28-زەرتتەۋ ماقالاسى
123-ٵن قۇداي ورناتقان تارتىپكە باعىنايىق
شىندىقتى انىقتاي الاسىز با؟
«ەندەشە نىق تۇرىپ، بەلدەرىڭە شىندىقتى بەلدىك ەتىپ تاعىڭدار» (ەفەس. 6:14).
نەگىزگى وي
ەحوبادان كەلگەن شىندىق پەن شايتاننان جانە قارسىلاستارىمىزدان كەلگەن وتىرىكتىڭ اراجىگىن اجىراتۋدى ۇيرەنەمىز.
1. ٴبىز شىندىققا قالاي قارايمىز؟
ەحوبانىڭ حالقى قۇداي سوزىندەگى شىندىقتى جاقسى كورەدى. ٴبىزدىڭ سەنىمىمىز سول شىندىققا نەگىزدەلگەن (ريم. 10:17). ەحوبا ماسىحشىلەردىڭ قاۋىمىن «شىندىقتىڭ تىرەگى ٵرى قورعانىشى» ەتكەنىنە ٴبىزدىڭ كوزىمىز جەتكەن (ٴتىم. 1-ح. 3:15). سونداي-اق ٴبىز ارامىزداعى «باسشىلىقتى قولعا العاندارعا» قۋانا مويىنسۇنامىز. ويتكەنى ولار كيەلى كىتاپتاعى شىندىقتى بىزگە ٴتۇسىندىرىپ بەرەدى جانە قۇداي ەركىنە ساي نۇسقاۋلار بەرەدى (ەۆر. 13:17).
2. جاقىپ 5:19 عا ساي، شىندىقتى بىلگەننەن كەيىن دە قانداي قاۋىپ بار؟
2 الايدا شىندىقتى قابىلداعاننان كەيىن دە جانە قۇداي ۇيىمىنىڭ بىزگە سەنىمدى باسشىلىقتار بەرەتىنىنە كوز جەتكىزگەن سوڭ دا شىندىق جولىنان اداسىپ كەتۋىمىز مۇمكىن (جاقىپ 5:19 وقىڭىز). شايتاننىڭ دا بار كوكسەگەنى — ٴبىزدىڭ كيەلى كىتاپقا دەگەن جانە قۇداي ۇيىمىنان كەلىپ جاتقان باسشىلىقتارعا دەگەن سەنىمدىلىگىمىزدى شايقالتۋ (ەفەس. 4:14).
3. نەلىكتەن شىندىقتى بەرىك ۇستانۋىمىز قاجەت؟ (ەفەستىكتەرگە 6:13، 14)
3 ەفەستىكتەرگە 6:13، 14 وقىڭىز. جۋىردا ٸبىلىس جەر بەتىندەگى حالىقتاردىڭ ٴبارىن اداستىرىپ، ەحوباعا قارسى قويۋ ٷشىن وتىرىك تاراتاتىن بولادى (ايان 16:13، 14). سونداي-اق ٴبىز ونىڭ ەحوبانىڭ حالقىن اداستىرۋ ٷشىن بارىنشا كۇش سالا بەرەتىنىن دە بىلەمىز (ايان 12:9). سوندىقتان ٴبىزدىڭ شىندىق پەن وتىرىكتىڭ اراجىگىن اجىراتىپ، شىندىققا مويىنسۇنۋدى ۇيرەنگەنىمىز اسا ماڭىزدى (ريم. 6:17؛ پەت. 1-ح. 1:22). ويتكەنى زور الاپاتتان امان ٶتۋىمىز وسىعان بايلانىستى.
4. بۇل ماقالادا نە تالقىلايمىز؟
4 بۇل ماقالادا ٴبىز كيەلى كىتاپقا نەگىزدەلگەن شىندىقتى انىقتاۋعا جانە قۇداي ۇيىمىنان كەلگەن باسشىلىقتاردى قابىلداۋعا كومەكتەسەتىن ەكى قاسيەتتى قاراستىرامىز. كەيىن شىندىقتى بەرىك ۇستانۋعا كومەك بولار ٷش كەڭەستى تالقىلايمىز.
شىندىقتى انىقتاۋعا كومەكتەسەتىن قاسيەتتەر
5. ەحوباعا دەگەن قورقىنىش شىندىقتى انىقتاۋعا قالاي كومەكتەسەدى؟
5 ەحوبادان قورقۋ. بويىمىزدا ەحوباعا دەگەن دۇرىس قورقىنىش جەتىلدىرەتىن بولساق، ەحوبانى قاتتى جاقسى كورگەندىكتەن، وعان ۇنامايتىن ەشتەڭە ىستەمەيمىز. ەحوبانىڭ ىقىلاسىنا يە بولۋ ٷشىن دۇرىس پەن بۇرىستىڭ، شىندىق پەن وتىرىكتىڭ اراجىگىن اجىراتۋعا بارىنشا كۇش سالامىز (ناق. س. 2:3—6؛ ەۆر. 5:14). ادام الدىنداعى قورقىنىشتىڭ ەحوباعا دەگەن سۇيىسپەنشىلىگىمىزدەن ۇستەم بولىپ كەتۋىنە ەشقاشان جول بەرمەيىك، ايتپەسە ادامعا ۇنايمىز دەپ ەحوبانى رەنجىتىپ الۋىمىز مۇمكىن.
6. قالايشا رۋباسىلارى ادامنان قورىققاندىقتان شىندىقتى بۇرمالاپ جىبەردى؟
6 ەگەر ٴبىز قۇدايدان ەمەس، ادامنان قورقاتىن بولساق، شىندىقتان وپ-وڭاي كەتىپ قالۋىمىز مۇمكىن. قازىر ەحوبا يسرايلدىكتەرگە ۋادە ەتكەن جەردى بارلاپ كەلۋگە بارعان 12 رۋباسىمەن بولعان وقيعانى قاراستىرىپ كورەيىك. 10 بارلاۋشىنىڭ ەحوباعا دەگەن سۇيىسپەنشىلىكتەرىنە قاراعاندا، قاناحاندىقتاردىڭ الدىنداعى قورقىنىشى باسىم بولىپ كەتتى. ولار يسرايلدىكتەرگە: «ٴبىز ونداعى حالىققا قارسى شىعا المايمىز، ولار بىزدەن الدەقايدا كۇشتى!»— دەدى (مۇس. 4-ج. 13:27—31). ٴيا، ادام كوزىمەن قاراعاندا، قاناحاندىقتار راسىمەن دە يسرايلدىكتەردەن كۇشتىرەك بولاتىن. ٴبىراق جاۋلارىمىزدى جەڭە المايمىز دەپ ويلاعان يسرايلدىكتەر ەحوبانى ۇمىت قالدىردى. 10 بارلاۋشى ەحوبانىڭ يسرايلدىكتەرگە قاتىستى نيەتىن ەستە ۇستاۋلارى كەرەك ەدى. وسىنىڭ الدىندا عانا ەحوبانىڭ ولار ٷشىن نە ىستەگەنى جايلى وي جۇگىرتۋلەرى كەرەك ەدى. سوندا ولار ەحوبانىڭ قۇدىرەتتى كۇشىنىڭ الدىندا قاناحاندىقتاردىڭ كۇشى سالىستىرۋعا دا كەلمەيتىنىن تۇسىنەر ەدى. ٴبىراق 12 بارلاۋشىنىڭ ٴبارى سەنىمنەن جۇرداي بولمادى. ولاردىڭ اراسىنداعى ەشۋا مەن حالەپ ەحوبانىڭ ىقىلاسىنا يە بولعىسى كەلدى. ولار ەكەۋى حالىققا: «ەحوبانىڭ كوڭىلىنەن شىقساق، ول ٴبىزدى... سول جەرگە مىندەتتى تۇردە اپارىپ، ونى يەلىگىمىزگە بەرەدى»،— دەدى (مۇس. 4-ج. 14:6—9).
7. ەحوباعا دەگەن قورقىنىشىمىزدى جەتىلدىرۋ ٷشىن نە ىستەسەك بولادى؟ (سۋرەتتى دە قاراڭىز.)
7 بويىمىزدا ەحوباعا دەگەن ورىندى قورقىنىشتى جەتىلدىرۋ ٷشىن، شەشىم قابىلداعان سايىن ەحوباعا نە ۇنايدى دەپ ويلانۋىمىز كەرەك (ٴزاب. 16:8). كيەلى كىتاپتاعى وقيعالاردى وقىعان كەزدە «مەن سول جاعدايدا بولعاندا، نە ىستەر ەدىم» دەپ ويلانىڭىز. مىسالى، ەلەستەتىپ كورىڭىز، ٴسىز 10 يسرايلدىك رۋباسىن تىڭداپ تۇرعان حالىقتىڭ اراسىنداسىز. ولار قارا اسپاندى ٴتوندىرىپ، قاناحاندىقتار جايلى نەبىر نارسەلەردى ايتىپ جاتىر. ولاردىڭ سوزدەرىنە سەنىپ، قورقىنىشقا بوي الدىراسىز با؟ الدە ەحوباعا دەگەن سۇيىسپەنشىلىگىڭىز بەن وعان ۇنامدى بولام دەگەن شەشىمىڭىز باسىم تۇسە مە؟ وكىنىشكە قاراي، كۇللى حالىق ەشۋا مەن حالەپ ايتقان شىندىققا سەنبەي قويدى. ناتيجەسىندە، ۋادە ەتىلگەن جەردەن قۇرالاقان قالدى (مۇس. 4-ج. 14:10، 22، 23).
ٴسىز كىمگە سەنەسىز؟ (7-ابزاستى قاراڭىز)
8. بويىمىزدا قانداي قاسيەتتى جەتىلدىرۋ ٷشىن كۇش سالۋىمىز قاجەت جانە نەگە؟
8 كىشىپەيىلدىلىك. ەحوبا تەك كىشىپەيىل ادامدارعا عانا شىندىقتى اشادى (مات. 11:25). كەزىندە ٴبىز شىندىقتى ٴبىلۋ ٷشىن كىشىپەيىلدىلىكپەن وزگەلەردىڭ كومەگىن قابىلدادىق (ەل. ٸس. 8:30، 31). دەسە دە كوكىرەك بولىپ كەتۋدەن ساق بولۋىمىز كەرەك. ەگەر كوكىرەك بولىپ كەتسەك، ٶزىمىزدىڭ ويىمىزدى كيەلى كىتاپ پرينسيپتەرىمەن جانە ەحوبانىڭ ۇيىمىنان كەلگەن باسشىلىقتارمەن تەڭ كورە باستاۋىمىز مۇمكىن.
9. كىشىپەيىل بولىپ قالۋ ٷشىن نە ىستەۋىمىز قاجەت؟
9 كىشىپەيىل بولىپ قالۋ ٷشىن ۇلى جاراتۋشىمىز ەحوبانىڭ الدىندا ٶزىمىزدىڭ قانشالىقتى تومەن ەكەنىمىزدى ەستە ۇستاۋىمىز قاجەت (ٴزاب. 8:3، 4). سونداي-اق «ۇيرەنۋگە دايىن، كىشىپەيىل بولايىنشى» دەپ دۇعا ەتسەك بولادى. سوندا ەحوبانىڭ كومەگىمەن ونىڭ ٴسوزى جانە ۇيىمى ارقىلى بەرىپ جاتقان ويلارىن ٶز ويلارىمىزدان جوعارى ساناۋدى ۇيرەنەمىز. كيەلى كىتاپتى وقىعاندا ەحوبانىڭ كىشىپەيىلدىلىكتى جاقسى كورىپ، وركوكىرەكتىكتى، تاكاپپارلىق پەن وزىمشىلدىكتى قانشالىقتى جەك كورەتىنىنە نازار اۋدارىڭىز. قانداي دا ٴبىر كوزگە تۇسەتىن قىزمەتكە تاعايىندالىپ جاتساڭىز، كىشىپەيىل بولىپ قالۋعا ەكى ەسە كۇش سالعانىڭىز ٴجون.
قالاي شىندىقتى بەرىك ۇستانا الامىز؟
10. ەحوبا ٶز حالقىنا نۇسقاۋلاردى كىمدەر ارقىلى بەرىپ كەلەدى؟
10 ەحوبانىڭ ۇيىمىنان كەلىپ جاتقان نۇسقاۋلارعا سەنىم ارتىڭىز. ەجەلگى يسرايلدە ەحوبا مۇسا ارقىلى، كەيىنىرەك ەشۋا ارقىلى ٶز حالقىنا نۇسقاۋلار بەرىپ وتىرعان (ەشۋا 1:16، 17). يسرايلدىكتەر بۇل كىسىلەرگە ەحوبانىڭ وكىلدەرى دەپ قاراعاندا، باتاعا كەنەلگەن. عاسىرلار وتە ماسىحشىلەردىڭ قاۋىمى قۇرىلعان كەزدە ەحوبا ٶز حالقىنا باسشىلىقتى 12 ەلشى ارقىلى بەرىپ وتىردى (ەل. ٸس. 8:14، 15). كەيىنىرەك ولاردىڭ قاتارىنا يەرۋساليمدەگى وزگە اقساقالدار دا قوسىلدى. وسى ادال كىسىلەردىڭ جەتەكشىلىگىنە مويىنسۇنعاننىڭ ارقاسىندا «قاۋىمداعىلاردىڭ سەنىمى نىعايىپ، كۇننەن-كۇنگە سانى ارتا بەردى» (ەل. ٸس. 16:4، 5). بۇگىندە ٴبىز دە ەحوبانىڭ ۇيىمىنان كەلىپ جاتقان باسشىلىقتارعا مويىنسۇناتىن بولساق، باتاعا كەنەلەمىز. ال ەگەر ەحوبا تاعايىنداعان جەتەكشىلەردەن باس تارتساق، ەحوبا نە سەزىنەدى؟ بۇل سۇراقتىڭ جاۋابىن ٴبىلۋ ٷشىن ۋادە ەتىلگەن جەرگە بارا جاتقان يسرايلدىكتەرمەن نە بولعانىن قاراستىرايىق.
11. ەجەلگى يسرايلدە ەحوبا تاعايىنداعان جەتەكشىنى مويىنداماعاندارمەن نە بولدى؟ (سۋرەتتى دە قاراڭىز.)
11 ۋادە ەتىلگەن جەرگە بارا جاتقان جولدا بەدەلدى ەر كىسىلەر مۇساعا قارسى شىعىپ، ونى ەحوبانىڭ ٶزى تاعايىنداعانىنا كۇمان كەلتىرە باستادى. ولار: «[مۇسا عانا ەمەس]، قاۋىمداعىلاردىڭ ٴبارى دە كيەلى، ەحوبا سولاردىڭ اراسىندا»،— دەدى (مۇس. 4-ج. 16:1—3). راسىمەن دە، قۇدايدىڭ كوز الدىندا قاۋىمداعىلاردىڭ ٴبارى كيەلى ەدى. ٴبىراق ەحوبا ٶز حالقىنا باسشى ەتىپ مۇسانى تاڭداعان بولاتىن (مۇس. 4-ج. 16:28). سوندىقتان بۇلىكشىلەر مۇسانى ايىپتاۋىمەن، شىن مانىندە، ەحوبانىڭ ٶزىن ايىپتاپ جاتقان ەدى. تۇپتەپ كەلگەندە، ولار ەحوبانى ەمەس، ٶز قالاۋلارىن عانا ويلادى. ولاردىڭ بار كوكسەگەنى كوبىرەك بيلىك پەن بەدەلگە يە بولۋ ەدى. سوندىقتان قۇداي وسى بۇلىكشى جەتەكشىلەردى جانە ولارعا قوسىلعان مىڭداعان ادامدى جويىپ جىبەردى (مۇس. 4-ج. 16:30—35، 41، 49). بۇگىندە دە ەحوبا ٶز ۇيىمى ارقىلى بەرىپ جاتقان باسشىلىقتاردى قۇرمەتتەمەيتىندەردى جاراتپايدى.
ٴسىز كىمدى قولدايسىز؟ (11-ابزاستى قاراڭىز)
12. نەگە ەحوبانىڭ ۇيىمىنا تولىقتاي سەنىم ارتا الامىز؟
12 ٴبىز ەحوبانىڭ ۇيىمىنا تولىقتاي سەنىم ارتساق بولادى. ۇيىمدا جەتەكشىلىكتى قولعا العان باۋىرلاستار كيەلى كىتاپ شىندىقتارىنا قاتىستى تۇسىنىكتەرىمىز ايقىندالا تۇسكەندە نەمەسە پاتشالىق ٸسىن ۇيىمداستىرۋعا قاتىستى كەيبىر نارسەلەردى باسقاشا اتقارۋ كەرەكتىگىن تۇسىنگەندە، وزگەرىستەر جاساۋعا قورىقپايدى (ناق. س. 4:18). ويتكەنى ولار ٴبىرىنشى كەزەكتە ەحوباعا ۇنامدى بولعىلارى كەلەدى. سونداي-اق ولار شەشىمدەرىن قۇداي سوزىنە نەگىزدەيدى. ال قۇداي ٴسوزى ەحوبانىڭ بارلىق حالقى ۇستانۋى كەرەك دۇرىس ٸلىمنىڭ ۇلگىسى بولىپ تابىلادى.
13. «دۇرىس ٸلىمنىڭ ۇلگىسى» دەگەن نە جانە ٴبىز نە ىستەۋىمىز كەرەك؟
13 «دۇرىس ٸلىمنىڭ ۇلگىسىن بۇدان بىلاي دا بەرىك ۇستانىڭىز» (ٴتىم. 2-ح. 1:13). «دۇرىس ٸلىمنىڭ ۇلگىسىنە» كيەلى كىتاپتاعى ماسىحشىلەردىڭ ىلىمدەرى جاتادى (جوح. 17:17). ٴبىزدىڭ بارلىق نانىم-سەنىمدەرىمىز وسى ىلىمدەرگە نەگىزدەلگەن. ەحوبانىڭ ۇيىمى ٴبىزدى وسى ىلىمدەردى بەرىك ۇستانۋعا ۇيرەتىپ كەلەدى. وسىلاي ەتەر بولساق، ٴبىز ەحوبانىڭ باتاسىنا كەنەلىپ، رۋحاني قاۋىپسىزدىكتە بولامىز.
14. نە سەبەپتى ٴى عاسىرداعى كەيبىر ماسىحشىلەر «دۇرىس ٸلىمنىڭ ۇلگىسىن» بەرىك ۇستانا الماي قالدى؟
14 ەگەر ٴبىز «دۇرىس ٸلىمنىڭ ۇلگىسىنەن» اۋىتقىپ كەتسەك، نە بولۋى مۇمكىن؟ ٴبىر وقيعانى قاراستىرايىق. ٴى عاسىردا كەيبىر ماسىحشىلەردىڭ اراسىندا «ەحوبانىڭ كۇنى كەلىپ قالدى» دەگەن قاۋەسەت تاراعان كورىنەدى. بۇنداي ويلاردىڭ تارالۋىنا پاۋىلدان كەلگەندەي كورىنگەن ٴبىر حات سەبەپ بولعان بولۋى مۇمكىن. سالونيكاداعى كەيبىر ماسىحشىلەر بۇل مالىمەتتى ەش تەكسەرمەي، وعان سەنىپ قالادى، ٴتىپتى ٵرى قاراي تاراتا باستايدى. ەگەر ولار پاۋىلدىڭ وزدەرىمەن بىرگە بولعاندا ۇيرەتكەندەرىن ەستە ۇستاعاندا، بۇل وتىرىككە يلانىپ قالماس ەدى (سال. 2-ح. 2:1—5). پاۋىل باۋىرلاستارىنا ەستىگەندەرىنىڭ بارىنە سەنە بەرمەۋگە كەڭەس بەردى. الداعى ۋاقىتتى دا ەسكەرىپ، پاۋىل سالونيكالىقتارعا ارنالعان ەكىنشى حاتىن مىناداي سوزدەرمەن اياقتادى: «مەن، پاۋىل، بۇل سالەمىمدى ٶز قولىممەن جازىپ وتىرمىن، مىنە، مەنىڭ قولتاڭبام وسىنداي. بارلىق حاتتارىمدى وسىدان تانيسىڭدار» (سال. 2-ح. 3:17).
15. شىنايى بولىپ كورىنگەن وتىرىككە الدانىپ قالماس ٷشىن نە ىستەسەك بولادى؟ مىسال كەلتىرىڭىز. (سۋرەتتى دە قاراڭىز.)
15 پاۋىلدىڭ سالونيكالىقتارعا ايتقاندارىنان نە ۇيرەنسەك بولادى؟ ەگەر ٴبىز كيەلى كىتاپتان بىلگەندەرىمىزگە ساي كەلمەيتىن ٴبىر وي ەستىسەك نەمەسە ەرەكشە تاڭعالدىراتىن ٴبىر حابار ەستىسەك، اقىل-پاراساتىمىزدى قوسۋىمىز قاجەت. كەڭەس وداعى كەزىندە جاۋلارىمىز باۋىرلاستارعا دۇنيەجۇزىلىك باس باسقارمادان كەلگەندەي كورىنەتىن ٴبىر حات جىبەرگەن. حاتتا باۋىرلاستاردى ٴبىر-بىرىنەن ٴبولىنىپ، تاۋەلسىز ۇيىم بولۋعا شاقىرعان. ٴبىر قاراعاندا، بۇل حات شىنىمەن دە باس باسقارمادان كەلگەندەي كورىنەتىن. ٴبىراق ادال باۋىرلاستار بۇعان الدانىپ قالمادى. باۋىرلاستار بۇل حاتتاعى سوزدەردىڭ وسىعان دەيىن العان بىلىمدەرىنە قايشى ەكەنىن ٴتۇسىندى. بۇگىندە دە شىندىقتىڭ جاۋلارى ينتەرنەت پەن الەۋمەتتىك جەلىنى پايدالانىپ، ٴبىزدى جاڭىلىستىرىپ، جىككە بولگىسى كەلەدى. سونداي كەزدەرى «بىردەن اقىل-پاراساتىمىزدان ايىرىلماي»، وقىعان نە ەستىگەندەرىمىز وسىعان دەيىن بىلگەن شىندىقتارعا ساي كەلە مە، جوق پا — سونى تەكسەرۋىمىز كەرەك (سال. 2-ح. 2:2؛ جوح. 1-ح. 4:1).
شىنايى بولىپ كورىنگەن وتىرىككە الدانىپ قالماڭىز (15-ابزاستى قاراڭىز) a
16. ريمدىكتەرگە 16:17، 18 گە ساي، ەگەر بىرەۋ شىندىقتى بۇرمالاسا، نە ىستەۋىمىز كەرەك؟
16 ەحوباعا ادال جاندارمەن بىرلىكتە بولىڭىز. ەحوبا ٶز قىزمەتشىلەرىنىڭ وعان بىرلىكتە قىزمەت ەتكەندەرىن قالايدى. شىندىققا تاس كەنەدەي جابىسىپ، بەرىك ۇستانساق قانا ٴبىز ٶزارا بىرلىكتە قالا الامىز. ال شىندىقتى بۇرمالايتىن ادام قاۋىمدا الاۋىزدىق تۋدىرادى. سوندىقتان قۇداي ٴبىزدى «ولاردان اۋلاق جۇرىڭدەر» دەپ ەسكەرتەدى. ايتپەسە ٶزىمىز دە شىندىقتان اۋىتقىپ كەتۋىمىز مۇمكىن (ريمدىكتەرگە 16:17، 18 وقىڭىز).
17. شىندىقتى انىقتاپ، ونى بەرىك ۇستاناتىن بولساق، قانداي يگىلىگىن كورەمىز؟
17 ەگەر شىندىقتى انىقتاپ، ونى بەرىك ۇستانساق، رۋحاني امان-ساۋ جۇرەمىز (ەفەس. 4:15، 16). سونداي-اق شايتاننىڭ وتىرىكتەرى مەن ۇگىت-ناسيحاتىنا الدانبايمىز. ال زور الاپات كەزىندە ەحوبانىڭ قورعانىشىندا بولامىز. ەندەشە، ٵرى قاراي دا شىندىقتى بەرىك ۇستانا بەرەيىك، «سوندا تىنىشتىقتىڭ قۇدايى بىزگە جار بولادى!» (ٴفىلىپ. 4:8، 9).
122-ٵن بەرىك تە مىعىم بول!
a سۋرەت سيپاتتاماسى: كەڭەس وداعى كەزىندە باۋىرلاستارىمىز باس باسقارمادان كەلگەندەي كورىنەتىن ٴبىر حات الادى. ٴبىراق شىن مانىندە بۇل حات جاۋلارىمىزدان ەدى. بۇگىندە دە جاۋلارىمىز ينتەرنەت ارقىلى ەحوبانىڭ ۇيىمى جايلى جالعان اقپارات تاراتادى.
