ەسىڭىزدە مە؟
بيىل شىققان «كۇزەت مۇناراسى» جۋرنالدارىن مۇقيات وقىدىڭىز با؟ ولاي بولسا، كەلەسى سۇراقتارعا جاۋاپ بەرىپ كورىڭىز:
ايەل زاتىنا قالاي قاراۋعا قاتىستى ەحوبا قانداي ۇلگى كورسەتەدى؟
ەحوبا ايەلدەردى ٴبولىپ-جارمايدى، ولاردى ەرلەردەن تومەن سانامايدى. ەحوبا ولاردى تىڭدايدى، سەزىمدەرى مەن ۋايىمدارىنا بەيجاي قارامايدى. سونداي-اق ولارعا سەنىم ارتىپ، ٶزىنىڭ ٸسىن اتقارۋدى تاپسىرادى (كم24.01، 15، 16-ب.).
ەفەستىكتەرگە 5:7 دەگى «مۇندايلارمەن ەش بايلانىستارىڭ بولماسىن» دەگەن سوزدەر نەنى بىلدىرەدى؟
ەلشى پاۋىل ەحوبانىڭ تالاپتارىن ۇستانۋعا كەدەرگى جاسايتىن ادامدارمەن ارالاسپاۋىمىز كەرەكتىگىن ايتقان. ونداي ادامدار بەتپە-بەت كورىسىپ نە الەۋمەتتىك جەلىلەردە ارالاسىپ جۇرگەن ادامداردىڭ اراسىندا بولۋى مۇمكىن (كم24.03، 22، 23-ب.).
قانداي وتىرىكتەردەن ساق بولۋىمىز كەرەك؟
باۋىرلاستارىمىز يگى نيەتپەن راس-وتىرىگى تەكسەرىلمەگەن مالىمەتتەر جىبەرۋى مۇمكىن نە مۇنداي مالىمەتتەر پوچتا ارقىلى ٴبىز تانىمايتىن ادامداردان كەلۋى مۇمكىن. يا بولماسا جولدان تايعان ادام حابارىمىزعا قىزىققانداي سىڭاي تانىتۋى مۇمكىن. سوندىقتان ٴبىزدىڭ اسا ساق بولعانىمىز ماڭىزدى (كم24.04، 12-ب.).
سۇلەيمەن پاتشانى، سودوم مەن عومورا تۇرعىندارىن، سونداي-اق توپان سۋدا جويىلعان ادامداردى ەحوبا قالاي سوتتايتىنىنا قاتىستى ٴبىز نەنى بىلەمىز جانە نەنى بىلمەيمىز؟
ەحوبا بۇل ادامداردى ماڭگىلىككە جويۋدى ۇيعاردى ما، جوق پا — ٴبىز بۇنى بىلمەيمىز. ٴبىراق ٴبىر بىلەتىنىمىز — ەحوبا بارلىق جايتتى ەسكەرەدى جانە ول اسقان مەيىرىمدى (كم24.05، 3، 4-ب.).
ەحوبانىڭ «جارتاس» دەپ اتالعانى بىزگە قانداي سەنىمدىلىك بەرەدى؟ (مۇس. 5-ج. 32:4).
ٴبىز ەحوبادان پانا تابا الامىز. ول — ٵردايىم سوزىندە تۇراتىن سەنىمدى قۇداي. سونداي-اق بولمىسى مەن نيەتىنەن ەشقاشان اينىمايتىن تۇراقتى قۇداي (كم24.06، 26—28 ب.).
جاڭا قاۋىمعا ٴسىڭىسىپ كەتۋ ٷشىن نە ىستەسەڭىز بولادى؟
ەحوباعا ارقا سۇيەڭىز، ول ەجەلدە قىزمەتشىلەرىنە كومەكتەسكەنىندەي، سىزگە دە كومەكتەسەدى. جاڭا قاۋىمىڭىزدى بۇرىنعى قاۋىمىڭىزبەن سالىستىرماڭىز. جاڭا قاۋىممەن بىتە قايناسىپ، جاڭا دوستار تابۋعا تىرىسىڭىز (كم24.07، 26—28 ب.).
ماتاي 25-تاراۋداعى ٷش مىسالدان قانداي ساباق الامىز؟
قويلار مەن سەركەلەر جايلى مىسال ادال بولۋدىڭ ماڭىزدىلىعىنا، اقىلدى جانە اقىلسىز قىزدار جايلى مىسال سەرگەك ٵرى دايىن بولۋدىڭ، ال تالانت تۋرالى مىسال ەڭبەكقور ٵرى ىنتالى بولۋدىڭ ماڭىزدىلىعىنا نازار اۋدارادى (كم24.09، 20—24 ب.).
سۇلەيمەن سوققان عيباداتحانانىڭ كىرەبەرىسىنىڭ بيىكتىگى قانشا بولعان؟
كەيبىر اۋدارمالارعا ساي، شەجىرەلەر 2-جازبا 3:4 تە كىرەبەرىستىڭ بيىكتىگى «120 شىنتاق»، ياعني 53 مەتر بولعانى ايتىلعان. ٴبىراق بەدەلدى كوشىرمەلەردە كىرەبەرىستىڭ بيىكتىگى «20 شىنتاق»، ياعني 9 مەتر بولعانى ايتىلعان. عيباداتحانانىڭ كىرەبەرىس قابىرعاسىنىڭ سونشالىقتى جۋان بولماعانىن ەسكەرسەك، بيىكتىگى 9 مەتر بولدى دەۋ قيسىندى (كم24.10، 31-ب.).
«قىزمەت كومەكشىسى ٴبىر عانا ايەلى بار» ادام بولۋ كەرەك دەگەن نەنى بىلدىرەدى؟ (ٴتىم. 1-ح. 3:12).
بۇل قىزمەت كومەكشىسى ٴبىر عانا ايەلمەن نەكە قۇرۋ كەرەك دەگەن ٴسوز. ول ەشقاشان جىنىستىق ازعىندىققا بارماۋ كەرەك. بۇل عانا ەمەس، ول ٴتىپتى بوتەن ايەلگە ورىنسىز كوڭىل بولۋدەن اۋلاق بولۋ كەرەك (كم24.11، 19-ب.).
نەگە جوحان 6:53 تەگى سوزدەر يەمىزدىڭ كەشكى اسىنا قاتىستى ەمەس دەي الامىز؟
جوحان 6:53 تە «ادام ۇلىنىڭ ٴتانىن جەپ، قانىن ٸشۋ» كەرەكتىگى ايتىلعان. يسا بۇل سوزدەردى ب. ز. 32-جىلى عاليلەيادا وعان ٵلى سەنىم تانىتپاعان ياھۋديلەرگە ايتقان. ال يەمىزدىڭ كەشكى اسىن يسا ٴبىر جىلدان سوڭ يەرۋساليمدە ەنگىزدى. ول كەزدە يسا وزىمەن بىرگە كوكتە بيلىك ەتەتىن ادامدارمەن بىرگە بولدى (كم24.12، 10، 11-ب.).
