وقىرمان ساۋالدارى
تىموتەگە 1-حات 5:21 دەگى «تاڭداۋلى پەرىشتەلەر» دەگەن كىمدەر؟
ەلشى پاۋىل اقساقال بولىپ قىزمەت ەتكەن تىموتەگە بىلاي دەپ جازعان: «قۇدايدىڭ، ٴماسىح يسانىڭ جانە تاڭداۋلى پەرىشتەلەردىڭ الدىندا مىنانى مىقتاپ ەسكەرتەمىن: وسى نۇسقاۋلاردى بىرجاقتى بولماي، الالاماي ورىندا» (ٴتىم. 1-ح. 5:21).
الدىمەن، «تاڭداۋلى پەرىشتەلەرگە» كىمدەر جاتپايتىنىن انىقتاپ الايىق. ولار 144000 مايلانعاندى بىلدىرمەيدى. پاۋىل تىموتەگە جوعارىداعى سوزدەردى جازعاندا، ەلشىلەر مەن مايلانعان ماسىحشىلەردىڭ كوككە قايتا ٴتىرىلىپ، رۋحاني جاراتىلىستارعا اينالاتىن ۋاقىتى ٵلى كەلمەگەن ەدى. سوندىقتان «تاڭداۋلى پەرىشتەلەر» مايلانعاندار ەمەس دەپ ناقتى ايتا الامىز (قور. 1-ح. 15:50—54؛ سال. 1-ح. 4:13—17؛ جوح. 1-ح. 3:2).
«تاڭداۋلى پەرىشتەلەر» توپان سۋ كەزىندە بۇلىك شىعارعان پەرىشتەلەردى دە بىلدىرمەيدى. ويتكەنى ولار شايتاننىڭ جاعىنا شىعىپ، جىن-پەرىلەرگە اينالدى. وسىلايشا يساعا قارسى شىقتى (مۇس. 1-ج. 6:2؛ لۇقا 8:30، 31؛ پەت. 2-ح. 2:4). بولاشاقتا بۇل جىن-پەرىلەر 1000-جىلعا تۇڭعيىققا تاستالادى، كەيىن شايتان ىبىلىسپەن بىرگە جويىلادى (ياھد. 6؛ ايان 20:1—3، 10).
«تاڭداۋلى پەرىشتەلەر» تارماقتىڭ وزىندە ايتىلعان «قۇدايعا» جانە «ٴماسىح يساعا» قولداۋ كورسەتەتىن كوكتەگى پەرىشتەلەردى بىلدىرسە كەرەك.
كوكتە سان مىڭداعان ادال پەرىشتەلەر بار (ەۆر. 12:22، 23). ٴبىز بارلىق پەرىشتەلەر بىردەي تاپسىرما ورىندايدى دەپ ويلاماۋىمىز كەرەك (ايان 14:17، 18). بىردە ەحوبا ٴبىر عانا پەرىشتەگە 185000 اسسيريا اسكەرىن جويۋدى تاپسىرعان (پات. 2-ج. 19:35). ال بىرنەشە پەرىشتەگە «[يسانىڭ] پاتشالىعىنان وزگەلەردىڭ كۇنا جاساۋىنا سەبەپكەر بولاتىنداردىڭ ٴبارىن، سونداي-اق زاڭسىزدىق جاسايتىنداردى جيناپ الۋ» تاپسىرىلعان كورىنەدى (مات. 13:39—41). سونداي-اق كوككە «تاڭداپ الىنعانداردى جيناپ الاتىن» پەرىشتەلەر دە بار سەكىلدى (مات. 24:31). ال تاعى ٴبىر پەرىشتەلەرگە ٴبىزدى «قايدا بارساق تا، قورعاپ ٴجۇرۋ» تاپسىرىلعان (ٴزاب. 91:11؛ مات. 18:10؛ 4:11؛ لۇقا 22:43).
تىموتەگە 1-حات 5:21 دەگى «تاڭداۋلى پەرىشتەلەر» قۇداي حالقىن قامقورلاۋ ٷشىن ارنايى تاپسىرما العان پەرىشتەلەر بولسا كەرەك. تارماقتىڭ مانماتىنىندە پاۋىل اقساقالدارعا اقىل-كەڭەس بەردى، ٵرى قاۋىمداعىلاردى ولارعا ٴتيىستى قۇرمەت كورسەتۋگە شاقىردى. ال اقساقالدار، ٶز كەزەگىندە، جاۋاپكەرشىلىكتەرىن «بىرجاقتى بولماي، الالاماي ورىنداپ»، ويلانباستان شەشىم قابىلداۋدان اۋلاق بولۋ كەرەك ەدى. اقساقالداردىڭ بۇل كەڭەسكە قۇلاق اسقاندارى نەگە ماڭىزدى؟ ويتكەنى ولار «قۇدايدىڭ، ٴماسىح يسانىڭ جانە تاڭداۋلى پەرىشتەلەردىڭ الدىندا» قىزمەت ەتەدى. تۇيىندەي كەتسەك، كەيبىر پەرىشتەلەرگە قاۋىمدى قورعاۋ، ۋاعىز ٸسىن قاداعالاۋ جانە سول جايلى ەحوباعا ەسەپ بەرۋ سياقتى قاۋىممەن بايلانىستى مىندەتتەر جۇكتەلگەن (مات. 18:10؛ ايان 14:6).