48-زەرتتەۋ ماقالاسى
ادالدىعىڭىز سىنالعاندا بايىپپەن ويلانىڭىز
«بايىپپەن ويلانىڭدار» (پەت. 1-ح. 4:7).
123-ٵن قۇداي ورناتقان تارتىپكە باعىنايىق
اڭداتپا a
1. «بايىپپەن ويلانۋعا» نە جاتادى؟ (پەتىردىڭ 1-حاتى 4:7)
كەيبىر قيىندىقتار ەحوباعا دەگەن جانە ونىڭ ۇيىمىنا دەگەن ادالدىعىمىزدى شايقالتۋى مۇمكىن. بۇعان جول بەرمەس ٷشىن نە ىستەۋىمىز كەرەك؟ سەنىمىمىزدى بەرىك ساقتاۋ ٷشىن بايىپپەن ويلانىپ، سەرگەكتىك ساقتاۋىمىز قاجەت (پەتىردىڭ 1-حاتى 4:7 وقىڭىز). ال بايىپپەن ويلانۋ دەپ سابىرلىق ساقتاپ، انىق ويلانۋدى جانە جاعدايعا ەحوبانىڭ كوزىمەن قاراۋدى ايتامىز. سوندا وي-سانامىزدى ساقتاپ، سەزىمنىڭ جەتەگىندە كەتپەيمىز.
2. بۇل ماقالا نە جايىندا؟
2 الدىڭعى ماقالادا ەحوباعا دەگەن ادالدىعىمىزدى سىنعا الاتىن قاۋىمنىڭ سىرتىنان تونەتىن ٷش قيىندىق جايلى قاراستىردىق. ال بۇل ماقالادا قاۋىمنىڭ ىشىندە بولاتىن ٷش قيىندىق جايلى قاراستىرامىز: 1) باۋىرلاس بىزگە جاماندىق جاسادى دەپ ويلاعاندا، 2) جونگە سالىنعاندا، 3) ۇيىمداعى وزگەرىستەرگە بەيىمدەلۋگە قينالعاندا. وسى ٷش جاعدايدا بايىپپەن ويلانىپ، ەحوبا مەن ونىڭ ۇيىمىنا تاس كەنەدەي جابىسىپ الۋعا نە كومەكتەسەدى؟
باۋىرلاس بىزگە جاماندىق جاسادى دەپ ويلاعاندا
3. باۋىرلاس بىزگە جاماندىق جاساعانداي كورىنگەندە نە ىستەي باستاۋىمىز مۇمكىن؟
3 قانداي دا ٴبىر باۋىرلاس، بالكىم، جاۋاپتى ەر باۋىرلاس سىزگە جاماندىق جاساعانداي سەزىنگەن كەزىڭىز بولعان با؟ مۇمكىن ول ٴسىزدى ادەيى رەنجىتپەگەن شىعار (ريم. 3:23؛ جاق. 3:2). ٴبىراق ونىڭ ارەكەتى اۋىر تيگەنى سونشالىق، ويىڭىزدان كەتپەي، ٴتىپتى ٴتۇن ۇيقىڭىزدان ايىرىلعان شىعارسىز. ٴسىز سول باۋىرلاستىڭ ىسىنەن كەيىن، «مەن ٶزى شىنىمەن قۇدايدىڭ ۇيىمىندا ٴجۇرمىن بە؟» دەپ كۇماندانا باستاۋىڭىز مۇمكىن. بۇلاي ويلانعانىڭىز تەك شايتانعا عانا كەرەك (قور. 2-ح. 2:11). بۇنداي ويلار سىزگە ۋ سياقتى اسەر ەتىپ، ەحوبا مەن ونىڭ ۇيىمىنان الىپ كەتۋى مۇمكىن. ەندەشە، باۋىرلاسىمىز ٴبىزدى رەنجىتكەندەي كورىنگەندە، ۋلى ويلاردان اۋلاق بولىپ، بايىپپەن ويلانۋعا نە كومەكتەسەدى؟
4. وزگەلەردەن جاپا شەككەندە ٴجۇسىپ قالاي بايىپپەن ويلاندى جانە ٴبىز ودان قانداي ۇلگى الامىز؟ (مۇسانىڭ 1-جازباسى 50:19—21)
4 اشىنباڭىز. ٴجۇسىپ جاسوسپىرىم كەزىندە اعالارىنان جاپا شەگىپ، ادىلەتسىزدىك كوردى. ولار ونى ولەردەي جەك كوردى، كەيبىرى ٴتىپتى كوزىن قۇرتقىسى كەلدى (مۇس. 1-ج. 37:4، 18—22). اقىر سوڭىندا اعالارى ٴجۇسىپتى قۇلدىققا ساتىپ تىندى. سونىڭ كەسىرىنەن بايعۇس بالا 13 جىلداي ۋاقىت بويى قيىندىق كوردى. ول «ەحوبا مەنى جاقسى كورمەيدى، ەڭ ٴزارۋ كەزىمدە مەنى تاستاپ كەتتى» دەپ ويلاپ، اشىنىپ كەتسە بولار ەدى. ٴبىراق ٴجۇسىپ سابىر ساقتاپ، بايىپپەن ويلاندى. ٴتىپتى اعالارىنان كەك الۋدىڭ ٴساتى تۋىپ تۇرسا دا، ولارعا سۇيىسپەنشىلىك كورسەتىپ، كەشىردى (مۇس. 1-ج. 45:4، 5). انىق ويلانعاننىڭ ارقاسىندا ٴجۇسىپ جاماندىققا جاقسىلىقپەن قايتاردى. ول قيىندىقتارىن عانا ويلاي بەرمەي، جاعدايعا الدەقايدا كەڭىرەك قارادى، ياعني ەحوبانىڭ ماقساتىنا نازار اۋداردى (مۇسانىڭ 1-جازباسى 50:19—21 وقىڭىز). ٴبىز بۇدان قانداي ساباق الامىز؟ ەگەر بىرەۋدەن ادىلەتسىزدىك كورسەڭىز، ەحوباعا اشۋلانىپ، ول مەنى تاستاپ كەتتى دەپ ويلاماڭىز. كەرىسىنشە، ەحوبا ٴسىزدى سول قيىندىقتان قالاي الىپ ٶتىپ جاتقانى تۋرالى ويلانىڭىز. سونداي-اق ٴسىزدى رەنجىتكەن ادامنىڭ كەمەلسىزدىگىن سۇيىسپەنشىلىكپەن جابۋعا تىرىسىڭىز (پەت. 1-ح. 4:8).
5. ميكەياس بايىپپەن ويلاناتىنىن قالاي كورسەتتى؟
5 وڭتۇستىك امەريكادا تۇراتىن ميكەياس b دەگەن اقساقالدىڭ مىسالىن الايىقشى. ول كەزىندە كەيبىر جاۋاپتى ەر باۋىرلاستاردىڭ مەيىرىمسىز ارەكەتىنەن قاتتى جاپا شەككەن ەكەن. ميكەياس بىلاي دەيدى: «مەن ومىرىمدە مۇنشالىقتى سترەسكە تۇسپەپپىن. ابدەن مازام قاشىپ، تۇنىمەن ۇيىقتاماي شىعاتىنمىن. مەندە جىلاۋدان باسقا ەش شارا قالمادى». دەسە دە ميكەياس بايىپپەن ويلانىپ، سەزىمدەرىن بارىنشا تىزگىندەدى. ول ەحوباعا قايتا-قايتا دۇعا ەتىپ، ودان كيەلى رۋحى مەن كۇشىن سۇراۋمەن بولدى. سونداي-اق ادەبيەتتەردەن ىزدەنىس جاساپ، وزىنە كومەك بولار ويلاردى تاپتى. ٴبىز ودان قانداي ۇلگى الامىز؟ ەگەر قانداي دا ٴبىر باۋىرلاس سىزگە جاماندىق جاساعانداي سەزىنسەڭىز، سابىرلىق ساقتاپ، جاعىمسىز سەزىمدەرىڭىزدى جۇگەندەۋگە تىرىسىڭىز. ول ادام نەگە ولاي دەگەنىن، نەگە ولاي ارەكەت ەتكەنىن ٴسىز تولىق بىلمەۋىڭىز مۇمكىن. سوندىقتان ەحوباعا دۇعا ەتىپ، جاعدايعا سول ادامنىڭ كوزىمەن قاراۋعا كومەكتەسشى دەپ سۇراڭىز. سوندا «ول ادەيى ىستەمەگەن شىعار» دەگەن تۇجىرىمعا كەلىپ، ونى كەشىرە الاسىز (ناق. س. 19:11). ەحوبا توبەدە ٴبارىن كورىپ تۇرعانىن ۇمىتپاڭىز، ول سىزگە توتەپ بەرۋگە قاجەتتى كۇش بەرەدى (شەج. 2-ج. 16:9؛ ۋاع. 5:8).
جونگە سالىنعاندا
6. جونگە سالۋدىڭ ارتىندا سۇيىسپەنشىلىك تۇرعانىن كورۋ نەگە ماڭىزدى؟ (ەۆرەيلەرگە 12:5، 6، 11)
6 ەحوبا جونگە سالعاندا، باسىندا بۇل كىم-كىمگە دە اۋىر تيەدى. وسىندايدا سەزىمىمىزدى عانا ويلاپ كەتسەك، بەرىلگەن تۇزەتۋ ادىلەتسىز يا قاتال بولدى دەپ ويلاي باستاۋىمىز مۇمكىن. ناتيجەسىندە ەڭ ماڭىزدى نارسەنى، ياعني ەحوبانىڭ سۇيىسپەنشىلىگىن كورمەي قالامىز (ەۆرەيلەرگە 12:5، 6، 11 وقىڭىز). وسىلاي سەزىمنىڭ جەتەگىندە كەتسەك، شايتان بۇنى پايدالانىپ، وتقا ماي قۇيا باستايدى. ول ٴبىزدى ەحوبانىڭ جونگە سالۋىنان باس تارتسا ەكەن، ال ودان دا سوراقىسى، ەحوبانى دا، قاۋىمدى دا تاستاپ كەتسە ەكەن دەيدى. ەگەر ٴسىزدى دە جونگە سالعان بولسا، بايىپپەن ويلانۋ ٷشىن نە ىستەي الاسىز؟
پەتىر بەرىلگەن كەڭەس پەن تۇزەتۋدى كىشىپەيىلدىلىكپەن قابىلداعاندىقتان، ەحوبانىڭ قولىندا جاقسى قۇرال بولا الدى (7-ابزاستى قاراڭىز)
7. ا) سۋرەتتەن كورەتىنىمىزدەي، پەتىر تۇزەتۋگە قۇلاق اسقان سوڭ، ەحوبا ونى قالاي قولداندى؟ ٵ) ٴبىز پەتىردەن قانداي ۇلگى الامىز؟
7 جونگە سالىنعاندا كونىپ، جاقسارا بەرىڭىز. يسا پەتىردى باسقا ەلشىلەردىڭ كوزىنشە ٴبىر ەمەس، بىرنەشە رەت تۇزەتكەن (مار. 8:33؛ لۇقا 22:31—34). سول كەزدە پەتىر قاتتى ۇيالىپ، ىڭعايسىزدانىپ قالسا كەرەك. ٴبىراق ول تۇزەتۋدى قابىل الىپ، ٶز قاتەلىكتەرىنەن ۇيرەنىپ، يساعا ادالدىق ساقتاپ قالدى. ەحوبا پەتىردىڭ ادالدىعىنا باتاسىن بەرىپ، قاۋىمدا ۇلكەن جاۋاپكەرشىلىكتەردى سەنىپ تاپسىردى (جوح. 21:15—17؛ ەل. ٸس. 10:24—33؛ پەت. 1-ح. 1:1). وسى ورايدا پەتىرگە قالاي ەلىكتەي الامىز؟ «جونگە سالىنىپ، ابدەن ۇياتقا قالدىم» دەپ كوپ ۋايىمداي بەرمەي، تۇزەتۋدى قابىلداساق جانە قاجەتتى وزگەرىستەردى جاساساق، مۇنىڭ پايداسىن ٶزىمىز دە، وزگەلەر دە كورەدى. وسىلاي ەحوباعا جانە باۋىرلاستارىمىزعا بۇرىنعىدان دا جاقسى قىزمەت ەتەتىن بولامىز.
8، 9. بەرناردو جونگە سالىنعاندا العاشىندا نە سەزىندى، ٴبىراق كوزقاراسىن تۇزەتۋگە نە كومەكتەستى؟
8 موزامبيكتە تۇراتىن بەرناردو دەگەن ەر باۋىرلاس اقساقالدىق قىزمەتىنەن ايىرىلىپ قالادى. العاشىندا ٶزىن قالاي سەزىنگەنى جايلى ول بىلاي دەيدى: «مەنى بۇلاي جونگە سالعاندارى ماعان مۇلدەم ۇنامادى، ٴتىپتى ابدەن ىزام كەلدى». بۇعان قوسا ول «ەندى قاۋىمداعى باۋىرلاستار نە ويلايدى» دەپ قاتتى ۋايىمداپ كەتتى. بەرناردو: «جاعدايعا دۇرىس قاراۋعا جانە ەحوبا مەن ونىڭ ۇيىمىنا قايتا سەنىم ارتۋعا ماعان بىرنەشە اي كەتتى»،— دەيدى. وعان كوزقاراسىن وزگەرتۋگە نە كومەكتەستى؟
9 ول بىلاي دەيدى: «اقساقال بولىپ قىزمەت ەتكەنىمدە باۋىرلاستار ەحوبانىڭ تۇزەتۋىن دۇرىس قابىلداۋ ٷشىن، ولارعا ەۆرەيلەرگە 12:7 ٴنى وقىپ بەرەتىنمىن. ٴبىراق كەيىن مەن بۇل تارماقتىڭ ولارعا عانا ەمەس، ەحوبانىڭ بارلىق قىزمەتشىلەرىنە، سونىڭ ىشىندە ماعان دا قاتىستى ەكەنىن ٴتۇسىندىم». ەحوباعا جانە ونىڭ ۇيىمىنا قايتا سەنىم ارتا باستاۋ ٷشىن بەرناردو تاعى باسقا قادامداردى جاسادى. مىسالى، كيەلى كىتاپتى وقىپ، تەرەڭ وي جۇگىرتۋگە كوبىرەك ۋاقىت ارنايتىن بولدى. سونداي-اق باۋىرلاستار مەن جايلى نە ويلادى دەپ ۋايىمداسا دا، ولارمەن قىزمەتكە شىقتى جانە قاۋىم كەزدەسۋلەرىنە دە اتسالىسىپ ٴجۇردى. ۋاقىت وتە بەرناردو قايتادان اقساقال بولىپ تاعايىندالدى. ٴسىزدى دە بەرناردو سياقتى جونگە سالعان بولسا، باسقالاردىڭ الدىندا ۇيات بولدى دەپ كوپ ۋايىمداماي، بەرىلگەن كەڭەسكە قۇلاق اسىڭىز، قاجەتتى وزگەرىستەردى جاساپ، جاقسارىڭىز c (ناق. س. 8:33؛ 22:4). سوندا ەحوبا ٴسىزدى وعان جانە ٶزىنىڭ ۇيىمىنا ادال بولىپ قالعانىڭىز ٷشىن جارىلقايتىنىنا سەنىمدى بولىڭىز.
ۇيىمداعى وزگەرىستەرگە بەيىمدەلۋ قيىن بولعاندا
10. قۇداي حالقىنداعى قانداي وزگەرىس كەيبىر يسرايلدىك ەر كىسىلەردىڭ ادالدىعىن سىنعا العان بولۋى مۇمكىن؟
10 ۇيىمداعى وزگەرىستەر دە ادالدىعىمىزدى سىنعا الۋى، اباي بولماساق، ٴتىپتى ەحوبادان اجىراتىپ اكەتۋى مۇمكىن. مىسالى، كەزىندە مۇسا زاڭى اكەلگەن وزگەرىستەر كەيبىر يسرايلدىكتەرگە قالاي اسەر ەتكەنىن الايىق. وعان دەيىن يسرايلدە ٴدىني قىزمەتكەردىڭ ٴرولىن اۋلەتباسىلار اتقاراتىن. ولار قۇرباندىق ورىندارىن تۇرعىزىپ، اۋلەتتەرىنىڭ اتىنان ەحوباعا قۇرباندىق شالاتىن (مۇس. 1-ج. 8:20، 21؛ 12:7؛ 26:25؛ 35:1، 6، 7؛ ٵيۇپ 1:5). ٴبىراق مۇسا زاڭى كۇشىنە ەنگەندە، اۋلەتباسىلار بۇدان بىلاي بۇل مارتەبەلى قىزمەتتى اتقارا المايتىن بولدى، ويتكەنى ەحوبا ونى تەك حاروننىڭ اۋلەتىنە تاپسىردى. بۇدان بىلاي حاروننىڭ ۇرپاعىنا جاتپايتىن قانداي دا ٴبىر اۋلەتباسى ٴدىني قىزمەتكەردىڭ ٴرولىن اتقارىپ، قۇرباندىق شالسا، ولىمگە كەسىلەتىن بولدى d (مۇس. 3-ج. 17:3—6، 8، 9). مۇسا مەن حاروننىڭ بيلىگىنە قارسى شىققان قوراح، داتان، ٵبيرام جانە 250 باسشى ەسىڭىزدە مە؟ ولاردىڭ بۇلىك شىعارۋىنا تۇرتكى بولعان سەبەپتەردىڭ ٴبىرى وسى وزگەرىس بولۋى مۇمكىن بە؟ (مۇس. 4-ج. 16:1—3). قالاي بولعان كۇندە دە، قوراح پەن ونىڭ قاسىنداعىلار ەحوباعا ادالدىق ساقتامادى. ەگەر ۇيىمداعى وزگەرىستەر ٴسىزدىڭ دە ادالدىعىڭىزعا سوققى بولىپ جاتسا، نە ىستەسەڭىز بولادى؟
قاحات ۇرپاقتارىنىڭ قىزمەتى وزگەرگەندە، ولار ٵن ايتۋعا، قاقپانى كۇزەتۋگە، قويمالاردا جۇمىس ىستەۋگە دايىن بولدى (11-ابزاستى قاراڭىز)
11. قاحاتتىڭ ۇرپاقتارىنان قانداي ۇلگى الامىز؟
11 ۇيىمداعى وزگەرىستەردى بارىنشا قولداڭىز. ٴشول دالادا جۇرگەندەرىندە قاحاتتان تاراعان لەۋىلىكتەردىڭ ەرەكشە تاپسىرمالارى بولاتىن. يسرايلدىكتەردىڭ قوسى كوشكەن سايىن قاحاتتىڭ ۇرپاقتارىنىڭ كەيبىرى بۇكىل حالىقتىڭ الدىندا كەلىسىم ساندىعىن كوتەرىپ جۇرەتىن (مۇس. 4-ج. 3:29، 31؛ 10:33؛ ەشۋا 3:2—4). بۇل وتە مارتەبەلى قىزمەت بولاتىن! ٴبىراق ۋادە ەتىلگەن جەرگە كىرگەن سوڭ، ٴبارى وزگەرىپ كەتتى. ەندى كەلىسىم ساندىعىن كوتەرىپ، كوشىپ ٴجۇرۋدىڭ قاجەتى بولمادى. سۇلەيمەن پاتشانىڭ تۇسىندا قاحات ۇرپاقتارىنىڭ كەيبىرى ٵن ايتۋعا، قاقپانى كۇزەتۋگە، ال كەيبىرى قويمالارعا جاۋاپتى بولۋعا تاعايىندالدى (شەج. 1-ج. 6:31—33؛ 26:1، 24). كيەلى كىتاپتىڭ ەش جەرىنەن ولاردىڭ «ٴبىزدى بەدەلدى قىزمەتىمىزدەن ٴتۇسىرىپ تاستادىڭدار» دەپ نەمەسە «جاقسىراق قىزمەتتى بەرىڭدەر» دەپ كۇڭكىلدەگەنىن وقىمايمىز. وسى ورايدا ولاردان قانداي ۇلگى الامىز؟ ەحوبانىڭ ۇيىمىنداعى وزگەرىستەردى، سونىڭ ىشىندە ٴسىزدىڭ تاعايىندالۋىڭىزعا دا اسەر ەتەتىن كەز كەلگەن وزگەرىستى بار جۇرەگىڭىزبەن قولداڭىز. قانداي تاپسىرما جۇكتەلسە دە، سودان قۋانىش تابىڭىز. ەسىڭىزدە بولسىن، ەحوبا ٷشىن ٴسىزدى باعالى ەتەتىن نارسە تاعايىندالۋىڭىز ەمەس. ول ٷشىن مويىنسۇنۋ كەز كەلگەن تاعايىندالۋدان ارتىق (سام. 1-ج. 15:22).
12. بەتەلدەن تاناپقا تاعايىندالعانى زايناعا قالاي اسەر ەتتى؟
12 تاياۋ شىعىستا تۇراتىن زاينا دەگەن ايەل باۋىرلاستىڭ وقيعاسىن الايىق. ول 23 جىلداي ۋاقىت بويى ٴسۇيىپ اتقارعان بەتەلدىك قىزمەتىن توقتاتىپ، تاناپقا تاعايىندالادى. زاينا بىلاي دەيدى: «بۇل وزگەرىس ماعان وتە اۋىر ٴتيدى. ٶزىمدى كەرەكسىز سەزىنىپ، قاي جەردەن قاتەلەستىم دەگەن وي ماعان مازا بەرمەدى». بۇل ازداي، قاۋىمداعى كەيبىر باۋىرلاستار وعان: «قىزمەتىڭدى دۇرىس اتقارساڭ، ۇيىم سەنى جىبەرمەس ەدى عوي»،— دەپ، جاراسىنا تۇز سەپتى. جانى جارالانعانى سونشا — زاينا تۇنىمەن جىلاپ شىعاتىن. «ٴبىراق مەن ۇيىم مەن ەحوبانىڭ سۇيىسپەنشىلىگىنە ٴبىر ساتكە دە كۇماندانعان ەمەسپىن»،— دەيدى ول. زايناعا بايىپپەن ويلانۋعا نە كومەكتەستى؟
13. زاينا باۋىرلاس جاعىمسىز سەزىمدەرىن قالاي باعىندىردى؟
13 زاينا جاعىمسىز سەزىمدەرىن باعىندىرا الدى. بۇل ٷشىن ول ادەبيەتتەرىمىزدەگى ٶزىنىڭ جاعدايىنا ساي كەلەتىن ماقالالاردى وقىدى. وعان اسىرەسە 2001-جىل، 1-اقپانداعى «كۇزەت مۇناراسىنىڭ» «مۇڭدى جەڭە ٴبىل» (حانزۇشا) دەگەن ماقالاسى كوپ كومەكتەستى. ول جەردە كيەلى كىتاپ جازۋشىسى مارقانىڭ قىزمەتى اۋىسقاندا، زاينانىكىندەي سەزىمدەر كەشكەنى ايتىلعان. «مارقانىڭ وقيعاسى جانىما شيپا بولدى. ول ماعان مۇڭنان ارىلۋعا كومەكتەستى»،— دەيدى زاينا. سونداي-اق زاينا دوستارىمەن قارىم-قاتىناسىن ۇزبەي، ولارعا جاقىن بولىپ قالدى. ول باۋىرلاستارىنان وقشاۋلانبادى، ٶزىن تىم اياپ تا كەتپەدى. بۇعان قوسا، ول ەحوبانىڭ ۇيىمىن كيەلى رۋحى جەتەلەپ وتىرعانىن جانە جاۋاپتى ەر باۋىرلاستار ونىڭ قامىن ويلايتىنىن ٴتۇسىندى. ول: «ەحوبانىڭ ٸسى العا باسۋ ٷشىن، ۇيىم ەڭ جاقسى شەشىمدى قابىلداۋى كەرەك قوي»،— دەيدى.
14. ۆلادو باۋىرلاسقا قانداي وزگەرىسكە بەيىمدەلۋ قيىن بولدى، ٴبىراق وعان نە كومەكتەستى؟
14 ەندى سلوۆەنيادا تۇراتىن 73 جاسار ۆلادو دەگەن اقساقالدىڭ وقيعاسىن الايىق. ونىڭ قاۋىمى باسقا ٴبىر قاۋىممەن بىرىكتىرىلىپ، ول بارىپ جۇرگەن پاتشالىق سارايى جابىلىپ قالادى. ۆلادو باۋىرلاس بىلاي دەيدى: «مەن سونداي ادەمى پاتشالىق سارايىمىزدىڭ نە ٷشىن جابىلىپ قالعانىن ەش تۇسىنبەدىم. ونى ٴبىز جاقىندا عانا جوندەپ شىققان ەدىك. ۇستا بولعاندىقتان، كەيبىر جيھازدارىن ٶز قولىممەن جاساعان ەدىم. ەكى قاۋىمنىڭ بىرىككەنى دە مەن سياقتى ۇلكەن جاستاعى جاريالاۋشىلارعا وڭايعا سوقپادى». وسى وزگەرىستى قولداۋعا ۆلادو باۋىرلاسقا نە كومەكتەستى؟ «ەحوبانىڭ ۇيىمىنداعى وزگەرىستەرگە بەيىمدەلگەنىڭ تەك جاقسىلىق اكەلەدى. بۇلار ٴبىزدى الدا بولاتىن ودان دا ۇلكەن وزگەرىستەرگە دايىندايدى»،— دەيدى ول. ٴسىزدىڭ دە قاۋىمىڭىز باسقا قاۋىمعا قوسىلعاندىقتان نە تاعايىندالۋىڭىز وزگەرگەندىكتەن قينالىپ ٴجۇرسىز بە؟ ەحوبا ٴسىزدىڭ سەزىمدەرىڭىزدى جاقسى تۇسىنەدى، بۇعان ەش كۇمانىڭىز بولماسىن. بولىپ جاتقان وزگەرىستەردى قابىلداپ، ەحوبا مەن ونىڭ ۇيىمىنا ادال بولىپ قالساڭىز، مىندەتتى تۇردە باتاعا كەنەلەسىز (ٴزاب. 18:25).
بارلىق جاعدايدا بايىپپەن ويلانىڭىز
15. قاۋىمنىڭ ىشىندە قيىندىقتار تۋىنداعاندا بايىپپەن ويلانۋ ٷشىن نە ىستەسەڭىز بولادى؟
15 وسى دۇنيەنىڭ سوڭى جاقىنداعان سايىن، قاۋىمنىڭ ىشىندە قيىندىقتار بولىپ تۇراتىنى قالىپتى جايت. ولار ەحوباعا دەگەن ادالدىعىمىزدى سىناۋى مۇمكىن بولعاندىقتان، وي-سانامىزدى ساقتاپ، بايىپپەن ويلانايىق. مىسالى، سىزگە ٴبىر باۋىرلاس ادىلەتسىزدىك جاساعانداي بولسا، اشىنىپ كەتپەڭىز. ال ەگەر ٴسىزدى جونگە سالعان بولسا، ابدەن ۇياتقا قالدىم دەپ ۋايىمداي بەرمەي، كەڭەستى قابىلداپ، قاجەتتى وزگەرىستەر جاساڭىز. سونداي-اق ەحوبانىڭ ۇيىمى سىزگە تىكەلەي اسەر ەتەتىن وزگەرىستەر جاساسا، سونى بار جۇرەگىڭىزبەن قولداپ، باسشىلىققا مويىنسۇنىڭىز.
16. ەحوبا مەن ونىڭ ۇيىمىنا دەگەن سەنىمىڭىزدى قالاي بەرىك ساقتاي الاسىز؟
16 ادالدىعىڭىز سىنعا الىنعاندا، ٴسىز ەحوباعا جانە ونىڭ ۇيىمىنا دەگەن سەنىمىڭىزدى بەرىك ساقتاي الاسىز. ول ٷشىن بايىپپەن ويلانىڭىز، ياعني سابىرلىق ساقتاپ، انىق ويلانىپ، جاعدايعا ەحوبانىڭ كوزىمەن قاراۋعا تىرىسىڭىز. سونداي-اق سىزدىكىندەي جاعدايعا كەزىككەن كيەلى كىتاپتاعى ادامدار جايلى زەرتتەپ، وي جۇگىرتىڭىز. ەحوباعا دۇعا ەتىپ، ودان كومەك سۇراڭىز. قاۋىمنان دا وقشاۋلانىپ كەتپەڭىز. سوندا قانداي جاعداي بولماسىن، شايتان ٴسىزدى ەحوبادان دا، ونىڭ ۇيىمىنان دا ٴبىر ەلىگە دە اجىراتا المايدى (جاق. 4:7).
126-ٵن ساق ٴجۇرىپ، اياعىڭدى نىق باس
a ەحوباعا جانە ونىڭ ۇيىمىنا دەگەن ادالدىعىمىزدى، اسىرەسە، قاۋىمنىڭ ىشىندە بولاتىن قيىندىقتار سىناۋى مۇمكىن. بۇل ماقالادا سول قيىندىقتاردىڭ ۇشەۋىنە توقتالامىز جانە ەحوبا مەن ونىڭ ۇيىمىنا قالاي ادال بولىپ قالا الاتىنىمىزدى قاراستىرامىز.
b كەيبىر ەسىمدەر وزگەرتىلگەن.
c 2009-جىلدىڭ 15-تامىزىنداعى «كۇزەت مۇناراسىنىڭ» 30-بەتىندەگى «جاۋاپتى قىزمەتكە قايتا ورالا الاسىڭ با؟» (حانزۇشا) دەگەن ماقالادا ٴبىراز پايدالى كەڭەستەر بار.
d مۇسا زاڭىنا ساي، ٷي جانۋارىن سويىپ، ەتىن جەگىسى كەلگەن اۋلەتباسىلار مالدى كيەلى ورىنعا اكەلۋگە مىندەتتى ەدى. تەك وتە الىس جەردە تۇراتىن اۋلەتباسىلارعا عانا مالدى تۇرىپ جاتقان جەرلەرىندە سويۋعا رۇقسات بەرىلەتىن (مۇس. 5-ج. 12:21).
