50-زەرتتەۋ ماقالاسى
135-ٵن ەحوبانىڭ شاقىرۋى: «اقىلدى بول، بالام»
اتا-انالار، بالاڭىزدىڭ سەنىمىن نىعايتىڭىز
«قۇدايدىڭ ىزگى دە ۇنامدى ٵرى كەمەلدى ەركىنە نە جاتاتىنىنا كوز جەتكىزىڭدەر» (ريم. 12:2).
نەگىزگى وي
بالامەن ماعىنالى اڭگىمە قۇرۋعا جانە بالانىڭ قۇداي مەن كيەلى كىتاپقا دەگەن سەنىمىن نىعايتۋعا كومەكتەسەتىن اتا-انالارعا ارنالعان ٴتيىمدى كەڭەستەردى قاراستىرامىز.
1، 2. بالاڭىز كيەلى كىتاپ ىلىمدەرىنە كۇماندانىپ، سۇراقتار قويىپ جاتسا، بۇعان قالاي قاراعانىڭىز دۇرىس؟
اتا-انا بولۋدى دەمالىسسىز جۇمىس دەپ ايتساق، ارتىق ايتپاسپىز. اتا-انالار، بالانىڭ بويىندا سەنىم دامىتۋعا ايانباي كۇش سالىپ جاتقاندارىڭىز ٷشىن سىزدەردى ماقتاعىمىز كەلەدى (مۇس. 5-ج. 6:6، 7). ٴبىراق بالاڭىز وسە كەلە، كيەلى كىتاپ ىلىمدەرى مەن ونداعى زاڭ-تالاپتارعا كۇماندانىپ، سۇراقتار قويا باستاۋى مۇمكىن.
2 بالاڭىزدىڭ سۇراقتارىن ەستىپ، بىردەن ۋايىمداپ كەتۋىڭىز مۇمكىن. ٴتىپتى سەنىمى السىرەپ كەتتى مە دەپ قورقاتىن دا شىعارسىز. ٴبىراق ۇمىتپاڭىز، بالانىڭ وسە كەلە سۇراقتار قويعانى وتە دۇرىس، ويتكەنى سولاي عانا ونىڭ جەكە كوزقاراسى قالىپتاسادى (قور. 1-ح. 13:11). سوندىقتان بالاڭىزدىڭ سۇراق قويعانىنان شوشىماڭىز، كەرىسىنشە، مۇنى مۇمكىندىك دەپ قاراستىرىڭىز. بالاڭىزدىڭ شىن كوڭىلمەن قويعان سۇراقتارىن پايدالانىپ، وعان تەرەڭىرەك وي جۇگىرتىپ، ايعاقتارعا كوز جەتكىزۋدى ۇيرەتىڭىز.
3. بۇل ماقالادا نە جايىندا قاراستىرامىز؟
3 بۇل ماقالادا ٴبىز اتا-انا بالاسىنا 1) شىندىققا كوز جەتكىزۋگە، 2) كيەلى كىتاپتاعى دۇرىس پەن بۇرىسقا قاتىستى تالاپتاردى ورىنداۋدىڭ پايداسىن تۇسىنۋگە جانە 3) ٶز سەنىمدەرىن قورعاپ سويلەۋگە قالاي كومەكتەسە الاتىنىن قاراستىرامىز. بۇدان بولەك، بالانىڭ سۇراق قويعانى نەگە جاقسى ەكەنىن تالقىلايمىز. سونداي-اق بالامەن نانىم-سەنىمدەرى جايلى سويلەسۋگە جاعداي جاساۋ ٷشىن اتا-انا نە ىستەي الاتىنىن كورەمىز.
بالاڭىزعا سەنىمىن نىعايتۋعا كومەكتەسىڭىز
4. بالا قانداي سۇراقتار قويۋى مۇمكىن جانە نەگە؟
4 اتا-انالار، مىنانى ەستەن شىعارماڭىزدار: قۇدايعا دەگەن سەنىم اتا-انادان بالاعا وتەتىن قاسيەت ەمەس. سىزگە دە ەحوباعا دەگەن سەنىم تۋا بىتكەن جوق. بالاڭىزدىڭ دا بويىندا سەنىم وزدىگىنەن پايدا بولمايدى. سوندىقتان بالاڭىز وسە كەلە «قۇدايدىڭ بار ەكەنىنە نەگە سەنۋىم كەرەك؟ كيەلى كىتاپتاعى سوزدەردىڭ راس-وتىرىك ەكەنىن قايدان بىلەمىن؟» دەگەن سياقتى سۇراقتار قويۋى مۇمكىن. نەگىزى، كيەلى كىتاپتىڭ ٶزى «اقىل-ويىمىزدى ىسكە قوسۋعا»، «ٴبارىن تەكسەرۋگە» شاقىرادى (ريم. 12:1؛ سال. 1-ح. 5:21). بالاڭىز كۇماندانعان كەزدەردە وعان قالاي كومەكتەسسەڭىز بولادى؟
5. بالاڭىزدىڭ كيەلى كىتاپقا دەگەن سەنىمى ارتۋى ٷشىن نە ىستەسەڭىز بولادى؟ (ريمدىكتەرگە 12:2)
5 بالاڭىزعا شىندىققا كوز جەتكىزۋدى ۇيرەتىڭىز (ريمدىكتەرگە 12:2 وقىڭىز). بالاڭىزدىڭ سۇراق قويعانىن پايدالانىپ، ىزدەنىس قۇرالدارىنىڭ كومەگىمەن سۇراقتارىنىڭ جاۋابىن قالاي تابۋعا بولاتىنىن كورسەتىڭىز. كيەلى كىتاپ ادامدار جازعان كىتاپ ەمەس، «قۇداي ٴسوزى» ەكەنىنە كوزى جەتۋ ٷشىن، بالاڭىزدى jw.org تور بەكەتىنەن ماقالالار مەن ۆيدەولاردى قاراپ شىعۋعا تالپىندىرىڭىز (سال. 1-ح. 2:13). مىسالى، ول ەجەلگى نينەۆيا قالاسى جايلى وقىسا بولادى. بۇرىندا كەيبىر عالىمدار نينەۆيا قالاسىنىڭ شىنىمەن بولعانىنا كۇماندانعان. ٴبىراق 1850 جىلدارى بۇل قالانىڭ قالدىقتارى تابىلعان. وسىلاي كيەلى كىتاپتىڭ راستىعى دالەلدەندى (ساف. 2:13—15). ال ەگەر بالاڭىز «نينەۆيانىڭ كۇيرەۋى» دەگەن ماقالانى وقىپ شىقسا، كيەلى كىتاپتاعى سول قالاعا قاتىستى پايعامبارلىقتىڭ قالاي ٴدال ورىندالعانىن كورە الادى. بالاڭىز ادەبيەتتەرىمىزدە ايتىلعان مالىمەتتى باسقا دا كىتاپتار مەن ەنسيكلوپەديالاردا ايتىلعان مالىمەتپەن سالىستىرسا، كيەلى كىتاپتىڭ راستىعىنا كوزى جەتە تۇسەدى.
6. كيەلى كىتاپتىڭ تۋرالىعىنا بالاڭىزدىڭ كوزى جەتە ٴتۇسۋ ٷشىن نە ىستەسەڭىز بولادى؟ مىسال كەلتىرىڭىز. (سۋرەتتى دە قاراڭىز.)
6 بالاڭىزعا كيەلى كىتاپتىڭ تۋرالىعىن دالەلدەيتىن ايعاقتاردى كورسەتىڭىز. نەگىزى، بالامەن كيەلى كىتاپ جانە قۇداي جايلى سويلەسۋگە مۇمكىندىكتەر كوپ. بالاڭىزبەن مۇراجايعا، بوتانيكالىق باققا نە ەحوبا كۋاگەرلەرىنىڭ فيليالىنداعى كورمەگە بارساڭىز، بۇنداي اڭگىمە وزدىگىنەن-اق باستالادى. مىسالى، مۇراجايعا تىكەلەي نە ونلاين بارۋدىڭ ٴبىر پايداسى، كيەلى كىتاپتىڭ تۋرالىعىن راستايتىن تاريحي وقيعالارعا بالاڭىزدىڭ نازارىن اۋدارىپ، وعان ارتەفاكتىلەردى كورسەتە الاسىز. مىسالى، قۇدايدىڭ ەسىمى 3000 جىل بۇرىن مواب تاسىنا قاشالىپ جازىلعانىن بالاڭىز بىلە مە؟ بۇل تاستىڭ ٴتۇپنۇسقاسى لۋۆر مۇراجايىندا ساقتالعان (پاريج، فرانسيا). ال كوشىرمەسىن ەحوبا كۋاگەرلەرىنىڭ باس باسقارماسىنداعى «كيەلى كىتاپ جانە قۇداي ەسىمى» دەپ اتالاتىن كورمەدەن كورۋگە بولادى (ۋورۆيك، نيۋ-يورك). بۇل تاستا مواب پاتشاسى مەشانىڭ يسرايلگە قارسى باس كوتەرگەنى جازىلعان. تۋرا وسى وقيعا كيەلى كىتاپتا دا باياندالادى (پات. 2-ج. 3:4، 5). كيەلى كىتاپتىڭ تۋرالىعىن راستايتىن ايعاقتاردى ٶز كوزىمەن كورگەنى بالاڭىزدىڭ سەنىمىن نىعايتادى (شەج. 2-ج. 9:6).
كيەلى كىتاپتىڭ تۋرالىعىنا كوزىن جەتكىزۋ ٷشىن بالاڭىزعا مۇراجايداعى ايعاقتاردى كورسەتىڭىز (6-ابزاستى قاراڭىز)
7، 8. ا) تابيعاتتىڭ اسەمدىگى مەن ۇيلەسىمدىلىگىنەن نەنى كورۋگە بولادى؟ مىسال كەلتىرىڭىز. (سۋرەتتى دە قاراڭىز.) ٵ) جاراتۋشىعا دەگەن سەنىمى ارتۋ ٷشىن بالاعا قانداي سۇراقتار قويساڭىز بولادى؟
7 بالاڭىزدى تابيعات الەمى جايلى ويلانۋعا تالپىندىرىڭىز. تابيعاتقا شىققاندا نە باقشادا جۇمىس ىستەگەندە، بالاڭىزعا تابيعاتتا كەزدەسەتىن تاڭعاجايىپ بىرىزدىلىكتى كورۋگە كومەكتەسىڭىز. بۇل بىرىزدىلىك تابيعات الەمىندە ٴبارى اسقان شەبەرلىكپەن جانە ەرەكشە ۇيلەسىمدىلىكپەن ويلاستىرىلعانىن دالەلدەيدى. مىسالى، سپيرال قۇرىلىمىن عالىمدار تالاي جىلدان بەرى زەرتتەپ كەلەدى. بيوفيزيك نيكولا فامەليدىڭ ايتۋىنشا، تابيعاتتا كەزدەسەتىن كەز كەلگەن سپيرالدى ساناپ كورسەڭ، بەلگىلى ٴبىر ساندار تىزبەگى بايقالادى. ونى فيبوناچچي ساندار تىزبەگى دەپ اتايدى. سپيرال قۇرىلىمى تابيعات الەمىندە وتە كوپ كەزدەسەدى. مىسالى، بۇنداي قۇرىلىمدى كەيبىر گالاكتيكالاردان، ۇلۋدىڭ باقالشاعىنان، وسىمدىك جاپىراقتارىنان جانە كۇنباعىستىڭ گۇلشوعىرىنان كورۋگە بولادى a.
8 بالاڭىز مەكتەپتە تابيعاتتاعى زاڭدىلىقتار تۋرالى ساباق ٶتۋى مۇمكىن. سونداي زاڭدىلىقتاردىڭ ٴبىرى تابيعاتتاعى پىشىندەردى قالىپتاستىرادى. مىسالى، قار ۇلپالارىنىڭ ٴپىشىنى بەلگىلى ٴبىر گەومەتريالىق قۇرىلىمدارعا ساي قالىپتاسادى، ياعني قار ۇلپاسىنىڭ ىشىندەگى جەكەلەگەن ورنەكتەر سول تۇتاس قار ۇلپاسىنىڭ ٴپىشىنىن قايتالايدى. ونى فراكتالدار دەپ اتايدى. فراكتال قۇرىلىمى تابيعات الەمىندە ٴجيى كەزدەسەدى. ٵرتۇرلى پىشىندەردى قالىپتاستىراتىن وسىنداي زاڭدىلىقتاردى ورناتقان كىم؟ اينالامىزداعى تاڭعاجايىپ ٴتارتىپ پەن ۇيلەسىمدىلىكتى كىم ويلاپ تاپتى؟ وسىنداي سۇراقتار جايلى ويلاناتىن بولسا، بالاڭىز ٴبارىن جاراتقان قۇداي ەكەنىن ٴتۇسىنىپ، سەنىمى نىعايا باستاۋى مۇمكىن (ەۆر. 3:4). وسى ورايدا بالاڭىزدان «ەگەر قۇداي تابيعات اسەم بولۋ ٷشىن زاڭدىلىقتار ورناتقان بولسا، ٴبىز دە باقىتتى بولۋىمىز ٷشىن بىزگە زاڭ-تالاپتار بەردى دەۋ قيسىندى ما؟» دەپ سۇراپ كورىڭىز. سودان كەيىن قۇداي بۇل زاڭ-تالاپتاردى كيەلى كىتاپقا جازدىرعانىن ايتىپ تۇسىندىرسەڭىز بولادى.
NASA, ESA, and the Hubble Heritage(STScl/AURA)-ESA/Hubble Collaboration
تابيعاتتاعى اسەمدىك پەن ۇيلەسىمدىلىكتىڭ ارتىندا كىم تۇر؟ (7، 8-ابزاستاردى قاراڭىز)
بالاڭىزعا قۇدايدىڭ زاڭ-تالاپتارىنىڭ پايداسىن ٴتۇسىندىرىڭىز
9. بالاڭىز كيەلى كىتاپتاعى زاڭ-تالاپتاردىڭ دۇرىستىعىنا كۇماندانىپ جاتسا، بۇعان نە سەبەپ بولۋى مۇمكىن؟
9 كەيدە بالاڭىز كيەلى كىتاپتاعى دۇرىس پەن بۇرىسقا قاتىستى زاڭ-تالاپتارعا كۇماندانىپ، سۇراقتار قويۋى مۇمكىن. ونداي كەزدەرى ونىڭ بۇنداي سۇراقتاردى نە ٷشىن قويىپ جاتقانىن تۇسىنۋگە تىرىسىڭىز. ول كيەلى كىتاپتاعى زاڭ-تالاپتاردىڭ دۇرىستىعىنا شىنىمەن سەنبەي مە؟ بالكىم، ول جاي عانا كەيبىر نارسەلەردى نە ٷشىن ىستەۋگە بولاتىنىن-بولمايتىنىن وزگەلەرگە ٴتۇسىندىرىپ بەرە المايتىن شىعار. ەكى جاعدايدا دا «ماڭگى باقي ٶمىردىڭ راقاتىن كورىڭىز!» باسىلىمىن قولدانىپ، بالاڭىزعا ەحوبانىڭ زاڭ-تالاپتارىن ورىنداۋ نەگە دۇرىس ەكەنىن ٴتۇسىندىرىپ بەرسەڭىز بولادى b.
10. بالاڭىزعا ەحوبانىڭ دوسى بولۋعا قالاي كومەكتەسسەڭىز بولادى؟
10 بالاڭىزعا ەحوبامەن دوس بولۋعا كومەكتەسىڭىز. بالاڭىزبەن كيەلى كىتاپتى زەرتتەگەندە، «ماڭگى باقي ٶمىردىڭ راقاتىن كورىڭىز!» كىتابىنداعى سۋرەتتەر مەن سۇراقتاردى ٴتيىمدى پايدالانىڭىز. سوندا بالاڭىزدىڭ نە ويلاپ، نە سەزىنىپ جۇرگەنىن تۇسىنە الاسىز (ناق. س. 20:5). مىسالى، 8-ساباقتا ەحوبا قامقور دوسقا تەڭەلەدى. وندا ەحوبا ناعىز دوس سياقتى پايدالى اقىل-كەڭەسىن ايتىپ، قاۋىپ-قاتەردەن قورعاپ وتىراتىنى ايتىلعان. جوحاننىڭ 1-حاتى 5:3 ٴتى تالقىلاپ بولعان سوڭ، بالاڭىزدان بىلاي دەپ سۇراپ كورىڭىز: «ەحوبا قامقور دوسىمىز بولسا، ٴبىز ونىڭ بىلاي ىستە، بىلاي ىستەمە دەگەن نۇسقاۋلارىنا قالاي قاراۋىمىز كەرەك؟» بۇل قاراپايىم سۇراق بولىپ كورىنەتىن شىعار. ٴبىراق وسىنداي سۇراقتىڭ ارقاسىندا بالاڭىز قۇداي ٶزىنىڭ زاڭ-تالاپتارىن ٴبىزدى سۇيگەندىكتەن بەرەتىنىن ٴتۇسىنۋى مۇمكىن (يشايا 48:17، 18).
11. بالاڭىزعا كيەلى كىتاپ پرينسيپتەرىنىڭ پايدالى ەكەنىن تۇسىنۋگە قالاي كومەكتەسسەڭىز بولادى؟ (ناقىل سوزدەر 2:10، 11)
11 بالاڭىزعا كيەلى كىتاپ پرينسيپتەرىنىڭ پايداسىن ٴتۇسىندىرىڭىز. بىرگە كيەلى كىتاپتى نە كۇندەلىكتى تارماقتى وقىعاندا، وتباسىڭىز كيەلى كىتاپ پرينسيپتەرىنىڭ قانداي پايداسىن كورگەنىن ايتىپ بەرىڭىز. مىسالى، بالاڭىز ەڭبەكقور، شىنشىل بولۋدىڭ ٶزىمىز ٷشىن پايدالى ەكەنىن تۇسىنە مە؟ (ەۆر. 13:18). سونداي-اق كيەلى كىتاپ پرينسيپتەرىن ۇستاناتىن ادامنىڭ دەنساۋلىعى دا، ەموسيالىق كۇيى دە جاقسى بولاتىنىن ايتىپ بەرىڭىز (ناق. س. 14:29، 30). پرينسيپتەردى وسىلاي تالقىلاپ وتىرعانىڭىز بالاڭىزعا كيەلى كىتاپتاعى اقىل-كەڭەستەردى باعالاي تۇسۋگە كومەكتەسەدى (ناقىل سوزدەر 2:10، 11 وقىڭىز).
12. ستيۆ ۇلىنا كيەلى كىتاپ پرينسيپتەرىنىڭ پايداسىن قالاي تۇسىندىرەدى؟
12 فرانسيادا تۇراتىن ستيۆ دەگەن باۋىرلاس جاسوسپىرىم ۇلىنا ەحوبانىڭ زاڭ-تالاپتارىنىڭ ارتىندا سۇيىسپەنشىلىك تۇرعانىن ٴتۇسىندىرۋ ٷشىن كوپ كۇش سالادى. ول بىلاي دەيدى: «ايەلىم ەكەۋىمىز بالامىز يتانعا مىناداي سۇراقتار قويامىز: «ەحوبا بۇل ٴپرينسيپتى ۇستانعانىمىزدى نە ٷشىن قالايدى؟ بۇدان ونىڭ ٴبىزدى جاقسى كورەتىنىن كورۋگە بولا ما؟ بۇل ٴپرينسيپتى ورىنداماساڭ، نە بولادى دەپ ويلايسىڭ؟» وسىلاي وي جۇگىرتكەننىڭ ارقاسىندا يتان ەحوبانىڭ زاڭ-تالاپتارىن اتا-اناسى ايتقاندىقتان ەمەس، ٶزى تۇسىنگەندىكتەن ورىنداپ ٴجۇر. ستيۆ تاعى بىلاي دەيدى: «ٴبىزدىڭ بار ماقساتىمىز — يتان كيەلى كىتاپتىڭ دانالىعى ادامداردىڭ دانالىعىنان الدەقايدا اسىپ تۇسەتىنىن تۇسىنسە ەكەن دەيمىز».
13. بالاڭىزعا كيەلى كىتاپ پرينسيپتەرىن ۇستانۋدى قالاي ۇيرەتسەڭىز بولادى؟ مىسال كەلتىرىڭىز.
13 بالاڭىزعا كيەلى كىتاپ پرينسيپتەرىن ۇستانۋدى ۇيرەتىڭىز. بالاڭىزعا ٷي تاپسىرماسى رەتىندە قانداي دا ٴبىر اڭگىمەنى وقىپ كەلۋدى بەرسە، سول مۇمكىندىكتى قالت جىبەرمەڭىز. بۇل اڭگىمەلەردە كەيبىر كەيىپكەرلەردىڭ ارەكەتتەرى ازعىندىقپەن نە قاتىگەزدىكپەن بايلانىستى بولۋى مۇمكىن. ٴبىراق وقۋلىقتا ولاردىڭ ٸس-ارەكەتتەرى اقتالىپ، ٴتىپتى جاقسى ەتىپ كورسەتىلۋى مۇمكىن. سوندىقتان بالاڭىزدى كيەلى كىتاپ پرينسيپتەرىنىڭ كومەگىمەن سول كەيىپكەرلەردىڭ ارەكەتتەرى دۇرىس پا، بۇرىس پا — سول جايلى ويلانۋعا تالپىندىرىڭىز (ناق. س. 22:24، 25؛ قور. 1-ح. 15:33؛ ٴفىلىپ. 4:8). سوندا مەكتەپتە ٷي تاپسىرماسىن تالقىلاعاندا، بالاڭىز ۇستازىنا نە سىنىپتاستارىنا كۋالىك بەرۋگە دايىن بولادى.
بالاڭىزعا سەنىمىن قورعاۋدى ۇيرەتىڭىز
14. مەكتەپتە بالالار قانداي تاقىرىپتان قورقۋى مۇمكىن جانە نەگە؟
14 كەيبىر جاستار ٶز نانىمدارىن قورعاپ سويلەۋگە قورقۋى مۇمكىن. ساباقتا ەۆوليۋسيا تۋرالى تالقىلانا قالسا، قورىققاننان جۇرەكتەرى زۋ ەتە قالاتىن شىعار. ويتكەنى مۇعالىمدەر ەۆوليۋسيا تۋرالى سەنىمدىلىكپەن ايعاقتار كەلتىرۋى مۇمكىن. اتا-انالار، ٶز نانىمدارىنا دەگەن سەنىمى شايقالماس ٷشىن بالاڭىزعا قالاي كومەكتەسسەڭىز بولادى؟
15. كيەلى كىتاپتاعى شىندىقتارعا دەگەن سەنىمدىلىگى ارتۋ ٷشىن بالاڭىزعا قالاي كومەكتەسسەڭىز بولادى؟
15 بالاڭىزدىڭ كيەلى كىتاپ نانىمدارىنا دەگەن سەنىمىن ارتتىرىڭىز. بالاڭىزدىڭ قورقۋىنا دا، ۇيالۋىنا دا ەش سەبەپ جوق، ويتكەنى ول جاراتىلىس تۋرالى ناعىز شىندىقتى بىلەدى (ٴتىم. 2-ح. 1:8). نەگىزى، عالىمداردىڭ كوبىسى تىرشىلىك وزدىگىنەن جانە اياق استىنان پايدا بولا قالدى دەگەنمەن كەلىسپەيدى. تىرشىلىكتىڭ سان الۋاندىعى مەن كۇردەلىلىگىنە قاراپ، ولار بۇنىڭ ارتىندا اسقان شەبەر، دانا تۇلعا تۇرعانىن تۇسىنەدى. سوندىقتان ولار دۇنيەجۇزى بويىنشا مەكتەپتەردە وتەتىن ەۆوليۋسيا تەورياسىن مويىندامايدى. سونداي-اق بالاڭىز باۋىرلاستاردىڭ ەۆوليۋسياعا نە ٷشىن سەنبەيتىنىن ەستىپ-بىلسە جانە ولاردىڭ كەلتىرگەن قيسىندى دالەلدەرى جايلى وي جۇگىرتسە، تىرشىلىكتى قۇداي جاراتقانىنا كوزى جەتە ٴتۇسۋى مۇمكىن c.
16. جاراتۋشىعا دەگەن سەنىمىن قورعاپ سويلەۋدى بالاڭىزعا قالاي ۇيرەتسەڭىز بولادى؟ (پەتىردىڭ 1-حاتى 3:15) (سۋرەتتى دە قاراڭىز.)
16 بالاڭىزعا جاراتۋشىعا دەگەن سەنىمىن قورعاۋدى ۇيرەتىڭىز (پەتىردىڭ 1-حاتى 3:15 وقىڭىز). بالاڭىزبەن بىرگە jw.org تور بەكەتىندەگى «جاستاردىڭ ساۋالدارى. تىرشىلىكتىڭ باستاۋى جاراتۋشى ما، ەۆوليۋسيا ما؟» دەگەن ماقالالار توپتاماسىن قاراستىرىپ كورىڭىز. سول مالىمەتتەردىڭ ىشىنەن بالاڭىزدىڭ سىنىپتاستارىما وسىنى ايتىپ بەرگىم كەلەر ەدى دەگەن تۇستارىن تاڭداپ، كەيىن سونى بىرگە ايتىپ جاتتىعىڭىزدار. وعان ەشكىممەن ٴسوز تالاستىرۋدىڭ قاجەتى جوق ەكەنىن ايتىپ وتىرىڭىز. بىرەۋ قىزىعىپ سۇراقتار قويعان جاعدايدا قاراپايىم سوزدەرمەن قيسىندى جاۋاپ بەرۋگە تالپىندىرىڭىز. مىسالى، سىنىپتاسى وعان: «مەن ٶز كوزىممەن كورمەيىنشە سەنبەيمىن. ال قۇدايدى مەن ەشقاشان كورگەن ەمەسپىن»،— دەۋى مۇمكىن. سونداي كەزدە بالاڭىز مىسال كەلتىرىپ، بىلاي دەسە بولادى: «ەلەستەتىپ كورشى، سەن ەلسىز جاپان دالادا كەلە جاتىرسىڭ. ٴبىر كەزدە الدىڭنان تاستان قالانعان قۇدىق شىعادى. سوندا سەن ول قۇدىق وزىنەن-ٶزى پايدا بولدى دەپ ويلاپ قالمايسىڭ عوي. ونى بىرەۋ قازعانىنا ەش كۇمانىڭ بولمايدى. تۋرا سولاي پلانەتامىزدى، ىشىندەگى بۇكىل جاراتىلىستاردى دا بىرەۋ جاراتتى دەۋ قيسىندى ەمەس پە؟»
سىنىپتاستارىڭمەن سويلەسكەندە قاراپايىم دا قيسىندى دالەلدەر كەلتىر (16، 17-ابزاستاردى قاراڭىز) d
17. بالاڭىزدى شىندىق جايلى ايتۋدىڭ مۇمكىندىگىن ىزدەۋگە قالاي تالپىندىرساڭىز بولادى؟ مىسال كەلتىرىڭىز.
17 بالاڭىزدى شىندىق جايلى ايتۋدىڭ مۇمكىندىگىن ىزدەۋگە تالپىندىرىڭىز (ريم. 10:10). بالاڭىز قانداي دا ٴبىر مۋزىكالىق اسپاپتا ويناۋدى ۇيرەنىپ ٴجۇر دەپ ەلەستەتىڭىز. ادەتتە ادام قاراپايىم نوتالاردى ويناۋدان باستايدى. كەيىن اسپاپتى جاقسى مەڭگەرگەن كەزدە، اۋەندەردى ەش قينالماي وينايتىن بولادى. تۋرا سولاي بالاڭىز دا باستاپقىدا ٶزىنىڭ سەنىمىن قاراپايىم ٴتۇسىندىرۋى مۇمكىن. مىسالى، ول سىنىپتاسىمەن اڭگىمەسىن بىلاي باستاسا بولادى: «بىلەسىڭ بە، ينجەنەرلەر ويلاپ تاپقان نارسەسىنىڭ ٴبارىن تابيعاتتان قايتالايدى. ساعان سول جايلى ٴبىر كۇشتى ۆيدەو كورسەتەيىنشى». كەيىن «جاراتىلىس عاجايىپتارى» توپتاماسىنان ٴبىر ۆيدەونى كورسەتىپ، بىلاي دەسە بولادى: «تابيعاتتا بار نارسەنى قايتالاپ، بىردەڭە ويلاپ شىعارعان عالىمداردى ادامدار ماراپاتتاپ جاتادى. ال سول تابيعاتتىڭ ٶزىن جاساعان كىم؟ ول ٷشىن ٴبىز كىمدى داڭقتاۋىمىز كەرەك؟» وسىنداي قاراپايىم سۇراقتاردىڭ ٶزى سىنىپتاسىنىڭ قىزىعۋشىلىعىن وياتىپ، كوبىرەك بىلۋگە تالپىندىرۋى مۇمكىن.
بالاڭىزدىڭ سەنىمىن نىعايتۋدان تالماڭىز
18. بالانىڭ قۇدايعا دەگەن سەنىمىن نىعايتۋ ٷشىن اتا-انالار نە ىستەي بەرۋلەرى كەرەك؟
18 ٴبىز ەحوباعا سەنبەيتىن ادامداردىڭ اراسىندا ٶمىر ٴسۇرىپ جاتىرمىز (پەت. 2-ح. 3:3). سوندىقتان، قىمباتتى اتا-انالار، زەرتتەۋ ساباعى كەزىندە بالاڭىزدى قۇدايدىڭ سوزىنە جانە ونىڭ زاڭ-تالاپتارىنا قۇرمەتىن ارتتىراتىن ماقالالاردى وقىپ-زەرتتەۋگە تالپىندىرىڭىز. ەحوبانىڭ جاراتىلىستارىنىڭ تاڭعالارلىق تۇستارىنا نازار اۋدارىپ، وي جۇگىرتۋدى ۇيرەتىڭىز. كيەلى كىتاپتاعى ەگجەي-تەگجەيلى ورىندالىپ قويعان پايعامبارلىقتاردى دا تۇسىنۋگە كومەكتەسىڭىز. ال ەڭ ماڭىزدىسى، بالاڭىزبەن بىرگە وتىرىپ دۇعا ەتىڭىز جانە ٶزىڭىز دە بالاڭىز جايلى دۇعا ەتىپ ٴجۇرىڭىز. سەنىمدى بولىڭىز، وسىلاردىڭ ٴبارىن جاساپ جۇرسەڭىز، ەحوبا ەڭبەگىڭىزگە باتاسىن بەرىپ، بالاڭىزعا سەنىمىن نىعايتۋعا كومەكتەسەدى (شەج. 2-ج. 15:7).
133-ٵن ەحوباعا جاستايىڭنان قىزمەت ەت
a كوبىرەك ٴبىلۋ ٷشىن jw.org تور بەكەتىنەن «عاجايىپ جاراتىلىستار قۇدايدىڭ داڭقىن پاش ەتەدى» (حانزۇشا) دەگەن ۆيدەونى قاراڭىز.
b بالاڭىز «ماڭگى باقي ٶمىردىڭ راقاتىن كورىڭىز!» باسىلىمىن زەرتتەپ قويعان بولسا، ونىمەن قۇدايدىڭ زاڭ-تالاپتارى قاراستىرىلاتىن 3، 4-بولىمدەگى كەيبىر ساباقتاردى قايتالاپ شىقساڭىز بولادى.
c 2006-جىلعى «ويانىڭدار!» جۋرنالىنان «جاراتۋشىعا نە ٷشىن سەنەمىز؟» (حانزۇشا) دەگەن ماقالانى جانە «تىرشىلىكتىڭ باستاۋى. بەس ماڭىزدى سۇراق» دەگەن كىتاپشانى وقىپ كورىڭىز. سونداي-اق «تىرشىلىكتىڭ پايدا بولۋىنا قاتىستى پىكىرلەر» توپتاماسىنان باۋىرلاستاردىڭ كوزقاراسى جايلى ۆيدەولار كورىڭىز.
d سۋرەت سيپاتتاماسى: ٴبىر كۋاگەر بالا درونعا قىزىعاتىن سىنىپتاسىنا «جاراتىلىس عاجايىپتارى» توپتاماسىنان ٴبىر ۆيدەو كورسەتىپ جاتىر.
