47-زەرتتەۋ ماقالاسى
103-ٵن باعۋشىلار — قۇدايدىڭ سيى
ەر باۋىرلاستار، اقساقال بولۋعا ۇمتىلىپ ٴجۇرسىز بە؟
«ەگەر بىرەۋ باقىلاۋشى مىندەتىنە ۇمتىلسا، ونىڭ يگىلىكتى ٸستى قالاعانى»(ٴتىم. 1-ح. 3:1).
نەگىزگى وي
اقساقال بولۋ ٷشىن ەر باۋىرلاس جازبالارداعى قانداي تالاپتارعا ساي كەلۋ كەرەك ەكەنىن قاراستىرامىز.
1، 2. اقساقالدار اتقارىپ جۇرگەن «يگىلىكتى ىسكە» نە جاتادى؟
ەگەر ٴسىز قىزمەت كومەكشىسى بولساڭىز، اقساقالدارعا قاجەت كەيبىر قاسيەتتەر مەن قابىلەتتەردى دامىتىپ جۇرگەن شىعارسىز. اقساقالدار اتقارىپ جۇرگەن «يگىلىكتى ٸستى» ٴسىز دە اتقارعىڭىز كەلەر مە ەدى؟ (ٴتىم. 1-ح. 3:1).
2 ال اقساقالدار اتقاراتىن ىسكە نە جاتادى؟ اقساقالدار ۋاعىز ىسىنە جەتەكشىلىك ەتۋدە، باقتاشىلىق ساپارلار جاساۋدا جانە ٴتالىم بەرۋدە كوپ ەڭبەك ەتەدى. بۇعان قوسا، قاۋىمدى سوزدەرىمەن جانە ىستەرىمەن نىعايتىپ جۇرەدى. ولاردىڭ كيەلى كىتاپتا «سي رەتىندە» بەرىلگەن ادامدار دەپ اتالعانى بەكەر ەمەس (ەفەس. 4:8).
3. ەر باۋىرلاس اقساقال بولۋ ٷشىن نە قاجەت؟ (تىموتەگە 1-حات 3:1—7؛ تيتكە 1:5—9)
3 اقساقال بولۋ ٷشىن نە قاجەت؟ اقساقال بولۋ جۇمىسقا تۇرۋ سياقتى ەمەس. ادەتتە قاجەتتى قابىلەتتەرىڭىز بولسا، ٴسىزدى جۇمىسقا الا بەرەدى. ٴبىراق اقساقال بولۋ ٷشىن قابىلەتتەردىڭ بولعانى عانا جەتكىلىكسىز. ۋاعىزداۋ جانە ٴتالىم بەرۋ قابىلەتتەرىنەن بولەك، سىزگە تىموتەگە 1-حات 3:1—7 جانە تيتكە 1:5—9 تارماقتاردا (وقىڭىز) جازىلعان تالاپتارعا ساي كەلۋ كەرەك. بۇل ماقالادا اقساقالدارعا قاتىستى ماڭىزدى ٷش سالانى قاراستىرامىز: قاۋىمداعى جانە قاۋىمنان تىسقارى ادامدار الدىندا جاقساتتى بولۋ، جاقسى وتاعاسى بولۋ جانە قاۋىمعا قىزمەت ەتۋگە دايىن بولۋ.
ادامدار الدىندا جاقساتتى بولۋ
4. «ەش كىناراتسىز» بولۋ دەگەن نەنى بىلدىرەدى؟
4 اقساقال بولۋ ٷشىن ٴسىز «ەش كىناراتسىز» بولۋىڭىز كەرەك. بۇل دەگەن ٴجۇرىس-تۇرىسىڭىز ەشكىم ايىپ تاقپايتىنداي بولۋ كەرەك دەگەندى بىلدىرەدى. بۇدان بولەك، «قاۋىمنان تىسقارى ادامدار الدىندا جاقساتتى بولۋىڭىز ٴتيىس». ارينە، كۋاگەر ەمەس ادامدار ٴسىزدى نانىم-سەنىمدەرىڭىزگە بولا جامانداۋى مۇمكىن. ٴبىراق ەشكىم دە ٴسىزدىڭ جاقسى ادام ەكەنىڭىزگە، شىنشىل ەكەنىڭىزگە شەك كەلتىرمەۋ كەرەك (دان. 6:4، 5). بىلاي دەپ ويلانىپ كورىڭىز: «مەن قاۋىمداعى جانە قاۋىمنان تىسقارى ادامدار الدىندا جاقساتتىمىن با؟»
5. «ىزگىلىك اتاۋلىنى جاقسى كورەتىنىڭىزدى» قالاي كورسەتە الاسىز؟
5 ەگەر ٴسىز «ىزگىلىك اتاۋلىنى جاقسى كورەتىن» بولساڭىز، وندا وزگەلەردىڭ جاقسى جاقتارىن بايقاپ، سول ٷشىن ولاردى ماقتاپ جۇرەسىز. سونداي-اق وزگەلەرگە قۋانا-قۋانا كومەكتەسىپ، ٴتىپتى ارتىعىمەن ىستەۋگە دايىن بولاسىز (سال. 1-ح. 2:8). اقساقالداردىڭ ىزگىلىكتى جاقسى كورگەندەرى نەگە ماڭىزدى؟ ويتكەنى ولار ەحوبانىڭ قويلارىن باعۋعا، قاۋىمداعى تاپسىرمالارىن اتقارۋعا كوپ ۋاقىت جۇمسايدى (پەت. 1-ح. 5:1—3). ىزگىلىكتى سۇيگەندەرىنىڭ ارقاسىندا ولار مۇنىڭ ٴبارىن قۋانىشپەن ىستەيدى. اقساقالداردىڭ وزگەلەرگە قىزمەت ەتۋدەن الاتىن قۋانىشتارى بارعان كەز كەلگەن قۇرباندىقتارىنان الدەقايدا اسىپ تۇسەدى (ەل. ٸس. 20:35).
6. «قوناقجاي» بولۋعا نە جاتادى؟ (ەۆرەيلەرگە 13:2، 16؛ سۋرەتتى دە قاراڭىز.)
6 وزگەلەرگە، ٴتىپتى اسا قاتتى ارالاسپايتىن ادامدارعا جاقسىلىق جاساعاندا، ٶزىڭىزدىڭ «قوناقجاي» ەكەنىڭىزدى كورسەتەسىز (پەت. 1-ح. 4:9). ٴبىر سوزدىكتە قوناقجاي ادام بىلاي دەپ سيپاتتالعان: «ونىڭ ٷيىنىڭ دە، جۇرەگىنىڭ دە ەسىگى بوتەن ادامدار ٷشىن اشىق». بىلاي دەپ ويلانىپ كورىڭىز: «مەن قاۋىمعا كەلەتىن قوناقتارعا كوڭىل بولەتىن ادام رەتىندە تانىمالمىن با؟» (ەۆرەيلەرگە 13:2، 16 وقىڭىز). قوناقجاي ادام قوناقتاردىڭ بارىنە — جاعدايى ناشار باۋىرلاستارعا، اۋىر ەڭبەكتەنىپ جۇرگەن اۋداندىق باقىلاۋشىلار مەن بايانداماشىلارعا — جاقسىلىق جاساپ، قولدا بارىمەن بولىسەدى (مۇس. 1-ج. 18:2—8؛ ناق. س. 3:27؛ لۇقا 14:13، 14؛ ەل. ٸس. 16:15؛ ريم. 12:13).
ەرلى-زايىپتى اۋداندىق باقىلاۋشى مەن ايەلىنە قوناقجايلىلىق تانىتىپ جاتىر (6-ابزاستى قاراڭىز)
7. اقساقال «اقشاقۇمار» ەمەس ەكەنىن قالاي كورسەتە الادى؟
7 «اقشاقۇمار بولماۋ» دەگەن نەنى بىلدىرەدى؟ بۇل بار ويىڭىز اقشادا بولماۋ كەرەك دەگەن ٴسوز. باي بولساڭىز دا، كەدەي بولساڭىز دا، پاتشالىقتى ومىرىڭىزدە ٴبىرىنشى ورىنعا قوياسىز (مات. 6:33). ۋاقىتىڭىزدى، كۇش-قايراتىڭىزدى، قولدا بارىڭىزدى ەحوباعا عيبادات ەتۋ ٷشىن، وتباسىڭىزدى قامقورلاۋ ٷشىن، قاۋىمعا قىزمەت ەتۋ ٷشىن پايدالاناسىز (مات. 6:24؛ جوح. 1-ح. 2:15—17). ٶزىڭىزدى بىلاي دەپ تەكسەرىڭىز: «اقشاعا دەگەن كوزقاراسىم قانداي؟ ٶمىر ٴسۇرۋ ٷشىن قاجەتتى نارسەلەرىم بار بولسا، سونى قاناعات ەتىپ ٴجۇرمىن بە؟ الدە اقشا تابۋ مەن دۇنيە-مۇلىك جيناۋدى كوپ ويلاپ كەتتىم بە؟» (ٴتىم. 1-ح. 6:6، 17—19).
8. ٴسىزدىڭ «بارلىق جاعىنان بايسالدى» ٵرى «ۇستامدى» ەكەنىڭىز نەدەن كورىنەدى؟
8 ەگەر ٴسىز «بارلىق جاعىنان بايسالدى» ٵرى «ۇستامدى» بولساڭىز، ٵر نارسەنىڭ شەگىن بىلەسىز. ٸشىپ-جەۋگە، كيىنۋگە جانە دەمالۋعا كەلگەندە، ٴبىر شەكتەن ەكىنشى شەككە شىعىپ كەتپەيسىز. وسى دۇنيەدەگى ترەندتەردىڭ دە سوڭىنان قۋمايسىز (لۇقا 21:34؛ جاق. 4:4). بىرەۋ ىزاڭىزعا ٴتيىپ جاتسا، سابىرلى كۇيىڭىزدەن اينىمايسىز. سونداي-اق «ماسكۇنەم» نە ٴبىر ىشسە، كوپ ىشەدى دەگەن اتقا قالۋدان دا اۋلاق بولاسىز. بىلاي دەپ ويلانىپ كورىڭىز: «وزگەلەر ماعان قاراپ، بارلىق جاعىنان بايسالدى، ۇستامدى ادام دەپ ايتا الا ما؟»
9. اقساقال «ەستى» ٵرى «ٸس-ارەكەتىنە ۇقىپتى» بولۋ كەرەك دەگەن نەنى بىلدىرەدى؟
9 ەگەر «ەستى» بولساڭىز، جاعدايعا كيەلى كىتاپ پرينسيپتەرىنىڭ تۇرعىسىنان باعا بەرەسىز. سول پرينسيپتەر تۋرالى تەرەڭ وي جۇگىرتكەندە، تۇسىنىككە يە بولاسىز. اسىعىس تۇجىرىم جاسامايسىز، كەرىسىنشە، بارلىق جايتتى ەسكەرگەنىڭىزگە كوز جەتكىزەسىز (ناق. س. 18:13). وسىلاي ىستەگەننىڭ ارقاسىندا ەحوبانىڭ وي قالپىنا ساي كەلەتىن ەڭ دۇرىس دەگەن شەشىمدەردى قابىلدايسىز. ال «ٸس-ارەكەتىڭىزگە ۇقىپتى» بولعانىڭىز جيناقى بولۋعا، ٴبارىن ۋاقىتىلى ىستەۋگە كومەكتەسەدى. باسقالار ٴسىزدى سەنىم ارتۋعا تۇراتىن، نۇسقاۋلاردى ۇستاناتىن ادام دەپ بىلەتىن بولادى. جاقساتتى بولۋ ٷشىن اتالعان وسى قاسيەتتەرىن ٴبارىن تانىتۋ ماڭىزدى. ال ەندى جاقسى وتاعاسى بولۋ ٷشىن ەر باۋىرلاس قانداي تالاپتارعا ساي كەلۋ كەرەكتىگىن قاراستىرايىق.
جاقسى وتاعاسى بولۋ
10. «وتباسىنا جاقسى باسشىلىق ەتەتىن» ەر ادام قانداي بولادى؟
10 ەگەر وتاعاسى بولساڭىز، اقساقال بولۋ ٷشىن ٷي ىشىڭىزدەگىلەردىڭ ۇلگىلى بولعانى ماڭىزدى. سول ٷشىن ٴسىز «وتباسىنا جاقسى باسشىلىق ەتەتىن» ادام بولۋىڭىز كەرەك. وزگەلەر ٴسىزدى وتباسىن جاقسى كورەتىن، ٶز مىندەتتەرىن جاقسى اتقاراتىن ادام رەتىندە ٴبىلۋ كەرەك. وتباسىڭىزعا عيباداتپەن بايلانىستى ىستەرگە اتسالىسۋعا كومەكتەسۋ — ٴسىزدىڭ مىندەتىڭىز. جاقسى وتاعاسى بولۋ نەگە سونشالىقتى ماڭىزدى؟ ەلشى پاۋىل ايتپاقشى، «ەگەر ادام ٶز وتباسىنا باسشىلىق ەتۋدى بىلمەسە، قالايشا قۇداي قاۋىمىن قامقورلاي الادى؟» (ٴتىم. 1-ح. 3:5).
11، 12. ٷي ىشىندەگىلەردىڭ ٴجۇرىس-تۇرىسى ەر باۋىرلاستىڭ اقساقال بولۋ-بولماۋىنا قالاي اسەر ەتەدى؟ (سۋرەتتى دە قاراڭىز.)
11 ەگەر 18 گە تولماعان بالالارىڭىز بولسا، ولار «مويىنسۇنعىش ٵرى ٴتارتىپتى بولۋى كەرەك». ٴسىزدىڭ مىندەتىڭىز — ولارعا مەيىرىممەن ٴتالىم-تاربيە بەرۋ. ارينە، بالا بولعان سوڭ ولار وينايدى، كۇلەدى، جۇگىرەدى. ٴبىراق ولارعا جاقسى تاربيە بەرەر بولساڭىز، بالالارىڭىز ٴتىلالعىش، وزگەلەردى قۇرمەتتەي بىلەتىن، وزدەرىن دۇرىس ۇستايتىن ادام بولىپ وسەدى. بالالارىڭىزعا ەحوبامەن تىعىز قارىم-قاتىناس ورناتۋعا كومەكتەسۋ، ولارعا كيەلى كىتاپ پرينسيپتەرىنە ساي ٶمىر ٴسۇرۋدى ۇيرەتۋ جانە شومىلدىرۋ راسىمىنەن وتەمىن دەگەن ماقساتىنا جەتۋگە كومەكتەسۋ دە ٴسىزدىڭ مىندەتىڭىزگە كىرەدى.
12 «بالالارى جۇگەنسىز، بەتىمەن كەتكەن ەمەس، سەنۋشى بولسىن» دەگەن نەنى بىلدىرەدى؟ سەنۋشى بالاسى اۋىر كۇنا جاساسا، بۇل وتاعاسىنىڭ قاۋىمداعى قىزمەتىنە اسەر ەتەدى. ەگەر اكەسى بالاسىنىڭ ٴتالىم-تاربيەسىنە نەمقۇرايدى قارايتىن بولسا، ونىڭ اقساقال بولىپ قىزمەت ەتۋى ەكىتالاي (1996-جىلعى «كۇزەت مۇناراسىنىڭ» 15-قازانداعى سانىن (حانزۇشا) قاراڭىز، 21-ب.، 6، 7-ابز.).
وتاعالارى بالالارىنا قاسيەتتى قىزمەتتىڭ تۇرلەرىنە اتسالىسۋدى ۇيرەتەدى (11-ابزاستى قاراڭىز)
قاۋىمعا قىزمەت ەتۋ
13. «يلىككىش» ٵرى «ٶز دەگەنىن ىستەتپەيتىن» ادام ەكەنىڭىزدى قالاي كورسەتە الاسىز؟
13 بويىندا جاقسى قاسيەتتەر دامىتقان ەر باۋىرلاس — قاۋىم ٷشىن ناعىز سي. مىسالى، «يلىككىش» ادام جان-جاعىندا تاتۋلىق ورناتىپ جۇرەدى. ٴسىز دە يلىككىش بولعىڭىز كەلسە، وزگەلەردى تىڭداپ، ولاردىڭ پىكىرلەرىنە قۇلاق اسۋعا دايىن بولىڭىز. ٴسىز اقساقال بولىپ، اقساقالدار كەڭەسىندە وتىرسىز دەلىك. سول كەزدە اقساقالداردىڭ باسىم كوپشىلىگى قابىلداعان شەشىم كيەلى كىتاپقا قايشى كەلمەسە، ونى وڭايلىقپەن قولداي الاسىز با؟ «ٶز دەگەنىن ىستەتەتىن» بولماۋ كەرەك دەگەن ٴبارى ٴسىز ايتقانداي بولۋ ٷشىن ٶز دەگەنىڭىزدە تۇرىپ الماۋدى بىلدىرەدى. قايتا، ٴسىز كەڭەسشىلەردىڭ كوپ بولعانىنا قۋانىپ، باسقالارمەن اقىلداساسىز (مۇس. 1-ج. 13:8، 9؛ ناق. س. 15:22). سونىمەن قاتار «داۋكەس» نە «قىزبا» بولماۋىڭىز كەرەك. ٴسىزدىڭ ايتىسقانىڭىز، قاتتى-قاتتى سويلەگەنىڭىز ٴجون بولماس، قايتا، ويلانىپ، جۇمساقتىقپەن سويلەگەنىڭىز ماڭىزدى. ەگەر وزگەلەرمەن تاتۋ بولساڭىز، ٴتىپتى ەڭ سترەستى دەگەن جاعدايدا ٴبىرىنشى بولىپ ارەكەت ەتىپ، تاتۋلىق ساقتايسىز (جاق. 3:17، 18). جىلى دا جۇمساق سويلەگەنىڭىز وزگەلەردىڭ، ٴتىپتى قارسىلاستاردىڭ جۇرەگىن ٴجىبىتىپ، كوزقاراسىن وزگەرتۋى مۇمكىن (بي. 8:1—3؛ ناق. س. 20:3؛ 25:15؛ مات. 5:23، 24).
14. «سەنىمدى جاڭادان قابىلداعانداردان بولماسىن» جانە «ادال... بولۋى ٴتيىس» دەگەن سوزدەر نەنى بىلدىرەدى؟
14 اقساقال بولاتىن ادام «سەنىمدى جاڭا قابىلداعانداردان بولماۋ» كەرەك. بۇل شومىلدىرۋ راسىمىنەن وتكەنىڭىزگە كوپ جىل بولۋ كەرەك دەگەن ٴسوز ەمەس. ٴبىراق رۋحاني تولىسقان ٴماسىحشى بولۋ ٷشىن ۋاقىت كەرەك. اقساقال بولىپ تاعايىندالماس بۇرىن، ٴسىز يسا سياقتى كىشىپەيىل ەكەنىڭىزدى جانە كەز كەلگەن قىزمەتتى قۋانىشپەن اتقارا بەرەتىنىڭىزدى، سونداي-اق ەحوبا قاۋىمدا كوبىرەك جاۋاپكەرشىلىك تاپسىرعانعا دەيىن ونى شىداممەن كۇتۋگە دايىن ەكەنىڭىزدى كورسەتۋىڭىز كەرەك (مات. 20:23؛ ٴفىلىپ. 2:5—8). ەحوباعا ەتەنە جاقىن بولساڭىز، ونىڭ ٵدىل زاڭ-تالاپتارىن ورىنداساڭىز جانە ۇيىمنىڭ بەرىپ جاتقان باسشىلىقتارىن بەرىك ۇستانساڭىز، ٶزىڭىزدىڭ «ادال» ەكەنىڭىزدى كورسەتەسىز (ٴتىم. 1-ح. 4:15).
15. اقساقال مىندەتتى تۇردە كەرەمەت بايانداماشى بولۋ كەرەك پە؟ ٴتۇسىندىرىڭىز.
15 باقىلاۋشى مىندەتىنە ۇمتىلاتىندار «ٴتالىم بەرۋگە قابىلەتتى» بولۋ كەرەكتىگى جازبالاردا انىق ايتىلعان. بۇل دەگەن باياندامانى ٴتۇبىن ٴتۇسىرىپ ايتا الۋىڭىز كەرەك دەگەندى بىلدىرە مە؟ جوق، ولاي ەمەس. نەگىزىنەن، اقساقالداردىڭ كوبىسى كەرەمەت بايانداماشى بولماسا دا، ۋاعىزداعاندا، باقتاشىلىق ساپار جاساعاندا وتە جاقسى ٴتالىم بەرەدى (قورىنتتىقتارعا 1-حات 12:28، 29 بەن ەفەستىكتەرگە 4:11 سالىستىرىڭىز). دەسە دە ٴتالىم بەرۋ قابىلەتىڭىزدى شىڭداۋدى توقتاتپاڭىز. بۇل جاعىنان جاقسارا بەرۋ ٷشىن نە ىستەسەڭىز بولادى؟
16. تالىمگەر رەتىندە شەبەرلىگىڭىزدى شىڭداۋ ٷشىن نە ىستەسەڭىز بولادى؟ (سۋرەتتى دە قاراڭىز.)
16 «شىنايى سوزدەردەن اۋىتقىماۋ كەرەك». شەبەر تالىمگەر بولعىڭىز كەلسە، جۇرت الدىندا ٴتالىم بەرگەندە دە، جەكە كەڭەس بەرگەندە دە سوزدەرىڭىزدى قۇداي سوزىنە نەگىزدەۋىڭىز كەرەك. ول ٷشىن كيەلى كىتاپتى، ادەبيەتتەردى تىڭعىلىقتى زەرتتەڭىز (ناق. س. 15:28؛ 16:23). زەرتتەۋ بارىسىندا ادەبيەتتەردە كيەلى كىتاپ تارماقتارى قالاي تۇسىندىرىلەتىنىنە اسا دەن قويىڭىز. سوندا قاي تارماقتى قاي كەزدە قولدانۋ ورىندى بولاتىنىن جاقسى تۇسىنەسىز. تالىمدەرىڭىز تىڭداپ وتىرعان ادامداردىڭ جۇرەكتەرىنە جەتۋ ٷشىن كوپ كۇش سالعانىڭىز ماڭىزدى. جاقسى تالىمگەر بولۋدىڭ تاعى ٴبىر جولى — تاجىريبەلى اقساقالداردان كەڭەس سۇراپ، سولارعا قۇلاق اسۋ (ٴتىم. 1-ح. 5:17). اقساقال باۋىرلاستارىن «جىگەرلەندىرە الاتىن» ادام بولۋ كەرەك. ٴبىراق كەيدە كەڭەس بەرەتىن، ٴتىپتى «اشكەرەلەۋ»، ياعني تۇزەتۋ كەرەك جاعدايلار دا بولادى. ەكى جاعدايدا دا اقساقال جۇمساق بولۋدى ۇمىتپاۋ كەرەك. ەگەر مەيىرىمدى بولساڭىز، باۋىرلاستارىڭىزدى جاقسى كورسەڭىز جانە تالىمدەرىڭىزدى قۇداي سوزىنە نەگىزدەسەڭىز، ۇلى ۇستازىمىز يسا سياقتى شەبەر تالىمگەر بولاسىز (مات. 11:28—30؛ ٴتىم. 2-ح. 2:24).
قىزمەت كومەكشىسى قالاي ٴتالىم بەرۋ كەرەكتىگىن تاجىريبەلى اقساقالدان ۇيرەنىپ جاتىر. كەيىن ول اينانىڭ الدىندا تۇرىپ، بايانداماسىن ايتىپ جاتتىعىپ تۇر (16-ابزاستى قاراڭىز)
العا ۇمتىلا بەرىڭىز
17. ا) قىزمەت كومەكشىسى اقساقال بولۋ ٷشىن نە ىستەسە بولادى؟ ٵ) اقساقالدار ەر باۋىرلاستىڭ تاعايىندالۋىن قاراستىرعاندا، نەنى ەستە ۇستاۋ كەرەك؟ ( «ەر باۋىرلاستىڭ تاعايىندالۋىن قاراستىرعاندا، قاراپايىم بولىڭىز» دەگەن قورشاۋدى قاراڭىز.)
17 اقساقالدارعا قويىلاتىن تالاپتاردى كورىپ، كەيبىر قىزمەت كومەكشىلەرى «مەن ەشقاشان اقساقال بولا المايمىن» دەپ تارتىنشاقتاپ قالۋى مۇمكىن. ٴبىراق ەحوبا دا، ونىڭ ۇيىمى دا سىزدەن اتالعان قاسيەتتەردىڭ بارلىعىن كەمەلدى تۇردە تانىتادى دەپ كۇتپەيدى (پەت. 1-ح. 2:21). ونىڭ ۇستىنە، اقساقال بولۋعا قاجەتتى قاسيەتتەردى دامىتۋعا ەحوبانىڭ ٶزى قۇدىرەتتى رۋحىمەن كومەكتەسەدى (ٴفىلىپ. 2:13). وسى ماقالادا ايتىلعان قاسيەتتەردىڭ قايسىسىن جاقسارتقىڭىز كەلەر ەدى؟ سول جايلى ەحوباعا دۇعا ەتىڭىز، سول قاسيەت تۋرالى زەرتتەڭىز جانە اقساقالداردىڭ بىرىنەن سول قاسيەتتى قالاي جاقسارتۋعا بولاتىنىن سۇراپ كورىڭىز.
18. بارلىق قىزمەت كومەكشىلەرى قانداي ماقساتقا ۇمتىلسا بولادى؟
18 ٴبارىمىزدىڭ دە، اقساقال بولىپ قويعان باۋىرلاستاردىڭ دا وسى ماقالادا ايتىلعان قاسيەتتەردى دامىتا بەرگەندەرى دۇرىس (ٴفىلىپ. 3:16). قىزمەت كومەكشىسى بولىپ جۇرگەن ەر باۋىرلاستار، اقساقال بولۋعا ۇمتىلا بەرىڭىزدەر! ەحوباعا دۇعا ەتىپ، «ساعان كوبىرەك پايدالى بولۋىم ٷشىن مەنى ۇيرەتىپ، قالىپتاستىرا بەرشى» دەپ سۇراڭىز (يشايا 64:8). لايىم، اقساقال بولۋعا ۇمتىلىپ جۇرگەن سىزگە ەحوبا باتاسىن بەرسىن!
101-ٵن بىرلەسە قىزمەت ەتەيىك
