32-زەرتتەۋ ماقالاسى
ەحوباعا ۇقساپ يلىككىش بولىڭىز
«يلىككىش ەكەندەرىڭدى جۇرتتىڭ ٴبارى كورەتىن بولسىن» (ٴفىلىپ. 4:5، ٴسىلت).
89-ٵن قۇدايعا قۇلاق اسىپ، باتاعا كەنەل
اڭداتپا a
ٴسىز قاي اعاش سياقتى بولعىڭىز كەلەدى؟ (1-ابزاستى قاراڭىز)
1. ماسىحشىلەر قاي ماعىنادا اعاش سياقتى بولۋ كەرەك؟ (سۋرەتتى دە قاراڭىز.)
«يىلگەن اعاش جەلگە سىنباس» دەگەن ٴسوز بار. مايىسقانىنىڭ ارقاسىندا كوپ اعاش داۋىلدا سىنىپ كەتپەي، قايتا، ٵرى قاراي جايقالىپ وسە بەرەدى. رۋحاني جايقالا بەرۋ ٷشىن ماسىحشىلەر دە يلىككىش بولۋ كەرەك. مىسالى، ومىرىمىزدەگى جاعدايلار كۇرت وزگەرگەندە بەيىمدەلىپ كەتۋگە جانە باسقالاردىڭ كوزقاراسى مەن شەشىمىن قۇرمەتتەۋگە دايىن بولعانىمىز ٴجون.
2. ومىردەگى وزگەرىستەرگە بەيىمدەلۋگە قانداي قاسيەتتەر كومەكتەسەدى جانە بۇل ماقالادا نە قاراستىرامىز؟
2 ەحوباعا عيبادات ەتكەندىكتەن، ٴبىز دە ول سياقتى يلىككىش بولعىمىز كەلەدى. سونداي-اق كىشىپەيىل ٵرى جاناشىر بولۋدى قالايمىز. وسى قاسيەتتەر كوپ ماسىحشىگە ٶمىردىڭ سان الۋان جاعدايىنا بەيىمدەلۋگە كومەكتەسكەن. وسى ماقالادا سولاردىڭ ۇلگىسىن قاراستىرا وتىرىپ، وزىمىزگە ساباق الامىز. بىراق الدىمەن يلىككىشتىك قاسيەتىنىڭ ەڭ ۇزدىك ۇلگىلەرى — ەحوبا مەن يسادان نە ۇيرەنەتىنىمىزدى كورەيىك.
ەحوبا دا، يسا دا يلىككىش
3. ەحوبانىڭ يلىككىش ەكەنىن قايدان بىلەمىز؟
3 كيەلى كىتاپتا ەحوبا «جارتاس» دەپ اتالادى، ويتكەنى وعان بەرىكتىك پەن مىزعىماستىق ٴتان (مۇس. 5-ج. 32:4). دەسە دە ول — يلىككىش قۇداي. مىسالى، دۇنيەدەگى جاعداي سان قۇبىلىپ جاتسا دا، ەحوبا سوعان بەيىمدەلىپ، ٶز نيەتىن ىسكە اسىرادى. ول ٴبىزدى وزىنە ۇقساس ەتىپ جاراتقاندىقتان، ٴبىز دە جاڭا جاعدايعا بەيىمدەلىپ كەتە الامىز. سونداي-اق ەحوبا ٶزىنىڭ سوزىندە ٴتۇرلى قيىندىقتا اقىلمەن ارەكەت ەتۋگە كومەكتەسەتىن پرينسيپتەر بەرگەن. بايقاعانىمىزداي، ەحوبا «جارتاستاي» بەرىك بولا تۇرا، يلىككىش ەكەنىن ونىڭ ٶزى دە، سوزىندەگى پرينسيپتەر دە كورسەتەدى.
4. ەحوبانىڭ يلىككىش ەكەنىنە دالەل كەلتىرىڭىز (مۇسانىڭ 3-جازباسى 5:7، 11).
4 ەحوبا ادامدارعا قاتال ەمەس، ونىڭ زاڭ-تالاپتارى كەمەلدى ٵرى يلىككىش. كەزىندە ونىڭ يسرايل حالقىنا قالاي بەيىمدەلگەنىن الايىقشى. ەحوبا باي بولسىن، كەدەي بولسىن — ٴبارى بىردەي قۇرباندىق اكەلسىن دەپ تالاپ ەتپەگەن. كەي جاعدايلاردا ادامعا ٶز شاماسىنا قاراي قۇرباندىق ۇسىنۋعا رۇقسات ەتكەن (مۇسانىڭ 3-جازباسى 5:7، 11 وقىڭىز).
5. ەحوبانىڭ كىشىپەيىلدىلىگى مەن جاناشىرلىعىنا مىسال كەلتىرىڭىز.
5 ەحوبانىڭ يلىككىشتىگىنىڭ ارتىندا كىشىپەيىلدىلىك پەن جاناشىرلىق قاسيەتتەرى جاتىر. مىسالى، ابدەن زۇلىمدىققا باتقان سودوم قالاسىن جويامىن دەگەندە ەحوبانىڭ قالاي كىشىپەيىلدىلىك تانىتقانىن الايىقشى. ٵدىل لۇتتى قۇتقارىپ قالۋ ٷشىن، ول وعان پەرىشتەلەرىن جىبەرىپ، تاۋعا قاشۋدى بۇيىرادى. بىراق لۇت ول جاققا بارۋعا قورقىپ، جاقىن جەردەگى سيعور قالاشىعىن پانالايىنشى دەپ جالىنادى. ال ەحوبا سيعوردى دا ۇكىمگە كەسىپ قويعان بولاتىن. سوندا ول لۇتقا «ايتقانىم — ايتقان، قالاي بۇيىردىم، سولاي ىستە» دەگەن جوق. قايتا، ونىڭ ٶتىنىشىن ورىنداپ، سيعوردى امان الىپ قالدى (مۇس. 1-ج. 19:18—22). ال كەيىن عاسىرلار وتە ەحوبا نينەۆيا حالقىنا جاناشىرلىق كورسەتتى. باسىندا ول زۇلىمدىق جايلاعان بۇل قالاعا پايعامبارىن جىبەرىپ، قالانىڭ ٶزى دە، تۇرعىندارى دا قۇرىپ جوق بولاتىنىن جاريا ەتكىزگەن. بىراق كەيىن ولار كۇنالارىنا وكىنگەندە، ەحوبا ولاردى اياپ، قالانى جويامىن دەگەن رايىنان قايتادى (ٴجۇنىس 3:1، 10؛ 4:10، 11).
6. يسا ەحوباعا ەلىكتەپ، قالاي يلىككىش بولعانىن ايتىپ بەرىڭىز.
6 يسا دا ەحوباعا ۇقساپ يلىككىش بولعان. ول، نەگىزىنەن، تەك «يسرايل ٷيىنىڭ جوعالعان قويلارىنا جىبەرىلگەن» ەدى. بىراق وسى تاپسىرمانى اتقارا ٴجۇرىپ، ول يلىككىش بولدى. مىسالى، بىردە وزگە ۇلتتىڭ ايەلى «جىن بۋىپ، قاتتى قينالىپ جاتقان» قىزىن ساۋىقتىرۋدى وتىنگەندە، يسا جانى اشىپ، ونىڭ تىلەگىن ورىندادى (مات. 15:21—28). تاعى ٴبىر جاعدايدى كەلتىرەيىك. قىزمەتى باستالعاندا يسا: «مەنەن تانعان اركىمنەن... مەن دە تانامىن»،— دەگەن بولاتىن (مات. 10:33). ال كەيىن پەتىر ودان ٷش رەت تانىپ كەتكەندە، يسا ودان تەرىس اينالدى ما؟ جوق، ويتكەنى ول پەتىردىڭ شىن وكىنگەنىن جانە سەنىمىن كوردى. قايتا تىرىلگەن سوڭ پەتىرگە كورىنگەندە، ول ونى ٵلى دە جاقسى كورەتىنىن جانە كەشىرگەنىن ٴبىلدىردى (لۇقا 24:33، 34).
7. فىلىپىلىكتەرگە 4:5 كە سايكەس، ٴبىز قانداي ادام بولعىمىز كەلەدى؟
7 ەحوبا مەن يسانىڭ قانداي يلىككىش ەكەنىن كوردىك. ال ٴبىز شە؟ ەحوبا بىزگە دە يلىككىش بولىڭدار دەيدى (فىلىپىلىكتەرگە 4:5 وقىڭىز). ەندەشە، ٶزىمىزدى بىلاي دەپ تەكسەرىپ كورەيىك: «ادامدار مەنى يلىككىش، كونۋگە دايىن، شىدامدى دەپ بىلە مە؟ الدە مەنى قاتال، ٶزىنىڭ ايتقانى بولماسا، باسقاعا كونبەيدى دەپ ساناي ما؟ وزىمشە ٴبىر زاڭدار شىعارىپ، باسقالاردان سونى تالاپ ەتەمىن بە؟ الدە ولاردىڭ دا قالاۋىن ەسكەرىپ، مۇمكىن بولسا، كونەمىن بە؟» ٴبىز نەعۇرلىم يلىككىش بولساق، ەحوبا مەن يساعا سوعۇرلىم ەلىكتەيتىنىمىزدى كورسەتەمىز. ال قازىر يلىككىش بولۋدى تالاپ ەتەتىن ەكى جاعدايدى قاراستىرايىق. ٴبىرىنشىسى — ومىرىمىزدە وزگەرىستەر بولعاندا، ەكىنشىسى — باسقالاردىڭ كوزقاراسى مەن شەشىمدەرى بىزدىكىنەن وزگەشە بولعاندا.
وزگەرىسكە بەيىمدەلۋ
8. ومىرىمىزدەگى وزگەرىستەرگە بەيىمدەلۋگە نە كومەكتەسەدى؟ (سىلتەمەنى دە قاراڭىز.)
8 ومىرىمىزدە توسىن وزگەرىس بولعاندا، يلىككىش بولىپ، بەيىمدەلە بىلگەنىمىز ماڭىزدى. ويتكەنى بۇنداي وزگەرىستەر ادەتتە جالعىز كەلمەي، توسىن قيىندىقتار تۋدىرىپ جاتادى. ٴبىزدىڭ كۇتپەگەن جەردەن دەنساۋلىعىمىز ناشارلاپ كەتۋى مۇمكىن، يا بولماسا ەلىمىزدە اياق استىنان ەكونوميكا قۇلدىراپ نە ساياسي وزگەرىستەر بولىپ، ٶمىرىمىزدىڭ استان-كەستەنى شىعۋى مۇمكىن (ۋاع. 9:11؛ قور. 1-ح. 7:31). ٴتىپتى ەحوبانىڭ ۇيىمىنداعى قىزمەتىمىز وزگەرگەن جاعدايدا دا ٴبىراز ەسەڭگىرەپ قالارمىز. دەسە دە كەز كەلگەن وزگەرىسكە بەيىمدەلىپ كەتە الامىز. ول ٷشىن مىنا ٴتورت قادامدى جاساۋ قاجەت: 1) كونۋ، 2) العا نازار تىگۋ، 3) جاقسى جاقتارىن كورە ٴبىلۋ، 4) باسقالارعا كومەكتەسۋ b. ال ەندى كەيبىر باۋىرلاستار وسى كەڭەستەردىڭ قانداي پايداسىن كورگەنىن قاراستىرايىق.
9. ەرلى-زايىپتى باۋىرلاستارىمىز كۇتپەگەن قيىندىقتارعا قالاي توتەپ بەردى؟
9 جاڭا جاعدايعا كونۋ. شەتەلگە ميسسيونەر بولىپ تاعايىندالعان ەممانۋەل مەن فرانچەسكا باۋىرلاستاردى الايىقشى. ولار ەندى ٴتىلدى مەڭگەرىپ، جاڭا قاۋىمعا ۇيرەنىسە باستاعاندا، 19-COVID پاندەمياسى باستالىپ، ۇيدەن شىعا الماي قالادى. سوسىن، كۇتپەگەن جەردەن فرانچەسكانىڭ اناسى قايتىس بولادى. پاندەميانىڭ كەسىرىنەن اياق-قولى تۇساۋلانىپ، جاقىندارىنىڭ قاسىندا بولا الماعانى فرانچەسكانىڭ جانىنا قاتتى باتادى. ٷستى-ۇستىنە بولعان وسىنداي قيىنشىلىقتارعا ولار قالاي توتەپ بەردى؟ ولار ەحوباعا دۇعا ەتىپ، ٴبىر كۇننىڭ ۋايىمىن عانا ويلاۋعا دانالىق بەرشى دەپ سۇرايدى. سوندا ەحوبا ولاردى رۋحاني ويلارمەن دەر كەزىندە جىگەرلەندىرىپ وتىرادى. مىسالى، ولارعا دميتريي ميحايلوۆ باۋىرلاستىڭ سۇحباتىنداعى مىنا سوزدەر قاتتى اسەر ەتىپتى: «جاڭا جاعدايعا نەعۇرلىم تەزىرەك بەيىمدەلسەك، سوعۇرلىم تەزىرەك قايتادان قۋانىشقا كەنەلىپ، سول ۋاقىتتى دۇرىس قولداناتىن بولامىز» c. ەكىنشىدەن، ولار تەلەفونمەن ۋاعىزداۋدى بارىنشا جاقسارتىپ، ٴتىپتى ٴبىر زەرتتەۋ ساباعىن باستايدى. ۇشىنشىدەن، جەرگىلىكتى باۋىرلاستاردىڭ سۇيىسپەنشىلىگى مەن قولداۋىن ريزاشىلىقپەن قابىلداي بىلەدى. ماسەلەن، ٴبىر ايەل باۋىرلاس ولارعا ٴبىر جىل بويى كۇنىگە كيەلى كىتاپتان قىسقاشا ويلار جىبەرىپ تۇرعان ەكەن. تۋرا وسىلاي ٴبىز دە جاعدايدىڭ وزگەرگەنىنە كونىپ، بەيىمدەلە بىلسەك، قولدان كەلگەنىن ىستەپ، سودان قۋانىش الامىز.
10. ايەل باۋىرلاس كۇتپەگەن وزگەرىسكە قالاي بەيىمدەلدى؟
10 العا كوز تىگىپ، جاقسى جاقتارىن كورە ٴبىلۋ. كريستينا دەگەن رۋمىندىق ايەل باۋىرلاسىمىز جاپونيادا اعىلشىن تىلىندەگى قاۋىمدا قىزمەت ەتىپ جۇرگەن. بۇل قاۋىم كۇتپەگەن جەردەن جابىلىپ قالىپ، ونىڭ كوڭىلى تۇسەدى. بىراق كريستينا وتكەندى ويلاي بەرمەي، الدىنا جاڭا ماقسات قويادى. ٴسۇيتىپ، جاپون تىلىندەگى قاۋىمعا قولداۋ كورسەتىپ، سول تاناپتا قىزمەت ەتۋدى شەشەدى. ٴتىلدى ۇيرەنۋ ٷشىن ول بۇرىنعى ارىپتەسىنەن كومەك سۇرايدى. كريستينا جاپون ٴتىلىن كيەلى كىتاپپەن جانە «ماڭگى باقي ٶمىردىڭ راقاتىن كورىڭىز!» كىتابىمەن ۇيرەنگىسى كەلەتىنىن ايتقاندا، ارىپتەسى كەلىسەدى. وسىلاي كريستينا ٴبىر وقپەن ەكى قويان اتىپ، ٴتىلدى دە ۇيرەنەدى، ارىپتەسى دە شىندىققا قىزىعۋشىلىق بىلدىرە باستايدى. دەمەك، العا كوز تىگىپ، جاقسى جاقتارىن كورە بىلسەك، كۇتپەگەن وزگەرىستەر كۇتپەگەن باتالارعا ۇلاسۋى مۇمكىن.
11. ٴبىر ەرلى-زايىپتى ەكونوميكالىق قيىندىققا قالاي توتەپ بەردى؟
11 باسقالارعا كومەكتەسىڭىز. ىسىمىزگە تيىم سالىنعان ەلدە تۇراتىن ٴبىر ەرلى-زايىپتى ەلدەرىندە ەكونوميكالىق داعدارىس بولعاندىقتان، تۇراقتى تابىس كوزىنەن ايىرىلىپ قالادى. بۇل وزگەرىسكە ولار قالاي بەيىمدەلدى؟ بىرىنشىدەن، قاراپايىم ٶمىر ٴسۇرىپ، شىعىندارىن ازايتتى. ەكىنشىدەن، وزدەرىنىڭ قيىندىعىن ويلاي بەرمەي، ادامدارعا كومەكتەسۋ ٷشىن ٵرى قاراي دا بەلسەندىلىكپەن ۋاعىزداي بەردى (ەل. ٸس. 20:35). «قىزمەتكە كوپ ۋاقىت جۇمساعاندىقتان، ٴبىز كوبىنە ەحوبانىڭ ەركىن ويلاپ، ۋايىمعا بەرىلە قويمادىق»،— دەيدى كۇيەۋى. ەندەشە، ومىرىمىزدە وزگەرىستەر بولعاندا، باسقالارعا كومەكتەسۋدى، اسىرەسە ۋاعىز ىسىندە بەلسەندى بولۋدى ۇمىتپايىق.
12. قىزمەتتە ٴتۇرلى ادامعا بەيىمدەلۋ جاعىنان پاۋىلدان نە ۇيرەنەمىز؟
12 قىزمەتتە يلىككىش بولا بىلگەنىمىز وتە ماڭىزدى. سەبەبى ٴبىز سەنىمى، كوزقاراسى مەن شىققان ورتاسى ٵرتۇرلى ادامداردى كەزدەستىرەمىز. بۇل جاعىنان ەلشى پاۋىل كەرەمەت ۇلگى قالدىرعان. يسا ونى «باسقا ۇلتتارعا ەلشى» ەتىپ جىبەرگەن بولاتىن (ريم. 11:13). سوندىقتان ول ياھۋديلەر مەن گرەكتەرگە، زيالىلار مەن قاراپايىم شارۋانىڭ ادامدارىنا، سونداي-اق شەندىلەر مەن پاتشالارعا دا ۋاعىزداعان. وسىنداي ٵرتۇرلى ادامداردىڭ جۇرەگىنە جول تابۋ ٷشىن ول «قولدان كەلگەننىڭ ٴبارىن ىستەدى» (قور. 1-ح. 9:19—23). پاۋىل ٵر ادامنىڭ وسكەن ورتاسىن، سەنىمىن بايقاي ٴبىلىپ، ٴسوزىن سوعان ساي بەيىمدەگەن. ٴبىز دە بەيىمدەلگىش بولىپ، ٵر ادامعا كومەكتەسۋدىڭ جولىن تابا بىلسەك، قىزمەتىمىز جەمىستى بولادى.
وزگەلەردىڭ كوزقاراسىن سيلاڭىز
يلىككىش بولساق، باسقالاردىڭ كوزقاراسىن سيلايمىز (13-ابزاستاردى قاراڭىز)
13. باسقالاردىڭ كوزقاراسىن سيلاساق، قورىنتتىقتارعا 1-حات 8:9 دا ايتىلعانداي، نەدەن اۋلاق بولامىز؟
13 يلىككىش بولۋ باسقالاردىڭ كوزقاراسىن سيلاۋدى دا بىلدىرەدى. مىسالى، كەيبىر ايەل باۋىرلاستار بويانۋدى ۇناتسا، بىرەۋلەرى ۇناتپايدى. كەيبىر باۋىرلاستار ازداپ ىشىمدىك ىشسە، باسقالارى اۋزىنا دا المايدى. دەنساۋلىعىمىزدىڭ جاقسى بولعانىن ٴبارىمىز قالايمىز، بىراق اركىم ٵرتۇرلى ەمدەلەدى. وسىنداي ماسەلەلەردە وزىمىزدىكىن دۇرىس دەپ، سوعان باسقالاردى كوندىرۋگە تىرىسساق، كەيبىرىن ٴسۇرىندىرىپ، ٴتىپتى قاۋىمنىڭ اراسىنا جىك سالۋىمىز مۇمكىن. بۇعان ەشقاشان جول بەرمەيىك! (قورىنتتىقتارعا 1-حات 8:9 وقىڭىز؛ 10:23، 24). بىزگە بايسالدى بولۋعا جانە بىرلىك ساقتاۋعا كيەلى كىتاپ پرينسيپتەرى قالاي كومەكتەسەتىنىن كەلەسى ەكى مىسالدان بىلەمىز.
يلىككىش بولساق، باسقالاردىڭ كوزقاراسىن سيلايمىز (14-ابزاستاردى قاراڭىز)
14. كيىم مەن شاش ۇلگىسىن تاڭداعاندا، قانداي پرينسيپتەردى ۇستانۋىمىز كەرەك؟
14 كيىم مەن شاش ۇلگىسى. ەحوبا بىزگە كيىنۋگە قاتىستى قاتاڭ ەرەجەلەر ورناتپاعان، بىراق پرينسيپتەر بەرگەن. ٴبىز قۇدايدىڭ قىزمەتشىلەرىنە لايىقتى كيىنۋىمىز كەرەك، ياعني پاراساتتى، قاراپايىم ٵرى «ەستى بولۋىمىز» قاجەت (ٴتىم. 1-ح. 2:9، 10؛ پەت. 1-ح. 3:3). سوندىقتان ٴبىزدىڭ كيىمىمىز باسقالاردىڭ كوزىنە ۇرىپ تۇرعانىن قالامايمىز. كيەلى كىتاپ پرينسيپتەرىن ۇستاناتىندىقتان، اقساقالدار دا كيىم مەن شاش ۇلگىسىنە قاتىستى ٶز ەرەجەلەرىن ورناتپايدى. مىسالى، ٴبىر قاۋىمدا جاس ەر باۋىرلاستار وسى الەمدەگى شاش قويۋ ستيلىنە ەلىكتەگەن ەكەن. ولار شاشتارىن الدىرعانمەن، ۇيپا-تۇيپا قىلىپ جاساپ جۇرگەن. سوندا اقساقالدار ەرەجە ورناتپاي-اق، ولارعا قالاي كومەكتەستى؟ ٴبىر اۋداندىق باقىلاۋشىنىڭ بەرگەن كەڭەسىنە ساي، ولار جاستارعا بىلاي دەپ ايتادى: «ساحناعا شىققانىڭدا باۋىرلاستاردىڭ بار نازارى سەنىڭ سوزىڭدە ەمەس، تۇرىڭدە بولسا، وندا يا شاشىڭنىڭ، يا كيىمىڭنىڭ ٴبىر جەرى دۇرىس ەمەس دەگەن ٴسوز». وسىلاي قاراپايىم تۇردە تۇسىندىرگەننىڭ ارقاسىندا ماسەلە بىردە-ٴبىر ەرەجە ورناتپاي-اق شەشىلىپ كەتتى d.
يلىككىش بولساق، باسقالاردىڭ كوزقاراسىن سيلايمىز (15-ابزاستاردى قاراڭىز)
15. ەم ٴتۇرىن تاڭداعاندا، ٴبىز قانداي زاڭدار مەن پرينسيپتەردى ەسكەرەمىز؟ (ريمدىكتەرگە 14:5)
15 دەنساۋلىق ساقتاۋ. دەنساۋلىعىن قالاي كۇتەتىنىن ٵر ٴماسىحشى ٶزى شەشۋ كەرەك (عال. 6:5). ەم ٴتۇرىن تاڭداعاندا، ماسىحشىلەر كيەلى كىتاپتىڭ قاننان جانە سپيريتيزمنەن اۋلاق بولۋ كەرەك دەگەن زاڭىنا باعىنادى (ەل. ٸس. 15:20؛ عال. 5:19، 20). ال قالعان جاعدايدا قانداي ەم تاڭدايتىنى — اركىمنىڭ جەكە ماسەلەسى. دەنساۋلىقتارىن كۇتۋ ٷشىن بىرەۋلەر تەك مەديسينا ماماندارىنا جۇگىنسە، باسقالارى بالاما ەم ٴتۇرىن تاڭدايدى. ٴبىر ەم ٴتۇرىنىڭ زياندى يا پايدالى ەكەنىنە ٶزىمىز سەنىمدى بولىپ تۇرساق تا، وزگەلەردىڭ تاڭداۋ قۇقىعىن سيلاي ٴبىلۋىمىز قاجەت. وسى ورايدا مىنا ٴتورت جاعدايدى ٵردايىم ەستە ۇستايىق: 1) تەك قۇداي پاتشالىعى كەلگەندە عانا ٴبىز قۇلانتازا ٵرى ٴبىرجولا ايىعامىز (يشايا 33:24)؛ 2) ٵربىر ٴماسىحشى ٶزى ٷشىن ەڭ دۇرىس شەشىم قابىلداپ جاتقانىنا «سەنىمدى بولۋى» كەرەك (ريمدىكتەرگە 14:5 وقىڭىز)؛ 3) ٴبىز وزگەلەردى ايىپتامايمىز جانە ولاردى سۇرىندىرەتىن ەشتەڭە جاسامايمىز (ريم. 14:13)؛ 4) ماسىحشىلەر سۇيىسپەنشىلىكپەن ارەكەت ەتەدى جانە قاۋىمنىڭ بىرلىگىن ٶز پىكىرلەرىنەن جوعارى قويادى (ريم. 14:15، 19، 20). وسى جايتتاردى قاپەردە ۇستاساق، باۋىرلاستارمەن تاتۋلىق ساقتايمىز ٵرى قاۋىمنىڭ اۋىزبىرلىگىنە ۇلەس قوسامىز.
يلىككىش بولساق، باسقالاردىڭ كوزقاراسىن سيلايمىز (16-ابزاستاردى قاراڭىز)
16. اقساقال باسقا اقساقالدارعا قالاي يلىكسە بولادى؟ (سۋرەتتەردى دە قاراڭىز.)
16 اقساقالدار يلىككىش بولۋ جاعىنان جاقسى ۇلگى كورسەتۋلەرى قاجەت (ٴتىم. 1-ح. 3:2، 3). مىسالى، ولار «مەنىڭ باسقا اقساقالداردان جاسىم ۇلكەن، سوندىقتان ارقاشان دا مەنىڭ ايتقانىم بولادى» دەپ كۇتپەۋ كەرەك. ويتكەنى كيەلى رۋح اقساقالدار كەڭەسىنىڭ كەز كەلگەن مۇشەسىنە اسەر ەتىپ، دۇرىس شەشىمگە اكەلەتىن وي سالا الادى. كەڭەستەگى اقساقالدار بىزدىكىنەن باسقا شەشىمدى تاڭداپ، كوپشىلىگى سوعان كەلىسىپ تۇرسا ٵرى ول شەشىم كيەلى كىتاپ پرينسيپتەرىنە قايشى بولماسا، وندا يلىگۋگە دايىن بولعانىمىز جاقسى.
يلىككىش بولۋدىڭ پايداسى
17. يلىككىش بولساق، قانداي باتالارعا كەنەلەمىز؟
17 دەمەك، يلىككىش بولا بىلسەك، كوپ باتاعا كەنەلەمىز. باۋىرلاستارمەن جاقسى قارىم-قاتىناستا بولامىز، قاۋىمدا دا ىنتىماق بولادى. ەحوبانىڭ حالقىندا بولمىسى، ادەتتەرى مەن مادەنيەتى ٵرتۇرلى باۋىرلاستاردىڭ بارىنا قۋانامىز. ولارمەن بىرگە ەحوباعا ٴبىر وتباسىنداي عيبادات ەتۋ نەتكەن عانيبەت! ەڭ باستىسى، وسىلاي ٴبىز يلىككىش قۇدايىمىز ەحوباعا ۇقسايمىز.
90-ٵن ٴبىر-ٴبىرىمىزدى جىگەرلەندىرەيىك
a ەحوبا مەن يسا يلىككىش، ولار ٴبىزدى دە يلىككىش بولسا ەكەن دەيدى. بۇل قاسيەت اۋرۋ-سىرقاۋ يا قارجىلاي قيىندىقتار سياقتى ومىردەگى توسىن جاعدايلارعا بەيىمدەلىپ كەتۋگە كومەكتەسەدى. يلىككىش بولۋدىڭ تاعى ٴبىر پايداسى — قاۋىمداعىلارمەن تاتۋلىق ساقتاي الامىز.
b 2016 جىل، 4-ٴنومىر «ويانىڭدار!» جۋرنالىنىڭ «وزگەرىستەرگە دايىنسىڭ با؟» دەگەن ماقالاسىن قاراڭىز.
c ۆيدەونى كورۋ ٷشىن jw.org تور بەكەتىنىڭ ىزدەۋ جولاعىنا «دميتريي ميحايلوۆ باۋىرلاسپەن سۇحبات» دەپ تەرىڭىز.
d كيىم مەن شاش ۇلگىسىنە قاتىستى كوبىرەك ٴبىلۋ ٷشىن، «ماڭگى باقي ٶمىردىڭ راقاتىن كورىڭىز!» كىتابىنىڭ 52-ساباعىن قاراڭىز.
