4-زەرتتەۋ ماقالاسى
30-ٵن ەحوبا، قۇدايىمسىڭ، ادال دوسىم
ەحوبا ٴسىزدى جاقسى كورەدى
«ەحوبا وتە جاناشىر» (جاق. 5:11).
نەگىزگى وي
ەحوبا سۇيىسپەنشىلىگىمەن قالاي ٴبىزدى وزىنە جاقىنداتادى؟ ونىڭ سۇيىسپەنشىلىگىنىڭ ارقاسىندا قالايشا ٴبىز ەشتەڭەدەن تارىقپايمىز، ٶزىمىزدى قاۋىپسىز سەزىنەمىز ٵرى بويىمىزعا كۇش بىتەدى؟
1. ٴسىز ەحوبانى قالاي ەلەستەتەسىز؟
ٴسىز ەحوبانى قالاي ەلەستەتەسىز؟ دۇعا ەتكەندە ويىڭىزعا قانداي تۇلعا كەلەدى؟ ٴبىز ونى كورە الماساق تا، كيەلى كىتاپتا ەحوبا ٵرتۇرلى سوزدەرمەن سيپاتتالعان. مىسالى، ول «كۇنىمىز ٵرى قالقانىمىز»، «جالماپ قوياتىن وت ىسپەتتى» دەلىنگەن (ٴزاب. 84:11؛ ەۆر. 12:29). ال ەزەكيەل كورگەن اياندا ول جاقۇت تاسىنا، لاۋلاعان مەتالعا جانە جارقىراعان كەمپىرقوساققا ۇقساتىلعان (ەزەك. 1:26—28). ەحوبانىڭ وسىنداي كەيبىر سيپاتتامالارىن وقىعاندا، بويىمىزدا تەرەڭ قاستەرلى سەزىم ويانىپ، ٴتىپتى ٶزىمىزدى تۇككە تۇرعىسىز سەزىنۋىمىز مۇمكىن.
2. كەيبىرەۋلەرگە ەحوباعا جاقىنداۋ نەلىكتەن قيىنعا سوعادى؟
2 ەحوبانى كوزىمىزبەن كورمەگەندىكتەن ونىڭ ٴبىزدى جاقسى كورەتىنىنە سەنۋ قيىن بولۋى مۇمكىن. كەيبىرەۋلەر ومىرلەرىندە كوپ قيىندىق بولعاندىقتان، ەحوبا ولاردى سۇيەدى دەگەنگە سەنە المايدى. بالكىم، ولار ەشقاشان اكەلىك ماحابباتتى سەزىنبەگەن شىعار. ەحوبا وسىنداي سەزىمدەرىمىزدى، بۇل سەزىمدەر بىزگە قالاي اسەر ەتەتىنىن جاقسى تۇسىنەدى. سوندىقتان وعان جاقىنداي الۋىمىز ٷشىن بىزگە كيەلى كىتاپتا ٶزىنىڭ جىلى دا جارقىن بەينەسىن اشادى.
3. نەلىكتەن ٴبىز ەحوبانىڭ سۇيىسپەنشىلىگى تۋرالى كوبىرەك بىلگەنىمىز ٴجون؟
3 ەحوبانى ەڭ كەرەمەت سيپاتتايتىن ٴسوز — سۇيىسپەنشىلىك (جوح. 1-ح. 4:8). ەحوبا قانداي؟ دەگەن سۇراققا كيەلى كىتاپتا: »قۇداي — سۇيىسپەنشىلىك»،— دەلىنگەن. ول ٵربىر ارەكەتىن سۇيىسپەنشىلىكتىڭ قوزعاۋىمەن جاسايدى. ونىڭ ماحابباتىنىڭ كەڭدىگى مەن قۇدىرەتى سونداي — ٶزىن سۇيمەيتىن ادامدارعا دا جەتەدى (مات. 5:44، 45). وسى ماقالادا ٴبىز ەحوبانىڭ قانداي ەكەنىنە جانە ونىڭ سۇيىسپەنشىلىگىنە زەر سالامىز. ال قۇدايىمىزدى جاقىننان تانىعان سايىن، وعان دەگەن سۇيىسپەنشىلىگىمىز وسە بەرەدى.
ەحوبا ٴبىزدى قاتتى جاقسى كورەدى
4. ەحوبانىڭ جاناشىرلىعى ٴسىزدى قانداي سەزىمگە بولەيدى؟ (سۋرەتتى دە قاراڭىز.)
4 «ەحوبا وتە جاناشىر» (جاق. 5:11). ول ٶزىن مەيىر-ماحابباتى توگىلگەن اناعا تەڭەگەن (يشايا 66:12، 13). ٴسابيىن الپەشتەپ، باعىپ-قاعاتىن انانى ەلەستەتەيىكشى. ول بالاسىن تىزەسىنە سالىپ الديلەيدى، وعان جىلى دا جۇمساق ۇنمەن سويلەيدى. جىلاسا يا ٴبىر جەرى اۋىرىپ قالسا، ونىڭ جاعدايىن جاساپ، كەرەگىن بەرەدى. ٴبىز قينالعاندا، ەحوبا اكەمىز دە بىزگە سۇيىسپەنشىلىك تانىتاتىنىنا ەش كۇماندانبايىق. ٴزابۇر جىرشىسى: «سارىۋايىمعا سالىنعانىمدا، سەن مەنى جۇباتىپ، جانىما جاي بەردىڭ»،— دەپ جازعان (ٴزاب. 94:19).
«اناسى بالاسىن قالاي جۇباتسا، مەن دە سەندەردى سولاي جۇباتامىن» (4-ابزاستى قاراڭىز)
5. ەحوبانىڭ اينىماس سۇيىسپەنشىلىگىن نە ٷشىن باعالايسىز؟
5 ەحوبانىڭ اينىماس سۇيىسپەنشىلىگى مول (ٴزاب. 103:8). شالىس قادام باسىپ قويعانىمىزدا، ول بىزدەن تەرىس اينالىپ كەتپەيدى. يسرايل حالقى قانشاما رەت ونىڭ جۇرەگىن اۋىرتىپ، كوڭىلىن قالدىردى. ٴبىراق وكىنىش ٴبىلدىرىپ، تەرىس جولدارىنان قايتاتىن بولسا، ولارعا دەگەن سۇيىسپەنشىلىگى ەش اينىمايتىنىن كورسەتىپ، بىلاي دەگەن: «سەن ماعان قىمباتسىڭ، قادىرلىسىڭ. مەن سەنى جاقسى كورەمىن» (يشايا 43:4، 5). ەحوبا ٴبىزدى دە ٴدال سولاي جاقسى كورەدى. ونىڭ سۇيىسپەنشىلىگى ەشقاشان وزگەرمەيتىنىنە سەنىمدى بولساق بولادى. اۋىر قاتەلىك جىبەرىپ قويساق تا، ول ٴبىزدى تاستاپ كەتپەيدى. كۇنامىزعا وكىنىپ، ەحوباعا ورالساق، ول ٴبىزدى ٴدال بۇرىنعىداي سۇيەتىنىن سەزىنەمىز. ول «جومارتتىقپەن كەشىرەتىنىن» ۋادە ەتكەن (يشايا 55:7). كيەلى كىتاپتا ەحوبا ٴبىزدى كەشىرگەن كەزدە ونىڭ «قايتا نىعايتاتىن ۋاقىتى كەلەدى» دەلىنگەن (ەل. ٸس. 3:19).
6. زاكاريا 2:8 دەگى سوزدەردەن ەحوبا جايلى نە بىلەمىز؟
6 زاكاريا 2:8 وقىڭىز. ەحوبا ٴبىزدى كوزىنىڭ قاراشىعىنا تەڭەيدى. ال كوز — ادامنىڭ ەڭ سەزىمتال ٵرى ماڭىزدى مۇشەسى. دەمەك، ەحوبا «كىم ساعان تيىسسە، سول مەنىڭ جاندى جەرىمە تيىسكەنى» دەگىسى كەلگەن. ول ٴبىزدى سۇيگەندىكتەن قانداي كۇي كەشىپ جاتقانىمىزدى بىردەن سەزەدى جانە ٴبىزدى قورعاۋعا اسىق. ٴبىز قينالعاندا، ول دا قينالادى. ەندەشە، ٴبىز بەرىك سەنىممەن: «مەنى كوزىڭنىڭ قاراشىعىنداي ساقتاشى»،— دەپ دۇعا ەتە الامىز (ٴزاب. 17:8).
7. نەگە ەحوبانىڭ ٴبىزدى سۇيەتىنىنە نىق سەنىمدى بولۋىمىز قاجەت؟
7 ەحوبا جەكە ٴسىزدى جاقسى كورەتىنىنە نىق سەنىمدى بولعانىڭىزدى قالايدى. ٴبىراق ول ومىرىڭىزدە بولعان جاعدايلارعا بايلانىستى ونىڭ سۇيىسپەنشىلىگىنە كۇماندانۋىڭىز مۇمكىن ەكەنىن دە بىلەدى. نەمەسە قازىر باستان وتكەرىپ جاتقان جاعدايلاردان بۇل سەنىمدىلىگىڭىز شايقالىپ قالعان شىعار. ەندەشە، ەحوبانىڭ ٴسىزدى سۇيەتىنىنە قالاي سەنىمدى بولا الاسىز؟ بۇل ٷشىن ەحوبا يساعا، مايلانعاندارعا جانە بارلىعىمىزعا سۇيىسپەنشىلىگىن قالاي بىلدىرگەنىن قاراستىرايىق.
ەحوبا سۇيىسپەنشىلىگىن قالاي بىلدىرەدى؟
8. يسا اكەسى ونى سۇيەتىنىنە نەگە سەنىمدى بولعان؟
8 ەحوبا مەن ۇلى ميللياردتاعان جىلدان بەرى بىرگە. ولاردىڭ ٴبىر-بىرىنە باۋىر باسقانى سونشالىق — ونداي تىعىز قارىم-قاتىناس الەمدە جوق. ماتاي 17:5 تە ەحوبا يسانى جاقسى كورەتىنىن اشىق ايتقان. ول جاي عانا «مەن وعان ريزامىن» دەپ ايتا سالعان جوق، قايتا، يسانى «بۇل — مەنىڭ سۇيىكتى ۇلىم» دەپ اتادى. ول يسانى قاتتى جاقسى كورەتىنىن ٴبىز بىلسە ەكەن دەدى (ەفەس. 1:7). ول ۇلىن ماقتان تۇتتى جانە ادامزات ٷشىن جانىن قيۋعا دايىن ەكەنىنە ريزا بولدى. يسا دا اكەسىنىڭ ونى جاقسى كورەتىنىنە ەش كۇماندانباعان. ول «اكەم مەنى جاقسى كورەدى» دەپ قايتا-قايتا سەنىممەن ايتقان، ويتكەنى ەحوبا ونى جاقسى كورەتىنىن بۇكىل ٶڭ بويىمەن سەزىنگەن (جوح. 3:35؛ 10:17؛ 17:24).
9. ەحوبانىڭ مايلانعاندارعا دەگەن سۇيىسپەنشىلىگى قالاي سيپاتتالادى؟ ٴتۇسىندىرىڭىز. (ريمدىكتەرگە 5:5)
9 ەحوبا مايلانعانداردى جاقسى كورەتىنىن دە اشىق ايتقان (ريمدىكتەرگە 5:5 وقىڭىز). وسى تارماق ٴتۇپنۇسقا تىلدە «ەحوبانىڭ مايلانعاندارعا دەگەن سۇيىسپەنشىلىگى اسىپ-تاسىعان اعىن سۋداي» دەگەن ويعا نۇسقايدى. بۇل تەڭەۋ شىنىندا دا ەحوبا ولاردى قانشالىقتى جاقسى كورەتىنىن كورسەتەدى ەمەس پە؟ مايلانعاندار دا وزدەرىنىڭ قۇدايدىڭ «سۇيىسپەنشىلىگىنە بولەنگەنىن» بىلەدى (ياھد. 1). ەلشى جوحان ولاردىڭ سەزىمىن مىنا سوزدەرمەن جەتكىزگەن بولاتىن: «قاراڭدار، قۇدايدىڭ بالالارى دەپ اتالۋىمىز ٷشىن اكەمىز بىزگە زور سۇيىسپەنشىلىك كورسەتتى» (جوح. 1-ح. 3:1). ەحوبا سۇيىسپەنشىلىگىن تەك مايلانعاندارعا عانا توگە مە؟ جوق، ول ٴبارىمىزدى دە سۇيەتىنىن دالەلدەگەن.
10. ەحوبا ٴسىزدى سۇيەتىنىنىڭ ەڭ اسقاق دالەلى قانداي؟
10 ەحوبانىڭ ٴبىزدى سۇيەتىنىنىڭ ەڭ كۇشتى دالەلى قانداي؟ تولەم. الەمدەگى سۇيىسپەنشىلىكتىڭ شىرقاۋ شىڭى وسى ەمەس پە؟! (جوح. 3:16؛ ريم. 5:8). ول ٶزىنىڭ اسىل ۇلىن بۇكىل ادامزات ٷشىن ولىمگە قيدى. بۇنى ەحوبا كۇنالارىمىز كەشىرلىپ، ونىمەن دوس بولا الۋىمىز ٷشىن ىستەدى (جوح. 1-ح. 4:10). تولەم بەرۋ ٷشىن ەحوبا مەن يسا قانداي قيىندىقتارعا توزگەنى جايلى ويلانساق، ولاردىڭ ٴارقايسىسىمىزدى قانشالىقتى جاقسى كورەتىنىن تەرەڭ تۇسىنەمىز (عال. 2:20). تولەم زاڭ تالاپ ەتكەندىكتەن عانا بەرىلگەن جوق، ول — ٴبىزدى سۇيگەندىكتەن بەرىلگەن سي. ەحوبا وزىندەگى ەڭ ارداقتىسىن، ەڭ اسىلىن — يسانى قۇربان ەتىپ، بىزگە دەگەن سۇيىسپەنشىلىگىن دالەلدەدى. ول ٴبىز ٷشىن بالاسىنىڭ ازاپ شەگىپ، ولۋىنە جول بەردى.
11. ەرەميا 31:3 تەن نە بىلەمىز؟
11 سونىمەن، ەحوبا ٴبىزدى ىشتەي عانا جاقسى كورمەيدى ەكەن. قايتا، سەزىمدەرىن بىزگە اشىق بىلدىرەدى (ەرەميا 31:3 وقىڭىز). ول ٴبىزدى جاقسى كورگەندىكتەن، وزىنە جاقىنداتىپ تارتتى (مۇسانىڭ 5-جازباسى 7:7، 8 سالىستىرىڭىز). ەش نارسە دە، ەشكىم دە ونىڭ سۇيىسپەنشىلىگىنەن ٴبىزدى ايىرا المايدى (ريم. 8:38، 39). ونىڭ سۇيىسپەنشىلىگى ٴسىزدى قانداي سەزىمگە بولەيدى؟ قازىر ٴزابۇردىڭ 23-تاراۋىن قاراستىرىپ، ەحوبانىڭ مەيىر-ماحابباتى مەن ايالى الاقانى ٴداۋىتتى قانداي سەزىمگە بولەگەنىن بىلەيىك جانە بۇل بىزگە قالاي اسەر ەتەتىنىن كورەيىك.
ەحوبانىڭ سۇيىسپەنشىلىگى ٴسىزدى قانداي سەزىمگە بولەيدى؟
12. ٴزابۇردىڭ 23-جىرىنىڭ مازمۇنىن قىسقاشا ايتىپ بەرىڭىز.
12 ٴزابۇر 23:1—6 وقىڭىز. ٴزابۇردىڭ 23-جىرىنان ٴداۋىتتىڭ ٴسۇيۋشى، قامقورشى قۇدايىنا دەگەن سەنىمدىلىگى ەسىپ تۇر. ٴداۋىت ٶزىنىڭ باعۋشىسى ەحوباعا ەتەنە جاقىن ەكەنىن سيپاتتاعان. ول ەحوبانىڭ جەتەلەۋىمەن جۇرگەندە قاۋىپسىز سەزىنگەن، ٶزىن وعان تولىقتاي سەنىپ تاپسىرعان. ول ٶمىرىنىڭ ٵر كۇنى ەحوبانىڭ سۇيىسپەنشىلىگىن كورەتىنىنە سەنىمدى بولعان. نە سەبەپتى؟
13. ەحوبا قامقورلايتىنىنا ٴداۋىت نەگە سەنىمدى بولدى؟
13 «مەن ەشتەڭەدەن تارىقپايمىن». ەحوبا ٴداۋىتتى كەرەگىمەن ٵردايىم قامتاماسىز ەتىپ وتىرعاندىقتان، ول ونىڭ قامقورلىعىن كورگەن. بۇعان قوسا، ول ەحوبامەن دوس بولىپ، ونىڭ شاپاعاتىن سەزىنگەن. سوندىقتان دا ول الدا نە بولماسىن، ەحوبا قاجەتىمەن قامداي بەرەتىنىنە سەنىمدى بولدى. ٴداۋىتتىڭ ەحوبانىڭ سۇيىسپەنشىلىگىنە دەگەن سەنىمدىلىگى مىقتى بولعاندىقتان، ول ەشقانداي ۋايىم مەن قورقىنىشقا بەرىلمەگەن. قايتا، باقىت پەن قاناعات سەزىنگەن (ٴزاب. 16:11).
14. ەحوبا قالاي ٴبىزدى سۇيىسپەنشىلىكپەن قامقورلايدى؟
14 ەحوبا اسىرەسە باسىمىزعا قيىن كۇندەر تۋعاندا سۇيىسپەنشىلىكپەن قامقورلايدى. بەتەلدە 20-جىلدان اسا ۋاقىت قىزمەت ەتكەن كلەر a باۋىرلاستىڭ وقيعاسىن الايىق. وتباسىن قيىندىقتار بىرىنەن كەيىن ٴبىرى سوققىلاعاندا، ول نە ىستەرىن بىلمەي، شاراسىز كۇي كەشتى. اكەسى ينسۋلت الادى، ٴبىر ٴسىڭلىسى قاۋىمنان شىعارىلادى، وتباسى كىشىگىرىم بيزنەستەرىنەن، سوسىن ۇيلەرىنەن ايىرىلىپ قالادى. وسى كەزدەرى ەحوبا ولاردى قالاي قامقورلادى؟ كلەر بىلاي دەيدى: «ەحوبانىڭ ارقاسىندا ٵربىر كۇنى وتباسىمدا كەرەكتىنىڭ ٴبارى بولدى. ەحوبا تالاي رەت ٴبىز ويلاعاننان دا كوپ نارسە ىستەدى. ەحوبانىڭ قامقورلىعىن، سۇيىسپەنشىلىگىن سەزىنگەن ساتتەرىمدى ٴجيى ەسكە الامىن. ولار مەن ٷشىن وتە قىمبات. ەحوبا كومەكتەسكەن ساتتەر ماعان قيىندىقتارعا قاراماي، العا قاراي ۇمتىلۋعا كۇش بەرىپ كەلەدى».
15. نەگە ٴداۋىت: «ەحوبا مەنىڭ جانىمدى جادىراتادى»،— دەگەن؟ (سۋرەتتى دە قاراڭىز.)
15 «ول مەنىڭ جانىمدى جادىراتادى». باسىنا ۇيىلگەن سىناقتار مەن قيىندىقتاردىڭ كەسىرىنەن كەيدە ٴداۋىت كۇيزەلىپ كەتەتىن (ٴزاب. 18:4—6). ٴبىراق جاناشىر دا قامقور ەحوبا ونىڭ جانىن جادىراتاتىن. ول شارشاپ، قالجىراعان دوسىن «جاسىل جايلاۋ» مەن «سۋى مول جايىلىمدارعا«جەتەلەيتىن. سوندا ٴداۋىت قايتادان كۇش-قايراتقا كەنەلىپ، ٵرى قاراي ەحوباعا قىزمەت ەتە العان (ٴزاب. 18:28—32).
جاۋلارىنان قاشىپ جۇرسە دە، ٴداۋىت ەحوبانىڭ مەيىر-ماحابباتى مەن ايالى الاقانىن سەزىنىپ، نىعايعان (15-ابزاستى قاراڭىز)
16. ەحوبا ٴسىزدىڭ بويىڭىزعا قالاي قايتا كۇش بىتىرگەن؟
16 بۇگىندە ٴبىز دە ٶمىردىڭ تاۋقىمەتىن كورگەندە، «ەحوبانىڭ اينىماس سۇيىسپەنشىلىگىنىڭ ارقاسىندا تۇگەل جويىلىپ كەتپەيمىز» (ەرم. ز. 3:22؛ قول. 1:11). مىسالى، 19-COVID پاندەمياسى كەزىندە رەيچەل باۋىرلاسىمىزدىڭ كۇيەۋى ونى تاستاپ، ەحوبادان دا باس تارتىپ كەتەدى. ول باسىنا جاي تۇسكەندەي بولىپ، ەڭسەسىن كوتەرە الماي قالادى. ەحوبا وعان قالاي كومەكتەستى؟ «ەحوبا مەنىڭ سۇيىسپەنشىلىك سەزىنۋىمە بار جاعدايدى جاسادى. دوستارىم كەلىپ، ماعان ۋاقىت ٴبولدى، تاماق ٴپىسىرىپ اكەلدى، جىلى سوزدەر جازىپ، تارماقتار جىبەرىپ وتىردى. ولار كۇلىمدەگەن جۇزدەرىمەن كوڭىلىمدى كوتەردى جانە ەحوبا مەنىڭ قامىمدى ويلايتىنىن قايتا-قايتا ەسىمە سالدى. ەحوبا وسىنداي ىستىق ۇياداي ۇلكەن وتباسى سيلاعانىنا العىس ايتۋدان تالمايمىن»،— دەيدى رەيچەل.
17. نەگە ٴداۋىت «قاۋىپ-قاتەردەن قورىقپاعان»؟
17 «قاۋىپ-قاتەردەن قورىقپايمىن، ويتكەنى سەن قاسىمداسىڭ». ٴداۋىتتىڭ ومىرىنە ٴجيى قاۋىپ-قاتەر تونگەن جانە جاۋلارىنىڭ كوبىسى وتە مىقتى بولعان. الايدا ول ەحوبانىڭ سۇيىسپەنشىلىگىنىڭ ارقاسىندا ٶزىن قاۋىپسىز سەزىنگەن. ٴداۋىت ٵربىر جاعدايدا ەحوبا ونىڭ قاسىندا ەكەنىن بىلگەن، سوندىقتان كوڭىلى تىنىش بولعان. ول: «[ەحوبا] بار قورقىنىشىمنان ارىلتتى»،— دەپ جىرلاعان (ٴزاب. 34:4). ٴيا، ٴداۋىتتىڭ قورىققانى راس، ٴبىراق ەحوبانىڭ سۇيىسپەنشىلىگى ونىڭ قورقىنىشىن سەيىلتىپ تاستاعان.
18. بويىڭىزدى ۇرەي بيلەگەندە، ەحوبانىڭ سۇيىسپەنشىلىگى ٴسىزدى قالاي نىعايتادى؟
18 ٴبىزدىڭ دە باسىمىزدان سۇمدىق جاعدايلار ٶتۋى مۇمكىن. وسىندايدا ەحوبانىڭ ٴبىزدى جاقسى كورەتىنىنە سەنىمدى بولۋدىڭ قانداي پايداسى بار؟ سيۋزي ەسىمدى ٸزاشاردى الايىقشى. ۇلى ٶز-وزىنە قول جۇمساعاندا، كۇيەۋى ەكەۋى قانداي جامان كۇي كەشكەنىن ايتىپ بەردى: «تابان استىنان باسىڭا وسىنداي قاسىرەت تۇسسە، مۇلدەم ەس جيا الماي، دارمەنسىز، بەيشارا كۇي كەشەدى ەكەنسىڭ. ٴبىراق ەحوبا ٶزىنىڭ مەيىر-ماحابباتىمەن ٴبىزدى قۇشاعىنا الدى، ٴبىز ودان پانا تاپتىق». جوعارىدا ايتىلعان رەيچەل بولسا بىلاي دەيدى: «ٴبىر كۇنى تۇندە مەن قاتتى قينالدىم. جۇرەگىم قارس ايىرىلا جازداپ، بويىمدى ۇرەي بيلەپ، ۋايىم شىرماپ الدى. سول كەزدە ەحوباعا وكىرىپ جىلاپ دۇعا ەتتىم. ەحوبا سول ساتتە-اق جۇرەگىمە تىنىشتىق سيلاپ، جانىما جاي بەردى. مەن اناسىنىڭ قۇشاعىنان جۇبانىش تاپقان سابيدەي ۇيىقتاپ كەتتىم. وسى جاعدايدى ەشقاشان دا ۇمىتپاسپىن». ال تاسوس دەگەن اقساقال اسكەرگە بارماعانى ٷشىن ٴتورت جىلعا باس بوستاندىعىنان ايىرىلدى. ول ەحوبانىڭ سۇيىسپەنشىلىگى مەن ايالى الاقانىن قالاي سەزىندى؟ «ەحوبا مەنىڭ قاجەتىمدى ارتىعىمەن قامدادى. سوندا ەحوباعا تولىق سەنىم ارتا الاتىنىما كوزىم جەتتى. ادامنىڭ ەڭسەسىن باساتىن تۇرمەنىڭ وزىندە ەحوبانىڭ كيەلى رۋحىنىڭ ارقاسىندا قۋانىشتى بولىپ ٴجۇردىم. ٴبىر تۇيگەنىم، ەحوبادان ەش اجىراماي، جابىسىپ السام، ٵرى قاراي دا ونىڭ سۇيىسپەنشىلىگىنە بولەنە بەرەمىن. ٴسۇيتىپ، مەن تۇرمەدە ٴجۇرىپ تۇراقتى ىزاشارلىق قىزمەتتى باستادىم»،— دەيدى ول.
مەيىر-ماحابباتى مول قۇدايىڭىزعا جاقىن بولىڭىز
19. ا) ەحوبانىڭ ٴبىزدى سۇيەتىنىنە سەنىمدى بولساق، قالاي دۇعا ايتامىز؟ ٵ) سىزگە ەحوبانىڭ سۇيىسپەنشىلىگىن سيپاتتايتىن قاي سوزدەر اسىرەسە ۇنادى؟ (« ەحوبانىڭ سۇيىسپەنشىلىگىن پاش ەتەتىن سوزدەر» دەگەن قورشاۋدى قاراڭىز.)
19 وسى وقيعالاردىڭ ٴبارى «سۇيىسپەنشىلىكتىڭ قۇدايى» ەحوبا بىزبەن بىرگە ەكەنىن دالەلدەيدى (قور. 2-ح. 13:11). ول ٴارقايسىسىمىزدىڭ قامىمىزدى ويلايدى. ونىڭ «اينىماس سۇيىسپەنشىلىگىنە بولەنىپ» جۇرگەنىمىزگە نىق سەنىمدىمىز (ٴزاب. 32:10). بىزگە تانىتقان سۇيىسپەنشىلىگى جايلى ويلانعان سايىن، ەحوبانىڭ ٴتىرى تۇلعا ەكەنىن سەزىنىپ، وعان جاقىنداي تۇسەمىز. ٴبىز ەش يمەنبەي، ەمىن-ەركىن وعان دۇعا ەتىپ، سۇيىسپەنشىلىگىنە قانشالىقتى مۇقتاج ەكەنىمىزدى ايتا الامىز. بۇكىل ۋايىمىمىزدى اشىپ ايتامىز، سەبەبى ونىڭ ٴبىزدى تۇسىنەتىنىن جانە كومەكتەسۋگە اسىق ەكەنىن بىلەمىز (ٴزاب. 145:18، 19).
20. نەگە ٴبىز ەحوبانىڭ سۇيىسپەنشىلىگىنە تارتىلامىز؟
20 ايازدى كۇنى وتتىڭ جىلۋىنا اسىعاتىنىمىزداي، ەحوبا دا ىستىق سۇيىسپەنشىلىگىمەن ٴبىزدى وزىنە تارتادى. ونىڭ سۇيىسپەنشىلىگى وتە كۇشتى بولسا دا، سونداي ايالى دا نازىك. ەندەشە، ەحوبانىڭ سۇيىسپەنشىلىگىنە كەنەلىپ جۇرگەن ٴسىز باقىتتىسىز. ٴبىزدى سۇيگەن ەحوباعا بەرەر جاۋابىمىز مىنانداي بولسىن: «مەن ەحوبانى جاقسى كورەمىن!» (ٴزاب. 116:1)
قالاي جاۋاپ بەرەر ەدىڭىز؟
-
ەحوبانىڭ سۇيىسپەنشىلىگىن قالاي سيپاتتار ەدىڭىز؟
-
ەحوبانىڭ ٴسىزدى قاتتى جاقسى كورەتىنىنە نەگە سەنىمدىسىز؟
-
ەحوبانىڭ سۇيىسپەنشىلىگى ٴسىزدى قانداي سەزىمگە بولەيدى؟
108-ٵن قۇدايدىڭ اينىماس سۇيىسپەنشىلىگى
a كەيبىر ەسىمدەر وزگەرتىلگەن.
