5-زەرتتەۋ ماقالاسى
108-ٵن قۇدايدىڭ اينىماس سۇيىسپەنشىلىگى
ەحوبانىڭ سۇيىسپەنشىلىگى ٴبىزدى مول يگىلىككە جەتكىزدى
«ٴماسىح يسا وسى دۇنيەگە كۇناكارلاردى قۇتقارۋ ٷشىن كەلدى» (ٴتىم. 1-ح. 1:15).
نەگىزگى وي
تولەمنىڭ يگىلىكتەرى جانە ەحوباعا تولەم ٷشىن ريزاشىلىق ٴبىلدىرۋدىڭ جولدارى.
1. ەحوبانى قاي كەزدە قۋانتامىز؟
ٴسىز جاقسى كورەتىن ادامىڭىزعا ادەمى ٵرى پايدالى سيلىق بەردىڭىز دەلىك. ەگەر ول سيلىعىڭىزدى ٴبىر جەرگە قويىپ، سول كۇيى ۇمىتىپ كەتسە، كوڭىلىڭىز تۇسەرى انىق. ال ەگەر، كەرىسىنشە، سيلىعىڭىزدى كادەسىنە جاراتىپ، سول ٷشىن راقمەتىن ايتسا، بۇعان قۋانىپ، مارقايىپ قالاسىز عوي. بۇل مىسالمەن نە ايتقىمىز كەلەدى؟ ەحوبا دا ٴبىزدى قاتتى جاقسى كورگەندىكتەن، ٶزىنىڭ ۇلىن ٴبىز ٷشىن قۇربان ەتتى. ٴبىز ونىڭ بۇل تەڭدەسسىز سيىن باعالاپ جۇرسەك، ول قانشالىقتى قۋانادى دەسەڭىزشى! (جوح. 3:16؛ ريم. 5:7، 8).
2. بۇل ماقالادا نە قاراستىرامىز؟
2 وكىنىشكە قاراي، ۋاقىت وتكەن سايىن تولەم ۇيرەنشىكتى نارسەگە اينالىپ كەتۋى مۇمكىن. بىلايشا ايتقاندا، قۇدايدىڭ باعالى بۇل سيىن ٴبىر جەرگە قويىپ، كەيىن ۇمىتىپ كەتكەندەي بولامىز. بۇعان جول بەرمەس ٷشىن، قۇداي مەن ٴماسىحتىڭ بىزگە جاساعان جاقسىلىعىن ٴجيى ەسكە الىپ، ريزاشىلىعىمىزدى جانداندىرىپ تۇرعانىمىز ماڭىزدى. بۇل ماقالانىڭ ماقساتى دا — سول. ٴبىز تولەمنىڭ قازىر قانداي يگىلىگىن كورىپ جۇرگەنىمىزدى جانە بولاشاقتا تولەم قانداي يگىلىك اكەلەتىنىن قاراستىرامىز. سونداي-اق بىزگە تانىتقان سۇيىسپەنشىلىگى ٷشىن ەحوباعا قالاي ٵردايىم، اسىرەسە ەسكە الۋ مەزگىلىندە، ريزاشىلىق بىلدىرە الاتىنىمىزدى كورەمىز.
تولەمنىڭ قازىرگى يگىلىگى
3. ٴبىز قازىر تولەمنىڭ قانداي يگىلىگىن كورىپ ٴجۇرمىز؟
3 ٴبىز تولەمنىڭ يگىلىگىن قازىردىڭ وزىندە كورىپ ٴجۇرمىز. سول يگىلىكتەردىڭ ٴبىرى — تولەمگە نەگىزدەپ ەحوبا ٴبىزدىڭ كۇنالارىمىزدى كەشىرەدى. ول ٴبىزدى كەشىرۋگە مىندەتتى ەمەس، ٴبىراق مۇنى ٶزى قالايدى. وسى ٷشىن جۇرەگى ريزاشىلىققا تولعان ٴزابۇر جىرشىسى: «ۋا، ەحوبا، سەن ىزگى ٵرى كەشىرۋگە دايىنسىڭ»،— دەپ جىرلاعان (ٴزاب. 86:5؛ 103:3، 10—13).
4. ەحوبا تولەمدى كىمدەر ٷشىن بەرگەن؟ (لۇقا 5:32؛ تىموتەگە 1-حات 1:15)
4 كەيدە ٴبىز ٶزىمىزدى ەحوبانىڭ كەشىرىمىنە لايىق ەمەسپىن دەپ ەسەپتەيتىن شىعارمىز. نەگىزىندە، بۇعان ەشقايسىسىمىز دا لايىق ەمەسپىز. ەلشى پاۋىل دا بۇنى ٴتۇسىنىپ: «ەلشى دەپ اتالۋعا دا تۇرمايمىن... ٴبىراق قۇدايدىڭ راقىمىمەن وسىنداي دارەجەگە يە بولدىم»،— دەگەن (قور. 1-ح. 15:9، 10). ەگەر كۇنالارىمىزعا وكىنەر بولساق، ەحوبا ٴبىزدى ٵردايىم كەشىرۋگە دايىن. ول ٴبىزدى لايىق بولعانىمىزدان ەمەس، جاقسى كورگەننەن كەشىرەدى. قۇدايدىڭ كەشىرىمىنە لايىق ەمەسپىن دەگەن وي مازالاپ جاتسا، مىنانى ۇمىتپاڭىز: ەحوبا تولەمدى كۇنا جاسامايتىن كەمەلدى ادامدار ٷشىن ەمەس، شىن وكىنەتىن كۇناكارلار ٷشىن بەرگەن (لۇقا 5:32؛ تىموتەگە 1-حات 1:15 وقىڭىز).
5. نەگە اتقارعان قىزمەتىمىز ٷشىن ەحوبا ٴبىزدى كەشىرۋگە مىندەتتى دەپ ويلاماۋىمىز كەرەك؟ ٴتۇسىندىرىڭىز.
5 ەحوباعا تالاي جىلدان بەرى قىزمەت ەتىپ جۇرسەك تە، اتقارعان قىزمەتىمىز ٷشىن ول ٴبىزدى كەشىرۋگە مىندەتتى دەپ ويلاماۋىمىز كەرەك. ارينە، ەحوبا ادالدىقپەن اتقارعان قىزمەتىمىزدى ەشقاشان ۇمىتپايدى (ەۆر. 6:10). ٴبىراق ول ٶزىنىڭ ۇلىن بىزگە قىزمەتىمىزدىڭ اقىسى رەتىندە ەمەس، سي رەتىندە بەرگەن. ەحوبانىڭ راقىمىنا اتقارعان قىزمەتىم ٷشىن يە بولدىم، ادال ەڭبەگىم ٷشىن ول ماعان ەرەكشە قاراۋ كەرەك دەپ ويلاۋ قاتە بولار ەدى. ەگەر بۇلاي ويلاساق، «ٴماسىحتىڭ بەكەرگە ولگەنى عوي» (عالاتتىقتارعا 2:21 سالىستىرىڭىز).
6. نەگە پاۋىل ەحوباعا الدىنا جان سالماي قىزمەت ەتكەن؟
6 پاۋىل قانشا تەر توكسە دە، قۇدايدىڭ راقىمىنا لايىقتى بولا المايتىنىن جاقسى تۇسىنگەن. وندا ول نەگە سونشا الدىنا جان سالماي قىزمەت ەتكەن؟ ويتكەنى ەحوبانىڭ راقىمى مەن مەيىرىمدىلىگىنە قانشالىقتى ريزا ەكەنىن كورسەتكىسى كەلگەن (ەفەس. 3:7). پاۋىل سياقتى ٴبىز دە قىزمەتىمىزدى زور قۇلشىنىسپەن اتقارا بەرەيىك. ٴبىراق مۇنى ەحوبانىڭ راقىمىنا لايىقتى بولۋ ٷشىن ەمەس، ريزاشىلىعىمىزدى كورسەتۋ ٷشىن ىستەيىك.
7. ٴبىز تولەمنىڭ تاعى قانداي يگىلىگىن كورىپ ٴجۇرمىز؟ (ريمدىكتەرگە 5:1؛ جاقىپ 2:23)
7 قازىر ٴبىز كورىپ جۇرگەن تولەمنىڭ تاعى ٴبىر يگىلىگى — ەحوبا قۇدايمەن جاقىن دوس بولا الاتىنىمىز. a الدىڭعى ماقالادا ايتقانىمىزداي، قازىر ەشقايسىسىمىز ەحوبانىڭ وتباسىندا ەمەسپىز. ٴبىراق تولەم بەرىلگەندىكتەن ٴبىز «قۇدايمەن تاتۋمىز»، سونىڭ ارقاسىندا ونىمەن دوس بولا الامىز (ريمدىكتەرگە 5:1؛ جاقىپ 2:23 وقىڭىز).
8. دۇعا ەتۋ مارتەبەسى ٷشىن نەگە ەحوباعا ريزاشىلىق بىلدىرگەنىمىز دۇرىس؟
8 ەحوبامەن دوس بولعاننىڭ ارقاسىندا بىزدە دۇعا ەتۋ مارتەبەسى بار. ەحوبا ٴبارىمىز باس قوسىپ، كوپشىلىكتىڭ الدىندا ايتقان دۇعالارىمىزدى عانا ەمەس، ٴارقايسىسىمىزدىڭ جەكە-جەكە ايتقان دۇعالارىمىزدى دا تىڭدايدى. دۇعا ەتكەندە وي-سانامىزدا تىنىشتىق ورناپ، جانىمىز جايلانىپ قالادى. ٴبىراق دۇعانىڭ پايداسى بۇل عانا ەمەس. دۇعا قۇدايمەن دوستىعىمىزدى نىعايتۋدىڭ كەرەمەت مۇمكىندىگى (ٴزاب. 65:2؛ جاق. 4:8؛ جوح. 1-ح. 5:14). يسا جەردە بولعاندا كوپ دۇعا ەتكەن، ويتكەنى ول ەحوبا دۇعالاردى تىڭدايتىنىن جانە دۇعا اكەسىمەن قارىم-قاتىناسىن بەرىك ەتەتىنىن جاقسى بىلگەن (لۇقا 5:16). ويلاپ كورىڭىزشى، ٴبىز ەحوبامەن دوس بولىپ، دۇعادا وعان تىكەلەي سويلەي الامىز. بۇل دا يسانىڭ قۇرباندىعىنا ريزاشىلىق بىلدىرۋگە كەلەلى سەبەپ ەمەس پە؟!
تولەمىنىڭ بولاشاقتاعى يگىلىگى
9. ەحوبانىڭ ادال قىزمەتشىلەرى بولاشاقتا تولەمنىڭ قانداي يگىلىگىن كورەدى؟
9 ەحوبانىڭ ادال قىزمەتشىلەرى تولەمنىڭ يگىلىگىن بولاشاقتا دا كورەدى. تولەمنىڭ ارقاسىندا ولار ماڭگىلىك ومىرگە يە بولادى. ادامداردىڭ كوبىسى ٶلىمدى تابيعات زاڭدىلىعى دەپ ەسەپتەيتىندىكتەن، ماڭگى ٶمىر ٴسۇرۋ مۇمكىن ەمەس دەپ ويلايدى. ٴبىراق ەحوبا و باستا ادامداردىڭ ماڭگى ٶمىر سۇرگەنىن نيەت ەتكەن. ەگەر ادام اتا كۇنا جاساماعاندا، ماڭگىلىك ٶمىر قازىرگىدەي ەرتەگى بولىپ كورىنبەس ەدى. قازىرگى تاڭدا ماڭگىلىك ٶمىر ٴبىز ٷشىن تىم اسقاق كورىنەتىن شىعار، ٴبىراق ەحوبانىڭ سول ٶمىردى قايتارۋ ٷشىن تولەگەن قۇنى دا تىم اسقاق قوي. ول ٶزىنىڭ جالعىز سۇيىكتى ۇلىن ولىمگە قيدى! (ريم. 8:32).
10. مايلانعاندار مەن باسقا قويلاردى قانداي ٶمىر كۇتىپ تۇر؟
10 ماڭگىلىك ومىرگە تەك بولاشاقتا قول جەتكىزسەك تە، ەحوبا ٴبىزدىڭ قازىردىڭ وزىندە سول ٶمىردى ويدا تۇتىپ ٶمىر سۇرگەنىمىزدى قالايدى. مىسالى، ماسىحپەن بىرگە جەر بەتىنە بيلىك ەتەتىن مايلانعانداردى كوكتە تاڭعاجايىپ ٶمىر كۇتىپ تۇر (ايان 20:6). ال باسقا قويلار قايعى-قاسىرەتتەن ادا جەر بەتىندەگى جۇماقتا ٶمىر كەشەتىن بولادى (ايان 21:3، 4). ەگەر ٷمىتىڭىز جەر بەتىندە ماڭگى ٶمىر ٴسۇرۋ بولسا، بۇل ٶمىر كوكتەگى ومىردەن كەم تۇسەدى دەپ ويلاماڭىز. ادام بالاسى جەر بەتىندە ٶمىر ٴسۇرۋ ٷشىن جاراتىلعان عوي. سوندىقتان جەردەگى ٶمىرىڭىز ٴمان-ماعىنا مەن باقىتقا تولى بولاتىنىنا ەش كۇمانىڭىز بولماسىن.
11، 12. اڭساپ كۇتىپ جۇرگەن جۇماقتاعى ٶمىرىمىز قانداي بولادى؟ (سۋرەتتەردى دە قاراڭىز.)
11 جۇماقتاعى ٶمىر قانداي بولاتىنىن ٴبىر ساتكە ەلەستەتىپ كورىڭىزشى. سەنەسىز بە، اۋرۋ مەن ٶلىمدى ويلاپ تيتتەي دە ۋايىمدامايسىز (يشايا 25:8؛ 33:24). ەحوبا ٵربىر جۇرەك قالاۋىڭىزدى ورىندايدى. ٴسىز جۇماقتا نەمەن اينالىسۋدى ويلاپ ٴجۇرسىز؟ جانۋارلار الەمىن زەرتتەگىڭىز كەلە مە؟ الدە قانداي دا ٴبىر اسپاپتا ويناۋدى ۇيرەنەسىز بە؟ بالكىم، سۋرەت سالۋدى ۇيرەنەتىن شىعارسىز. جۇماقتا ارحيتەكتورلار، قۇرىلىسشىلار، ەگىنشىلەر كوپتەپ قاجەت بولادى. تاماق ىستەيتىن، قۇرال-سايماندار جاسايتىن، باۋ-باقشالاردى كۇتىپ-باپتايتىن ادامدارعا دا سۇرانىس وتە كوپ بولادى (يشايا 35:1؛ 65:21). ٶمىرىمىز شەكسىز بولاتىندىقتان، نە ۇيرەنەمىن دەسەڭىز دە ۋاقىت بارىنە جەتەدى.
12 ويلاڭىزشى، جۇماقتا ٴبىز قايتا تىرىلگەن جاقىندارىمىزدى قارسى الامىز! (ەل. ٸس. 24:15). سونداي-اق ەحوبانىڭ سان الۋان جاراتىلىستارىن زەرتتەپ، كوكتەگى اكەمىزدى ودان سايىن تاني بەرەمىز (ٴزاب. 104:24؛ يشايا 11:9). بارىنەن دە كەرەمەتى، ٴبىز بىردە-ٴبىر كۇنا جاسامايتىندىقتان، ٶزىمىزدى كىنالى سەزىنۋدىڭ نە ەكەنىن ۇمىتىپ، ەحوباعا كىرشىكسىز تازا ار-ۇجدانمەن عيبادات ەتەمىز! بولاشاقتا ٴسىزدى كۇتىپ تۇرعان وسى تاماشا باتالاردى «ۋاقىتشا راقات» سيلايتىن كۇناعا ايىرباستار ما ەدىڭىز؟ (ەۆر. 11:25). ولاي ەتپەسىڭىز انىق. قازىر قانداي دا ٴبىر نارسەدەن باس تارتۋعا تۋرا كەلسە، كۇمانىڭىز بولماسىن، بۇل باتالار كەز كەلگەن قۇرباندىققا تاتيدى. ۇمىتپايىق، جۇماقتاعى ماڭگى ٶمىر تەك ٷمىت بولىپ قالمايدى، بۇل ٷمىت مىندەتتى تۇردە شىنايى ومىرگە اينالادى. ەحوبا ٴبىزدى ٶز ۇلىن ولىمگە قياتىنداي دەڭگەيدە جاقسى كورمەگەندە، بۇل باتالاردىڭ ەشقايسىسىن دا كورمەس ەدىك!
جۇماقتا بارىنەن بۇرىن نەنى قالايسىز؟ (11، 12-ابزاستاردى قاراڭىز)
ەحوباعا سۇيىسپەنشىلىگى ٷشىن ريزاشىلىق ٴبىلدىرىڭىز
13. ەحوبانىڭ سۇيىسپەنشىلىگىنە ريزاشىلىق ٴبىلدىرۋدىڭ ٴبىر جولى قانداي؟ (قورىنتتىقتارعا 2-حات 6:1)
13 تولەم ٷشىن ەحوباعا ريزاشىلىق ٴبىلدىرۋدىڭ ٴبىر جولى — وعان قىزمەت ەتۋدى ومىردە باستى ورىنعا قويۋ (مات. 6:33). نە دەگەنمەن، يسانىڭ «ولگەندەگى ماقساتى — ٶمىر ٴسۇرىپ جاتقاندار ەندى وزدەرى ٷشىن ەمەس، وزدەرىنىڭ يگىلىگى ٷشىن ولگەن ٵرى قايتا تىرىلگەن ٴماسىح ٷشىن ٶمىر سۇرۋلەرى» (قور. 2-ح. 5:15). ەندەشە، «قۇدايدىڭ راقىمى... قانداي ماقساتپەن كورسەتىلگەنىن ەلەۋسىز قالدىرمايىق» (قورىنتتىقتارعا 2-حات 6:1 وقىڭىز).
14. ەحوبانىڭ نۇسقاۋلارىنا سەنىم ارتاتىنىمىزدى قالاي كورسەتە الامىز؟
14 ەحوبانىڭ سۇيىسپەنشىلىگىنە ريزاشىلىق ٴبىلدىرۋدىڭ تاعى ٴبىر جولى — ونىڭ بەرىپ جاتقان نۇسقاۋلارىنا سەنىم ارتۋ. قانداي دا ٴبىر شەشىمنىڭ الدىندا تۇرعاندا، مىسالى جوعارعى وقۋ ورنىنا ٴتۇسۋ-تۇسپەۋدى نە ۇسىنىلعان جۇمىسقا كەلىسۋ-كەلىسپەۋدى شەشكەندە، ەحوبانىڭ بىزدەن نە كۇتەتىنىن ەسكەرۋىمىز كەرەك (قور. 1-ح. 10:31؛ قور. 2-ح. 5:7). ەحوباعا سەنىم ارتىپ شەشىم قابىلدار بولساق، وعان دەگەن سەنىمىمىز دە، ونىمەن دوستىعىمىز دا بەرىك بولادى، ال ٷمىتىمىز شىنايى بولا تۇسەدى (ريم. 5:3—5؛ جاق. 2:21، 22).
15. ەسكە الۋ مەزگىلىندە تولەمگە دەگەن ريزاشىلىعىمىزدى قالاي بىلدىرسەك بولادى؟
15 ەحوبانىڭ سۇيىسپەنشىلىگىنە ريزاشىلىق ٴبىلدىرۋدىڭ تاعى ٴبىر ەرەكشە جولى بار. ەسكە الۋ كەشىنە دەيىنگى جانە كەيىنگى ۋاقىتتى پايدالانىپ، ەحوباعا تولەم ٷشىن قانشالىقتى ريزا ەكەنىڭىزدى كورسەتە الاسىز. ەسكە الۋ كەشىنە ٶزىڭىز عانا كەلىپ قويماي، وزگەلەردى دە شاقىرىڭىز (ٴتىم. 1-ح. 2:4). ولارعا ەسكە الۋ كەشى قالاي وتەتىنىن ٴتۇسىندىرىڭىز. بۇل ٷشىن jw.org تور بەكەتىندەگى «يسا پايعامبار نە ٷشىن ٶلدى؟» جانە «يسا پايعامباردىڭ ولگەن كۇنىن ەسكە الۋ» دەگەن ۆيدەولاردى كورسەتسەڭىز بولادى. ال اقساقالدار قاۋىمنان قول ٷزىپ قالعانداردى ەسكە الۋ كەشىنە شاقىرۋدى ۇمىتپاۋ كەرەك. ەحوبانىڭ جوعالعان قويى وتارعا ورالعاندا، كوكتە دە، جەردە دە قانشالىقتى زور قۋانىش بولادى دەسەڭىزشى! (لۇقا 15:4—7). ەسكە الۋ كەشىندە ٴبىر-ٴبىرىمىزدى عانا ەمەس، جاڭادان كەلگەندەردى نە ٴبىرازدان بەرى كەلمەي كەتكەندەردى دە قۇشاق جايا قارسى الايىق. ولار وزدەرىن جايلى سەزىنۋ ٷشىن بار جاعدايدى جاسايىق (ريم. 12:13).
16. ەسكە الۋ كەشىنە دەيىنگى جانە كەيىنگى ۋاقىتتا كوبىرەك قىزمەت ەتۋدى جوسپارلاۋ نەگە ماڭىزدى؟
16 ەسكە الۋ كەشىنە دەيىنگى جانە كەيىنگى ۋاقىتتا رۋحاني ىستەرگە كوبىرەك اتسالىسا الاسىز با؟ بۇل قۇدايعا جانە ماسىحكە جاساعان جاقسىلىقتارى ٷشىن ريزاشىلىق ٴبىلدىرۋدىڭ تاماشا مۇمكىندىگى. قىزمەتكە بارىنشا اتسالىساتىن بولساق، ەحوبانىڭ قولداۋىن سەزەمىز، سونىڭ ارقاسىندا وعان كوبىرەك سەنىم ارتاتىن بولامىز (قور. 1-ح. 3:9). سونداي-اق «كيەلى جازبالاردى كۇندەلىكتى زەرتتەۋ» كىتاپشاسىن نە جۇمىس داپتەرىندەگى كەستەنى قولدانىپ، ەسكە الۋ كەشىنە قاتىستى تارماقتاردى بىرەۋىن قالدىرماي وقىپ ٴجۇرىڭىز. سول ۇزىندىلەردىڭ كەيبىرىن تاڭداپ، جەكە زەرتتەۋ جۇرگىزسەڭىز دە بولادى.
17. ەحوبانى بارىنەن بۇرىن نە قۋانتادى؟ (« ەحوباعا ريزاشىلىق ٴبىلدىرۋدىڭ جولدارى» دەگەن قورشاۋدى دا قاراڭىز.)
17 وسى ماقالادا ايتىلعان نارسەلەردىڭ ٴبارىن ىستەۋگە مۇمكىندىگىڭىز بولماسا، مىنانى ۇمىتپاڭىز: ەحوبا ەشقاشان ٴسىزدىڭ قىزمەتىڭىزدى وزگەلەردىكىمەن سالىستىرمايدى. ول بارىنەن بۇرىن جۇرەگىڭىزگە قارايدى. جۇرەگىڭىز ونىڭ تەڭدەسسىز سيى تولەمگە دەگەن ريزاشىلىققا تولى ەكەنىن كورسە، سونىڭ ٶزى ونى قۋانىشقا بولەيدى (سام. 1-ج. 16:7؛ مار. 12:41—44).
18. ەحوبا قۇدايعا جانە يسا ماسىحكە نە ٷشىن ريزامىز؟
18 كۇنالارىمىزدىڭ كەشىرىلەتىنى، ەحوبامەن دوستىعىمىز جانە ماڭگىلىك ومىرگە دەگەن ٷمىتىمىز — تەك تولەمنىڭ ارقاسى. وسى باتالارعا جول اشقان ەحوباعا سۇيىسپەنشىلىگى ٷشىن ٵردايىم ريزاشىلىق ٴبىلدىرىپ جۇرەيىك (جوح. 1-ح. 4:19). يساعا دا العىس ٴبىلدىرۋدى ۇمىتپايىق. ول ٴبىزدى ٶز جانىنان ارتىق جاقسى كورىپ، ٴبىز ٷشىن ٶمىرىن قيدى! (جوح. 15:13).
154-ٵن سارقىلماس سۇيىسپەنشىلىك
a ٴماسىح ٶمىرىن ٵلى قۇربان ەتپەي تۇرىپ-اق ەحوبا ٶز قىزمەتشىلەرىن كەشىرىپ وتىرعان. ۇلىنىڭ ولە-ولگەنشە ادال بولاتىنىنا سەنىمدى بولعانى سونشا — ەحوبا تولەم بەرىلىپ قويعانداي ارەكەت ەتكەن (ريم. 3:25).
