2-زەرتتەۋ ماقالاسى
132-ٵن ەندى ٴبىز ٴبىر ٴبۇتىنبىز
كۇيەۋلەر، ايەلدەرىڭىزگە قۇرمەت كورسەتىڭىزدەر
«كۇيەۋلەر، ايەلدەرىڭە... قۇرمەت كورسەتىڭدەر» (پەت. 1-ح. 3:7).
نەگىزگى وي
نەكەدە كۇيەۋ ايەلىنە سوزىمەن دە، ىسىمەن دە قۇرمەت كورسەتۋ كەرەك.
1. ەحوبا نەكە قۇرىلىمىن نە ٷشىن ورناتقان؟
ەحوبا — «باقىتتى قۇداي» (ٴتىم. 1-ح. 1:11). ول ٴبىزدىڭ دە باقىتتى بولعانىمىزدى قالايدى. ٶمىرىمىزدى باقىتقا تولتىرۋ ٷشىن ول بىزگە كوپتەگەن سيلار بەرگەن (جاق. 1:17). سول سيلاردىڭ ٴبىرى — نەكە. ەر مەن ايەل نەكە قۇرعان كەزدە، ٴبىر-ٴبىرىن ٴسۇيىپ، قۇرمەتتەپ، ايالاپ ٶتۋدى ۋادە ەتەدى. ەگەر ولار قارىم-قاتىناستارىن بەرىك ەتىپ ساقتايتىن بولسا، ەكەۋى دە باقىتتى ٶمىر كەشەدى (ناق. س. 5:18).
2. بۇگىندە كوپ ادامنىڭ نەكەسى قانداي كۇيدە؟
2 وكىنىشكە قاراي، بۇل دۇنيەدە كوپ ەرلى-زايىپتىلار ۇيلەنگەن كۇنى بەرگەن انتتارىن ۇمىتقان. سوندىقتان ولار نەكەدە باقىتسىز. دۇنيەجۇزىلىك دەنساۋلىق ساقتاۋ ۇيىمىنىڭ مالىمدەمەسىنە ساي، ەر ادامداردىڭ كوبى ايەلدەرىنە زورلىق-زومبىلىق كورسەتەدى، ياعني قول جۇمسايدى، اۋىر سوزدەر ايتىپ قورلايدى، ەموسيالىق قىسىم كورسەتەدى. بۇنداي ەر ادام جۇرتتىڭ كوزىنشە ايەلىنە جاقسى قاراپ، ال ۇيدە وعان كۇن كورسەتپەيدى. بۇل ازداي، پورنوگرافيا كورەتىن كۇيەۋلەر دە بار. بۇل — ايەلدى قادىر-قاسيەتى مەن باقىتىنان ايىرىپ جۇرگەن تاعى ٴبىر ماسەلە.
3. ەر ادامنىڭ ٶز ايەلىنە زورلىق-زومبىلىق كورسەتۋىنە قانداي جايتتار سەبەپ بولۋى مۇمكىن؟
3 كەيبىر ەرلەردىڭ ٶز ايەلدەرىنە زورلىق-زومبىلىق كورسەتۋىنىڭ سەبەبى نەدە؟ كەيبىرەۋلەر اكەسى اناسىنا قول كوتەرىپ، قورلىق كورسەتكەنىن كورىپ وسكەن، سوندىقتان ايەلگە بۇلاي قاراۋ دۇرىس دەپ ويلايدى. ال تاعى بىرەۋلەرگە مادەنيەت اسەر ەتكەن. ويتكەنى كەيبىر مادەنيەتتە «ناعىز ەركەك» بولعىڭ كەلسە، ايەلىڭ اشساڭ الاقانىڭدا، جۇمساڭ جۇدىرىعىڭدا بولۋ كەرەك دەگەن پىكىر قالىپتاسقان. كەيبىرەۋلەرىنە ەموسيالارىن قاداعالاۋدى، اشۋ-ىزاسىن جۇگەندەۋدى ەشكىم ۇيرەتپەگەن بولۋى مۇمكىن. تاعى بىرەۋلەرى ٴجيى پورنوگرافيا كورگەندىكتەن، كوزقاراستارى بۇزىلىپ، ايەل تەك جىنىستىق قالاۋلارىن قاناعاتتاندىرۋ ٷشىن عانا كەرەك دەپ ويلاپ كەتكەن. كەيبىر مالىمدەمەگە ساي، 19-COVID پاندەمياسى كەزىندە بۇنداي ابيۋزدىك قارىم-قاتىناس ودان سايىن كوبەيگەن. ٴبىراق كۇيەۋلەردىڭ ٶز ايەلدەرىنە كورسەتىپ جاتقان زورلىق-زومبىلىعىن ەشتەڭە دە اقتامايدى.
4. ٴماسىحشى كۇيەۋلەر نەدەن ساق بولۋ كەرەك جانە نەگە؟
4 وسى دۇنيەنىڭ ايەلدەرگە دەگەن بۇرمالانعان كوزقاراسى اسەر ەتپەس ٷشىن ٴماسىحشى كۇيەۋلەر ساق بولۋ كەرەك a. بۇل نەگە ماڭىزدى؟ ويتكەنى ادامنىڭ ويى ٸس-ارەكەتىنە اسەر ەتەدى. كەزىندە ەلشى پاۋىل دا ريمدەگى مايلانعان ماسىحشىلەردى «وسى زاماننىڭ ٶمىر سالتىن ۇلگى ەتپەڭدەر» دەپ ەسكەرتكەن (ريم. 12:1، 2). ول كەزدە ريمدەگى قاۋىمنىڭ قۇرىلعانىنا ٴبىراز جىل بولعان ەدى. پاۋىلدىڭ ەسكەرتكەنىنە قاراعاندا، كەيبىرەۋلەرگە وسى دۇنيەنىڭ ٴداستۇرى مەن وي قالپى ٵلى دە ىقپال ەتىپ جاتقان. پاۋىل ولاردى وي-سانالارى مەن ٸس-ارەكەتتەرىن وزگەرتۋگە تالپىندىردى. ونىڭ بۇل كەڭەسى بۇگىندەگى ٴماسىحشى كۇيەۋلەرگە دە قاتىستى. وكىنىشكە قاراي، كەيبىر ٴماسىحشى كۇيەۋلەرگە وسى دۇنيەنىڭ كوزقاراسى ىقپال ەتىپ جاتىر. ىقپال ەتكەنى سونشا — كەيبىرى ٴتىپتى ايەلىنە زورلىق-زومبىلىق كورسەتۋگە دەيىن بارادى b. ٴبىراق ەحوبا كۇيەۋلەردەن نە كۇتەدى؟ ولاردىڭ ٶز ايەلدەرىنە قالاي قاراعانىن قالايدى؟ بۇنىڭ جاۋابىن وسى ماقالانىڭ نەگىزگى تارماعىنان بىلەمىز.
5. پەتىردىڭ 1-حاتى 3:7 گە ساي، كۇيەۋلەر ايەلدەرىنە قالاي قاراۋ كەرەك؟
5 پەتىردىڭ 1-حاتى 3:7 وقىڭىز. ەحوبا كيەلى كىتاپتا كۇيەۋلەرگە ايەلدەرىنە قۇرمەت كورسەتۋدى ناقتى بۇيىرعان. قۇرمەت كورسەتۋ دەگەن ادامدى ارداقتاۋ، قادىرلەۋ، سيلاۋ دەگەندى بىلدىرەدى. ايەلىن قۇرمەتتەي بىلەتىن كۇيەۋ ونى قامقورلايدى، ايالايدى. بۇل ماقالادا كۇيەۋلەر ٶز ايەلدەرىنە قالاي قۇرمەت كورسەتە الاتىندارىن قاراستىرامىز. ٴبىراق ونىڭ الدىندا قانداي ارەكەتتەر ايەلدىڭ قادىرىن تۇسىرەتىنىنە توقتالىپ وتەيىك.
ايەلىڭىزدىڭ قادىرىن تۇسىرەتىن ارەكەتتەردەن اۋلاق بولىڭىز
6. ايەلدەرىنە قول كوتەرەتىن كۇيەۋلەرگە ەحوبا قالاي قارايدى؟ (قولوستىقتارعا 3:19)
6 ايەلگە قول كوتەرۋ. ەحوبا قاتىگەزدىك تانىتاتىن كەز كەلگەن ادامدى جەك كورەدى (ٴزاب. 11:5). ال ايەلدەرىنە زورلىق-زومبىلىق كورسەتەتىن كۇيەۋلەردى جانى تىپتەن جاراتپايدى (مالح. 2:16؛ قولوستىقتارعا 3:19 وقىڭىز). نەگىزگى تارماعىمىز پەتىردىڭ 1-حاتى 3:7 دە ايتىلعانداي، كۇيەۋلەر ايەلدەرىنە دۇرىس قاراماسا، قۇدايمەن قارىم-قاتىناستارىن بۇزىپ الادى. ەحوبا ٴتىپتى ولاردىڭ دۇعالارىن تىڭداماي قويۋى مۇمكىن.
7. ەفەستىكتەرگە 4:31، 32 گە ساي، كۇيەۋلەر نەدەن اۋلاق بولۋ كەرەك؟ («ٴسوز ٴمانىن» دە قاراڭىز.)
7 ايەلدى سوزبەن قورلاۋ. كەيبىرەۋلەر ايەلدەرىنىڭ جانىن جارالاپ، اشۋمەن وتە اۋىر سوزدەر ايتادى. ٴبىراق ەحوبا «اشۋ-ىزا، ايقايلاسۋ، قورلىق سوزدەردى c» جەك كورەدى (ەفەستىكتەرگە 4:31، 32 وقىڭىز). ونىڭ قۇلاعى ٴبارىن ەستيدى. كۇيەۋلەردىڭ ٶز ايەلدەرىنە قالاي سويلەيتىنى، ٴتىپتى ايەلىمەن وڭاشا قالعاندا نە ايتاتىنى دا ەحوبا ٷشىن ٴبارىبىر ەمەس. سوندىقتان كۇيەۋ ايەلىنە دورەكى سويلەسە، ٶز نەكەسىن عانا ەمەس، قۇدايمەن قارىم-قاتىناسىن دا قۇرتادى (جاق. 1:26).
8. ەحوبا پورنوگرافياعا قالاي قارايدى جانە نەگە؟
8 پورنوگرافيا كورۋ. ەحوبا پورنوگرافيانى دا جەك كورەدى. سوندىقتان ۇياتسىز بەينەلەردى كورەتىن كۇيەۋلەر ەحوبامەن قارىم-قاتىناسىن بۇزادى. بۇل عانا ەمەس، بۇنداي ارەكەتىمەن ول ٶز ايەلىنىڭ قادىر-قاسيەتىن اياق استى ەتەدى d. ەحوبا كۇيەۋلەردىڭ ٶز ايەلدەرىنە ادال بولعانىن قالايدى. ايەلىنە ادال ادام ازعىندىققا بارماق تۇگىلى، بوتەن ايەل جايلى ويلامايدى دا. يسا دا بوتەن ايەلگە قۇمارتا قاراۋ «نەكە ادالدىعىن بۇزۋمەن» تەڭ ەكەنىن ايتقان e (مات. 5:28، 29).
9. ەحوبا كۇيەۋلەردىڭ جىنىستىق قاتىناس كەزىندەگى قانداي ارەكەتىن جەك كورەدى جانە نەگە؟
9 ايەلدىڭ سەزىمىن ەسكەرمەۋ. كەيبىر كۇيەۋلەر جىنىستىق قاتىناس كەزىندە ايەلدەرىن وزدەرى قالامايتىن، ٴتىپتى ار-ۇجدانى جول بەرمەيتىن نارسەلەردى ىستەۋگە زورلاپ كۇشتەيدى. ەحوبا وزىمشىلدىكپەن جاسالاتىن بۇنداي ەسسىز ارەكەتتى جەك كورەدى. ويتكەنى ول كۇيەۋلەردەن ايەلدەرىن ٴسۇيىپ، ايالاپ، سەزىمدەرىمەن ساناسىپ، قۇرمەت كورسەتۋدى تالاپ ەتەدى (ەفەس. 5:28، 29). ەندەشە، ايەلىنە زورلىق-زومبىلىق كورسەتىپ جۇرگەن نە پورنوگرافيا كورەتىن ادەتى بار ٴماسىحشى كۇيەۋلەر نە ىستەسە بولادى؟ ولارعا ويىن جانە ٸس-ارەكەتىن وزگەرتۋگە نە كومەكتەسەتىنىن قاراستىرايىق.
ايەلىنىڭ قادىرىن ٴتۇسىرۋدى دوعارۋ ٷشىن كۇيەۋ نە ىستەۋ كەرەك؟
10. كۇيەۋلەر يسادان قاي جاعىنان ۇلگى السا بولادى؟
10 ايەلدەرىنە زورلىق-زومبىلىق كورسەتۋدى، قادىرىن ٴتۇسىرۋدى دوعارۋ ٷشىن كۇيەۋلەردىڭ يساعا ەلىكتەگەندەرى اسا ماڭىزدى. يسانىڭ ەشقاشان ايەلى بولماسا دا، ونىڭ شاكىرتتەرمەن قارىم-قاتىناسى قانداي بولعانىنا قاراپ، كۇيەۋلەر ايەلدەرىن قۇرمەتتەۋدى ۇيرەنۋ كەرەك (ەفەس. 5:25). قازىر يسانىڭ ٶز شاكىرتتەرىنە قالاي قاراعانىنان، ولارمەن قالاي سويلەسكەنىنەن كۇيەۋلەر نە نارسەگە ۇيرەنە الاتىنىن كورەيىك.
11. يسا شاكىرتتەرىنە قالاي قاراعان؟
11 يسا ٶزىنىڭ شاكىرتتەرىنە ٵردايىم مەيىرىممەن، قۇرمەتپەن قاراعان. ەشقاشان ولارعا قاتالدىق تانىتىپ، ۇستەمدىك ەتكەن ەمەس. يسا شاكىرتتەرى ٷشىن يە ٵرى قوجايىن بولسا دا، الىمجەتتىك جاساپ، ولاردىڭ الدىندا ٶز بەدەلىن كورسەتۋگە تىرىسپاعان. قايتا، ول شاكىرتتەرىنە كىشىپەيىلدىلىكپەن قىزمەت ەتكەن (جوح. 13:12—17). بىردە يسا ولارعا: «مەنەن ۇيرەنىڭدەر، ويتكەنى مەن جۇمساق ٵرى كىشىپەيىلمىن. سوندا جاندارىڭ سەرگيدى»،— دەگەن (مات. 11:28—30). راسىمەن دە، يسانىڭ مىنەزى وتە جۇمساق بولعان. ٴبىراق جۇمساقتىق السىزدىكتى بىلدىرمەيدى. كەرىسىنشە، جۇمساق ادام — ٶز-ٶزىن ۇستاۋعا كۇشى جەتەتىن مىقتى ادام. شىدامى سىنالعان ساتتەردە يسا ىشكى سەزىمدەرىن قاداعالاپ، سابىرلى كۇيىنەن اينىماعان.
12. يسا ادامدارمەن قالاي سويلەسكەن؟
12 يسانىڭ ايتقان سوزدەرى وزگەلەردى تەك جۇباتىپ، سەرگىتكەن. ول شاكىرتتەرىنە دە ەشقاشان جەكىپ سويلەمەگەن (لۇقا 8:47، 48). ٴتىپتى جاۋلارى وعان ٴتىل تيگىزىپ، قانشا ىزاسىن كەلتىرۋگە تىرىسسا دا، يسا ٴسوز قايتارىپ، «ولاردى عايباتتامادى» (پەت. 1-ح. 2:21—23). «ٵ» دەسە، «ٴما» دەۋ بىلاي تۇرسىن، يسا كەيدە ٴتىپتى ۇندەمەي قويا سالۋدى ٴجون كورگەن (مات. 27:12—14). ٴماسىحشى كۇيەۋلەر ٷشىن نە دەگەن كەرەمەت ۇلگى!
13. كيەلى كىتاپتاعى «ەركەك... ايەلىنە قوسىلادى» دەگەن سوزدەر نەنى بىلدىرەدى؟ (ماتاي 19:4—6، سىلتەمە) (سۋرەتتى دە قاراڭىز.)
13 يسا كۇيەۋلەر ٶز ايەلدەرىنە ادال بولۋ كەرەكتىگىن ايتقان. ول ەحوبانىڭ كەزىندە ايتقان ٴسوزىن قايتالاپ، «ەركەك... ايەلىنە قوسىلادى» دەگەن (ماتاي 19:4—6 وقىڭىز). بۇل تارماقتاعى «قوسىلادى» دەپ اۋدارىلعان گرەك ەتىستىگى سوزبە-ٴسوز «قاتتى جابىسادى» دەگەندى بىلدىرەدى. دەمەك، نەكە قۇرعان ەر مەن ايەلدىڭ قارىم-قاتىناسى مىقتى بولۋى كەرەكتىگى سونشا — ولار ٴبىر-بىرىنە قاتتى جابىسىپ، جەلىمدەلىپ قالعانداي بولۋ كەرەك. ەگەر بۇنداي قارىم-قاتىناس اجىرايتىن بولسا، بۇدان ەكى تاراپ تا مىندەتتى تۇردە جاپا شەگەدى. ايەلىمەن وسىنداي وتە تىعىز قارىم-قاتىناس دامىتا بىلگەن كۇيەۋ پورنوگرافيانىڭ ەشبىر تۇرىنە جولامايدى. «كوزىن تۇككە تۇرعىسىز نارسەگە تۇسىرمەۋ» ٷشىن بەتىن بىردەن بۇرىپ اكەتەدى (ٴزاب. 119:37). بىلايشا ايتقاندا، وزگە ايەلگە ەشقاشان سۇقتانىپ قارامايمىن دەپ كوزىمەن كەلىسىم جاساسادى (ٵيۇپ 31:1).
ايەلىنە ادال كۇيەۋ پورنوگرافيادان اۋلاق جۇرەدى (13-ابزاستى قاراڭىز) g
14. زورلىق-زومبىلىق كورسەتىپ جۇرگەن كۇيەۋ ەحوبامەن جانە ايەلىمەن قارىم-قاتىناسىن تۇزەۋ ٷشىن قانداي قادامدار جاساۋ كەرەك؟
14 ايەلىنە قول كوتەرىپ، قورلىق سوزدەر ايتىپ جۇرگەن كۇيەۋ ەحوبامەن جانە ايەلىمەن قارىم-قاتىناسىن تۇزەۋ ٷشىن كەلەسى قادامداردى جاساۋ كەرەك. ٴبىرىنشى، ىستەپ جۇرگەن ٸسى مۇلدەم دۇرىس ەمەس ەكەنىن مويىنداۋ كەرەك. ەحوبانىڭ نازارىنان ەش نارسە تىس قالمايدى، ول ٴبارىن كورىپ تۇر (ٴزاب. 44:21؛ ۋاع. 12:14؛ ەۆر. 4:13). ەكىنشى، ايەلىنە زورلىق-زومبىلىق كورسەتۋىن قويىپ، وزگەرۋى ٴتيىس (ناق. س. 28:13). ٷشىنشى، ايەلىنەن جانە ەحوبادان كەشىرىم سۇراپ، ولاردىڭ كەشىرىمىنە يە بولۋ ٷشىن بار كۇشىن سالۋ كەرەك (ەل. ٸس. 3:19). سونداي-اق ەحوباعا جالبارىنىپ، وزگەرۋ ٷشىن بويىندا ىقىلاس وياتۋىن جانە ويىن، سوزدەرىن، ٸس-ارەكەتىن قاداعالاۋعا كومەكتەسۋىن سۇراپ دۇعا ەتۋ كەرەك (ٴزاب. 51:10—12؛ قور. 2-ح. 10:5؛ ٴفىلىپ. 2:13). ٴتورتىنشى، ايتقان دۇعاسىنا ساي ارەكەت ەتىپ، قاتىگەزدىك پەن قورلىق ٴسوز اتاۋلىنىڭ ٴبارىن جەك كورۋدى ۇيرەنۋى قاجەت (ٴزاب. 97:10). بەسىنشى، تەز ارادا قامقور اقساقالداردىڭ كومەگىنە جۇگىنۋى كەرەك (جاق. 5:14—16). التىنشى، بۇرىس ارەكەتىن قايتالاپ قويماس ٷشىن، نە ىستەپ، نە ىستەمەيتىنىن الدىن الا ويلاستىرىپ الۋى قاجەت. پورنوگرافيا كورەتىن كۇيەۋلەر دە تۋرا وسى التى قادامدى جاساۋى ٴتيىس. وزگەرەمىن دەگەن كۇيەۋلەرگە ەحوبا كومەكتەسىپ، باتاسىن بەرەدى (ٴزاب. 37:5). ٴبىراق كۇيەۋلەردىڭ ايەلدەرىنىڭ قادىرىن تۇسىرەتىن ىستەردى دوعارىپ قانا قويعانى جەتكىلىكسىز. بۇدان بولەك، ولار ايەلدەرىنە قالاي قۇرمەت كورسەتۋدى ۇيرەنۋلەرى قاجەت. قازىر سول تۋرالى قاراستىرايىق.
ايەلىڭىزگە قالاي قۇرمەت كورسەتسەڭىز بولادى؟
15. كۇيەۋلەر ايەلدەرىن سۇيەتىنىن قالاي كورسەتە الادى؟
15 ماحابباتىڭىزدى ٴبىلدىرىپ وتىرىڭىز. نەكەدەن قۋانىش تاۋىپ جۇرگەن ەر باۋىرلاستار ايەلدەرىن سۇيەتىنىن كورسەتۋ ٷشىن كۇندە ٴبىر نارسە ىستەيدى (جوح. 1-ح. 3:18). مىسالى، جاي عانا ايەلىنىڭ قولىنان ۇستاپ، قۇشاقتاپ، ماحابباتىن بىلدىرەدى. يا بولماسا «سەنى سۇيەمىن»، «سەنى ساعىندىم»، «كۇنىڭ قالاي ٶتىپ جاتىر؟» دەپ، قىسقا حابارلاما جازىپ قويادى. اراگىدىك اشىقحاتقا نە ٴبىر جاپىراق قاعازعا ٴبىر-ەكى اۋىز ادەمى ٴسوز جازىپ، سەزىمىن بىلدىرەدى. بۇل — ايەلگە قۇرمەت كورسەتۋدىڭ جانە نەكەنى بەرىك ەتۋدىڭ قاراپايىم جولدارى.
16. كۇيەۋلەردىڭ ايەلدەرىن ماقتاپ وتىرعانى نەگە ماڭىزدى؟
16 العىس ٴبىلدىرىپ وتىرىڭىز. قۇرمەت كورسەتە بىلەتىن كۇيەۋ ايەلىنىڭ مەرەيىن ٶسىرىپ، قادىر-قاسيەتىن ارتتىرادى. ول ايەلىنىڭ ٵربىر كومەگىن باعالاپ، سول ٷشىن العىس ٴبىلدىرىپ وتىرۋدى ۇمىتپايدى (قول. 3:15). كۇيەۋى شىن جۇرەكتەن ماقتايتىن بولسا، ايەلى گۇلدەي جايناپ، كۇندەي جادىراپ جۇرەدى. كۇيەۋىنىڭ ماحابباتى مەن قۇرمەتىن سەزىپ جۇرگەن ايەل — كوڭىلى تىنىش، باقىتتى ايەل (ناق. س. 31:28).
17. كۇيەۋلەر ايەلدەرىن سيلايتىنىن قالاي كورسەتە الادى؟
17 ايەلىڭىزدى ايالاڭىز، سيلاڭىز. ايەلىن جاقسى كورەتىن كۇيەۋ ونى باعالايدى، ايالاپ، ماپەلەيدى. ونى ەحوبانىڭ بەرگەن باعا جەتپەس سيى دەپ بىلەدى (ناق. س. 18:22؛ 31:10). بۇنداي كۇيەۋلەر ايەلىنە ٵردايىم، ٴتىپتى تىم جەكە ماسەلەلەردە دە بارىنشا قۇرمەت كورسەتەدى. جىنىستىق قاتىناس كەزىندە ايەلىن ول قالامايتىن، قادىر-قاسيەتىن تۇسىرەتىن نە ار-ۇجدانى جول بەرمەيتىن نارسەلەردى ىستەۋگە زورلاپ كۇشتەمەيدى f. نەگىزى، كۇيەۋلەر ەحوبانىڭ الدىندا وزدەرىنىڭ دە ار-ۇجدانى تازا بولۋىنا ەرەكشە ٴمان بەرۋ كەرەك (ەل. ٸس. 24:16).
18. كۇيەۋلەر نە ىستەي بەرۋگە بەكىنۋ كەرەك؟ (« ايەلىڭىزگە قۇرمەت كورسەتۋدى ۇيرەنىڭىز» دەگەن قورشاۋدى دا قاراڭىز.)
18 كۇيەۋلەر، ايەلدەرىڭىزگە بارلىق جاعدايدا قۇرمەت كورسەتسەڭىزدەر، ەحوبا مۇنى بايقاپ، باتاسىن بەرەتىنىنە سەنىمدى بولىڭىزدار. ايەلىڭىزدىڭ قادىر-قاسيەتىن تۇسىرەتىن ارەكەتتەردەن اۋلاق بولىڭىز. ونى سيلاپ، ايالاپ، ماحابباتىڭىزدى كورسەتىپ وتىرىڭىز. سوندا ايەلىڭىزدى شىن سۇيەتىنىڭىزدى، باعالايتىنىڭىزدى دالەلدەيسىز. ايەلىڭىزگە قۇرمەت كورسەتىڭىز، سوندا ەحوبامەن دوستىعىڭىزدى ساقتاپ قالاسىز! (ٴزاب. 25:14).
131-ٵن «قۇداي قوسقان جۇپتى»
a كۇيەۋلەر 2024-جىلعى «كۇزەت مۇناراسىنىڭ» قاڭتارداعى سانىنان «ٴسىز ايەل زاتىنا ەحوبا سياقتى قارايسىز با؟» دەگەن ماقالانى وقىپ شىقسا بولادى.
b كۇيەۋىنەن زورلىق-زومبىلىق كورىپ جۇرگەن ايەلدەر «تۇرمىستىق زورلىق-زومبىلىق قۇرباندارىنا كومەك» دەگەن ماقالانى وقىپ شىقسا بولادى. ونى jw.org تور بەكەتىندەگى نە ®JW Library قوسىمشاسىنداعى «سان ٴتۇرلى تاقىرىپتار» دەگەن جەردەن تابۋعا بولادى.
c ٴسوز ٴمانى: «قورلىق سوزدەرگە» ادامدى كەمسىتەتىن سوزدەرمەن، ٴتىپتى بالاعات سوزدەرمەن اتاۋ جاتادى. بۇعان ادامنىڭ كەمشىلىگىن بەتىنە باسىپ كەلەكە-مازاق ەتۋ دە كىرەدى. نەگىزى، كۇيەۋىنىڭ ٶز ايەلىن رەنجىتىپ، قادىر-قاسيەتىن ٴتۇسىرىپ، ابىرويىن كەمسىتىپ ايتقان سوزدەرىنىڭ ٴبارى قورلىق سوزدەر بولىپ ەسەپتەلەدى.
d jw.org تور بەكەتىنەن نە JW Library قوسىمشاسىنان «پورنوگرافيا نەكەنى بۇزادى ما؟» دەگەن ماقالانى وقىپ كورىڭىز.
e كۇيەۋى پورنوگرافيا كورەتىن ايەلدەر 2023-جىلعى «كۇزەت مۇناراسىنىڭ» تامىزداعى سانىنان «جۇبايىم پورنوگرافيا كورەتىن بولسا، نە ىستەۋىم كەرەك؟» دەگەن ماقالانى وقىپ كورسە بولادى.
f جىنىستىق قاتىناس كەزىندە ەر مەن ايەلدىڭ قانداي ارەكەتى تازا نە تازا ەمەس بولىپ ەسەپتەلەتىنى كيەلى كىتاپتا ناقتى ايتىلماعان. بۇل ورايدا ەرلى-زايىپتىلار ەحوبانى رەنجىتپەيتىندەي، ەكەۋىنە دە ٴلاززات اكەلەتىندەي جانە ار-ۇجداندارىنا قايشى كەلمەيتىندەي شەشىم قابىلداۋ كەرەك. ولار جىنىستىق قاتىناستارى جايلى وزگەلەرمەن تالقىلامايدى.
g سۋرەت سيپاتتاماسى : ەر باۋىرلاستىڭ ارىپتەستەرى وعان پورنوگرافيالىق جۋرنال كورۋدى ۇسىنىپ جاتىر.
