45-زەرتتەۋ ماقالاسى
ەحوبا قىزمەتىمىزدى اتقارۋعا كومەكتەسەدى
«سوندا ولار... ارالارىندا پايعامباردىڭ بولعانىن بىلەتىن بولادى» (ەزەك. 2:5).
67-ٵن «قۇداي ٴسوزىن ۋاعىزدا»
اڭداتپا a
1. ٴبىز قىزمەتتە نەگە كەزىگۋىمىز مۇمكىن، ٴبىراق نە نارسەگە سەنىمدى بولا الامىز؟
بۇگىندە ٴبىز ۋاعىز قىزمەتىندە قارسىلىق ٴبىلدىرىپ جاتاتىن ادامداردى كەزدەستىرەمىز. ال بولاشاقتا بۇنداي قارسىلىقتار كوبەيگەن ۇستىنە كوبەيۋى مۇمكىن (دان. 11:44؛ ٴتىم. 2-ح. 3:12؛ ايان 16:21). ٴبىراق ەحوبا قاجەتتى كومەكتى بەرەتىنىنە سەنىمدى بولا الامىز. نەگە؟ ويتكەنى ەحوبا تاريح بويى قىزمەتشىلەرىنىڭ تاپسىرمالارى قانداي قيىن بولماسىن، ونى سوڭىنا دەيىن اتقارۋعا ارقاشان كومەكتەسىپ وتىرعان. بۇعان دالەل رەتىندە بابىلدا تۇتقىندا جۇرگەن ياھۋديلەرگە ۋاعىزداعان ەزەكيەل پايعامباردىڭ وقيعاسىن قاراستىرىپ كورەيىك.
2. ەحوبا ەزەكيەل ۋاعىزدايتىن ادامدار جايلى نە دەدى جانە وسى ماقالادا نە قاراستىرامىز؟ (ەزەكيەل 2:3—6)
2 ەزەكيەل ۋاعىزداعان ادامدار قانداي بولعان؟ ەحوبا ولاردى «ەش نارسەدەن شىمىرىكپەيتىن»، «قىڭىر»، «بۇلىكشىل ادامدار» دەپ سيپاتتاعان. ولار زاقىم كەلتىرەتىن تىكەن جانە قاۋىپتى شاياندار سياقتى بولعان. سوندىقتان دا ەحوبا ەزەكيەل پايعامبارعا: «ولاردان قورىقپا!»— دەپ قايتا-قايتا ايتقان (ەزەكيەل 2:3—6 وقىڭىز). ەزەكيەلگە ٶز قىزمەتىن اتقارۋعا مىنا ٷش جايت كومەكتەستى: 1) ونى ەحوبانىڭ ٶزى جىبەردى، 2) قۇدايدىڭ رۋحى وعان كۇش بەردى، 3) قۇدايدىڭ ٴسوزى وعان ٴنار بولدى. وسى ٷش جايت ەزەكيەلگە قالاي كومەكتەستى، ال بىزگە قالاي كومەك بولا الادى؟
ەزەكيەلدى ەحوبانىڭ ٶزى جىبەردى
3. ەزەكيەلگە قانداي سوزدەر جىگەر بەردى جانە ەحوبا ونى قولدايتىنىنا قانداي نەگىز بار ەدى؟
3 ەحوبا ەزەكيەلگە: «مەن سەنى... جىبەرىپ وتىرمىن»،— دەگەن (ەزەك. 2:3، 4). بۇل سوزدەر ەزەكيەلدى نىعايتقانىندا ٴسوز جوق. سەبەبى كەزىندە ەحوبا مۇسا مەن يشايانى ٶزىنىڭ پايعامبارلارى ەتىپ تاعايىنداعاندا، وسىعان ۇقساس سوزدەردى ايتقان بولاتىن (مۇس. 2-ج. 3:10؛ يشايا 6:8). سونداي-اق ەزەكيەل ەحوبانىڭ سول ەكى پايعامبارعا قيىندىقتارىن جەڭۋگە قالاي كومەكتەسكەنىن دە بىلەتىن. سوندىقتان ەحوبانىڭ «مەن سەنى جىبەرىپ وتىرمىن» دەپ ٴبىر ەمەس، ەكى رەت ايتقانى ەزەكيەلدى قاناتتاندىرىپ تاستادى. سونداي-اق ەزەكيەل كىتابىندا «ەحوبا ماعان بىلاي دەدى» جانە «ەحوبا تاعى دا ماعان ٴسوزىن ارنادى» دەگەن سوزدەر كوپ رەت كەزدەسەدى (ەزەك. 3:16؛ 6:1). ٴيا، ەزەكيەل ەحوبانىڭ ٶزى ونى جىبەرىپ وتىرعانىنا ەش كۇماندانبادى. بۇعان قوسا، ٴدىني قىزمەتكەر بولعان اكەسىنەن دە ول ەحوبانىڭ بۇرىندا ٶز پايعامبارلارىن قالاي قولداعانىن ەستىپ وسسە كەرەك. مىسالى، ىسقاق، جاقىپ، ەرەمياعا ەحوبا: «مەن ساعان جار بولامىن»،— دەپ ايتقان (مۇس. 1-ج. 26:24؛ 28:15؛ ەرم. 1:8).
4. ەزەكيەلگە تاعى قانداي سوزدەر كۇش بەردى؟
4 ەزەكيەل جاريالاعان حاباردى يسرايلدىكتەردىڭ باسىم كوپشىلىگى قالاي قابىلداماق ەدى؟ ەحوبا ولار جايلى: «يسرايل ٷيى سەنى تىڭدامايدى، ويتكەنى ولار مەنى تىڭداعىلارى كەلمەيدى»،— دەگەن (ەزەك. 3:7). دەمەك، حالىق ەزەكيەلدەن باس تارتۋلارىمەن ەحوبانىڭ وزىنەن باس تارتپاق ەدى. بۇل سوزدەر ەزەكيەلگە سەنىمدىلىك بەردى، ويتكەنى حالىقتىڭ حابارعا قۇلاق اسپاعانى ونىڭ پايعامبارلىق مىندەتىن ناشار اتقارعانىن بىلدىرمەدى. سونداي-اق ەحوبا ەزەكيەلدىڭ جاريالاپ جۇرگەن ۇكىم حابارى جۇزەگە اسقاندا، حالىق «ارالارىندا پايعامباردىڭ بولعانىن بىلەتىن بولادى» دەپ ايتقان (ەزەك. 2:5؛ 33:33). وسى سوزدەردىڭ بارلىعى ەزەكيەلگە جۇبانىش بولىپ، قىزمەتىن ٵرى قاراي دا اتقارا بەرۋگە كۇش بەردى.
ٴبىزدى دە ەحوبا جىبەردى
ەزەكيەلدىڭ كەزىندەگىدەي، ادامدار ٴبىزدى تىڭداماي، قارسىلىق كورسەتسە دە، ەحوبا بىزگە جار ەكەنىن ۇمىتپايىق (5، 6-ابزاستاردى قاراڭىز)
5. يشايا 44:8 گە ساي، بىزگە نە نارسە كۇش بەرەدى؟
5 بۇگىندە ٴبىزدى دە ەحوبانىڭ ٶزى جىبەرىپ وتىر. ول ٴبىزدى «مەنىڭ كۋاگەرلەرىمسىڭدەر» دەپ اتاۋىمەن بىزگە ۇلكەن قۇرمەت كورسەتەدى (يشايا 43:10). بۇل ٴبىز ٷشىن زور مارتەبە! ەحوبا ەزەكيەلگە: «قورىقپا»،— دەپ ايتقانداي، بىزگە دە: «ۇرەيلەرىڭ ۇشپاسىن»،— دەيدى. ال قارسىلاستارىمىزدان قورىقپاۋعا بىزدە قانداي سەبەپ بار؟ ەزەكيەل سياقتى، ٴبىزدى دە ەحوبانىڭ ٶزى جىبەرىپ، ٶزى دەمەپ وتىر. وسىنى بىلگەنىمىز بىزگە كۇش بەرەدى ەمەس پە؟! (يشايا 44:8 وقىڭىز).
6. ا) ەحوبا بىزگە نە دەپ ۋادە ەتەدى؟ ٵ) ٴبىزدى نە نارسە جۇباتىپ، كۇش بەرەدى؟
6 ەحوبا ٴبىزدى قولدايمىن دەپ ۋادە ەتەدى. «سەندەر مەنىڭ كۋاگەرلەرىمسىڭدەر»،— دەپ ايتپاس بۇرىن، ول بىلاي دەگەن: «سۋدان وتكەنىڭدە، مەن سەنىمەن بىرگە بولامىن، وزەندەردەن وتكەنىڭدە، سۋ استىندا قالمايسىڭ. وت اراسىنان وتكەنىڭدە، كۇيمەيسىڭ، سەنى جالىن دا شارپىمايدى» (يشايا 43:2). كەيدە ٴبىز تاسىعان وزەندەي كەدەرگىلەرگە كەزىگىپ، وتتاي قيىندىقتارعا تاپ بولىپ جاتامىز. ٴبىراق ەحوبانىڭ كومەگىمەن ٴبىز ٵرى قاراي دا ۋاعىزداي بەرەمىز (يشايا 41:13). ەزەكيەلدىڭ كەزىندەگىدەي، بۇگىندە دە كوپ ادام ىزگى حابارعا قۇلاق اسپايدى. ٴبىراق بۇل قىزمەتىمىزدى جامان اتقارىپ جاتىرمىز دەگەندى بىلدىرمەيدى. ىزگى حاباردى ادالدىقپەن ٵرى قاراي دا جاريالاي بەرسەك، ەحوبانىڭ جۇرەگىن قۋانتامىز. بۇنى بىلگەنىمىز بىزگە جۇبانىش پەن كۇش بەرەدى. ەلشى پاۋىل: «ٵر ادام ەڭبەگىنە قاراي ٶز سيىن الادى»،— دەگەن (قور. 1-ح. 3:8؛ 4:1، 2). ۇزاق ۋاقىتتان بەرى ٸزاشار بولىپ قىزمەت ەتەتىن ٴبىر ايەل باۋىرلاس: «ەحوبا بىزگە سيىن ەڭبەگىمىزگە قاراي بەرەتىنى قانداي جاقسى!»— دەيدى.
ەزەكيەلگە قۇداي رۋحى كۇش بەردى
ەزەكيەل اياندا ەحوبانىڭ كوكتەگى ارباسىن كوردى. بۇل ايان ەحوبا وعان قىزمەتىن سوڭىنا دەيىن اتقارۋعا كومەكتەسەتىنىنە سەندىردى (7-ابزاستى قاراڭىز)
7. كورگەن ايانى جايلى وي جۇگىرتكەن سايىن ەزەكيەل قانداي اسەر السا كەرەك؟ (مۇقاباداعى سۋرەتتى قاراڭىز.)
7 ەزەكيەل اياندا قۇدايدىڭ كيەلى رۋحى قانشالىقتى قۇدىرەتتى ەكەنىنە كوز جەتكىزدى. ول كيەلى رۋحتىڭ قۇدىرەتتى تىرشىلىك يەلەرىن جانە ەحوبانىڭ كوكتەگى ارباسىنىڭ الىپ دوڭگەلەكتەرىن باعىتتاپ وتىرعانىن كوردى (ەزەك. 1:20، 21). بۇل ايان ەزەكيەلگە قالاي اسەر ەتتى؟ ول: «مۇنى كورگەندە، مەن جەرگە ەتپەتتەي كەتتىم»،— دەگەن. ٴيا، ەزەكيەل تاڭعالعانى سونشا — جەرگە جىعىلا كەتتى (ەزەك. 1:28). ۋاقىت وتە وسى اياننىڭ ۇستىنەن وي جۇگىرتكەن سايىن، ەزەكيەل قۇداي رۋحىنىڭ كومەگىمەن قىزمەتىن سوڭىنا دەيىن اتقارا الاتىنىنا سەنىمدى بولا تۇسسە كەرەك.
8، 9. ا) ەحوبا ەزەكيەلگە «تۇرەگەلۋدى» بۇيىرعاندا، ونىمەن نە بولدى؟ ٵ) قيىن اۋماقتا ۋاعىزداي الۋى ٷشىن، ەحوبا ەزەكيەلدى تاعى قالاي نىعايتتى؟
8 ەحوبا ەزەكيەلگە: «ادام ۇلى، تۇرەگەل دە، ايتاتىن سوزدەرىمدى تىڭدا»،— دەپ بۇيىردى. وسى كەزدە ەزەكيەلدىڭ بويىنا كۇش ٴبىتىپ، ول اياققا تۇردى. «بويىما رۋح ەنىپ، مەنى اياعىما تۇرعىزدى»،— دەپ جازدى ول (ەزەك. 2:1، 2). قۇدايدىڭ «قۇدىرەتى»، ياعني كيەلى رۋحى ەزەكيەلدى وسى جاعدايدان كەيىن دە، ٴتىپتى قىزمەتىنىڭ سوڭىنا دەيىن دە باعىتتاپ وتىردى (ەزەك. 3:22؛ 8:1؛ 33:22؛ 37:1؛ 40:1). قۇدايدىڭ كيەلى رۋحى ەزەكيەلگە العان تاپسىرماسىن ورىنداۋعا، ياعني «ماڭدايلارى قاتتى، جۇرەكتەرى شەمەن» ادامدارعا ۋاعىزداۋعا كۇش بەردى (ەزەك. 3:7). ەحوبا وعان: «مەن سەنىڭ بەتىڭدى دە، ماڭدايىڭدى دا تاپ سولاردىكىندەي قاتتى قىلامىن. ماڭدايىڭدى شاقپاقتاستان الدەقايدا قاتتى الماستاي ەتەمىن. سەن ولاردان قورىقپا، تۇرلەرىنە قاراپ شوشىما»،— دەدى (ەزەك. 3:8، 9). بىلايشا ايتقاندا، ەحوبا ەزەكيەلگە: «ادامداردىڭ قىڭىرلىعى رۋحىڭدى كۇيرەتىپ جىبەرمەسىن، وعان جول بەرمە. مەن سەنى نىعايتامىن»،— دەگەندەي بولدى.
9 كەيىن قۇدايدىڭ رۋحى ەزەكيەلدى ونىڭ ۋاعىزدايتىن اۋماعىمەن الىپ ٶتتى. سول كەزدە «ەحوبا [وعان] قۇدىرەتىن دارىتتى». جاريالاعالى جاتقان حابارىن تولىقتاي قورىتىپ، ٴتۇسىنىپ الۋعا وعان ٴبىر اپتا ۋاقىت كەتتى (ەزەك. 3:14، 15). سودان كەيىن ەحوبا وعان جازىق دالاعا بارۋدى ايتتى. سول جەردە ونىڭ بويىنا «رۋح ەندى» (ەزەك. 3:23، 24). وسىلايشا ەزەكيەل قىزمەتىن باستاۋعا دايار بولدى.
بىزگە دە قۇداي رۋحى كۇش بەرەدى
ەزەكيەلدىڭ جاعدايىنداعىداي، بىزگە دە قىزمەتىمىزدى اتقارا بەرۋگە نە كومەكتەسەدى؟ (10-ابزاستى قاراڭىز)
10. ۋاعىز ٸسىن اتقارۋ ٷشىن بىزگە قانداي كومەك قاجەت جانە نەگە؟
10 ۋاعىز ٸسىن اتقارۋعا بىزگە نە كومەكتەسەدى؟ ەزەكيەل قۇدايدىڭ حابارىن جاريالاۋعا كىرىسپەس بۇرىن، قۇداي رۋحىنان كۇش العان ەدى. سول سياقتى، ٴبىز دە بۇگىندە تەك قۇدايدىڭ رۋحىنىڭ ارقاسىندا عانا ۋاعىز ٸسىن اتقارا الامىز. نەگە ولاي؟ ويتكەنى شايتان بىزبەن كۇرەسىپ، ۋاعىز ٸسىن توقتاتقىسى كەلەدى (ايان 12:17). ادامي تۇرعىدان قاراعاندا، ٴبىز شايتانعا ەشقاشان قارسى تۇرا المايتىنداي كورىنەتىن شىعارمىز. ٴبىراق ىزگى حاباردى جاريالاۋىمىزبەن ٴبىز جەڭىسكە جەتىپ جاتىرمىز! (ايان 12:9—11) قىزمەتكە شىققاندا، ٴبىز شايتاننىڭ قورقىتىپ-ۇركىتكەنىنەن سەسكەنبەيتىنىمىزدى كورسەتەمىز. ٴبىزدىڭ ٵر ۋاعىزداعانىمىز شايتاندى جىققان سوققىلار سياقتى. سونىمەن، قارسىلىقتارعا قاراماستان، ۋاعىز ٸسىن اتقارا بەرگەنىمىز نەنى كورسەتەدى ەكەن؟ بۇل كيەلى رۋح ٴبىزدى قۋاتتاپ وتىرعانىن جانە ەحوبا بىزگە جار ەكەنىن ايقىن ەتەدى (مات. 5:10—12؛ پەت. 1-ح. 4:14).
11. قۇدايدىڭ رۋحى بىزگە قالاي كومەكتەسەدى جانە ول بىزگە ۇنەمى اسەر ەتۋ ٷشىن نە ىستەۋىمىز كەرەك؟
11 قاتتى قارسىلىقتارعا توتەپ بەرۋى ٷشىن ەحوبا ەزەكيەلدىڭ بەتى مەن ماڭدايىن قاتتى قىلعانى بىزگە تاعى ٴبىر سەنىمدىلىك بەرەدى. قۇدايدىڭ رۋحى قىزمەتتە كەزىككەن قيىندىقتىڭ كۇشى مەن ٴبىزدىڭ كۇشىمىزدى تەڭەستىرە الادى (قور. 2-ح. 4:7—9). ەندەشە، قۇدايدىڭ رۋحىنان ۇنەمى كۇش الىپ تۇرۋ ٷشىن نە ىستەسەك بولادى؟ ەحوبادان كيەلى رۋحىن تالماي سۇراي بەرەيىك. ول ٴبىزدى تىڭدايتىنىنا ەش كۇماندانبايىق. يسا دا شاكىرتتەرىن: «سۇراي بەرىڭدەر،...ٸزدەي بەرىڭدەر،...ەسٸكتٴى قاعا بەرىڭدەر»،— دەپ ۇيرەتكەن. سوندا ەحوبا «وزىنەن سۇراعاندارعا كيەلى رۋحتى ٴشۇباسىز بەرەدى» (لۇقا 11:9، 13؛ ەل. ٸس. 1:14؛ 2:4).
ەزەكيەل قۇدايدىڭ سوزىنەن ٴنار الدى
12. ەزەكيەل 2:9—3:3-تارماقتارعا ساي، شيىرشىق قايدان كەلدى جانە وندا نە جازىلعان؟
12 ەزەكيەلگە قۇدايدىڭ رۋحى عانا ەمەس، قۇدايدىڭ ٴسوزى دە قۋات بەرگەن. اياندا ول شيىرشىق ۇستاپ تۇرعان قولدى كورەدى (ەزەكيەل 2:9—3:3 وقىڭىز). قازىر بۇل نە دەگەن قول ەكەنىن، شيىرشىقتا نە جازىلعانىن جانە قالاي ول ەزەكيەلدى قۋاتتاندىرعانىن كورەيىك. شيىرشىق قۇدايدىڭ تاعىنان كەلگەن بولاتىن. ەحوبا وسى شيىرشىقتى ەزەكيەلگە بەرۋ ٷشىن، الدىندا ەزەكيەلگە كورىنگەن ٴتورت پەرىشتەنىڭ بىرەۋىن قولدانعان بولۋى مۇمكىن (ەزەك. 1:8؛ 10:7، 20). ال شيىرشىقتىڭ ەكى بەتىندە دە قۇدايدىڭ سوزدەرى، ياعني بۇلىكشىل حالقىنا ارنالعان ۇزىن ۇكىم حابارى جازىلعان ەكەن (ەزەك. 2:7). ەزەكيەل ونى سول حالىققا جەتكىزۋ كەرەك بولدى.
13. ەحوبا ەزەكيەلگە شيىرشىقپەن نە ىستەۋدى بۇيىردى جانە ونىڭ ٴتاتتى بولعانى نەنى بىلدىرەدى؟
13 ەحوبا ٶزىنىڭ پايعامبارىنا: «شيىرشىقتى جەپ، قۇرساعىڭدى تولتىر»،— دەدى. ەزەكيەل وعان بىردەن قۇلاق اسىپ، شيىرشىقتى تۇگەل جەپ قويادى. اياننىڭ وسى بولىگى نەنى بىلدىرەدى؟ ەزەكيەل حالىققا ايتقالى جاتقان حابارىن ٶزى تولىق قورىتىپ، ٴتۇسىنىپ الۋ كەرەك ەدى. بىلايشا ايتقاندا، شيىرشىقتاعى حابار ونىڭ بۇكىل جان دۇنيەسىن قوزعاپ، جانىنىڭ ٴبىر بولىگىنە اينالدى. سوسىن ەزەكيەل ٴبىر قىزىق نارسەنى بايقادى: «شيىرشىق بالداي ٴتاتتى» ەكەن (ەزەك. 3:3). بۇل نەنى بىلدىرەدى؟ ەزەكيەل ەحوبانىڭ اتىنان سويلەپ، ونىڭ وكىلى بولۋدى بالداي ٴتاتتى، كەرەمەت مارتەبە سانادى (ٴزاب. 19:8—11). ول ەحوبانىڭ كوڭىلىنەن شىعىپ، پايعامبار بولا الاتىنىنا شەكسىز ريزا ەدى!
14. ەزەكيەل العان تاپسىرماسىن اتقارۋعا قالاي دايىندالدى؟
14 بۇدان كەيىن ەحوبا ەزەكيەلگە: «ايتقان سوزدەرىمنىڭ ٴبارىن جۇرەگىڭە توقىپ، قۇلاعىڭا قۇيىپ ال»،— دەدى (ەزەك. 3:10). وسىلايشا وعان شيىرشىقتاعى سوزدەردى جاتتاپ، ۇستىنەن وي جۇگىرتۋدى تاپسىردى. سولاي ەتكەنىنىڭ ارقاسىندا ەزەكيەلدىڭ سەنىمى نىعايدى جانە حالىققا قانداي حابار جەتكىزۋ كەرەكتىگىن دە جاقسى ٴتۇسىندى (ەزەك. 3:11). قۇدايدىڭ حابارى جۇرەگىندە دە، اۋزىندا دا بولعاندىقتان، ەزەكيەل ٶزىنىڭ تاپسىرماسىن ورىنداۋعا ساقاداي ساي بولدى (ٴزاب. 19:14 سالىستىرىڭىز).
ٴبىز دە قۇدايدىڭ سوزىنەن ٴنار الامىز
15. قىزمەتىمىزدى تاباندىلىقپەن اتقارا بەرۋ ٷشىن ٴبىز نەنى «جۇرەگىمىزگە توقىپ» الۋىمىز كەرەك؟
15 قىزمەتىمىزدى تاباندىلىقپەن اتقارۋ ٷشىن ٴبىز دە قۇداي سوزىنەن ٴنار الىپ وتىرۋىمىز كەرەك. بۇل ٷشىن ەحوبانىڭ ايتقان سوزدەرىنىڭ ٴبارىن «جۇرەگىمىزگە توقىپ» الۋىمىز قاجەت. ال ونىڭ سوزدەرى كيەلى كىتاپتا جازىلعان. قۇدايدىڭ ٴسوزى ويلارىمىز بەن سەزىمدەرىمىزگە جانە نيەتىمىزگە اسەر ەتىپ جاتقانىنا قالاي كوز جەتكىزسەك بولادى؟
16. ەحوبا ونىڭ سوزىمەن نە ىستەگەنىمىزدى قالايدى جانە ول جۇرەگىمىزگە ٴسىڭۋ ٷشىن نە ىستەۋىمىز كەرەك؟
16 كادىمگى تاماق جەپ، ول بويىمىزعا سىڭگەندە، ٴجۇزىمىز بال-بۇل جايناپ، قۋاتتانىپ قالامىز. قۇدايدىڭ ٴسوزىن زەرتتەپ، ۇستىنەن وي جۇگىرتكەندە دە ٴدال وسىنداي كۇي كەشەمىز. ەحوبانىڭ ەزەكيەلگە شيىرشىققا قاتىستى نە دەپ بۇيىرعانىن ەستە ۇستايىق. ول ٴبىزدىڭ ٶزىنىڭ سوزىمەن «قۇرساعىمىزدى تولتىرعانىمىزدى» قالايدى، ياعني ونىڭ ٴسوزىن قورىتىپ، بويىمىزعا سىڭدىرسەك ەكەن دەيدى. بۇل ٷشىن بىزگە دۇعا ەتۋ، وقۋ جانە وي جۇگىرتۋ قاجەت. دەمەك، بىرىنشىدەن، دۇعا ايتىپ، جۇرەگىمىزدى قۇدايدىڭ ويلارىن قابىلداۋعا دايىنداپ الامىز. سوسىن كيەلى كىتاپتى وقيمىز. كەيىن ٴبىراز كىدىرىپ، وقىعانىمىزدىڭ ۇستىنەن تەرەڭ وي جۇگىرتەمىز. وسىلاي كوبىرەك وي جۇگىرتكەن سايىن قۇدايدىڭ ٴسوزى دە بەينەلى جۇرەگىمىزگە كوبىرەك سىڭەتىن بولادى.
17. كيەلى كىتاپتىڭ ۇستىنەن وي جۇگىرتۋ نەگە ماڭىزدى؟
17 كيەلى كىتاپتى وقىپ، وي جۇگىرتۋ نەگە ماڭىزدى؟ بۇل قازىرگى ۋاقىتتا پاتشالىق جايلى حاباردى جاريالاۋعا جانە جاقىن ارادا ادامزاتقا اۋىر سوققى بولىپ تيەتىن ۇكىم حابارىن باتىل ايتۋعا قاجەتتى كۇش-جىگەر بەرەدى. سونداي-اق ەحوبانىڭ تارتىمدى قاسيەتتەرى جايلى وي جۇگىرتكەندە، ونىمەن دوستىعىمىز ودان سايىن بەرىك بولا تۇسەدى. سوندا مۇنىڭ بالداي ٴتاتتى جەمىسىن كورەمىز، ياعني جان تىنىشتىعىنا كەنەلىپ، قاناعات الامىز (ٴزاب. 119:103).
«سوڭىنا دەيىن تاباندىلىق تانىتۋعا» نىق بەكىنگەنبىز!
18. ايماعىمىزداعى ادامدار نەنى مويىندايتىن بولادى جانە نەلىكتەن؟
18 ارينە، ٴبىز ەزەكيەل سياقتى پايعامبار ەمەسپىز. ٴبىراق ٴبىز ول سياقتى سوڭىنا دەيىن، ياعني ەحوبا جەتكىلىكتى دەپ ايتقان كەزگە دەيىن، ونىڭ سوزىندەگى حاباردى ۋاعىزداي بەرۋگە نىق بەكىنگەنبىز. سوندا قۇدايدىڭ ادامزاتقا شىعارعان ۇكىمى جۇزەگە اسقاندا، ايماعىمىزدا تۇراتىن ادامدار ٴبىزدى ەشكىم ەسكەرتپەدى نەمەسە ٴبىز قۇدايعا كەرەك ەمەسپىز دەي المايدى (ەزەك. 3:19؛ 18:23). قايتا، قۇدايدىڭ اتىنان حابار ايتقانىمىزدى مويىندايتىن بولادى.
19. نە نارسەلەر قىزمەتىمىزدى اتقارۋعا كۇش بەرەدى؟
19 قورىتا كەتسەك، قىزمەتىمىزدى اتقارۋعا بىزگە نە كۇش بەرەدى؟ كەزىندە ەزەكيەل پايعامبارعا كۇش بەرگەن ٷش جايت، ياعني ٴبىزدى ەحوبانىڭ ٶزى جىبەرىپ وتىرعانى، قۇدايدىڭ كيەلى رۋحىنان قۋات الاتىنىمىز جانە قۇدايدىڭ ٴسوزى بىزگە كۇش بەرەتىنى. ەحوبانىڭ كومەگىمەن ٴبىز قىزمەتىمىزدى ٵرى قاراي دا اتقارا بەرۋگە جانە «سوڭىنا دەيىن تاباندىلىق تانىتۋعا» نىق بەكىنگەنبىز! (مات. 24:13).
65-ٵن العا ۇمتىل!
a ەحوبا ٶزىنىڭ پايعامبارى ەزەكيەلگە قىزمەتىن اتقارۋعا ٷش جولمەن كومەكتەسكەن. سول ٷش كومەكتى وسى ماقالادا قاراستىرعانىمىز ەحوبا بىزگە دە قىزمەتىمىزدى اتقارۋعا كومەكتەسەتىنىنە سەنىمدىلىك بەرەدى.
