52-زەرتتەۋ ماقالاسى
قىز باۋىرلاستار، قالاي رۋحاني تولىسقان ايەل بولا الاسىڭدار؟
«ايەلدەر،.. بارلىق جاعىنان بايسالدى، قاي نارسەدە دە ادال بولۋى ٴتيىس» (ٴتىم. 1-ح. 3:11).
133-ٵن ەحوباعا جاستايىڭنان قىزمەت ەت
اڭداتپا a
1. تولىسقان ٴماسىحشى بولۋ ٷشىن نە ىستەۋ كەرەك؟
بالالاردىڭ دەم ارادا ەسەيىپ كەتەتىنىنە تاڭعالىپ جاتامىز. ولار بۇعان ەش كۇش سالمايدى، وزدىگىنەن ەسەيە بەرەدى. ٴبىراق ٴماسىحشى رەتىندە تولىسىپ، جەتىلۋ ٷشىن ادام كۇش سالۋ كەرەك b (قور. 1-ح. 13:11؛ ەۆر. 6:1). بۇل ٷشىن ونىڭ ەحوبامەن قارىم-قاتىناسى وتە تىعىز بولۋى كەرەك. سونداي-اق وعان بويىندا قۇدايعا ۇنايتىن قاسيەتتەر جەتىلدىرۋ ٷشىن، بەلگىلى ٴبىر قابىلەت-دارىنداردى قالىپتاستىرۋ ٷشىن جانە بولاشاقتا موينىنا الاتىن جاۋاپكەرشىلىكتەرگە دايىن بولۋ ٷشىن كيەلى رۋح قاجەت (ناق. س. 1:5).
2. مۇسانىڭ 1-جازباسى 1:27 دە نە ايتىلعان جانە وسى ماقالادا نە قاراستىرامىز؟
2 ەحوبا ادامداردى ٴبىرىن ەر، ٴبىرىن ايەل ەتىپ جاراتقان (مۇسانىڭ 1-جازباسى 1:27 وقى). ولاردىڭ سىرت كەلبەتىنەن بولەك، ٴبىر-بىرىنەن تاعى ٴبىر ەرەكشەلىكتەرى بار. ەحوبا ولاردىڭ ٴارقايسىسىنا وزىندىك ٴرول بەرگەن. سول رولدەرىن اتقارۋ ٷشىن ولارعا كەيبىر قاسيەتتەر مەن قابىلەتتەر كەرەك (مۇس. 1-ج. 2:18). وسى ماقالادا ٴبىز جاس قىز باۋىرلاستاردىڭ قالاي رۋحاني تولىسقان ايەل بولا الاتىندارىن قاراستىرامىز. ال كەلەسى ماقالادا جاس ەر باۋىرلاستار جايلى ٴسوز قوزعايمىز.
ەحوباعا ۇنامدى قاسيەتتەردى جەتىلدىر
رۋحاني تولىسقان ايەل بولۋ ٷشىن رابيعا، ەستەر، ابيگەل ىسپەتتى ادال ايەلدەرگە ەلىكتەسەڭ بولادى (3، 4-ابزاستاردى قارا)
3، 4. قىز باۋىرلاستار كىمگە قاراپ بوي تۇزەسە بولادى؟ (سۋرەتتى دە قارا.)
3 كيەلى كىتاپتا ەحوبانى جاقسى كورگەن، وعان قىزمەت ەتكەن ايەلدەر كوپتەپ تابىلادى (jw.org تور بەكەتىنەن ورىس تىلىندەگى «جەنشينى ۆ بيبليي: چەمۋ ۋچيت يح پريمەر؟» دەگەن ماقالانى قارا). ولار وسى ماقالانىڭ نەگىزگى تارماعىنا ساي، «قاي نارسەدە دە ادال بولعان». ولاردان جانە قاۋىمىڭداعى ۇلگى الۋعا تۇرارلىق ايەل باۋىرلاستاردان كوپ نارسەگە ۇيرەنسەڭ بولادى.
4 ەندەشە، «رۋحاني تولىسقان ايەلدەردىڭ قايسىسىنا قاراپ بوي تۇزەسەم بولادى؟» دەپ ويلان. ولاردىڭ ادامدى باۋرايتىن ادەمى قاسيەتتەرىن بايقاپ، «بۇل قاسيەتتەردى مەن قالاي تانىتا الامىن؟» دەپ وي جۇگىرت. كەلەسى ابزاستاردا رۋحاني تولىسقان ايەل بولۋعا قاجەتتى ٷش قاسيەتتى جىكتەپ شىعايىق.
5. رۋحاني تولىسقان ايەل بولۋ ٷشىن نەگە كىشىپەيىلدىلىك اسا ماڭىزدى؟
5 تولىسقان ٴماسىحشى بولۋ ٷشىن كىشىپەيىل بولۋ اسا ماڭىزدى. ايەل باۋىرلاس كىشىپەيىل بولسا، ول ەحوبامەن دە، باسقالارمەن دە جاقسى قارىم-قاتىناستا بولادى (جاق. 4:6). مىسالى، ەحوبانى سۇيەتىن ايەل ول ورناتقان باسشىلىق پرينسيپىنە كىشىپەيىلدىلىكپەن مويىنسۇنادى (قور. 1-ح. 11:3). قاۋىمدا جانە وتباسىندا وسى ٴپرينسيپتى ۇستانۋدىڭ وزىندىك ەرەكشە تۇستارى بار c.
6. قىز باۋىرلاستار رابيعادان نە ۇيرەنسە بولادى؟
6 بۇل رەتتە رابيعادان ۇلگى الساق بولادى. ول اقىلدى، كەرەك كەزدە باتىل ىسكە كىرىسەتىن شەشىمتال ايەل بولعان (مۇس. 1-ج. 24:58؛ 27:5—17). سوندا دا ول وزگەلەرگە قۇرمەت كورسەتىپ، باعىنا بىلگەن (مۇس. 1-ج. 24:17، 18، 65). ٴبىز دە رابيعا ىسپەتتى كىشىپەيىل بولىپ، ەحوبا جاۋاپكەرشىلىك تاپسىرعان ادامدارعا مويىنسۇناتىن بولساق، وتباسىمىزدىڭ ۇيىتقىسى ٵرى قاۋىمعا دا ونەگە بولامىز.
7. قىز باۋىرلاستار ەستەردىڭ قاراپايىمدىلىعىنا قالاي ەلىكتەسە بولادى؟
7 بارلىق تولىسقان ماسىحشىلەرگە ٴتان تاعى ٴبىر قاسيەت — قاراپايىمدىلىق. كيەلى كىتاپتا: «قاراپايىمدارعا دانالىق ٴتان»،— دەلىنگەن (ناق. س. 11:2). ەستەر وسىنداي قاراپايىم، قۇدايعا ادال ايەل بولعان. قاراپايىمدىلىعىنىڭ ارقاسىندا ول «پاتشايىم بولدىم» دەپ كوكىرەك كەرىپ كەتپەگەن. ول نەمەرە اعاسى ماردوحايدىڭ اقىلىن تىڭداپ، بۇلجىتپاي ورىنداعان (ەست 2:10، 20، 22). ٴبىز دە جاقسى اقىل-كەڭەس ىزدەپ، سوعان قۇلاق اساتىن بولساق، بۇل — قاراپايىمدىلىقتىڭ بەلگىسى (تيت. 2:3—5).
8. تىموتەگە 1-حات 2:9، 10 عا ساي، ايەل باۋىرلاس كيىنىپ، ارلەنىپ-ساندەنگەندە قالاي قاراپايىم بولا الادى؟
8 ەستەردىڭ قاراپايىمدىلىعى تاعى ٴبىر نارسەدەن كورىنەدى. «دەنە ٴبىتىمى كەلىسكەن، سۇلۋ قىز» بولسا دا، ول جۇرتتى وزىنە قاراتۋعا تىرىسپاعان (ەست. 2:7، 15). ايەل باۋىرلاستار ەستەرگە قالاي ەلىكتەسە بولادى؟ ونىڭ ٴبىر جولى — تىموتەگە 1-حات 2:9، 10 داعى (وقى) كەڭەسكە قۇلاق اسۋ. ەلشى پاۋىل ٴماسىحشى ايەلدەر قاراپايىم دا ەستى كيىنسىن دەگەن. گرەكتىڭ بۇل سوزدەرى ادەپپەن كيىنۋدى، وزگەلەردىڭ سەزىمى مەن كوزقاراسىن ەسكەرۋدى بىلدىرەدى. ٴبىز قاراپايىم كيىنەتىن اياۋلى ايەل باۋىرلاستارىمىزدى ماقتان تۇتامىز!
9. ابيگەلدەن نە ۇيرەنسەك بولادى؟
9 تولىسقان ايەل باۋىرلاستارعا پارىقتىلىق قاسيەتى دە وتە قاجەت. بۇل قانداي قاسيەت؟ پارىقتىلىق دەپ اقىل-پاراساتتى ىسكە قوسىپ، نەنىڭ دۇرىس، نەنىڭ بۇرىس ەكەنىن اجىراتا ٴبىلۋدى جانە دۇرىس نارسەنى ىستەۋدى ايتادى. ابيگەلدى الايىقشى. كۇيەۋىنىڭ اقىماقتىعىنىڭ كەسىرىنەن بۇكىل ٷي ٸشى پالەگە ۇشىراماق ەدى. وسىنى ٴبىلىپ، ابيگەل دەرەۋ ارەكەت ەتتى. اقىل-پاراساتپەن ارەكەت ەتكەنىنىڭ ارقاسىندا ول تالاي ادامنىڭ باسىن امان الىپ قالدى (سام. 1-ج. 25:14—23، 32—35). بويىمىزدا پارىقتىلىقتى دامىتساق، قاي كەزدە سويلەپ، قاي كەزدە ۇندەمەۋ كەرەكتىگىن دە انىقتاي بىلەمىز. سونداي-اق بۇل قاسيەت — وزگەلەردىڭ جاعدايىن سۇراپ، قىزىعۋشىلىق تانىتقان كەزدە، شەكتەن شىعىپ كەتپەۋگە كومەكتەسەدى (سال. 1-ح. 4:11).
قاجەتتى قابىلەتتەردى مەڭگەرىپ ال
دۇرىس وقىپ-جازا ٴبىلۋدىڭ پايداسى قانداي؟ (11-ابزاستى قارا)
10، 11. ساۋاتتى بولۋدىڭ قانداي پايداسى بار؟ (سۋرەتتى دە قارا.)
10 ايەل باۋىرلاستاردىڭ كۇندەلىكتى تۇرمىستا كەرەك بولاتىن قابىلەتتەردى مەڭگەرىپ العاندارى دۇرىس. قىز بالاسى كىشكەنتايىنان بويىنا سىڭىرگەن داعدىلاردىڭ پايداسىن ۇلكەن ومىردە كوپ كورەدى. مىسالى، ولار نەنى ۇيرەنىپ السا بولادى؟
11 دۇرىس وقىپ-جازۋدى ۇيرەن. كەي مادەنيەتتە، ايەلدەرگە ساۋاتتى بولۋدىڭ اسا قاجەتى جوق دەپ سانايدى. ٴبىراق ماسىحشىلەرگە وقىپ-جازا ٴبىلۋ اۋاداي قاجەت d (ٴتىم. 1-ح. 4:13). ەگەر قۇداي ٴسوزىن وقىپ، وي جۇگىرتە الساڭ، ەحوباعا جاقىنداي تۇسەسىڭ. سونداي-اق كيەلى كىتاپتى تەرەڭىنەن زەرتتەپ، جاقسى تالىمگەر دە بولا الاسىڭ. وقۋ-جازۋدى بىلگەنىڭنىڭ ارقاسىندا جۇمىسقا دا تۇرىپ، اقشا تابا الاسىڭ. ەندەشە ەش نارسەگە قاراماي، ساۋاتتى وقىپ-جازۋدى ۇيرەنىپ ال (ەشۋا 1:8؛ ٴتىم. 1-ح. 4:15).
12. ناقىل سوزدەر 31:26 داعى سوزدەر وزگەلەرمەن ٴتىل تابىسۋىڭا قالاي كومەكتەسەدى؟
12 ادامدارمەن ٴتىل تابىسا ٴبىلۋدى ۇيرەن. ٴماسىحشىنىڭ وزگەلەردى تىڭداپ، سويلەسە ٴبىلۋى ماڭىزدى. وسى ورايدا شاكىرت جاقىپ: «اركىم تىڭداۋعا جۇيرىك، سويلەۋگە... باياۋ بولسىن»،— دەپ جاقسى كەڭەس بەرگەن (جاق. 1:19). ادامدى مۇقيات تىڭداي بىلسەك، ونىڭ سەزىمدەرىن تۇسىنەمىز نەمەسە «قايعىسىنا ورتاقتاس» بولا الامىز (پەت. 1-ح. 3:8). ال ەگەر ادامنىڭ نە ايتقىسى كەلگەنىن نە سەزىمدەرىن تۇسىنبەي جاتساڭ، ورىندى سۇراقتار قويساڭ بولادى. ال كەيىن، سويلەمەس بۇرىن ٴبىر ٴسات ويلانىپ ال (ناق. س. 15:28 ٴسىلت.). «مەنىڭ ايتايىن دەپ تۇرعانىم شىن با جانە ول ادامنىڭ رۋحىن كوتەرە مە؟ بۇل ىزەتتىلىككە، مەيىرىمدىلىككە جاتا ما؟» دەپ ويلانىپ كور. سونداي-اق سويلەسۋدى باسقالارمەن جاقسى ٴتىل تابىساتىن ايەل باۋىرلاستاردان دا ۇيرەنسەڭ بولادى (ناقىل سوزدەر 31:26 وقى). ولاردىڭ نە ايتاتىنىنا، قالاي سويلەيتىنىنە ٴمان بەر. سويلەۋ مەن تىڭداۋ قابىلەتىن شىڭداعان سايىن، وزگەلەرمەن اڭگىمەڭ جاراسىپ، اراقاتىناسىڭ دا نىعايادى.
ٷي شارۋاسىنا پىسىق بولىپ ۇيرەنگەن ايەل وتباسى ٷشىن دە، قاۋىم ٷشىن دە زور باتا (13-ابزاستى قارا)
13. ٷي تىرلىگىنە پىسىق بولۋدى قالاي ۇيرەنسەڭ بولادى؟ (سۋرەتتى دە قارا.)
13 ٷي شارۋاسىنا پىسىق بولۋدى ۇيرەن. كوپ جەرلەردە ٷي تىرلىگىن ادەتتە ايەلدەر اتقارادى. بۇنى سەن اناڭنان نە باسقا ٴبىر پىسىق ايەل باۋىرلاستان ۇيرەنە الاسىڭ. سيندي دەگەن قىز باۋىرلاس بىلاي دەيدى: «انامنىڭ بويىما سىڭىرگەن ەڭ اسىل تاربيەسى — ەڭبەك ەتۋدەن قۋانىش الۋ. تاماق ٴپىسىرۋدى، ٷي جيناۋدى، كيىم تىگۋدى، بازارلاپ، كەرەك-جاراق ساتىپ الۋدى ۇيرەنىپ العانىمنىڭ ارقاسىندا ٶز جاعدايىمدى جاساپ، ەحوبا ٷشىن دە كوپ نارسە ىستەي الامىن. انام مەنى قوناقجاي بولۋعا دا ۇيرەتتى. سونىڭ ارقاسىندا ماعان ۇلگى بولاتىن كوپتەگەن باۋىرلاستارمەن تانىستىم» (ناق. س. 31:15، 21، 22). ٷي شارۋاسىنا پىسىق، ەڭبەكقور، قوناقجاي ايەل باۋىرلاستارىمىز وتباسى ٷشىن دە، قاۋىم ٷشىن دە زور باتا (ناق. س. 31:13، 17، 27؛ ەل. ٸس. 16:15).
14. كريستاللدىڭ سوزىنەن نە ٴتۇيدىڭ جانە نەنى ويدا ۇستاعانىڭ ٴجون؟
14 ٶز كۇنىڭدى ٶزىڭ كورە ٴبىل. بارلىق تولىسقان ماسىحشىلەر وزدەرىن اسىراۋدى جانە قاناعاتشىل بولۋدى ۇيرەنگەندەرى ماڭىزدى (ٴفىلىپ. 4:11). بۇل رەتتە كريستالل ەسىمدى قىز باۋىرلاس بىلاي دەدى: «جوعارى سىنىپتارعا وتەر كەزدە، اتا-انام ماعان ەرتەڭ جۇمىس تابا الاتىنداي سالانى تاڭداۋعا كومەكتەستى. اكەمنىڭ ايتۋىمەن، بۋحگالتەرلىك ساباقتاردى تاڭداپ، كەيىن سونىڭ كوپ پايداسىن كوردىم». جۇمىس تابا الاتىنداي سالانى مەڭگەرىپ الۋدان بولەك، قاراجاتىڭدى ۇنەمدەپ، دۇرىس جۇمساۋدى دا ۇيرەن (ناق. س. 31:16، 18). لاجى بولسا، قارىز الۋدان اۋلاق ٴجۇرىپ، ازدى قاناعات ەتە بىلسەڭ، رۋحاني ماقساتتارىڭا جەتە الاسىڭ (ٴتىم. 1-ح. 6:8).
بولاشاق مىندەتتەرىڭە دايىندال
15، 16. نەگە سالتباستى ايەل باۋىرلاستار قاۋىمعا زور باتا؟ (مارقا 10:29، 30)
15 ەحوباعا ۇنامدى قاسيەتتەر دامىتىپ، قاجەتتى قابىلەتتەردى مەڭگەرگەنىڭ سەنى ۇلكەن ومىرگە دايىندايدى. مىسالى، الدا سەندە قانداي تاڭداۋلار بولادى؟
16 بەلگىلى ٴبىر ۋاقىت تۇرمىس قۇرماۋدى شەشەرسىڭ. كەيبىر ايەل باۋىرلاستار مادەنيەتتەرىندە قۇپ سانالماسا دا، يسانىڭ سوزدەرىنە ساي، تۇرمىس قۇرماۋدى شەشەدى (مات. 19:10—12). وزگەلەرى بەلگىلى ٴبىر جاعدايلارعا بايلانىستى ازىرگە سالتباستى بولىپ ٴجۇر. ەحوبا مەن يسا سالتباستى باۋىرلاستاردى ەشقاشان كەم سانامايدى. دۇنيەجۇزىندەگى اياۋلى سالتباستى ايەل باۋىرلاستار قاۋىمداردا جاقسى ۇلگى بولىپ ٴجۇر. وزگەلەرگە دەگەن سۇيىسپەنشىلىگى مەن قامقورلىعىنىڭ ارقاسىندا ولار بىرەۋگە رۋحاني انا، بىرەۋگە رۋحاني اپكەدەي بولىپ كەتكەن (مارقا 10:29، 30 وقى؛ ٴتىم. 1-ح. 5:2).
17. قىز باۋىرلاستار تولىق ۋاقىتتى قىزمەتكە قازىردەن قالاي دايىندالسا بولادى؟
17 تولىق ۋاقىت قىزمەت ەتە الاسىڭ. تورتكىل دۇنيەدەگى ايەل باۋىرلاستارىمىزدىڭ ۋاعىز ىسىندە اتقاراتىن ەڭبەكتەرى وراسان (ٴزاب. 68:11). ال سەن تولىق ۋاقىت قىزمەت ەتۋدى قازىردەن جوسپارلاي الاسىڭ با؟ مىسالى، ٸزاشار، قۇرىلىس ەرىكتىسى، بەتەلدىك بولۋعا ۇمتىلا الاسىڭ. ماقساتىڭ جايلى دۇعا ەت. سوعان قول جەتكىزگەن باۋىرلاستارمەن سويلەسىپ، سول قىزمەتكە لايىقتى بولۋ ٷشىن نە ىستەۋگە بولاتىنىن سۇراستىر. سوسىن ٶز جاعدايىڭدى ەسكەرىپ، جوسپار قۇر. ەگەر تولىق ۋاقىتتى قىزمەتكە قول جەتكىزسەڭ، ەحوباعا كوبىرەك بەرەسىڭ ٵرى ٶمىرىڭ كوركەيە تۇسەدى.
ەگەر تۇرمىسقا شىعۋدى ويلاپ جۇرسەڭ، بولاشاق جارىڭدى تاڭداعاندا اسا مۇقيات بول (18-ابزاستى قارا)
18. نەگە قىز باۋىرلاس بولاشاق جارىن وتە مۇقيات تاڭداۋى كەرەك؟ (سۋرەتتى دە قارا.)
18 تۇرمىسقا شىعامىن دەپ شەشۋىڭ مۇمكىن. وسى قاراستىرعان قاسيەتتەر مەن قابىلەتتەر ساعان جاقسى جار بولۋعا كومەكتەسەدى. الايدا بولاشاق كۇيەۋىڭدى تاڭداردا اسا مۇقيات بول، ويتكەنى بۇل — سەنىڭ ومىرىڭدەگى ەڭ ماڭىزدى شەشىمدەردىڭ ٴبىرى. سول تاڭداعان ەر ادامىڭا ەرتەڭ باعىنۋىڭ كەرەك بولادى، سونى ۇمىتپا (ريم. 7:2؛ ەفەس. 5:23، 33). سوندىقتان مىنا سۇراقتار جايلى جاقسىلاپ ويلان: «ول رۋحاني تولىسقان با؟ رۋحاني ىستەردى باستى ورىنعا قويا ما؟ اقىلمەن شەشىم قابىلداي ما؟ ٶز قاتەلىكتەرىن مويىنداي ما؟ ايەلدەرگە سي-قۇرمەت كورسەتە مە؟ ول ماعان رۋحاني مىقتى بولۋعا كومەكتەسە الا ما؟ مەنى اسىراي الا ما؟ ماعان جاقسى دوس بولا الا ما؟ وزىنە جۇكتەلگەن مىندەتتەردى جاقسى اتقارا ما؟ ماسەلەن، ونىڭ قاۋىمدا قانداي جاۋاپكەرشىلىكتەرى بار جانە ولاردى قالاي اتقارادى؟» (لۇقا 16:10؛ ٴتىم. 1-ح. 5:8). ٴبىراق ارينە، ەگەر جاقسى كۇيەۋ بولاتىن ادامدى تاپقىڭ كەلسە، ٶزىڭ دە جاقسى ايەل بولۋدى ۇيرەنۋىڭ كەرەك.
19. نەلىكتەن «كومەكشى» بولۋ وتە سيلى ٴرول دەي الامىز؟
19 كيەلى كىتاپتا جاقسى ايەل كۇيەۋىن «تولىقتىراتىن كومەكشى» ەكەنى ايتىلعان (مۇس. 1-ج. 2:18). بۇل — ايەلدى كەمسىتەتىن ەمەس، قايتا، قادىرىن ارتتىراتىن ٴرول. كيەلى كىتاپتا «كومەكشى» دەگەن تىركەس كوبىنەسە ەحوباعا قاتىستى قولدانىلادى (ٴزاب. 54:4؛ ەۆر. 13:6). ايەل كۇيەۋىنە قولداۋ كورسەتسە، وتباسىنا قاتىستى قابىلداعان شەشىمدەرىن ىسكە اسىرۋعا كومەكتەسسە، وعان ناعىز كومەكشى بولا الادى. ەحوبانى جاقسى كورگەندىكتەن، ول كۇيەۋىنىڭ بەدەلىن ارتتىرۋعا تىرىسادى (ناق. س. 31:11، 12؛ ٴتىم. 1-ح. 3:11). بولاشاقتاعى وسى مىندەتكە دايىن بولۋ ٷشىن ەحوباعا دەگەن سۇيىسپەنشىلىگىڭدى كۇشەيتە بەر ٵرى قاۋىمدا جانە وتباسىندا جاقسى كومەكشى بولا ٴبىل.
20. وتباسىندا انانىڭ الار ورنى قانداي؟
20 سەن بولاشاقتا انا بولۋىڭ مۇمكىن. تۇرمىس قۇرعاننان كەيىن، بالالى بولۋلارىڭ مۇمكىن (ٴزاب. 127:3). سوندىقتان دا انا بولۋعا الدىن الا دايىندالعانىڭ دۇرىس. ٴبىز تالقىلاپ كەتكەن قاسيەتتەر مەن قابىلەتتەر ساعان جاقسى جار ٵرى جاقسى انا بولۋعا كومەكتەسەدى. سەن ماحاببات-مەيىرىمىڭمەن، شىدامدىلىعىڭمەن ٶز ٷيىڭدى جىلى ۇياداي ەتەسىڭ، ال ونداي ورتادا بالالار الاڭسىز ٶسىپ، گۇلدەي جايقالادى (ناق. س. 24:3).
جازبالاردان ٴتالىم الىپ، بىلگەندەرىن ومىردە قولدانعان كوپ ايەل باۋىرلاس رۋحاني تولىسقان (21-ابزاستى قارا)
21. نەلىكتەن ٴبىز ايەل باۋىرلاستارىمىزدى اسىلعا بالايمىز؟ (مۇقاباداعى سۋرەتتى قارا.)
21 قىمباتتى قىز باۋىرلاستار، سەندەر ەحوبا مەن ونىڭ حالقى ٷشىن ەرەن ەڭبەك ەتەسىڭدەر، سول ٷشىن سەندەردى جاقسى كورەمىز (ەۆر. 6:10). بويلارىڭدا ەحوباعا ۇنامدى قاسيەتتەر تاربيەلەۋگە، وزدەرىڭە جانە وزگەلەرگە قۋانىش سيلايتىن قابىلەتتەردى ۇيرەنۋگە، بولاشاقتا اتقاراتىن مىندەتتەرىڭە دايىندالۋعا كوپ تەر توگەسىڭدەر. سەندەردىڭ ەحوبانىڭ ۇيىمىندا الار ورىندارىڭ اسا باعالى!
137-ٵن ەحوباعا ادال ايەلدەر
a اياۋلى جاس قىز باۋىرلاس، سەن قاۋىم ٷشىن اسا قىمباتسىڭ. ەگەر بويىڭدا ەحوباعا ۇنامدى قاسيەتتەردى جەتىلدىرسەڭ، قاجەتتى قابىلەتتەردى مەڭگەرىپ الساڭ جانە بولاشاق مىندەتتەرىڭە دايىندالساڭ، ٴماسىحشى ايەل رەتىندە ٴپىسىپ-تولىساسىڭ. سوندا ەحوبا ٷشىن اتقاراتىن قىزمەتىڭدە مول باتاعا كەنەلەسىڭ.
b ٴسوز ٴمانى: رۋحاني تولىسقان ٴماسىحشى وسى دۇنيەنىڭ دانالىعىمەن ەمەس، قۇداي رۋحىنىڭ جەتەلەۋىمەن جۇرەدى. ول يساعا ەلىكتەيدى، ەحوبامەن تىعىز قارىم-قاتىناستا بولۋ ٷشىن ايانباي كۇش سالادى جانە وزگەلەرگە رياسىز سۇيىسپەنشىلىك تانىتادى.
d وقۋدىڭ ماڭىزدىلىعى جايلى ٴبىلۋ ٷشىن jw.org تور بەكەتىنەن «بالالاردى وقۋعا باۋلۋ. 1-ٴبولىم: وقىعان دۇرىس پا، الدە كورگەن بە؟» دەگەن ماقالانى قارا.
