47-زەرتتەۋ ماقالاسى
ەحوبادان ٴسىزدى ەش نارسە اجىراتپاسىن
«مەن، ۋا، ەحوبا، وزىڭە ارقا سۇيەيمىن» (ٴزاب. 31:14).
122-ٵن بەرىك تە مىعىم بول!
اڭداتپا a
1. ەحوبا بىزگە جاقىن بولعىسى كەلەتىنىن قايدان بىلەمىز؟
ەحوبا ٴبىزدى وزىنە جاقىن بولۋعا شاقىرادى (جاق. 4:8). ول ٴبىزدىڭ قۇدايىمىز، اكەمىز جانە دوسىمىز بولعىسى كەلەدى. مىسالى، ٴبىزدىڭ دۇعامىزعا جاۋاپ بەرىپ، قيىن شاقتا قاسىمىزدان تابىلادى. سونداي-اق ۇيىمى ارقىلى بىزگە ٴتالىم-تاربيە بەرەدى ٵرى قورعايدى. وعان جاقىن بولۋىمىز ٷشىن ٴبىز ٶز تاراپىمىزدان نە ىستەۋىمىز كەرەك؟
2. ٴبىز ەحوباعا قالاي جاقىنداي الامىز؟
2 ەحوباعا جاقىنداي ٴتۇسۋ ٷشىن، وعان دۇعا ەتۋىمىز، ٴسوزىن وقىپ، ۇستىنەن وي جۇگىرتۋىمىز كەرەك. سوندا جۇرەگىمىزدى ەحوباعا دەگەن سۇيىسپەنشىلىك پەن ريزاشىلىق كەرنەپ، وعان مويىنسۇنۋعا جانە ماداقتاۋعا تالپىنامىز. ال ول بۇعان ابدەن لايىق ەمەس پە؟! (ايان 4:11). وسىلاي ەحوبانى جاقىننان تانىعان سايىن، ونىڭ وزىنە دە جانە ٴبىزدىڭ قامىمىز ٷشىن بەرگەن ۇيىمىنا دا كوبىرەك سەنىم ارتا باستايمىز.
3. ٸبىلىس قالاي ٴبىزدى ەحوبادان الشاقتاتقىسى كەلەدى، ٴبىراق ەحوبانى دا، ونىڭ ۇيىمىن دا تاستاپ كەتپەۋگە نە كومەكتەسەدى؟ (ٴزابۇر 31:13، 14)
3 الايدا ٸبىلىس تىنىش جاتسىن با! ول ٴبىزدى، اسىرەسە قينالعان كەزىمىزدە، ەحوبادان الشاقتاتىپ جىبەرگىسى كەلەدى. بۇل ٷشىن ول اقىرىنداپ ەحوباعا جانە ونىڭ ۇيىمىنا دەگەن سەنىمىمىزدى جويۋعا تىرىسادى. ٴبىراق ٴبىز ەحوباعا دەگەن سەنىمىمىز بەن سەنىمدىلىگىمىزدى بەرىك ساقتاساق، ٸبىلىستىڭ ايلا-امالدارىنا قارسى تۇرىپ، قۇدايدى دا، ونىڭ ۇيىمىن دا ەشقاشان تاستاپ كەتپەيتىن بولامىز (ٴزابۇر 31:13، 14 وقىڭىز).
4. وسى ماقالادا نە تۋرالى قاراستىرامىز؟
4 وسى ماقالادا قاۋىمنىڭ سىرتىنان تونەتىن ٷش قيىندىق جايلى قاراستىرامىز. ولاردىڭ ٴارقايسىسى ەحوباعا جانە ونىڭ ۇيىمىنا دەگەن سەنىمىمىزدى شايقالتۋى ابدەن مۇمكىن. بۇل قيىندىقتار ٴبىزدى ەحوبادان قالاي الىپ كەتۋى مۇمكىن؟ شايتاننىڭ شابۋىلدارىنا قالاي تويتارىس بەرە الامىز؟
قيىندىققا كەزىككەندە
5. قيىندىقتار ەحوباعا جانە ونىڭ ۇيىمىنا دەگەن سەنىمىمىزدى قالاي سىندىرۋى مۇمكىن؟
5 كەيدە تۋىستارىمىز ٴبىزدى ەحوبا كۋاگەرى بولعانىمىز ٷشىن جەك كورىپ، قارسى شىعىپ جاتادى. ال كەيدە نان تاۋىپ جۇرگەن جۇمىسىمىزدان ايىرىلىپ قالامىز. وسىنداي قيىندىقتار ەحوبانىڭ ۇيىمىنا دەگەن سەنىمىمىزدى شايقالتىپ، ودان الشاقتاتىپ جىبەرۋى مۇمكىن. قالايشا؟ قانداي دا ٴبىر قيىندىق ۇزاقتان بەرى جاۋىر بولىپ كەلە جاتسا، ٶزىمىزدى شاراسىز سەزىنىپ، رۋحىمىز كۇيرەۋى مۇمكىن. شايتان وسى ٴساتتى پايدالانىپ، «ەحوبا مەنى جاقسى كورمەيتىن شىعار» دەگەن ويدى ۇيالاتۋعا تىرىسادى. ول «ەحوبانىڭ جانە ونىڭ ۇيىمىنىڭ كەسىرىنەن وسىنداي قيىنشىلىق كورىپ جاتىرمىن» دەپ ويلاعانىمىزدى قالايدى. كەزىندە مىسىردا جۇرگەن يسرايلدىكتەر وسىلاي ويلادى. العاشىندا ولار مۇسا مەن حاروندى ەحوبا تاعايىنداعانىنا جانە ەكەۋى ولاردى قۇلدىقتان الىپ شىعاتىنىنا سەنىمدى بولدى (مۇس. 2-ج. 4:29—31). ٴبىراق كەيىنىرەك پەرعاۋىن ومىرلەرىن قيىنداتىپ جىبەرگەن كەزدە، ولار مۇسا مەن حاروندى جازعىرىپ شىعا كەلدى. ولار ەكەۋىنە: «پەرعاۋىن مەن ونىڭ قىزمەتشىلەرىنە ٴبىزدى جەككورىنىشتى ەتىپ، كوزىمىزدى قۇرتۋ ٷشىن قولدارىنا سەمسەر بەردىڭدەر»،— دەدى (مۇس. 2-ج. 5:19—21). قانداي وكىنىشتى! يسرايلدىكتەر قۇدايدىڭ ادال قىزمەتشىلەرىنە كىنا تاقتى. ەگەر ٴسىزدى ٴبىر قيىندىق ۇزاقتان بەرى مازالاپ جۇرسە، ەحوبا مەن ونىڭ ۇيىمىنا دەگەن سەنىمىڭىزدى سىندىرماۋعا نە كومەكتەسەدى؟
6. اباقۇق پايعامباردان قيىندىقپەن كۇرەسۋگە قاتىستى نە ۇيرەنەمىز؟ (اباقۇق 3:17—19)
6 دۇعادا سەزىمدەرىڭىزدى اشىق ايتىپ، ەحوبادان كومەك ىزدەڭىز. اباقۇق پايعامبار ومىرىندە كوپ قيىندىق كورگەن. بىردە ول ٴتىپتى «مەنىڭ كۇيىم ەحوبانى قىزىقتىرا ما ٶزى» دەگەن ويعا بەرىلەدى. ٴسۇيتىپ، ويلارى مەن سەزىمدەرىن ەش بۇكپەي: «ۋا، ەحوبا، قاشانعى كومەك سۇرايمىن، ال سەن قۇلاق سالار ەمەسسىڭ؟ نەگە قىسىمشىلىققا شىداپ وتىرسىڭ؟»— دەپ دۇعا ەتەدى (ابق. 1:2، 3). ادال قىزمەتشىسىنىڭ جۇرەكتەن شىققان وسى دۇعاسىنا ەحوبا جاۋاپ بەردى (ابق. 2:2، 3) اباقۇق ەحوبانىڭ ٶز حالقىن قۇتقارعان كەزدەرىن ەسكە ٴتۇسىرىپ، ايىرىلىپ قالعان قۋانىشىن قايتا تاپتى. ەحوبا ونىڭ قامىن ويلاپ كەلگەنىنە جانە كەز كەلگەن قيىندىقتى جەڭۋگە كومەكتەسەتىنىنە ونىڭ كوزى جەتتى (اباقۇق 3:17—19 وقىڭىز). ٴبىز بۇدان قانداي ساباق الامىز؟ قيىندىققا كەزىككەندە ەحوباعا بارلىق سەزىمدەرىڭىز بەن ۋايىمىڭىزدى اشىق ايتىڭىز. سوسىن ودان كومەك ىزدەڭىز. وسىلاي ارەكەت ەتكەن كەزىڭىزدە ەحوبانىڭ سىزگە توتەپ بەرۋگە كۇش بەرەتىنىنە سەنىمدى بولىڭىز. سوندا ونىڭ قولداپ-قۋاتتاعانىن سەزىنگەندە، سەنىمىڭىز قاتايا تۇسەدى.
7. شيرلەيدىڭ تۋىستارى ونى نە نارسەگە سەندىرۋگە تىرىستى، ٴبىراق ەحوباعا دەگەن سەنىمىن جوعالتپاۋعا وعان نە كومەكتەستى؟
7 رۋحاني ادەتىڭىزدەن اينىماڭىز. بۇل كەڭەس پاپۋا – جاڭا گۆينەيادا تۇراتىن شيرلەي دەگەن باۋىرلاسقا قيىندىققا كەزىككەندە قالاي كومەكتەسكەنىن قاراستىرىپ كورەيىك b. ونىڭ وتباسى كەدەي تۇراتىن، ٴتىپتى جەيتىن تاماقتى تابۋدىڭ ٶزى قيىنعا سوعاتىن. شيرلەيدىڭ ٴبىر تۋىسى ونىڭ ەحوباعا دەگەن سەنىمىن كۇيرەتكىسى كەلىپ بىلاي دەيدى: «سەن قۇدايدىڭ رۋحى بىزگە كومەكتەسىپ جاتىر دەيسىڭ، كومەكتەسكەنى قايدا؟ وتباسىڭنىڭ جاعدايى اناۋ، ال ٶزىڭ بولساڭ ۋاعىز-ۋاعىز دەپ ۋاقىتىڭدى تەككە كەتىرىپ ٴجۇرسىڭ». شيرلەي بىلاي دەيدى: «سوندا مەن ەحوبا شىنىمەن قامىمىزدى ويلايتىنىنا كۇماندانىپ قالدىم. ٴبىراق ەحوباعا بىردەن دۇعا ەتىپ، ويىمنىڭ ٴبارىن اشىق ايتتىم. سونداي-اق كيەلى كىتاپ پەن ادەبيەتتەرىمىزدى وقۋدى جالعاستىرا بەردىم. قىزمەتكە شىعۋدى، قاۋىم كەزدەسۋلەرىنە بارۋدى دا ۇزبەدىم». كەيىن شيرلەي ەحوبا ونىڭ قامىن ويلاپ جۇرگەنىنە كوز جەتكىزە باستادى. مىسالى، ونىڭ وتباسىنىڭ اش قالعان كەزى بولماعان ەدى ٵرى ولار باقىتتى ەدى. «ەحوبا مەنىڭ دۇعالارىما جاۋاپ بەرىپ جاتقانىن سەزدىم»،— دەيدى شيرلەي (ٴتىم. 1-ح. 6:6—8). ٴسىز دە رۋحاني ادەتىڭىزدەن جاڭىلمايتىن بولساڭىز، بىردە-ٴبىر قيىندىق تا، كۇمان دا ٴسىزدى ەحوبادان اجىراتا المايدى.
جاۋاپتى ەر باۋىرلاستار ادىلەتسىزدىك كورگەندە
8. ەحوبانىڭ ۇيىمىنداعى جاۋاپتى ەر باۋىرلاستار قانداي جاعدايعا كەزىگۋى مۇمكىن؟
8 جاۋلارىمىز بۇقارالىق اقپارات قۇرالدارى مەن ينتەرنەت ارقىلى ەحوبانىڭ ۇيىمىنداعى جاۋاپتى ەر باۋىرلاستار تۋرالى جالعان نە بۇرمالانعان اقپاراتتار تاراتادى (ٴزاب. 31:13). وسى ەر باۋىرلاستاردىڭ كەيبىرى قاماۋعا الىنىپ، قىلمىسكەر دەگەن اتپەن سوتتالىپ جاتىر. ٴبىرىنشى عاسىردا ەلشى پاۋىل دا جالعان ايىپپەن قاماۋعا الىنعان. سول كەزدە باسقا ماسىحشىلەر نە ىستەدى؟
9. ەلشى پاۋىل تۇرمەگە قامالعاندا كەيبىر ماسىحشىلەر نە ىستەدى؟
9 ەلشى پاۋىل ريمدەگى تۇرمەگە قامالعاندا، ماسىحشىلەردىڭ كەيبىرى ودان تەرىس اينالىپ كەتتى (ٴتىم. 2-ح. 1:8، 15). ولار نەگە بۇلاي ەتتى؟ جۇرت پاۋىلدى قىلمىسكەر دەپ ساناعاندىقتان، وعان كومەكتەسۋگە نامىستاندى ما، الدە «ەندى ٴبىزدى دە قۋدالايتىن بولدى» دەپ قورىقتى ما؟ (ٴتىم. 2-ح. 2:8، 9). بۇنىڭ سەبەبى قانداي بولماسىن، سول كەزدە ەلشى پاۋىل نە سەزىنگەنىن ويلاپ كورىڭىزشى. ول سول باۋىرلاستارى ٷشىن كوپتەگەن قيىندىققا ٴتوزىپ، ٴتىپتى ٶمىرىن قاتەرگە تىككەن ەدى عوي! (ەل. ٸس. 20:18—21؛ قور. 2-ح. 1:8). كومەككە اسا مۇقتاج كەزىندە پاۋىلدان تەرىس اينالىپ كەتكەن سول ماسىحشىلەرگە ەشقاشان ۇقسامايىق. ەندەشە، جاۋاپتى ەر باۋىرلاستار قۋعىن-سۇرگىنگە ۇشىراعاندا نەنى ەستە ۇستاۋىمىز كەرەك؟
10. جاۋاپتى باۋىرلاستار قۋدالانعاندا نەنى ەستە ۇستاۋىمىز كەرەك جانە نەگە؟
10 نە ٷشىن قۋدالانىپ جاتقانىڭىزدى جانە ونىڭ ارتىندا كىم تۇرعانىن ۇمىتپاڭىز. تىموتەگە 2-حات 3:12 دە: «ٴماسىح يسانىڭ شاكىرتى رەتىندە قۇدايعا شىن بەرىلىپ ٶمىر سۇرگىسى كەلەتىندەردىڭ ٴبارى دە قۋعىندالادى»،— دەلىنگەن. سوندىقتان ٴبىز نەگە شايتاننىڭ جاۋاپتى ەر باۋىرلاستاردى نىساناعا الىپ، ولارعا شابۋىلداپ جاتقانىنا تاڭعالمايمىز. ونىڭ ماقساتى — ولاردى مىنسىزدىكتەرىنەن تايدىرۋ، ال ٴبىزدى قورقىتىپ-ۇركىتۋ (پەت. 1-ح. 5:8).
11. ٴبىز ونيسيپوردان قانداي ۇلگى الامىز؟ (تىموتەگە 2-حات 1:16—18)
11 باۋىرلاستارىمىزدى ارقاشان قولداپ، ولاردان اجىراماڭىز (تىموتەگە 2-حات 1:16—18 وقىڭىز). پاۋىلدى تاستاپ كەتكەن ماسىحشىلەرمەن سالىستىرعاندا ونيسيپور مۇلدەم باسقاشا ارەكەت ەتتى. ول پاۋىلدىڭ تۇرمەدە وتىرعانىنان ەش ۇيالمادى، قايتا، ونى ىزدەپ تاۋىپ، ٴتىپتى باسىن قاتەرگە تىگۋگە تۋرا كەلسە دە، پاۋىلعا قولداۋ كورسەتۋدىڭ امالدارىن ىزدەستىردى. وسى جاعدايدان قانداي ساباق الامىز؟ ادامداردان قورقىپ، قۋعىنعا كەزىككەن باۋىرلاستارعا قولداۋ كورسەتۋدەن تارتىنىپ جۇرمەيىك. قايتا، ولاردى قورعاۋعا جانە قولىمىزدان كەلگەنشە جاردەمدەسۋگە دايىن بولايىق (ناق. س. 17:17). ولارعا ٴبىزدىڭ سۇيىسپەنشىلىگىمىز بەن قولداۋىمىز اۋاداي قاجەت.
12. رەسەيدەگى باۋىرلاستار بىزگە قانداي ۇلگى كورسەتەدى؟
12 رەسەيدەگى باۋىرلاستار تۇرمەدە وتىرعان باۋىرلاستارىن قالاي قولداپ جاتقاندارىنا نازار اۋدارايىقشى. باۋىرلاستار سوت وتىرىسىنا اعىلىپ كەلىپ، ايىپتالىپ جاتقان باۋىرلاسپەن بىرگە ەكەندەرىن كورسەتىپ ٴجۇر. بۇل ٴبىز ٷشىن كەرەمەت ۇلگى! جاۋاپتى ەر باۋىرلاستارىمىزعا جالا جابىلىپ، ولاردى تۇتقىنداپ، قۋدالاپ جاتسا، قورقىنىشقا بوي الدىرمايىق. ولار ٷشىن دۇعا ايتايىق، وتباسىنداعى ادامدارىنا كوڭىل بولەيىك جانە باسقا دا جولدارمەن جاردەمدەسۋدىڭ امالىن ىزدەستىرەيىك (ەل. ٸس. 12:5؛ قور. 2-ح. 1:10، 11).
كەلەكە-مازاققا قالعاندا
13. كەلەكە-مازاق ەحوبا مەن ونىڭ ۇيىمىنا دەگەن سەنىمىڭىزدى قالاي كۇيرەتۋى مۇمكىن؟
13 سەنبەيتىن تۋىستارىمىز، ارىپتەستەرىمىز بەن سىنىپتاستارىمىز ٴبىزدىڭ ۋاعىز ٸسىمىزدى جانە ەحوبانىڭ جوعارى مورالدىق نورمالارىن ۇستاناتىنىمىزدى جاقتىرماي، ٴبىزدى كەلەكە-مازاق ەتۋى مۇمكىن (پەت. 1-ح. 4:4). ولار: «سەن جاپ-جاقسى-اق ادامسىڭ، ٴبىراق مىنا ٴدىنىڭ سەنى تىم شەكتەپ تاستاپتى، باياعى زاماندا قالىپ كەتىپسىڭ»،— دەيتىن شىعار. ال وزگەلەرى بولسا قاۋىمنان شىعارۋ شاراسىن ايىپتاپ: «بۇل نە دەگەن تاسجۇرەكتىك، مەيىرىمدەرىڭ قايدا؟!»— دەۋى مۇمكىن. وسىنداي سوزدەردىڭ بارلىعى سانامىزعا تارايتىن ۋ سياقتى. ٴبىز: «ەحوبا مەنەن تىم كوپ تالاپ ەتىپ جاتقان جوق پا؟ ونىڭ ۇيىمى تىم قاتال ەمەس پە؟»— دەپ ويلاي باستاۋىمىز مۇمكىن. وسىنداي جاعدايعا كەزىكسەڭىز، ەحوبا مەن ونىڭ ۇيىمىنان اجىراپ كەتپەۋگە نە كومەكتەسەدى؟
14. ەحوبانىڭ تالاپتارىن ۇستانعانىمىز ٷشىن بىرەۋلەر مازاقتاسا، قالاي ارەكەت ەتكەن دۇرىس؟ (ٴزابۇر 119:50—52)
14 ەحوبانىڭ تالاپتارىن بەرىك ۇستانۋعا بەكىنىڭىز. كەلەكە-مازاققا ۇشىراسا دا، ٵيۇپ ەحوبانىڭ تالاپتارىن بەرىك ۇستانعان (ٵيۇپ 4:17، 18؛ 22:3). ونىڭ ٴبىر دوسسىماعى «قۇدايدىڭ تالاپتارىمەن ٶمىر ٴسۇرىپ، ٴمىنسىز جۇرگەنىڭنەن وعان كەلىپ-كەتەر پايدا جوق» دەگەن وي سالادى. ٴبىراق بۇنداي قىپ-قىزىل وتىرىككە ٵيۇپ ەش يلانبادى. ول ەحوبانىڭ جاقسى مەن جامانعا قاتىستى تالاپتارىنىڭ دۇرىستىعىنا سەنىمدى بولدى جانە ولاردى نىق ۇستانۋعا بەكىنگەن ەدى. ٵيۇپ ٶز مىنسىزدىگىن ەشكىمگە تاپتاتپادى (ٵيۇپ 27:5، 6). ٴبىز ودان قانداي ۇلگى الامىز؟ ادامداردىڭ كەلەكە-مازاعىنا سەنىپ، ەحوبانىڭ تالاپتارىنا كۇماندانىپ جۇرمەڭىز. ٶز ٶمىرىڭىز جايلى ويلانىپ كورىڭىزشى. ەحوبانىڭ ٴتىلىن الىپ، ونىڭ تالاپتارىن ورىنداعاننىڭ ارقاسىندا ومىرىڭىزدە كوپ جاقسىلىق كوردىڭىز، سولاي ەمەس پە؟ ەندەشە، سول تالاپتاردى ۇستاناتىن ۇيىمدا ٵرى قاراي دا قالۋعا نىق بەكىنىڭىز، سوندا ەشقانداي كەلەكە-مازاق ٴسىزدى ٴبىر ەلىگە دە ەحوبادان اجىراتا المايدى (ٴزابۇر 119:50—52 وقىڭىز).
15. بريدجيت قانداي قيىندىققا كەزىكتى؟
15 تۋىسقاندارىنىڭ كەلەكە-مازاعىنا ۇشىراعان بريدجيت دەگەن ۇندىستاندىق ايەل باۋىرلاستىڭ جاعدايىن الايىقشى. ول 1997-جىلى شومىلدىرۋ راسىمىنەن وتكەننەن كەيىن كوپ ۇزاماي ونىڭ كۋاگەر ەمەس كۇيەۋى جۇمىسىنان ايىرىلادى. ٴسۇيتىپ، كۇيەۋى بريدجيت پەن قىزدارىن الىپ، باسقا قالادا تۇراتىن اتا-اناسىنىڭ ۇيىنە كوشىپ بارادى. ٴبىراق بۇل جاعداي بريدجيتتىڭ ٶمىرىن ودان سايىن قيىنداتىپ جىبەرەدى. كۇيەۋى جۇمىسسىز قالعاندىقتان، بريدجيتكە وتباسىن اسىراۋ ٷشىن تاڭ اتقاننان قارا كەشكە دەيىن جۇمىس ىستەۋگە تۋرا كەلەدى. ال ەڭ جاقىن دەگەن قاۋىمعا بارۋ ٷشىن وعان كەم دەگەندە 350 كيلومەتر جول ٴجۇرۋ كەرەك بولادى. ونىڭ ۇستىنە، كۇيەۋىنىڭ وتباسى ٴبريدجيتتىڭ ٴماسىحشى بولعاندىعىن مۇلدەم جاقتىرماي، قاتتى قارسىلىق كورسەتەدى. قارسىلىق كۇشەيىپ كەتكەندىكتەن، ولار قايتادان كوشۋگە ٴماجبۇر بولادى. سوسىن ەشكىم كۇتپەگەن جەردەن كۇيەۋى قايتىس بولادى. ارتىنشا نەبارى 12 جاسار قىزى قاتەرلى ىسىكتەن كوز جۇمادى. جىعىلعانعا جۇدىرىق بولىپ، وسى قاسىرەتتىڭ بارىنە تۋىسقاندارى ٴبريدجيتتى كىنالاي باستايدى. ولار: »وسىنىڭ بارلىعى سەنىڭ ٴدىنىڭنىڭ كەسىرىنەن بولىپ جاتىر»،— دەپ جازعىرادى. ٴبىراق بريدجيت ٵرى قاراي دا ەحوباعا سەنىم ارتىپ، ونىڭ ۇيىمىنان ەش اجىرامايدى.
16. ەحوبادان جانە ونىڭ ۇيىمىنان اجىراماعانى ٷشىن بريدجيت قالاي جارىلقاندى؟
16 بريدجيت قاۋىمنان جىراقتا تۇرعاندىقتان، اۋداندىق باقىلاۋشى وعان ٶزىنىڭ تۇراتىن جەرىندە ۋاعىزداپ، قاۋىم كەزدەسۋلەرىن ٶز ۇيىندە وتكىزۋدى تاپسىرادى. بۇل تاپسىرما جۇك بولىپ كورىنسە دە، بريدجيت وعان مويىنسۇندى. ول ٶز اۋماعىندا ىزگى حاباردى ۋاعىزداپ، ۇيىندە قاۋىم كەزدەسۋلەرىن وتكىزە باستادى. قىزدارىمەن وتباسىلىق عيباداتتى وتكىزۋگە دە ۋاقىت تاپتى. ونىڭ ەڭبەگى قانداي جەمىس اكەلدى؟ بريدجيت كوپ كيەلى كىتاپ زەرتتەۋ ساباعىن باستادى جانە ولاردىڭ كوبىسى شومىلدىرۋ راسىمىنەن ٶتتى. ال 2005-جىلى ول تۇراقتى ٸزاشار بولىپ تاعايىندالدى. ونىڭ ەحوباعا دەگەن سەنىمى جانە ونىڭ ۇيىمىنا دەگەن ادالدىعى مولىنان جارىلقاندى. قازىر ٴبريدجيتتىڭ قىزدارى ەحوباعا ادالدىقپەن قىزمەت ەتىپ ٴجۇر جانە سول اۋماقتا ەندى ەكى قاۋىم بار. بريدجيت ٶمىردىڭ تاۋقىمەتى مەن تۋىسقاندارىنىڭ قارسىلىقتارىنا تەك ەحوبانىڭ ارقاسىندا عانا توتەپ بەرە العانىنا سەنىمدى.
ەحوبا مەن ونىڭ ۇيىمىنا ادال بولىپ قالىڭىز
17. ٴسىز نە نارسەگە بەكىنۋىڭىز كەرەك؟
17 قيىندىققا كەزىككەنىمىزدە شايتان «ەحوبا ٴبىزدى تاستاپ كەتەدى، ونىڭ ۇيىمىندا جۇرگەنىمىز ٶمىرىمىزدى قيىنداتىپ جىبەرەدى» دەپ ويلاعانىمىزدى قالايدى. ال جاۋاپتى ەر باۋىرلاستارىمىز جالا جابىلىپ، قۋعىندالىپ، تۇرمەگە ٴتۇسىپ جاتسا، شايتان ٴبىزدى ۇرەيگە بوي الدىرىپ، قورقىپ قالسا ەكەن دەيدى. بۇعان قوسا، كەلەكە-مازاقتى قولدانىپ، ەحوبانىڭ تالاپتارى مەن ۇيىمىنا دەگەن سەنىمىمىزدى سىندىرعىسى كەلەدى. ٴبىراق ٴبىز ونىڭ ايلا-امالدارىن جاقسى بىلگەندىكتەن، وعان الدانبايمىز (قور. 2-ح. 2:11). قايتا، شايتاننىڭ وتىرىكتەرىنە تويتارىس بەرىپ، ەحوبا مەن ونىڭ ۇيىمىنا ادال بولىپ قالۋعا بەكىنەمىز. ەسىڭىزدە بولسىن، ەحوبا ٴسىزدى ەشقاشان تاستاپ كەتپەيدى (ٴزاب. 28:7). ەندەشە، ەشكىمگە دە، ەش نارسەگە دە ٴسىزدى ەحوبادان اجىراتىپ اكەتۋىنە جول بەرمەڭىز (ريم. 8:35—39).
18. كەلەسى ماقالادا نە تالقىلانادى؟
18 وسى ماقالادا ٴبىز قاۋىمنان ەمەس، سىرتتان بولاتىن قيىندىقتار جايلى تالقىلادىق. ٴبىراق قاۋىمنىڭ ىشىندەگى قيىندىقتار دا ەحوباعا جانە ونىڭ ۇيىمىنا دەگەن سەنىمىمىزدى سىنعا الىپ جاتادى. سوندايدا نە ىستەي الامىز؟ بۇل جايلى كەلەسى ماقالادان كورەمىز.
118-ٵن «سەنىمىمىزدى نىعايتا كور»
a سوڭعى كۇندەردەن ادالدىق ساقتاپ ٶتۋ ٷشىن، ەحوبا مەن ونىڭ ۇيىمىنا دەگەن سەنىمىمىزدى جوعالتپاۋىمىز كەرەك. ٸبىلىس وسى سەنىمىمىزدى كۇيرەتكىسى كەلەدى. ول مۇنى قانداي ٷش جولمەن ىستەيدى جانە ٴبىز وعان قالاي قارسى تۇرا الامىز؟ وسى ماقالادا سول جايىندا بىلەمىز.
b كەيبىر ەسىمدەر وزگەرتىلگەن.