44-زەرتتەۋ ماقالاسى
33-ٵن ۋايىمىڭدى ەحوباعا ارت
ادىلەتسىزدىك كورگەندە ەحوباعا ادال بولىپ قالىڭىز
«جاماندىقتان جەڭىلمەي، ونى ٵردايىم جاقسىلىقپەن جەڭىپ شىق!» (ريم. 12:21).
نەگىزگى وي
ادىلەتسىزدىك كورگەندە ونسىز دا اۋىر جاعدايىمىزدى ۋشىقتىرىپ جىبەرمەۋگە نە كومەكتەسەدى؟
1، 2. بۇگىندە ادىلەتسىزدىككە كەزىگەتىن كەزىمىز بولا ما؟ ٴتۇسىندىرىڭىز.
بىردە يسا ادىلدىك ورناتۋىن سۇراپ، ٴبيدىڭ الدىنا كەلە بەرگەن جەسىر ايەل تۋرالى مىسال ايتىپ بەردى. مىسالداعى ايەلدىڭ سەزىمى تىڭداپ تۇرعان شاكىرتتەرىنىڭ كوبىنە جاقسى تانىس ەدى، ويتكەنى ول زاماندا ادىلەتسىزدىكتىڭ قۇرباندارى كوپ بولاتىن (لۇقا 18:1—5). ٴبىز دە ارا-تۇرا ادىلەتسىزدىككە كەزىگەتىندىكتەن، جەسىر ايەلدىڭ كۇيىن جاقسى تۇسىنەمىز.
2 بۇل دۇنيە الالاۋشىلىق، تەڭسىزدىك، قاناۋشىلىققا تولى بولعاندىقتان، ادىلەتسىزدىككە كەزىگىپ جاتساق، تاڭعالمايمىز (ۋاع. 5:8). ال قاۋىمداعى باۋىرلاسىمىزدان ادىلەتسىزدىك كورگەندە، توبەمىزگە جاي تۇسكەندەي بولادى. ارينە، باۋىرلاستار شىندىقتىڭ قارسىلاستارى سياقتى بىزگە ادەيىلەپ ادىلەتسىزدىك جاسامايدى. ونىڭ ٴبارى جاي عانا كەمەلسىزدىكتەن. ادىلەتسىز جاپا شەككەندە، يسانىڭ زۇلىم قارسىلاستارىنا قالاي توتەپ بەرگەنى بىزگە ۇلگى بولا الادى. ەگەر قارسىلاستارىمىزدىڭ ادىلەتسىزدىگىنە شىداپ جاتساق، باۋىرلاستارىمىزعا ودان بەتەر شىدامدى بولۋىمىز كەرەك ەمەس پە؟! نەگىزى، ٴبىز قاۋىمداعى ادامنان بولسىن، قاۋىمنان تىس ادامنان بولسىن ادىلەتسىزدىك كورگەندە ەحوبا نە سەزىنەدى؟ ول بىزگە كومەكتەسە مە، الدە وعان ٴبارىبىر مە؟
3. ادىلەتسىزدىك كورگەنىمىز ەحوباعا قالاي اسەر ەتەدى جانە نەگە؟
3 وزگەلەردىڭ بىزگە قالاي قارايتىنى ەحوباعا ٴبارىبىر ەمەس. «سەبەبى ەحوبا ادىلدىكتى سۇيەدى» (ٴزاب. 37:28). يسا ايتىپ كەتكەندەي، «قۇداي ادىلدىك ورناتۋعا اسىعادى» ٵرى بۇنى ٶز ۋاقىتىندا ىستەيدى (لۇقا 18:7، 8). جاقىندا ول ادىلەتسىزدىكتىڭ بارلىق ٴتۇرىن جانە بارلىق سالدارىن جويادى (ٴزاب. 72:1، 2).
4. ەحوبا ادىلەتسىزدىك كورگەنىمىزدە قالاي كومەكتەسەدى؟
4 ادىلدىك ۇستەم بولاتىن سول زامان كەلگەنشە، ەحوبا قاراپ وتىرمايدى، ول ادىلەتسىزدىككە توتەپ بەرۋگە كومەكتەسەدى (پەت. 2-ح. 3:13). ول جاپا شەككەنىمىزدە قالاي ارەكەت ەتۋ كەرەكتىگىن ۇيرەتىپ، اقىماقتىق جاساۋدان ساقتايدى. مىسالى، ونىڭ سوزىندە ادىلەتسىزدىككە توتەپ بەرگەن ۇلىنىڭ كەمەلدى ۇلگىسى بار. سونداي-اق دۇرىس ارەكەت ەتۋگە كومەكتەسەتىن ٴتيىمدى كەڭەستەر بەرگەن.
قالاي ارەكەت ەتەتىنىڭىزگە ساق بولىڭىز
5. ادىلەتسىزدىك كورگەندە نە ٷشىن وزىمىزگە ساق بولۋىمىز كەرەك؟
5 كەز كەلگەن ادىلەتسىزدىك جانىمىزدى جارالاپ، كۇيزەلتىپ جىبەرەدى (ۋاع. 7:7). ٵيۇپ جانە اباقۇق سياقتى قۇدايدىڭ ادال قىزمەتشىلەرى دە وسىنداي كۇي كەشكەن (ٵيۇپ 6:2، 3؛ ابق. 1:1—3). بۇنداي كۇي ادام بالاسىنا ٴتان بولعانمەن، قالاي ارەكەت ەتەتىنىمىزگە مۇقيات بولۋىمىز كەرەك، ويتكەنى اقىماقتىق جاساپ قويۋىمىز ابدەن مۇمكىن.
6. ابەسسالومنان قانداي ساباق الامىز؟ (سۋرەتتى دە قاراڭىز.)
6 وزىمىزگە يا جاقىنىمىزعا ادىلەتسىزدىك جاسالعاندا، جاعدايدى ٶزىمىز شەشكىمىز كەلەر. الايدا اباي بولماساق، وتقا ماي قۇيىپ جىبەرۋىمىز مۇمكىن. ٴداۋىت پاتشانىڭ ۇلى ابەسسالوممەن تۋرا سولاي بولعان. تۋعان قارىنداسى تاماردى ٴبىر اكەدەن تۋعان باۋىرى امنون زورلاعاندا، ابەسسالومنىڭ قانى باسىنا شاپتى. ونىڭ بۇل اشۋى تۇسىنىكتى-اق. بۇل سوراقىلىعى ٷشىن امنون مۇسا زاڭى بويىنشا ولىمگە لايىق ەدى (مۇس. 3-ج. 20:17). ٴبىراق ابەسسالومنىڭ ونى ٶزى جازالاۋىنا ەش قاقىسى جوق ەدى (سام. 2-ج. 13:20—23، 28، 29).
قارىنداسى تامارعا ادىلەتسىزدىك جاسالعاندا، ابەسسالوم اشۋىن تىزگىندەمەدى (6-ابزاستى قاراڭىز)
7. اينالاسىندا بولىپ جاتقان ادىلەتسىزدىك ٴبىر ٴزابۇر جىرشىسىنا العاشىندا قالاي اسەر ەتتى؟
7 ادىلەتسىزدىك جاساعان ادامنىڭ جازاسىز جۇرگەنىن كورگەندە، قۇدايدىڭ الدىندا ٵدىل ٴجۇرىپ-تۇرۋدان نە پايدا دەپ ويلاي باستاۋىمىز مۇمكىن. سولاي ويلاعان ادامداردىڭ ٴبىرى — ٴزابۇر جىرشىسى. ول ادىلدەردى قاناپ، شالقىپ ٶمىر ٴسۇرىپ جۇرگەن زۇلىمداردى كورگەندە: «[ولار] ۇنەمى بەيقام جۇرەدى»،— دەگەن (ٴزاب. 73:12). اينالاسىندا بولىپ جاتقان ادىلەتسىزدىكتەن ٴتۇڭىلىپ كەتكەنى سونشا — ەحوباعا قىزمەت ەتۋدەن كەلىپ-كەتەر پايدا بار ما دەپ ويلاي باستاعان. «وسىنى تۇسىنۋگە تىرىسىپ ەم، بۇل مەنىڭ مازامدى قاشىردى»،— دەدى ول (ٴزاب. 73:14، 16). ٴتىپتى: «جولدان تايۋعا شاق قالدىم، اياعىم تايىپ كەتە جازدادى»،— دەپ مويىندادى (ٴزاب. 73:2). البەرتو دەگەن ەر باۋىرلاس تۋرا وسى كۇيدى باستان كەشكەن ەكەن.
8. ادىلەتسىزدىك ٴبىر ەر باۋىرلاسقا قالاي اسەر ەتتى؟
8 بىردە البەرتوعا قاۋىم قارجىسىنا قول سۇقتى دەگەن جالعان ايىپ تاعىلادى. ناتيجەسىندە ول قاۋىمداعى مىندەتتەرىنەن جانە وسى جاعدايدى ەستىگەن قاۋىمداعى باۋىرلاستاردىڭ قۇرمەتىنەن ايىرىلادى. «مەن قاتتى اشىندىم، ىزاعا بۋلىعىپ، كۇيىپ كەتتىم»،— دەدى ول. وسىنداي كۇيى ونىڭ رۋحاني ساۋلىعىن كۇيرەتىپ، ول قاۋىمنان بەس جىلعا قول ٷزىپ قالدى. وسى جاعدايدان ادىلەتسىزدىككە اشىنۋدىڭ ٴتۇبى نەگە اكەلەتىنىن كورەمىز.
ادىلەتسىزدىككە يسا سياقتى توتەپ بەرىڭىز
9. يسا قانداي ادىلەتسىزدىككە كەزىكتى؟ (سۋرەتتى دە قاراڭىز.)
9 يسا ادىلەتسىزدىككە توتەپ بەرۋدىڭ ۇزدىك ۇلگىسىن كورسەتتى. ول ٷي ىشىندەگىلەردەن دە، وزگە ادامداردان دا ادىلەتسىزدىك كورگەن. شىندىقتى قابىلداماعان جاقىندارى ونى ەسىنەن اداسقان دەگەن، ٴدىني جەتەكشىلەر بولسا يسانىڭ جىندارمەن بايلانىسى بار دەپ جالا جاپقان، ال ريم ساربازدارى ونى مازاقتاپ، قورلىق كورسەتىپ، تۇبىندە ٶلتىرىپ تىندى (مار. 3:21، 22؛ 14:55؛ 15:16—20، 35—37). يسا سول ادىلەتسىزدىكتىڭ بارلىعىنا توتەپ بەردى جانە ەشبىر جاعدايدا جاماندىققا جاماندىقپەن قايتارمادى. ٴبىز ودان نە ۇيرەنەمىز؟
يسا ادىلەتسىزدىككە توتەپ بەرۋدىڭ ەڭ ۇزدىك ۇلگىسىن قالدىردى (9، 10-ابزاستاردى قاراڭىز)
10. يسا ادىلەتسىزدىككە قالاي توتەپ بەردى؟ (پەتىردىڭ 1-حاتى 2:21—23)
10 پەتىردىڭ 1-حاتى 2:21—23 وقىڭىز a. يسا قاي كەزدە سويلەپ، قاي كەزدە ۇندەمەۋ كەرەكتىگىن جاقسى بىلگەن (مات. 26:62—64). ول وزىنە تاعىلعان ٵربىر جالعان ايىپقا جاۋاپ بەرىپ تۇرماعان (مات. 11:19). جاۋاپ بەرگەن كۇندە دە دورەكى سويلەپ، قورقىتىپ-ۇركىتپەگەن. «ٶزىن ٵدىل سوتتاۋشىعا سەنىپ تاپسىرعاندىقتان»، ول ۇستامدى بولعان. يسا «ەڭ باستىسى، ەحوبا ٴبارىن كورىپ تۇر ٵرى ۋاقىتى كەلگەندە ول ادىلدىك ورناتادى» دەپ سەنىمدى بولدى.
11. تىلىمىزبەن جاعدايدى ۋشىقتىرىپ جىبەرمەۋدىڭ قانداي جولدارى بار؟ (سۋرەتتەردى دە قاراڭىز.)
11 ادىلەتسىزدىككە كەزىككەندە تىلىمىزگە يە بولساق، يساعا ەلىكتەيمىز. كەيبىر بولماشى جاعدايلاردا ۇندەمەي قويا سالارمىز نەمەسە جاعدايدى ۋشىقتىرىپ جىبەرمەس ٷشىن ٴتىلىمىزدى تىستەپ قالارمىز (ۋاع. 3:7؛ جاق. 1:19، 20). ال باسقا ٴبىر جاعدايدا ٴجابىر كورىپ جاتقان ادامدى نە شىندىقتى قورعاۋ ٷشىن سويلەۋ كەرەك بولادى (ەل. ٸس. 6:1، 2). سويلەگەن كۇندە دە سابىرمەن ٵرى قۇرمەتپەن سويلەۋگە بارىنشا تىرىسۋىمىز كەرەك (پەت. 1-ح. 3:15) b.
ادىلەتسىز قينالعاندا، قاشان جانە قالاي سويلەيتىنىمىزگە مۇقيات بولساق، يساعا ەلىكتەيمىز (11، 12-ابزاستاردى قاراڭىز)
12. ٶزىمىزدى «ٵدىل سوتتاۋشىعا سەنىپ تاپسىرۋعا» نە جاتادى؟
12 ٶزىمىزدى «ٵدىل سوتتاۋشىعا سەنىپ تاپسىرعاندا» دا يساعا ەلىكتەيمىز. بىرەۋ بىزگە ادىلەتسىزدىك جاساعاندا نە ايىپتاپ جىبەرگەندە، ەحوبا بار شىندىقتى بىلەتىنىنە سەنىمدى بولامىز. بۇل سەنىمدىلىك بىزگە ادىلەتسىزدىككە توتەپ بەرۋگە كومەكتەسەدى، ويتكەنى تۇبىندە جاعدايدى ەحوبانىڭ ٶزى تۇزەتەتىنىن بىلەمىز. وسىلاي ماسەلەنى ەحوباعا تاپسىرساق، جۇرەگىمىزگە اشۋ مەن كەك ۇيالامايدى. ايتپەسە تۇيمەدەيدى تۇيەدەي قىلىپ جىبەرۋىمىز، قۋانىشتان ايىرىلۋىمىز، ٴتىپتى ەحوبامەن قارىم-قاتىناسىمىزعا سىزات ٴتۇسىرۋىمىز مۇمكىن (ٴزاب. 37:8).
13. ادىلەتسىزدىككە ٵرى قاراي دا توتەپ بەرۋگە نە كومەكتەسەدى؟
13 دەگەنمەن ٴبىز يساعا كەمەلدى تۇردە ەلىكتەي المايمىز. ايتەۋىر ٴبىر نارسەنى دۇرىس ايتپاي، دۇرىس ىستەمەي، ارتىنان وپىق جەيتىن كەزدەرىمىز بولىپ تۇرادى (جاق. 3:2). ال كەيدە وزگەلەردىڭ ادىلەتسىزدىگى جانىمىزعا تەرەڭ جارا سالىپ، وسى دۇنيەنىڭ سوڭىنا دەيىن ورنى جازىلماۋى مۇمكىن. مۇندايدا ەحوبا ٴسىزدىڭ قانداي كۇيدە جۇرگەنىڭىزدى جاقسى بىلەتىنىنە سەنىمدى بولىڭىز. ادىلەتسىز جاپا شەككەن يسا دا جانىڭىزدى جاقسى تۇسىنەدى (ەۆر. 4:15، 16). ەحوبا بىزگە ادىلەتسىزدىككە توتەپ بەرۋگە كومەكتەسۋ ٷشىن يسانىڭ ۇلگىسىنە قوسا، كيەلى كىتاپتاعى ٴتيىمدى كەڭەستەردى بەرگەن. ريمدىكتەرگە ارنالعان حاتتا سونداي كەڭەستەردىڭ ەكەۋى جازىلعان. قازىر سولاردى قاراستىرىپ كورەيىك.
«قۇدايدىڭ قاھارىنا قالدىرىڭدار»
14. كەك الۋدى «قۇدايدىڭ قاھارىنا قالدىرۋ» نەنى بىلدىرەدى؟ (ريمدىكتەرگە 12:19)
14 ريمدىكتەرگە 12:19 وقىڭىز. ەلشى پاۋىل: «كەك الماڭدار، ونى قۇدايدىڭ قاھارىنا قالدىرىڭدار»،— دەگەن. بۇل نەنى بىلدىرەدى؟ بۇل ادىلدىكتى قاشان جانە قالاي ورناتۋدى ەحوبانىڭ ەنشىسىنە قالدىرۋدى بىلدىرەدى. ادىلەتسىزدىكتەن جاپا شەككەن دجون دەگەن باۋىرلاس بىلاي دەيدى: «جاعدايدى ٶزىم رەتتەپ، ادىلدىك ورناتقىم كەلدى. ماعان ٸشىمدى ورتەپ بارا جاتقان وسى سەزىمدى باسۋ كەرەك بولدى. ٴسۇيتىپ، ريمدىكتەرگە 12:19 دىڭ ارقاسىندا ەحوبانى كۇتۋدى شەشتىم».
15. نەگە ەڭ دۇرىسى ەحوبانى كۇتۋ؟
15 جاعدايدى شەشۋدى ەحوبانىڭ ەنشىسىنە قالدىرعانىمىز وزىمىزگە جاقسى. ايتپەسە كۇيىپ-ٴپىسىپ، وزىمىزگە اۋىر جۇك ارتىپ العانداي بولامىز. ەحوبا بىزگە: «ادىلدىك ورناتۋدى ماعان قالدىر، بارلىعىن ٶزىم رەتتەيمىن»،— دەپ كومەگىن ۇسىنىپ جاتىر. ونىڭ «ەسەسىن مەن قايتارامىن» دەگەن ۋادەسىنە سەنسەك، ىشتەگى ىزا-كەكتەن ارىلامىز، ويتكەنى ەحوبا ەڭ دۇرىس جولمەن شەشەتىنىن بىلەمىز. جوعارىدا ايتىلىپ كەتكەن دجونعا وسى نارسە كومەك بولدى. «ەحوبانى كۇتسەم، ول وسى جاعدايدى مەنەن الدەقايدا جاقسى شەشەتىن بولادى»،— دەيدى ول.
«ٵردايىم جاقسىلىقپەن جەڭىپ شىق!»
16، 17. جاماندىقتى «ٵردايىم جاقسىلىقپەن جەڭۋگە» دۇعا قالاي كومەكتەسەدى؟ (ريمدىكتەرگە 12:21)
16 ريمدىكتەرگە 12:21 وقىڭىز. سونداي-اق پاۋىل ماسىحشىلەرگە جاماندىقتى «ٵردايىم جاقسىلىقپەن جەڭىپ شىعۋعا» كەڭەس بەرگەن. يسا دا تاۋداعى ۋاعىزىندا: «جاۋلارىڭدى ۇدايى جاقسى كورىڭدەر جانە وزدەرىڭدى قۋدالاعاندار ٷشىن دۇعا ەتە بەرىڭدەر»،— دەگەن (مات. 5:44). يسا وسى سوزدەرىن ٶزى ورىنداعان. ريمدىك ساربازدار باعاناعا شەگەلەگەندە ونىڭ قالاي قينالعانىن تالاي ەلەستەتكەن شىعارمىز. دەگەنمەن ونىڭ كورگەن ادىلەتسىزدىگى مەن قورلىعىنىڭ قانشالىقتى اۋىر بولعانىن ٴبىز ەشقاشان دا تولىق ەلەستەتە المايمىز.
17 ٴبىراق يسا ادىلەتسىزدىكتى جەڭىپ شىقتى. ول ٶزىن ازاپتاپ جاتقان ساربازداردى قارعاپ جىبەرمەدى، قايتا: «اكە، ولاردى كەشىرە كور، ويتكەنى نە ىستەپ جاتقاندارىن بىلمەيدى»،— دەپ دۇعا ەتتى (لۇقا 23:34). ٴبىز دە ٴجابىر كورسەتكەن ادام جايلى دۇعا ەتسەك، ىشتەگى ىزا-كەكتەن ارىلىپ، ٴتىپتى وعان دەگەن كوزقاراسىمىز دۇرىستالۋى مۇمكىن.
18. دۇعا البەرتو مەن دجونعا ادىلەتسىزدىككە توتەپ بەرۋگە قالاي كومەكتەستى؟
18 جوعارىدا ايتىلىپ كەتكەن ەكى باۋىرلاس دۇعانىڭ ارقاسىندا ادىلەتسىزدىككە توتەپ بەرگەن. البەرتو بىلاي دەيدى: «ماعان ادىلەتسىزدىك جاساعان ەر باۋىرلاستار جايلى دۇعا ەتتىم. بولعان جاعدايعا شىرمالماۋعا كومەكتەسشى دەپ ەحوبادان سان مارتە سۇرادىم». قۋانىشقا وراي، قازىر البەرتو ەحوباعا ادال قىزمەت ەتىپ ٴجۇر. ال دجون بولسا بىلاي دەيدى: «مەنى رەنجىتكەن ەر باۋىرلاس جايىندا قايتا-قايتا دۇعا ەتتىم. دۇعانىڭ ارقاسىندا باۋىرلاسىمدى سوتتاماي، جاعدايعا جان-جاقتى قاراي الدىم. جانىم دا تىنىشتىق تاپتى».
19. وسى دۇنيەنىڭ سوڭى كەلگەنشە نە ىستەۋىمىز كەرەك؟ (پەتىردىڭ 1-حاتى 3:8، 9)
19 وسى دۇنيەنىڭ سوڭى كەلگەنشە ايتەۋىر ٴبىر ادىلەتسىزدىككە كەزىگۋىمىز مۇمكىن. قانداي جاعداي بولماسىن، ەحوبادان دۇعادا كومەك سۇراۋدى دوعارمايىق. سونداي-اق ادىلەتسىزدىككە يسا سياقتى توتەپ بەرەيىك جانە كيەلى كىتاپ پرينسيپتەرىن قولدانا بەرەيىك. سوندا مىندەتتى تۇردە ەحوبانىڭ باتاسىن الامىز (پەتىردىڭ 1-حاتى 3:8، 9 وقىڭىز).
38-ٵن قۇداي ساعان كۇش بەرەدى
a ەلشى پەتىر ٶزىنىڭ 1-حاتىنىڭ 2، 3-تاراۋلارىندا تاسجۇرەك قوجايىندارىنىڭ نەمەسە سەنۋشى ەمەس كۇيەۋلەرىنىڭ قولىنان جاپا شەككەن I عاسىرداعى ماسىحشىلەر تۋرالى جازعان (پەت. 1-ح. 2:18—20؛ 3:1—6، 8، 9).
b jw.org تور بەكەتىنەن «سۇيىسپەنشىلىك ناعىز تىنىشتىق پەن تاتۋلىققا باستايدى» دەگەن ۆيدەونى قاراڭىز.
