46-زەرتتەۋ ماقالاسى
49-ٵن ەحوبانىڭ جۇرەگىن قۋانتايىق
ەر باۋىرلاستار، قىزمەت كومەكشىسى بولۋعا ۇمتىلىپ ٴجۇرسىز بە؟
«العاننان گورى بەرگەن باقىتتى» (ەل. ٸس. 20:35).
نەگىزگى وي
شومىلدىرۋ راسىمىنەن وتكەن ەر باۋىرلاستاردى قىزمەت كومەكشىسى بولۋعا جانە تالاپتارعا ساي كەلۋگە تالپىندىرۋ.
1. ەلشى پاۋىل قىزمەت كومەكشىلەرىنە قالاي قاراعان؟
قاۋىمدا قىزمەت كومەكشىلەرىنىڭ ويىپ الار ورنى بار. ولاردىڭ ارقاسىندا قانشاما كوپ ىستەر تىنادى. ەلشى پاۋىل دا بۇنداي ادال ەر كىسىلەردى ەرەكشە باعالاعان. مىسالى، فىلىپىدەگى ماسىحشىلەرگە حات جازعاندا، ول اقساقالداردان بولەك، قىزمەت كومەكشىلەرىنە دە ارنايى سالەم جولداعان (ٴفىلىپ. 1:1).
2. لۋيس باۋىرلاس اتقارىپ جۇرگەن قىزمەتى جايلى قانداي ويدا؟
2 جاس دەمەي، جاسى ۇلكەن دەمەي، كوپتەگەن ەر باۋىرلاستار قىزمەت كومەكشىسى رەتىندە قۋانا قىزمەت اتقارىپ ٴجۇر. مىسالى، ديۆەن 18 جاسىندا قىزمەت كومەكشىسى بولىپ تاعايىندالعان. ال لۋيس باۋىرلاس 50 دەن اسقان شاعىندا قىزمەت كومەكشىسى بولعان. ول باۋىرلاسىمىز بىلاي دەيدى: «قاۋىمداعى باۋىرلاستارىما قىزمەت ەتۋ — مەن ٷشىن ۇلكەن مارتەبە! ولار مەنەن سۇيىسپەنشىلىكتەرىن ايامايدى، ەندى مەن دە ولاردى جاقسى كورەتىنىمدى كورسەتكىم كەلەدى!» بۇل سوزدەرمەن قىزمەت كومەكشىلەرىنىڭ كوبىسى كەلىسەتىنى ٴسوزسىز.
3. بۇل ماقالادا قانداي سۇراقتاردى قاراستىرامىز؟
3 شومىلدىرۋ راسىمىنەن وتكەن ەر باۋىرلاس، ەگەر ٵلى قىزمەت كومەكشىسى بولماساڭىز، بۇنى ماقسات ەتىپ قويا الاسىز با؟ بۇل ماقساتقا قانداي نيەتپەن ۇمتىلعانىڭىز ٴجون؟ جازبالارداعى قانداي تالاپتارعا ساي كەلۋىڭىز كەرەك؟ بۇل سۇراقتاردىڭ جاۋابىن وسى ماقالادا قاراستىرامىز. ٴبىراق الدىمەن قىزمەت كومەكشىلەرى قاۋىمدا قانداي مىندەتتەر اتقاراتىنىنا توقتالايىق.
قىزمەت كومەكشىلەرىنىڭ مىندەتتەرى قانداي؟
4. قىزمەت كومەكشىلەرى قانداي ىستەر اتقارادى؟ (سۋرەتتى دە قاراڭىز.)
4 قىزمەت كومەكشىلەرى شومىلدىرۋ راسىمىنەن وتكەن ەر باۋىرلاستار. ولار قاۋىمدا ٵرتۇرلى ىستەر اتقارىپ، اقساقالدارعا قولعابىس ەتۋ ٷشىن كيەلى رۋحپەن تاعايىندالادى. باۋىرلاستاردىڭ جەتكىلىكتى ادەبيەتتەرى مەن ۋاعىزدايتىن اۋماعى بولۋىنا وسى قىزمەت كومەكشىلەرى جاۋاپتى. ولار پاتشالىق سارايىن تازالاۋعا جانە كۇتىپ ۇستاۋعا اتسالىسادى. سونداي-اق ولار قاۋىمدا قىزمەت كورسەتۋشى بولادى جانە قاۋىم كەزدەسۋى كەزىندە اۋديو-ۆيدەو اپپاراتۋراسىندا قىزمەت كورسەتەدى. بايقاساق، ولار كوبىنەسە ٸس جۇزىندە قىزمەت كورسەتەدى. ٴبىراق قىزمەت كومەكشىلەرى ٴبىرىنشى كەزەكتە رۋحاني مىقتى ادامدار. ولار ەحوبانى جاقسى كورەدى جانە ونىڭ ٵدىل تالاپتارىنا ساي ٶمىر سۇرەدى، قاۋىمداعى باۋىرلاستارىن دا ەرەكشە جاقسى كورەدى (مات. 22:37—39). وسىنداي قىزمەت كومەكشىلەرىنىڭ قاتارىنا قوسىلۋ ٷشىن شومىلدىرۋ راسىمىنەن وتكەن ەر باۋىرلاستار نە ىستەي الادى؟
5. قىزمەت كومەكشىسى بولۋعا ۇمتىلىپ جۇرگەن باۋىرلاس نە ىستەي الادى؟
5 كيەلى كىتاپتا قىزمەت كومەكشىسى بولىپ تاعايىندالۋ ٷشىن قانداي تالاپتارعا ساي كەلۋ كەرەكتىگى ايتىلعان (ٴتىم. 1-ح. 3:8—10، 12، 13). ەگەر ٴسىز قىزمەت كومەكشىسى بولعىڭىز كەلسە، جازبالارداعى سول تالاپتاردى مۇقيات زەرتتەڭىز، كەيىن سولارعا ساي كەلۋ ٷشىن بارىنشا كۇش سالىڭىز. ٴبىراق بارىنەن بۇرىن، نە ٷشىن قىزمەت كومەكشىسى بولعىڭىز كەلەتىنىن انىقتاپ الىڭىز.
قانداي نيەتپەن ۇمتىلىپ ٴجۇرسىز؟
6. باۋىرلاستارىڭىز ٷشىن جاساعان ٵربىر ٸسىڭىزدىڭ ارتىندا نە تۇرۋ كەرەك؟ (ماتاي 20:28؛ سۋرەتتى دە قاراڭىز.)
6 ۇلگى تۇتاتىن ۇستازىمىز يسا ٴماسىح نە ىستەسە دە، ٴبارىن اكەسىنە جانە ادامدارعا دەگەن سۇيىسپەنشىلىكتىڭ قوزعاۋىمەن ىستەگەن. سۇيىسپەنشىلىگى بولعاندىقتان، يسا ايانباي ەڭبەك ەتۋگە جانە وزگەلەر ٷشىن ٴتىپتى ەڭ تومەن جۇمىستى دا اتقارۋعا دايىن بولعان (ماتاي 20:28 وقىڭىز؛ جوح. 13:5، 14، 15). ەگەر ٴسىزدىڭ دە جۇرەگىڭىزدەگى قوزعاۋشى كۇش سۇيىسپەنشىلىك بولسا، ەحوبا سىزگە مىندەتتى تۇردە باتاسىن بەرەدى. ول سىزگە جازبالارداعى تالاپتارعا ساي كەلىپ، قىزمەت كومەكشىسى بولۋعا كومەكتەسەدى (قور. 1-ح. 16:14؛ پەت. 1-ح. 5:5).
7. نەگە ەر باۋىرلاس اتاققۇمارلىقتان اۋلاق بولۋ كەرەك؟
7 ەشتەڭەگە قاراماي جوعارعى دارەجەگە ۇمتىلاتىندارعا وسى دۇنيەدە ادامدار قىزىعا قارايدى، ولاردى تابىستى دەپ ەسەپتەيدى. ٴبىراق ەحوبانىڭ ۇيىمىندا مۇلدەم ولاي ەمەس. يساعا ەلىكتەپ، سۇيىسپەنشىلىكتىڭ قوزعاۋىمەن ارەكەت ەتەتىن ەر باۋىرلاس اتاق-داڭق قۋىپ، وزگەلەردەن ۇستەم بولۋدى ويلامايدى. اتاققۇمارلىققا ۇمتىلاتىن ادام قاۋىمدا تاعايىندالاتىن بولسا، ول ەحوبانىڭ باعالى قويلارىن قامقورلاۋ ٷشىن جاسالاتىن قاراپايىم ىستەردى ىستەۋدەن باس تارتۋى مۇمكىن. ول بۇنداي قاراپايىم جۇمىستار قادىرىمدى تۇسىرەدى دەپ ويلاۋى مۇمكىن (جوح. 10:12). اتاق-داڭقتى كوكسەپ جۇرگەن كوكىرەك ادامدارعا ەحوبا باتاسىن بەرمەيدى (قور. 1-ح. 10:24، 33؛ 13:4، 5).
8. يسا ەلشىلەرىنە قانداي كەڭەس بەردى؟
8 يسانىڭ قاسىندا جۇرگەن شاكىرتتەرىنىڭ دە بۇرىس نيەتپەن جوعارى دارەجەگە ۇمتىلعان كەزدەرى بولعان. مىسالى، جاقىپ پەن جوحان يسادان پاتشالىعىندا قۇرمەتتى ورىنعا وتىرعىزۋدى سۇراعان. اتاق پەن داڭقتى ويلاپ تۇرعان بۇل شاكىرتتەرىن يسا قۇپتامادى. ول 12 ەلشىسىن تۇگەل شاقىرىپ الىپ، بىلاي دەدى: «كىم ۇلى بولعىسى كەلسە، سول سەندەرگە قىزمەتشى بولۋى ٴتيىس. كىم باستىلارىڭ بولعىسى كەلسە، سول بارىنە قۇل بولۋ كەرەك» (مار. 10:35—37، 43، 44). تاعايىندالۋلارعا دۇرىس نيەتپەن، ياعني وزگەلەرگە قىزمەت ەتسەم دەگەن ويمەن ۇمتىلاتىندار — قاۋىم ٷشىن ناعىز باتا (سال. 1-ح. 2:8).
ىقىلاسىڭىزدى قالاي ارتتىرساڭىز بولادى؟
9. وزگەلەرگە قىزمەت ەتۋگە دەگەن ىقىلاسىڭىزدى قالاي ارتتىرساڭىز بولادى؟
9 ەش كۇمانىمىز جوق، ٴسىز ەحوبانى جاقسى كورەسىز ، وزگەلەرگە دە قىزمەت ەتكىڭىز كەلەدى. سوعان قاراماستان قىزمەت كومەكشىلەرىنەن كۇتىلەتىن ىستەردى اتقارۋعا اسا ىقىلاسىڭىز بولماسا شە؟ ونداي كەزدە ىقىلاسىڭىزدى ارتتىرۋعا نە كومەكتەسەدى؟ باۋىرلاستارعا قىزمەت ەتۋ قانشالىقتى قۋانىش اكەلەتىنى جايلى ويلانىپ كورىڭىزشى. يسا: «العاننان گورى بەرگەن باقىتتى»،— دەگەن (ەل. ٸس. 20:35). ول ٶزى وسى سوزدەرگە ساي ٶمىر ٴسۇرىپ، وزگەلەرگە قىزمەت ەتۋدەن زور قۋانىش تاپقان. بۇنداي قۋانىشقا ٴسىز دە كەنەلە الاسىز.
10. وزگەلەرگە قىزمەت ەتۋ يساعا قۋانىش اكەلگەنى نەدەن كورىنەدى؟ (مارقا 6:31—34)
10 يسا وزگەلەرگە قۋانىشپەن قىزمەت ەتكەنىن كورسەتەتىن ٴبىر جاعدايدى قاراستىرايىق (مارقا 6:31—34 وقىڭىز). بىردە قاتتى شارشاعان يسا مەن ونىڭ ەلشىلەرى وڭاشا جەرگە بارىپ، دەمالماقشى بولادى. ٴبىراق يسادان ٴتالىم العىسى كەلگەن جۇرت سول جەرگە ولاردان بۇرىن جەتىپ الادى. يسا مەن ەلشىلەردىڭ «ٴتىپتى تاماقتانۋعا ۋاقىتى بولماعانىن» ەسكەرسەك، يسانىڭ جۇرتقا ٴتالىم بەرۋدەن باس تارتۋىنا بولار ەدى. يا بولماسا ٴبىر-ەكى عانا شىندىقتى ۇيرەتىپ، ولاردى تاراتىپ جىبەرۋىنە بولار ەدى. ٴبىراق يسا بۇل ادامداردى جاقسى كورگەندىكتەن، «ولاردى كوپ نارسەگە ۇيرەتە باستادى». ول ٴتىپتى «كەش تۇسكەنگە» دەيىن ٴتالىم بەردى (مار. 6:35). يسا بۇنىڭ ٴبارىن مىندەتتى بولعاندىقتان ەمەس، حالىقتى اياعاندىقتان ىستەدى. يسا ولاردى سۇيگەندىكتەن، ٴتالىم بەرۋدى ٶزى قالادى. وزگەلەرگە قىزمەت ەتۋ راسىمەن دە يساعا قۋانىش سيلاعان.
11. يسا وزگەلەرگە ٸس جۇزىندە قالاي قىزمەت كورسەتكەن؟ (سۋرەتتى دە قاراڭىز.)
11 يسا جۇرتقا ٴتالىم بەرىپ قانا قويماي، ولاردى تاندىك قاجەتتىلىكتەرىمەن دە قامداعان. بىردە يسا كەرەمەت تۇردە نان مەن بالىقتى كوبەيتىپ، كەيىن شاكىرتتەرىنە سولاردى حالىققا تاراتىپ بەرۋدى تاپسىردى (مار. 6:41). وسىلاي يسا شاكىرتتەرىنە وزگەلەرگە قىزمەت ەتۋدىڭ نە ەكەنىن ۇيرەتتى. سونداي-اق ول ٸس جۇزىندە قىزمەت كورسەتۋدىڭ — بۇگىندە قىزمەت كومەكشىلەرى اتقارىپ جۇرگەن قىزمەتتىڭ — قانشالىقتى ماڭىزدى ەكەنىن كورسەتتى. يسامەن قىزمەتتەسىپ، كەرەمەتتىڭ ارقاسىندا پايدا بولعان تاماقتى حالىق «تويىپ العانشا» تاراتقان شاكىرتتەردىڭ قۋانىشىندا شەك بولماعانى انىق (مار. 6:42). بۇل — يسا وزگەلەردىڭ مۇددەسىن وزىنىكىنەن جوعارى قويعان جالعىز جاعداي ەمەس. ول جەردە وتكەن بۇكىل ٶمىرىن وزگەلەرگە قىزمەت ەتۋ ٷشىن ارناعان (مات. 4:23؛ 8:16). يسا وزگەلەرگە ٴتالىم بەرۋدەن دە، كىشىپەيىلدىلىكپەن قامدارىن جاساۋدان دا كوپ قۋانىش پەن قاناعات العان. ەش كۇمانىڭىز بولماسىن، قىزمەت كومەكشىسى بولىپ، وزگەلەرگە جانقيارلىقپەن قىزمەت ەتكەندە، ٴسىز دە تۋرا وسىنداي قۋانىشقا كەنەلەسىز.
12. نەگە قاۋىمعا ەش پايدام جوق دەپ ويلاماۋىمىز كەرەك؟
12 اسا ٴبىر كەرەمەت قابىلەتىم جوق دەپ ويلاساڭىز، كوڭىلىڭىز تۇسپەسىن. ويتكەنى بويىڭىزدا قاۋىمعا پايدالى بولاتىن قاسيەتتەرىڭىزدىڭ بار ەكەنى انىق. قورىنتتىقتارعا 1-حات 12:12—30 تارماقتاردا جازىلعان پاۋىلدىڭ سوزدەرىن وقىپ، كەيىن ەحوباعا دۇعا ەتىپ، سول سوزدەردىڭ ٴمانىن تۇسىنۋگە كومەكتەسۋىن سۇراڭىز. بۇل سىزگە ەحوبانىڭ ٵربىر قىزمەتشىسى سياقتى ٴسىزدىڭ دە قاۋىمدا ٶز ورنىڭىز بار ەكەنىن انىق كورۋگە كومەكتەسەدى. قىزمەت كومەكشىسى بولۋ ٷشىن قويىلاتىن تالاپتارعا ازىرگە ساي كەلمەسەڭىز، ەش بەرىلمەڭىز. ەحوباعا جانە باۋىرلاستارعا قىزمەت ەتۋ ٷشىن قولىڭىزدان نە كەلەدى، سونى جاساي بەرىڭىز. اقساقالدار ٴسىزدى بايقاپ، جاعدايىڭىز بەن قابىلەتىڭىزگە ساي كەلەتىن تاپسىرمالار بەرەتىنىنە سەنىمدى بولىڭىز (ريم. 12:4—8).
13. تاعايىندالعان ەر باۋىرلاستارعا قويىلاتىن تالاپتارعا قاتىستى نەنى ۇمىتپاۋىمىز كەرەك؟
13 مىنا جايلى دا ويلانىپ كورىڭىز: نەگىزى، قىزمەت كومەكشىلەرىنە قويىلعان تالاپتار بارلىق ماسىحشىلەرگە قويىلادى. مىسالى، ەحوباعا جاقىنداي ٴتۇسۋ، بەرۋدەن قۋانىش الۋ جانە ەحوباعا ۇنايتىنداي ٶمىر ٴسۇرۋ بارىمىزگە قويىلاتىن تالاپتار. دەمەك، قىزمەت كومەكشىلەرىنە قاجەت قاسيەتتەردىڭ ٴبىرازى سىزدە دە بار دەگەن ٴسوز. قازىر قىزمەت كومەكشىسى بولۋعا ۇمتىلىپ جۇرگەن ەر باۋىرلاستارعا قويىلاتىن كەيبىر تالاپتارعا توقتالىپ وتەيىك.
قىزمەت كومەكشىسى بولۋ ٷشىن نە ىستەۋ كەرەك؟
14. «ساليقالى بولۋ» دەگەن نەنى بىلدىرەدى؟ (تىموتەگە 1-حات 3:8—10، 12)
14 تىموتەگە 1-حات 3:8—10، 12 ٴنشى تارماقتاردا (وقىڭىز) جازىلعان كەيبىر تالاپتاردى قاراستىرايىق. قىزمەت كومەكشىسى «ساليقالى بولۋ» كەرەك. بۇل تىركەس «قۇرمەتكە لايىقتى بولۋ»، «سيلى بولۋ»، «قادىرلى بولۋ» دەپ تە اۋدارىلادى. ساليقالى بولۋ دەگەن ەشقاشان كۇلمەۋ كەرەك، ازىلدەمەۋ كەرەك دەگەندى بىلدىرمەيدى (ۋاع. 3:1، 4). بۇل جۇكتەلگەن مىندەتتەرگە جاۋاپكەرشىلىكپەن قاراۋدى بىلدىرەدى. ەگەر ٴسىز باستاعان ٸسىڭىزدى سوڭىنا دەيىن جەتكىزىپ، تياناقتى اتقاراتىن بولساڭىز، باۋىرلاستار ٴسىزدىڭ سەنىم ارتۋعا بولاتىن ادام ەكەنىڭىزدى كورىپ، قۇرمەتتەيتىن بولادى.
15. «ەكىجۇزدى بولماۋ» جانە «اشكوزدىكپەن ارام ولجا ىزدەمەۋ» دەگەن نەنى بىلدىرەدى؟
15 «ەكىجۇزدى بولماۋ» دەگەن شىنشىل ٵرى سەنىمدى ادام بولۋدى بىلدىرەدى. بۇنداي ادام سوزىندە تۇرادى جانە وزگەلەردى الدامايدى (ناق. س. 3:32). ال «اشكوزدىكپەن ارام ولجا ىزدەمەۋ» دەگەن ىسكەرلىك ماسەلەلەردە جانە اقشامەن بايلانىستى ىستەردە شىنشىل بولۋدى بىلدىرەدى. ونداي ادام اقشا تابۋ ٷشىن ٴبىر سەنىمدەگى باۋىرلاستارىن پايدالانبايدى.
16. ا) «شاراپقا قۇمار بولماۋ» دەگەن نەنى بىلدىرەدى؟ ٵ) «تازا ار-ۇجدانعا» يە بولۋ دەگەن نەنى بىلدىرەدى؟
16 قىزمەت كومەكشىسى «شاراپقا قۇمار بولماۋ» كەرەك. بۇل شامادان تىس ىشپەۋدى، سونداي-اق ٴبىر ىشسە، كوپ ىشەتىن ادام دەگەن اتقا قالماۋدى بىلدىرەدى. ال «تازا-ار ۇجدانعا» يە بولۋ دەگەن قۇدايدىڭ زاڭ-تالاپتارىنا ساي ٶمىر ٴسۇرۋدى بىلدىرەدى. كەمەلسىز بولساڭىز دا، قۇدايمەن تاتۋ قارىم-قاتىناسىڭىزدىڭ ارقاسىندا جۇرەگىڭىزدە تىنىشتىق بولادى.
17. «بۇل ىسكە ساي كەلەتىندىگى سىنالسىن» دەگەن سوزدەر نەنى بىلدىرەدى؟ (تىموتەگە 1-حات 3:10؛ سۋرەتتى دە قاراڭىز.)
17 «بۇل ىسكە ساي كەلەتىندىگى سىنالسىن» دەگەن سوزدەر ٶزىڭىزدىڭ جاۋاپكەرشىلىگى مول، سەنىم ارتۋعا تۇراتىن ادام ەكەنىڭىزدى كورسەتۋىڭىز كەرەكتىگىن بىلدىرەدى. اقساقالدار قانداي دا ٴبىر تاپسىرما بەرسە، ولاردىڭ نۇسقاۋلارىن جانە ۇيىمنان كەلگەن باسشىلىقتاردى مۇقيات ۇستانىڭىز. مىندەتىڭىزگە نە كىرەتىنىن جانە بەرىلگەن تاپسىرمانى قاشان اياقتاۋ كەرەكتىگىن جاقسىلاپ ۇعىپ الىڭىز. بەرىلگەن ٵربىر تاپسىرمانى ۇقىپتى ورىندايتىن بولساڭىز، قاۋىمداعىلار ٴسىزدىڭ بارعان سايىن جاۋاپكەرشىلىكتى ادامعا اينالىپ جاتقانىڭىزدى بايقايدى. ال سىزدەر، اقساقالدار، شومىلدىرۋ راسىمىنەن وتكەن ەر باۋىرلاستاردى ۇيرەتۋدى ەستەن شىعارماڭىزدار (تىموتەگە 1-حات 3:10 وقىڭىز). قاۋىمىڭىزدا 10—14 جاس ارالىعىنداعى نە ودان دا كىشى شومىلدىرۋ راسىمىنەن وتكەن ەر باۋىرلاستار بار ما؟ ولاردىڭ جەكە زەرتتەۋ ادەتى قالىپتاسقان با؟ قاۋىمعا جاقسى دايىندالىپ كەلە مە؟ قاۋىمدا ٴجيى تۇسىنىكتەمە بەرە مە؟ جۇيەلى تۇردە قىزمەتكە شىعىپ تۇرا ما؟ وسىلاردىڭ ٴبارىن ىستەپ جۇرگەن بولسا، ولارعا جاسىنا، جاعدايىنا ساي كەلەتىن تاپسىرمالار بەرىپ قويىڭىزدار. وسىلاي ولاردىڭ قىزمەت كومەكشىسى بولۋعا «ساي كەلەتىندىگى سىنالادى». ۋاقىت وتە ولار 20 جاسقا تولماي-اق قىزمەت كومەكشىسى بولۋعا دايىن بولادى.
18. «ايىپسىز بولۋ» دەگەن نەنى بىلدىرەدى؟
18 «ايىپسىز بولۋ» دەگەن ادامعا اۋىر كۇنا جاسادى دەگەن ايىپ تاعىلماۋ كەرەكتىگىن بىلدىرەدى. ارينە، كەيدە ماسىحشىلەرگە جالعان ايىپ تاعىلۋى مۇمكىن. ٴتىپتى يسانىڭ وزىنە دە جالا جابىلعان جانە ول ٸزباسارلارىنا دا جالا جابىلاتىنىن ايتىپ كەتكەن (جوح. 15:20). ٴبىراق يسا سياقتى ٴتۇزۋ ٴجۇرىپ-تۇرساڭىز، قاۋىمدا جاقساتقا يە بولاسىز (مات. 11:19).
19. «ٴبىر عانا ايەلى بار... ادام بولسىن» دەگەن سوزدەر نەنى بىلدىرەدى؟
19 قىزمەت كومەكشىسى «ٴبىر عانا ايەلى بار... ادام بولۋ» كەرەك. ەحوبا و باستا نەكە ٴبىر ەر مەن ٴبىر ايەلدەن عانا تۇرۋ كەرەك دەپ شەشكەندىكتەن، نەكەڭىز سوعان ساي بولۋى ٴتيىس (مات. 19:3—9). ٴماسىحشى ەر ادام ەشقاشان جىنىستىق ازعىندىققا بارماۋ كەرەك (ەۆر. 13:4). بۇل عانا ەمەس، ول ٴتىپتى بوتەن ايەلگە ورىنسىز كوڭىل بولۋدەن اۋلاق بولىپ، ومىرلىك جارىنا ادال بولۋ كەرەك (ٵيۇپ 31:1).
20. «ٷي ىشىنە جاقسى باسشىلىق ەتەتىن ادام» قانداي بولادى؟
20 «قىزمەت كومەكشىسى... بالا شاعاسى مەن ٷي ىشىنە جاقسى باسشىلىق ەتەتىن ادام بولسىن». وتاعاسى بولساڭىز، وتباسىنداعى مىندەتتەرىڭىزگە ۇلكەن جاۋاپكەرشىلىكپەن قاراڭىز. وتباسىلىق عيباداتتى جىبەرمەي وتكىزىپ تۇرىڭىز. ٷي ىشىڭىزدەگى ٵربىر اداممەن مۇمكىندىگىنشە ٴجيى قىزمەتكە شىعىڭىز. بالالارىڭىزعا ەحوبامەن جەكە قارىم-قاتىناس دامىتۋعا كومەكتەسىڭىز (ەفەس. 6:4). ٷي ىشىنە باس-كوز بولا بىلگەن ادام قاۋىمعا دا جەتەكشىلىك ەتە الادى (ٴتىم. 1-ح. 3:5).
21. ٵلى دە قىزمەت كومەكشىسى بولماساڭىز، نە ىستەسەڭىز بولادى؟
21 ەر باۋىرلاستار، ەگەر ٵلى دە قىزمەت كومەكشىسى بولىپ تاعايىندالماعان بولساڭىز، وتىنەمىز، وسى ماقالانى دۇعا ەتە وتىرىپ قاراستىرىڭىز. قىزمەت كومەكشىلەرىنە قويىلاتىن تالاپتاردى زەرتتەڭىز، كەيىن سول تالاپتارعا ساي كەلۋگە بارىنشا كۇش سالىڭىز. ەحوبانى، باۋىرلاستارىڭىزدى قانشالىقتى جاقسى كورەتىنىڭىز جايلى ويلانىپ كورىڭىز. ولارعا قىزمەت ەتۋگە دەگەن ىقىلاسىڭىزدى ارتتىرىڭىز (پەت. 1-ح. 4:8، 10). سوندا رۋحاني وتباسىڭىزعا قىزمەت ەتۋدەن قۋانىش تاباسىز. لايىم، قىزمەت كومەكشىسى بولۋعا ۇمتىلىپ جۇرگەن سىزگە ەحوبا مولىنان باتاسىن توكسىن! (ٴفىلىپ. 2:13).
17-ٵن «قالايمىن»
a سۋرەت سيپاتتاماسى: سول جاعىندا يسا شاكىرتتەرىنە كىشىپەيىلدىلىكپەن قىزمەت ەتىپ جاتىر؛ وڭ جاعىندا قىزمەت كومەكشىسى قاۋىمداعى ٴبىر قارت ەر باۋىرلاسقا قولعابىس ەتىپ ٴجۇر.