1-زەرتتەۋ ماقالاسى
2-ٵن سەنىڭ ەسىمىڭ — ەحوبا
ەحوبانى دارىپتەيىك!
2025-جىلدىڭ تارماعى: «ەحوبانى ەسىمىنە لايىق دارىپتەڭدەر!» (ٴزاب. 96:8).
نەگىزگى وي
ەحوبانى وزىنە تيەسىلى داڭققا بولەۋ.
1. بۇگىندە كوپ ادامنىڭ ەسىل-دەرتى نەدە؟
كەلىسەتىن شىعارسىز، بۇگىندە كوپ ادامنىڭ بار ەسىل-دەرتى — ٶزىن كورسەتۋ. مىسالى، الەۋمەتتىك جەلىلەردە اتاق-داڭقتى ىزدەگەن قانشاما ادام وزدەرىن، جەتكەن جەتىستىكتەرىن كورسەتىپ الەك. ەحوبا قۇدايدى ماداقتاۋ ولاردىڭ ويىنا كىرىپ تە شىقپايدى. ٴبىراق ەحوبانى داڭقتاعىسى كەلەتىندەر دە از ەمەس. بۇل ماقالادا ٴبىز ەحوبانى دارىپتەۋ، ماداقتاۋ دەگەننىڭ نە ەكەنىن جانە بۇلاي ەتۋگە بىزگە نە قوزعاۋ سالۋ كەرەكتىگىن كورەمىز. سونداي-اق وزىنە تيەسىلى اتاق-داڭققا ەحوبانى قالاي بولەي الاتىنىمىزدى جانە الداعى ۋاقىتتا ول ٶز ەسىمىن قالاي داڭقتايتىنىن تالقىلايمىز.
ەحوبانى دارىپتەۋگە نە جاتادى؟
2. سيناي تاۋىندا ەحوبا ٶزىنىڭ ۇلىلىعىن قالاي پاش ەتتى؟ (سۋرەتتى دە قاراڭىز.)
2 كيەلى كىتاپتا ەحوبا ۇلى دا ايبىندى قۇداي ەكەنى ايتىلعان. يسرايل حالقى مىسىردىڭ قۇلدىعىنان ازات بولعاننان كەيىن كوپ ۇزاماي ەحوبا ولارعا اسقان ۇلىلىعىن پاش ەتتى. كوز الدىڭىزعا ەلەستەتىپ كورىڭىز: ميلليونداعان يسرايلدىك سيناي تاۋىنىڭ بوكتەرىندە قۇدايدىڭ نە ايتاتىنىن تىڭداۋ ٷشىن جينالىپ تۇر. تاۋدىڭ باسىن قويۋ قارا بۇلت باسقان. كەنەتتەن تۋرا ٴبىر جانارتاۋ اتقىلاعانداي تاۋدىڭ باسىنان بۇرقىراپ ٴتۇتىن كوتەرىلدى. ال جەر قوزعالىپ، قاتتى سىلكىنە باستادى. اسپان دا مىڭ قۇبىلىپ، نايزاعاي جارق-جۇرق ويناپ، كۇن كۇركىرەپ كەتتى. كەرنەيدىڭ اسا قاتتى شىققان داۋسى دا جەر-جاھاندى الدى (مۇس. 2-ج. 19:16—18؛ 24:17؛ ٴزاب. 68:8). ەحوبانىڭ اسقان ۇلىلىعىن پاش ەتكەن وسى قۇبىلىستاردى كورىپ، يسرايلدىكتەردىڭ بويىن قاستەرلى سەزىم بيلەدى.
سيناي تاۋىندا ەحوبا ەرەكشە قۇبىلىستار ارقىلى يسرايلدىكتەرگە ٶزىنىڭ اسقان ۇلىلىعىن پاش ەتتى (2-ابزاستى قاراڭىز)
3. ەحوبانى دارىپتەپ، ماداقتاۋعا نە جاتادى؟
3 ادامدار دا ەحوبانىڭ اسقان ۇلىلىعىن پاش ەتىپ، ونى ماداقتاپ، داڭقتاي الادى. بۇنىڭ ٴبىر جولى — ەحوبانىڭ شەكسىز قۇدىرەتى مەن كوركەم قاسيەتتەرى جايلى جاريالاۋ. جەتكەن جەتىستىگىمىز ەحوبانىڭ ارقاسىندا ەكەنىن ايتىپ وتىرساق، بۇل دا قۇدايدى ماداقتاۋعا جاتادى (يشايا 26:12). الدىنا جان سالماي ەحوبانى ماداقتاعان ادامداردىڭ ٴبىرى — ٴداۋىت پاتشا. بىردە ول يسرايل قاۋىمىنىڭ الدىندا تۇرىپ، ەحوبانى ماداقتاپ بىلاي دەپ دۇعا ەتتى: «ۋا، ەحوبا، ۇلىلىق پەن قۇدىرەت، سۇلۋلىق پەن سالتانات، ايبىندىلىق ساعان تيەسىلى. ويتكەنى كوك پەن جەردەگىنىڭ ٴبارى سەنىكى». ٴداۋىت دۇعاسىن تامامداعان سوڭ، «بۇكىل قاۋىم... ەحوبانى ماداقتادى» (شەج. 1-ج. 29:11، 20).
4. يسا جەردە بولعاندا ەحوبانى قالاي ماداقتاعان؟
4 يسا دا جەردە بولعاندا اكەسىن داڭققا بولەگەن. ول كەرەمەتتەر جاساۋعا ەحوبانىڭ ٶزى قۇدىرەت بەرگەنىن جاسىرماي ايتىپ جۇرگەن (مار. 5:18—20). ونىڭ كوكتەگى اكەسى جايلى بەرگەن كۋالىگى دە، ادامدارمەن قارىم-قاتىناسى دا ەحوباعا تەك ماداق جاۋدىردى. بىردە يسا ٴماجىلىسحانادا ٴتالىم بەرىپ جاتقاندا، تىڭداپ وتىرعان ادامداردىڭ اراسىندا بويىن جىن بيلەگەن ٴبىر ايەل بولدى. ول 18 جىل بويى بەلىن جازا الماي، بۇكىرەيىپ قينالىپ جۇرگەن. بايعۇس ايەلدىڭ كۇيى نەتكەن ايانىشتى ەدى! يسا ونى كورگەندە جانى اشىپ: «اۋرۋىڭىزدان ارىلدىڭىز»،— دەدى دە، ۇستىنە قولىن قويدى. سوندا ايەلدىڭ ارقاسى تۇزەلىپ، بويىنا كۇش-قۋاتى دا، قادىر-قاسيەتى دە ورالدى. سول ساتتە ول ريزاشىلىقتان «قۇدايدى ماداقتاي باستادى» (لۇقا 13:10—13). بۇل ايەل سياقتى بىزدە دە ەحوباعا ماداق جاۋدىرۋعا سەبەپ كوپ.
ەحوبانى نە سەبەپتى داڭقتايمىز؟
5. ەحوبانى تەرەڭ قاستەرلەۋگە بىزدە قانداي سەبەپتەر بار؟
5 ەحوبانى داڭقتايتىن سەبەبىمىز — ٴبىز ونى تەرەڭ قاستەرلەيمىز. ەحوبا ٴبىزدىڭ قۇرمەتىمىزگە ابدەن لايىق. ويتكەنى ول — قۇدىرەتى شەكسىز قۇداي. ال قولىنان شىققان تۋىندىلارى ونىڭ اسقان دانالىعىن پاش ەتىپ تۇر (ٴزاب. 96:4—7). بىزگە ٶمىر بەرگەن دە، ٶمىر سۇرۋگە بار جاعدايدى جاساعان دا — ەحوبا (ايان 4:11). ول ٶز قىزمەتشىلەرىنە ادال (ايان 15:4). باستاعان كەز كەلگەن ٸسىن ەش كەدەرگىسىز اياعىنا دەيىن جەتكىزەدى (ەشۋا 23:14). ٵردايىم سوزىندە تۇرىپ، بەرگەن ۋادەسىن ورىندايدى. ەرەميا پايعامبار ەحوبا جايلى بىلاي دەپ ٴدال ايتقان: «ۋا، ەحوبا، ساعان تەڭ كەلەر ەشكىم جوق. سەن ۇلىسىڭ... كۇللى حالىقتاردىڭ دانىشپاندارىنىڭ اراسىندا، بۇكىل پاتشالىقتارىندا ساعان تەڭ كەلەر ەشكىم جوق» (ەرم. 10:6، 7). راسىمەن دە، كوكتەگى اكەمىزدى قۇرمەت تۇتۋعا سەبەپتەر نەتكەن كوپ. ٴبىراق ەحوبا قۇرمەتىمىزگە عانا ەمەس، سۇيىسپەنشىلىگىمىزگە دە لايىق.
6. ٴبىز ەحوبانى نە ٷشىن جاقسى كورەمىز؟
6 ەحوبانى داڭقتايتىن سەبەبىمىز — ٴبىز ونى جاقسى كورەمىز. جۇرەگىمىزدە سۇيىسپەنشىلىك وياتقان ەحوبانىڭ كەيبىر ادەمى قاسيەتتەرىنە نازار اۋدارايىق. ول مەيىرىمدى ٵرى جاناشىر (ٴزاب. 103:13؛ يشايا 49:15). ەحوبا ٴبىزدىڭ جان دۇنيەمىزدى ۇعا بىلەدى. جانىمىزعا باتقان ازاپ ونىڭ دا جانىنا باتادى (زاك. 2:8). ونىمەن دوس بولۋ دا سونداي وڭاي (ٴزاب. 25:14؛ ەل. ٸس. 17:27). ەحوبا وتە كىشىپەيىل. «ول كوك پەن جەرگە قاراۋ ٷشىن ەڭكەيىپ، بەيشارانى توپىراقتان تۇرعىزادى» (ٴزاب. 113:6، 7). بولمىسى عاجاپ بۇنداي قۇدايدى قالاي عانا ماداقتامايسىڭ؟! (ٴزاب. 86:12).
7. بىزدە قانداي كەرەمەت مۇمكىندىك بار؟
7 ەحوبانى داڭقتايتىن سەبەبىمىز — ادامدار ول جايلى بىلسە ەكەن دەيمىز. ەحوبانىڭ شىن مانىندە قانداي قۇداي ەكەنىن كوپ ادام بىلمەيدى. ويتكەنى شايتان ول جايلى نەبىر وتىرىكتەر تاراتىپ، ادامداردىڭ ساناسىن سوقىر قىلىپ قويعان (قور. 2-ح. 4:4). شايتان ەحوبا جازالاۋدى عانا ويلاپ تۇراتىن كەكشىل قۇداي، ول ادامداردىڭ قامىن مۇلدەم ويلامايدى، دۇنيەدە بولىپ جاتقان بار قايعى-قاسىرەتكە ەحوبا كىنالى دەگەن وتىرىكتەرگە ادامداردى سەندىرىپ قويعان. ٴبىراق بۇنىڭ ٴبارى شىندىققا مۇلدەم جاناسپايدى! ويلاپ كورىڭىزشى، ٴبىز ادامداردىڭ كوزىن اشىپ، ەحوبانىڭ قانشالىقتى تاماشا قۇداي ەكەنىن ايتا الامىز. بۇل كوكتەگى اكەمىزدى ماداقتاۋدىڭ كەرەمەت مۇمكىندىگى ەمەس پە؟! (يشايا 43:10). ٴزابۇردىڭ 96-تاراۋى ٴبىزدى بارىنشا ەحوبانى ماداققا بولەۋگە شاقىرادى. بۇل جىردى قاراستىرۋ بارىسىندا ەحوبانى وزىنە تيەسىلى اتاق-داڭققا قالاي بولەي الاتىنىمىزدى كورەمىز.
ەحوبانى وزىنە تيەسىلى اتاق-داڭققا قالاي بولەي الامىز؟
8. ەحوبانى دارىپتەۋدىڭ ٴبىر جولى قانداي؟ (ٴزابۇر 96:1—3)
8 ٴزابۇر 96:1—3 وقىڭىز. ٴبىز ەحوبانى اۋىزبەن دارىپتەي الامىز. ٴزابۇر جىرشىسى ٴبىزدى «ەحوباعا ٵن شىرقاڭدار»، «اتىن ماداقتاڭدار»، «قۇتقاراتىنى جايلى ىزگى حاباردى جاريالاڭدار»، «ۇلتتار اراسىندا ۇلىلىعىن... جاريالاڭدار» دەپ شاقىرادى. بۇنىڭ ٴبارى كوكتەگى اكەمىزدى ماداقتاۋدىڭ تاماشا جولدارى. كەزىندە ادال ياھۋديلەر دە، ٴبىرىنشى عاسىرداعى ماسىحشىلەر دە ەحوبانىڭ كەرەمەت ىستەرىن ايتۋدان، ونىڭ اتىن قورعاپ سويلەۋدەن ەش ۇيالماعان (دان. 3:16—18؛ ەل. ٸس. 4:29). ٴبىز ولارعا قالاي ەلىكتەسەك بولادى؟
9، 10. انجەلينا باۋىرلاستان قانداي ۇلگى الساق بولادى؟ (سۋرەتتى دە قاراڭىز.)
9 قۇراما شتاتتاردا تۇراتىن انجەلينا a باۋىرلاسىمىز جۇمىسىندا باتىلدىقپەن ەحوبانىڭ اتىن قورعاپ سويلەگەن. انجەلينا ەندى عانا جۇمىسقا تۇرعاندىقتان، ول ارنايى ٴبىر كەزدەسۋگە شاقىرىلادى. بۇل كەزدەسۋدىڭ ماقساتى جاڭادان كەلگەن ارىپتەستەر وزدەرى جايلى ايتىپ، ٴبىر-بىرىمەن جاقىنىراق تانىسۋ ەدى. انجەلينا ەحوبا كۋاگەرى بولعاننىڭ ارقاسىندا ماعىنالى ٶمىر كەشىپ جاتقانىن ارىپتەستەرىنە كورسەتۋ ٷشىن الدىن الا سۋرەتتەر دايىندايدى. ٴبىراق تۋرا كەزەگى تاياپ قالعان كەزدە، ٴبىر ەر كىسى ٶزىنىڭ ەحوبا كۋاگەرلەرىنىڭ وتباسىندا وسكەنىن ايتادى. ول ەحوبا كۋاگەرلەرىن جامانداپ، مازاق ەتە باستايدى. سول كەزدە نە سەزىنگەنىن ايتىپ، انجەلينا بىلاي دەيدى: «جۇرەگىم تارسىلداپ، قاتتى ۋايىمداپ كەتتىم. ٴبىراق ىشتەي بىلاي دەپ ويلاندىم: «ونىڭ ەحوبا جايلى وتىرىك ايتىپ جاتقانىنا قۇر قاراپ وتىرا بەرەمىن بە، الدە ەحوبانى قورعاپ سويلەيمىن بە؟»
10 ارىپتەسى ٴسوزىن اياقتاعان سوڭ، انجەلينا تەز ىشتەي دۇعا ەتىپ، وعان سابىرلى ۇنمەن بىلاي دەيدى: «ەكەۋىمىزدىڭ جاعدايىمىز ۇقساس ەكەن. مەن دە ەحوبا كۋاگەرلەرىنىڭ وتباسىندا ٶستىم. كەيىن ٶزىم دە كۋاگەر بولىپ، الىگە دەيىن وسى جولدامىن». سول كەزدە ارىپتەستەرى نە بولىپ جاتقانىن تۇسىنبەي، ٴبىرتۇرلى بولىپ قالادى. سوندا دا انجەلينا ەش ساسپاي، باۋىرلاستارىمەن كونگرەستە تۇسكەن سۋرەتتەرىن كورسەتەدى جانە قۇرمەتپەن سەنىمىن قورعاپ سويلەيدى (پەت. 1-ح. 3:15). انجەلينا ٴسوزىن اياقتاي بەرگەندە، الگى ەر كىسى قاباعى اشىلىپ، ويى وزگەرگەندەي بولادى. ول ٴتىپتى ەحوبا كۋاگەرلەرىمەن ارالاسىپ جۇرگەندە جاقسى ساتتەر دە بولعانىن ايتىپ بەرەدى. انجەلينا بىلاي دەيدى: «ەحوبانىڭ اتىن قورعاۋ — ۇلكەن مارتەبە! باتىلدىق تانىتىپ، قورعاپ سويلەۋىمىزگە ول ابدەن لايىق». بايقاعانىمىزداي، وزگەلەر ەحوبانى قارالاپ، قۇرمەتسىزدىك تانىتىپ جاتقان كەزدە دە ٴبىز ونى ماداقتاپ، دارىپتەي الامىز. بۇل، شىن مانىندە، اسقان مارتەبە!
ٴبىز ەحوبانى اۋزىمىزبەن دارىپتەي الامىز (9، 10-ابزاستاردى قاراڭىز) b
11. ەحوبانىڭ قىزمەتشىلەرى ٴزابۇر 96:8 دەگى ٴپرينسيپتى قالاي ورىنداپ كەلەدى؟
11 ٴزابۇر 96:8 وقىڭىز. ٴبىز ەحوبانى قۇندى نارسەلەرىمىزبەن دارىپتەي الامىز. ەحوبانى بۇنداي جولمەن دارىپتەۋ قىزمەتشىلەرىنىڭ اراسىندا بۇرىننان بار (ناق. س. 3:9). مىسالى، يسرايلدىكتەر عيباداتحانانى سوعىپ، كەيىن جوندەۋ جۇمىستارىن جاساۋ ٷشىن اقشا جيناعان (پات. 2-ج. 12:4، 5؛ شەج. 1-ج. 29:3—9). ٴماسىحتىڭ شاكىرتتەرى دە «قولدا بارلارىمەن يسا مەن ونىڭ ەلشىلەرىنە قىزمەت كورسەتىپ جۇرگەن» (لۇقا 8:1—3). سونداي-اق ٴبىرىنشى عاسىرداعى ماسىحشىلەر اشتىق كەزىندە ٴبىر سەنىمدەگى باۋىرلاستارىنا كومەك جىبەرگەن (ەل. ٸس. 11:27—29). بۇگىندە ٴبىز دە ەحوبانى ەرىكتى ساداقالارىمىزبەن دارىپتەي الامىز.
12. جاساعان ساداقالارىمىز ەحوبانى قالاي دارىپتەيدى؟ (سۋرەتتى دە قاراڭىز.)
12 ساداقالارىمىز ەحوبانى قالاي دارىپتەيتىنىن پريسكا باۋىرلاستىڭ وقيعاسىنان كورەمىز. 2020-جىلى زيمبابۆەدە ۇزاق ۋاقىت قۋاڭشىلىق بولعان. سونىڭ سالدارىنان ميلليونداعان ادام اشتان قىرىلۋعا شاق قالدى. سوندا دا پريسكا باۋىرلاس بۇرىنعى ادەتى بويىنشا سارسەنبى جانە جۇما كۇندەرى ۋاعىزعا شىعىپ جۇرگەن. ول ٴتىپتى جەر جىرتاتىن مەزگىل باستالعاندا دا ۋاعىزعا شىعۋىن توقتاتپاعان. بۇنى كورىپ كورشىلەرى: «جەر جىرتپاي وسىلاي جۇرە بەرسەڭ، اشتان قالاسىڭ»،— دەپ ونى كۇلكى ەتكەن. سوندا پريسكا باۋىرلاس: «ەحوبا ٶزىنىڭ قىزمەتشىلەرىن ەشقاشان تاستامايدى»،— دەپ نىق جاۋاپ بەرىپتى. كوپ ۇزاماي ۇيىمىمىز وعان گۋمانيتارلىق كومەك جەتكىزدى. ال بۇنداي گۋمانيتارلىق كومەك ٴبىزدىڭ ساداقالارىمىزدىڭ ارقاسىندا جاسالادى. قاتتى تاڭعالعان كورشىلەرى پريسكا باۋىرلاسقا: «قۇدايىڭ سەنى راسىمەن دە تاستامايدى ەكەن. ٴبىز دە سەنىڭ قۇدايىڭ جايلى بىلگىمىز كەلەدى»،— دەپتى. اقىرى، كورشىلەرىنىڭ جەتەۋى قاۋىم كەزدەسۋلەرىنە قاتىسا باستاعان ەكەن.
ٴبىز ەحوبانى قۇندى نارسەلەرىمىزبەن دارىپتەي الامىز (12-ابزاستى قاراڭىز) c
13. ٴجۇرىس-تۇرىسىمىزبەن ەحوبانى قالاي دارىپتەي الامىز؟ (ٴزابۇر 96:9)
13 ٴزابۇر 96:9 وقىڭىز. ٴبىز ەحوبانى ٴجۇرىس-تۇرىسىمىزبەن دارىپتەي الامىز. ەجەلدە ەحوبانىڭ ۇيىندە قىزمەت ەتكەن ٴدىني قىزمەتكەرلەر ٷستى-باستارىن تازا ۇستاۋ كەرەك بولعان (مۇس. 2-ج. 40:30—32). ٴبىراق كادىمگى تازالىقتان دا ماڭىزدىسى — ٴجۇرىس-تۇرىسىمىزدىڭ تازا بولعانى (ٴزاب. 24:3، 4؛ پەت. 1-ح. 1:15، 16). سوندىقتان ٴبىز «ەسكى بولمىستان... ارىلۋىمىز» كەرەك، ياعني ەحوباعا ۇنامايتىن كوزقاراس پەن ٸس-ارەكەتتەردى تاستاۋىمىز قاجەت. سونداي-اق ٴبىز «جاڭا بولمىسقا يە بولۋىمىز» كەرەك، بۇل ەحوبانىڭ كوركەم قاسيەتتەرىنە ەلىكتەپ، دۇرىس ويلانىپ، دۇرىس ٴجۇرىپ-تۇرۋدى بىلدىرەدى (قول. 3:9، 10). ەحوبانىڭ كومەگىمەن ٴتىپتى ەڭ ازعىن، ەڭ قاتىگەز دەگەن ادامنىڭ ٶزى وزگەرىپ، جاڭا بولمىسقا يە بولا الادى.
14. دجەكتىڭ وقيعاسىنان نە ٴتۇيدىڭىز؟ (سۋرەتتى دە قاراڭىز.)
14 دجەك باۋىرلاستىڭ وقيعاسىن الساق، ونىڭ بۇرىن قاتىگەز ٵرى قاۋىپتى ادام بولعانى سونشا — وزگەلەر ونى «شايتان» دەپ اتاپ كەتكەن. جاساعان اۋىر قىلمىستارى ٷشىن ول ٶلىم جازاسىنا كەسىلەدى. جازاسىن كۇتىپ جۇرگەن ۋاقىتتا تۇرمەگە ٴبىر ەر باۋىرلاس كەلەدى. دجەك ونىمەن زەرتتەۋ ساباعىن وتۋگە كەلىسەدى. قانشا زۇلىم ىستەر جاساسا دا، ول ەسكى بولمىسىن تاستاپ، ۋاقىت وتە شومىلدىرۋ راسىمىنەن ٶتتى. ونىڭ مۇلدەم باسقا ادامعا اينالعانى سونشا — ولىمگە كەسىلەتىن كۇنى تۇرمە ساقشىلارى ونى قيماي، كوزدەرىنە جاس العان. ٴبىر سەرجانت ٴتىپتى بىلاي دەگەن: «دجەك وسى تۇرمەدەگى ەڭ جامان ادام ەدى. ٴبىراق كەيىن ول وسىندا جۇرگەن ەڭ جاقسى ادامعا اينالدى». دجەك ولىمگە كەسىلگەننەن كەيىنگى اپتادا ەر باۋىرلاستار تۇرمەدە قاۋىم كەزدەسۋىن وتكىزەدى. بۇل كەزدەسۋگە ٴبىر كىسى العاش رەت كەلەدى. ونىڭ كەلگەن سەبەبى — ول دجەكتىڭ سونشالىقتى قاتتى وزگەرگەنىنە تاڭعالىپ، ەحوباعا عيبادات ەتۋ ٷشىن نە ىستەۋ كەرەكتىگىن بىلگىسى كەلگەن ەكەن. راسىمەن دە، ٴبىزدىڭ ٴجۇرىس-تۇرىسىمىز كوكتەگى اكەمىزدى دارىپتەي الادى! (پەت. 1-ح. 2:12).
ٴبىز ەحوبانى ٴجۇرىس-تۇرىسىمىزبەن دارىپتەي الامىز (14-ابزاستى قاراڭىز) d
ەحوبا جۋىردا ٶز ەسىمىن داڭقتايدى
15. ەحوبا جۋىردا ٶزىنىڭ ەسىمىن قالاي داڭقتايدى؟ (ٴزابۇر 96:10—13)
15 ٴزابۇر 96:10—13 وقىڭىز. ٴزابۇر 96-تاراۋدىڭ سوڭعى تارماقتارىندا ەحوبا ٵدىل تورەشى ٵرى پاتشا رەتىندە سيپاتتالعان. ەحوبا جاقىندا ٶزىنىڭ ەسىمىن داڭقتايدى. قالايشا؟ ول ٵدىل سوت جۇرگىزەدى. ەحوبا كيەلى ەسىمىن قارالاپ جۇرگەن ۇلى بابىلدىڭ كوزىن قۇرتادى (ايان 17:5، 16؛ 19:1، 2). ۇلى بابىلدىڭ كۇيرەگەنىن كورىپ، كەيبىرەۋلەر تازا عيباداتقا بەت بۇرۋى مۇمكىن. ارماگەددون باستالعاندا، ەحوبا شايتاننىڭ دۇنيەسىن دە، وزىنە قارسى شىعىپ، ەسىمىنە كۇيە جاعىپ جۇرگەندەردى دە تۇگەل جويادى. ال ٶزىن سۇيەتىن، مويىنسۇناتىن جانە ەسىمىن ماقتانىشپەن داڭقتايتىن قىزمەتشىلەرىن امان الىپ قالادى (مار. 8:38؛ سال. 2-ح. 1:6—10). ٴماسىحتىڭ مىڭجىلدىق بيلىگى اياقتالىپ، ادامزات سوڭعى سىناقتان وتكەندە، ەحوبانىڭ ەسىمى كيەلى بولىپ، ونىڭ ٵربىر ادام عيبادات ەتۋگە لايىق قۇداي ەكەنى دالەلدەنەدى (ايان 20:7—10). سول ۋاقىت كەلگەندە، «تەڭىزدىڭ سۋعا تولى بولعانىنداي، جەر بەتى دە ەحوبانىڭ داڭقى جايلى بىلىمگە تولى بولادى» (ابق. 2:14).
16. ٴسىز نە ىستەي بەرۋگە بەكىندىڭىز؟ (سۋرەتتى دە قاراڭىز.)
16 ويلاپ كورىڭىزشى، بولاشاقتا ٵربىر سانالى جاراتىلىس ەحوبانى ەسىمىنە لايىق دارىپتەيتىن بولادى! ٴبىراق سول ۋاقىت كەلگەنشە ٵر مۇمكىندىكتى پايدالانىپ، قۇدايىمىز ەحوبانى داڭقتاۋدان تالمايىق. وسىنى ويدا تۇتسىن دەپ، باسقارۋشى كەڭەس 2025-جىلدىڭ تارماعى رەتىندە ٴزابۇر 96:8 دەگى كەلەسى سوزدەردى تاڭدادى: «ەحوبانى ەسىمىنە لايىق دارىپتەڭدەر!»
ەڭ اقىرىندا ٵربىر سانالى جاراتىلىس ەحوبانى ەسىمىنە لايىق دارىپتەيتىن بولادى! (16-ابزاستى قاراڭىز)
12-ٵن ۇلى قۇداي ەحوبا
a كەيبىر ەسىمدەر وزگەرتىلگەن.
