37-زەرتتەۋ ماقالاسى
باۋىرلاستارىمىزعا سەنىم ارتايىق
«سۇيىسپەنشىلىك... بارىنە سەنەدى، ەش ٷمىتىن ۇزبەيدى» (قور. 1-ح. 13:4، 7).
124-ٵن ٵردايىم ادالدىق تانىتايىق
اڭداتپا a
1. قازىرگى ادامداردىڭ ٴبىر-بىرىنە سەنبەيتىنى ٴبىزدى نەگە تاڭعالدىرمايدى؟
بۇگىندە شايتاننىڭ دۇنيەسىندەگى ادامدار كىمگە سەنەرلەرىن بىلمەيدى. ويتكەنى اتاقتى بيزنەسمەندەر، ساياسي نە ٴدىني جەتەكشىلەر ۇنەمى ولاردىڭ كوڭىلىن قالدىرىپ، سەنىمىن اقتامايدى. ادامدار كورشىلەرىنە، دوستارىنا، ٴتىپتى ٶز ٷيىنىڭ ادامدارىنا سەنۋدەن قالعان. الايدا نەگە بۇلاي بولىپ كەتكەنى ٴبىزدى تاڭعالدىرمايدى، سەبەبى كيەلى كىتاپتا «سوڭعى كۇندەرى ادامدار وپاسىز، جالاقور، ساتقىن» بولاتىنى ايتىلعان (ٴتىم. 2-ح. 3:1—4؛ قور. 2-ح. 4:4). باسقاشا ايتقاندا، ادامدار وسى دۇنيەنىڭ قۇدايى — شايتاننىڭ بولمىسىن شاعىلىستىرىپ ٴجۇر، ال شايتانعا مۇلدەم سەنىم جوق.
2. ا) ٴبىز كىمگە تولىقتاي سەنىم ارتامىز؟ ٵ) كەيبىرەۋلەر نە دەپ ويلاۋى مۇمكىن؟
2 ال ٴبىز، ماسىحشىلەر، ەحوباعا تولىقتاي سەنىم ارتا الامىز (ەرم. 17:7، 8). ول دوستارىن سۇيەتىنىنە جانە «ەشقاشان تاستامايتىنىنا» سەنىمدىمىز (ٴزاب. 9:10). ٴبىز يسا ماسىحكە دە سەنىم ارتامىز، ويتكەنى ول ٴبىز ٷشىن باسىن ولىمگە تىكتى (پەت. 1-ح. 3:18). سونداي-اق كيەلى كىتاپتىڭ دانالىققا تۇنعان اقىل-كەڭەستەرىنە دە سەنىم ارتامىز، ويتكەنى ٵرقايسىسىمىز ونىڭ تالاي پايداسىن كورگەنبىز (ٴتىم. 2-ح. 3:16، 17). دەسە دە كەيبىرەۋلەر: «ارينە، ەحوبا مەن يسا دا، كيەلى كىتاپ تا ابدەن سەنىم ارتۋعا تۇرادى. بىراق قاۋىمداعى باۋىرلاستارعا ٵرقاشان سەنىم ارتا الامىن با؟»— دەپ ويلايتىن شىعار. ەندەشە، باۋىرلاستارىمىز نەگە سەنىم ارتۋعا تۇرارلىق ەكەنىن كورەيىك.
باۋىرلاستارىمىز بىزگە كەرەك
دۇنيەجۇزىندە ەحوبانى ٴبىز سياقتى سۇيەتىن، سەنىمدى باۋىرلاستاردىڭ بولعانى قانداي جاقسى! (3-ابزاستى قاراڭىز)
3. ٴسىز قانداي ەرەكشە مارتەبەگە يەسىز؟ (مارقا 10:29، 30)
3 ەحوبا ٴسىزدى قىزمەتشىلەرىنەن تۇراتىن دۇنيەجۇزىلىك وتباسىنا جاقىنداتىپ تارتتى. وسىنداي وتباسىنىڭ مۇشەسى بولىپ، قانداي يگىلىكتەرگە كەنەلىپ جۇرگەنىڭىزدى ويلاپ كورىڭىزشى، بۇل ۇلكەن مارتەبە ەمەس پە؟! (مارقا 10:29، 30 وقىڭىز). دۇنيەنىڭ قاي بۇرىشىنا بارساڭىز دا، ەحوبانى ٴسىز سياقتى جاقسى كورەتىن جانە ونىڭ تالاپتارىن بارىنشا ۇستاناتىن باۋىرلاستارىڭىز بار. ٴبىز ٴتۇرلى تىلدەن، ٴتۇرلى ۇلتتان شىعىپ، ٴتۇرلى كيىم كيسەك تە، ٴبىر كورگەننەن-اق ٴبىر ٷيدىڭ بالالارىنداي ارالاسىپ كەتەمىز. اسىرەسە كوكتەگى سۇيىكتى اكەمىزدى ماداقتاپ، وعان ٴبارىمىز بىرگە عيبادات ەتكەندە، زور قۋانىشقا كەنەلەمىز (ٴزاب. 133:1).
4. ٴبىز باۋىرلاستارىمىزعا نەلىكتەن مۇقتاجبىز؟
4 بۇگىنگى تاڭدا باۋىرلاستارمەن بىرلىكتە بولعانىمىز بۇرىن-سوڭدى بولماعانداي ماڭىزدى. ويتكەنى ولار يىعىمىزداعى اۋىرتپالىعىمىزدى كوتەرىسەدى (ريم. 15:1؛ عال. 6:2). سونداي-اق قىزمەتىمىزدى باسەڭدەتپەي، رۋحاني مىقتى بولىپ قالۋعا دەم بەرىپ جۇرەدى (سال. 1-ح. 5:11؛ ەۆر. 10:23—25). راسىندا دا، شايتان ٸبىلىس پەن ونىڭ زۇلىم دۇنيەسىنە تاس قامالداي قارسى تۇرۋعا كومەكتەسەتىن قاۋىمىمىز بولماعاندا، نە ەتەر ەدىك؟! جاقىندا شايتان مەن ونىڭ قول استىنداعى ادامدار قۇدايدىڭ قىزمەتشىلەرىنە شابۋىلدايتىن بولادى. سول كەزدە جانىمىزدا تىرەك بولاتىن ادال دوستارىمىزدىڭ بارىنا قانشالىقتى ريزا بولامىز دەسەڭىزشى!
5. كەيبىرەۋلەر باۋىرلاستارعا نەگە سەنبەۋى مۇمكىن؟
5 بىراق كەيبىرىمىزگە باۋىرلاستارعا سەنۋ قيىن بولۋى مۇمكىن. ويتكەنى ٴبىر باۋىرلاس ۋادەسىن بۇزىپ، سەنىمىمىزدى اياقاستى ەتكەن بولار. يا بولماسا قاۋىمدا بىرەۋ سوزىمەن نە ىسىمەن جانىمىزعا تەرەڭ جارا سالعان شىعار. «اۋزىمىز كۇيگەندىكتەن»، ٴبىز باسقالارعا سەنۋدەن قالارمىز. ولاي بولسا، باۋىرلاستارىمىزعا قايتادان سەنىم ارتۋعا نە كومەكتەسە الادى؟
سۇيىسپەنشىلىك — سەنۋگە سەبەپ
6. سەنىم ارتۋعا سۇيىسپەنشىلىك قالاي كومەكتەسەدى؟ (قورىنتتىقتارعا 1-حات 13:4—8)
6 باۋىرلاستارعا سەنۋدىڭ نەگىزگى قوزعاۋشى كۇشى — سۇيىسپەنشىلىك. قورىنتتىقتارعا ارنالعان 1-حات 13 تاراۋدا سۇيىسپەنشىلىكتىڭ باسقالارعا سەنىم ارتۋعا جانە جوعالعان سەنىمدى قالپىنا كەلتىرۋگە كومەكتەسەتىن قىرلارى جازىلعان (قورىنتتىقتارعا 1-حات 13:4—8 وقىڭىز). مىسالى، 4 تارماقتا: «سۇيىسپەنشىلىك شىدامدى دا مەيىرىمدى»،— دەلىنگەن. ەحوبا ٴتىپتى وعان قارسى كۇنا جاساعانىمىزدا دا بىزگە شىدامدىلىق تانىتادى. ەندەشە، ٴبىز دە ىزامىزدى كەلتىرگەن نە جانىمىزعا جارا سالعان باۋىرلاسقا شىدامدى بولۋىمىز كەرەك. 5 تارماقتا: «[سۇيىسپەنشىلىك] اشۋشاڭ دا ەمەس، كەك تە ساقتامايدى»،— دەلىنگەن. ٴبىز باۋىرلاسىمىزدىڭ رەنجىتكەن كەزدەرىن جىپكە ٴتىزىپ، «كەيىن بەتىنە باسارمىن» دەپ كەك ساقتاعىمىز كەلمەس ەدى. ۋاعىزداۋشى 7:9: «رەنجۋگە اسىقپا»،— دەپ ەسىمىزگە سالادى. شىنىندا دا، وكپە ساقتاپ، ىزالانعاننان گورى «كۇن باتپاي تۇرىپ اشۋىمىزدى باسقانىمىز» الدەقايدا جاقسى ەمەس پە؟! (ەفەس. 4:26).
7. ماتاي 7:1—5-تارماقتارداعى پرينسيپتەر باۋىرلاستارعا سەنىم ارتۋعا قالاي كومەكتەسەدى؟
7 باۋىرلاستارعا سەنىم ارتۋدى ۇيرەنۋدىڭ تاعى ٴبىر جولى — ولارعا ەحوبانىڭ كوزىمەن قاراۋ. ەحوبا ولاردى جاقسى كورەدى جانە ولاردىڭ كۇنا-قاتەلىكتەرىن جىپكە تىزبەيدى. ٴبىز دە باۋىرلاستارعا سولاي قاراۋىمىز كەرەك (ٴزاب. 130:3). ولاردىڭ كەمشىلىكتەرىنە قادالماي، بويلارىنداعى جاقسى قاسيەتتەرىنە جانە قانداي جاقسىلىق جاساي الاتىندارىنا نازار اۋدارايىق (ماتاي 7:1—5 وقىڭىز). سۇيىسپەنشىلىك «بارىنە سەنەتىندىكتەن»، باۋىرلاستار جانىمىزدى ادەيى جارالاعىسى كەلمەگەنىنە سەنىمدى بولايىق (قور. 1-ح. 13:7). بىراق بۇل — كوز جۇمىپ، بارلىعىنا بىردەي سەنىم ارتا بەرۋىمىز كەرەك دەگەن ٴسوز ەمەس، ەحوبا بىزدەن بۇنى كۇتپەيدى. ٴبىز باۋىرلاستاردىڭ سەنىمدى ەكەندەرىن كورگەندىكتەن، ولارعا سەنىم ارتامىز b.
8. باۋىرلاستارعا سەنۋدى قالاي ۇيرەنە الامىز؟
8 وزگەلەرگە سەنىم ارتىپ ۇيرەنۋ ٷشىن ۋاقىت پەن كۇش قاجەت. الدىمەن، باۋىرلاستارمەن جاقىنىراق تانىسۋدان باستاڭىز. قاۋىم كەزدەسۋلەرىندە ولاردى اڭگىمەگە تارتىڭىز، قىزمەتكە شىعىپ تۇرىڭىز. سەنىمدى ەكەندەرىن كورسەتۋگە مۇمكىندىك بەرىپ، شىدامدىلىق تانىتىڭىز. ەندى عانا تانىسىپ جاتقاندىقتان، العاشىندا ولارعا جەكە ماسەلەلەرىڭىزدىڭ ٴبارىن ايتا بەرمەيتىن شىعارسىز. ال دوستاسا كەلە، سەزىمدەرىڭىزدى اشىق ايتا باستارسىز (لۇقا 16:10). بىراق باۋىرلاسىڭىز ٴبىر جاعدايدا كوڭىلىڭىزدى قالدىرسا شە؟ ودان كۇدەر ۇزۋگە اسىقپاڭىز. ٴبىر-ەكى ادامنىڭ ارەكەتىنە بولا بارلىق باۋىرلاسقا دەگەن سەنىمىڭىزدى جوعالتپاڭىز. ەندەشە، قازىر كەيبىرەۋلەردەن كوڭىلى قالسا دا، باسقالارعا سەنىم ارتا بىلگەن ەحوبانىڭ كەيبىر قىزمەتشىلەرىنىڭ مىسالدارىن قاراستىرايىق.
باسقالارعا سەنە بىلگەن جانداردىڭ ۇلگىسى
حاننا ەليدىڭ بىردەن ايىپتاپ تاستاعانىنا قاراماستان، ەحوبا ورناتقان شارالارعا سەنىم ارتا بەردى (9-ابزاستى قاراڭىز)
9. ا) ەحوبانىڭ وكىلدەرىنىڭ كۇنا-قاتەلىكتەرىنە قاراماستان، قالايشا حاننا قۇدايدىڭ شارالارىنا سەنىم ارتا بەردى؟ ٵ) حاننانىڭ جاعدايىنان ەحوبانىڭ شارالارىنا سەنىم ارتۋعا قاتىستى نە ۇيرەندىڭىز؟ (سۋرەتتى قاراڭىز.)
9 جاۋاپتى ەر باۋىرلاستان كوڭىلىڭىز قالعان كەز بولعان با؟ ولاي بولسا، حاننانىڭ مىسالىن قاراستىرىپ كورەيىكشى. سول ۋاقىتتا باس ٴدىني قىزمەتكەر ەلي كۇللى يسرايل حالقىن شىنايى عيباداتتا باستاپ الىپ جۇرگەن بەدەلدى تۇلعا بولعان. بىراق ونىڭ وتباسىنىڭ كۇيى ٴماز ەمەس ەدى. ۇلدارى جاۋاپتى مىندەتتەر اتقارسا دا، جەركەنىشتى ىستەر جاساپ، ازعىندىقپەن اينالىساتىن. ال ەلي ولاردى جارىتىپ جونگە سالمايتىن. بىراق ەحوبا ەليدى قىزمەتىنەن بىردەن الىپ تاستامادى. دەسە دە حاننا: «ەلي باس ٴدىني قىزمەتكەر بولىپ تۇرعاندا، كيەلى شاتىردا عيبادات ەتپەسپىن»،— دەپ قۇداي ورناتقان رۋحاني شارالاردان تەرىس اينالىپ كەتپەدى. ول كيەلى شاتىردا جانى ەزىلىپ، قاتتى كۇيزەلىپ دۇعا ەتىپ تۇرعاندا، ەلي ونى ماس دەپ ويلاپ قالادى. ٴسۇيتىپ، جىعىلعانعا جۇدىرىق بولىپ، حاننانى ايىپتاپ تاستايدى (سام. 1-ج. 1:12—16). وسىنداي اۋىر سوققىعا قاراماستان، حاننا قۇدايعا انت بەرەدى، ياعني ۇلدى بولسا، ونى كيەلى شاتىردا قىزمەت ەتۋگە باعىشتايتىنىن ايتادى. بالاسى كەيىن ەليدىڭ قاراماعىندا قىزمەت ەتەرىن بىلسە دە، حاننا وسىلاي ۋادە ەتەدى (سام. 1-ج. 1:11). ەليدىڭ ارسىز ۇلدارىنا كەلسەك، ولاردى جونگە سالۋ كەرەك بولدى. ەحوبا ۋاقىتى كەلگەندە سولاي ەتتى دە (سام. 1-ج. 4:17). ال حانناعا سامۋيل دەگەن تاماشا ۇل سيلادى (سام. 1-ج. 1:17—20).
10. ساتقىندىق كورسە دە، ٴداۋىت قالايشا باسقالارعا دەگەن سەنىمىن جوعالتپادى؟
10 ٴسىزدى دوسىڭىز ساتىپ كەتكەن جاعداي بولعان با؟ ولاي بولسا، ٴداۋىت پاتشانىڭ وقيعاسىن قاراستىرايىق. ونىڭ ادال دوستارىنىڭ ٴبىرى احيتوپەل بولاتىن. ٴداۋىتتىڭ ۇلى ابەسسالوم اكەسىنە قارسى باس كوتەرىپ، بيلىكتى تارتىپ الماق بولعاندا، احيتوپەل ابەسسالومنىڭ جاعىنا شىعىپ كەتەدى. باۋىر ەتى بالاسىنىڭ دا، اقىلشىسى بولعان دوسىنىڭ دا وزىنە تاپ بەرگەنى داۋىتكە اۋىر سوققى بولىپ تيسە كەرەك. دەسە دە ول «جاقىندارىم وسىلاي ەتسە، باسقالاردان نە ٷمىت» دەپ، كوپكە توپىراق شاشپادى. ول بۇلىكشىلەرگە قوسىلماعان حۋشاي دەگەن باسقا ٴبىر ادال جانعا سەنىم ارتتى. حۋشاي ونىڭ ٷمىتىن اقتادى، ٴتىپتى ول ٷشىن باسىن قاتەرگە تىكتى (سام. 2-ج. 17:1—16).
11. نابالدىڭ ٴبىر قىزمەتشىسى باسقالارعا سەنىم ارتاتىنىن قالاي كورسەتتى؟
11 ال ەندى نابالدىڭ ٴبىر قىزمەتشىسىنىڭ ۇلگىسىنە نازار اۋدارايىق. ٴداۋىت پەن ونىڭ قاسىنداعى جىگىتتەرى نابال دەگەن ٴبىر باي كىسىنىڭ قىزمەتشىلەرىن قورعاپ جۇرەدى. كەيىنىرەك ٴداۋىت اشىعىپ قالعان جىگىتتەرىن تاماقتاندىرۋ ٷشىن، نابالدان ازىق-تۇلىگىنەن شاماسى كەلگەنشە بەرۋدى سۇرايدى. نابال ونىڭ وسى ٴبىر قاراپايىم ٶتىنىشىن ورىنداماي قويعاندا، ٴداۋىت قاتتى اشۋلانىپ، ونىڭ ۇيىندەگى ەركەك اتاۋلىنىڭ ٴبارىن قىرىپ جىبەرمەك بولادى. بولعان جاعدايدى نابالدىڭ ٴبىر قىزمەتشىسى ونىڭ ايەلى ابيگەلگە كەلىپ جەتكىزەدى، سەبەبى ونىڭ ٶمىرى ەندى سونىڭ قولىندا ەدى. ابيگەل ٴبىر امال تاباتىنىنا سەنگەندىكتەن، ول قاشىپ كەتپەدى. ويتكەنى ابيگەلدىڭ اقىلدى ايەل دەگەن جاقسى اتى بار ەدى. ناتيجەسىندە، ابيگەل باتىلدىقپەن ٴداۋىتتىڭ بەتىن قايتارىپ، الگى قىزمەتشىسىنىڭ سەنىمىن اقتادى (سام. 1-ج. 25:2—35). ٶز كەزەگىندە ابيگەل دە ٴداۋىت اشۋىن اقىلعا باعىندىراتىنىنا سەندى.
12. يسا شاكىرتتەرىنىڭ قاتەلىكتەرىنە قاراماستان، ولارعا قالاي سەنىم ارتتى؟
12 يسا شاكىرتتەرىنىڭ قاتەلىكتەرىنە قاراماستان، ولارعا سەنىم ارتتى (جوح. 15:15، 16). بىردە جاقىپ پەن جوحان ودان كوك پاتشالىعىنان دارەجەلى ورىن بەرۋىن سۇرايدى. سول كەزدە يسا ولاردى: «ەحوباعا دۇرىس ەمەس نيەتپەن قىزمەت ەتىپ جۇرسىڭدەر»،— دەپ ايىپتامادى نەمەسە ەكەۋىن ەلشى بولۋدان شەتتەتىپ تاستامادى (مار. 10:35—40). كەيىنىرەك يسا تۇتقىنعا الىنعان ٴتۇنى شاكىرتتەرىنىڭ بارلىعى ونى تاستاپ، قاشىپ كەتەدى (مات. 26:56). بىراق يسا ەش ٷمىتىن ۇزبەدى. ولاردىڭ قاتە-كەمشىلىكتەرىن جاقسى بىلسە دە، «ولاردى اقىرىنا دەيىن ٴسۇيدى» (جوح. 13:1). قايتا تىرىلگەننەن كەيىن يسا 11 ادال ەلشىسىنە ٴتىپتى شاكىرت دايىنداۋ ىسىندە جەتەكشىلىك ەتۋدى جانە اياۋلى قويلارىن باعىپ-قاعۋدى تاپسىرىپ، ۇلكەن ىستە سەنىم ارتادى (مات. 28:19، 20؛ جوح. 21:15—17). كەمشىلىكتەرى كوپ، كەمەلسىز ادامدار بولسا دا شاكىرتتەرى يسانىڭ ٷمىتىن اقتادى. ولاردىڭ بارلىعى جەردەگى ومىرلەرىنىڭ سوڭىنا دەيىن ادال قىزمەت ەتتى. راسىمەن دە، يسا دا، الدىندا ايتىلىپ كەتكەن حاننا، ٴداۋىت، نابالدىڭ قىزمەتشىسى مەن ابيگەل دە كەمەلسىز ادامدارعا سەنىم ارتۋدا كەرەمەت ۇلگى قالدىرعان.
باۋىرلاستارعا قايتادان سەنىم ارتىپ ۇيرەنۋ
13. وزگەلەرگە سەنىم ارتۋعا نە نارسە كەدەرگى بولۋى مۇمكىن؟
13 ٴبىر باۋىرلاسقا قۇپياڭىزدى سەنىپ ايتىپ، كەيىن سول قۇپياڭىز باسقالارعا تاراپ كەتكەن كەز بولعان با؟ بۇندايدا توبەمىزدەن مۇزداي سۋ قۇيىپ جىبەرگەندەي بولادى. ٴبىزدىڭ ٴبىر ايەل باۋىرلاسىمىز ٴبىر اقساقالمەن ٶزىنىڭ جەكە ماسەلەسىن بولىسكەن ەكەن. سويتسە كەلەسى كۇنى اقساقالدىڭ ايەلى باۋىرلاسقا تەلەفون شالىپ، سول ماسەلە بويىنشا جىگەرلەندىرمەك بولادى. بۇل جاعداي باۋىرلاسىمىزدىڭ الگى اقساقالعا دەگەن سەنىمىن كۇيرەتەدى. بىراق قۋانىشقا وراي، باۋىرلاسىمىز وزگە اقساقالدىڭ كومەگىنە جۇگىنىپ، قاۋىم اقساقالدارىنا دەگەن جوعالعان سەنىمىن قالپىنا كەلتىرەدى.
14. ٴبىر ەر باۋىرلاسقا اقساقالدارعا قايتادان سەنىم ارتۋعا نە كومەكتەستى؟
14 ٴبىر ەر باۋىرلاسىمىز ۇزاق ۋاقىت بويى ەكى اقساقالعا رەنجىپ، سەنىم ارتپاي جۇرەدى. كەيىن ول ٶزى قۇرمەتتەيتىن ٴبىر ەر باۋىرلاستىڭ «ٴبىزدىڭ جاۋىمىز — شايتان، باۋىرلاستار ەمەس» دەگەن ٴسوزى جايلى ويلانا باستايدى. باۋىرلاسىمىز قاراپايىم دا اسەرلى وسى شىندىقتىڭ ۇستىنەن وي جۇگىرتىپ، دۇعا ەتىپ، اقىرىندا الگى ەكى اقساقالمەن تاتۋلاسادى.
15. كەيبىرەۋلەرگە قايتادان باۋىرلاستارعا سەنىم ارتۋ ٷشىن نەگە ۋاقىت قاجەت؟ مىسال كەلتىرىڭىز.
15 مارتەبەلى قىزمەتىڭىزدەن ايىرىلعان كەزىڭىز بولعان با؟ بۇل كىم-كىمگە دە اۋىر تيەتىنى ٴسوزسىز. گرەتا دەگەن ايەل باۋىرلاستىڭ وقيعاسىنا توقتالايىقشى. ول اناسى ەكەۋى 1930-جىلدارى ناسيستىك گەرمانيادا ىسىمىزگە تيىم سالىنعان كەزدە دە ادالدىقپەن قىزمەت ەتكەن. گرەتا «كۇزەت مۇناراسى» جۋرنالىنىڭ كوشىرمەلەرىن جاسايتىن ٵرى بۇل ٸس وعان قاتتى ۇنايتىن. بىراق ەر باۋىرلاستار ونىڭ اكەسى شىندىققا قارسى ەكەنىن بىلگەننەن كەيىن، ودان ٴسۇيىپ اتقاراتىن مارتەبەلى ٸسىن الىپ قويادى. ويتكەنى اكەسى قاۋىمدى قارسىلاس ادامدارعا ساتىپ جىبەرەدى دەپ قورقادى. جىعىلعانعا جۇدىرىق بولىپ، ەكىنشى دۇنيەجۇزىلىك سوعىس كەزىندە باۋىرلاستار گرەتانىڭ وزىنە دە، اناسىنا دا جۋرنالدارىمىزدىڭ كوشىرمەسىن بەرمەي قويادى. ٴتىپتى كوشەدە كورىسىپ قالسا، ولارمەن امانداسپاي ٶتىپ كەتەدى. بۇنىڭ ٴبارى گرەتانىڭ جۇرەگىنە تەرەڭ جارا سالادى! تەك ۇزاق ۋاقىت وتە گرەتا سول باۋىرلاستاردى كەشىرىپ، ولارعا قايتادان سەنىم ارتا باستايدى. ويتكەنى «ەحوبا ولاردى كەشىرگەن بولار، ەندەشە مەن دە ولاردى كەشىرۋىم كەرەك» دەگەن ويعا كەلەدى c.
«ٴبىزدىڭ جاۋىمىز — شايتان، باۋىرلاستار ەمەس»
16. باۋىرلاستارعا سەنۋگە كەدەرگى ەتەتىن نارسەلەردى نەلىكتەن جەڭۋىمىز كەرەك؟
16 گرەتا سياقتى ٴٴسىزدىڭ دە كوڭىلىڭىز سىنىپ، سەنىمىڭىز جوعالعان بولسا، سول سەنىمىڭىزدى قالپىنا كەلتىرۋگە كۇش سالا بەرىڭىز. بۇعان ٴبىراز ۋاقىت كەرەك، ارينە. بىراق كەيىن جەمىسىن كورگەندە، ابدەن ريزا بولاسىز. مىناداي ٴبىر مىسالدى قاراستىرايىقشى: ٴسىز ٴبىر تاماقتان ۋلانىپ قالدىڭىز دەلىك. بۇدان كەيىن، ارينە، باسقا تاماقتاردى ساقتىقپەن، تاڭداپ جەيتىن بولاسىز. الايدا ٴبىر تاماقتان ۋلاندىم دەپ مۇلدەم تاماق ىشپەي قويمايسىز عوي. سول سياقتى ٴبىر باۋىرلاسقا دەگەن سەنىمىمىز جوعالعاندا، باۋىرلاستاردىڭ بارىنە كۇماندانىپ، سەنۋدەن قالماۋىمىز قاجەت. ويتكەنى ٴبارىمىز دە كەمەلسىزبىز، ٴمىنسىز ادام جوق. باسقالارعا قايتادان سەنىم ارتۋدى ۇيرەنسەك، باقىتتىراق بولامىز جانە قاۋىمداعىلار دا ٴبىر-بىرىنە سەنىم ارتىپ ۇيرەنۋلەرىنە ٶز ۇلەسىمىزدى قوساتىن بولامىز.
17. باۋىرلاستارعا سەنۋ نەگە ماڭىزدى جانە كەلەسى ماقالا نە جايلى بولماق؟
17 شايتاننىڭ دۇنيەسىندە ادامدار ٴبىر-بىرىنە سەنىم ارتپايدى. بىراق ەحوبانىڭ ۇيىمىندا بارلىعىمىز ٴبىر-ٴبىرىمىزدى جاقسى كورگەندىكتەن، سەنىم ارتامىز. وسى سەنىمنىڭ ارقاسىندا بۇگىندە ارامىزدا قۋانىش بار، بىرلىك بار. ال بولاشاقتاعى قيىندىقتار كەزىندە بۇل سەنىم بىزگە قورعان بولادى. ەگەر ٴبىر باۋىرلاس ٴٴسىزدىڭ سەنىمىڭىزدى اقتاماي، كوڭىلىڭىزدى قالدىرعان بولسا، نە ىستەگەنىڭىز دۇرىس؟ جاعدايعا ەحوبانىڭ كوزىمەن قاراۋعا تىرىسىڭىز. كيەلى كىتاپتىڭ اقىل-كەڭەستەرىنە قۇلاق اسىڭىز. باۋىرلاستارعا دەگەن سۇيىسپەنشىلىگىڭىزدى تەرەڭدەتە بەرىڭىز جانە كيەلى كىتاپتاعى كەيىپكەرلەردەن ۇيرەنىڭىز. سوندا جانىڭىزعا تۇسكەن جاراڭىز جازىلىپ، باۋىرلاسقا قايتا سەنىم ارتا باستايسىز. سونداي-اق «تۋعان باۋىردان دا جاقىن كوپ دوستار» تاباسىز (ناق. س. 18:24). الايدا ٶزىمىز دە سەنىم ارتۋعا تۇرارلىق ادام بولعىمىز كەلەدى. كەلەسى ماقالادا بۇل ٷشىن نە ىستەۋىمىز كەرەكتىگىن بىلەتىن بولامىز.
99-ٵن سانسىز كوپ باۋىرلاستار
a ٴبىز باۋىرلاستارعا سەنىم ارتۋىمىز قاجەت بولعانمەن، بۇل وڭاي بولا بەرمەيدى. ويتكەنى كەيدە ولار كوڭىلىمىزدى قالدىرىپ جاتادى. وسىندايدا ولارعا قايتادان سەنىم ارتۋعا نە كومەكتەسەدى؟ جالپى، باۋىرلاستارعا كوبىرەك سەنىم ارتۋدى قالاي ۇيرەنسەك بولادى؟ بۇل ماقالادا كيەلى كىتاپتاعى كەيبىر پرينسيپتەر مەن كەيبىر كەيىپكەرلەردىڭ مىسالدارىن قاراستىرىپ، وي جۇگىرتەتىن بولامىز.
b كيەلى كىتاپ قاۋىمدا سەنىم ارتۋعا تۇرمايتىن ادامدار بولۋى مۇمكىن ەكەنىن ەسكەرتەدى (ياھد. 4). سيرەك جاعدايلاردا قاۋىمدا «جالعان ىلىمدەردى تاراتىپ»، باسقالاردى اداستىرۋعا تىرىساتىن جالعان باۋىرلاستار دا بولۋى مۇمكىن (ەل. ٸس. 20:30). ٴبىز مۇنداي ادامدارعا سەنبەيمىز دە، ولاردى تىڭدامايمىز دا.
c گرەتا باۋىرلاس جايلى كوبىرەك ٴبىلۋ ٷشىن، 1974-جىلعى «ەحوبا كۋاگەرلەرىنىڭ جىلناماسىنىڭ» (جانزۇشا) 129—131-بەتتەرىن قاراڭىز.
