4-زەرتتەۋ ماقالاسى
18-ٵن تولەمگە ريزاشىلىق
تولەم ەحوبا مەن يسا جايلى نەنى ايقىن ەتەدى؟
«قۇداي بىزگە دەگەن سۇيىسپەنشىلىگىن بىلاي كورسەتتى: جالعىز ۇلىن وسى دۇنيەگە جىبەردى» (جوح. 1-ح. 4:9).
نەگىزگى وي
تولەم ەحوبا قۇداي مەن يسا ٴماسىحتىڭ تاماشا قاسيەتتەرىن ايقىن ەتەدى.
1. جىل سايىن ەسكە الۋ كەشىنە بارىپ تۇرعانىمىز نەگە ماڭىزدى؟
تولەم «تەڭدەسى جوق سي» ەكەنىمەن كەلىسەرىڭىز ٴسوزسىز (قور. 2-ح. 9:15). ٴبىز ەحوبا قۇدايمەن دوس بولا الامىز، ماڭگى ٶمىر سۇرەمىز دەگەن ٷمىتىمىز بار. بۇل يسا ٶز ٶمىرىن قۇربان ەتكەننىڭ ارقاسىندا عانا مۇمكىن بولدى. ەندەشە، بىزگە وسىلاي سۇيىسپەنشىلىك تانىتقان ەحوباعا تولەم ٷشىن ٵردايىم ريزاشىلىق ٴبىلدىرىپ ٴجۇرۋىمىز كەرەك ەمەس پە؟! (ريم. 5:8). تولەم ۇيرەنشىكتى نارسەگە اينالىپ كەتپەسىن دەپ جانە بۇل سيدى ٵردايىم باعالاپ ٴجۇرۋىمىز ٷشىن، يسا ٶزىنىڭ ٶلىمىن جىل سايىن ەسكە الىپ تۇرۋدى وسيەت ەتكەن (لۇقا 22:19، 20).
2. بۇل ماقالادا نە جايلى تالقىلايمىز؟
2 بيىل ەسكە الۋ كەشى 12-ٴساۋىر، سەنبى كۇنى وتەدى. بۇل كەشكە قاتىسۋدى بارلىعىڭىز جوسپارلاپ جاتقانىڭىزدا ەش كۇمان جوق. ەسكە الۋ كەشىنىڭ قارساڭىندا ارنايى ۋاقىت ٴبولىپ، ەحوبا مەن يسانىڭ ٴبىز ٷشىن جاساعان جاقسىلىقتارى جايلى وي جۇگىرتكەنىمىز a ماڭىزدى. بۇل ماقالادا ٴبىز تولەم ەحوبا مەن يسانىڭ بولمىسىن تاني تۇسۋگە قالاي كومەكتەسەتىنىن كورەمىز. ال كەلەسى ماقالادا تولەمنىڭ بىزگە اكەلەر يگىلىكتەرىن، سونداي-اق تولەم ٷشىن ريزاشىلىعىمىزدى قالاي كورسەتە الاتىنىمىزدى قاراستىرامىز.
تولەم ەحوبا جايلى نەنى ايقىن ەتەدى؟
3. قالايشا ٴبىر-اق ادامنىڭ ٶلىمى ميلليونداعان ادامنىڭ ٶمىرىن وتەپ الدى؟ (سۋرەتتى دە قاراڭىز.)
3 تولەم ەحوبانىڭ قانشالىقتى ٵدىل قۇداي ەكەنىن دالەلدەيدى (مۇس. 5-ج. 32:4). ادام اتا قۇدايعا مويىنسۇنباعان كەزدە، ٴبارىمىز ودان كۇنا مەن ٶلىمدى مۇرا ەتتىك (ريم. 5:12). سول كۇنا مەن ولىمنەن ٴبىزدى ازات ەتۋ ٷشىن ەحوبا يسانى تولەم رەتىندە بەرگەن. ٴبىراق ٴبىر عانا ادامنىڭ ٶلىمى ميلليونداعان ادامنىڭ ٶمىرىن وتەپ الۋى مۇمكىن بە؟ ەلشى پاۋىل بۇنى بىلاي دەپ تۇسىندىرگەن: «ٴبىر كىسىنىڭ [ادام اتانىڭ] مويىنسۇنباۋى كوپ ادامدى كۇناكار ەتسە، ٴدال سولاي، ٴبىر كىسىنىڭ [يسانىڭ] مويىنسۇنۋى كوپ ادامدى ٵدىل قىلادى» (ريم. 5:19؛ ٴتىم. 1-ح. 2:6). باسقاشا ايتقاندا، ادامزاتتىڭ كۇنا مەن ٶلىمنىڭ قۇلىنا اينالعانىنا ٴبىر عانا كەمەلدى ادامنىڭ مويىنسۇنباعانى سەبەپ بولدى. سوندىقتان ادامداردى ازات ەتۋ ٷشىن مويىنسۇنعىش ٴبىر عانا كەمەلدى ادامنىڭ ٶمىرى جەتكىلىكتى ەدى.
4. نەگە ەحوبا ادام اتانىڭ اقجۇرەك، مويىنسۇنعىش بالالارىنا ماڭگى ٶمىر ٴسۇرۋدى رۇقسات ەتە سالماعان؟
4 يسا ولمەي-اق قويسا بولماس پا ەدى؟ ەحوبا ادام اتانىڭ اقجۇرەك، مويىنسۇنعىش بالالارىنا ماڭگى ٶمىر ٴسۇرۋدى رۇقسات ەتە سالسا بولار ەدى عوي دەپ ويلايتىن شىعارمىز. كەمەلسىز ادامنىڭ تۇرعىسىنان بۇل اقىلعا قونىمدى، مەيىرىمدىلىكپەن جاسالعان شەشىم بولىپ كورىنەتىن شىعار. ٴبىراق بۇنداي شەشىم ٵدىل بولار ما ەدى؟ ادام اتانىڭ جاساعان اۋىر كۇناسىنا كوز جۇما سالۋعا ەحوبانىڭ كەمەلدى ادىلدىگى جول بەرمەس ەدى.
5. ەحوبا ٵردايىم دۇرىس ارەكەت ەتەتىنىنە نەگە سەنىمدى بولا الامىز؟
5 ەحوبا ٶزىنىڭ ادىلدىگىنەن اتتاپ، ادام اتانىڭ كەمەلسىز ۇرپاعىنا ماڭگى ٶمىر سۇرۋگە جول بەرگەندە نە بولار ەدى؟ ادامدار قۇداي بارلىق ۋاقىتتا ٵدىل شەشىم شىعاراتىنىنا سەنۋدەن قالار ەدى. مىسالى، قۇدايدىڭ ٶز ۋادەلەرىن تۇگەل ورىندايتىنىنا ٴجۇز پايىز سەنىمدى بولماس ەدى. ٴبىراق بىزدە قازىر ولاي كۇماندانۋعا تيتتەي دە سەبەپ جوق. ويتكەنى ەحوبا ادىلدىك ورناتۋ ٷشىن ەڭ جوعارعى قۇن تولەپ، ٶزىنىڭ سۇيىكتى ۇلىن قۇربان ەتتى! ەحوبا ٵردايىم دۇرىس ارەكەت ەتەتىن قۇداي ەكەنىنە بۇدان اسقان قانداي دالەل كەرەك؟!
6. ەحوبانى تولەم بەرۋگە تاعى قاي قاسيەت تالپىندىردى؟ (جوحاننىڭ 1-حاتى 4:9، 10)
6 تولەم ەحوبانىڭ ٵدىل قۇداي ەكەنىن عانا ەمەس، ونىڭ ٴبىزدى قانشالىقتى جاقسى كورەتىنىن دە ايقىن كورسەتەدى (جوح. 3:16؛ جوحاننىڭ 1-حاتى 4:9، 10 وقىڭىز). ەحوبانىڭ ٶز ۇلىن ولىمگە قيعانىنىڭ تاعى ٴبىر سەبەبى — ول ٴبىزدىڭ ماڭگى ٶمىر سۇرگەنىمىزدى عانا ەمەس، ٶزىنىڭ وتباسىنا قايتا ورالعانىمىزدى دا قالادى. ادام اتا كۇنا جاساعاننان كەيىن ەحوبانىڭ وتباسىنان الاستاتىلدى. سونىڭ كەسىرىنەن قازىر ەشقايسىسىمىز دا ەحوبانىڭ وتباسىندا ەمەسپىز. ٴبىراق تولەمنىڭ ارقاسىندا ەحوبا سەنىم تانىتاتىن، مويىنسۇنعىش ادامداردىڭ ٴبارىن بولاشاقتا ٶزىنىڭ وتباسىنا قايتا قابىلدايدى. تولەمنىڭ ارقاسىندا ٴتىپتى قازىردىڭ وزىندە كۇنالارىمىز كەشىرىلىپ، ەحوبامەن دە، باۋىرلاستارمەن دە دوستىق قارىم-قاتىناستامىز. راسىمەن دە، ەحوبانىڭ سۇيىسپەنشىلىگىنە بولەنىپ جۇرگەن نەتكەن باقىتتى جاندارمىز! (ريم. 5:10، 11).
7. يسانىڭ كورگەن ازابى ەحوبا ٴبىزدى قاتتى جاقسى كورەتىنىن قالاي دالەلدەيدى؟
7 ٶز ۇلىن ازاپتى ولىمگە قيۋ ەحوباعا قانشالىقتى وڭاي بولماعانىن تۇسىنسەك، ونىڭ ٴبىزدى قانشالىقتى جاقسى كورەتىنىن كورەمىز. كەزىندە شايتان ادام قينالعاندا ەحوباعا ادال بولماي، ودان تەرىس اينالىپ كەتەدى دەپ ايتقان ەدى. ونىڭ وتىرىگىن جوققا شىعارۋ ٷشىن ەحوبا يسانىڭ ولەر الدىندا بارىنشا ازاپتالۋىنا جول بەردى (ٵيۇپ 2:1—5؛ پەت. 1-ح. 2:21). ەحوبا ٴدىني جەتەكشىلەردىڭ يسانى مازاق ەتىپ جاتقانىن دا، ساربازداردىڭ ونى اياۋسىز ساباپ، كەيىن باعاناعا شەگەلەگەنىن دە كوكتەن كورىپ تۇردى. ٴبىراق ول ۇلىنىڭ وسىلاي ازاپتالىپ ٶلتىرىلىپ جاتقانىنا شىداپ، ەش اراشا تۇسپەدى (مات. 27:28—31، 39). بۇنىڭ ٴبارىن كەز كەلگەن ۋاقىتتا توقتاتۋعا ەحوبانىڭ قۇدىرەتى جەتەر ەدى. اسىرەسە قارسىلاستارىنىڭ «قۇدايعا ۇنامدى بولسا، ٴدال قازىر قۇتقارىپ السىن!» دەگەن سوزدەرىن ەستىگەندە، ەحوبا ٴدال ايتقاندارىنداي ىستەپ، يسانى قۇتقارىپ الۋىنا بولار ەدى (مات. 27:42، 43). ٴبىراق ەحوبا وسىلاي اراشا تۇسكەندە، تولەم بەرىلمەس ەدى. ال تولەم بەرىلمەسە، ەشقانداي ٷمىت تە بولماس ەدى. ٴبىزدىڭ ٷمىتىمىز بولسىن دەپ، ەحوبا ۇلىنىڭ سوڭعى دەمى شىققانشا ەش ارەكەت ەتپەي، شىداپ وتىردى.
8. ۇلى قينالعاندا ەحوبا دا قينالدى ما؟ ٴتۇسىندىرىڭىز. (سۋرەتتى دە قاراڭىز.)
8 قۇدىرەتى شەكسىز قۇداي ٴبارىن قالپىنا كەلتىرە الاتىندىقتان، ول ەش نارسە سەزىنبەيدى دەپ ويلامايىق. ٴبىز قۇدايعا ۇقساس ەتىپ جاراتىلعانبىز، سوندىقتان ونىڭ بويىندا دا بىزدىكىندەي ٵرتۇرلى سەزىمدەر بار دەپ تۇجىرىمداۋ ورىندى. كيەلى كىتاپتا ەحوبانىڭ «جۇرەگى اۋىرىپ»، «قايعىرعان» كەزدەرى بولعانى ايتىلعان (ٴزاب. 78:40، 41). قازىر ەحوبانىڭ جاعدايىن ىبىرايىمدىكىمەن سالىستىرىپ كورەيىكشى. ەحوبا ىبىرايىمعا جالعىز ۇلى ىسقاقتى قۇرباندىققا شالۋدى بۇيىرعان (مۇس. 1-ج. 22:9—12؛ ەۆر. 11:17—19). ىسقاقتىڭ ٶمىرى ٴبىر-اق ساتتە ٷزىلىپ، ازاپ شەكپەي ولەتىنىن بىلسە دە، ىبىرايىمنىڭ جانى ازاپقا تۇسكەنى ايتپاسا دا تۇسىنىكتى. ال ەندى قۇدايسىز ادامدار يسانى ابدەن قيناپ، قورلاپ، ٶلتىرىپ جاتقاندا ەحوبانىڭ قانشالىقتى قايعىرىپ، قينالعانىن ەلەستەتە بەرىڭىز (jw.org تور بەكەتىنەن «سەنىمىن سەرىك ەتكەندەر: ىبىرايىم (2-ٴبولىم)» دەگەن ۆيدەونى قاراڭىز).
9. ريمدىكتەرگە 8:32، 38، 39 دان ەحوبانىڭ سۇيىسپەنشىلىگى جايلى نە ٴتۇيدىڭىز؟
9 تولەم تاعى مىنانى ايقىن ەتەدى: ەحوبانىڭ سۇيىسپەنشىلىگى ەڭ جاقىن دوسىمىزدىڭ دا، ٴتىپتى ەڭ جاقىن دەگەن ادامىمىزدىڭ دا سۇيىسپەنشىلىگىنەن اسىپ تۇسەدى (ريمدىكتەرگە 8:32، 38، 39 وقىڭىز). ەحوبا ٴبىزدى ٴتىپتى وزىمىزدەن دە ارتىق جاقسى كورەدى. ٴسىز ماڭگى ٶمىر سۇرگىڭىز كەلە مە؟ ەحوبا بۇنى سىزدەن بەتەر قالايدى. كۇنالارىڭىزدىڭ كەشىرىلگەنىن قالايسىز با؟ ەحوبا بۇنى سىزدەن ارتىق قالايدى. ونىڭ بىزدەن بار سۇرايتىنى — سەنىم مەن مويىنسۇنۋشىلىق تانىتىپ، تولەمگە ريزاشىلىق ٴبىلدىرۋ. شىنىمەن دە، تولەم — ەحوبانىڭ بىزگە دەگەن اسقان سۇيىسپەنشىلىگىنىڭ ايقىن كورىنىسى. ال كەلەر جاڭا زاماندا ەحوبانىڭ تاڭعاجايىپ ىستەرىن كورىپ، ونىڭ ٴبىزدى قانشالىقتى جاقسى كورەتىنىنە ودان سايىن كوزىمىز جەتە بەرەدى (ۋاع. 3:11).
تولەم يسا جايلى نەنى ايقىن ەتەدى؟
10. ا) يسا ولەر الدىندا نەنى قاتتى ۋايىمدادى؟ ٵ) يسا ەحوبانىڭ ەسىمىن قالاي اقتاپ شىقتى؟ (« يسا مىنسىزدىك ساقتاپ، ەحوبانىڭ ەسىمىن اقتاپ شىقتى» دەگەن قورشاۋدى دا قاراڭىز.)
10 يسا بارىنەن بۇرىن اكەسىنىڭ ابىرويىن ويلاعان (جوح. 14:31). قۇدايدى قورلادى، وعان ٴتىل تيگىزدى دەپ ايىپتالعانىم اكەمنىڭ ەسىمىنە كىر كەلتىرىپ جۇرمەي مە ەكەن دەگەن ۋايىم يسانىڭ جانىن جەگىدەي جەدى. ونىڭ: «اكە، مۇمكىن بولسا، وسى توستاعاندى مەنەن اكەتە كور»،— دەپ دۇعا ەتكەنى دە سودان (مات. 26:39). ولە-ولگەنشە مىنسىزدىك ساقتاپ، يسا اكەسىنىڭ ەسىمىن تولىقتاي اقتاپ شىقتى.
11. يسا ادامداردى ەرەكشە جاقسى كورەتىنىن قالاي كورسەتتى؟ (جوحان 13:1)
11 تولەم يسا ادامداردى، اسىرەسە شاكىرتتەرىن ەرەكشە جاقسى كورەتىنىن ايقىن دالەلدەيدى (ناق. س. 8:31؛ جوحان 13:1 وقىڭىز). يسا جەردەگى قىزمەتى وڭاي بولمايتىنىن، ٴتىپتى ٶزىنىڭ ازاپتى ولىممەن ولەتىنىن جاقسى ٴبىلدى. ٴبىراق ول وزىنە جۇكتەلگەن بۇل مىندەتتى ايتەۋىر ٴبىر اتقارىپ شىقسام بولدى دەمەگەن. كەرىسىنشە، ول جانىن سالىپ ۋاعىزداعان، ٴتالىم بەرگەن جانە وزگەلەرگە قىزمەت ەتكەن. ٴتىپتى ولەتىن كۇنى دە يسا قىسىلتاياڭ شاققا قاراماستان، ەلشىلەرىنىڭ اياقتارىن جۋىپ، ٴتالىم بەرگەن، ولاردىڭ كوڭىلدەرىن ورنىقتىرىپ، رۋحتارىن قايرايتىن جىگەرلى سوزدەر ايتقان (جوح. 13:12—15). باعانادا ٸلىنىپ، قينالىپ تۇرعان كەزىندە دە ول قاسىنداعى قىلمىسكەرگە ٷمىت بەرەتىن سوزدەر ايتتى، ٴتىپتى اناسىن شاكىرتىنە تابىستاپ كەتتى (لۇقا 23:42، 43؛ جوح. 19:26، 27). جانىن قيىپ قانا قويماي، ادامدار ٷشىن ٶمىرىنىڭ سوڭىنا دەيىن قام جەگەنى يسا ادام بالاسىن شىن سۇيەتىنىن ايقىن دالەلدەيدى.
12. يسا ٵلى كۇنگە دەيىن بىزگە قالاي كومەكتەسىپ كەلەدى؟
12 يسا ٴبىزدىڭ يگىلىگىمىز ٷشىن «ٴبىر رەت ٶلدى»، ٴبىراق ول ٵلى كۇنگە دەيىن ٴبىزدىڭ قامىمىزدى ويلاپ كەلەدى (ريم. 6:10). بىزدەر تولەمنىڭ يگىلىگىن كورسە ەكەن دەپ ول بارىنشا ەڭبەكتەنىپ جاتىر. مىسالى، قازىر ول پاتشا، باس ٴدىني قىزمەتكەر جانە قاۋىمنىڭ باسى رەتىندە تىنباي قىزمەت ەتىپ ٴجۇر (قور. 1-ح. 15:25؛ ەفەس. 5:23؛ ەۆر. 2:17). مايلانعاندار مەن ۇلى جاماعاتتى جيناۋ ٸسى دە يساعا تاپسىرىلعان، بۇل ٸس زور الاپاتتىڭ سوڭىنا دەيىن جالعاسادى b (مات. 25:32؛ مار. 13:27). يسا وسى سوڭعى كۇندەرى ادال قىزمەتشىلەرىنىڭ رۋحاني توق بولىپ جۇرۋىنە دە باس-كوز بولىپ كەلەدى (مات. 24:45). ول مىڭ جىل بويى بيلىك ەتكەن كەزدە دە ادامداردىڭ يگىلىگى ٷشىن قىزمەت ەتەتىن بولادى. راسىمەن دە، يسا ٶزىن بىزگە تۇگەلدەي ارناعان. ول — ەحوبانىڭ بىزگە بەرگەن ەڭ كەرەمەت سيى!
ٴبىلىمىڭىزدى تەرەڭدەتۋدى توقتاتپاڭىز
13. ەحوبا مەن يسا ٴبىزدى قانشالىقتى جاقسى كورەتىنىن تەرەڭىرەك تۇسىنە بەرۋ ٷشىن نە ىستەگەنىمىز ماڭىزدى؟
13 وزىڭىزگە تانىتىلعان سۇيىسپەنشىلىك جايلى وي جۇگىرتىپ جۇرسەڭىز، ەحوبا مەن يسانىڭ ٴسىزدى قانشالىقتى جاقسى كورەتىنىن جاڭا قىرىنان تۇسىنە بەرەسىز. مىسالى، ەسكە الۋ كەشى قارساڭىندا ٴتورت ىزگى حاباردىڭ ٴبىر-ەكەۋىن مۇقيات وقىپ شىقساڭىز بولادى. ٴبىر دەگەندە كوپ مالىمەتتى وقۋىم كەرەك دەپ ويلاماڭىز. كەرىسىنشە، اسىقپاي وقىپ، ەحوبا مەن يسانى جاقسى كورە تۇسۋگە تالپىندىراتىن ويلاردى بايقاۋعا تىرىسىڭىز. كەيىن بىلگەندەرىڭىزدى وزگەلەرمەن مۇمكىندىگىنشە بولىسە ٴجۇرىڭىز.
14. تولەم جانە باسقا دا ىلىمدەر جايلى كوبىرەك بىلە بەرۋ ٷشىن ىزدەنىس جاساۋ نەگە ماڭىزدى؟ (ٴزابۇر 119:97) (سۋرەتتى دە قاراڭىز.)
14 شىندىقتا جۇرگەنىڭىزگە ٴبىرتالاي جىل بولسا، بالكىم مىناداي وي كەلەتىن شىعار: «قۇدايدىڭ ادىلدىگى، سۇيىسپەنشىلىگى جانە تولەم سياقتى تاقىرىپتار ابدەن تالقىلانعان عوي، جاڭا وي تابۋ كەيدە مۇمكىن ەمەس». نەگىزىنەن، ٴبىز كيەلى كىتاپتاعى شىندىقتاردىڭ تۇبىنە ەشقاشان جەتىپ بولمايمىز. ۇيرەنەتىن جاڭا نارسەلەرىمىز ٵردايىم بولادى. سوندىقتان باسىلىمدارىمىزداعى اعىل-تەگىل مالىمەتتىڭ بار يگىلىگىن كورۋگە تىرىسىڭىز. كيەلى كىتاپتى وقىپ جاتقاندا قانداي دا ٴبىر جەرىن تۇسىنبەسەڭىز، قوسىمشا ىزدەنىڭىز. سوسىن سول كۇننىڭ بارىسىندا بىلگەندەرىڭىز جايلى وي جۇگىرتىڭىز. مىسالى، «وسى بىلگەنىم ەحوبا جايلى، يسا جايلى جانە ولاردىڭ ماعان دەگەن سۇيىسپەنشىلىگى جايلى نە ايتادى؟» دەپ ويلانىڭىز (ٴزابۇر 119:97 وقىڭىز).
15. نەگە ٴبىز كيەلى كىتاپتان جاڭا اسىل تاستار ىزدەي بەرۋىمىز كەرەك؟
15 ىزدەنىس جاساعاندا، ٵردايىم جاڭا نە قىزىقتى نارسە تابا بەرمەۋىڭىز مۇمكىن. مۇندايدا كوڭىلىڭىز تۇسپەسىن. ٶزىڭىزدى التىن ىزدەپ ٴجۇرمىن دەپ ەسەپتەڭىز. ادەتتە التىن ىزدەۋشىلەر ٴبىر ٴتۇيىر التىندى تابۋ ٷشىن قانشاما ساعات، ٴتىپتى قانشاما كۇن جۇمسايدى. ٴبىراق ولار ىزدەۋدەن ەش شارشامايدى، ويتكەنى ٴبىر ٴتۇيىر التىننىڭ قانشالىقتى قىمبات ەكەنىن بىلەدى. كادىمگى التىننىڭ قاسىندا كيەلى كىتاپتاعى اسىل تاستار الدەقايدا قۇندى ەمەس پە؟! (ٴزاب. 119:127؛ ناق. س. 8:10). سوندىقتان كيەلى كىتاپتى وقۋ كەستەڭىزدەن اينىماي، جاڭا ويلار ىزدەۋدەن تالماڭىز (ٴزاب. 1:2).
16. ەحوبا مەن يساعا قالاي ەلىكتەسەڭىز بولادى؟
16 ىزدەنىس جاساۋ بارىسىندا بىلگەندەرىڭىزدى ٸس جۇزىندە قالاي قولداناتىنىڭىزدى دا ويلانىڭىز. مىسالى، ەحوبانىڭ ادىلدىگىنە ەلىكتەپ، ەشكىمدى ٴبولىپ-جارماڭىز. اكەسىن جانە ادامداردى جاقسى كورگەن يسا سياقتى ەحوبانىڭ ەسىمى ٷشىن ازاپ شەگۋگە دايىن بولىڭىز جانە باۋىرلاستارىڭىزعا جانىڭىزدى سالىپ قىزمەت ەتىڭىز. سونداي-اق يساعا ەلىكتەپ، ادامدارعا ۋاعىزداڭىز، سوندا ولار دا ەحوبانىڭ تەڭدەسسىز سيىنىڭ يگىلىگىن كورە الادى.
17. كەلەسى ماقالادا نە قاراستىرامىز؟
17 تولەم جايلى تۇسىنىگىمىز ارتقان سايىن، ريزاشىلىعىمىز دا ارتىپ، ەحوبا مەن يسانى ودان سايىن جاقسى كورە تۇسەمىز. بۇنى كورىپ، ەحوبا مەن يسا دا ٴبىزدى ودان سايىن جاقسى كورە تۇسەدى (جوح. 14:21؛ جاق. 4:8). ەندەشە، ەحوبا بەرىپ وتىرعان رۋحاني اس-سۋدىڭ كومەگىمەن تولەم جايلى ٴبىلىمىڭىزدى تەرەڭدەتە بەرىڭىز. كەلەسى ماقالادا تولەمنىڭ يگىلىكتەرى جايلى جانە بىزگە تانىتقان سۇيىسپەنشىلىگى ٷشىن ەحوباعا قالاي ريزاشىلىق بىلدىرە الاتىنىمىزدى قاراستىرامىز.
107-ٵن ٴسۇيۋدىڭ كەمەلدى ۇلگىسى
a ٴسوز ٴمانى: «وي جۇگىرتۋ» دەگەن قانداي دا ٴبىر تاقىرىپقا بارىنشا دەن قويىپ، سول تاقىرىپتى ەگجەي-تەگجەيلى، تەرەڭىرەك قاراستىرۋدى بىلدىرەدى.
b ماتاي 24:31 مەن مارقا 13:27 دەگى يسانىڭ «تاڭداپ الىنعانداردى جيناپ الۋ» جايلى ايتقان سوزدەرى پاۋىلدىڭ ەفەستىكتەرگە 1:10 داعى «كوكتەگىلەردىڭ ٴبارىن... جيناۋ» دەگەن سوزدەرىنە قاتىسى جوق. پاۋىل ەحوبا ٶزىنىڭ رۋحاني ۇلدارىن تاڭداپ، ولاردى كيەلى رۋحپەن مايلايتىن ۋاقىت جايلى ايتقان. ال يسا زور الاپات كەزىندە جەردە قالعان مايلانعاندار كوككە جينالاتىن ۋاقىت جايلى ايتقان.