40-زەرتتەۋ ماقالاسى
«كوپشىلىكتى ادىلدىككە جەتكىزۋ»
«كوپشىلىكتى ادىلدىككە جەتكىزەتىندەر جۇلدىزدارداي ماڭگى باقي جارقىرايدى» (دان. 12:3).
151-ٵن ول شاقىرادى
اڭداتپا a
1. مىڭجىلدىق بيلىك كەزىندە ٴبىزدى قانداي جان تەبىرەنتەر ساتتەر كۇتىپ تۇر؟
ٴماسىحتىڭ مىڭجىلدىق بيلىگى كەزىندە مارقۇمدار تىرىلەتىن كۇندى ەلەستەتىپ كورىڭىزشى! جەردىڭ ٵر بۇرىشىندا ادامدار جىلدار بويى ساعىنا كۇتكەن جاقىندارىمەن قاۋىشىپ، قۋانىشتان جىلايتىن بولادى. سول ۋاقىتتى ەحوبا دا اڭساپ كۇتىپ وتىر (ٵيۇپ 14:15). سول كەزدە، الدىڭعى ماقالادا ايتىلعانداي، ەسىمدەرى ٶمىر كىتابىنا جازىلعان «ادىلدەر» «ٶمىر ٴسۇرۋ ٷشىن تىرىلەدى» (ەل. ٸس. 24:15؛ جوح. 5:29). بالكىم، كوبىمىزدىڭ جاقىندارىمىز العاشقى بولىپ تىرىلەتىندەردىڭ قاتارىندا بولاتىن شىعار b. ال قايتىس بولعانعا دەيىن ەحوبا تۋرالى ٴبىلىم الۋعا، وعان ادالدىق ساقتاپ قىزمەت ەتۋگە جەتكىلىكتى مۇمكىندىگى بولماعان «ادىلەتسىزدەر» «سوتتالۋ ٷشىن تىرىلەدى».
2، 3. ا) يشايا 11:9، 10 دا ايتىلىپ كەتكەندەي، بولاشاقتا قانداي دۇنيەجۇزىلىك ٴبىلىم بەرۋ باعدارلاماسى وتەتىن بولادى؟ ٵ) وسى ماقالادا نە قاراستىرامىز؟
2 تىرىلەتىن سول ادامداردىڭ بارلىعىنا ٴتالىم الۋ قاجەت بولادى (يشايا 26:9؛ 61:11). سوندىقتان تاريحتا بۇرىن-سوڭدى بولماعان ەڭ اۋقىمدى ٴبىلىم بەرۋ باعدارلاماسى ۇيىمداستىرىلادى (يشايا 11:9، 10 وقىڭىز). ويتكەنى قايتا تىرىلگەن ادىلەتسىزدەرگە يسا ٴماسىح، قۇداي پاتشالىعى، تولەم قۇرباندىعى تۋرالى جانە ەحوبانىڭ ەسىمى مەن بۇكىلالەمدىك بيلىگىنە قاتىستى داۋلى ماسەلە تۋرالى ٴبىلىم الۋ كەرەك بولادى. ٴتىپتى ادىلدەردىڭ وزدەرىنە ەحوبانىڭ جەر مەن ادامزاتقا قاتىستى اشقان جاڭا تۇسىنىكتەرىن ٴبىلۋ كەرەك بولادى. ويتكەنى ولاردىڭ كەيبىرى كيەلى كىتاپ تولىق جازىلماي تۇرىپ ۇزاق جىلدار بۇرىن قايتىس بولىپ كەتكەن. دەمەك، ادىلدەردى دە، ادىلەتسىزدەردى دە مول ٴبىلىم كۇتىپ تۇر.
3 بۇل ماقالادا ٴبىز مىنا سۇراقتارعا جاۋاپ الامىز: دۇنيەجۇزىلىك ٴبىلىم بەرۋ باعدارلاماسى قالاي جۇرەدى؟ ادامداردىڭ ەسىمدەرى ٶمىر كىتابىنا ٴبىرجولاتا ٴتۇسۋ-تۇسپەۋى وسى باعدارلاماعا قالاي بايلانىستى بولادى؟ بۇل سۇراقتاردىڭ جاۋاپتارى بۇگىندە بارلىعىمىزدى دا قىزىقتىرۋ كەرەك. الدا كورەتىنىمىزدەي، دانيال مەن ايان كىتاپتارىنداعى كەيبىر پايعامبارلىقتار بىزگە جەر بەتىنە تىرىلگەن مارقۇمدارمەن نە بولاتىنىن جاقسىراق تۇسىنۋگە كومەكتەسەدى. ەندەشە، دانيال 12:1، 2 دەگى پايعامبارلىقتا نە ايتىلعانىنان باستايىق.
«جەر قوينىندا ۇيىقتاپ جاتقاندار... ويانادى»
4، 5. دانيال 12:1 دە اقىرعى ۋاقىتقا قاتىستى نە ايتىلادى؟
4 دانيال 12:1 وقىڭىز. دانيال كىتابىندا اقىرعى ۋاقىتتا بىرىنەن كەيىن ٴبىرى بولاتىن ەرەكشە وقيعالار سيپاتتالادى. مىسالى، دانيال 12:1 دە ميكايلدىڭ، ياعني يسا ٴٴماسىحتىڭ «[قۇداي] حالقىنىڭ مۇددەسىن قورعاپ تۇرعانى» ايتىلعان. پايعامبارلىقتىڭ وسى بولىگى 1914-جىلى يسا قۇداي پاتشالىعىنىڭ پاتشاسى بولعاندا ورىندالا باستادى.
5 سونداي-اق دانيال پايعامبار يسانىڭ «حالىق پايدا بولعالى بەرى بۇرىن-سوڭدى باسقا تۇسپەگەن قيىن-قىستاۋ ۋاقىتتا» «ارەكەت ەتەتىنىن» اشقان. بۇل «قيىن-قىستاۋ ۋاقىت» ماتاي 24:21 دەگى «زور الاپاتتى» بىلدىرەدى. دەمەك، يسا سول قيىن-قىستاۋ ۋاقىتتىڭ اياعىندا، ياعني ارماگەددوندا قۇداي حالقىن قورعاۋ ٷشىن ارەكەت ەتەدى. ايان كىتابىنان بۇل حالىقتىڭ زور الاپاتتان وتكەن «ۇلى جاماعات» ەكەنىن بىلەمىز (ايان 7:9، 14).
6. ۇلى جاماعات زور الاپاتتان وتكەننەن كەيىن نە بولادى؟ ٴتۇسىندىرىڭىز. (جەر بەتىندە بولاتىن قايتا ٴتىرىلۋ جايلى كوبىرەك ٴبىلۋ ٷشىن وسى جۋرنالداعى «وقىرمان ساۋالدارىن» قاراڭىز.)
6 دانيال 12:2 وقىڭىز. ۇلى جاماعات قيىن-قىستاۋ ۋاقىتتان وتكەننەن كەيىن قانداي جاعداي ورىن الادى؟ ٴبىز بۇرىندا بۇل تارماقتاعى پايعامبارلىق بەينەلى قايتا ٴتىرىلۋدى، ياعني سوڭعى كۇندەردە قۇداي قىزمەتشىلەرىنىڭ رۋحاني جاڭعىرۋىن بىلدىرەدى دەپ تۇسىندىك c. بىراق ەندى ٴبىز مۇندا مارقۇمداردىڭ جاڭا دۇنيەدە تۋرا ماعىنادا ٴتىرىلۋى جايلى ايتىلىپ تۇر دەگەن تۇجىرىمعا كەلدىك. نەگە دەيسىز بە؟ بۇل تارماقتاعى «جەر قوينى» دەگەن تىركەس ٵيۇپ 17:16 دا دا كەزدەسەدى ٵرى ول مارقۇمدار جاتقان كوردى بىلدىرەدى. دەمەك، دانيال 12:2 دە سوڭعى كۇندەر اياقتالىپ، ارماگەددون شايقاسى بىتكەننەن كەيىن ورىن الاتىن تۋرا ماعىناداعى قايتا ٴتىرىلۋ جايلى ايتىلىپ تۇر.
7. ا) مارقۇمداردىڭ كەيبىرى قاي ماعىنادا «ماڭگى ٶمىر ٴسۇرۋ ٷشىن ويانادى»؟ ٵ) نەلىكتەن ونى «اناعۇرلىم جاقسى قايتا ٴتىرىلۋ» دەيمىز؟
7 ال دانيال12:2 دەگى مارقۇمداردىڭ «كەيبىرى ماڭگى ٶمىر ٴسۇرۋ ٷشىن ويانادى» دەگەن نەنى بىلدىرەدى؟ قايتا تىرىلگەندەر يسانىڭ مىڭجىلدىق بيلىگى كەزىندە ەحوبا مەن يسا تۋرالى ٴبىلىم الۋدى جالعاستىرىپ، ولارعا مويىنسۇنا بەرسە، ٴبىرجولاتا ماڭگىلىك ومىرگە يە بولادى (جوح. 17:3). بۇل بۇرىنعى بولعان قايتا تىرىلۋلەرمەن سالىستىرعاندا «اناعۇرلىم جاقسى قايتا ٴتىرىلۋ» بولماق (ەۆر. 11:35). ويتكەنى بۇرىنعى ۋاقىتتا تىرىلگەن ادامدار كەمەلسىز بولعاندىقتان قايتادان ولگەن.
8. قالايشا قايتا تىرىلگەندەردىڭ كەيبىرى «ماسقارا بولىپ، ماڭگىلىك بويى جەككورىنىشپەن ەسكە الىنادى»؟
8 دەگەنمەن قايتا تىرىلگەندەردىڭ اراسىندا ەحوبادان ٴبىلىم العىسى كەلمەيتىندەر دە بولادى. دانيال ولار جايلى: «وزگەلەرى ماسقارا بولىپ، ماڭگىلىك بويى جەككورىنىشپەن ەسكە الىنادى»،— دەپ پايعامبارلىق ەتكەن. بۇلىكشىل رۋح تانىتقاندىقتان، ولاردىڭ ەسىمدەرى ٶمىر كىتابىنا جازىلمايدى جانە ماڭگىلىك ٶمىردى يەمدەنبەيدى. كەرىسىنشە، ولار ماڭگىلىك بويى «جەككورىنىشپەن ەسكە الىنادى»، ياعني جويىلادى. دەمەك، دانيال 12:2 دە مارقۇمداردىڭ قايتا تىرىلگەننەن كەيىنگى ارەكەتتەرىنە قاراي تۇبىندە ولارمەن نە بولاتىنى ايتىلىپ تۇر، ياعني كەيبىرەۋلەرى ماڭگى ٶمىر سۇرەدى، ال كەيبىرەۋلەرى ماڭگىلىككە جويىلادى d (ايان 20:12).
«كوپشىلىكتى ادىلدىككە جەتكىزەتىندەر»
9، 10. زور الاپاتتان كەيىن تاعى نە بولادى جانە كىمدەر «اسپان كۇمبەزىندەي جارقىراپ نۇر شاشادى»؟
9 دانيال 12:3 وقىڭىز. الداعى «قيىن-قىستاۋ ۋاقىتتان» كەيىن، ياعني زور الاپات وتكەن سوڭ تاعى نە بولادى؟ بۇل جايلى دانيال 12:3 تەن بىلەمىز.
10 مۇندا ايتىلعان «اسپان كۇمبەزىندەي جارقىراپ نۇر شاشاتىندار» كىمدەر؟ بۇل سۇراقتىڭ كىلتىن يسانىڭ ماتاي 13:43 تە ايتقان سوزدەرىنەن تابامىز. ول: «ادىلدەر سول كەزدە اكەلەرىنىڭ پاتشالىعىندا كۇندەي جارقىرايدى»،— دەگەن. وسى سوزدەردىڭ ٴمان-ماتىنىنەن يسا مۇندا كوك پاتشالىعىندا ونىمەن بىرگە قىزمەت ەتەتىن «پاتشالىقتىڭ ۇلدارى» جايلى، ياعني مايلانعان باۋىرلارى جايلى ايتقانىن بايقايمىز (مات. 13:38). دەمەك، دانيال 12:3 تە مايلانعاندار مەن ولاردىڭ مىڭجىلدىق بيلىگى كەزىندە اتقاراتىن ٸسى جايلى ايتىلىپ تۇر دەي الامىز.
يسا ماسىحپەن بىرگە 144000 مايلانعان يىق تىرەسە قىزمەتتەسىپ، مىڭجىلدىقتا جۇرەتىن اعارتۋ ٸسىن باسقاراتىن بولادى (11-ابزاستى قاراڭىز)
11، 12. 144000 مايلانعان مىڭ جىل بويى قانداي ٸس اتقارادى؟
11 قاي ماعىنادا مايلانعاندار «كوپشىلىكتى ادىلدىككە جەتكىزەدى»؟ ولار يسا ماسىحپەن يىق تىرەسە قىزمەتتەسىپ، مىڭجىلدىق بيلىك كەزىندە جەر بەتىندە جۇرەتىن اعارتۋ ٸسىن باسقاراتىن بولادى. 144000 مايلانعان پاتشانىڭ عانا ەمەس، ٴدىني قىزمەتكەردىڭ دە مىندەتىن اتقارادى (ايان 1:6؛ 5:10؛ 20:6). ولار «حالىقتاردى ساۋىقتىرۋ» ىسىنە قاتىسادى، ياعني ولاردى بىرتە-بىرتە كەمەلدىلىككە جەتكىزەدى (ايان 22:1، 2؛ ەزەك. 47:12). بۇل ٸستى مايلانعاندار قۋانا-قۋانا اتقاراتىن بولادى!
12 ال ادىلدىككە جەتەتىن «كوپشىلىكتى» كىمدەر قۇرايدى؟ قايتا تىرىلگەندەر جانە ارماگەددوننان وتكەندەر مەن جاڭا دۇنيەدە تۋىلۋى مۇمكىن بالالار. جەر بەتىندەگى سول ادامداردىڭ ٴبارى مىڭ جىلدىڭ سوڭىندا كەمەلدى بولادى. سوندا، قاي كەزدە ولاردىڭ ەسىمدەرى ٶمىر كىتابىنا قارىنداشپەن ەمەس، سيامەن ٴبىرجولاتا بەكىتىلەدى؟
سوڭعى سىناق
13، 14. جەر بەتىندە كەمەلدى ادامداردىڭ ٴبارى ماڭگى ٶمىردى يەمدەنۋ ٷشىن نە ىستەۋ كەرەك بولادى؟
13 ٴبىز مىنانى ۇمىتپاعانىمىز ٴجون: كەمەلدىلىككە جەتكەنىمىز ماڭگى ٶمىردى يەمدەندىك دەگەندى بىلدىرمەيدى. مىسالى، ادام مەن حاۋا دا كەمەلدى بولعان، بىراق ماڭگى ٶمىردى يەمدەنۋ ٷشىن ولار الدىمەن ەحوباعا مويىنسۇناتىندارىن كورسەتۋلەرى كەرەك ەدى. وكىنىشكە وراي، ولار مويىنسۇنبادى (ريم. 5:12).
14 مىڭ جىلدىڭ سوڭىندا جەر بەتىندەگى جاعداي قانداي بولماق؟ ادامداردىڭ بارلىعى كەمەلدى بولادى. ولار ەحوبانىڭ بيلىگىن ماڭگىلىككە قولداي ما، الدە ادام مەن حاۋا سياقتى كەمەلدى بولا تۇرا وپاسىزدىق جاساي ما؟ بۇل قالاي انىقتالاتىن بولادى؟ قازىر سول تۋرالى بىلەمىز.
15، 16. ا) بۇكىل كەمەلدى ادامزاتتىڭ ەحوباعا دەگەن ادالدىعى قاي كەزدە سىنالاتىن بولادى؟ ٵ) سوڭعى سىناقتىڭ ناتيجەسى قانداي بولادى؟
15 شايتان مىڭ جىلعا بۇعاۋلاناتىندىقتان، سول ۋاقىتتا ەشكىمدى اداستىرا المايدى. بىراق مىڭ جىلدىڭ سوڭىندا ول بوساتىلادى. سوندا ول كەمەلدى ادامداردى اداستىرۋعا تىرىسىپ-باعادى. سول سىناقتا ٵربىر كەمەلدى ادام ەحوبانىڭ ەسىمىن قۇرمەتتەپ، بۇكىلالەمدىك بيلىگىن قولداي ما، جوق پا — سونى كورسەتەتىن بولادى (ايان 20:7—10). شايتان سىناعاندا قالاي ارەكەت ەتەتىندەرىنە قاراي، ولاردىڭ ەسىمدەرى ٶمىر كىتابىنا ٴبىرجولاتا جازىلادى يا جازىلمايدى.
16 ادام مەن حاۋا سياقتى ەحوباعا باعىنباۋدى شەشەتىن سانى بەلگىسىز ادامدار دا بولادى. ولارمەن نە بولاتىنى جايلى ايان 20:15 تە: «كىم ٶمىر كىتابىنا جازىلماعان بولسا، ول دا وتتى كولگە تاستالدى»،— دەلىنگەن. دەمەك، بۇلىكشىلەردىڭ ٴبارى ماڭگىلىككە جويىلادى. ال كەمەلدى ادامزاتتىڭ كوپشىلىگى سوڭعى سىناقتان سۇرىنبەي وتەدى. ولاردىڭ ەسىمدەرى ٶمىر كىتابىنا سيامەن بەكىتىلەدى.
«اقىرعى ۋاقىتتا»
17. پەرىشتە دانيال پايعامبارعا ٴبىزدىڭ كەزىمىز جايلى نە ايتتى؟ (دانيال 12:4، 8—10)
17 بولاشاقتا ٴبىزدى نە دەگەن وقيعالار كۇتىپ تۇر دەسەڭىزشى! دانيال ٴبىزدىڭ كەزىمىزگە، ياعني «اقىرعى ۋاقىتقا» قاتىستى دا ماڭىزدى حابار العان (دانيال 12:4، 8—10 وقىڭىز؛ ٴتىم. 2-ح. 3:1—5). پەرىشتە وعان: «شىنايى ٴبىلىم مولايا تۇسەدى»،— دەدى. دەمەك، قۇدايدىڭ حالقى دانيال كىتابىنداعى پايعامبارلىقتاردى تەرەڭىرەك تۇسىنبەك ەدى. بىراق پەرىشتە اقىرعى ۋاقىتتا «زۇلىمدار زۇلىمدىعىن جاسايتىنىن، ولاردىڭ ەشقايسىسى بۇل سوزدەردى ۇقپايتىنىن» دا ايتتى.
18. جۋىردا زۇلىمدارمەن نە بولادى؟
18 كەيدە بىزگە زۇلىمدار ەش جازالانباي، دۇنيەنى جالپاعىنان باسىپ جۇرگەندەي كورىنەتىن شىعار (مالح. 3:14، 15). بىراق جۋىردا يسا سەركەلەردى قويلاردان اجىراتىپ، ۇكىمىن جۇزەگە اسىراتىن بولادى (مات. 25:31—33). زۇلىمدار زور الاپاتتان امان وتپەيدى دە، جاڭا دۇنيەدە تىرىلمەيدى دە. ولاردىڭ ەسىمدەرى مالاحي 3:16 دا ايتىلعان «ەستەلىك كىتابىنا» جازىلمايدى.
19. ٵرقايسىسىمىزعا قازىر نە ىستەۋ كەرەك جانە نەلىكتەن؟ (مالاحي 3:16—18)
19 قازىر ٵرقايسىسىمىز ٷشىن زۇلىمداردىڭ قاتارىنا جاتپايتىنىمىزدى دالەلدەيتىن كەز (مالاحي 3:16—18 وقىڭىز). ەحوبا «ەرەكشە مەنشىگىم» دەپ باعالايتىن ادامداردى جيناپ جاتىر. ٴبىز سولاردىڭ اراسىندا بولعىمىز كەلەدى.
دانيال مەن سۇيىكتى جاندارىمىزدىڭ جانە باسقا دا كوپتەگەن ادامداردىڭ جۇماقتا قايتا «تۇراتىندارىن» كورۋ نەتكەن عانيبەت بولماق! (20-ابزاستى قاراڭىز)
20. دانيالعا قانداي ۋادە بەرىلدى جانە ٴسىز سول ۋادەنىڭ ورىندالۋىن نەگە كۇتىپ ٴجۇرسىز؟
20 بۇگىندە ٴبىز قايتالانباس ۋاقىتتا ٶمىر ٴسۇرىپ جاتقانىمىز راس. دەگەنمەن الدا ٴبىزدى ودان دا ەرەكشە وقيعالار كۇتىپ تۇر. جۋىردا زۇلىمدار تۇگەلىمەن جويىلادى. سودان كەيىن ٴبىز ەحوبانىڭ دانيالعا «كۇندەردىڭ سوڭىندا ۇلەسىڭدى الۋ ٷشىن تۇراسىڭ» دەگەن ۋادەسىنىڭ ورىندالۋىنا كۋا بولامىز (دان. 12:13). ٴسىز دانيال پايعامبار مەن سۇيىكتى جاندارىڭىز «تۇراتىن» ۋاقىتتى كۇتىپ ٴجۇرسىز بە؟ ەندەشە، بارىڭىزدى سالىپ ەحوباعا ادالدىق ساقتاڭىز، سوندا ٶمىر كىتابىنان ەسىمىڭىز وشپەيدى.
80-ٵن «ٴدامىن تاتىڭدار دا، ەحوبانىڭ ىزگىلىگىنە كوز جەتكىزىڭدەر»
a بۇل ماقالادا دانيال 12:2، 3 تە ايتىلعان وتە اۋقىمدى ٴبىلىم بەرۋ باعدارلاماسىنا قاتىستى جاڭا تۇسىنىكتى قاراستىرامىز. بۇل باعدارلاما قاشان بولاتىنىن جانە وعان كىمدەر قاتىساتىنىن دا كورەمىز. سونداي-اق وسى اعارتۋ ٸسى جەر بەتىندەگى ادامداردى مىڭجىلدىق بيلىكتىڭ سوڭىندا بولاتىن ەڭ سوڭعى سىناققا قالاي دايىندايتىنىن دا بىلەمىز.
b قايتا ٴتىرىلۋ سوڭعى كۇندەرى قايتىس بولعان ادال ادامداردان باستاپ كەيىنگە قاراي، ياعني ٴبىر ۇرپاقتان الدىڭعى ۇرپاققا قاراي ٴجۇرۋى مۇمكىن. ەگەر سولاي بولسا، ٵر ۇرپاقتىڭ ادامدارى وزىنەن الدىڭعى ۇرپاقتىڭ ادامدارىن تانىپ، ولاردى قارسى الا الادى. مىسالى، جازبالاردا كوكتەگى قايتا ٴتىرىلۋدىڭ «ٶز كەزەگىمەن» بولاتىنى ايتىلعان. سوندىقتان جەردەگى قايتا ٴتىرىلۋ دە تارتىپپەن وتەدى دەي الامىز (قور. 1-ح. 14:33؛ 15:23).
c بۇل «دانيالدىڭ پايعامبارلىعىنا كوڭىل قويىڭدار!» كىتابىنىڭ 17-تاراۋى مەن 1987-جىلى 1-جەلتوقساندا شىققان «كۇزەت مۇناراسىنىڭ» 17—21-بەتتەرىندە ايتىلعان تۇسىنىككە قاتىستى وزگەرىس (حانزۇشا).
d ال ەلشىلەردىڭ ىستەرى 24:15 تەگى «ادىلدەر» مەن «ادىلەتسىزدەر» دەگەن جانە جوحان 5:29 داعى «جاقسىلىق جاساعاندار» مەن «زۇلىمدىق جاساعاندار» دەگەن سوزدەر قايتا تىرىلگەن ادامداردىڭ قايتىس بولعانعا دەيىنگى ٸس-ارەكەتتەرىنە نۇسقايدى.
