30-زەرتتەۋ ماقالاسى
سۇيىسپەنشىلىگىڭىزدى جەتىلدىرە بەرىڭىز
«سۇيىسپەنشىلىكپەن جان-جاقتى ٶسىپ جەتىلە بەرەيىك» (ەفەس. 4:15).
2-ٵن سەنىڭ ەسىمىڭ — ەحوبا
اڭداتپا a
1. كيەلى كىتاپتى زەرتتەي باستاعاندا قانداي شىندىقتاردى ٴبىلدىڭىز؟
كيەلى كىتاپتى ەندى عانا وقىپ-زەرتتەي باستاعانىڭىز ەسىڭىزدە مە؟ قۇدايدىڭ اتى بار ەكەنىن بىلگەندە تاڭعالعان شىعارسىز. ونىڭ ادامداردى توزاق وتىندا ازاپتامايتىنىن ٴبىلىپ، كوڭىلىڭىز جاي تاپقان بولار. ال دۇنيەدەن وتكەن جاقىن ادامدارىڭىزبەن قايتا قاۋىشىپ، ولارمەن جەردەگى جۇماقتا ماڭگى جاسايتىنىڭىزدى ەستىگەندە، جۇرەگىڭىز قۋانىشتان جارىلا جازداعان شىعار!
2. شىندىقتى بىلگەن سوڭ، ٵرى قاراي قانداي قادامدار جاسادىڭىز؟ (ەفەستىكتەرگە 5:1، 2)
2 كيەلى كىتاپتى زەرتتەگەن سايىن، ٴسىز ەحوبانى جاقسى كورىپ كەتتىڭىز. ال ەحوبانى جاقسى كورگەندىكتەن، بىلگەندەرىڭىزدى ومىرىڭىزدە قولدانۋعا تالپىندىڭىز. وسىلايشا كيەلى كىتاپ پرينسيپتەرىنە ساي، اقىلمەن شەشىمدەر قابىلداي باستادىڭىز. قۇدايعا ۇنامدى بولۋ نيەتىمەن ويىڭىز بەن ٸسىڭىزدى جاقسى جاققا وزگەرتتىڭىز. سۇيىكتى اتا-اناسىنا ەلىكتەيتىن بالاداي، ٴسىز دە كوكتەگى اكەڭىزگە ەلىكتەۋدى ۇيرەندىڭىز (ەفەستىكتەرگە 5:1، 2 وقىڭىز).
3. ٶزىمىزدى قالاي تەكسەرىپ كورسەك بولادى؟
3 «العاش ٴماسىحشى بولعان كەزىممەن سالىستىرعاندا، قازىر ەحوبانى ودان دا قاتتى جاقسى كورەمىن بە؟ شومىلدىرۋ راسىمىنەن وتكەلى بەرى باۋىرلاستاردى جاقسى كورۋ جاعىنان ەحوباعا ۇقساي ٴتۇستىم بە؟»— دەپ ويلانىپ كورسەك بولادى. «العاشقى سۇيىسپەنشىلىگىڭىز» سۋىپ كەتكەندەي كورىنسە، ەش مويىماڭىز. ٴى عاسىرداعى ماسىحشىلەر دە مۇنى باستان كەشكەن. بىراق يسا ولاردان كوڭىلى قالىپ، باس تارتپادى عوي. سول سياقتى، بىزدەن دە تەرىس اينالمايدى (ايان 2:4، 7). ول ٴبىزدىڭ العاشقى سۇيىسپەنشىلىگىمىزدى قايتا جالىنداتا الاتىنىمىزعا سەنەدى.
4. بۇل ماقالادا نەنى قاراستىرامىز؟
4 بۇل ماقالادا ٴبىز ەحوباعا جانە باۋىرلاستارعا دەگەن سۇيىسپەنشىلىگىمىزدى ارتتىرا بەرۋدى ۇيرەنەمىز. سونداي-اق بىزدەگى سۇيىسپەنشىلىك مولايعان سايىن، ٶزىمىز دە، وزگەلەر دە مۇنىڭ قانداي پايداسىن كورەتىنىن قاراستىرامىز.
ەحوبانى ودان سايىن ٴسۇيىڭىز
5، 6. ەلشى پاۋىل قىزمەتى بارىسىندا قانداي قيىندىقتار كوردى، بىراق سوندا دا ەحوباعا قىزمەت ەتە بەرۋگە ونى نە تالپىندىردى؟
5 ەلشى پاۋىل جىلدار بويى ەحوباعا قۋانىشپەن قىزمەت ەتتى، بىراق ونىڭ قيىندىقتارى دا از بولمادى. وعان ٴجيى الىس جەرلەرگە ساپار شەگۋ كەرەك بولعان. ال ول زاماندا بۇل وڭاي شارۋا ەمەس-ٴتىن. پاۋىل «تالاي رەت وزەندەردە قاتەرگە تاپ بولعان»، ال كەيدە «قاراقشىلاردان... باسىنا قاۋىپ تونەتىن». قارسىلاستاردان سوققى جەگەن كەزدەرى دە بولدى (قور. 2-ح. 11:23—27). ٴتىپتى كەيبىر ٴماسىحشى باۋىرلاستار ونىڭ قاۋىم ٷشىن بارىن سالىپ اتقارعان ەڭبەگىن باعالاماي قويدى (قور. 2-ح. 10:10؛ ٴفىلىپ. 4:15).
6 وسىنىڭ بارىنە قاراماي، پاۋىل نەلىكتەن ەحوباعا ادال قىزمەت ەتە بەردى؟ ول كيەلى جازبالاردان جانە ٶزىنىڭ ومىرىندە بولعان جاعدايلاردان ەحوبانىڭ قانداي قۇداي ەكەنىن تۇكپىرلەي تاني ٴبىلدى. وسىلايشا ەحوبا ونى قاتتى جاقسى كورەتىنىنە سەنىمدى بولدى (ريم. 8:38، 39؛ ەفەس. 2:4، 5). پاۋىلدىڭ ٶزى دە ەحوبانى قاتتى جاقسى كورىپ كەتتى. بۇل سۇيىسپەنشىلىگى ٵرى قاراي دا «قاسيەتتىلەر ٷشىن» تالماي قىزمەت ەتە بەرۋگە تالپىندىردى (ەۆر. 6:10).
7. ەحوباعا دەگەن سۇيىسپەنشىلىگىمىزدى كۇشەيتۋدىڭ ٴبىر جولى قانداي؟
7 ٴبىز دە ەحوبانىڭ ٴسوزىن مۇقيات وقىپ-زەرتتەسەك، ونى ودان سايىن جاقسى كورە تۇسەمىز. كيەلى كىتاپتى وقىعاندا: «وسى وقىعانىمنان ەحوبا جايلى نە بىلۋگە بولادى؟»— دەپ ويلانىڭىز. سونداي-اق وزىڭىزگە مىنا ەكى سۇراقتى قويىڭىز: «بۇل ۇزىندىدە ەحوبا مەنى جاقسى كورەتىنى نەدەن كورىنەدى؟ ال مەن ەحوبانى تاعى نە ٷشىن جاقسى كورسەم بولادى؟»
8. ەحوباعا دەگەن سۇيىسپەنشىلىگىمىزدى دۇعا قالاي كۇشەيتەدى؟
8 ەحوبانى ودان سايىن جاقسى كورۋدىڭ تاعى ٴبىر جولى — كۇنىگە وي-سەزىمدەرىمىزدى اقتارىپ دۇعا ەتۋ (ٴزاب. 25:4، 5). ەحوبا بولسا دۇعالارىمىزدى جاۋاپسىز قالدىرمايدى (جوح. 1-ح. 3:21، 22). ازياداعى كەن دەگەن ايەل باۋىرلاس بىلاي دەپ ٴبولىستى: «العاشىندا ەحوباعا دەگەن سۇيىسپەنشىلىگىم العان بىلىمىمە عانا نەگىزدەلگەن ەدى، بىراق دۇعالارىما جاۋاپ العان سايىن، ونى جاقسى كورە ٴتۇستىم. ال سۇيىسپەنشىلىگىم كۇشەيگەن سايىن، وعان ۇنامدى بولۋعا بارىنشا تىرىساتىن بولدىم» b.
وزگەلەردى ودان سايىن ٴسۇيىڭىز
9. تىموتە باۋىرلاستارىنا دەگەن سۇيىسپەنشىلىگىن كۇشەيتە بەرگەنى نەدەن كورىنەدى؟
9 پاۋىل ٴبىر ميسسيونەرلىك ساپارىندا تىموتە ەسىمدى جاس باۋىرلاسپەن تانىسادى. تىموتە ەحوبانى دا، باۋىرلاستاردى دا جاقسى كورگەن. ويتكەنى بىرنەشە جىل وتە پاۋىل فىلىپىدەگى قاۋىمعا: «[تىموتە] سياقتى مەنىمەن نيەتتەس، شىن كوڭىلدەن قامدارىڭدى ويلايتىن باسقا ەشكىمىم جوق»،— دەگەن (ٴفىلىپ. 2:20). بايقاساق، ول تىموتەنىڭ ۇيىمداستىرۋ قابىلەتىنە نە كوپشىلىك الدىندا شەشەن سويلەگەنىنە ەمەس، باۋىرلاستارعا دەگەن ىستىق سۇيىسپەنشىلىگىنە ٴتانتى بولعان. باۋىرلاستار دا تىموتەنىڭ ساپارىن اسىعا كۇتكەنى ٴسوزسىز (قور. 1-ح. 4:17).
10. اننا مەن كۇيەۋى باۋىرلاستاردى سۇيەتىنىن قالاي كورسەتتى؟
10 وسى رەتتە الدىڭعى ماقالادا ايتىلىپ كەتكەن اننا باۋىرلاستىڭ وقيعاسىن قاراستىرايىق (ەۆر. 13:16). باۋىرلاستاردى سۇيگەندىكتەن، اننا كۇيەۋى ەكەۋى ولارعا ٸس جۇزىندە كومەك كورسەتكەن. بىردە سۇراپىل داۋىلدان كەيىن ٴبىر كۋاگەر وتباسىنىڭ ٷيىنىڭ شاتىرى قيراپ قالادى. اننا كۇيەۋى ەكەۋى سول وتباسىنىڭ جاعدايىن ٴبىلىپ قايتۋعا بارىپ، ولاردىڭ كيەرگە بىردە-ٴبىر تازا كيىمدەرى قالماعانىن كورەدى. «ٴبىز ولاردىڭ كيىمدەرىن ۇيگە الىپ كەتىپ، جۋىپ، ۇتىكتەپ، قايتا اكەلىپ بەردىك. ارينە، بۇل ٴبىر قيىن شارۋا ەمەس ەدى، بىراق وسى كىشىگىرىم كومەكتىڭ ارقاسىندا ٴبىز ٴبىر-بىرىمىزگە باۋىر باسىپ، جاقسى دوس بولىپ كەتتىك»،— دەيدى اننا. ٴبىز دە سولار سياقتى باۋىرلاستارىمىزعا قول ۇشىن بەرۋدىڭ امالدارىن قاراستىرىپ جۇرەيىك (جوح. 1-ح. 3:17، 18).
11. ا) سۇيىسپەنشىلىك تانىتۋعا بارىنشا كۇش سالساق، باسقالار نە سەزىنەدى؟ ٵ) ناقىل سوزدەر 19:17 گە ساي، وزگەلەرگە تانىتقان سۇيىسپەنشىلىگىمىزگە ەحوبا قالاي قارايدى؟
11 باۋىرلاستارىمىزعا سۇيىسپەنشىلىك پەن مەيىرىمدىلىك كورسەتسەك، ەحوباعا ەلىكتەۋگە تىرىسىپ جۇرگەنىمىزدى ولار بايقايدى. باۋىرلاستار مەيىرىمدىلىگىمىزگە قانشالىقتى ريزا بولاتىنىن ٴبىز بىلمەۋىمىز دە مۇمكىن. بۇنى الدىندا ايتىپ كەتكەن كەننىڭ سوزدەرىنەن اڭعارامىز. ول باۋىرلاستاردىڭ جاقسىلىعىن ٵلى دە ۇمىتپاعان ەكەن. «كەزىندە مەنى قىزمەتكە الىپ شىققان ايەل باۋىرلاستارعا العىسىم زور. ولار مەنى ۇيىمنەن الىپ كەتەتىن، بىرگە تاماقتانۋعا شاقىراتىن، سوڭىندا ۇيىمە جەتكىزىپ سالاتىن. ولاردىڭ قانشاما كوپ كۇش سالعانىن ەندى ٴتۇسىنىپ وتىرمىن ٵرى ولار مۇنى قۋانىشپەن ىستەدى»،— دەيدى كەن. ول بىلاي دەپ ٴسوزىن جالعادى: «سول باۋىرلاستاردىڭ جاقسىلىعىن جاقسىلىقپەن قايتارعىم-اق كەلەدى، بىراق ٴبارى جان-جاققا كەتىپ قالعاندىقتان، كىمنىڭ قايدا تۇراتىنىن بىلمەيمىن. بىراق ەحوبا بىلەدى عوي، سوندىقتان مەن ودان «باۋىرلاستارىمنىڭ قارىمتاسىن قايتارا گور» دەپ سۇرايمىن». ٴبىزدىڭ دە كورسەتكەن مەيىرىمدىلىگىمىزدى ٴبارى بىردەي بايقاپ، راقمەت ايتپاۋى مۇمكىن. بىراق كەن ايتپاقشى، ەحوبا ٴبىزدىڭ وزگەلەر ٷشىن جاساعان تيتتەي دە ٸسىمىزدى نازارىنان تىس قالدىرمايدى. ول بۇعان اسا قۇندى قۇرباندىق ٵرى قايتارۋىم كەرەك قارىز دەپ قارايدى (ناقىل سوزدەر 19:17 وقىڭىز).
رۋحاني العا باسىپ جاتقان ادام وزگەلەرگە كومەكتەسۋدىڭ جولدارىن ويلاپ جۇرەدى (12-ابزاستى قاراڭىز)
12. ەر باۋىرلاستار قاۋىمدى سۇيەتىنىن قالاي كورسەتسە بولادى؟ (سۋرەتتەردى دە قاراڭىز.)
12 ٴسىز ەر باۋىرلاس بولساڭىز، قالاي وزگەلەرگە سۇيىسپەنشىلىك تانىتىپ، قول ۇشىن بەرە الاسىز؟ بۇنى دجوردان ەسىمدى جاس ەر باۋىرلاستىڭ وقيعاسىنان كورەمىز. ول ٴبىر اقساقالعا جولىعىپ، قاۋىمعا قالاي كوبىرەك پايدامدى تيگىزسەم بولادى دەپ سۇرايدى. اقساقال ونىڭ كۇش سالىپ جۇرگەن تۇستارىن ماقتاپ، تاعى نە ىستەۋگە بولاتىنىن ايتادى. مىسال ٷشىن، پاتشالىق سارايىنا ەرتەرەك كەلىپ، باۋىرلاستارمەن سالەمدەسۋگە، كەزدەسۋدە اتسالىسىپ وتىرۋعا، ۋاعىزداۋ توبىمەن جۇيەلى تۇردە قىزمەتكە شىعۋعا جانە باۋىرلاستارعا ٸس جۇزىندە كومەك كورسەتۋگە وي سالادى. دجوردان وسى ايتىلعان ىستەردى اتقارا ٴجۇرىپ، باۋىرلاستارىن ودان سايىن جاقسى كورىپ كەتەدى. ول مىنانى ٴتۇسىنىپتى: ەر باۋىرلاس قىزمەت كومەكشىسى بولىپ تاعايىندالعاننان كەيىن عانا ەمەس، وعان دەيىن دە باۋىرلاستارعا كومەكتەسىپ ٴجۇرۋى كەرەك ەكەن (ٴتىم. 1-ح. 3:8—10، 13).
13. كريستيان باۋىرلاستى قايتادان اقساقال بولۋعا نەگە سۇيىسپەنشىلىك تالپىندىردى دەي الامىز؟
13 بۇرىن ٴسىز قىزمەت كومەكشىسى نە اقساقال بولىپ قىزمەت ەتسەڭىز، مىنانى ۇمىتپاڭىز: ەحوبا ٴسىزدىڭ سول كەزدە اتقارعان ەڭبەگىڭىز بەن سۇيىسپەنشىلىگىڭىزدى ۇمىتپايدى (قور. 1-ح. 15:58). ول ٵلى دە تانىتىپ جۇرگەن سۇيىسپەنشىلىگىڭىزدى بايقايدى. كريستيان ەسىمدى باۋىرلاس اقساقالدىق قىزمەتىنەن الىنعاندا، قاتتى كوڭىلى تۇسكەن ەكەن. «بىراق مەن بىلاي دەپ ۇيعاردىم: مەن ەحوبانى سۇيەمىن عوي، سوندىقتان اقساقال بولسام دا، بولماسام دا وعان بارىمدى سالىپ قىزمەت ەتە بەرەمىن»،— دەيدى كريستيان. ۋاقىت وتە ول قايتادان اقساقال بولىپ تاعايىندالدى. ول بىلاي دەيدى: «سول كەزدە ٴبىراز ۋايىمدادىم. بىراق ەحوبا ماعان راقىمدىلىق تانىتىپ، تاعى ٴبىر مۇمكىندىك بەرىپ تۇرسا، ەحوبانى جانە باۋىرلاستارىمدى سۇيگەندىكتەن، مەن سول قىزمەتتى اتقارامىن دەپ شەشتىم».
14. گرۋزياداعى ايەل باۋىرلاستىڭ سوزدەرىنەن نە تۇيەمىز؟
14 ەحوبانىڭ قىزمەتشىلەرى باسقا ادامداردى دا سۇيەدى (مات. 22:37—39). گرۋزيادا تۇراتىن ەلەنا دەگەن باۋىرلاستىڭ سوزدەرىنە دەن قويايىق: «العاشىندا ادامدارعا ەحوبانى جاقسى كورگەننەن عانا ۋاعىزدايتىنمىن. بىراق وعان دەگەن سۇيىسپەنشىلىگىم كۇشەيە كەلە، ادامداردى دا جاقسى كورە باستادىم. ٴسۇيتىپ، ولار نەدەن قينالىپ ٴجۇر، ولاردى نە قىزىقتىرادى دەپ ويلاناتىن بولدىم. ادامداردىڭ جاعدايىن ويلاعان سايىن، قاتتىراق كومەكتەسكىم كەلەتىن» (ريم. 10:13—15).
سۇيىسپەنشىلىك كورسەتكەنىمىزدىڭ اكەلەر يگىلىگى
سۇيىسپەنشىلىكپەن ىستەلگەن ٴبىر عانا ارەكەتتىڭ يگىلىگىن كوپ ادام كورۋى مۇمكىن (15، 16-ابزاستاردى قاراڭىز)
15، 16. سۋرەتتە كورسەتىلگەندەي، وزگەلەرگە سۇيىسپەنشىلىك تانىتساق، بۇل قانداي جەمىس اكەلەدى؟
15 باۋىرلاستارعا سۇيىسپەنشىلىك تانىتىپ، كومەكتەسكەنىمىزدىڭ پايداسىن ولار عانا ەمەس، باسقالار دا كورەدى. 19-COVID پاندەمياسى باستالعاندا، پاۋلو دەگەن ەر باۋىرلاس ايەلىمەن بىرگە قاۋىمداعى قارت ايەل باۋىرلاستارعا ەلەكتروندى قۇرىلعىمەن ۋاعىزداۋدى ۇيرەتە باستايدى. سولاردىڭ ىشىندە ٴبىر ايەل باۋىرلاس باسىندا قينالسا دا، اقىرى مەڭگەرىپ الىپ، تۋىسقاندارىن ەسكە الۋ كەشىنە شاقىرادى. ٴسۇيتىپ، ەسكە الۋ كەشىندە بەينەكونفەرەنسياعا ونىڭ 60 تۋىسى قوسىلادى! كەيىننەن ول پاۋلو مەن ونىڭ ايەلىنە بىلاي دەپ حات جازىپ جىبەرىپتى: «بىزدەي قاريالارعا جاردەم بەرگەندەرىڭە كوپ راقمەت! ەحوبانىڭ قامقورلىعىن، سەندەردىڭ ەرەن ەڭبەكتەرىڭدى ەشقاشان ۇمىتپايمىن».
16 وسى سياقتى جاعدايلاردان پاۋلو باۋىرلاس وتە ماڭىزدى ٴبىر وي ٴتۇيدى. «ادامنىڭ بىلىمىنەن، قابىلەتىنەن گورى سۇيىسپەنشىلىگى الدەقايدا قۇندى ەكەن. مەن ٴبىر كەزدەرى اۋداندىق باقىلاۋشى بولىپ قىزمەت ەتكەنمىن. بايقاعانىم، باۋىرلاستاردىڭ ەسىندە قالعانى سول كەزدە ايتقان باياندامالارىم ەمەس، ٸس جۇزىندە كورسەتكەن كومەگىم ەكەن»،— دەيدى ول.
17. باسقالارعا سۇيىسپەنشىلىك تانىتساق، بۇنىڭ پايداسىن تاعى كىمدەر كورەدى؟
17 باسقالارعا سۇيىسپەنشىلىك تانىتساق، بۇنىڭ ٶزىمىز ويلاماعان پايداسىن كورۋىمىز مۇمكىن. جاڭا زەلانديادا تۇراتىن دجوناتان ەسىمدى باۋىرلاس وسىعان كوز جەتكىزدى. ول ٴبىر سەنبى كۇنى شاڭقاي تۇستە ٴبىر ٸزاشار باۋىرلاستىڭ كوشە بويىندا جالعىز ۋاعىزداپ جۇرگەنىن بايقايدى. ٴسۇيتىپ، سەنبى كۇندەرى تۇسكى ۋاقىتتا وعان قىزمەتتە سەرىك بولۋدى ۇسىنادى. وسى مەيىرىمدىلىگى ونىڭ وزىنە پايدالى بولىپ شىعاتىنىن دجوناتان سول كەزدە بىلمەدى. ول بىلاي دەيدى: «شىنىمدى ايتسام، ۋاعىزداعاندى اسا جاقسى كورمەيتىنمىن. بىراق الگى ٸزاشاردىڭ قالاي ٴتالىم بەرەتىنىن، قىزمەتىنىڭ قانداي جەمىستى ەكەنىن كورىپ، مەن دە ۋاعىز ٸسىن ٴسۇيىپ كەتتىم. سونداي-اق ول ماعان رۋحاني وسۋگە، قىزمەتتىڭ قىزىعىن كورۋگە جانە ەحوباعا جاقىنداي تۇسۋگە كومەكتەسەتىن مىقتى دوس بولىپ كەتتى».
18. ەحوبا ٴبىزدىڭ نە ىستەگەنىمىزدى قالايدى؟
18 ەحوبا ٴارقايسىسىمىزدىڭ وعان جانە ادامدارعا دەگەن سۇيىسپەنشىلىگىمىزدى كۇشەيتە بەرگەنىمىزدى قالايدى. وسى ماقالادان بىلگەنىمىزدەي، ەحوبانى قاتتىراق ٴسۇيۋ ٷشىن، ونىڭ ٴسوزىن وقىپ، وي جۇگىرتۋىمىز كەرەك جانە دۇعادا ونىمەن جۇيەلى تۇردە سويلەسۋىمىز قاجەت. ال باۋىرلاستاردى قاتتىراق سۇيگىمىز كەلسە، ٸس جۇزىندە كومەك كورسەتكەنىمىز ٴجون. وسىلاي سۇيىسپەنشىلىگىمىز كۇشەيگەن سايىن، ەحوباعا دا، رۋحاني وتباسىمىزعا دا جاقىن بولا تۇسەمىز. ال مۇنداي دوستىق ماڭگىگە جالعاسپاق!
109-ٵن «ٴبىر-ٴبىرىڭدى بارىنشا جاقسى كورىڭدەر»
a شىندىققا كەشە كەلسەك تە، جىلدار بويى ەحوباعا قىزمەت ەتىپ كەلە جاتساق تا — ٴبارىمىزدىڭ ودان سايىن جاقسارتاتىن تۇستارىمىز بار. بۇل ماقالادان بىلەتىنىمىزدەي، رۋحاني العا باسۋدىڭ بىردەن-ٴبىر جولى — ەحوباعا جانە باسقالارعا دەگەن سۇيىسپەنشىلىگىمىزدى كۇشەيتۋ. ماقالانى قاراستىرۋ بارىسىندا ٶزىڭىزدىڭ قاي جاعىنان جاقسارعانىڭىزدى، ال قاي جاعىنان ٵلى جاقسارۋىڭىز كەرەكتىگىن ويلانۋعا شاقىرامىز.
b كەيبىر ەسىمدەر وزگەرتىلگەن.
