1-زەرتتەۋ ماقالاسى
قۇداي ٴسوزى شىندىق ەكەنىنە سەنىمدى بولىڭىز
2023-جىلدىڭ تارماعى: «سەنىڭ ٴسوزىڭ — تۇپتامىرىمەن شىندىق» (ٴزاب. 119:160).
96-ٵن قۇدايدىڭ بەرگەن قازىناسى
اڭداتپا a
1. بۇگىندە كوپ ادام كيەلى كىتاپقا نەلىكتەن سەنبەيدى؟
ادامداردىڭ بۇگىندە بارار جەرى، باسار تاۋى قالماعان. كىمگە سەنەرلەرىن دە بىلمەيدى، ويتكەنى ولار بەدەل تۇتقان ۇكىمەت باسىلارى، عالىمدار مەن كاسىپكەرلەردىڭ ٴبارى بىردەي حالىقتىڭ قامىن شىنداپ ويلامايدى. جۇرت ٶزىن ٴماسىحشىمىز دەيتىن ٴدىنباسىلارىنا دا سەنۋدەن قالعان، سوندىقتان ولاردىڭ قولىنداعى كيەلى كىتاپقا دا سىن كوزبەن قارايدى.
2. ٴزابۇر 119:160 قا ساي، بىزدە قانداي سەنىمدىلىك بولۋ كەرەك؟
2 الايدا ٴبىز، ەحوبانىڭ قىزمەتشىلەرى، مىناعان نىق سەنىمدىمىز: ەحوبا — «شىندىقتىڭ قۇدايى»، ٵرى ول بىزگە تەك جاقسىلىق تىلەيدى (ٴزاب. 31:5 ٴسىلت.؛ يشايا 48:17). سونداي-اق ٴبىز كيەلى كىتاپتا جازىلعان سوزدەرگە دە سەنەمىز، ويتكەنى قۇدايدىڭ ٴسوزى — «تۇپتامىرىمەن شىندىق» b (ٴزابۇر 119:160 وقىڭىز). كيەلى كىتاپتى زەرتتەۋشى ٴبىر عالىم بىلاي دەپ وتە ورىندى ايتقان: «قۇدايدىڭ اۋزىنان شىققان ٵربىر ٴسوزى — اقيقات، ايتقاندارىنىڭ ٴبارى بۇلجىماي ىسكە اسادى. قۇداي حالقى بۇعان كامىل سەنىمدى، ويتكەنى ولار سول ٴسوزدى ايتقان قۇدايدىڭ وزىنە سەنىمدى».
3. بۇل ماقالادا نە جايلى قاراستىرامىز؟
3 ەندەشە، قۇداي ٴسوزىنىڭ اقيقات ەكەنىنە قالاي باسقالاردىڭ دا كوزىن جەتكىزە الامىز؟ نەگىزى، كيەلى كىتاپقا سەنۋگە بولاتىنىنا ٷش سەبەپ بار. ولار: كيەلى كىتاپتىڭ تۋرالىعى، پايعامبارلىقتاردىڭ ورىندالۋى جانە كيەلى كىتاپتىڭ ادامدى وزگەرتە الاتىن كۇشى. قازىر وسى ۇشەۋىنە جەكە-جەكە توقتالايىق.
كيەلى كىتاپ ٴماتىنىنىڭ مازمۇنى بۇرمالانباي جەتكەن
4. كيەلى كىتاپتىڭ وزگەرمەي جەتكەنىنە كەيبىر ادامدار نەگە سەنبەيدى؟
4 ەحوبا قۇداي كيەلى كىتاپتى ٶزىنىڭ 40 شاقتى ادال قىزمەتشىسىنە جازدىرعان. الايدا سول ٴتۇپنۇسقا جازبالاردىڭ ەشقايسىسى ٴبىزدىڭ كۇنىمىزگە دەيىن جەتپەگەن، تەك كوشىرمەلەرىنىڭ كوشىرمەلەرى عانا ساقتالعان. سوندىقتان دا كەيبىر ادامدار ٴتۇپنۇسقاداعى ٴماتىننىڭ ٴبىزدىڭ كەزىمىزگە دەيىن قاز-قالپىندا جەتكەنىنە كۇماندانادى. ەندەشە، كيەلى كىتاپتىڭ ەش وزگەرمەي، تۋرا جەتكەنىنە قالاي كوز جەتكىزە الامىز؟
قۇداي ٴسوزى تۋرا ساقتالۋ ٷشىن ەۆرەي جازبالارىنىڭ بىلىكتى كوشىرمەشىلەرى ونى اسقان ۇقىپتىلىقپەن كوشىرگەن (5-ابزاستى قاراڭىز)
5. ەۆرەي جازبالارىنىڭ كوشىرمەسى قالاي جاسالعان؟ (مۇقاباداعى سۋرەتتى قاراڭىز.)
5 كيەلى رۋحىمەن جازدىرعان مالىمەتتى ساقتاپ قالۋ ٷشىن ەحوبا جازبالاردى كوشىرىپ وتىرۋدى بۇيىرعان. مىسالى، يسرايل پاتشالارىنىڭ مىندەتىنە زاڭنىڭ كوشىرمەسىن جاساۋ كىرگەن. ال لەۋىلىكتەر زاڭدى حالىققا ۇيرەتىپ وتىرۋعا تاعايىندالعان (مۇس. 5-ج. 17:18؛ 31:24—26؛ نەح. 8:7). كەيىننەن يسرايل حالقى بابىلدان ورالعان سوڭ، ارنايى بىلىكتى كوشىرمەشىلەر ەۆرەي جازبالارىنىڭ كوشىرمەسىن كوپتەپ جاساي باستادى (ەزرا 7:6 ٴسىلت.). ولار ٶز ىستەرىن مۇقيات اتقارعان. بارلىعىن دالمە-ٴدال كوشىرگەندەرىنە سەنىمدى بولۋ ٷشىن، ولار سوزدەردى عانا ەمەس، ٴتىپتى ارىپتەرىنە دەيىن ساناي باستاعان. دەگەنمەن كەمەلسىزدىكتىڭ كەسىرىنەن كەتىپ قالعان مايدا-شۇيدە قاتەلىكتەر بولعان. ٴبىراق ٴبىر ٴماتىننىڭ ٴبىرتالاي كوشىرمەسى بولعاندىقتان، ونىڭ قاي جەرىندە قاتە كەتكەنىن تاۋىپ الۋعا بولادى. قالاي دەيسىز عوي؟
6. كيەلى كىتاپتىڭ كوشىرمەلەرىندە كەتكەن قاتەلەردى قالاي انىقتاۋعا بولادى؟
6 عالىمدار كيەلى كىتاپتىڭ كوشىرمەلەرىنىڭ قاي جەرىندە قانداي قاتە كەتكەنىن انىقتاۋدىڭ ٴتيىمدى جولىن تاپتى. بۇل قانداي ٵدىس ەكەنىن ٴتۇسىنۋ ٷشىن ٴبىر مىسال كەلتىرەيىك. ٴبىر پاراق ٴماتىندى 100 ادام قولمەن كوشىرىپ شىقتى دەلىك. ٴبىراق بىرەۋى بولماشى قاتە جىبەرىپ قويادى. ال ول قاتەنى انىقتاۋدىڭ ٴبىر جولى — ونى قالعان 99 كوشىرمەمەن سالىستىرىپ شىعۋ. سول سياقتى، عالىمدار كيەلى كىتاپتىڭ كوپتەگەن قولجازبالارىن سالىستىرا وتىرىپ، قاي جەردە قانداي ٴسوز ٴتۇسىپ قالعانىن، قانداي قاتە كەتكەنىن انىقتاي الادى.
7. كوشىرمەشىلەردىڭ تۋرا كوشىرگەنىنە قانداي دالەل بار؟
7 ال ەندى، كوشىرمەشىلەر ٶز جۇمىستارىن قانشالىقتى مۇقيات اتقارعانىنا توقتالايىق. مىسالى، ب.ز. 1008-1009-جىلدارى جاسالعان لەنينگراد كودەكسىن الايىق. ول ەۆرەي جازبالارىنىڭ ەڭ كونە ٵرى تولىق قولجازباسى سانالادى. ٴبىراق بەرتىن كەلە ودان 1000 جىلداي بۇرىن جازىلعان كوپتەگەن قولجازبالار مەن ولاردىڭ ۇزىندىلەرى تابىلدى. مۇمكىن، كەيبىرى: «1000 جىل بويى كوشىرىلىپ-كوشىرىلىپ، ٴتۇپنۇسقا ماتىننەن تۇك قالماعان شىعار»،— دەپ ويلار. ٴبىراق عالىمدار لەنينگراد كودەكسى مەن ودان ەرتەرەك جازىلعان الگى قولجازبالاردى سالىستىرا كەلە نە انىقتادى؟ كەيبىر سوزدەردە كىشىگىرىم وزگەشەلىكتەر بولماسا، ولاردىڭ مازمۇنى مۇرتى بۇزىلماي ساقتالعان.
8. گرەك جازبالارىنىڭ كوشىرمەلەرىن ەجەلگى باسقا ەڭبەكتەردىڭ كوشىرمەلەرىمەن سالىستىرعاندا نە بايقالعان؟
8 ەۆرەي جازبالارىنىڭ كوشىرمەشىلەرىنىڭ جولىن قۋىپ، ەرتەدەگى ماسىحشىلەر گرەك جازبالارىن دا تۋرا سولاي كوشىرگەن. ولار ونداعى 27 كىتاپتى مۇقيات كوشىرىپ شىعىپ، ۋاعىز ىسىندە جانە قاۋىم كەزدەسۋلەرىندە قولدانعان. ٴبىر عالىم گرەك جازبالارىنىڭ كوشىرمەلەرىن سول ۋاقىتتا جاسالعان باسقا ەڭبەكتەردىڭ كوشىرمەلەرىمەن سالىستىرىپ كورگەن سوڭ: «گرەك جازبالارىنىڭ كوشىرمەلەرى باسقا كىتاپتاردىڭ كوشىرمەلەرىنەن كوبىرەك ٵرى ٴماتىنى دە كوپ جاعدايدا تولىق ساقتالعان»،— دەپ تۇيىندەدى. «جاڭا وسيەت اناتومياسى» كىتابىندا بىلاي دەلىنەدى: «گرەك جازبالارىنىڭ قازىرگى ساپالى اۋدارماسىن وقىپ وتىرعان ادام اۆتوردىڭ اۋەل باستاعى ويلارىن وقىپ وتىرعانىنا سەنىمدى بولا الادى» («Anatomy of the New Testament»).
9. يشايا 40:8 دەن كيەلى كىتاپتىڭ حابارىنا قاتىستى نە بىلەمىز؟
9 كورگەنىمىزدەي، عاسىرلار بويى كوشىرمەشىلەر كوز مايىن تاۋىسىپ، كيەلى كىتاپتى ساقتاپ قالعان c. سونىڭ ارقاسىندا بۇگىندە ٴبىز كيەلى كىتاپتىڭ تۋرا كوشىرمەسىن وقىپ زەرتتەي الامىز. ارينە، تۇپتەپ كەلگەندە، ادامزاتقا ارنالعان حابارىنىڭ قاز-قالپىندا جەتۋىن قامداعان — ەحوبانىڭ ٶزى (يشايا 40:8 وقىڭىز). دەسە دە كەيبىر ادامدار: «كيەلى كىتاپ بۇگىنگە دەيىن ساقتالسا ساقتالعان شىعار، ٴبىراق ونىڭ قۇداي ٴسوزى ەكەنىن كىم ٴبىلىپتى؟!»— دەۋى مۇمكىن. ەندەشە، كيەلى كىتاپتىڭ قۇدايدىڭ رۋحىمەن جازىلعانىنا بىرنەشە دالەل قاراستىرايىق.
كيەلى كىتاپتىڭ پايعامبارلىقتارى دالمە-ٴدال ورىندالادى
Right: C. Sappa/DeAgostini/Getty Images; left: Image © Homo Cosmicos/Shutterstock
كيەلى كىتاپتاعى پايعامبارلىق ەجەلدە دە، بۇگىندە دە ورىندالعان (10، 11-ابزاستاردى قاراڭىز) e
10. قانداي پايعامبارلىقتىڭ ورىندالۋى پەتىردىڭ 2-حاتى 1:21 ٴدى راستايدى؟ (سۋرەتتى قاراڭىز.)
10 كيەلى كىتاپتا جۇزەگە اسقان پايعامبارلىقتار وتە كوپ. ولاردىڭ ىشىندە جازىلعاننان كەيىن جۇزدەگەن جىلدار وتە ورىندالعاندارى دا بار. بۇل پايعامبارلىقتاردىڭ جۇزەگە اسقانىن تاريح تا راستايدى. مىسالى، ەجەلگى بابىل قالاسىنىڭ قۇلاۋى جايلى پايعامبارلىقتى الايىق. ب.ز.ب. VIII عاسىردا يشايا پايعامبار ۇلى دا قۋاتتى بابىل قالاسىن جاۋلارى باسىپ الاتىنىن كيەلى رۋحتىڭ جەتەلەۋىمەن جازىپ كەتكەن. ول ٴتىپتى قالانى كىم جانە قالاي باسىپ الاتىنىنا دەيىن ايتقان (يشايا 44:27—45:2). يشايا بابىل قالاسىنىڭ جەرمەن-جەكسەن بولىپ، قۇلاتۇزگە اينالاتىنىن دا ايتقان (يشايا 13:19، 20). شىنىمەن-اق، ب.ز.ب. 539-جىلى كير پاتشا باستاعان ميديالىقتار مەن پارسىلار بابىلدى جاۋلاپ الدى. وسىلاي كەزىندە دۇركىرەپ تۇرعان قالا كۇيرەپ، ۇيىندىگە اينالدى. البەتتە، يشايا الدىن الا ايتقان سوزدەر دالمە-ٴدال ورىندالماي قويماس ەدى، ويتكەنى بۇل دا، كيەلى كىتاپتاعى پايعامبارلىقتاردىڭ ٴبارى دە ەحوبادان كەلگەن! (پەتىردىڭ 2-حاتى 1:21 وقىڭىز؛ «ماڭگى باقي ٶمىردىڭ راقاتىن كورىڭىز!» كىتابىنىڭ ەلەكتروندى نۇسقاسىنىڭ 3-ساباعى، 5-تاقىرىپشاسىنداعى «كيەلى كىتاپ بابىلدىڭ قۇلايتىنىن كۇنى بۇرىن ايتقان» دەگەن بەينەروليكتى كورىڭىز).
11. دانيال 2:41—43-تارماقتار بۇگىندە قالاي ورىندالىپ جاتقانىن ايتىپ بەرىڭىز.
11 كيەلى كىتاپتىڭ تەك كونە زامانعا ەمەس، ٴبىزدىڭ كەزىمىزگە قاتىستى پايعامبارلىقتارى دا جۇزەگە اسىپ جاتىر. مىسالعا دانيالدىڭ دۇنيەجۇزىلىك انگلو-امەريكا دەرجاۆاسىنا قاتىستى ايتقان پايعامبارلىعىنا كوڭىل بۇرايىق (دانيال 2:41—43 وقىڭىز). دانيال قوس مەملەكەتتەن تۇراتىن بۇل دەرجاۆانىڭ جارتىلاي تەمىر سياقتى «بەرىك»، جارتىلاي ساز سياقتى «مورت سىنعىش» بولاتىنىن ايتقان. بۇل پايعامبارلىقتىڭ كوز الدىمىزدا قالاي ورىندالىپ جاتقانى قاي-قايسىسىمىزدى دا قايران قالدىرادى. شىنىمەن-اق، بريتانيا مەن امەريكا ەكى بىردەي دۇنيەجۇزىلىك سوعىستا دا تەمىردەي قۋاتىن كورسەتىپ، جەڭىسكە جەتۋدە باستى ٴرول وينادى جانە ٵلى كۇنگە دەيىن ولاردىڭ اسكەري كۇشى مىقتى بولىپ تۇر. ال قاي ماعىنادا بۇل دەرجاۆا ساز سياقتى مورت سىنعىش؟ ونىڭ ازاماتتارى قايتا-قايتا جۇمىسشىلاردىڭ قۇقىقتارى ٷشىن، ازاماتتىق قۇقىقتارى مەن تاۋەلسىزدىكتەرى ٷشىن ەرەۋىلدەر مەن شەرۋلەرگە شىعىپ، مەملەكەتتى ىشتەي السىرەتۋدە. بۇل جايىندا الەمدىك ٴبىر ساياسات ساراپشىسى بىلاي دەگەن: «قازىرگى دامىعان دەموكراتيالىق ەلدەردىڭ ىشىندە ساياسي تۇرعىدان ەڭ جىككە بولىنگەنى — قۇراما شتاتتار». ال بريتانياعا كەلسەك، سوڭعى جىلدارى ول جاقتا دا بولىنۋشىلىك بەلەڭ الدى. ويتكەنى حالىق بريتانيانىڭ ەۋروپالىق وداقتىڭ قۇرامىنداعى ەلدەرمەن قانداي قارىم-قاتىناستا بولۋ كەرەكتىگىنە قاتىستى قاراما-قايشى پىكىردە. وسىنداي جىكشىلدىك انگلو-امەريكا دۇنيەجۇزىلىك دەرجاۆاسىنىڭ اياعىنان شالىپ، ونى بار قاۋقارىمەن ارەكەت ەتكىزبەي وتىر.
12. كيەلى كىتاپتاعى پايعامبارلىقتاردىڭ ورىندالۋى نە نارسەگە كوزىمىزدى جەتكىزەدى؟
12 كيەلى كىتاپتاعى كوپ پايعامبارلىقتاردىڭ ورىندالىپ كەتكەنى قۇدايدىڭ بولاشاققا قاتىستى ۋادەلەرىنىڭ ورىندالاتىنىنا سەنىمىمىزدى نىعايتادى. سوندىقتان ٴبىز ٶزىمىزدى: «قۇتقارۋىڭدى اڭساپ توسامىن، ويتكەنى سەنىڭ سوزىڭە ٷمىت ارتامىن»،— دەگەن ٴزابۇر جىرشىسى سياقتى سەزىنەمىز (ٴزاب. 119:81). ەحوبا ٶزىنىڭ ٴسوزى كيەلى كىتاپ ارقىلى بىزگە «جارقىن بولاشاق پەن ٷمىت سيلاپ» وتىر (ەرم. 29:11). ٴبىزدىڭ بۇل ٷمىتىمىز ادامداردىڭ ەمەس، قۇدايدىڭ ۋادەلەرىنە نەگىزدەلگەن. ەندەشە، كيەلى كىتاپتاعى پايعامبارلىقتاردى ىنتى-شىنتىمىزبەن زەرتتەپ، قۇداي سوزىنە دەگەن سەنىمىمىزدى بەكەمدەي بەرەيىك!
كيەلى كىتاپتىڭ اقىل-كەڭەسى تالايلاردى ٴتۇزۋ جولعا سالعان
13. ٴزابۇر 119:66، 138 گە سۇيەنسەك، كيەلى كىتاپتىڭ راستىعىنا تاعى قانداي دالەل بار؟
13 كيەلى كىتاپتىڭ راستىعىنىڭ تاعى ٴبىر دالەلى — ونداعى اقىل-كەڭەستەردىڭ ٶمىرىمىزدى كوركەيتىپ جاتقاندىعى (ٴزابۇر 119:66، 138 وقىڭىز). ماسەلەن، شاڭىراعى ورتاسىنا تۇسكەلى تۇرعان ەرلى-زايىپتىلار كيەلى كىتاپتىڭ ارقاسىندا قايتا قوسىلىپ، ۇيلەرىنە بەرەكە كىرگەن. ال بالالارى اتا-اناسىنىڭ مەيىر-شۋاعىنا بولەنىپ، ماسىحشىلەر وتباسىندا الاڭسىز ٵرى باقىتتى ٶمىر ٴسۇرىپ جاتىر (ەفەس. 5:22—29).
14. كيەلى كىتاپتاعى شىندىق بويىنشا ٶمىر سۇرسە، ادامنىڭ مىنەزى جاقساراتىنىنا مىسال كەلتىرىڭىز.
14 كيەلى كىتاپتاعى دانالىقتىڭ قۇدىرەتى سونداي — ٴتىپتى اسا قاۋىپتى دەگەن قىلمىسكەرلەردىڭ ٶزىن تۇبەگەيلى وزگەرتىپ جىبەرگەن. دجەكتىڭ وقيعاسى بۇعان جاقسى دالەل d. ول ٶلىم جازاسىنا كەسىلگەن ٵرى تۇرمەدەگى ەڭ قاۋىپتى تۇتقىن رەتىندە اتى شىققان قىلمىسكەر بولاتىن. بىردە ول ٴبىر كيەلى كىتاپتى زەرتتەۋ ساباعىنا قاتىسىپ قالادى. باۋىرلاستاردىڭ مەيىرىمدىلىگى ونىڭ جۇرەك قىلىن شەرتىپ، ول دا زەرتتەۋ ساباعىن وتەمىن دەپ شەشەدى. كيەلى كىتاپتاعى وسيەتتەر بويىنشا ٶمىر سۇرە باستاعاندا ونىڭ ٸسى مەن ٴسوزى دە، مىنەز-قۇلقى دا جاقسى جاققا وزگەرەدى. ٴسۇيتىپ، ول جاريالاۋشى بولىپ، كەيىن شومىلدىرۋ راسىمىنەن وتەدى. ول تۇرمەدەگى تۇتقىندارعا قۇداي پاتشالىعى جايلى حاباردى ۋاعىزداپ، كەم دەگەندە، تورتەۋىمەن زەرتتەۋ ساباعىن وتەدى. ولىمگە كەسىلەتىن كۇنى جەتكەندە دجەك ەندى بۇرىنعى دجەك ەمەس ەدى. بۇنى راستاپ، سول كۇنى ونىڭ قورعاۋشىسى بىلاي دەدى: «مەن 20 جىل بۇرىن بىلگەن دجەك مۇلدەم باسقا بولاتىن. ەحوبا كۋاگەرلەرى بەرگەن ٴبىلىمنىڭ ارقاسىندا ول جاڭا ادام بولىپ شىقتى». دجەك باۋىرلاس جازاعا كەسىلىپ، كوز جۇمسا دا، ونىڭ وقيعاسى مىنانى دالەلدەيدى: كيەلى كىتاپ — سەنىمدى كىتاپ ٵرى ونىڭ ادام بولمىسىن جاقسارتا الاتىن قۇدىرەتى بار (يشايا 11:6—9).
كيەلى كىتاپتىڭ اقىل-كەڭەسىنىڭ ارقاسىندا ٴتۇرلى ورتادان شىققان كوپ ادام جاقسى جاققا وزگەردى (15-ابزاستى قاراڭىز) f
15. كيەلى كىتاپتاعى شىندىقتى ۇستاناتىن ەحوبانىڭ حالقى نەسىمەن ەرەكشە؟ (سۋرەتتى قاراڭىز.)
15 كيەلى كىتاپتاعى شىندىققا ساي ٶمىر سۇرەتىندىكتەن، ەحوبانىڭ حالقىنىڭ بىرلىگى جاراسقان (جوح. 13:35؛ قور. 1-ح. 1:10). مىنا دۇنيە مەن ٴبىزدىڭ ارامىزداعى ايىرماشىلىق جەر مەن كوكتەي: ادامدار ساياسي كوزقاراسىنا، ۇلتىنا، ناسىلىنە، الەۋمەتتىك جاعدايىنا قاراي ٴتۇرلى جىككە ٴبولىنىپ جاتقاندا، ٴبىزدىڭ ارامىزدا اۋىزبىرشىلىك پەن ىنتىماق بار. وسىنداي تاماشا بىرلىگىمىزدى كورگەندە، دجين ەسىمدى ٴبىر جىگىت قاتتى اسەر الادى. ول افريكانىڭ ٴبىر ەلىندە تۋىپ-وسكەن. ەلدە ازاماتتىق سوعىس باستالىپ كەتىپ، دجين اسكەرگە قوسىلادى. ٴبىراق كەيىن ول كورشى ەلگە قاشىپ كەتىپ، سول جەردە كۋاگەرلەردى كەزدەستىرەدى. دجين ٶزىنىڭ قالاي وزگەرگەنى جايىندا بىلاي دەپ اڭگىمەلەيدى: «مەن كۋاگەرلەرگە قاراپ، اقيقات ٴدىندى ۇستانۋشىلار قانداي بولاتىنىن ٴتۇسىندىم. ولار ساياساتقا ارالاسپايدى، ارالارىندا بولىنۋشىلىك دەگەن اتىمەن جوق، قايتا، ٴبىر-ٴبىرىن شىن سۇيەدى. وسىعان دەيىنگى ٶمىرىمدى وتاندى قورعاۋعا ارناعان ەدىم. ال ەندى شىندىقتى ٴبىلىپ، بار جۇرەك قالاۋىممەن ٶمىرىمدى ەحوباعا باعىشتاۋدى شەشتىم». بۇرىن باسقا ەلدىڭ جانە باسقا ۇلتتىڭ وكىلدەرىمەن شايقاسقان ول قازىر كيەلى كىتاپتىڭ تاتۋلىققا جەتكىزەتىن حابارىن بارشاعا ايتىپ ٴجۇر. شىنىندا دا، ۇلتى مەن شىققان ورتاسى ٵرتۇرلى ادامداردىڭ باسىن بىرىكتىرىپ وتىرعانى — كيەلى كىتاپتىڭ راستىعىنا بۇلتارتپاس دالەل.
قۇدايدىڭ حاق سوزىنە سەنىمىڭىز وسە بەرسىن
16. قۇداي سوزىنە دەگەن سەنىمىمىزدى قاتايتۋ نەگە ماڭىزدى؟
16 مىنا دۇنيە قۇلدىراپ، ٴحالى ناشارلاعان سايىن، ٴبىزدىڭ قۇدايدىڭ سوزىنە دەگەن سەنىمىمىز سىنالادى. وزگەلەر كيەلى كىتاپتىڭ حاقتىعىنا، يا بولماسا ەحوبا ٶز حالقىن جەتەلەۋگە ادال دا اقىلدى قۇلدى تاعايىنداعانىنا كۇمان سەپكىسى كەلۋى مۇمكىن. ٴبىراق ٴبىز ەحوبانىڭ ٴسوزى شىندىق ەكەنىنە بەرىك سەنىمدى بولساق، ولاردىڭ شابۋىلىنا قاسقايىپ تۇرىپ تويتارىس بەرەمىز. سونداي-اق وسى سەنىمدىلىكتىڭ ارقاسىندا ٴبىز ەحوبانىڭ «جارلىقتارىنا مويىنسۇنۋعا جۇرەگىمىزدى بەيىمدەپ، ارقاشان، اقىرىنا دەيىن، سولاي ەتۋگە بەل بۋامىز» (ٴزاب. 119:112). بۇعان قوسا، وزگەلەردەن ەش ۇيالماي، ولارعا شىندىقتى ۋاعىزدايمىز ٵرى سوعان ساي ٶمىر سۇرۋگە شاقىرامىز (ٴزاب. 119:46). ومىرىمىزدەگى ەڭ اۋىر سىناقتارعا دا، ونىڭ ىشىندە قۋعىن-سۇرگىنگە دە «شىدامدىلىقپەن جانە قۋانىشپەن» توزە الامىز (قول. 1:11؛ ٴزاب. 119:143، 157).
17. 2023-جىلدىڭ تارماعى نەنى ەسكە سالادى؟
17 ەحوبانىڭ بىزگە شىندىقتى اشقانىنا شەكسىز ريزامىز! ادامدار نە ىستەپ، نە قويارىن بىلمەي ابىگەرگە تۇسكەن مىنا دۇنيەدە شىندىق جانىمىزعا سابىر بەرىپ، قازىقتاي بەرىك ۇستاپ تۇر. ٴبىزدىڭ ماقساتىمىز، قايدا بەت العانىمىز بەلگىلى. سونداي-اق قۇداي پاتشالىعى بيلىك ەتەتىن ۋاقىتتا باقىتتى ٶمىر سۇرۋگە ٷمىتتىمىز. لايىم 2023-جىلدىڭ تارماعى قۇداي ٴسوزىنىڭ تۇپتامىرىمەن شىندىق ەكەنىنە دەگەن سەنىمىمىزدى بەكەمدەي ٴتۇسسىن! (ٴزاب. 119:160).
94-ٵن قۇداي ٴسوزى ٷشىن ريزاشىلىق
a 2023-جىلدىڭ تارماعى بولىپ تاڭدالعان جالىندى سوزدەر: «سەنىڭ ٴسوزىڭ — تۇپتامىرىمەن شىندىق» (ٴزاب. 119:160). بۇل سوزدەردىڭ راستىعىنا ەشقايسىسىمىز ٴشۇبا كەلتىرمەيمىز. ٴبىراق مىنا دۇنيەدە كيەلى كىتاپتىڭ اقيقات ەكەنىنە، ونىڭ بۇگىنگى تاڭدا ومىرىمىزگە پايداسى بار ەكەنىنە سەنبەيتىندەر كوپ. سوندىقتان ٴبىز اقپەيىل جاندارعا كيەلى كىتاپتىڭ وزىنە جانە ونىڭ دانالىعىنا دەگەن سەنىم ۇيالاتقىمىز كەلەدى. وسى ورايدا كومەك بولاتىن ٷش جايت بار.
b ٴسوز ٴمانى: «تۇپتامىرىمەن» دەپ اۋدارىلعان ەۆرەي ٴسوزى بۇل تارماقتا «تۇگەلىمەن»، «باستان-اياق» دەگەن ماعىنانى بىلدىرەدى.
c jw.org تور بەكەتىنىڭ ىزدەۋ جولاعىنا «تاريح جانە كيەلى كىتاپ» (حانزۇشا) دەپ تەرسەڭىز، كيەلى كىتاپتىڭ قالاي ساقتالعانى جايلى تولىعىراق بىلە الاسىز.
d كەيبىر ەسىمدەر وزگەرتىلگەن.
