٷشىن ەمەس، ەحوبا ٷشىن ىستەگەندەي» سوڭىنا دەيىن جەتكىز (قول. 3:23). ارينە، كەمەلسىز ەكەنىڭدى دە ۇمىتپاي، قاراپايىم بول جانە قاتەلىكتەرىڭدى مويىنداي ٴبىل (ناق. س. 11:2).
قاجەتتى قابىلەتتەردى مەڭگەرىپ ال
9. نەلىكتەن جاس ەر باۋىرلاستىڭ ومىرگە قاجەتتى قابىلەتتەردى مەڭگەرىپ العانى ابزال؟
9 رۋحاني تولىسقان ەر ازامات بولۋ ٷشىن ساعان ومىرگە قاجەتتى قابىلەتتەردى ۇيرەنىپ الۋ كەرەك. بۇل ساعان قاۋىمداعى مىندەتتەرىڭدى اتقارۋعا، ٶزىڭدى يا وتباسىڭدى اسىراۋ ٷشىن جۇمىس ىستەۋگە جانە باسقالارمەن جاقسى قارىم-قاتىناستا بولۋعا كومەكتەسەدى. اسا قاجەت بولاتىن قابىلەتتەردىڭ كەيبىرىن قاراستىرايىق.
دۇرىس وقىپ-جازا بىلگەنىڭ ٶزىڭنىڭ دە، قاۋىمنىڭ دا پايداسىنا اسادى (10، 11-ابزاستاردى قارا)
10، 11. ەر باۋىرلاستىڭ وقۋ-جازۋدى ۇيرەنگەنى وزىنە جانە قاۋىمعا نەگە پايدالى؟ (ٴزابۇر 1:1—3) (سۋرەتتى دە قارا.)
10 دۇرىس وقىپ-جازۋدى ۇيرەن. كيەلى جازبالاردا قۇداي ٴسوزىن كۇن سايىن وقىپ، وي جۇگىرتەتىن ادامنىڭ باقىتتى ٵرى ونىڭ ٵربىر ٸسى ٴساتتى بولاتىنى ايتىلعان (ٴزابۇر 1:1—3 وقى). كيەلى كىتاپتى كۇندەلىكتى وقىساڭ، ەحوبانىڭ ويىن جاقسىراق بىلەسىڭ. وسىلايشا سارالاپ-سالماقتاۋدى جانە جازبالارعا ساي ارەكەت ەتۋدى ۇيرەنەسىڭ (ناق. س. 1:3، 4). ال قاۋىمعا مۇنداي ەر باۋىرلاستار وتە قاجەت. نەگە؟
11 قاۋىمداعى باۋىرلاستار كيەلى كىتاپقا نەگىزدەپ باعىت-باعدار سىلتەي الاتىن، كەڭەس بەرە الاتىن ەر ادامدارعا مۇقتاج (تيت. 1:9). دۇرىس وقىپ، ساۋاتتى جازۋدى ۇيرەنسەڭ، قاۋىمدا مازمۇندى ٵرى سەنىمدى نىعايتاتىن باياندامالار ايتىپ، تۇسىنىكتەمەلەر بەرە الاسىڭ. سونداي-اق وسى داعدىنىڭ ارقاسىندا سەن زەرتتەۋ جۇرگىزگەندە، قاۋىمدا، كونگرەستەردە بايانداما تىڭداعاندا پايدالى ويلاردى وزىڭە ٴتۇرتىپ الا الاسىڭ. بۇل جازبالارىڭ ٶز سەنىمىڭدى نىعايتۋعا جانە باسقالاردى جىگەرلەندىرۋگە كومەك بولادى.
12. ادامدارمەن ٴتىل تابىسۋدى ۇيرەنۋ ٷشىن نە ىستەسەڭ بولادى؟
12 ادامدارمەن ٴتىل تابىسۋدى ۇيرەن. ەر باۋىرلاس بۇنى ۇيرەنىپ الۋى ٴتيىس. ادامدارمەن جاقسى ٴتىل تابىسۋ ٷشىن ولاردى قۇلاق قويىپ تىڭداپ، ويلارى مەن سەزىمدەرىن تۇسىنە ٴبىلۋىڭ كەرەك (ناق. س. 20:5). بۇل ٷشىن ادامنىڭ داۋسىنا، بەت-الپەتىنە، دەنە قيمىلدارىنا مۇقيات دەن قويساڭ بولادى. بۇل — ادامدارمەن كوبىرەك ارالاسۋىڭ كەرەك دەگەن ٴسوز. ال ەگەر سەن وزگەلەرمەن تەك ەلەكتروندى حابارلامالار ارقىلى سويلەسەتىن بولساڭ، ولارمەن جۇزبە-ٴجۇز دۇرىستاپ ارالاسا الماي قالاسىڭ. سوندىقتان ادامدارمەن بەتپە-بەت سويلەسۋدىڭ امالىن جاسا (جوح. 2-ح. 12).
ەرتەڭ جۇمىس تابۋ ٷشىن ٴبىر كاسىپتى مەڭگەرىپ العانىڭ جاقسى (13-ابزاستى قارا)
13. جاس جىگىت تاعى نەنى ۇيرەنىپ الۋى ٴتيىس؟ (تىموتەگە 1-حات 5:8) (سۋرەتتى دە قارا.)
13 ٶزىڭدى اسىراي الاتىنداي بول. رۋحاني تولىسقان ەر ازامات ٶزىن جانە وتباسىن اسىراي الۋى شارت (تىموتەگە 1-حات 5:8 وقى). كەيبىر ەلدەردە جاس ەر باۋىرلاستار اكەسىنىڭ نە باسقا ٴبىر تۋىسىنىڭ قاسىندا ٴجۇرىپ، ٴبىر ٸستى يگەرىپ الادى. ال باسقا ٴبىر ەلدەردە ەر باۋىرلاستار ارنايى كۋرستاردان نە كوللەدجدەن قانداي دا ٴبىر كاسىپتى نە ماماندىقتى مەڭگەرىپ شىعادى. قالاي بولعان كۇندە دە، جۇمىس تابا الۋىڭ ٷشىن ٴبىر ٸستى يگەرىپ الۋىڭ كەرەك (ەل. ٸس. 18:2، 3؛ 20:34؛ ەفەس. 4:28). وزگەلەر سەنى ەڭبەكقور، جۇمىستى سوڭىنا دەيىن اپاراتىن ادام دەپ ٴبىلسىن. سوندا ساعان جۇمىس تابۋ جانە سوندا قالۋ وڭاي بولادى. وسى جوعارىدا تالقىلانىپ كەتكەن بۇكىل قاسيەتتەر مەن قابىلەتتەر ەر باۋىرلاستى الداعى مىندەتتەرىنە دە دايىندايدى. ول قانداي مىندەتتەر بولۋى مۇمكىن؟
بولاشاق مىندەتتەرىڭە دايىندال
14. جاس ەر باۋىرلاس تولىق ۋاقىتتى قىزمەتشى بولۋعا قالاي دايىندالسا بولادى؟
14 تولىق ۋاقىتتى قىزمەتشى. رۋحاني تولىسقان ەر باۋىرلاستاردىڭ كوبىسى تولىق ۋاقىت قىزمەت ەتۋدى جاستايىنان باستاعان. ىزاشارلىق قىزمەتتىڭ ارقاسىندا جاس ەر باۋىرلاس ٵرتۇرلى ادامدارمەن قىزمەتتەسىپ، ٴتىل تابىسۋدى ۇيرەنەدى. تاپقان اقشاسىن دۇرىس جۇمساپ، كورپەسىنە قاراي كوسىلۋدى دە ۇيرەنەدى (ٴفىلىپ. 4:11—13). قوسالقى ىزاشارلىق قىزمەت تولىق ۋاقىتتى قىزمەتكە جاقسى باستاما بەرەدى. كوبىسى تۇراقتى ٸزاشار بولۋعا دايىندالۋ ٷشىن ٴبىراز ۋاقىت بويى قوسالقى ٸزاشار رەتىندە قىزمەت ەتەدى. ال ىزاشارلىق قىزمەت بولسا قۇرىلىس ەرىكتىسى نە بەتەلدىك بولۋ سياقتى باسقا دا تولىق ۋاقىتتى قىزمەت تۇرىنە جول اشادى.
15، 16. جاس ەر باۋىرلاس قىزمەت كومەكشىسى نە اقساقال بولۋ ٷشىن نە ىستەسە بولادى؟
15 قىزمەت كومەكشىسى نە اقساقال. بارلىق ەر باۋىرلاستار قاۋىمدا اقساقالدارعا قويىلاتىن تالاپتارعا ساي بولۋعا تىرىسۋى كەرەك. كيەلى كىتاپتا ەر باۋىرلاس وسىنداي مىندەتكە ۇمتىلسا، «ونىڭ يگىلىكتى ٸستى قالاعانى» دەلىنگەن (ٴتىم. 1-ح. 3:1). ەر باۋىرلاس اقساقال بولماس بۇرىن، قىزمەت كومەكشىسى بولۋعا لايىقتى بولۋ كەرەك. قىزمەت كومەكشىلەرى اقساقالدارعا قاۋىمنىڭ ىستەرىن اتقارۋعا كوپ كومەكتەسەدى. اقساقالدار دا، قىزمەت كومەكشىلەرى دە باۋىرلاستارىنا كىشىپەيىلدىلىكپەن قىزمەت ەتەدى ٵرى ۋاعىز ىسىنە قۇلشىنا قاتىسادى. جاس ەر باۋىرلاستار ٴتىپتى 17—19 جاستارىندا دا قىزمەت كومەكشىسى بولىپ تاعايىندالا الادى. ال قابىلەتتى قىزمەت كومەكشىلەرى ٴتىپتى جيىرمالارىندا اقساقال بولىپ تاعايىندالا الادى.
16 قىزمەت كومەكشىسى، كەيىنىرەك اقساقال بولۋ ٷشىن نە ىستەسەڭ بولادى؟ بۇنىڭ ناقتى ٴبىر ەرەجەسى جوق. ٴبىراق كيەلى كىتاپتا قىزمەت كومەكشىسى نە اقساقالدارعا قويىلاتىن تالاپتار جازىلعان جانە بۇل تالاپتار ەحوباعا، وتباسىڭا جانە قاۋىمعا دەگەن سۇيىسپەنشىلىككە نەگىزدەلگەن (ٴتىم. 1-ح. 3:1—13؛ تيت. 1:6—9؛ پەت. 1-ح. 5:2، 3). ٵربىر تالاپتى جاقسىلاپ ٴتۇسىنىپ الىپ، سوعان ساي بولۋ ٷشىن ەحوبادان كومەك سۇراپ، دۇعا ەت c.
ەحوبا كۇيەۋلەردىڭ ايەلى مەن بالالارىن ٴسۇيىپ، ولاردىڭ ماتەريالدىق، ەموسيالىق، ەڭ باستىسى رۋحاني قامىن جاساعانىن قالايدى (17-ابزاستى قارا)
17. جاس ەر باۋىرلاس كۇيەۋ جانە وتاعاسى بولۋعا قالاي دايىندالا الادى؟ (سۋرەتتى دە قارا.)
17 كۇيەۋ جانە وتاعاسى. يسا رۋحاني تولىسقان ەرلەردىڭ كەيبىرى سالتباستى بولىپ قالاتىنىن ايتقان (مات. 19:12). ال ەگەر شاڭىراق كوتەرەمىن دەپ شەشسەڭ، ساعان كۇيەۋ جانە وتاعاسى رەتىندە قوسىمشا جاۋاپكەرشىلىكتەر جۇكتەلەدى (قور. 1-ح. 11:3). ەحوبا كۇيەۋلەردەن ايەلىن اسىرايدى، وعان جاقسى دوس بولادى، رۋحاني مىقتى بولۋعا كومەكتەسەدى دەپ كۇتەدى (ەفەس. 5:28، 29). وسى ماقالادا قاراستىرىلعان سانالى بولۋ، ايەلدەردى قۇرمەتتەۋ، سەنىمدى اقتاي ٴبىلۋ سياقتى قاسيەتتەر مەن قابىلەتتەر ساعان جاقسى كۇيەۋ بولۋعا كومەكتەسەدى. وسىلاي كۇيەۋلىك جانە وتاعالىق مىندەتىڭە جاقسى دايىندالاسىڭ.
18. جاس ەر باۋىرلاس اكە بولۋعا قالاي دايىندالا الادى؟
18 اكە. ۇيلەنگەننەن كەيىن سەن اكە بولۋىڭ مۇمكىن. ال جاقسى اكە بولۋدى سەن ەحوبادان ۇيرەنە الاسىڭ. ەحوبا اكەلەرگە قانداي ۇلگى قالدىرعان؟ (ەفەس. 6:4). ول ٶزىنىڭ ۇلى يسانى جاقسى كورەتىنىن ٵرى وعان ريزا ەكەنىن اشىق ايتقان (مات. 3:17). اكە بولىپ جاتساڭ، سەن دە ۇنەمى بالالارىڭدى جاقسى كورەتىنىڭدى ايتىپ، سەندىرىپ وتىر. جاقسى ىستەرى ٷشىن ولاردان ماقتاۋ ٴسوزىڭدى اياما. ەحوبانى ۇلگى تۇتاتىن اكەلەر رۋحاني تولىسقان ۇل-قىزداردى تاربيەلەپ وسىرەدى. بۇل رولگە قازىردەن باستاپ دايىندالۋ ٷشىن ٷي ىشىندەگىلەرگە جانە قاۋىمداعىلارعا سۇيىسپەنشىلىك تانىتىپ، قامقور بول. ولاردى جاقسى كورەتىنىڭدى، باعالايتىنىڭدى ايتىپ ۇيرەن (جوح. 15:9). وسىنىڭ ارقاسىندا بولاشاقتا جاقسى كۇيەۋ ٵرى جاقسى اكە، ال قازىردىڭ وزىندە ەحوبا ٷشىن، وتباسىڭ مەن قاۋىمىڭ ٷشىن قولعانات بولا الاسىڭ.
قازىر نە ىستەي الاسىڭ؟
جازبالاردان ٴتالىم الىپ، سوعان ساي ارەكەت ەتكەن كوپ جاس ەر باۋىرلاس تولىسقان ٴماسىحشى بولعان (19، 20-ابزاستاردى قارا)
19، 20. قالاي جاس ەر باۋىرلاستار رۋحاني تولىسقان ەر ازاماتتار بولا الادى؟ (مۇقاباداعى سۋرەتتى قارا.)
19 جاس ەر باۋىرلاستار، سەندەر وزدىگىنەن رۋحاني تولىسقان ەر ازامات بولىپ كەتپەيسىڭدەر. بۇل ٷشىن ۇلگى بولاتىن ەرلەرگە ەلىكتەۋلەرىڭ كەرەك. سانالى، سەنىمدى اقتايتىن ادام بولۋلارىڭ كەرەك. قاجەتتى قابىلەتتەردى مەڭگەرىپ، بولاشاقتاعى مىندەتتەرىڭە دايىن بولۋلارىڭ كەرەك.
20 بالكىم، كەيدە سەندەر الداعى اتقاراتىن مىندەتتەردى ويلاپ، شامام جەتە مە ەكەن دەپ ۋايىمدايتىن شىعارسىڭدار. ٴبىراق بۇل قولدارىڭنان كەلەدى. ەستەرىڭدە بولسىن، ەحوبا سەندەرگە كومەكتەسۋگە اسىق (يشايا 41:10، 13). قاۋىمداعى باۋىرلاستارىڭ دا سەندەرگە قولداۋ كورسەتەدى. ەر باۋىرلاس رەتىندە ٴپىسىپ-جەتىلگەندە، ٶمىرىڭ ٴمان-ماعىنا مەن قاناعاتقا تولى بولادى. ٴبىزدىڭ اسا قىمباتتى جاس ەر باۋىرلاستار، سەندەردى جاقسى كورەمىز! تولىسقان ٴماسىحشى بولۋ ٷشىن كۇش سالىپ جاتقان سەندەردى ەحوبا مولىنان جارىلقاسىن! (ناق. س. 22:4).
65-ٵن العا ۇمتىل!
a قاۋىمدارىمىزعا رۋحاني تولىسقان ەر ازاماتتار قاجەت. وسى ماقالادا ٴبىز جاس ەر باۋىرلاستار قالاي تولىسقان ٴماسىحشى بولا الاتىنىن بىلەمىز.
b وتكەن ماقالاداعى «ٴسوز ٴمانىن» قارا.
