42-زەرتتەۋ ماقالاسى
103-ٵن باعۋشىلار — قۇدايدىڭ سيى
«سي رەتىندەگى ادامدارعا» العىس ٴبىلدىرىڭىز
«ول زاڭعار بيىككە كوتەرىلىپ، ... سي رەتىندە ادامدار بەردى» (ەفەس. 4:8).
نەگىزگى وي
قىزمەت كومەكشىلەرى، اقساقالدار، اۋداندىق باقىلاۋشىلار بىزگە قالاي كومەكتەسىپ جۇرگەنىن جانە سول ادال ەر كىسىلەرگە ريزاشىلىعىمىزدى قالاي بىلدىرە الاتىنىمىزدى كورەمىز.
1. يسا بىزگە بەرىپ جاتقان سيلاردىڭ كەيبىرى قانداي؟
ەڭ جومارت دەگەن ادامداردىڭ ەشقايسىسى يساعا جەتپەيدى. جەردە بولعان كەزىندە يسا ادامدارعا كومەكتەسۋ ٷشىن كۇش-قۋاتىن اياماعان (لۇقا 9:12—17). ونىڭ جاساعان جاقسىلىعىنىڭ ەڭ كەرەمەتى — ٴبىز ٷشىن ٶمىرىن قيعانى (جوح. 15:13). قايتا تىرىلگەننەن كەيىن دە يسا بىزگە كومەكتەسۋىن دوعارعان جوق. يسا ۋادەسىنە ساي اكەسىنەن سۇراعاندىقتان، ٴتالىم الىپ، جۇبانىش تابا الۋىمىز ٷشىن ەحوبا بىزگە كيەلى رۋحىن توگىپ جاتىر (جوح. 14:16، 17، ٴسىلت.؛ 16:13). سونداي-اق قاۋىم كەزدەسۋلەرى ارقىلى يسا بۇكىل جەرجۇزىندە قالاي شاكىرت دايىنداۋ كەرەكتىگىن بىزگە ۇيرەتۋدە (مات. 28:18—20).
2. ەفەستىكتەرگە 4:7، 8 دە ايتىلعان «سي رەتىندەگى ادامدارعا» كىمدەر جاتادى؟
2 يسانىڭ بەرگەن تاعى ٴبىر سيىنا توقتالايىق. ەلشى پاۋىل يسا كوككە كوتەرىلگەننەن كەيىن، ونىڭ «سي رەتىندە ادامدار» بەرگەنى تۋرالى جازعان (ەفەستىكتەرگە 4:7، 8 وقىڭىز). پاۋىل ٶز حاتىندا تۇسىندىرگەندەي، يسا بۇل ادامداردى قاۋىمدى ٵرتۇرلى جولدارمەن قولداۋ ٷشىن بەرگەن (ەفەس. 1:22، 23؛ 4:11—13). بۇگىندە سول «سي رەتىندەگى ادامدارعا» قىزمەت كومەكشىلەرى، قاۋىم اقساقالدارى جانە اۋداندىق باقىلاۋشىلار جاتادى a. ارينە، بۇل ادامدار كەمەلسىز، سوندىقتان ولار دا قاتەلەسەدى (جاق. 3:2). ٴبىراق يەمىز يسا ٴماسىح بىزگە كومەكتەسۋ ٷشىن سول ادامداردى قولدانادى. ولار يسانىڭ بىزگە بەرگەن سيلارى.
3. «سي رەتىندەگى ادامداردى» ٴبارىمىز قالاي قولداي الاتىنىمىزدى مىسالمەن ٴتۇسىندىرىڭىز.
3 يسا «سي رەتىندەگى ادامداردى» قاۋىمدى نىعايتۋ ماقساتىندا تاعايىنداعان (ەفەس. 4:12). بۇل ادامدارعا وسى ماڭىزدى مىندەتتەرىن اتقارۋعا ٴبىز دە قولعابىس ەتە الامىز. مىناداي مىسال كەلتىرەيىك. كەيبىر باۋىرلاستار پاتشالىق سارايىن سوعۋعا تىكەلەي اتسالىسادى، ال باسقالارى وسى ىسكە قولداۋ كورسەتىپ، تاماق ٴپىسىرۋ، باۋىرلاستاردى تاسۋ سياقتى باسقا دا قوسىمشا ىستەردى اتقارادى. تۋرا سولاي، ٴبارىمىز دە سوزىمىزبەن، ىسىمىزبەن قىزمەت كومەكشىلەرىنە، قاۋىم اقساقالدارى مەن اۋداندىق باقىلاۋشىلارعا قولداۋ كورسەتە الامىز. قازىر بۇل ادامداردىڭ ايانباي ەڭبەكتەنىپ جۇرگەنىنىڭ ارقاسىندا ٴبىز قانداي يگىلىك كورىپ جۇرگەنىمىزدى قاراستىرايىق. سونداي-اق ولاردىڭ وزدەرىنە جانە سول سيلاردى بەرىپ وتىرعان يساعا قالاي ريزاشىلىق بىلدىرە الاتىنىمىزدى كورەمىز.
«وزگەلەرگە كومەكتەسەتىن» قىزمەت كومەكشىلەرى
4. ٴبىرىنشى عاسىردا قىزمەت كومەكشىلەرى قانداي قىزمەت اتقارعان؟
4 ٴبىرىنشى عاسىردا كەيبىر ەر باۋىرلاستار قىزمەت كومەكشىسى بولىپ تاعايىندالعان (ٴتىم. 1-ح. 3:8). پاۋىل «وزگەلەرگە كومەكتەسەتىن» ادامدار جايلى جازعاندا، وسى قىزمەت كومەكشىلەرى جايلى ايتقان كورىنەدى (قور. 1-ح. 12:28). اقساقالدار ەش الاڭداماي ٴتالىم بەرىپ، باقتاشىلىق ساپار جاساي الۋى ٷشىن بۇل قىزمەت كومەكشىلەرى ٵرتۇرلى ماڭىزدى ىستەردى اتقارسا كەرەك. مىسالى، ولار جازبالاردىڭ كوشىرمەلەرىن جاساۋعا كومەكتەسكەن بولۋى مۇمكىن، يا بولماسا كوشىرمە جاساۋعا قاجەتتى زاتتاردى ساتىپ الۋمەن اينالىسقان بولۋى مۇمكىن.
5. بۇگىندە قىزمەت كومەكشىلەرى قانداي ىستەر اتقارادى؟
5 قاۋىمىڭىزداعى قىزمەت كومەكشىلەرى قانداي ىستەر اتقارىپ جۇرگەنىن بىلەسىز بە؟ (پەت. 1-ح. 4:10). ولار قاۋىم قارجىسىمەن جانە ۋچاسكەلەرمەن بايلانىستى ىستەردى اتقارادى. باۋىرلاستاردىڭ الاتىن ادەبيەتتەرى بولۋ ٷشىن ولار تاپسىرىس بەرەدى. اۋديو-ۆيدەو اپپاراتۋراسىمەن بايلانىستى قىزمەتتەردى اتقارادى. كەيدە قاۋىمدا قىزمەت كورسەتۋشى بولادى. سونداي-اق پاتشالىق سارايىن كۇتىپ ۇستاۋعا قولعابىس ەتەدى. وسى ىستەردىڭ ٴبارى اتقارىلماسا، قاۋىمىمىز لايىقتى تۇردە ٶتىپ، ۋاعىز ٸسىمىز تارتىپپەن جۇرمەس ەدى (قور. 1-ح. 14:40). بۇعان قوسا، كەيبىر قىزمەت كومەكشىلەرى «ماسىحشىلىك ٶمىرىمىز بەن قىزمەتىمىز» كەزدەسۋىندە تاپسىرمالارمەن شىعادى. سونداي-اق كوپشىلىككە ارنالعان باياندامالار ايتادى. قىزمەت كومەكشىلەرى توپ باقىلاۋشىسىنىڭ كومەكشىسى رەتىندە دە تاعايىندالۋى مۇمكىن. ال كەيدە قابىلەتتى قىزمەت كومەكشىلەرى اقساقالدارمەن بىرگە باقتاشىلىق ساپارلار جاسايدى.
6. قىزمەت كومەكشىلەرىنىڭ ەرەن ەڭبەگىن نەگە قاتتى باعالايمىز؟
6 قىزمەت كومەكشىلەرى اتقارىپ جۇرگەن ىستەردىڭ قاۋىمداعىلار قانداي يگىلىگىن كورىپ ٴجۇر؟ بوليۆيادا تۇراتىن بەۆەرلي b ەسىمدى ايەل باۋىرلاس بىلاي دەيدى: «قىزمەت كومەكشىلەرىنىڭ ارقاسىندا قاۋىمنىڭ بار پايداسىن كورىپ ٴجۇرمىن. مەن قاۋىمدا ٵن ايتامىن، تۇسىنىكتەمە بەرەمىن، باياندامالار تىڭدايمىن، ەكراندا شىققان ۆيدەولار مەن سۋرەتتەردەن ساباق الىپ وتىرامىن. بۇنىڭ ٴبارى سولاردىڭ ەڭبەگىنىڭ ارقاسى عوي. ولار قاۋىمنىڭ قاۋىپسىزدىكتە ٶتۋىن قامدايدى. سونداي-اق قاۋىمعا ۆيدەوكونفەرەنسيا ارقىلى قوسىلاتىنداردىڭ جاعدايىن جاسايدى. ال قاۋىمنان كەيىن تازالىق جۇمىستارىنا قاتىسىپ، باس-كوز بولادى. ساداقا جاشىگىنە تۇسكەن قارجىنى ەسەپتەيدى. سونداي-اق قانداي ادەبيەتتەر قاجەت ەكەنىنە كوز جەتكىزەدى. بۇل باۋىرلاستارىما سونداي ريزامىن!» كۇيەۋى اقساقال بولىپ قىزمەت ەتەتىن كولۋمبياداعى لەسلي ەسىمدى باۋىرلاسىمىز بىلاي دەيدى: «كۇيەۋىم قىزمەت كومەكشىلەرىنىڭ ارقاسىندا ٴبىرتالاي ىستەردى تىندىرىپ ٴجۇر. ولار بولماعاندا، ىستەرىنەن قولى بوساماي، كۇيەۋىمدى كورمەي كەتەتىن ەدىم. ٵردايىم كومەكتەسۋگە دايىن وسى باۋىرلاستارعا شەكسىز ريزامىن!» ٴسىز دە وسى باۋىرلاستاردىڭ ايتقان سوزدەرىمەن كەلىسەتىن شىعارسىز (ٴتىم. 1-ح. 3:13).
7. قىزمەت كومەكشىلەرىنە قالاي العىس بىلدىرسەك بولادى؟ (سۋرەتتى دە قاراڭىز.)
7 بالكىم، ٴبىز قىزمەت كومەكشىلەرىنە ىشتەي ريزا شىعارمىز. ٴبىراق كيەلى كىتاپ ٴبىزدى: «العىس بىلدىرىڭدەر»،— دەپ شاقىرادى (قول. 3:15). فينليانديادا قىزمەت ەتەتىن كريستوفەر ەسىمدى اقساقال قالاي ريزاشىلىق بىلدىرەتىنىن ايتىپ بىلاي دەدى: «مەن قاۋىمداعى قانداي دا ٴبىر قىزمەت كومەكشىسىنە اشىقحات نە حابارلاما جازىپ، تارماق كەلتىرەمىن. سونداي-اق ول مەنى قالاي جىگەرلەندىرگەنىن نەمەسە ونىڭ قىزمەتىن نە ٷشىن باعالايتىنىمدى ايتامىن». جاڭا كالەدونيادا تۇراتىن پاسكال مەن جاەل قىزمەت كومەكشىلەرى ٷشىن ٴجيى دۇعا ەتىپ تۇرادى ەكەن. «سوڭعى كەزدەرى ٶتىنىپ، جالبارىنىپ، ريزاشىلىق ٴبىلدىرىپ ايتقان دۇعالارىمىزدىڭ ٴبارى قاۋىمداعى تاعايىندالعان ەر باۋىرلاستار جايلى بولىپ ٴجۇر»،— دەيدى پاسكال. ەحوبا بۇنداي دۇعالاردى تىڭدايدى جانە ونىڭ پايداسىن بۇكىل قاۋىم كورەدى (قور. 2-ح. 1:11).
«اۋىر ەڭبەكتەنىپ» جۇرگەن اقساقالدار
8. نەگە ەلشى پاۋىل ٴبىرىنشى عاسىرداعى اقساقالداردى «اۋىر ەڭبەكتەنىپ» جۇرگەندەر دەپ اتاعان؟ (سالونيكالىقتارعا 1-حات 5:12، 13)
8 ٴبىرىنشى عاسىرداعى اقساقالدار قاۋىمنىڭ قامى ٷشىن اۋىر ەڭبەكتەنگەن (سالونيكالىقتارعا 1-حات 5:12، 13 وقىڭىز؛ ٴتىم. 1-ح. 5:17). ولار قاۋىمعا «جەتەكشىلىك ەتكەن»، ياعني قاۋىم كەزدەسۋلەرىن وتكىزگەن جانە اقساقالدار كەڭەسى بولىپ شەشىمدەر قابىلداعان. سونداي-اق ولار قاۋىمدى قورعاۋ ٷشىن باۋىرلاستارعا ناقتى، سويتسە دە سۇيىسپەنشىلىكپەن «اقىل-كەڭەستەر بەرىپ» وتىرعان (سال. 1-ح. 2:11، 12؛ ٴتىم. 2-ح. 4:2). ارينە، بۇل ەر كىسىلەر وتباسىلارىن اسىراۋ ٷشىن جانە وزدەرىنىڭ رۋحاني كۇيلەرىن مىقتى ەتىپ ساقتاۋ ٷشىن دە كوپ كۇش سالعان (ٴتىم. 1-ح. 3:2، 4؛ تيت. 1:6—9).
9. بۇگىندە اقساقالدار اتقارىپ جۇرگەن ىستەردىڭ كەيبىرى قانداي؟
9 بۇگىندە اقساقالداردىڭ اتقاراتىن ىستەرى وتە كوپ. ولار ىزگى حاباردىڭ ۋاعىزداۋشىلارى (ٴتىم. 2-ح. 4:5). ولار زور قۇلشىنىسپەن ۋاعىز ىسىنە جەتەكشىلىك ەتەدى. ٶز اۋماقتارىندا ۋاعىز ٸسىن ۇيىمداستىرادى جانە باۋىرلاستارعا ٴتيىمدى ۋاعىزداپ، ٴتالىم بەرۋدى ۇيرەتەدى. سونداي-اق ولار مەيىرىمدى، ەشكىمدى ٴبولىپ-جارمايتىن تورەشىلەر. ٴماسىحشى اۋىر كۇنا جاساپ قويعاندا، اقساقالدار وعان ەحوبامەن قارىم-قاتىناسىن قالپىنا كەلتىرۋگە كومەكتەسەدى. دەسە دە قاۋىمنىڭ تازا ساقتالۋىنا دا مۇقيات بولادى (قور. 1-ح. 5:12، 13؛ عال. 6:1). اقساقالدار ٴبىرىنشى كەزەكتە باعۋشىلار (پەت. 1-ح. 5:1—3). ولار جاقسى دايىندالعان جانە جازبالارعا نەگىزدەلگەن باياندامالار ايتادى. قاۋىمدا ٵربىر باۋىرلاستى جاقسىراق بىلۋگە كۇش سالادى جانە باقتاشىلىق ساپارلار جاسايدى. بۇعان قوسا، كەيبىر اقساقالدار پاتشالىق سارايلارىن سوعۋ نە جوندەۋ جۇمىستارىنا قاتىسادى، كونگرەستەردى ۇيىمداستىرادى، «اۋرۋحانالارمەن بايلانىس كوميتەتتەرىندە» جانە «ناۋقاستارعا كومەك كورسەتۋ توپتارىندا» قىزمەت ەتەدى. ولاردىڭ بۇدان بولەك باسقا تاپسىرمالارى بولۋى مۇمكىن. راسىمەن دە، اقساقالدار ٴبىزدىڭ قامىمىز ٷشىن اۋىر ەڭبەكتەنىپ ٴجۇر!
10. ٴبىز ايانباي ەڭبەك ەتىپ جۇرگەن اقساقالدارىمىزدى نە ٷشىن باعالايمىز؟
10 ەحوبا باعۋشىلاردىڭ ٴبىزدى قامقورلايتىنىن جانە ٴبىز «ەشتەڭەدەن ۇرەيلەنبەيتىنىمىزدى، شوشىنبايتىنىمىزدى» الدىن الا ايتقان (ەرم. 23:4). فينليانديادا تۇراتىن دجواننا باۋىرلاسىمىز اناسى قاتتى ناۋقاستانىپ قالعان كەزدە وسى سوزدەردىڭ راستىعىنا كوزى جەتكەن. ول بىلاي دەيدى: «نەگىزى، مەن وزگەلەرگە ىشتەگى سەزىمدەرىمدى ايتۋعا قينالامىن. ٴبىراق ٶزىم اسا جاقسى تانىمايتىن قاۋىمداعى اقساقالىم مەنى شىداممەن تىڭداعاندا، وعان ۋايىمدارىمدى ايتىپ، بولىسە باستادىم. ول مەنىمەن بىرگە دۇعا ەتتى، ەحوبانىڭ مەنى جاقسى كورەتىنىنە سەندىردى. ونىڭ ماعان ناقتى نە ايتقانى ەسىمدە جوق. ٴبىراق قورقىنىش، ۋايىمىم سەيىلىپ، ٶزىمدى جاقسى سەزىنگەنىم ەسىمدە. ونى ماعان ٴدال كەرەك كەزىندە جىبەرگەن ەحوبا ەكەنىنە كۇمانىم جوق». ٴسىز قاۋىمداعى اقساقالداردىڭ قانداي كومەگىن كورىپ ٴجۇرسىز؟
11. اقساقالدارعا قالاي ريزاشىلىق بىلدىرسەك بولادى؟ (سۋرەتتى دە قاراڭىز.)
11 ەحوبا ٴبىزدىڭ اقساقالدارعا «ەڭبەكتەرى ٷشىن» العىس بىلدىرگەنىمىزدى قالايدى (سال. 1-ح. 5:12، 13). فينليانديادا تۇراتىن حەنريتتا ەسىمدى ايەل باۋىرلاسىمىز بىلاي دەيدى: «اقساقالداردىڭ بىزگە كومەكتەسۋگە اسىق بولىپ تۇرعانى ولاردىڭ ۋاقىتتارى مەن كۇشتەرى بىزدىكىنەن كوپ، ومىرلەرىندە ەشقانداي قيىندىقتارى جوق دەگەندى بىلدىرمەيدى. مەن كەيدە اقساقالدارعا جاي عانا بىلاي دەيمىن: «بىلەسىڭ بە، سەن وتە جاقسى اقساقالسىڭ. وسىنى بىلسەڭ ەكەن دەيمىن». تۇركيادا تۇراتىن سەرا ەسىمدى ايەل باۋىرلاس بولسا بىلاي دەيدى: «اقساقالدارعا دا العا قاراي جۇرە بەرۋ ٷشىن «جانارماي» كەرەك. سوندىقتان ٴبىز ولارعا اشىقحات جازا الامىز، يا بولماسا بىرگە تاماق ىشۋگە، قىزمەت ەتۋگە شاقىرساق بولادى». ٴسىزدىڭ دە قاۋىمدا ەڭبەگى ٷشىن ەرەكشە ريزا بولىپ جۇرگەن اقساقالىڭىز بار ما؟ بار بولسا، وعان العىس ٴبىلدىرۋدىڭ مۇمكىندىكتەرىن ىزدەڭىز (قور. 1-ح. 16:18).
تاعايىندالعان ەر باۋىرلاستار العا قاراي جۇرە بەرۋ ٷشىن ولارعا «جانارماي قۇيىپ» وتىرىڭىز (7، 11، 15-ابزاستاردى قاراڭىز)
قاۋىمداردى نىعايتاتىن اۋداندىق باقىلاۋشىلار
12. قاۋىمداردى نىعايتۋ ٷشىن يسا تاعى كىمدەردى بەرگەن؟ (سالونيكالىقتارعا 1-حات 2:7، 8)
12 يسا بەرگەن «سي رەتىندەگى ادامدارعا» جاتاتىن تاعى ٴبىر توپتى قاراستىرايىق. يسانىڭ جەتەكشىلىگىمەن يەرۋساليمدەگى اقساقالدار پاۋىلدى، بارنابا مەن وزگەلەردى ارالاۋشى باقىلاۋشىلار رەتىندە قاۋىمدارعا جىبەرىپ وتىرعان (ەل. ٸس. 11:22). نە سەبەپتى؟ قىزمەت كومەكشىلەرى مەن اقساقالدار سياقتى، بۇل تاعايىندالعان باۋىرلاستاردىڭ دا مىندەتى قاۋىمداردى نىعايتۋ بولعان (ەل. ٸس. 15:40، 41). بۇل ەر كىسىلەر وزگەلەرگە ٴتالىم بەرىپ، جىگەرلەندىرۋ ٷشىن جايلى ومىرلەرىن تاستاعان، كەيدە ٴتىپتى باستارىن قاتەرگە تىككەن (سالونيكالىقتارعا 1-حات 2:7، 8 وقىڭىز).
13. اۋداندىق باقىلاۋشىلار قانداي ىستەر اتقارادى؟
13 اۋداندىق باقىلاۋشىلار ۇنەمى كوشىپ-قونىپ جۇرەدى. كەيدە ولار ٴبىر قاۋىمنان ەكىنشى قاۋىمعا جەتكەنشە جۇزدەگەن شاقىرىم جول جۇرەدى. اپتا سايىن اۋداندىق باقىلاۋشىلار بىرنەشە بايانداما ايتادى، ۋاعىزداۋعا ارنالعان كەزدەسۋلەر جۇرگىزەدى، باقتاشىلىق ساپارلار جاسايدى، ٸزاشارلارعا ارنالعان كەزدەسۋ وتكىزەدى، اقساقالدارمەن كەزدەسەدى. سونداي-اق اۋداندىق جانە ايماقتىق كونگرەستەردى ۇيىمداستىرادى، سول كونگرەستەردە باياندامالار ايتادى. ولار ٸزاشارلارعا ارنالعان مەكتەپتە ٴتالىم بەرەدى، اۋدانداعى ىزاشارلارمەن ارنايى كەزدەسۋ وتكىزەدى. سونداي-اق فيليال تاپسىرعان ٵرتۇرلى جۇمىستاردى، كەيدە شۇعىل ىستەردى اتقارادى.
14. اۋداندىق باقىلاۋشىلاردىڭ اۋىر ەڭبەگىن نە ٷشىن باعالايمىز؟
14 سي رەتىندە بەرىلگەن اۋداندىق باقىلاۋشىلاردىڭ قىزمەتىنىڭ ارقاسىندا قاۋىم قانداي يگىلىك كورىپ ٴجۇر؟ تۇركيادا تۇراتىن ٴبىر ەر باۋىرلاس بىلاي دەيدى: «اۋداندىق باقىلاۋشىنىڭ ٵر ساپارىنان كەيىن، باۋىرلاستارعا كومەكتەسۋگە دەگەن ىقىلاسىم ارتا تۇسەدى. مەن كوپتەگەن اۋداندىق باقىلاۋشىلاردى كورگەنمىن، ٴبىراق ەشقايسىسى دا قولى تيمەيتىن، سەنىمەن سويلەۋگە ۋاقىتى جوقتاي اسەر قالدىرعان ەمەس». جوعارىدا ايتىلعان دجواننا اۋداندىق باقىلاۋشىمەن قىزمەتكە شىققان، ٴبىراق ۇيلەرىندە بولماعاندىقتان بىردە-ٴبىر اداممەن سويلەسە الماعان. ول بىلاي دەيدى: «سوندا دا سول كۇن مەن ٷشىن ەستە قالعان ەرەكشە كۇن بولدى. سول كەزدەرى ەكى اپكەم باسقا قالاعا كوشىپ كەتىپ، ولاردى ساعىنىپ جۇرگەن ەدىم. ول مەنى جىلى سوزدەرىمەن جۇباتىپ، ەحوباعا قىزمەت ەتۋ ٷشىن ٴبىر-بىرىمىزدەن جىراقتا جۇرگەنىمىز ۋاقىتشا ەكەنىن، ال جۇماقتا ماڭگى بىرگە بولا الاتىنىمىزدى ەسىمە سالدى». اۋداندىق باقىلاۋشىلاردىڭ كوبىسى وسىلاي سۇيىسپەنشىلىك، قامقورلىق تانىتىپ، باۋىرلاستاردىڭ جۇرەگىنەن ەرەكشە ورىن العان (ەل. ٸس. 20:37—21:1).
15. ا) جوحاننىڭ 3-حاتى 5—8 تارماقتارعا ساي، اۋداندىق باقىلاۋشىلارعا ريزاشىلىعىمىزدى قالاي بىلدىرسەك بولادى؟ (سۋرەتتى دە قاراڭىز.) ٵ) تاعايىندالعان باۋىرلاستاردىڭ ايەلدەرىن نە ٷشىن باعالاۋىمىز كەرەك جانە باعالايتىنىمىزدى قالاي كورسەتسەك بولادى؟ (« ولاردىڭ ايەلدەرىن ۇمىتپاڭىز» دەگەن قورشاۋدى قاراڭىز.)
15 ەلشى جوحان گايدى ساپارمەن كەلگەن باۋىرلاستارعا قوناقجايلىلىق تانىتۋعا تالپىندىرىپ، ولاردى «قۇدايعا ۇنايتىنداي ەتىپ شىعارىپ سالۋدى» ايتقان (جوحاننىڭ 3-حاتى 5—8 وقىڭىز). اۋداندىق باقىلاۋشىلارىمىزدى قولداۋدىڭ جولدارى — ولاردى تاماققا شاقىرۋ، ۋاعىزداۋعا ارنالعان كەزدەسۋلەرگە قاتىسۋ. ولارعا تاعى قالاي ريزاشىلىق بىلدىرۋگە بولاتىنىن جوعارىدا ايتىلعان لەسليدىڭ سوزدەرىنەن كورۋگە بولادى. ول بىلاي دەيدى: «مەن ەحوباعا دۇعا ەتىپ، ولارعا بار قاجەتىن بەرشى دەپ سۇرايمىن. سونداي-اق كۇيەۋىم ەكەۋىمىز ولارعا حات جازىپ، ساپارلارى بىزگە قالاي كومەكتەسكەنىن ايتىپ بەرەمىز». ەسىڭىزدە بولسىن، اۋداندىق باقىلاۋشىلار تەمىر ەمەس، ولار دا ٴبىز سياقتى ەت پەن سۇيەكتەن جارالعان. ولار دا اۋىرادى، ۋايىمدايدى، كەيدە ٴتىپتى كوڭىلدەرى تۇسەدى. ٴسىزدىڭ جىلى سوزدەرىڭىز، قاراپايىم سيلىعىڭىز ولاردىڭ ايتقان دۇعالارىنا جاۋاپ بولۋى مۇمكىن (ناق. س. 12:25).
«سي رەتىندەگى ادامدار» ٵلى دە قاجەت
16. ناقىل سوزدەر 3:27 گە ساي، ەر باۋىرلاستار قانداي سۇراقتار جايلى ويلانسا بولادى؟
16 «سي رەتىندەگى ادامدار» بىزگە دۇنيەجۇزى بويىنشا ٵلى دە كوپ قاجەت. ەگەر ٴسىز شومىلدىرۋ راسىمىنەن وتكەن ەر باۋىرلاس بولساڭىز، سول «سي رەتىندەگى ادامداردىڭ» قاتارىنا قوسىلۋعا مۇمكىندىگىڭىز بار ما؟ (ناقىل سوزدەر 3:27 وقىڭىز). قىزمەت كومەكشىسى بولعىڭىز كەلە مە؟ باۋىرلاستاردىڭ قامىن كوبىرەك جاساۋ ٷشىن اقساقال بولۋعا ۇمتىلا الاسىز با؟ c قاجەتتى وزگەرىستەر جاساپ، پاتشالىقتى جاريالاۋشىلارعا ارنالعان مەكتەپكە ٶتىنىش تولتىرۋعا جاعدايىڭىز كەلە مە؟ سول مەكتەپتەن وتسەڭىز، يسا ٴسىزدى قازىرگىدەن دە كوبىرەك قولدانا الار ەدى. ال ەگەر ٶزىڭىزدى ٵلى دايىن ەمەسپىن دەپ ويلاساڭىز، ەحوباعا دۇعا ەتىڭىز. وزىڭىزگە تاپسىرىلعان كەز كەلگەن ٸستى جاقسى اتقارۋعا كيەلى رۋحى ارقىلى كومەكتەسۋىن سۇراڭىز (لۇقا 11:13؛ ەل. ٸس. 20:28).
17. «سي رەتىندەگى ادامدار» پاتشامىز يسا ٴماسىح جايلى نەنى ايقىن كورسەتەدى؟
17 يسا «سي رەتىندە» بەرگەن ەر باۋىرلاستارعا قاراپ، سوڭعى كۇندەرى ٴبىزدى جەتەلەپ وتىرعان يسانىڭ ٶزى ەكەنىن ايقىن كورەمىز (مات. 28:20). ٴبىزدىڭ قامىمىزدى ويلاپ، قابىلەتتى ەر باۋىرلاستار تاعايىنداعان ٴسۇيۋشى دە جومارت ٵرى قامقور پاتشامىزعا وتە ريزامىز، سولاي ەمەس پە؟! ەندەشە، ٴبىز ٷشىن ايانباي ەڭبەك ەتىپ جۇرگەن ەر باۋىرلاستارعا ريزاشىلىق ٴبىلدىرۋدىڭ مۇمكىندىكتەرىن ىزدەيىك. سول ٷشىن ەحوباعا دا ريزاشىلىق ٴبىلدىرۋدى ۇمىتپايىق. ويتكەنى ول — بارلىق «يگى دە كەمەلدى سيدىڭ» قاينارى (جاق. 1:17).
99-ٵن سانسىز كوپ باۋىرلاستار
a «سي رەتىندەگى ادامدارعا» باسقارۋشى كەڭەستىڭ مۇشەلەرى، باسقارۋشى كەڭەستىڭ كومەكشىلەرى، فيليال كوميتەتىنىڭ مۇشەلەرى جانە باسقا قىزمەت تۇرلەرىن اتقارىپ جۇرگەن ەر باۋىرلاستار دا جاتادى.
b كەيبىر ەسىمدەر وزگەرتىلگەن.
c قىزمەت كومەكشىسى نە اقساقال بولامىن دەگەن ماقساتىڭىزعا قالاي جەتۋگە بولاتىنىن ٴبىلۋ ٷشىن، 2024-جىلعى «كۇزەت مۇناراسىنىڭ» قاراشا ايىنداعى سانىنان «ەر باۋىرلاستار، قىزمەت كومەكشىسى بولۋعا ۇمتىلىپ ٴجۇرسىز بە؟» جانە «ەر باۋىرلاستار، اقساقال بولۋعا ۇمتىلىپ ٴجۇرسىز بە؟» دەگەن ماقالالاردى قاراڭىز.
