31-زەرتتەۋ ماقالاسى
«بەرىك بولىڭدار، مىزعىماي تۇرىڭدار»
«سۇيىكتى باۋىرلاستارىم، بەرىك بولىڭدار، مىزعىماي تۇرىڭدار» (قور. 1-ح. 15:58).
122-ٵن بەرىك تە مىعىم بول!
اڭداتپا a
1، 2. قاي ماعىنادا ٴماسىحشى ٴزاۋلىم عيماراتقا ۇقسايدى؟ (قورىنتتىقتارعا 1-حات 15:58)
1970-جىلداردىڭ اياعىنا تامان جاپونيانىڭ توكيو قالاسىندا اسپانمەن تالاسقان 60 قاباتتى عيمارات بوي كوتەرە باستادى. سول كەزدە جۇرت جەر سىلكىنىسى ٴجيى بولاتىن قالادا بۇنداي ٴزاۋلىم ٷي قالاي تۇرماق دەپ ويلادى. سويتسە، ينجەنەرلەر بۇل عيماراتتى بەرىك قىلىپ، سويتە تۇرا دۇمپۋلەردە قيراپ كەتپەي، يىلەتىندەي ەتىپ جاساعان ەكەن. ماسىحشىلەر دە قانداي دا ٴبىر ماعىنادا وسى عيماراتقا ۇقسايدى.
2 سەبەبى ولار بەرىك ٵرى يلىككىش بولىپ، وسى ەكى قاسيەتتىڭ ورتاسىن تابا ٴبىلۋ كەرەك. ماسەلەن، ٴماسىحشى قۇدايدىڭ زاڭ-تالاپتارىن ورىنداۋعا كەلگەندە بەرىك تۇرۋى قاجەت (قورىنتتىقتارعا 1-حات 15:58 وقىڭىز). ول «مويىنسۇنۋعا دايىن» ٵرى ٶز ۇستانىمىنان ەش اتتامايدى. بىراق ورىندى بولسا نە جاعداي تالاپ ەتىپ تۇرسا، «يلىككىش» تە بولا بىلەدى (جاق. 3:17). وسىنداي ٴماسىحشى تىم قاتال دا، تىم جۇمساق تا ەمەس. بۇل ماقالادا وسى ەكى قاسيەتتىڭ بىرىنشىسىنە توقتاپ، قانداي نارسەدە مىزعىماي تۇرۋىمىز كەرەكتىگىن قاراستىرامىز. سونداي-اق شايتان ٴبىزدى قانداي بەس جولمەن شايقالتقىسى كەلەتىنىن جانە وعان قالاي توتەپ بەرە الاتىنىمىزدى بىلەمىز.
نە نارسەدە بەرىك بولۋىمىز كەرەك؟
3. ەڭ جوعارعى زاڭ شىعارۋشىمىز ەلشىلەردىڭ ىستەرى 15:28، 29 دا قانداي زاڭدار بەرگەن؟
3 ەڭ جوعارعى زاڭ شىعارۋشىمىز ەحوبا ٶزىنىڭ حالقىنا ٵردايىم انىق تا قانىق زاڭدار بەرىپ وتىرعان (يشايا 33:22). مىسالى، ٴى عاسىردا باسقارۋشى كەڭەس ماسىحشىلەرگە قانداي ٷش ماسەلەدە مىزعىماي تۇرۋ كەرەكتىگىن ايتقان: 1) پۇتقا تابىنۋدان اۋلاق بولىپ، جالعىز ەحوباعا عيبادات ەتۋ، 2) قاننىڭ قاسيەتتىلىگىن قۇرمەتتەۋ، 3) كيەلى كىتاپتاعى جوعارى مورالدىق نورمالاردى ۇستانۋ (ەلشىلەردىڭ ىستەرى 15:28، 29 وقىڭىز). بۇگىندە ماسىحشىلەر وسى ٷش سالادا قالاي بەرىكتىك تانىتىپ ٴجۇر؟
4. ەحوباعا قالتقىسىز بەرىلۋ دەگەن نە؟ (ايان 4:11)
4 ٴبىز پۇتتارعا تابىنبايمىز، جالعىز ەحوباعا عيبادات ەتەمىز. ەحوبا يسرايل حالقىنان وعان قالتقىسىز بەرىلۋدى تالاپ ەتكەن (مۇس. 5-ج. 5:6—10). كەيىن ٸبىلىس ازعىرعاندا، يسا دا جالعىز ەحوباعا تابىنۋ كەرەكتىگىن شەگەلەپ ايتقان (مات. 4:8—10). سوندىقتان ٴبىز پۇتقا جاتاتىن بەينە نە مۇسىندەرگە باس يمەيمىز. بۇعان قوسا، ٴدىني جەتەكشىلەردى، ۇكىمەت باسىلارىن، سپورت پەن ونەر جۇلدىزدارى سياقتى ادامداردى قۇدايداي كورىپ، ٴپىر تۇتپايمىز. ٴبىز «ٴبارىن جاراتقان» ەحوباعا عانا عيبادات ەتىپ، تەك سوعان عانا بەرىلگەنبىز (ايان 4:11 وقىڭىز).
5. نە ٷشىن ٴبىز ەحوبانىڭ ٶمىر مەن قاندى قاسيەتتى تۇتىڭدار دەگەن زاڭىن ۇستانامىز؟
5 ٴبىز ەحوبانىڭ ٶمىر مەن قاندى قاسيەتتى تۇتىڭدار دەگەن زاڭىن ۇستانامىز. نە ٷشىن؟ ويتكەنى ەحوبا قان ٶمىردى بىلدىرەتىنىن ايتقان، ال ٶمىر — ونىڭ بىزگە تارتۋ ەتكەن باعا جەتپەس سيى (مۇس. 3-ج. 17:14). ول ادامدارعا العاش رەت ەت جەۋگە رۇقسات بەرگەندە، ونى قانىمەن جەۋگە تيىم سالعان (مۇس. 1-ج. 9:4). كەيىنىرەك يسرايل حالقىنا مۇسا زاڭىن بەرگەندە دە وسىنى بۇيىردى (مۇس. 3-ج. 17:10). ال I عاسىردا ەحوبا باسقارۋشى كەڭەس ارقىلى ماسىحشىلەردىڭ بارىنەن «قاننان... اۋلاق بولۋدى» تالاپ ەتتى (ەل. ٸس. 15:28، 29). بۇگىندە ٴبىز ەم-شارا قابىلداۋ ماسەلەسىندە وسى زاڭدى بەرىك ۇستانامىز b.
6. ەحوبانىڭ جوعارى مورالدىق نورمالارىمەن ٶمىر سۇرۋگە ٴبىز قالاي كۇش سالامىز؟
6 ەحوبانىڭ جوعارى مورالدىق نورمالارىن بەرىك ۇستانامىز (ەۆر. 13:4). ەلشى پاۋىل دەنە مۇشەلەرىڭدى «ولتىرىڭدەر» دەگەندە، جامان قۇمارلىقتاردان ارىلۋ ٷشىن قاتاڭ شارا قولدانۋدى ايتقان. سوندىقتان ٴبىز جىنىستىق ازعىندىققا اپاراتىن نارسەلەردى كورمەيمىز دە، ىستەمەيمىز دە (قول. 3:5؛ ٵيۇپ 31:1). ال ٴبىزدى ازعىراتىن جاعدايمەن بەتپە-بەت كەلگەندە، ەحوبامەن دوستىعىمىزدى بۇزاتىن وي مەن ىستەن بىردەن باس تارتامىز.
7. ٴبىز نە ىستەۋگە بەكىنۋىمىز قاجەت جانە نەگە؟
7 ەحوبا ٴبىزدىڭ وعان «شىن جۇرەكتەن مويىنسۇنعانىمىزدى» قالايدى (ريم. 6:17). ٴبىز ونىڭ مىنا زاڭىنا باعىنامىن، ال مىنا زاڭى ماعان قاجەت ەمەس دەپ تاڭداي المايمىز، ونىڭ قاي زاڭىن ۇستانساق تا، ٶزىمىزدىڭ پايدامىز ٷشىن (يشايا 48:17، 18؛ قور. 1-ح. 6:9، 10). ٴبىز ەحوباعا ۇنامدى بولۋ ٷشىن بار كۇشىمىزدى سالامىز. ويتكەنى ٴزابۇر جىرشىسى سياقتى ٴبىز دە «جارلىقتارىنا مويىنسۇنۋعا جۇرەگىمىزدى بەيىمدەيمىز، ارقاشان، اقىرىنا دەيىن، سولاي ەتۋگە بەل بۋامىز» (ٴزاب. 119:112). بىراق شايتان ٴبىزدىڭ بوساڭسىپ، وسى شەشىمىمىزدەن تايىپ كەتكەنىمىزدى قالايدى. بۇل ٷشىن ول قانداي ايلا-امال قولدانادى؟
بەرىكتىگىمىزدەن تايدىرۋ ٷشىن شايتان نە ىستەيدى؟
8. بەرىكتىگىمىزدەن تايدىرۋ ٷشىن شايتان ٴبىزدى قالاي قۋدالايدى؟
8 قۋدالاۋ. ٸبىلىس كۇش كورسەتۋ ارقىلى نەمەسە قورقىتىپ، ەموسيالىق قىسىم جاساۋ ارقىلى بەرىكتىگىمىزدى سىندىرعىسى كەلەدى. ول ٴبىزدى تىرىدەي «جالماپ» قويسام ەكەن دەيدى، ياعني ەحوبامەن دوستىعىمىزدى ۇزگىسى كەلەدى (پەت. 1-ح. 5:8). I عاسىرداعى ماسىحشىلەر بەرىكتىگىنەن تايماي قويعاندا، شايتان ولارعا قوقان-لوقى كورسەتىپ، ۇرىپ-سوعىپ، ٴتىپتى كەيبىرىن ولتىرتكەن (ەل. ٸس. 5:27، 28، 40؛ 7:54—60). ول قۇدايدىڭ حالقىن ٵلى دە قۋدالاپ كەلەدى. مىسالى، رەسەي مەن باسقا ەلدەردە باۋىرلاستار ۇكىمەت پەن وزگە دە قارسىلاستاردىڭ تاراپىنان جاۋىزدىق پەن قورلىق كورىپ جاتىر.
9. شايتاننىڭ زىمياندىعىنان اباي بولۋ كەرەكتىگىنە مىسال كەلتىرىڭىز.
9 الداپ ٴتۇسىرۋ. شايتان اشىق شابۋىلدان بولەك، «زىميان ٸس-ارەكەتتەرگە» دە بارادى (ەفەس. 6:11). ماسەلەن، روبەرت دەگەن ەر باۋىرلاس كۇردەلى وتا جاساتۋ كەرەك بولىپ، اۋرۋحاناعا جاتادى. ول دارىگەرلەرگە قايتكەن كۇندە دە وعان قان قۇيماۋدى ەسكەرتىپ قويادى. وتا جاسايتىن دارىگەر بۇعان كەلىسەدى. بىراق وتادان ٴبىر كۇن بۇرىن روبەرتتىڭ جاقىندارى اۋرۋحانادان كەتىپ قالعاندا، وعان انەستەزيولوگ كىرىپ-شىعادى. قاسىندا جاقىندارى جوقتا ويىنان اينىپ قالار دەگەن پيعىلمەن بولسا كەرەك، ول: «ارينە، قان قاجەت بولمايدى دەپ ۇمىتتەنەمىز، بىراق جاعداي قيىنداپ جاتسا، قاندى قاسىمىزدا دايىن ۇستاپ تۇرامىز»،— دەيدى. سوندا روبەرت باۋىرلاسىمىز بەرىك شەشىمىنەن اينىماي: «مەن ٶلىپ كەتسەم دە قان قۇيدىرمايمىن»،— دەيدى.
10. ادامداردىڭ كوزقاراسى نەسىمەن قاۋىپتى؟ (قورىنتتىقتارعا 1-حات 3:19، 20)
10 ادامداردىڭ كوزقاراسى. اينالامىزداعى ادامداردىڭ وي-پىكىرىنە ەرىپ كەتسەك، ەحوبانى دا، ونىڭ نورمالارىن دا ەلەمەي كەتەمىز (قورىنتتىقتارعا 1-حات 3:19، 20 وقىڭىز). ويتكەنى «وسى دۇنيەنىڭ دانالىعى» ەڭ ٴبىرىنشى تاندىك قالاۋىڭدى ويلاۋعا شاقىرادى. كەزىندە پەرگام مەن تياتيرا قالالارىندا پۇتقا تابىنۋ، ازعىن ٶمىر ٴسۇرۋ كادىمگى نارسە سانالاتىن. بۇل جامان كوزقاراس قاۋىمداعى بىرەن-ساران ماسىحشىگە دە سىڭگەن بولاتىن. جىنىستىق ازعىندىققا ٴتوزىپ جۇرگەندەرى ٷشىن وسى ەكى قاۋىمدى يسا قاتاڭ ەسكەرتكەن (ايان 2:14، 20). بۇگىندە دە وسى الەم بۇرىس كوزقاراسىن بىزگە جان-جاقتان تىقپىشتايدى. مىسالى، ويىمىزدان اينىپ، قۇداي زاڭدارىنان اتتاي سالۋىمىز ٷشىن، جاقىندارىمىز يا تانىستارىمىز جاندى جەرىمىزگە باسىپ، سەزىمدەرىمىزگە اسەر ەتكىلەرى كەلەر. ولار ٶز قالاۋىڭدى ورىنداعاندا تۇرعان ەشتەڭە جوق، ال كيەلى كىتاپتىڭ مورالدىق نورمالارى قازىرگى زامانعا ساي كەلمەيدى دەۋى مۇمكىن.
11. ٴبىز نەدەن اۋلاق بولۋىمىز كەرەك؟
11 ال كەيدە ٴبىز وزىمىزشە پايىمداپ، ەحوبانىڭ بەرگەن نۇسقاۋلارىن از كورۋىمىز مۇمكىن. ٴسۇيتىپ، «جازىلعانداردى عانا ۇستانعان» جەتكىلىكسىز دەپ، قوسىمشا ەرەجە ورناتقىمىز كەلەر (قور. 1-ح. 4:6). الايدا يسانىڭ زامانىنداعى ٴدىني جەتەكشىلەر وسى ٷشىن كۇناعا باتقانىن ۇمىتپايىق. ولار مۇسا زاڭىنىڭ ۇستىنە ٶز زاڭدارىن قوسىپ، قاراپايىم حالىقتىڭ يىعىنا اۋىر جۇك ارتقان (مات. 23:4). ەحوبا بىزگە ٴسوزى مەن ۇيىمى ارقىلى جەتكىلىكتى تۇردە انىق تا قانىق نۇسقاۋلار بەرىپ جاتىر، وعان ەشتەڭەنى الىپ-قوسۋدىڭ قاجەتى جوق (ناق. س. 3:5—7). ەندەشە، قۇداي سوزىندە جازىلعانداردى عانا ۇستانايىق، باۋىرلاستارعا جەكە ماسەلەلەرگە قاتىستى ەرەجە ورناتپايىق.
12. شايتان «بوس، الدامشى ويلاردى» قالاي تاراتادى؟
12 جالعان اقپاراتتار. شايتان «بوس، الدامشى ويلارىمەن» جانە «وسى دۇنيەنىڭ قاعيدالارىنا نەگىزدەلگەن ىلىمدەرىمەن» ادامداردى جىككە ٴبولىپ، اداستىرادى (قول. 2:8). مىسالى، ٴى عاسىردا ادامنىڭ ويىنان شىققان ٴپالساپا، جازبالارعا نەگىزدەلمەگەن يۋدايزم ىلىمدەرى مەن «ماسىحشىلەر مۇسا زاڭىن ۇستانۋ كەرەك» دەگەن ىلىمدەر كەڭ تاراعان. بۇنداي وتىرىكتەر ادامداردى اداستىرىپ، شىنايى دانالىقتىڭ كوزى ەحوبادان الىپ كەتەتىن. ال قازىرگى كۇنى شايتان باق پەن الەۋمەتتىك جەلىلەردى قولدانىپ، بيلىك يەلەرىنە قارسى قاۋەسەت سوزدەردى جانە ساياسي جەتەكشىلەردەن شىققان وتىرىك جاڭالىقتاردى تاراتادى. بۇعان 19-COVID پاندەمياسىندا ابدەن كوزىمىز جەتتى c. جۇرت جالعان اقپاراتقا ەرىپ، ۋايىم كەشىپ، ابىرجىپ جاتقاندا، ٴبىز ۇيىمنىڭ بەرگەن تۋرا باسشىلىعىنا باعىنىپ، سابىر ساقتادىق (مات. 24:45).
13. الاڭداتاتىن جايتتاردان نەگە ساق بولۋىمىز كەرەك؟
13 الاڭداتاتىن جايتتار. مىزعىماي تۇرۋ ٷشىن «نەنىڭ ماڭىزدىراق ەكەنىن» ۇمىتپاۋىمىز كەرەك (ٴفىلىپ. 1:9، 10). ويتكەنى بۇل دۇنيەدە تىم كوپ ۋاقىتىمىزدى الىپ، كوڭىلىمىزدى جاۋلاپ الاتىن نارسەلەر كوپ. مىسالى، ٸشىپ-جەۋ، دەمالۋ، جۇمىس ىستەۋ سياقتى كۇندەلىكتى نارسەلەر باستى ورىنعا شىعىپ، ماڭىزدىراق ىستەردەن الاڭداتىپ جىبەرۋى مۇمكىن (لۇقا 21:34، 35). بۇعان قوسا، الەۋمەتتىك نە ساياسي داۋ-دامايلار جايلى جاڭالىقتار كۇندە قارشا بوراپ جاتىر. وسىنداي ايتىس-تارتىستارعا كوڭىلىمىز اۋىپ كەتپەسىن، ايتپەسە، ىشتەي بىرەۋدىڭ جاعىنا شىعىپ كەتۋىمىز مۇمكىن. جوعارىدا ايتىلىپ كەتكەن بەس ٴتاسىل ارقىلى شايتان ٴبىزدى شايقالتىپ، دۇرىس جولدان تايدىرعىسى كەلەدى. ال ەندى وعان قالاي قارسى تۇرىپ، بەرىك بولىپ قالا الاتىنىمىزدى قاراستىرايىق.
بەرىك بولىپ قالۋعا نە كومەكتەسەدى؟
مىزعىماي تۇرۋ ٷشىن: باعىشتالىپ، شومىلدىرۋ راسىمىنەن وتكەن كەزىڭىز جايلى ويلانىڭىز؛ قۇداي ٴسوزىن زەرتتەپ، وي جۇگىرتىڭىز؛ مىزعىماس جۇرەككە يە بولىڭىز جانە ەحوباعا سەنىم ارتىڭىز (14—18-ابزاستاردى قاراڭىز)
14. ٵردايىم ەحوباعا مويىنسۇنىپ، ونىڭ جاعىندا بەرىك تۇرۋعا نە كومەكتەسەدى؟
14 ەحوباعا باعىشتالىپ، شومىلدىرۋ راسىمىنەن وتكەن كەزىڭىز جايلى ويلانىڭىز. ٴسىز بۇل قادامدى نە ٷشىن جاسادىڭىز؟ ويتكەنى ٵردايىم ەحوباعا مويىنسۇنامىن دەپ شەشتىڭىز. شىندىقتى تاپقانىڭىزعا كوز جەتكىزگەن كەزىڭىزدى ەسكە ٴتۇسىرىڭىزشى. ەحوبا جايلى ٴبىلىم العان سايىن، ونى اكەڭىزدەي جاقسى كورىپ، قۇرمەتتەي ٴتۇستىڭىز. بىرتە-بىرتە سەنىمىڭىز ٶسىپ، كەيىن كۇنالارىڭىزعا وكىندىڭىز. جامان ادەتتەردى تاستاپ، قۇدايدىڭ ەركىنە ساي ٶمىر سۇرۋگە بەكىندىڭىز. ال قۇداي ٴسىزدى كەشىرگەنىن بىلگەندە، كوڭىلىڭىز جاي تاپتى (ٴزاب. 32:1، 2). ٴسۇيتىپ، قاۋىم كەزدەسۋلەرىنە باراتىن بولدىڭىز جانە بىلگەن كەرەمەت شىندىقتاردى باسقالارعا ايتا باستادىڭىز. وسىلاي ەحوباعا باعىشتالعان، شومىلدىرۋ راسىمىنەن وتكەن ٴماسىحشى بولىپ، ومىرگە اپاراتىن جولدا كەلە جاتسىز ٵرى بۇل جولدان ەش تايماۋعا بەكىنگەنسىز (مات. 7:13، 14).
15. كيەلى كىتاپتى زەرتتەپ، وي جۇگىرتۋ نەلىكتەن پايدالى؟
15 قۇداي ٴسوزىن زەرتتەپ، وي جۇگىرتىڭىز. تامىرى تەرەڭ جايىلعان اعاش مىزعىماي تۇراتىنداي، ەحوباعا دەگەن سەنىمىمىز كۇشتى بولسا، ٴبىز دە بەرىك تۇرا الامىز. اعاش وسكەن سايىن تامىرى تەرەڭدەپ، كەڭىنەن جايىلا بەرەدى. سول سياقتى، قۇداي ٴسوزىن زەرتتەپ، وي جۇگىرتكەن سايىن، سەنىمىمىز نىعايىپ، قۇدايدىڭ جولى ەڭ دۇرىس جول ەكەنىنە كوزىمىز جەتە تۇسەدى (قول. 2:6، 7). بۇل ٷشىن ەجەلدەگى قىزمەتشىلەرى ەحوبانىڭ باسشىلىعىنىڭ، اقىل-كەڭەسىنىڭ، قورعانىشىنىڭ قانداي پايداسىن كورگەنى جايلى ويلانساڭىز بولادى. مىسالى، ەزەكيەلدىڭ اياندا عيباداتحانانى كورگەن كەزىن الايىقشى. پەرىشتە عيباداتحانانىڭ ەگجەي-تەگجەيلى ولشەمىن الىپ جاتقاندا، ول مۇقيات باقىلاپ تۇرعان. بۇل ايان ەزەكيەلدىڭ سەنىمىن نىعايتىپ تاستادى. بۇگىندە ٴبىز دە بۇل اياننان ەحوبانىڭ تازا عيباداتقا قاتىستى نورمالارىن قالاي ۇستانۋ كەرەكتىگىن ۇيرەنەمىز d (ەزەك. 40:1—4؛ 43:10—12). قۇداي سوزىندەگى تەرەڭ ويلاردى زەرتتەپ، ويلانۋعا ۋاقىت بولسەك، ٴبىز دە مۇنىڭ مول پايداسىن كورەمىز.
16. مىزعىماس جۇرەكتىڭ ارقاسىندا روبەرت نە ىستەدى؟ (ٴزابۇر 112:7)
16 مىزعىماس جۇرەككە يە بولىڭىز. ٴداۋىت «جۇرەگىم مىزعىماس بەرىك، ۋا، قۇدايىم» دەگەندە، ەحوباعا دەگەن سۇيىسپەنشىلىگىن ەشكىم دە، ەشتەڭە دە سۋىتا المايتىنىن كورسەتكەن (ٴزاب. 57:7). ٴبىز دە جۇرەگىمىزدى مىزعىماس ەتكىمىز كەلسە، ەحوباعا تولىقتاي سەنىم ارتۋىمىز كەرەك (ٴزابۇر 112:7 وقىڭىز). الدىندا ايتىلىپ كەتكەن روبەرت باۋىرلاسقا ورالايىقشى. مىزعىماس جۇرەكتىڭ ارقاسىندا ول نە ىستەدى؟ انەستەزيولوگ كەلىپ، قاجەت بولىپ جاتسا، قاندى دايىن ۇستاپ تۇراتىنىن ايتقاندا، روبەرت: «قانداي جاعداي بولماسىن، قان قۇيمايمىز دەپ كەپىلدىك بەرە الماساڭىز، وندا مەن قازىر-اق كەتەمىن»،— دەپ كەسىپ ايتادى. ول كەيىننەن بۇل جايىندا بىلاي دەدى: «مەن ٴبىر ساتكە دە ويلانىپ جاتپادىم، كەيىن نە بولارىن دا مۇلدەم ۋايىمدامادىم».
سەنىمىمىزدىڭ ىرگەسىن مىقتى ەتىپ قالاساق، قانداي سىناق بولسا دا، بەرىك تۇرامىز (17-ابزاستى قاراڭىز)
17. روبەرتتىڭ وقيعاسىنان نە ۇيرەنەمىز؟ (سۋرەتتى دە قاراڭىز.)
17 روبەرتتىڭ مىزعىماي تۇرۋىنىڭ سەبەبى — ول اۋرۋحاناعا تۇسپەي جاتىپ-اق بەرىك شەشىم قابىلداپ قويعان. ول بۇنداي شەشىمگە قالاي كەلدى؟ بىرىنشىدەن، ەحوبانى قۋانتقىسى كەلدى. ەكىنشىدەن، كيەلى كىتاپ پەن وعان نەگىزدەلگەن ادەبيەتتەردەن ٶمىر مەن قاننىڭ قاسيەتتىلىگى جايلى جاقسىلاپ زەرتتەدى. ۇشىنشىدەن، ەحوبانىڭ ٴتىلىن العانى قىسقا ۋاقىتقا عانا ەمەس، باياندى يگىلىك اكەلەتىنىنە كامىل سەندى. كەز كەلگەن سىناقتا مىزعىماي تۇراتىن جۇرەككە ٴبىز دە يە بولا الامىز.
باراق پەن ونىڭ جاۋىنگەرلەرى سيسارانىڭ اسكەرىن قايسارلىقپەن قۋدى (18-ابزاستى قاراڭىز)
18. ەحوباعا سەنىم ارتۋعا قاتىستى باراق بيدەن نە ۇيرەنەمىز؟ (مۇقاباداعى سۋرەتتى قاراڭىز.)
18 ەحوباعا سەنىم ارتىڭىز. ەحوباعا سەنىم ارتىپ، نۇسقاۋىنا مويىنسۇنعاننىڭ ارقاسىندا باراق بي جەڭىسكە جەتكەن. بۇكىل يسرايلدە ٴبىر تال نايزا دا، قالقان دا جوق زاماندا ەحوبا وعان قاناحاندىقتاردىڭ مۇزداي قارۋلانعان اسكەرىنە قارسى اتتانۋدى بۇيىرادى (بي. 5:8). دەبورا پايعامبار باراققا قاناحاندىقتاردىڭ قولباسشىسى سيسارانىڭ 900 سوعىس ارباسىمەن جازىق جەردە شايقاسۋدى ايتادى. تەگىس جەردە سوعىس اربالارى جۇيتكىپ، جاۋلارىنىڭ كۇشى باسىم تۇسەتىنىن بىلسە دە، باراق ەحوباعا مويىنسۇنادى. ٴسۇيتىپ، ول ساربازدارىمەن تابور تاۋىنان تۇسە بەرگەندە، ەحوبا كوكتەن نوسەر قۇيدىرىپ، جەر مي باتپاققا اينالادى. سيسارانىڭ اربالارى باتپاقتان شىعا الماي قالادى دا، ەحوبا باراقتى جەڭىسكە جەتكىزەدى (بي. 4:1—7، 10، 13—16). ٴبىز دە جەڭىسكە جەتۋ ٷشىن ەحوبادان جانە ونىڭ وكىلدەرىنەن كەلەتىن نۇسقاۋلارعا سەنىم ارتۋىمىز كەرەك (مۇس. 5-ج. 31:6).
بەرىكتىكتەن تايماۋعا بەكىنىڭىز
19. ٴسىز نەلىكتەن اقىرىنا دەيىن بەرىك تۇرعىڭىز كەلەدى؟
19 ٴبىز وسى دۇنيەنىڭ اقىرىنا دەيىن بەرىك تۇرۋ ٷشىن كۇرەسە بەرۋىمىز كەرەك (ٴتىم. 1-ح. 6:11، 12؛ پەت. 2-ح. 3:17). قۋعىن-سۇرگىن، الداپ-ارباۋ، ادامي كوزقاراستار، جالعان اقپاراتتار مەن الاڭداتاتىن نارسەلەر بەرىكتىگىمىزدى شايقالتىپ جۇرمەسىن (ەفەس. 4:14). قايتا، ەحوباعا بەرىلگەندىگىمىزدەن ەش اينىمايىق جانە ونىڭ زاڭ-تالاپتارىنا مىزعىماي مويىنسۇنايىق. مىزعىماي تۇرۋمەن قاتار، بىزگە يلىككىش تە بولا ٴبىلۋ كەرەك. كەلەسى ماقالادا ەحوبا مەن يسا وسى قاسيەتتى قالاي تانىتاتىنىن قاراستىرامىز.
129-ٵن تاباندى بولامىز
a ادامدار نەنىڭ جاقسى، نەنىڭ جامان ەكەنىن وزدەرى شەشە الادى دەگەن پىكىردى شايتان ادام مەن حاۋانىڭ كەزىنەن بەرى ناسيحاتتاپ كەلەدى. ول ٴبىزدىڭ دە وسىلاي ويلاپ، ەحوبانىڭ زاڭدارى مەن ۇيىمنىڭ نۇسقاۋلارىنا ٵتۇستى قاراعانىمىزدى قالايدى. ەندەشە، وسى ماقالانى قاراستىرا وتىرىپ، مىنا دۇنيەنىڭ تاۋەلسىزدىك رۋحىنا قارسى تۇرا بىلەيىك جانە ەحوبانىڭ جاعىندا بەرىك تۇرۋدى ۇيرەنەيىك.
b قۇدايدىڭ قانعا قاتىستى كوزقاراسىن قۇرمەتتەۋگە نە جاتاتىنىن «ماڭگى باقي ٶمىردىڭ راقاتىن كورىڭىز!» كىتابىنىڭ 39-ساباعىنان ٴبىلىڭىز.
c jw.org تور بەكەتىنەن «جالعان اقپاراتتان ساق بولىڭىز» دەگەن ماقالانى قاراڭىز.
d كوبىرەك مالىمەتتى «ەحوبا تازا عيباداتتى قالپىنا كەلتىردى!» كىتابىنىڭ 13، 14-تاراۋلارىنان بىلە الاسىز.
