29-زەرتتەۋ ماقالاسى
زور الاپاتقا دايىنسىز با؟
«دايىن بولىڭدار» (مات. 24:44).
150-ٵن قۇتقارىلۋ ٷشىن قۇدايدى ىزدەيىك
اڭداتپا a
1. اپاتقا نەلىكتەن الدىن الا دايىندالعان دۇرىس؟
«قامدانعان قاپى قالمايدى» دەيدى. ماسەلەن، توتەنشە جاعدايعا الدىن الا دايىندالىپ قويعان ادام ٶز ٶمىرىن امان ساقتاپ قانا قويماي، وزگەلەرگە دە كومەك بەرە الادى. ەۋروپانىڭ ادامدارعا گۋمانيتارلىق كومەك كورسەتەتىن ٴبىر ۇيىمىنىڭ ايتۋىنشا، «دايىندىعىمىز جاقسى بولسا، ٶمىرىمىزدى امان ساقتاپ قالا الامىز».
2. زور الاپاتقا نەگە الدىن الا دايىندالعان دۇرىس؟ (ماتاي 24:44)
2 توتەنشە جاعداي سياقتى، زور الاپات تا كەنەتتەن باستالادى (مات. 24:21). بىراق ٴبىر ايىرماشىلىعى، كوپشىلىكپەن سالىستىرعاندا، ٴبىز ونىڭ كەلەتىنىن بىلەمىز. سوناۋ ەكى مىڭداي جىل بۇرىن يسا شاكىرتتەرىنە سول كۇنگە دايىن بولۋدى ەسكەرتىپ كەتكەن (ماتاي 24:44 وقىڭىز). الدىن الا دايىن بولساق، سول الاساپىران ۋاقىتقا توتەپ بەرۋ وزىمىزگە وڭاي بولادى ٵرى باسقالارعا دا كومەكتەسە الامىز (لۇقا 21:36).
3. زور الاپاتقا دايىن بولۋ ٷشىن نەگە تاباندىلىق، جاناشىرلىق پەن سۇيىسپەنشىلىك قاجەت؟
3 ماسەلەن، زور الاپاتتا ادامدارعا بۇرشاقتاي قاتتى تيەتىن ۇكىمدى ايتۋ كەرەك بولسا، ال ولار بىزگە قارسى شىعىپ جاتسا، نە ىستەيمىز؟ (ايان 16:21). ەحوبانىڭ ٴبىزدى قورعايتىنىنا سەنىپ، ايتۋ كەرەك حاباردى ايتۋ ٷشىن بىزگە تاباندىلىق قاجەت بولادى. ال ەگەر سول كەزدە باۋىرلاستار دۇنيە-مۇلكىنەن ايىرىلىپ، تۇكسىز قالسا، نە ىستەيمىز؟ (ابق. 3:17، 18). ولارعا جاردەم بەرۋ ٷشىن بىزگە جاناشىر بولۋ قاجەت. وداقتاسقان حالىقتار شابۋىلداپ جاتقاندىقتان، باۋىرلاستارمەن تار جەردى تاماشالاپ، ٴبىر جەردە وتىرۋعا تۋرا كەلسە، نە ىستەيمىز؟ (ەزەك. 38:10—12). ول دا وڭايعا سوقپايدى، سوندىقتان بىزگە بەرىك سۇيىسپەنشىلىك قاجەت. راسىندا دا، زور الاپاتقا دايىن بولۋ ٷشىن قازىردەن باستاپ بىزگە وسى ٷش قاسيەتتى جەتىلدىرۋ كەرەك.
4. تاباندىلىق، جاناشىرلىق پەن سۇيىسپەنشىلىكتى جاقسارتا بەرۋىمىز كەرەكتىگىن كيەلى كىتاپ قالاي كورسەتەدى؟
4 قۇداي ٴسوزى تاباندىلىق، جاناشىرلىق پەن سۇيىسپەنشىلىگىمىزدى ٵرى قاراي شىڭداي بەرۋگە ۇندەيدى. لۇقا 21:19 دا: «تاباندى بولۋلارىڭمەن جاندارىڭدى ساقتاپ قالاسىڭدار»،— دەلىنگەن. ال قولوستىقتارعا 3:12: «جاناشىرلىققا... بولەنىڭدەر»،— دەيدى. سالونيكالىقتارعا 1-حات 4:9، 10 دا بولسا: «ٴبىر-ٴبىرىڭدى ٴسۇيۋدى سەندەرگە قۇداي ۇيرەتىپ جاتىر عوي... ٴبىراق، باۋىرلاستار، ٴبىز سەندەردى وسى جاعىنان ٵرى قاراي دا جاقسارا بەرۋگە شاقىرامىز»،— دەپ جازىلعان. بۇل سوزدەردى ەستىگەن ماسىحشىلەر اتالمىش قاسيەتتەردى ونسىز دا تانىتىپ جۇرگەن. سوندا دا ولارعا وسى جاعىنان جاقسارا بەرۋ كەرەك ەدى. دەمەك، بىزگە دە سولاي ەتۋ كەرەك. ەندەشە، I عاسىرداعى ماسىحشىلەر بۇل قاسيەتتەردى قالاي تانىتقانىن قاراستىرىپ وتەيىك. سونداي-اق ولاردى ٴبىز قالاي تانىتا الاتىنىمىزدى جانە زور الاپاتقا قالاي دايىن بولا الاتىنىمىزدى بىلەمىز.
تاباندىلىعىڭىزدى شىڭداي بەرىڭىز
5. I عاسىرداعى ماسىحشىلەر نەنىڭ ارقاسىندا قيىنشىلىقتارعا تاباندىلىقپەن توتەپ بەردى؟
5 نەلىكتەن I عاسىرداعى ماسىحشىلەرگە تاباندىلىق قاجەت بولدى؟ (ەۆر. 10:36). بارلىق ادامنىڭ باسىنا تۇسەتىن اۋىرتپالىقتاردان بولەك، ولار باسقا دا قيىندىقتار كورگەن. ٴدىني جەتەكشىلەر مەن ريم ۇكىمەتىنە قوسا، ٶز تۋعاندارى ولارعا قارسى شىعىپ، قۋعىندادى (مات. 10:21). ونىڭ ۇستىنە، ولار قاۋىمدا الاۋىزدىق تۋدىرىپ جۇرگەن جولدانتايۋشىلاردىڭ ىلىمدەرىنە قارسى تۇرۋ كەرەك ەدى (ەل. ٸس. 20:29، 30). بىراق وسىنىڭ بارلىعىنا ولار تاباندىلىقپەن توتەپ بەردى (ايان 2:3). نەنىڭ ارقاسىندا؟ ولار جازبالارداعى ٵيۇپ پايعامبار سياقتى تاباندىلىقتىڭ ۇلگىلەرى جايلى وي جۇگىرتكەن (جاق. 5:10، 11). ەحوبادان كۇش سۇراپ دۇعا ەتكەن (ەل. ٸس. 4:29—31). سونداي-اق اقىرىنا دەيىن تاباندى بولسا، مۇنىڭ قانداي جەمىسىن كورەتىندەرىن ۇمىتپاعان (ەل. ٸس. 5:41).
6. قارسىلىققا توتەپ بەرگەن مەريتادان نە ۇيرەندىڭىز؟
6 ٴبىز دە كيەلى كىتاپتاعى جانە ادەبيەتتەرىمىزدەگى تاباندىلىقتىڭ ۇلگىلەرى جايلى ۇنەمى وقىپ-زەرتتەپ، ويلانساق، قيىندىقتارعا توزە الامىز. مەريتا ەسىمدى الباندىق ايەل باۋىرلاسىمىزعا وسى كومەكتەسكەن. تۋعان-تۋىستارى شىندىق ٷشىن ونى اياۋسىز ۇرىپ-سوققاندا، ول قالاي توتەپ بەرگەنىن ايتىپ بەردى. «مەن ٵيۇپتىڭ تاباندىلىعىنا قايران قالدىم! باسىنا سونشاما ازاپ تۇسسە دە، ونىڭ قايدان كەلىپ جاتقانىن بىلمەسە دە، ٵيۇپ: «ولە-ولگەنشە مىنسىزدىگىمنەن تايماسپىن!»— دەگەن (ٵيۇپ 27:5). ونىكىمەن سالىستىرعاندا، مەنىڭ سىناقتارىم تۇك ەمەس قوي! بۇل سىناقتاردىڭ ارتىندا كىم تۇرعانىن دا مەن جاقسى بىلەمىن»،— دەيدى ول.
7. قازىر اۋىر سىناقتان ٶتىپ جاتپاساق تا، نەنى ۇيرەنە بەرگەنىمىز ٴجون؟
7 تاباندىلىعىمىزدى شىڭدايتىن تاعى ٴبىر نارسە — ەحوباعا بار ۋايىمىمىزدى اقتارىپ، ٴجيى-ٴجيى دۇعا ايتۋ (ٴفىلىپ. 4:6؛ سال. 1-ح. 5:17). بالكىم، ٴدال قازىر ٴسىزدى قاتتى ۋايىمداتىپ جاتقان اۋىر سىناق جوق شىعار. بىراق كوڭىلىڭىز تۇسكەندە، نە ىستەرىڭىزدى بىلمەي دال بولعاندا، بىردەن دۇعا ايتىپ، ەحوبادان اقىل سۇرايسىز با؟ كۇندەلىكتى مايدا-شۇيدە ماسەلەدە ەحوباعا ارقا سۇيەپ ۇيرەنسەڭىز، الداعى ۇلكەن سىناقتا دا بىردەن سولاي ەتەسىز. وسىلايشا ەحوبا ٴسىز ٷشىن ٴدال ۋاقىتىندا جانە ٴدال كەرەك جولمەن ارەكەت ەتەتىنىنە سەنىمدى بولاسىز (ٴزاب. 27:1، 3).
تاباندىلىق
ٵربىر قيىندىق كەلەسىسىنە توتەپ بەرە الاتىنداي مىقتى قىلادى (8-ابزاستى قاراڭىز)
8. سىناقتا تاباندى تۇرۋدى قازىردەن ۇيرەنسەك، بولاشاقتا دا تاباندى تۇراتىنىمىزدى ميرانىڭ مىسالى قالاي راستايدى؟ (جاقىپ 1:2—4) (سۋرەتتى دە قاراڭىز.)
8 قازىردەن باستاپ سىناقتارعا تاباندىلىقپەن توتەپ بەرسەك، كەيىن زور الاپاتتا وزىمىزگە اناعۇرلىم جەڭىل بولادى (ريم. 5:3). مۇنى كوپ باۋىرلاستار ٶز باسىنان وتكەرگەن. ولاردىڭ ايتۋىنشا، ٵربىر سىناقتى ارتتا قالدىرعان سايىن، كەلەسىسىنە توتەپ بەرۋگە دايىن بولادى ەكەنسىڭ. قالاي؟ سىناققا ەحوبانىڭ كومەگىمەن توتەپ بەرگەندە، تاباندىلىعىڭ شىڭدالىپ، ەحوبا ەشقاشان كومەكسىز قالدىرمايتىنىنا سەنىمىڭ قاتايادى. وسىنداي سەنىم كەلەسى سىناقتاردا تاباندى تۇرۋعا كومەكتەسەدى (جاقىپ 1:2—4 وقىڭىز). البانيادا تۇراتىن ميرا ەسىمدى ٸزاشار وسىعان دەيىن تاباندى تۇرعانىنىڭ ارقاسىندا ٵلى دە تاباندى بولىپ كەلە جاتقانىن ايتىپ بەردى. وعان «وسى مەن عانا قيىندىقتان كوز اشپايمىن» دەگەن ويلار كەلەدى ەكەن. سوندايدا ميرا سوڭعى 20 جىل بويى ەحوبا قالاي دەمەپ كەلە جاتقانىن ەسىنە الىپ: «وسىنشاما جىلدار بويى قانشاما كۇرەستى ەحوبامەن بىرگە جەڭىپ شىققانىڭ زايا كەتسىن دەمەسەڭ، سوڭىنا دەيىن ادالدىق ساقتا!»— دەپ ٶزىن ىشتەي قايراپ وتىرادى ەكەن. ٴسىز دە وسى ۋاقىتقا دەيىن ەحوبانىڭ قالاي قولداپ-قۋاتتاپ كەلە جاتقانىن ويلاڭىز. ول ٴسىزدىڭ ٵربىر سىناققا توتەپ بەرگەن ٴساتىڭىزدى ۇمىتپاي، مىندەتتى تۇردە سي بەرەتىنىنە ەش كۇماندانباڭىز (مات. 5:10—12). سوندا زور الاپات كەلگەندە، تاباندىلىعىڭىز ابدەن شىڭدالعاندىقتان، اقىرىنا دەيىن توتەپ بەرۋگە تاستاي بەكىنەسىز.
جاناشىر بولىڭىز
9. انتيوحياداعى قاۋىم جاناشىرلىعىن قالاي كورسەتتى؟
9 I عاسىردا ياھۋدەيا جەرىن قاتتى اشتىق جايلاعان كەزدى الايىقشى. بۇنى بىلگەندە، سيريانىڭ انتيوحيا قالاسىنداعى ماسىحشىلەردىڭ اشتىقتا جۇرگەن باۋىرلاستارىنا قاتتى جانى اشىسا كەرەك. سول كەزدە ولار باۋىرلاستارىن اياپ قانا قويماي، مۇنى ٸس جۇزىندە كورسەتتى، ياعني «ٴارقايسىسى ٶز شاماسىنا قاراي ياھۋدەيادا تۇراتىن باۋىرلاستارىنا جاردەم جىبەرۋدى شەشتى» (ەل. ٸس. 11:27—30). ياھۋدەيا تىم الىس جەر بولسا دا، باۋىرلاستارىنا قول ۇشىن سوزۋعا بۇل ەش كەدەرگى بولمادى (جوح. 1-ح. 3:17، 18).
جاناشىرلىق
تابيعي اپاتتا جاناشىرلىق كورسەتۋگە دايىن بولايىق (10-ابزاستى قاراڭىز)
10. اپاتتان زارداپ شەككەن باۋىرلاستارعا جاناشىرلىق تانىتۋدىڭ قانداي جولدارى بار؟ (سۋرەتتى دە قاراڭىز.)
10 ٴبىز دە باۋىرلاستاردىڭ قانداي دا ٴبىر اپاتقا يا توتەنشە جاعدايعا ۇشىراعانىن ەستىسەك، جاناشىرلىق تانىتىپ، كومەكتەسۋگە اسىق بولايىق. ول ٷشىن اقساقالدارعا جولىعىپ، كومەكتەسۋ شاراسىنا قالاي اتسالىسا الامىن دەپ سۇراساڭىز بولادى نەمەسە دۇنيەجۇزىلىك ىسكە ساداقا جاساساڭىز دا، سول باۋىرلاستار ٷشىن دۇعا ەتسەڭىز دە بولادى b (ناق. س. 17:17). مىسالى، 2020-جىلى 19-COVID پاندەمياسىندا دۇنيەجۇزى بويىنشا 950 دەن اسا توتەنشە جاعدايلار كوميتەتى قۇرىلدى. وسى كوميتەتتە قىزمەت ەتەتىن باۋىرلاستارىمىزدىڭ ەرەن ەڭبەگىنە العىسىمىز شەكسىز. جاناشىرلىق قاسيەتى ولاردى گۋمانيتارلىق كومەك پەن رۋحاني كومەك كورسەتۋگە جانە ۇيلەرىن يا عيبادات ورىندارىن جوندەپ بەرۋگە، ٴتىپتى جاڭادان سوعىپ بەرۋگە تالپىندىردى (قورىنتتىقتارعا 2-حات 8:1—4 سالىستىرىڭىز).
11. قالايشا ٴبىزدىڭ جاناشىرلىققا تولى ىستەرىمىز ەحوباعا ماداق اكەلەدى؟
11 اپاتتان سوڭ باۋىرلاستارعا كورسەتەتىن جاناشىرلىعىمىز سىرت كوزدەن تاسا قالمايدى. بۇعان باگام ارالدارىندا بولعان ٴبىر وقيعا دالەل. 2019-جىلى سوققان دوريان داۋىلىنان سول جاقتاعى ٴبىر پاتشالىق سارايى قيراپ قالادى. باۋىرلاستار پاتشالىق سارايىندا جوندەۋ جۇمىستارىن جۇرگىزىپ جاتىپ، كۋاگەر ەمەس مەردىگەردىڭ كومەگىنە جۇگىنەدى. بۇل جۇمىستىڭ قۇنى قانداي بولاتىنىن سۇراعاندا، الگى كىسى بىلاي دەگەن ەكەن: «سەندەردىڭ ۇيىمدارىڭا ٴبىر جاقسىلىق ىستەگىم كەلىپ تۇر. جۇمىسىم ٷشىن دە، قۇرال-جابدىقتار مەن ماتەريالدار ٷشىن دە سەندەردەن ەشقانداي اقى المايمىن. سەبەبى ٴبىر-بىرلەرىڭە جان اياماي كومەكتەسەتىندەرىڭە قاتتى ريزا بولدىم». مىنا دۇنيەدە باسىم كوپشىلىك ەحوبانى بىلمەسە دە، ونىڭ كۋاگەرلەرى جاساپ جاتقان ىستەردى بايقايدى. ٴبىزدىڭ جاناشىرلىعىمىزدى كورىپ، ادامدار «اسا مەيىرىمدى» اكەمىزگە جاقىنداپ جاتسا، قانداي كەرەمەت! (ەفەس. 2:4).
12. زور الاپاتقا دايىن بولۋ ٷشىن نەلىكتەن قازىردەن باستاپ جاناشىرلىق تانىتىپ ۇيرەنگەنىمىز ٴجون؟ (ايان 13:16، 17)
12 ال زور الاپاتتا جاناشىرلىق تانىتۋدىڭ ماڭىزدىلىعى ارتا تۇسپەك. كيەلى كىتاپتا ايتىلىپ كەتكەندەي، وسى دۇنيەنىڭ ساياساتىن قولداماعاندار قازىردىڭ وزىندە دە، زور الاپاتتا دا قيىندىقتار كورەدى (ايان 13:16، 17 وقىڭىز). زور الاپاتتا باۋىرلاستار ٴتىپتى تىرشىلىككە ەڭ قاجەتتى نارسەلەردىڭ وزىنە ٴزارۋ بولىپ قالۋى مۇمكىن. سوندىقتان سول كەزەڭدە دە بارىنشا جاناشىر بولعانىمىز ماڭىزدى. سوندا پاتشامىز يسا ٴماسىح ادامزاتتى سوتتاۋعا كەلگەندە، ٴبىزدى «پاتشالىعىن مۇرا ەتۋگە» لايىقتى دەپ تابادى (مات. 25:34—40).
سۇيىسپەنشىلىگىڭىز ارتا بەرسىن
13. ريمدىكتەرگە 15:7 دە ايتىلعانداي، العاشقى ماسىحشىلەر ارالارىنداعى سۇيىسپەنشىلىكتى قالاي نىعايتىپ وتىرعان؟
13 العاشقى ماسىحشىلەر ٴبىر-بىرىنە دەگەن ەرەكشە سۇيىسپەنشىلىگىمەن تانىلعان. بىراق ٴبىر-ٴبىرىن ٴسۇيۋ ولارعا وڭاي بولدى ما؟ ول كەزدەگى قاۋىمداردا ٵرتۇرلى باۋىرلاستار بولعانىن ەسكەرسەك، وڭاي بولماعان. مىسالى، ريمدەگى قاۋىمدا مۇسا زاڭىنىڭ تاربيەسىمەن وسكەن ياھۋديلەر عانا ەمەس، مۇلدەم باسقا ورتادان شىققان وزگە ۇلت ادامدارى دا بولعان. ارالارىندا قۇل مەن ەرىكتىلەر دە، قۇل يەلەنۋشىلەر دە بولعان. وسىنداي ٵرالۋاندىققا قاراماستان، قالايشا ولار ٴبىر-ٴبىرىن جاقسى كوردى؟ ەلشى پاۋىل ولارعا «ٴبىر-ٴبىرىڭدى قابىلداڭدار» دەپ كەڭەس بەرگەن (ريمدىكتەرگە 15:7 وقىڭىز). «قابىلداۋ» دەپ اۋدارىلعان ٴتۇپنۇسقاداعى ٴسوز ادامدى جىلى ٵرى قۇشاق جايا قارسى الىپ، ۇيىڭە كىرگىزۋدى يا ٶز ورتاڭا قوسۋدى بىلدىرگەن. مىسالى، پاۋىل ٴفىلىموندى قاشىپ كەتكەن قۇلى ونيسىمدى «جىلى قابىلداۋعا» شاقىرعان (فلم. 17). ال پريسكيلا مەن اقيلا اپوللوستى قۇداي جولى تۋرالى ٴبىلىمى از بولسا دا، «وزدەرىمەن بىرگە الىپ كەتىپ»، ورتالارىنا قوسقان (ەل. ٸس. 18:26). دەمەك، العاشقى ماسىحشىلەر ٵرتۇرلى ەكەنبىز دەپ جىك-جىككە بولىنبەي، قايتا ٴبىر-ٴبىرىن جىلى قابىلداي بىلگەن.
سۇيىسپەنشىلىك
باۋىرلاستاردىڭ بارلىعىن دا ٴسۇيۋىمىز كەرەك (15-ابزاستى قاراڭىز)
14. اننا باۋىرلاس پەن كۇيەۋى قالاي سۇيىسپەنشىلىك كورسەتتى؟
14 ٴبىز دە باۋىرلاستاردى ٶز ورتامىزعا قابىلداپ، ولارعا سۇيىسپەنشىلىك تانىتايىق. سوندا ٶزىمىز دە ولاردىڭ سۇيىسپەنشىلىگىنە بولەنەمىز (قور. 2-ح. 6:11—13). اننا باۋىرلاستىڭ وسىعان كوزى جەتتى. ول كۇيەۋىمەن باتىس افريكاعا ميسسيونەر بولىپ تاعايىندالعان سوڭ، ارتىنشا 19-COVID پاندەمياسى باستالىپ كەتەدى. جاڭا باۋىرلاستارمەن جۇزبە-ٴجۇز كورىسىپ، تانىسۋعا مۇمكىندىك بولماعاندىقتان، ولار باسقا امالىن تابادى. ەكەۋى باۋىرلاستارمەن بەينەكونفەرەنسيا ارقىلى بايلانىسىپ، ولارمەن تانىسۋعا اسىق ەكەندەرىن ايتادى. وسىنداي ىقىلاستارىنا باۋىرلاستار قاتتى ريزا بولىپ، ولارعا وزدەرى حابارلاسىپ، جازىپ تۇراتىن بولىپتى. ميسسيونەرلەردى جاڭا قاۋىممەن ٴبىرىنشى بولىپ تانىسۋعا نە تالپىندىردى؟ اننا بىلاي دەيدى: «ٴسۇيۋدى مەن كەزىندە باۋىرلاستارىمنان ۇيرەنگەنمىن. ٶمىردىڭ اشتى-تۇشىسىندا ولار ماعان دا، وتباسىما دا، زور سۇيىسپەنشىلىك كورسەتتى. ولاردىڭ جاقسىلىقتارى جۇرەگىمدە ماڭگىلىككە ساقتاۋلى».
15. باۋىرلاستاردىڭ ٴبارىن سۇيۋگە قاتىستى ۆانەسسادان نە ۇيرەنەمىز؟ (سۋرەتتى دە قاراڭىز.)
15 كوبىمىز وسكەن ورتالارى، العان تاربيەلەرى جانە بولمىستارى ٵرتۇرلى باۋىرلاستارمەن ٴبىر قاۋىمدامىز. ولارعا دەگەن سۇيىسپەنشىلىگىمىز نىعايۋ ٷشىن جاقسى قاسيەتتەرىن كورە بىلگەنىمىز ٴجون. جاڭا زەلانديادا تۇراتىن ۆانەسسا باۋىرلاستىڭ قاۋىمداعى كەيبىر جاريالاۋشىلارمەن باسى پىسپەگەن ەكەن. بىراق كەيىن سول باۋىرلاستاردان قاشا بەرمەي، جاقىنىراق ارالاسىپ كورۋدى شەشىپتى. سودان، ۆانەسسا ولاردى ەحوبا نە ٷشىن سۇيەتىنىن كورە باستايدى. ول بىلاي دەيدى: «كۇيەۋىم اۋداندىق باقىلاۋشى بولعاندا، ناعىز سانالۋاندىقتى سوندا كوردىك. بىراق ولارمەن وپ-وڭاي ٴتىل تابىسىپ كەتتىم. بولمىسىمىزدىڭ ٵرتۇرلى بولعانى قازىر ماعان ۇنايدى. بۇل ەحوباعا دا ۇنايدى، ايتپەسە ٴبىزدى ٴتۇرلى باۋىرلاستاردان تۇراتىن قاۋىمعا جاقىنداتىپ تارتىپ، باسىمىزدى قوسپاس ەدى». باسقالاردىڭ بويىنان ەحوبا كورەتىندى بايقاپ ۇيرەنسەك، ولاردى سۇيەتىنىمىزدى كورسەتەمىز (قور. 2-ح. 8:24).
باۋىرلاستارمەن ىنتىماق-بىرلىك ساقتاساق، زور الاپاتتا ەحوبا ٴبىزدى قورعاپ قالادى (16-ابزاستى قاراڭىز)
16. نەلىكتەن زور الاپاتتا سۇيىسپەنشىلىكسىز بولمايدى دەپ ايتا الامىز؟ (سۋرەتتى دە قاراڭىز.)
16 زور الاپاتتا سۇيىسپەنشىلىكتىڭ قانشالىقتى ماڭىزدى بولاتىنىن قاراستىرايىقشى. زور الاپات باستالعاندا ەحوبا ٴبىزدى قالاي قورعايدى؟ ەجەلدە بابىلعا شابۋىل جاسالعاندا، ەحوبا سونداعى حالقىنا بىلاي دەپ نۇسقاۋ بەرگەن: «حالقىم، بارىپ، ىشكى بولمەلەرىڭە كىرىڭدەر دە، ەسىكتەرىڭدى جاۋىپ الىڭدار. قۇدايدىڭ قاھارى باسىلعانشا، ازعانا ۋاقىت جاسىرىنا تۇرىڭدار» (يشايا 26:20). زور الاپاتتا بىزگە دە ٴدال وسى نۇسقاۋعا باعىنۋ قاجەت بولۋى مۇمكىن. مۇنداعى «ىشكى بولمەلەر» قاۋىمداردى بىلدىرسە كەرەك. دەمەك، قاۋىمداعى باۋىرلاستارمەن بىرلىك ساقتاپ، يىق تىرەسە قىزمەت ەتىپ جۇرسەك، ەحوبا زور الاپاتتا ٴبىزدى امان الىپ قالادى. سوندىقتان باۋىرلاستارعا شىداپ-ٴتوزىپ قانا قويماي، قازىردەن باستاپ ولاردى بارىنشا جاقسى كورۋگە كۇش سالا بەرۋىمىز قاجەت. ٴبىزدىڭ امان قالۋ-قالماۋىمىز سوعان بايلانىستى بولىپ قالۋى مۇمكىن!
قازىردەن دايىن بولىڭىز
17. قازىردەن باستاپ دايىندالساق، زور الاپاتتا نە ىستەي الامىز؟
17 «ەحوبانىڭ ۇلى كۇنى» بۇكىل ادامزاتتىڭ باسىنا اۋىر قاسىرەت بولىپ تۋماق (ساف. 1:14، 15). سول كەزدە ونىڭ حالقى دا ٴبىراز اۋىرتپاشىلىق كورەدى. بىراق قازىردەن باستاپ دايىندالساق، سابىرلى قالپىمىزدان اينىماي، باسقالارعا دا كومەكتەسە الامىز. قانداي قيىندىق بولسا دا، بارلىعىنا تاباندىلىقپەن توتەپ بەرەمىز. باۋىرلاستارىمىز قينالىپ قالسا، جاناشىرلىق تانىتىپ، ولارعا قول ۇشىن سوزامىز. ولاردى قازىردەن باستاپ سۇيۋگە كۇش سالعاندىقتان، سول كەزدە دە توننىڭ ىشكى باۋىنداي بولامىز. سوندا ەحوبا بىزگە اپات پەن الاپات دەگەندەر اتىمەن جوق بولاتىن ماڭگىلىك ٶمىردى سيلايدى (يشايا 65:17).
144-ٵن زور سيعا نازار تىگەيىك
a زور الاپاتتىڭ باستالاتىن ۋاقىتى تاياپ قالدى. ەشقاشان تاريحتا بولماعان سول الاساپىران كەزەڭگە دايىن بولۋ ٷشىن بىزگە تاباندىلىق، جاناشىرلىق جانە سۇيىسپەنشىلىك قاسيەتتەرى وتە قاجەت. سوندىقتان I عاسىرداعى ماسىحشىلەر بۇل قاسيەتتەردى تانىتۋدى قالاي ۇيرەنگەنىن، ٴبىز قالاي ۇيرەنە الاتىنىمىزدى ٵرى وسى ٷش قاسيەت زور الاپاتتا نەگە قاجەت بولاتىنىن تالقىلاپ وتەيىك.
b توتەنشە جاعدايدا كومەكتەسۋ شاراسىنا اتسالىسامىن دەسەڭىز، «جەرگىلىكتى جوبالاۋ جانە قۇرىلىس ٸسىنىڭ ەرىكتىسى بولۋعا ٶتىنىش» (50-DC) قاعازىن نەمەسە «ەرىكتى قىزمەتشى بولۋعا ٶتىنىش» (19-A) قاعازىن تولتىرىڭىز، سوسىن جوباعا شاقىرعانىن كۇتىڭىز.
