46-زەرتتەۋ ماقالاسى
ەحوبا قيىندىققا قۋانىشپەن توتەپ بەرۋگە كومەكتەسەدى
«ەحوبا سەندەرگە ىقىلاسىن ٴتۇسىرۋ ٷشىن شىداممەن كۇتىپ وتىر. ول سەندەرگە مەيىرىم تانىتۋ ٷشىن تۇرەگەلەدى» (يشايا 30:18).
3-ٵن سەن بىزگە كۇش بەردىڭ، ٷمىت بەردىڭ
اڭداتپا a
1، 2. ا) ٴبىز قانداي سۇراقتاردى قاراستىرامىز؟ ٵ) ەحوبا بىزگە كومەكتەسۋگە اسىق ەكەنىن قايدان بىلەمىز؟
ەحوبا ٶمىردىڭ تاۋقىمەتىن بولىسە كوتەرىسەدى ٵرى قاسيەتتى قىزمەتىمىزدەن قۋانىش تابۋعا كومەكتەسەدى. بۇل كومەكتى ەحوبا قانداي جولدارمەن كورسەتەدى؟ ونىڭ كومەگىنىڭ بار پايداسىن كورۋ ٷشىن نە ىستەسەك بولادى؟ بۇل ماقالادا وسى سۇراقتارعا جاۋاپ الامىز. ٴبىراق الدىمەن ەحوبا بىزگە شىنىمەن كومەكتەسكىسى كەلە مە، سونى بىلەيىك.
2 بۇعان ەلشى پاۋىلدىڭ ەۆرەيلەرگە جازعان حاتىنداعى ٴبىر ٴسوز جاۋاپ بەرەدى. ول: «ەحوبا — مەنىڭ كومەكشىم. مەن ەشتەڭەدەن قورىقپايمىن. ادام بالاسى ماعان نە ىستەي الادى؟»— دەپ جازعان (ەۆر. 13:6). ٴبىر ەڭبەكتە ايتىلعانداي، مۇنداعى «كومەكشى» دەگەن ٴسوز ايعايلاپ كومەككە شاقىرىپ جاتقان ادامعا جۇگىرىپ باراتىن ادامدى بىلدىرەدى. ەحوبانىڭ قينالىپ جاتقان قىزمەتشىسىنە قاراي اسىعىپ بارا جاتقانىن ەلەستەتىپ كورىڭىزشى. بۇل كورىنىس ول ٴبىزدىڭ كومەكشىمىز بولۋدى قاتتى قالايتىنىن كورسەتەدى ەمەس پە؟! ەحوبا جانىمىزدان تابىلىپ، بىزگە ٵر كەز بولىسىپ تۇرسا، كەز كەلگەن قيىندىققا قۋانىشپەن توزە الامىز.
3. قىزمەتشىلەرى قيىنشىلىققا قۋانىشپەن ٴتوزۋ ٷشىن، ەحوبا قانداي ٷش جولمەن كومەكتەسەدى؟
3 قيىنشىلىقتارعا قۋانىشپەن توزۋگە ەحوبا قانداي جولدارمەن كومەكتەسەدى؟ بۇل سۇراققا جاۋاپ بەرۋ ٷشىن يشايا كىتابىنا نازار اۋدارايىق. ويتكەنى ونداعى كيەلى رۋحتىڭ جەتەلەۋىمەن جازىلعان كوپ پايعامبارلىق قۇدايدىڭ بۇگىندەگى قىزمەتشىلەرىنە قاتىستى. سونداي-اق وندا يشايا پايعامبار ەحوبانى بىزگە تۇسىنىكتى بولاتىن قاراپايىم تىركەستەرمەن سيپاتتايدى. مىسالعا 30 تاراۋدى الايىقشى. وندا ەحوبا ٶز قىزمەتشىلەرىنە مىناداي ٷش جولمەن قالاي كومەكتەسەتىنى ادەمى تىلمەن جازىلادى: 1) دۇعالارىمىزدى قۇلاق قويىپ تىڭداپ، ولارعا جاۋاپ بەرەدى؛ 2) باعىت-باعدار بەرىپ وتىرادى؛ 3) قازىر دە، بولاشاقتا دا بىزگە مول باتاسىن توگەدى. وسى ٷش كومەككە قازىر جەكە-جەكە توقتالىپ كەتەيىك.
ەحوبا ٴبىزدى تىڭدايدى
4. ا) يشايانىڭ كەزىندەگى ياھۋديلەردى ەحوبا قالاي سيپاتتادى جانە ول نە نارسەگە جول بەردى؟ ٵ) ەحوبا ادال ياھۋديلەرگە قانداي ٷمىت بەردى؟ (يشايا 30:18، 19)
4 يشايا كىتابىنىڭ 30 تاراۋىنىڭ العاشقى سوزدەرىندە ەحوبا ياھۋديلەردى «كۇنالارىنا كۇنا قوساتىن» «قيقار ۇلدار» دەپ اتاعان. بۇعان قوسا، ولاردى «ەحوبانىڭ زاڭىن تىڭداعىسى كەلمەيتىن» «بۇلىكشىل حالىق» دەگەن (يشايا 30:1، 9). ەحوبانى تىڭداماعاندارى ٷشىن يشايا ولاردى اپات كۇتىپ تۇرعانىن ايتتى (يشايا 30:5، 17؛ ەرم. 25:8—11). راسىندا دا، كەيىن بابىلدىقتاردىڭ اسكەرى كەلىپ، ولاردى تۇتقىندىققا الىپ كەتتى. دەسە دە سول بۇلىكشىلەردىڭ اراسىندا ادال ياھۋديلەر دە بار ەدى. يشايا كۇندەردىڭ كۇنىندە ەحوبا ولارعا قايتادان ىقىلاسىن تۇسىرەتىنىن ايتىپ، سونگەن ۇمىتتەرىن قايتا جاقتى (يشايا 30:18، 19 وقىڭىز). بابىلدان ازات بولعاندا، ولاردىڭ وسى ۇمىتتەرى اقتالدى! دەسە دە «ەحوبا سەندەرگە ىقىلاسىن ٴتۇسىرۋ ٷشىن شىداممەن كۇتىپ وتىر» دەگەن سوزدەر ادال ياھۋديلەردىڭ بىردەن ەمەس، ارادا ٴبىراز ۋاقىت وتە قۇتقارىلاتىندارىن ٴبىلدىردى. باقانداي 70 جىل وتكەننەن كەيىن عانا ٴيسرايلدىڭ تامتىعى يەرۋساليمگە ورالدى (يشايا 10:21؛ ەرم. 29:10). وسىلاي قايعىنىڭ جاسى قۋانىش جاسىنا ۇلاستى.
5. يشايا 30:19 بىزگە قانداي سەنىمدىلىك بەرەدى؟
5 «كومەككە شاقىرىپ جالبارىنعانىڭدا، ول ىقىلاسىن تۇسىرەدى» دەگەن سوزدەردەن بۇگىندە بارلىعىمىز دا جۇبانىش تابا الامىز (يشايا 30:19). ەحوبانى كومەككە شاقىرعانىمىزدا، ول ٴبىزدى مۇقيات تىڭدايدى جانە بىردەن جاۋاپ بەرەدى. يشايا پايعامبار: «داۋسىڭدى ەستي سالا، ساعان جاۋاپ بەرەدى»،— دەپ جازعان. وسى سوزدەر كوكتەگى اكەمىزدىڭ دۇعا ايتقاندارعا كومەكتەسۋگە اسىق ەكەنىن كورسەتەدى، سولاي ەمەس پە؟! بۇل ويدى بىلگەن جان قيىندىققا قۋانىشپەن توتەپ بەرە الادى.
6. يشايانىڭ سوزدەرىنەن ەحوبا ٵربىر قىزمەتشىسىنىڭ دۇعاسىن تىڭدايتىنى قالاي كورىنەدى؟
6 وسى تارماق ٴبىزدى تاعى ٴبىر نارسەگە سەندىرەدى. ەحوبا ٴارقايسىسىمىزدىڭ دۇعامىزعا جەكە-جەكە قۇلاق اسادى. نەگە بۇلاي دەي الامىز؟ يشايا 30 تاراۋدىڭ العاشقى جارتىسىندا ەحوبا ٶز حالقىنا «سەندەر» دەپ توپ رەتىندە سويلەپ كەلە جاتادى دا، 19 تارماقتا «سەن» دەپ جەكەشە تۇرگە اۋىسىپ، ٴسوزىن ٵربىر ادامعا ارنايدى. وندا: «سەن ەندى قايتىپ جىلامايسىڭ. كومەككە شاقىرىپ جالبارىنعانىڭدا... داۋسىڭدى ەستي سالا، ساعان جاۋاپ بەرەدى»،— دەلىنگەن. ٴسۇيۋشى اكەمىز ەحوبا ەڭسەسى تۇسكەن ۇلىن نە قىزىن باسقا قىزمەتشىلەرىمەن سالىستىرىپ، «سەن اناۋ باۋىرلاسىڭ سياقتى مىقتى بولۋىڭ كەرەك» دەمەيدى. ول ٴارقايسىسىمىزعا دارا تۇلعا دەپ قاراپ، دۇعالارىمىزدى مۇقيات تىڭدايدى (ٴزاب. 116:1؛ يشايا 57:15).
يشايانىڭ «[ەحوباعا] تىنىشتىق بەرمەڭدەر» دەگەنى نەنى بىلدىرەدى؟ (7-ابزاستى قاراڭىز)
7. يشايا مەن يسانىڭ سوزدەرىنەن كورىنەتىندەي، نەلىكتەن تالماي دۇعا ايتا بەرۋىمىز كەرەك؟
7 ٴبىز ەحوباعا ۋايىمىمىزدى ايتقاندا، ول بىردەن جاۋاپ بەرىپ، سول جاعدايدى كوتەرەتىن كۇش بەرەدى. ەگەر قيىندىعىمىز ٴبىز كۇتكەن ۋاقىتتا شەشىلمەي جاتسا، توتەپ بەرەتىن كۇش سۇراپ، ەحوباعا قايتا-قايتا دۇعا ايتا بەرۋىمىز كەرەك. ونىڭ ٶزى ٴبىزدى سولاي ەتۋگە شاقىرادى. بۇل يشايانىڭ «وعان تىنىشتىق بەرمەڭدەر» دەگەن سوزدەرىنەن كورىنەدى (يشايا 62:7). بىلايشا ايتقاندا، ٴبىز ەحوباعا تىنىشتىق بەرمەي، تاباندى تۇردە دۇعا ايتا بەرۋىمىز كەرەك. بۇل سوزدەر يسانىڭ لۇقا 11:8—10، 13 تەگى دۇعا جايلى ايتقان مىسالىن ەسكە سالادى. ول جەردە يسا كيەلى رۋحتى «قادالىپ سۇراپ تۇرىپ الۋعا» جانە «سۇراي بەرۋگە» شاقىرادى. ٴبىز دۇرىس شەشىم قابىلداۋ ٷشىن دە ەحوبادان باعىت كورسەتۋىن سۇراپ جالبارىنساق بولادى.
ەحوبا ٴبىزدى باعىتتايدى
8. يشايا 30:20، 21 دەگى سوزدەر ەجەلدە قالاي ورىندالدى؟
8 يشايا 30:20، 21 وقىڭىز. بابىل اسكەرى يەرۋساليمدى ٴبىر جارىم جىل بويى قورشاۋدا ۇستاعاندا، حالىقتىڭ قينالعانى سونشا — قيىندىقتار ولارعا نان مەن سۋ سياقتى تانىس بولىپ كەتكەن ەدى. ٴبىراق 20، 21 ٸنشى تارماقتارعا ساي، ولار ىستەرىنە وكىنىپ، ٴجۇرىس-تۇرىستارىن وزگەرتسە، ەحوبا ولاردى قۇتقارىپ الاتىنىن، سونداي-اق وعان ۇنامدى تۇردە عيبادات ەتۋدى ٶزى ۇيرەتەتىنىن دە ۋادە ەتتى. مۇنى يشايانىڭ ەحوبانى «ۇلى تالىمگەرلەرىڭ» دەپ اتاعان سوزدەرىنەن كورەمىز. قۇدايدىڭ بۇل ۋادەسى ياھۋديلەر بوستاندىققا شىققاندا ورىندالدى. ولار ەحوبانىڭ باعىتتاۋىمەن تازا عيباداتتى قالپىنا كەلتىرگەندە، ەحوبا ۇلى تالىمگەر ەكەنىن دالەلدەدى. وسىنداي ۇلى تالىمگەرىمىزدىڭ بارى — ٴبىز ٷشىن دە زور باقىت!
9. بۇگىندە ەحوبادان ٴتالىم الۋدىڭ ٴبىر جولى قانداي؟
9 يشايا ٴبىزدى ەحوبادان ەكى جولمەن ٴتالىم الىپ جاتقان وقۋشىلارعا تەڭەيدى. الدىمەن ول: «سەندەر ۇلى تالىمگەرلەرىڭدى ٶز كوزدەرىڭمەن كورەسىڭدەر»،— دەگەن. مۇندا يشايا ەحوبانى وقۋشىلارىنىڭ الدىندا تۇرعان تالىمگەرگە تەڭەپ تۇر. ودان ٴتالىم الۋ — ٴبىز ٷشىن ۇلكەن مارتەبە! الايدا ەحوبا ٴتالىمىن قالاي بەرەدى؟ ٶزىنىڭ ۇيىمى ارقىلى. ٴبىز وسى ارنانىڭ انىق تا قانىق نۇسقاۋلار بەرىپ، ٴبىزدى باعىتتاپ جاتقانىنا وتە ريزامىز! كەزدەسۋلەر مەن كونگرەستەردەن، ادەبيەتتەرىمىز بەن ®JW Broadcasting باعدارلاماسىنان جانە باسقا دا مالىمەت كوزدەرىنەن الىپ جاتقان تالىمدەرىمىز قيىنشىلىقتاردى قۋانىشپەن كوتەرۋگە كومەكتەسەدى.
10. ٴبىز قاي ماعىنادا «تۋ سىرتىمىزدان داۋىس ەستيمىز»؟
10 يشايا ەحوبادان ٴتالىم الۋدىڭ ەكىنشى جولى تۋرالى: «تۋ سىرتتارىڭنان... داۋىس ەستيسىڭدەر»،— دەگەن. بۇل جەردە ول ەحوبانى وقۋشىلارىنىڭ ارتىنان ٴجۇرىپ، قاي جولعا ٴتۇسۋ كەرەكتىگىن ايتىپ كەلە جاتقان تالىمگەرگە ۇقساتادى. ٴبىز دە بۇگىندە تۋ سىرتىمىزدان ەحوبانىڭ داۋسىن ەستيمىز. قالاي دەيسىز بە؟ ونىڭ ٴسوزى كيەلى كىتاپ كوپتەگەن عاسىر بۇرىن جازىلعان. دەمەك، ٴبىز كيەلى كىتاپتى وقىعاندا قۇدايدىڭ داۋسىن ارتقى جاقتان، ياعني تۋ سىرتىمىزدان ەستىپ جاتقانداي بولامىز (يشايا 51:4).
11. قيىندىققا قۋانىشپەن توتەپ بەرۋ ٷشىن قانداي قادامداردى جاساۋ قاجەت؟
11 ەحوبانىڭ ٶز ۇيىمى مەن ٴسوزى ارقىلى بەرىپ جاتقان نۇسقاۋلارىنىڭ تولىق پايداسىن كورۋ ٷشىن نە ىستەۋىمىز كەرەك؟ يشايا مۇنى ەكى-اق اۋىز سوزبەن تۇسىندىرگەن. ول: «جول — مىناۋ»،— دەدى. سوسىن: «وسى جولمەن جۇرىڭدەر!»— دەپ قوستى (يشايا 30:21). دەمەك، «جولدى» ٴبىلىپ قانا قويعانىمىز جەتكىلىكسىز، ٴبىز ونىمەن «ٴجۇرۋىمىز» قاجەت. كيەلى كىتاپتان جانە ونى ۇيىم قالاي ٴتۇسىندىرىپ بەرگەنىنەن ەحوبا بىزدەن نە تالاپ ەتەتىنىن بىلە الامىز، سونداي-اق بىلگەندەرىمىزدى ومىردە قالاي قولدانۋ كەرەكتىگىن ۇيرەنەمىز. ەگەر قيىندىقتارعا توتەپ بەرىپ، ەحوباعا قۋانىشپەن قىزمەت ەتكىمىز كەلسە، وسى قادامداردىڭ ەكەۋىن دە جاساۋىمىز كەرەك. سوندا عانا ەحوبانىڭ باتاسىنا بولەنە الامىز.
ەحوبا بىزگە باتاسىن توگەدى
12. يشايا 30:23—26-تارماقتارعا ساي، ەحوبا حالقىنا قالاي باتاسىن توكتى؟
12 يشايا 30:23—26 وقىڭىز. بۇل پايعامبارلىق ياھۋديلەر بابىلدان شىعىپ، يسرايلگە ورالعاندا قالاي ورىندالدى؟ ولار تاندىك جاعىنان دا، رۋحاني جاعىنان دا باتالارعا مولىنان كەنەلدى. ەحوبا ٶز حالقىن استىڭ مولشىلىعىمەن جارىلقادى. ال بۇدان دا ماڭىزدىسى — تازا عيباداتتى بىرتە-بىرتە قالپىنا كەلتىرىپ، ولاردى مول رۋحاني اسپەن قامدادى. 26 تارماقتا ايتىلعانداي، ەحوبا رۋحاني جارىقتى «جەتى ەسە» جارقىراتتى (يشايا 60:2). قۇداي حالقى بۇرىن-سوڭدى مۇنشالىقتى مول رۋحاني باتاعا كەنەلمەگەن ەدى. ەحوبانىڭ وسى باتالارىنىڭ ارقاسىندا ولاردىڭ «جۇرەكتەرىن قۋانىش كەرنەپ»، قىزمەتتەرىن قۋانىشپەن جالعاستىرا بەردى (يشايا 65:14).
13. تازا عيباداتتىڭ قالپىنا كەلۋى جايلى پايعامبارلىق ٴبىزدىڭ كەزىمىزدە قالاي ورىندالىپ جاتىر؟
13 تازا عيباداتتىڭ قالپىنا كەلۋى جايلى پايعامبارلىقتىڭ ٴبىزدىڭ كەزىمىزگە قاتىسى بار ما؟ ارينە! 1919-جىلدان بەرى ميلليونداعان ادام ۇلى بابىلدىڭ، ياعني دۇنيەجۇزىلىك جالعان دىندەر يمپەرياسىنىڭ تۇتقىندىعىنان بوساپ شىعۋدا. ولار كەزىندە يسرايلدىكتەر بارعان ۋادە ەتىلگەن جەردەن دە جاقسى جەرگە اياق باسىپ جاتىر. بۇل جەر رۋحاني جۇماقتى بىلدىرەدى (يشايا 51:3؛ 66:8). ال رۋحاني جۇماق دەگەن نە؟
14. رۋحاني جۇماق دەگەن نە جانە ول جەردى كىمدەر مەكەندەيدى؟ (ٴسوز ٴمانىن قاراڭىز.)
14 1919-جىلدان بەرى مايلانعان ماسىحشىلەر رۋحاني جۇماقتى مەكەندەپ كەلەدى b. ۋاقىت وتە «باسقا قويلار» دا، ياعني جەردە ٶمىر سۇرۋگە ۇمىتتەنەتىندەر دە سول مەكەنگە قونىس تەۋىپ، ەحوبانىڭ مول باتاسىنا كەنەلەتىن بولدى (جوح. 10:16؛ يشايا 25:6؛ 65:13).
15. بۇگىندە رۋحاني جۇماق قاي جەردە ورنالاسقان؟
15 رۋحاني جۇماق قاي جەردە ورنالاسقان؟ ەحوباعا عيبادات ەتەتىن ادامدار بۇگىندە جەردىڭ تۇكپىر-تۇكپىرىندە ٶمىر سۇرەدى. سوندىقتان رۋحاني جۇماق بەلگىلى ٴبىر جەردە ەمەس، بۇكىل جەردە بار دەي الامىز. دەمەك، جەردىڭ قاي بۇرىشىندا ٶمىر سۇرمەيىك، تازا عيباداتتى بەلسەندى تۇردە قولداپ جۇرسەك — رۋحاني جۇماقتا جۇرگەنىمىز.
رۋحاني جۇماعىمىزدىڭ كوركىنە ٶز ۇلەسىمىزدى قالاي قوسساق بولادى؟ (16، 17-ابزاستاردى قاراڭىز)
16. رۋحاني جۇماقتىڭ سۇلۋلىعىنان كوز تايدىرىپ الماۋ ٷشىن نە ىستەۋىمىز كەرەك؟
16 رۋحاني جۇماقتا قالا بەرۋ ٷشىن، ٴبىز باسقا ىستەردى اتقارۋمەن قاتار، دۇنيەجۇزىلىك باۋىرلاستىعىمىزعا دەگەن ريزاشىلىعىمىزدى دا جوعالتپاۋىمىز كەرەك. بۇل ٷشىن نە ىستەسەك بولادى؟ رۋحاني جۇماقتا جۇرگەن باۋىرلارىمىزدىڭ كەمشىلىكتەرىنە ەمەس، ادەمى قاسيەتتەرىنە نازار اۋدارا ٴبىلۋىمىز قاجەت (جوح. 17:20، 21). ەلەستەتىپ كورەيىكشى، ٴبىز وتە ادەمى ٴبىر ساياباقتا ٴجۇرمىز دەلىك. وندا ٴبىز اعاشتاردىڭ ٴتۇر-ٴتۇرىن كورىپ تاماشالايمىز. سول اعاشتار سياقتى، ٴبىزدىڭ رۋحاني جۇماعىمىزدا دا ٴتۇرلى باۋىرلاستار بار (يشايا 44:4؛ 61:3). ٴبىراق ٴبىز جانىمىزداعى «اعاشتاردىڭ» كەم-كەتىگىنە ەمەس، بۇكىل «ساياباقتىڭ» سۇلۋلىعىنا كوز تىگۋدى ۇيرەنۋىمىز كەرەك. بىلايشا ايتقاندا، ٴبىز ٶز كەمشىلىگىمىز نە قاۋىمداعىلاردىڭ كەمشىلىگى دۇنيەجۇزىلىك باۋىرلاستىعىمىزدىڭ سۇلۋلىعىن تۇمشالاپ تاستاعانىن قالامايمىز.
17. باۋىرلاستار اراسىنداعى بىرلىككە ٵربىرىمىز قالاي ۇلەس قوسا الامىز؟
17 ارامىزداعى بىرلىككە ٴارقايسىسىمىز قالاي ۇلەس قوسا الامىز؟ تاتۋلاستىرۋشى بولۋ ارقىلى (مات. 5:9؛ ريم. 12:18). تاتۋلىق ورناتۋ ٷشىن ٵر كەز ٶزىمىز ٴبىرىنشى بولىپ ارەكەت ەتسەك، رۋحاني جۇماعىمىزدى ودان سايىن كوركەيتە تۇسەمىز. وسى مەكەندەگى ٵربىر جاندى ەحوبا تازا عيباداتقا ٶزى جاقىنداتىپ تارتقانىن ۇمىتپايىق (جوح. 6:44). ەحوبا اياۋلى قىزمەتشىلەرىنىڭ اراسىنداعى تاتۋلىق پەن بىرلىك ٷشىن ايانباي كۇرەسىپ جۇرگەنىمىزدى كورگەندە قانشالىقتى قۋانادى دەسەڭىزشى! (يشايا 26:3؛ حاگ. 2:7).
18. ٴبىز نە تۋرالى ٴجيى ويلانۋىمىز كەرەك جانە نەگە؟
18 ەحوبا ٶز قىزمەتشىلەرىنە بەرىپ جاتقان باتالاردىڭ تولىقتاي پايداسىن كورۋ ٷشىن نە ىستەۋىمىز كەرەك؟ قۇداي سوزىنەن جانە ادەبيەتتەرىمىزدەن زەرتتەگەنىمىز جايلى تەرەڭ ويلانۋىمىز كەرەك. وسىلاي زەرتتەپ، وي جۇگىرتسەك، بويىمىزدا «ٴبىر-ٴبىرىمىزدى تۋعان باۋىرلارداي جاقسى كورۋگە» تالپىندىراتىن قاسيەتتەردى دامىتا الامىز (ريم. 12:10). سونىمەن قاتار قازىر الىپ جاتقان باتالارىمىز جايلى ويلاناتىن بولساق، ەحوبامەن دوستىعىمىز مىقتى بولادى. ال بولاشاقتا يە بولاتىن باتالار جايلى وي جۇگىرتسەك، ەحوباعا ماڭگى قىزمەت ەتەمىز دەگەن ٷمىتىمىز جالىنداي تۇسەدى. بۇلاردىڭ بارلىعى قازىردىڭ وزىندە قۋانىشپەن قىزمەت ەتۋگە سەپتىگىن تيگىزەدى.
تاباندى تۇرۋعا نىق بەكىنگەنبىز
19. ا) يشايا 30:18 گە ساي، ٴبىز نە نارسەگە سەنىمدىمىز؟ ٵ) قيىندىققا قۋانىشپەن توتەپ بەرۋگە نە كومەكتەسەدى؟
19 ەحوبا وسى زۇلىم دۇنيەنى جويعاندا، ٴبىزدى قۇتقارۋ ٷشىن «تۇرەگەلەدى» (يشايا 30:18). ول «ادىلدىك ورناتاتىن قۇداي» بولعاندىقتان، شايتاننىڭ دۇنيەسى جويىلاتىن ۋاقىتتىڭ ٴبىر كۇنگە دە كەشىگۋىنە جول بەرمەيدى (يشايا 25:9). سول كۇن تۋعانشا ٴبىز ەحوبانى شىداممەن كۇتە بەرەمىز. ال قازىر وعان دۇعا ەتۋ، ونىڭ ٴسوزىن زەرتتەپ، ومىردە قولدانۋ جانە باتالارىمىز جايلى وي جۇگىرتۋ مارتەبەسىن باعالاي بەرۋگە بەكىنەيىك. سوندا ەحوبا بىزگە قيىنشىلىقتارىمىزعا قاراماستان، وعان قۋانىشپەن عيبادات ەتە بەرۋگە كومەكتەسەدى.
142-ٵن ٷمىتىمىز جالىنداي بەرسىن
a ەحوبا ٶز قىزمەتشىلەرىنە قيىندىقتارعا قۋانىشپەن توتەپ بەرۋگە ٷش جولمەن كومەكتەسەدى. بۇل جايىندا يشايا كىتابىنىڭ 30-تاراۋىنان بىلەمىز. قازىر سول تاراۋدى قاراستىرا وتىرىپ، ەحوباعا دۇعا ەتۋدىڭ، ونىڭ ٴسوزىن زەرتتەۋدىڭ، قازىرگى جانە بولاشاقتاعى باتالار جايلى وي جۇگىرتۋدىڭ قانشالىقتى ماڭىزدى ەكەنىن ەسكە تۇسىرەمىز.
b ٴسوز ٴمانى: «رۋحاني جۇماق» دەپ ەحوباعا يىق تىرەسە عيبادات ەتىپ جۇرگەن قاۋىپسىز ورتامىزدى ايتامىز. بۇل ورتادا جالعان دىندەردىڭ ىلىمدەرىنەن تازا رۋحاني اس-سۋ مول. سونداي-اق قۇداي پاتشالىعى جايلى ىزگى حاباردى ۋاعىزداۋمەن بايلانىستى ىستەر دە كوپ ٵرى بۇل ىستەر بىزگە قاناعات سيلايدى. بۇل ورتادا ٴبىز ەحوبامەن جاقىن دوس بولا الامىز جانە قامقور باۋىرلاستارمەن تاتۋلىقتا ٶمىر سۇرەمىز. ولار بىزگە ٶمىردىڭ قيىنشىلىقتارىن قۋانىشپەن ەڭسەرۋگە كومەكتەسەدى. رۋحاني جۇماققا كىرۋ ٷشىن ادام ەحوباعا دۇرىس جولمەن عيبادات ەتۋى جانە وعان بارىنشا ەلىكتەۋى قاجەت.
