3-زەرتتەۋ ماقالاسى
35-ٵن «نەنىڭ ماڭىزدىراق ەكەنىنە كوز جەتكىزىڭدەر»
ەحوباعا ۇنايتىن شەشىمدەر قابىلداڭىز
«دانالىقتىڭ باستاۋى — ەحوبادان قورقۋ، ال تۇسىنىك ەڭ كيەلى قۇداي جايلى بىلىمنەن كەلەر» (ناق. س. 9:10).
نەگىزگى وي
دۇرىس شەشىم قابىلداۋ ٷشىن ٴبىلىم مەن تۇسىنىك قاجەت.
1. ٴبارىمىز كۇندە نە ىستەيمىز؟
ٴبىز كۇندە ٵرتۇرلى شەشىمدەر قابىلدايمىز. تاڭعى اسقا نە جەيمىن، قاي ۋاقىتتا ۇيىقتايمىن دەگەن سياقتى سۇراقتاردى شەشۋ اسا قيىن ەمەس شىعار. ٴبىراق دەنساۋلىعىمىزعا، باقىتىمىزعا، جاقىندارىمىزعا، عيباداتىمىزعا اسەر ەتەتىن ماسەلەلەردى شەشۋ وڭاي بولا بەرمەيدى. ٴبىز ٶزىمىز ٷشىن دە، وتباسىمىز ٷشىن دە دۇرىس بولاتىن شەشىمدەر قابىلداعىمىز كەلەدى. ٴبىراق، بارىنەن بۇرىن، شەشىمدەرىمىز ەحوبانى قۋانتسا ەكەن دەيمىز (ريم. 12:1، 2).
2. دۇرىس شەشىم قابىلداۋ ٷشىن قانداي قادامدار جاساۋىمىز كەرەك؟
2 قابىلداعان شەشىمىڭىز دۇرىس بولۋ ٷشىن، كەلەسى قادامداردى جاساعانىڭىز ماڭىزدى: 1) ٴمان-جايدى انىقتاپ الىڭىز؛ 2) ەحوبانىڭ نە ويلايتىنىنا كوز جەتكىزىڭىز؛ 3) قاي شەشىم ەڭ دۇرىس بولاتىنىن سالماقتاپ-سارالاڭىز. بۇل ماقالادا ٴبىز وسى ٷش قادامعا جەكە-جەكە توقتالامىز. سونداي-اق تەرەڭ تۇسىنىككە يە بولۋ ٷشىن نە ىستەي الاتىنىمىزدى كورەمىز (ناق. س. 16:22).
ٴمان-جايدى انىقتاپ الىڭىز
3. شەشىم قابىلداماس بۇرىن ٴمان-جايدى انىقتاپ الۋ نەگە ماڭىزدى؟ مىسال كەلتىرىڭىز.
3 دۇرىس شەشىمگە باستايتىن قادام — ٴمان-جايدى انىقتاپ الۋ. بۇل قادام اسا ماڭىزدى. ەلەستەتىپ كورىڭىزشى، اۋىر دەرتى بار ٴبىر ادام دارىگەرگە كەلدى دەلىك. دارىگەر ودان ەش نارسە سۇراماي، ەش جەرىن تەكسەرمەي جاتىپ قانداي ەم الۋ كەرەكتىگىن ايتار ما ەدى؟ ارينە، جوق. تۋرا سولاي، ٴمان-جايدى انىقتاپ الماساڭىز، دۇرىس شەشىم قابىلداۋىڭىز ەكىتالاي. ال ٴمان-جايدى انىقتاپ الۋعا نە جاتادى؟
4. ناقىل سوزدەر 18:13 كە ساي، ٴمان-جايدى انىقتاپ الۋ ٷشىن نە ىستەسەڭىز بولادى؟ (سۋرەتتى دە قاراڭىز.)
4 ٴمان-جايدى انىقتاپ الۋ ٷشىن سۇراقتار قويعان جاقسى. مىسالى، بىرەۋ ٴسىزدى وتىرىسقا شاقىرسا، باراتىن-بارمايتىنىڭىزدى قالاي شەشەسىز؟ ەگەر شاقىرعان ادامدى اسا جاقسى تانىماساڭىز يا قانداي وتىرىس بولاتىنىن بىلمەسەڭىز، شاقىرعان ادامنان بىلاي دەپ سۇراعانىڭىز ٴجون: «وتىرىس قاي جەردە جانە قاشان وتەدى؟ كوپ ادام بولا ما؟ باس-كوز بولاتىن بىرەۋ بولا ما؟ قانداي ادامدار كەلەدى؟ باعدارلاما قانداي؟ ىشىمدىك بولا ما؟» وسى سۇراقتاردىڭ جاۋابىن ٴبىلىپ العانىڭىز دۇرىس شەشىم قابىلداۋعا كومەكتەسەدى (ناقىل سوزدەر 18:13 وقىڭىز).
سۇراقتار قويىپ، ٴمان-جايدى انىقتاپ الىڭىز (4-ابزاستى قاراڭىز) a
5. ٴمان-جايدى انىقتاعان سوڭ، نە ىستەگەنىڭىز ٴجون؟
5 ٴمان-جايدى انىقتاعان سوڭ، جان-جاقتى باعا بەرىپ، تولىق جاعدايدى كورە ٴبىلىڭىز. مىسالى، وتىرىسقا كيەلى كىتاپ پرينسيپتەرىن ەلەمەيتىن ادامدار كەلەتىنىن بىلسەڭىز، كىم قانشا ٸشىپ جاتقانىن قاداعالايتىن ەشكىم بولمايتىنىن تۇسىنسەڭىز، يا بولماسا وتىرىستىڭ ارتى ىردۋ-دىردۋ بولىپ كەتەتىنىن سەزسەڭىز، نە ىستەيسىز؟ (پەت. 1-ح. 4:3). ال ەگەر سول وتىرىس قاۋىم كەزدەسۋىنە نە قىزمەتكە شىعاتىن ۋاقىتىڭىزعا تۋرا كەلىپ قالسا شە؟ ماسەلەنى وسىلاي جان-جاقتى قاراستىرىپ، جاعدايدى تولىق كورە بىلگەنىڭىز دۇرىس شەشىم قابىلداۋعا سەپتىگىن تيگىزەدى. ٴبىراق بۇل ٴسىزدىڭ جاعدايعا باعا بەرۋىڭىز. ال ەحوبا قانداي باعا بەرەدى؟ قازىر دۇرىس شەشىم قابىلداۋعا كومەكتەسەتىن كەلەسى قادامدى قاراستىرايىق (ناق. س. 2:6).
ەحوبانىڭ نە ويلايتىنىنا كوز جەتكىزىڭىز
6. جاقىپ 1:5 كە ساي، نەگە ەحوبادان كومەك سۇراعانىمىز ماڭىزدى؟
6 ەحوبانىڭ كوزقاراسىن ٴتۇسىنۋ ٷشىن ودان كومەك سۇراڭىز. ەحوبا بىزگە دانالىق بەرەمىن دەپ ۋادە ەتكەن. بۇل دانالىق بىزگە وعان قانداي شەشىمدەر ۇنايتىنىن، قانداي شەشىمدەر ۇنامايتىنىن تەرەڭىرەك تۇسىنۋگە كومەكتەسەدى. ەحوبا بۇنداي دانالىقتى بىزگە «جومارتتىقپەن ٵرى ەش جازعىرماي بەرەدى» (جاقىپ 1:5 وقىڭىز).
7. ەحوبانىڭ ويىن ٴبىلۋ ٷشىن نە ىستەسەڭىز بولادى؟ مىسال كەلتىرىڭىز.
7 ەحوبادان كومەك سۇراپ دۇعا ەتكەننەن كەيىن، ونىڭ دۇعاڭىزعا نە دەپ جاۋاپ بەرەتىنىنە دەن قويىڭىز. ەلەستەتىپ كورىڭىزشى، ٴسىز ساياحاتتاپ ٴجۇرىپ اداسىپ كەتەسىز. ٴسۇيتىپ، ٴبىر ادامدى توقتاتىپ، جول سۇرايسىز. ٴبىراق سۇرارىن سۇراپ الىپ، جاۋابىن تىڭداماي كەتىپ قالاسىز با؟ ارينە، جوق. كەرىسىنشە، ونىڭ نە ايتاتىنىنا مۇقيات دەن قوياسىز عوي. تۋرا سولاي، ەحوباعا دۇعا ەتىپ، دانالىق سۇراعاننان كەيىن ونىڭ جاۋابىن تىڭداڭىز، ياعني جاعدايىڭىزعا ساي كەلەتىن كيەلى كىتاپتاعى زاڭدار مەن پرينسيپتەردى قاراستىرىپ، ەحوبانىڭ جاۋابىن كورە ٴبىلىڭىز. باعاناعى وتىرىسقا قايتا ورالساق، وعان باراتىن-بارمايتىنىڭىزدى شەشكەندە، كيەلى كىتاپتا جامان ورتاعا قاتىستى، ىردۋ-دىردۋ توي-دۋمانعا جانە پاتشالىقتىڭ مۇددەسىن وزىمىزدىكىنەن جوعارى قويۋعا قاتىستى نە ايتىلعانىن قاراستىرىپ كورسەڭىز بولادى (مات. 6:33؛ ريم. 13:13؛ قور. 1-ح. 15:33).
8. جاعدايىڭىزعا قاتىسى بار مالىمەتتەردى ىزدەپ تابۋ ٷشىن سىزگە كومەك قاجەت بولسا، نە ىستەسەڭىز بولادى؟ (سۋرەتتى دە قاراڭىز.)
8 جاعدايىڭىزعا قاتىسى بار مالىمەتتەردى ىزدەپ تابۋ ٷشىن كەيدە سىزگە كومەك قاجەت بولۋى مۇمكىن. ونداي كەزدە تاجىريبەلى باۋىرلاستاردان اقىل-كەڭەس سۇراساڭىز بولادى. بۇدان بولەك، «ەحوبا كۋاگەرلەرىنىڭ ونلاين كىتاپحاناسى» مەن «ماسىحشىلىك ومىردە قاجەت تارماقتار» باسىلىمىنىڭ كومەگىمەن ٶزىڭىز دە ىزدەنسەڭىز بولادى. بۇل ىزدەنىس قۇرالدارىنان قانشاما پايدالى مالىمەتتەر تابا الاسىز. ۇمىتپاڭىز: بۇنىڭ ٴبارىن ىستەۋدەگى باستى ماقساتىڭىز — ەحوباعا ۇنايتىن شەشىمدى تابۋ.
ەحوبانىڭ نە ويلايتىنىنا كوز جەتكىزىڭىز (8-ابزاستى قاراڭىز) b
9. قابىلدايتىن شەشىمىمىز ەحوباعا ۇنايتىنىنا قالاي كوز جەتكىزسەك بولادى؟ (ەفەستىكتەرگە 5:17)
9 قابىلدايتىن شەشىمىمىز ەحوباعا ۇنايتىنىنا قالاي كوز جەتكىزسەك بولادى؟ بۇل ٷشىن ەڭ الدىمەن ەحوبانى جاقسى ٴبىلۋىمىز كەرەك. كيەلى كىتاپتا «تۇسىنىك ەڭ كيەلى قۇداي جايلى بىلىمنەن كەلەتىنى» ايتىلعان (ناق. س. 9:10). تەرەڭ تۇسىنىككە يە بولۋ ٷشىن ەحوبانىڭ قاسيەتتەرىن، نيەتىن جانە ونىڭ نەنى جاقسى كورىپ، نەنى جەك كورەتىنىن جاقسى بىلگەنىمىز ماڭىزدى. بىلاي دەپ ويلانىپ كورىڭىز: «ەحوبا جايلى بىلىمىمە سۇيەنىپ باعا بەرسەم، قابىلدايتىن شەشىمىم وعان ۇنايدى دەپ ايتا الامىن با؟» (ەفەستىكتەرگە 5:17 وقىڭىز).
10. نەگە كيەلى كىتاپ پرينسيپتەرىن ۇستانۋ وتباسىمىزدان دا، مادەنيەتىمىزدەن دە ماڭىزدى؟
10 ەحوبانى قۋانتۋ ٷشىن كەيدە جاقىندارىمىزدىڭ كوڭىلىنە قاراماي، شەشىمىمىزدە نىق تۇرۋىمىز كەرەك. مىسالى ٷشىن، كەيبىر اتا-انالار يگى نيەتپەن قىزدارى تۇرمىسى جاقسى نە كوپ قالىڭ مال تولەيتىن ادامعا كۇيەۋگە شىققانىن قالاپ، قىسىم كورسەتەدى. ٴبىراق ول ادامنىڭ رۋحاني تولىسپاعانىن ەلەمەۋى مۇمكىن. ارينە، اتا-انا بولعاسىن قىزدارىنىڭ اقشادان تارىقپاي، جاقسى ٶمىر سۇرگەنىن قالايدى. ٴبىراق قىزدارىنىڭ رۋحاني كۇيىن كىم ويلايدى؟ بۇنداي جاعدايعا ەحوبا قالاي قارايتىنى ماتاي 6:33 تە انىق جازىلعان. وندا ماسىحشىلەر «قۇداي پاتشالىعىن ٴبىرىنشى ورىنعا قويۋ» كەرەكتىگى ايتىلعان. ٴبىز اتا-انامىزدى دا، مادەنيەتىمىزدى دە قۇرمەتتەيمىز. ٴبىراق ەحوبانى قۋانتۋ — ٴبىز ٷشىن بارىنەن دە ماڭىزدى.
قاي شەشىم ەڭ دۇرىس بولاتىنىن سالماقتاپ-سارالاڭىز
11. قاي شەشىم ەڭ دۇرىس بولاتىنىن انىقتاۋعا قانداي قاسيەت كومەكتەسەدى؟ (فىلىپىلىكتەرگە 1:9، 10)
11 جاعدايىڭىزعا قاتىسى بار كيەلى كىتاپ پرينسيپتەرىن قاراستىرعان سوڭ، ماسەلەنى شەشۋدىڭ بىرنەشە جولى پايدا بولۋى مۇمكىن. ونداي كەزدە قايسىسى ەڭ دۇرىس شەشىم بولاتىنىن سالماقتاپ-سارالاۋىڭىز كەرەك بولادى (فىلىپىلىكتەرگە 1:9، 10 وقىڭىز). ٵر شەشىمنىڭ ارتى قانداي بولاتىنىن جوبالاپ ٴبىلۋ ٷشىن تەرەڭ تۇسىنىك كەرەك. بىرنەشە شەشىمنىڭ اراسىنان ەڭ دۇرىسىن تاڭداۋ بىردە وڭاي بولسا، بىردە قيىن. ٴبىراق تەرەڭ تۇسىنىككە يە بولساق، ەڭ قيىن دەگەن جاعدايدىڭ وزىندە دۇرىس شەشىم قابىلداي الامىز.
12، 13. جۇمىسقا تۇراتىن كەزدە تەرەڭ تۇسىنىك دۇرىس شەشىم قابىلداۋعا قالاي كومەكتەسەدى؟
12 مىناداي جاعدايدى ەلەستەتىڭىز: ٴسىز وتباسىڭىزدى اسىراۋ ٷشىن جۇمىس ىزدەپ ٴجۇرسىز. ٴسۇيتىپ، ەكى جۇمىس تابىلادى. ٴسىز الدىمەن ول قانداي جۇمىس، كەستەسى قانداي، جولعا قانشا ۋاقىت كەتەدى، سونىڭ ٴبارىن انىقتاپ ٴبىلىپ الاسىز. ەكى جۇمىس تا كيەلى كىتاپقا قايشى كەلمەيدى. بالكىم، سىزگە اقشاسى كوپ ٵرى وزىڭىزگە قىزىقتى بولىپ تۇرعان جۇمىس ۇنايتىن شىعار. ٴبىراق بۇعان عانا قاراماڭىز. دۇرىس شەشىم قابىلداۋ ٷشىن تاعى دا باسقا ماڭىزدى جايتتاردى ەسكەرۋ كەرەك.
13 مىسالى، سول جۇمىسقا تۇرساڭىز، كەيبىر كۇندەرى قاۋىم كەزدەسۋىنە بارا الماي قالۋىڭىز مۇمكىن بە؟ ول جۇمىس وتباسىڭىزدىڭ ەموسيالىق جانە رۋحاني قاجەتتىلىگىنە جۇمسايتىن ۋاقىتىڭىزدى ۇرلاپ جۇرمەي مە؟ وسىنداي سۇراقتاردىڭ كومەگىمەن وي جۇگىرتسەڭىز، «نەنىڭ ماڭىزدىراق ەكەنىنە كوز جەتكىزىپ»، عيباداتىڭىز بەن وتباسىڭىزدى اقشا مەن دۇنيە-مۇلىكتەن جوعارى قوياتىن بولاسىز. وسىلاي ەحوبا باتاسىن بەرەتىندەي دۇرىس شەشىم قابىلدايسىز.
14. تەرەڭ تۇسىنىك پەن سۇيىسپەنشىلىك وزگەلەردى ٴسۇرىندىرىپ الماۋعا قالاي كومەكتەسەدى؟
14 تەرەڭ تۇسىنىك شەشىمدەرىمىز وزگەلەرگە قالاي اسەر ەتەتىنىن دە ويلاۋعا تالپىندىرادى. سونىڭ ارقاسىندا ٴبىز بىرەۋلەردى ٴسۇرىندىرىپ، «سەنىمىنە نۇقسان كەلتىرۋدەن» اۋلاق بولامىز (ٴفىلىپ. 1:10). كيىمگە نە سىرت كورىنىسكە قاتىستى شەشىم قابىلداعاندا دا وزگەلەردى ويلاۋ ماڭىزدى. بالكىم، سىزگە قانداي دا ٴبىر ستيل ۇنايتىن شىعار. ٴبىراق ونداي ستيلگە قاۋىمداعىلار نە قاۋىمنان تىس ادامدار قالاي قارايدى؟ ولاردى ٴسۇرىندىرىپ جۇرمەيسىز بە؟ تەرەڭ تۇسىنىگىمىز بولسا، ٴبىز وزگەلەردى قۇرمەتتەپ، سەزىمدەرىن ەسكەرەمىز. ال سۇيىسپەنشىلىك قاسيەتى ٴبىزدى «وزگەنىڭ يگىلىگىن ويلاۋعا» جانە قاراپايىم بولىپ جۇرۋگە تالپىندىرادى (قور. 1-ح. 10:23، 24، 32؛ ٴتىم. 1-ح. 2:9، 10). ەندەشە، قابىلداعان شەشىمىمىزدەن وزگەلەرگە دەگەن سۇيىسپەنشىلىگىمىز بەن قۇرمەتىمىز كورىنىپ تۇرسىن.
15. وتە ماڭىزدى شەشىم قابىلداماس بۇرىن، نەنى ەسەپتەپ الۋىڭىز كەرەك؟
15 وتە ماڭىزدى شەشىم قابىلداپ جاتساڭىز، ونى قالاي ىسكە اسىراتىنىڭىزدى دا ويلانىپ العانىڭىز ٴجون. يسا ٴبىزدى «الدىمەن شىعىندى ەسەپتەپ الۋعا» شاقىرعان (لۇقا 14:28). قابىلداعان شەشىمىڭىز ويداعىداي ىسكە اسۋ ٷشىن قانشا ۋاقىت، قانشا قاراجات، قانشا كۇش كەتەتىنىن ەسەپتەپ الىڭىز. ەگەر بۇل شەشىم ىسكە اسۋ ٷشىن وتباسىڭىزدىڭ قولداۋى قاجەت بولسا، وندا ولارمەن دە اقىلداسىپ العانىڭىز ٴجون. ٴبارىن وسىلاي ەسەپتەپ الساڭىز، شەشىمىڭىزدىڭ كەيبىر تۇستارىن وزگەرتۋ كەرەكتىگىن نە مۇلدەم باسقا شەشىم قابىلداعان دۇرىس بولاتىنىن ٴتۇسىنۋىڭىز مۇمكىن. ەگەر وتباسىڭىزبەن اقىلداسىپ، ولاردىڭ ويىن ەسكەرسەڭىز، ولار دا ٴسىزدى قولداۋعا ىقىلاستى بولىپ، شەشىمىڭىز وڭ ناتيجە اكەلەدى (ناق. س. 15:22).
شەشىمىڭىز وڭ ناتيجە اكەلسىن
16. شەشىمىڭىز وڭ ناتيجە اكەلسىن دەسەڭىز، قانداي قادامدار جاساۋىڭىز كەرەك؟ (« دۇرىس شەشىمگە باستايتىن ٷش قادام» دەگەن قورشاۋدى دا قاراڭىز.)
16 بۇل ماقالادان ٴسىز دۇرىس شەشىم قابىلداۋ ٷشىن نە ىستەۋ كەرەكتىگىن ٴبىلىپ الدىڭىز. الدىمەن، ٴمان-جايدى انىقتاپ الىڭىز. كەيىن ەحوباعا ۇنايتىن شەشىمدى تابۋعا كومەكتەسەتىن كيەلى كىتاپ پرينسيپتەرىن قاراستىرىڭىز. وسى قادامداردان كەيىن ەحوبادان شەشىمىڭىز وڭ ناتيجە اكەلسىن دەپ سۇراۋ عانا قالادى.
17. دۇرىس شەشىم قابىلداۋدىڭ باستى سىرى نەدە؟
17 بۇعان دەيىن قابىلداعان شەشىمدەرىڭىز دۇرىس بولىپ كەلسە دە، ٶز اقىلىڭىز بەن تاجىريبەڭىزگە سۇيەنىپ كەتپەڭىز. ويتكەنى دۇرىس شەشىم قابىلداۋدىڭ باستى سىرى — ەحوبانىڭ دانالىعىنا جۇگىنۋ. دانالىقتىڭ نەگىزگى تىرەگى ٴبىلىم مەن تۇسىنىكتى تەك ەحوبا عانا بەرە الادى (ناق. س. 2:1—5). ەحوبانىڭ دانالىعىمەن ٴجۇرىپ-تۇرساڭىز، شەشىمدەرىڭىز ونى دا، ٶزىڭىزدى دە قۋانتادى (ٴزاب. 23:2، 3).
28-ٵن ەحوبانىڭ دوسى بولايىق
