1-زەرتتەۋ ماقالاسى
38-ٵن قۇداي ساعان كۇش بەرەدى
ەحوباعا سەنىم ارتساق، قورقىنىشتى جەڭە الامىز
2024-جىلدىڭ تارماعى: «بويىمدى ۇرەي بيلەگەندە، وزىڭە سەنىم ارتامىن» (ٴزاب. 56:3).
نەگىزگى وي
ەحوباعا سەنىم ارتساق، قورقىنىشىمىزدى قالاي جەڭە الاتىنىمىزدى بىلەيىك.
1. ٴبىز نەدەن قورقۋىمىز مۇمكىن؟
كيەلى كىتاپتان ٴبىلىم العاننىڭ ارقاسىندا ٴبىز ولىمنەن، تىلسىم كۇشتەردەن جانە بولاشاقتان قورىقپايتىن بولدىق. دەسە دە بويىمىزعا ۇرەي ۇيالاتاتىن باسقا دا جايتتار بار. ويتكەنى ٴبىز سوعىس، قىلمىس، ىندەت ىسپەتتى «قورقىنىشتى نارسەلەر» بولىپ جاتقان ۋاقىتتا ٶمىر ٴسۇرىپ جاتىرمىز (لۇقا 21:11). سونداي-اق ادامنان، مىسالى، شىنايى عيباداتقا قارسىلىق كورسەتەتىن ۇكىمەتتەن نە تۋىستاردان قورقۋىمىز مۇمكىن. ال كەيبىر باۋىرلاستار قازىر كورىپ جۇرگەن قيىندىقتارعا نە بولاشاقتا كەزىگەتىن سىناقتارعا توتەپ بەرە الماي قالامىن با دەپ قورقادى.
2. عاتقا كەلگەندە داۋىتپەن نە بولعانىن ايتىپ بەرىڭىز.
2 ۇرەيدىڭ نە ەكەنىن ٴداۋىت جاقسى بىلگەن. بىردە ساۋل ولتىرەمىن دەپ سوڭىنا تۇسكەندە، ٴداۋىت فىلىستىرلەردىڭ قالاسى عاتقا قاشىپ كەتتى. كوپ ۇزاماي عات پاتشاسى احيش ٴداۋىتتىڭ داڭقى شىققان مىقتى جاۋىنگەر ەكەنىن، ٴتىپتى ول تۋرالى «ون مىڭداعان ٴفىلىستىردى جايراتتى» دەگەن ٵن بارىن ەستيدى. سوندا ٴداۋىت احيش ماعان نە ىستەر ەكەن دەپ، «زارە-قۇتى قالماي قاتتى قورقىپ كەتەدى» (سام. 1-ج. 21:10—12). ٴداۋىت ۇرەيىن قالاي جەڭدى ەكەن؟
3. ٴزابۇر 56:1—3، 11 گە ساي، ٴداۋىت قورقىنىشىن قالاي جەڭدى؟
3 ٴزابۇردىڭ 56-جىرىندا ٴداۋىت ٶزىنىڭ نە سەزىنگەنىن اشىپ ايتقان. بۇل جىردا ٴداۋىت نەلىكتەن قورىققانىن عانا ەمەس، سول ۇرەيىن قالاي جەڭگەنىن دە ايتادى. ول ەحوباعا سەنىم ارتتى (ٴزابۇر 56:1—3، 11 وقىڭىز). ونىڭ سەنىمى اقتالدى دا. ەحوبانىڭ كومەگىمەن ٴداۋىت ٴبىر ايلا تاۋىپ كەتتى: ٴبىرتۇرلى قىلىقتار جاساپ، پاتشا الدىندا ٶزىن ەسۋاستاي كورسەتتى. سوندا احيش پاتشا ونى قاۋىپ توندىرەتىن ادام ەمەس، قايداعى ٴبىر ەسۋاس قوي دەپ قۋىپ جىبەردى. وسىلاي ٴداۋىتتىڭ باسى امان قالدى (سام. 1-ج. 21:13—22:1).
4. ەحوباعا كوبىرەك سەنىم ارتۋدى قالاي ۇيرەنەمىز؟ مىسال كەلتىرىڭىز.
4 ەحوباعا سەنىم ارتساق، ٴبىز دە ۇرەيدى جەڭە الامىز. ٴبىراق ٶزىمىز قورقىپ تۇرساق، قالاي ٴبىز بار ٷمىتىمىزدى ەحوباعا ارتامىز؟ بۇعان ٷش نارسە كومەكتەسەدى، سوعان مىسال كەلتىرەيىك. ٴسىز قانداي دا ٴبىر اۋرۋعا شالدىققانىڭىزدى بىلگەندە، شوشىپ كەتەتىن شىعارسىز. ٴبىراق ٴسىزدى ەمدەيتىن دارىگەرگە سەنىمدى بولساڭىز، قورقىنىشىڭىز سەيىلە باستايدى. ٴسىز ونىڭ بۇرىن سىزدىكىندەي دەرتى بار تالاي ادامدى ەمدەگەنىن بىلەسىز. سونداي-اق ول ٴسىزدى دەن قويىپ تىڭدايدى ٵرى كۇيىڭىزدى وتە جاقسى تۇسىنەدى. سوسىن ول سىزگە كوبىسىنە شيپا بولعان ەم ٴتۇرىن ۇسىنادى. سول سياقتى ٴبىز ەحوبانىڭ بۇرىن نە ىستەگەنىن، قازىر نە ىستەپ جاتقانىن جانە بولاشاقتا نە ىستەيتىنىن مۇقيات ويلانساق، وعان كوبىرەك سەنىم ارتاتىن بولامىز. ٴزابۇردىڭ 56-جىرىنان بىلەتىنىمىزدەي، ٴداۋىت وسىلاي ەتكەن. ونىڭ سوزدەرىن قاراستىرعاندا، ٴسىز دە ەحوباعا سەنىم ارتىپ، قالاي قورقىنىشىڭىزدى جەڭە الاتىنىڭىزدى ويلاڭىز.
ەحوبا وسىعان دەيىن نە ىستەگەن؟
5. ۇرەي-قورقىنىشىن جەڭۋ ٷشىن ٴداۋىت نە تۋرالى ويلاندى؟ (ٴزابۇر 56:12، 13)
5 باسىنا قاۋىپ ٴتونىپ تۇرسا دا، ٴداۋىت بار ويىن ەحوبانىڭ بۇرىن جاساعان ىستەرىنە اۋدارعان (ٴزابۇر 56:12، 13 وقىڭىز). نەگىزى، ول ٶمىر بويى وسىنداي وي قالپىنان اينىماعان. ماسەلەن، ول جاراتىلىستارعا قاراپ ويلانعاندا، ەحوبانىڭ قۇدىرەتىنىڭ شەكسىزدىگىن جانە ادامدارعا دەگەن اسقان قامقورلىعىن كورگەن (ٴزاب. 65:6—9). سونداي-اق ول ەحوبانىڭ وزگەلەرگە جاساعان يگىلىگى جايلى دا وي جۇگىرتكەن (ٴزاب. 31:19؛ 37:25، 26). اسىرەسە وزىنە جاساعان جاقسىلىعىن ٴجيى ەسكە الىپ تۇرعان. ەحوبا ونى شىر ەتىپ دۇنيەگە كەلگەننەن باستاپ قورعاپ-قولداپ كەلە جاتتى (ٴزاب. 22:9، 10). وسىنىڭ بارلىعىن سانا سارابىنان وتكىزگەننىڭ ارقاسىندا ٴداۋىتتىڭ ەحوباعا ارقا سۇيەيمىن دەگەن شەشىمى بەكي ٴتۇستى.
ەحوبانىڭ بۇرىن نە ىستەگەنىن، قازىر نە ىستەپ جاتقانىن جانە الدا نە ىستەيتىنىن ويلاعاننىڭ ارقاسىندا ٴداۋىت ەحوباعا ودان بەتەر سەنىم ارتتى (5، 8، 12-ابزاستاردى قاراڭىز) d
6. قورقىپ قالعان كەزدە ەحوباعا سەنىم ارتۋعا نە كومەكتەسەدى؟
6 ٴسىز دە بىردەڭەدەن قورىقساڭىز، «ەحوبا وسىعان دەيىن نە ىستەگەن؟» دەپ ويلانىڭىز. ونىڭ جاراتقاندارى جايلى وي جۇگىرتىڭىز. مىسالى، قۇستار يا گۇلدەر ەحوباعا ۇقساس ەتىپ جاراتىلماسا دا، وعان قىزمەت ەتپەسە دە، قۇدايىمىز ولاردىڭ قامىن جاسايدى. دەمەك، ٴبىزدىڭ قامىمىزدى ودان بەتەر ويلايدى ەمەس پە؟ وسىلاي ولارعا «نازار سالساق»، سەنىمىمىز نىعايا تۇسەدى (مات. 6:25—32). ەكىنشىدەن، ەحوبا ٶز قىزمەتشىلەرى ٷشىن نە ىستەگەنىن ويلاڭىز. بۇل ٷشىن كيەلى كىتاپتاعى تاۋداي سەنىمى بولعان ٴبىر كىسى جايلى نەمەسە ەحوبانىڭ قازىرگى تاڭداعى قىزمەتشىسى جايلى وقىپ-زەرتتەڭىز a. سونىمەن قاتار ەحوبانىڭ ٴسىز ٷشىن وسىعان دەيىن نە ىستەگەنى جايلى ويلانىڭىز. ول ٴسىزدى شىندىققا قالاي جاقىنداتىپ تارتتى؟ (جوح. 6:44). دۇعالارىڭىزعا قالاي جاۋاپ بەردى؟ (جوح. 1-ح. 5:14). ۇلىنىڭ بەرگەن اسىل قۇرباندىعىنىڭ كۇن سايىن قانداي يگىلىگىن كورىپ ٴجۇرسىز؟ (ەفەس. 1:7؛ ەۆر. 4:14—16).
ەحوبانىڭ بۇرىن نە ىستەگەنىن، قازىر نە ىستەپ جاتقانىن جانە الدا نە ىستەيتىنىن ويلاساق، وعان ودان بەتەر سەنىم ارتاتىن بولامىز (6، 9، 10، 13، 14-ابزاستاردى قاراڭىز) e
7. دانيال پايعامباردىڭ وقيعاسى ۆانەسساعا قورىقپاۋعا قالاي كومەكتەستى؟
7 گايتيدە تۇراتىن ۆانەسسا b باۋىرلاسىمىزدىڭ باسىنان ٴبىر قورقىنىشتى جاعداي وتكەن. ول تۇراتىن ايماقتاعى ٴبىر ەر كىسى وعان قايتا-قايتا تەلەفون شالىپ، جازىپ، جىنىستىق قاتىناسقا تۇسۋگە شاقىرادى. ۆانەسسا بۇدان ٷزىلدى-كەسىلدى باس تارتادى. سوندا الگى ەر ادام ودان بەتەر اشۋعا ٴمىنىپ، سەس كورسەتە باستايدى. «مەنىڭ زارە-قۇتىم قالمادى»،— دەيدى ۆانەسسا. ول نە ىستەدى؟ ول ٶزىن قورعاۋ ٷشىن ناقتى ارەكەت ەتتى. ٴبىر اقساقال وعان ٴتيىستى ورگاندارعا حابارلاسۋعا كەڭەس بەردى. بۇدان بولەك، ول ەحوبا بۇرىنعى قىزمەتشىلەرىن قالاي قورعاعانى جايلى ويلاندى. «ويىما بىردەن دانيال پايعامبار كەلدى. ەش جازىعى بولماسا دا، ونى اش ارىستاندار جاتقان ورعا لاقتىرىپ جىبەردى. سوندا دا ەحوبا ونى امان الىپ قالدى. مەن دە ەحوباعا دۇعا ەتىپ، وسى ماسەلەنى ٴبىر وزىڭە تاپسىرامىن، ٶزىڭ قولىڭا الشى دەپ ٶتىندىم. سودان كەيىن قورىقپايتىن بولدىم»،— دەيدى ۆانەسسا (دان. 6:12—22).
ەحوبا قازىر نە ىستەپ جاتىر؟
8. ٴداۋىت نە نارسەگە سەنىمدى بولدى؟ (ٴزابۇر 56:8)
8 عاتتا جۇرگەندە ٶمىرى قىل ۇستىندە تۇرسا دا، ٴداۋىت قورقىنىشقا بوي الدىرمادى. ول ەحوبانىڭ سول كەزدە نە ىستەپ جاتقانى جايلى ويلاندى. قۇداي وعان باعىت-باعدار بەرىپ، قورعاپ جاتقانىن، ونىڭ ىشكى كۇيىن تۇسىنەتىنىن سەزىندى (ٴزابۇر 56:8 وقىڭىز). سونداي-اق ونىڭ جوناتان، باس ٴدىني قىزمەتكەر احيمالىك سياقتى ادال دوستارى بولدى. ولار ٴداۋىتتى ۇنەمى قولداپ، كومەكتەسىپ ٴجۇردى (سام. 1-ج. 20:41، 42؛ 21:6، 8، 9). ساۋل پاتشا ونىڭ كوزىن قۇرتقىسى كەلسە دە، ودان امان-ەسەن قاشىپ قۇتىلا الدى. وسىلايشا ٴداۋىت باسىنان نە ٶتىپ جاتقانىن، سونىڭ كەسىرىنەن جان دۇنيەسىندە نە بولىپ جاتقانىن ەحوبا كورىپ، ٴبىلىپ تۇرعانىنا سەنىمدى بولدى.
9. ەحوبا ٴارقايسىسىمىز جايلى نە بىلەدى؟
9 باسىڭىزعا تۇسكەن قانداي دا ٴبىر سىناقتان بويىڭىزدى ۇرەي بيلەسە، مىنانى ەستە ۇستاڭىز: ەحوبا جاعدايىڭىزدىڭ قانداي ەكەنىن جانە نە كۇي كەشىپ جاتقانىڭىزدى كورىپ تۇر. مىسالى، ەحوبا يسرايلدىكتەردىڭ مىسىردا قانالىپ جاتقانىن عانا ەمەس، «قانداي ازاپ شەگىپ جاتقانىن» دا كوردى (مۇس. 2-ج. 3:7). ٴداۋىت ەحوبا ونىڭ «قاسىرەتىن» دە، «جانىنىڭ ازابىن» دا بايقاعانىن ايتىپ جىرلاعان (ٴزاب. 31:7). ٴتىپتى حالقى ٶز اقىماقتىعىنىڭ كەسىرىنەن جاپا شەككەندە دە، «بۇل [ەحوبانىڭ] جانىنا باتقان» (يشايا 63:9). دەمەك، ەحوبا ٴسىزدىڭ سەزىمدەرىڭىزدى جاقسى تۇسىنەدى جانە قورقىنىشىڭىزدى سەيىلتۋگە بارىنشا كومەكتەسكىسى كەلەدى.
10. ەحوبا ٴسىزدىڭ قامىڭىزدى ويلايتىنىنا ٵرى كەز كەلگەن سىناقپەن كۇرەسۋگە كومەكتەسەتىنىنە نەگە سەنىمدىسىز؟
10 قورقىنىش تۋدىراتىن سىناقتارعا كەزىككەندە، «ەحوبا مەنى قولداپ جاتقانىن قايدان بىلەم؟» دەپ ويلارسىز. ەحوباعا «سەنىڭ كومەك قولىڭدى كورە الايىنشى» دەپ دۇعا ەتىڭىز (پات. 2-ج. 6:15—17). سودان كەيىن مىنا سۇراقتار جايلى ويلانىپ كورىڭىز: قاۋىمدا بايانداماداعى ٴبىر وي نە باۋىرلاستىڭ تۇسىنىكتەمەسى سىزگە جىگەر بەردى مە؟ قانداي دا ٴبىر ادەبيەت، ۆيدەو نە ٵن ٴسىزدى نىعايتتى ما؟ مۇمكىن ٴبىر باۋىرلاس كوڭىلىڭىزدى جايلاندىراتىن ٴبىر تارماقپەن نە ويمەن بولىسكەن شىعار. كەيدە ٴبىز باۋىرلاستارىمىزدىڭ سۇيىسپەنشىلىگىنە جانە رۋحاني اس-سۋعا كادىمگى جايت دەپ قاراپ، باعالاماي كەتۋىمىز مۇمكىن. ٴبىراق بۇلار ەحوبا بەرگەن ەلدە جوق ەرەكشە سيلار (يشايا 65:13؛ مار. 10:29، 30). وسى سيلارعا قاراپ، ەحوبا ٴبىزدىڭ قامىمىزدى ويلايتىنىنا، ونىڭ سەنىم ارتۋعا تۇراتىن قۇداي ەكەنىنە كوزىمىز جەتەدى (يشايا 49:14—16).
11. ايدا قورقىنىشىن قالاي جەڭدى؟
11 سەنەگالدا تۇراتىن ايدا باۋىرلاسىمىز قيىن شاقتا ەحوبانىڭ ونى قولداپ-دەمەگەنىن كورەدى. ٷيدىڭ تۇڭعىشى بولعاندىقتان اتا-اناسى ودان وزدەرىن اسىرايدى دەپ كۇتكەن ەكەن. ٴبىراق ايدا ٸزاشار بولعىسى كەلىپ، تۇرمىسىن قاراپايىم ەتكەندىكتەن، قارجى جاعىنان ٴبىراز قينالىپ قالادى. سوندا وتباسى نارازى بولىپ، ونى كىنالاي باستايدى. «مەن اتا-اناما كومەكتەسە الماي قالسام، ٴبارى مەنەن تەرىس اينالىپ كەتەدى عوي دەپ ۋايىمدادىم. وسىنداي كۇيگە ۇشىراعانىما ٴتىپتى ەحوبانى ايىپتاي باستادىم»،— دەيدى ول. كەيىن جينالىستا ول ٴبىر بايانداما تىڭدايدى. بايانداماشى ەحوبا جۇرەگىمىزدى سىزداتقان كەز-كەلگەن ۋايىم-قايعىمىزدى بىلەتىنىن ايتادى. «اقساقالدار مەن باۋىرلاستاردىڭ كەڭەسىنىڭ ارقاسىندا بىرتە-بىرتە ەحوبانىڭ مەنى سۇيەتىنىنە كوزىم جەتتى. سودان ەحوباعا سەنىممەن دۇعا ەتەتىن بولدىم. ونىڭ دۇعالارىما جاۋاپ بەرىپ جاتقانىن كورگەندە، جانىم جاي تاپتى»،— دەدى ايدا. كەيىن ول ٸزاشار بولا ٴجۇرىپ، اتا-اناسى مەن وزگەلەرگە دە كومەكتەسە الاتىنداي جۇمىس تاۋىپ الدى. ايدا: «مەن ەحوباعا تولىقتاي سەنىم ارتۋدى ۇيرەندىم. قازىر مەن دۇعا ەتكەندە قورقىنىشىم لەزدە-اق عايىپ بولادى»،— دەيدى.
ەحوبا بولاشاقتا نە ىستەيدى؟
12. ٴزابۇر 56:9 عا ساي، داۋىتتە قانداي سەنىمدىلىك بولدى؟
12 ٴزابۇر 56:9 وقىڭىز. وسى تارماقتان داۋىتكە قورقىنىشقا بەرىلمەۋگە تاعى نە كومەكتەسكەنىن كورەمىز. باسىنا قاۋىپ ٴتونىپ تۇرسا دا، ٴداۋىت ەحوبانىڭ بولاشاقتا ول ٷشىن نە ىستەيتىنى جايلى وي جۇگىرتتى. ول ەحوبانىڭ دەر كەزىندە ونى قۇتقارىپ الاتىنىنا سەنىمدى بولدى. قانشا دەگەنمەن ەحوبا ٴيسرايلدىڭ ەندىگى پاتشاسى ٴداۋىت بولادى دەپ ايتىپ قويعان ەدى عوي (سام. 1-ج. 16:1، 13). ال ەحوبا نە ايتسا دا، ورىندايتىنىنا ٴداۋىت ٴجۇز پايىز سەنىمدى بولعان.
13. ەحوبانىڭ نە ىستەيتىنىنە ٴبىز نىق سەنىمدىمىز؟
13 ەحوبا سىزگە بولاشاقتا نە ىستەيمىن دەپ ۋادە بەرەدى؟ ارينە، ول ٴبىزدى بارلىق قيىندىقتارىمىزدان قالقالاپ وتىرادى دەپ كۇتپەيمىز c. ٴبىراق ول وسى دۇنيەدە ارپالىسىپ جۇرگەن ۋايىم-قايعىمىزدىڭ ٴبارىن كەلەشەكتە جاڭا دۇنيەدە شەشىپ بەرەدى (يشايا 25:7—9). جاراتۋشىمىز ەحوباعا مارقۇمداردى قايتا تۇرعىزۋ، جانىمىز بەن ٴتانىمىزدى ساۋىقتىرۋ، قارسىلاستارىمىزدى جوق قىلۋ تۇك تە قيىن ەمەس (جوح. 1-ح. 4:4).
14. نە جايلى ويلانساق بولادى؟
14 بويىڭىزدى قورقىنىش مەڭدەگەندە بولاشاقتا ەحوبانىڭ نە ىستەيتىنى جايلى ويلانىڭىز: شايتان قۇردىمعا كەتكەن، زۇلىمدار اتىمەن جوق، جەر بەتىن تەك ٵدىل ادامدار مەكەندەگەن، كەمەلسىزدىك كۇن ساناپ كەرى قايتىپ جاتقان الەمدە ٶزىڭىزدى قالاي سەزىنەسىز؟ 2014-جىلعى ايماقتىق كونگرەستە ٷمىتىمىزدى ەلەستەتۋ جايلى كورىنىس بولعان ەدى. كورىنىستە ٴبىر وتاعاسى وتباسىمەن تىموتەگە 2-حات 3:1—5 تارماقتار جۇماققا قاتىستى ايتىلعاندا قالاي بولار ەدى دەپ تالقىلايدى. ول بىلاي دەيدى: «جاڭا دۇنيەدە ەڭ باقىتتى ۋاقىت بولاتىنىن ٴبىلىپ قوي: ادامدار وزگەلەردى جاقسى كورەتىن، رۋحاني قازىنانى باعالايتىن، قاراپايىم، مومىن، قۇدايعا ماداق اكەلەتىن، اتا-اناسىنا مويىنسۇناتىن، العىس بىلدىرەتىن، ادال، باۋىرمال، ىمىراشىل، وزگەلەردى تەك ماقتايتىن، ۇستامدى، جۇمساق، جاقسىلىقتى جاقسى كورەتىن، سەنىم ارتۋعا تۇراتىن، يلىككىش، كىشىپەيىل، ٴلاززات-ەرمەكتەن گورى قۇدايدى جاقسى كورەتىن ٵرى وعان شىن جۇرەكتەن بەرىلگەن بولادى. مۇندايلاردان اجىراما». ٴسىز جۇماقتا ٶمىرىمىز قانداي بولاتىنىن وتباسىڭىزبەن نە باۋىرلاستارمەن تالقىلاپ تۇراسىز با؟
15. تانيا قورقىنىشىن قالاي جەڭە الدى؟
15 سولتۇستىك ماكەدونيادا تۇراتىن تانيا باۋىرلاسىمىز جايلى ايتىپ وتسەك. كيەلى كىتاپتان ٴبىلىم الا باستاعاندا اتا-اناسى وعان قاتتى قارسى بولادى. الايدا تانيا ەحوبانىڭ بولاشاقتا بەرەتىن باتالارى جايلى وي جۇگىرتكەننىڭ ارقاسىندا قورقىنىشىن سەيىلتىپ، ادالدىق ساقتاي الدى. «قورىققان نارسەلەرىم شىنىمەن دە بولدى. قاۋىم كەزدەسۋلەرىنە بارعان سايىن انام مەنى ۇرىپ-سوعاتىن. اكە-شەشەم «وسىدان ەحوبا كۋاگەرى بولساڭ، سەنى ولتىرەمىز» دەپ قورقىتاتىن»،— دەيدى ول. اقىرىندا، تانيانى اتا-اناسى ۇيدەن قۋىپ جىبەردى. ول وسى قيىندىقتارعا قالاي ٴتوزدى ەكەن؟ ول بىلاي دەيدى: «مەن ٴمىنسىز بولىپ قالسام، جۇماقتا ماڭگىلىك باقىتتى بولاتىنىمدى ويلادىم. سونداي-اق كورگەن قيىندىقتارىم جاڭا دۇنيەدە ۇمىت بولاتىنى، ٵرى وسى دۇنيەدە نەدەن باس تارتپايىن، ەحوبا ورنىن تولتىرىپ، جارىلقايتىنى جايلى ويلاندىم». ەحوبانىڭ جاردەمىمەن تانيا تۇراتىن جەر تاپتى. بۇگىندە ول ادال جارىمەن بىرگە قۋانا ەحوباعا تولىق ۋاقىت قىزمەت ەتىپ ٴجۇر.
وسى باستان سەنىم ارتۋدى ۇيرەنىڭىز
16. لۇقا 21:26—28 ايتىلعان جايتتار ورىندالا باستاعاندا، باتىلدىقتان تايماۋعا بىزگە نە كومەكتەسەدى؟
16 زور الاپات كەزىندە جۇرتتىڭ بويىن «ۇرەي بيلەپ، ەسەڭگىرەپ قالادى». ٴبىراق سول كەزدە قۇداي حالقى تايسالماي، باتىل تۇرادى (لۇقا 21:26—28 وقىڭىز). ٴبىز نەگە قورىقپايمىز؟ ويتكەنى سول ۋاقىتقا دەيىن ٴبىز قۇدايعا سەنىم ارتۋدى جاقسىلاپ ۇيرەنىپ الامىز. جاڭا ايتىلعان تانيا باۋىرلاس باسىنان وتكەن جاعدايلاردىڭ ارقاسىندا ومىرىندەگى باسقا دا الاي-دۇلەي قيىندىقتارعا توتەپ بەرە العانىن ايتتى. «مەنىڭ ٴبىر تۇسىنگەنىم، قانداي قيىندىق بولماسىن، ەحوبانىڭ ارقاسىندا ٴبىز وعان توتەپ بەرىپ، باتاسىنا كەنەلە الامىز. كەيدە بار تىزگىن بىرەۋلەردىڭ قولىندا تۇرعانداي كورىنۋى مۇمكىن. ٴبىراق شىن مانىندە ولار ەحوبا جول بەرگەننەن اسىپ ەشتەڭە ىستەي المايدى. ودان بولەك، سىناق قانشالىقتى اۋىر بولماسىن، ونىڭ اقىرى بار»،— دەيدى تانيا.
17. 2024-جىلدىڭ تارماعى بىزگە قاي جاعىنان كومەكتەسەدى؟ (مۇقاباداعى سۋرەتتى قاراڭىز.)
17 قازىرگى كەزدە بويىمىزعا قورقىنىش ۇيالاتاتىن جايتتار بارشىلىق. ٴبىراق داۋىتكە ەلىكتەسەك، ٴبىز قورقىنىشتىڭ قۇرساۋىنا تۇسپەيمىز. 2024-جىلدىڭ تارماعى ٴداۋىتتىڭ ەحوباعا ايتقان مىنا سوزدەرى — «بويىمدى ۇرەي بيلەگەندە، وزىڭە سەنىم ارتامىن» (ٴزاب. 56:3). بۇل سوزدەردى كيەلى كىتاپتى زەرتتەۋشى ٴبىر عالىم بىلاي دەپ ٴتۇسىندىردى: «ٴداۋىت قورقىنىشىن تۇتاندىرىپ، قيىندىقتارى جايلى ويلاي بەرمەگەن، قايتا بار نازارىن ٶزىنىڭ قۇتقارۋشىسىنا تىككەن«. وسى تارماق جايلى الداعى ايلاردا، اسىرەسە قورقىنىشتى جاعدايلارمەن بەتپە-بەت كەلگەندە وي جۇگىرتىڭىز. ۋاقىت ٴبولىپ، ەحوبانىڭ بۇرىنداعى، قازىرگى جانە بولاشاقتاعى ىستەرى جايلى ويلانىڭىز. سوندا ٴداۋىت ىسپەتتى: «قۇدايىما ارقا سۇيەيمىن، ەش قورىقپايمىن»،— دەيتىن بولاسىز (ٴزاب. 56:4).
اپات بولعان كەزدە ايەل باۋىرلاسىمىز جىلدىق تارماق جايلى وي جۇگىرتىپ تۇر (17-ابزاستى قاراڭىز)
قالاي ٴبىز ەحوبانىڭ...
-
وسىعان دەيىن ىستەگەندەرى جايلى وي جۇگىرتىپ، قورقىنىشىمىزدى جەڭە الامىز؟
-
قازىر نە ىستەپ جاتقانى جايلى وي جۇگىرتىپ، قورقىنىشىمىزدى جەڭە الامىز؟
-
بولاشاقتا نە ىستەيتىنى جايلى وي جۇگىرتىپ، قورقىنىشىمىزدى جەڭە الامىز؟
33-ٵن ۋايىمىڭدى ەحوباعا ارت
a jw.org تور بەكەتىنىڭ ىزدەۋ جولاعىنا «سەنىمىن سەرىك ەتكەندەر» نە «وقيعالار» دەپ جازساڭىز، سەنىم نىعايتارلىق مالىمەتتەر تابا الاسىز. ®JW Library قوسىمشاسىنان ماقالالار توپتاماسىنا كىرىپ، «سەنىمىن سەرىك ەتكەندەر» نە «ەحوبا كۋاگەرلەرىنىڭ ٶمىربايانى» دەگەن بولىكتەردى قاراڭىز.
b كەيبىر ەسىمدەر وزگەرتىلگەن.
c «ەحوباعا جاقىندا» كىتابىن قاراڭىز (7-تار.، 13—22-ابز.).
d سۋرەت سيپاتتاماسى: ٴداۋىت ايۋ تاپ بەرگەندە ەحوبا وعان قالاي كۇش بەرگەنى جايلى ويلاندى. سونداي-اق ەحوبا وعان احيمالىك ارقىلى كومەكتەسكەنى جانە پاتشا ەتىپ تاعايىنداعانى جايلى وي جۇگىرتتى.
e سۋرەت سيپاتتاماسى: سەنىمى ٷشىن تۇرمەدە وتىرعان ەر باۋىرلاس كەزىندە ەحوبا وعان تەمەكىنى تاستاۋعا كومەكتەسكەنى، قازىر جاقىن ادامدارىنان كەلگەن حاتتار ارقىلى جىگەرلەندىرىپ جاتقانى، ال بولاشاقتا جۇماقتا ماڭگى ٶمىر سيلايتىنى جايلى ويلانىپ وتىر.
