41-زەرتتەۋ ماقالاسى
پەتىردىڭ حاتتارىنداعى قۇندى ساباقتار
«بۇلاردى ۇدايى ەستەرىڭە سالىپ وتىرماقپىن» (پەت. 2-ح. 1:12).
127-ٵن قانداي ادام بولۋىم كەرەك؟
اڭداتپا a
1. پەتىردىڭ ٶمىرى سوڭىنا تاياپ قالعاندا، ەحوبا وعان قانداي تاپسىرما بەردى؟
پەتىر كوپ جىل بويى ەحوباعا ادال قىزمەت ەتتى. ول يسامەن بىرگە ٴجۇرىپ ۋاعىزدادى، باسقا ۇلتتارعا ۋاعىزداۋ ىسىنە باستاما بەردى، كەيىنىرەك باسقارۋشى كەڭەستىڭ مۇشەسى بولدى. ال ٶمىرىنىڭ سوڭىنا قاراي ەحوبا وعان تاعى ٴبىر تاپسىرما بەردى. ب.ز. 62—64-جىلدارى ول رۋحتىڭ جەتەلەۋىمەن «پەتىردىڭ 1-حاتى جانە 2-حاتى» دەپ اتالاتىن كىتاپتاردى جازدى. پەتىر ٶزى دۇنيەدەن ٶتىپ كەتكەن سوڭ دا، باۋىرلاستار ونىڭ حاتتارىنىڭ پايداسىن كورە بەرگەنىن قالادى (پەت. 2-ح. 1:12—15).
2. پەتىردىڭ حاتتارى نەگە ٴدال كەرەك كەزدە جازىلدى؟
2 پەتىر وسى حاتتارىن جازىپ جاتقان كەزدە باۋىرلاستاردىڭ باسىنان «ٵرتۇرلى سىناقتار» ٶتىپ جاتتى (پەت. 1-ح. 1:6). زۇلىم پيعىلدى ادامدار قاۋىمعا جالعان ىلىمدەرىن ناسيحاتتاپ، باۋىرلاستاردى ارام ىستەرگە ەلىكتىرىپ ٴجۇردى (پەت. 2-ح. 2:1، 2، 14). وعان قوسا، يەرۋساليمدەگى ماسىحشىلەر ٷشىن «بارلىق نارسەنىڭ سوڭى تاياپ قالعان» ەدى، ياعني الدا ريم اسكەرى كەلىپ، يەرۋساليم مەن عيباداتحانانى جويماق ەدى (پەت. 1-ح. 4:7). پەتىردىڭ حاتتارىنىڭ ارقاسىندا باۋىرلاستار كورىپ جۇرگەن قيىندىقتارىنا توتەپ بەرىپ، الدا بولاتىندارىنا دايىن بولا الاتىن b.
3. پەتىردىڭ حاتتارىن قاراستىرعانىمىز نەگە ماڭىزدى؟
3 پەتىر ەكى حاتىن I عاسىرداعى ماسىحشىلەرگە ارناپ جازسا دا، ەحوبا ولاردى ٶزىنىڭ سوزىنە قوسىپ قويدى. دەمەك، ونداعى ويلاردىڭ ٴبىز ٷشىن دە ماڭىزى زور (ريم. 15:4). ٴى عاسىرداعىداي، ٴبىز دە ازعىندىق اشىق ناسيحاتتالاتىن زاماندا ٶمىر ٴسۇرىپ جاتىرمىز. سوندىقتان بىزگە دە ەحوباعا ادال قىزمەت ەتۋ وڭاي ەمەس. ٴى عاسىرداعى ماسىحشىلەر يەرۋساليمنىڭ كۇيرەۋىنىڭ الدىندا تۇرسا، ٴبىز بۇكىل دۇنيە جويىلاتىن الاپاتتىڭ الدىندا تۇرمىز. ەندەشە ونىڭ حاتتارىندا ٴبىز ٷشىن دە وتە ماڭىزدى ەسكەرتۋلەر بار. ونداعى ويلار بىزگە ەحوبانىڭ كۇنىن شىداممەن كۇتۋگە، پەندەدەن قورىقپاۋعا جانە ٴبىر-ٴبىرىمىزدى بارىنشا سۇيۋگە تالپىندىرادى. اقساقالدار دا جاقسى باعۋشى بولۋعا كومەكتەسەتىن ويلار تابا الادى.
شىداممەن كۇتە بەرىڭىز
4. پەتىردىڭ 2-حاتى 3:3، 4 تە ايتىلعانداي، سەنىمىمىز نەدەن شايقالۋى مۇمكىن؟
4 اينالامىزداعى ادامداردىڭ كوبىسى كيەلى كىتاپتىڭ پايعامبارلىقتارىنا سەنبەيدى. شىندىققا قارسى كەيبىر ادامدار «زاماننىڭ اقىرى كەلەدى دەپ جۇرگەندەرىڭە قانشا جىل بولدى، كەلەتىن ٴتۇرى جوق قوي» دەپ كەلەكە-مازاق قىلىپ جاتادى. وسى دۇنيەنىڭ سوڭى ەشقاشان كەلمەيدى دەيتىندەر دە بار (پەتىردىڭ 2-حاتى 3:3، 4 وقىڭىز). قىزمەتتە يا جۇمىستا، ٴتىپتى ٶز ۇيىمىزدە وسىنداي سوزدەردى ەستي بەرسەك، ٴبىزدىڭ دە سەنىمىمىز شايقالىپ قالۋى مۇمكىن. قۋانىشقا وراي، پەتىر بىزگە نە كومەكتەسەتىنىن ايتىپ كەتكەن.
5. وسى دۇنيەنىڭ سوڭىن دۇرىس كوزقاراسپەن كۇتۋگە نە كومەكتەسەدى؟ (پەتىردىڭ 2-حاتى 3:8، 9)
5 بالكىم، كەيبىرەۋلەر: «ەحوبا قۇداي قاشان ارەكەت ەتەدى؟ مىنا زۇلىم دۇنيەنى جويۋعا اسىقپايدى عوي!»— دەيتىن شىعار. بىراق پەتىر ٴبىزدى دۇرىس كوزقاراس ساقتاۋعا شاقىرادى. ول ەحوبانىڭ ۋاقىتقا دەگەن كوزقاراسى بىزدىكىنەن مۇلدەم وزگەشە ەكەنىن ايتقان (پەتىردىڭ 2-حاتى 3:8، 9 وقىڭىز). ول ٷشىن مىڭ جىل ٴبىر كۇندەي. سونداي-اق ەحوبا — شىدامدى قۇداي، ول ەشكىمنىڭ دە جويىلعانىن قالامايدى. بىراق ونىڭ بەلگىلەگەن كۇنى مەن ساعاتى كەلگەندە، وسى دۇنيە مىندەتتى تۇردە جويىلادى. ال ٴبىز قالعان ۋاقىتتى ٴتيىمدى پايدالانىپ، بارلىق ۇلت ادامدارىنا ىزگى حاباردى جەتكىزە بەرەيىك.
6. ەحوبانىڭ كۇنىن ەستە «مىقتاپ ۇستاۋ» ٷشىن نە ىستەسەك بولادى؟ (پەتىردىڭ 2-حاتى 3:11، 12)
6 پەتىر ٴبىزدى ەحوبانىڭ كۇنىن ەستە «مىقتاپ ۇستاۋعا» شاقىرعان (پەتىردىڭ 2-حاتى 3:11، 12 وقىڭىز). بۇل ٷشىن، مۇمكىن بولسا، كۇن سايىن بولاشاقتاعى باتالار جايلى ويلانۋىمىز كەرەك. جۇماقتىڭ كوكىرەك كەرىپ تىنىستايتىن ٴمولدىر تازا اۋاسىن، ٴنارلى تاعامدى ٴسۇيسىنىپ جەپ جاتقانىڭىزدى، قايتا تىرىلگەن جاقىندارىڭىزبەن قاۋىشىپ جاتقانىڭىزدى جانە ەجەلدە ٶمىر سۇرگەن ادامدارعا پايعامبارلىقتاردىڭ قالاي ورىندالعانىن ٴتۇسىندىرىپ وتىرعانىڭىزدى كوز الدىڭىزعا ەلەستەتىڭىز. وسى جايىندا ۇنەمى ويلانىپ جۇرسەك، جاڭا دۇنيەنى شىداممەن كۇتە بەرەمىز. قاي ۋاقىتتا ٶمىر ٴسۇرىپ جاتقانىمىزعا دا مۇقيات بولامىز. بولاشاعىمىزدىڭ قانداي بولاتىنىن «الدىن الا بىلگەندىكتەن»، ٴبىز «جاڭساق ويلاردى» ۇگىتتەۋشىلەرگە الدانىپ قالمايمىز (پەت. 2-ح. 3:17).
پەندەدەن قورىقپاۋدى ۇيرەنە الاسىز
7. ادامنان قورىقساق، بۇل بىزگە قالاي اسەر ەتۋى مۇمكىن؟
7 ەحوبانىڭ كۇنىن ەستە مىقتاپ ۇستايتىندىقتان، ٴبىز وزگەلەرگە ىزگى حاباردى ايتقىمىز كەلەدى. بىراق كەيدە اداممەن سويلەسۋگە باتىلىمىز جەتپەي جاتادى. ويتكەنى «ادام مەن تۋرالى نە ويلاپ قالادى» نەمەسە «ماعان جامان بىردەڭە ىستەسە شە» دەپ قورقاتىن شىعارمىز. پەتىر دە كەزىندە ۇرەيگە بوي الدىرىپ قويعان. يسا سوتتالىپ جاتقان ٴتۇنى ول ونىڭ شاكىرتى ەكەنىن، ٴتىپتى تانيتىنىن دا مويىنداماي قويدى (مات. 26:69—75). بىراق پەتىر تۇبىندە ادامداردان قورىقپاۋدى ۇيرەنىپ، ٴتىپتى سەنىممەن بىلاي دەدى: «ولار قورقاتىن نارسەدەن قورىقپاڭدار دا، ابىرجىماڭدار دا» (پەت. 1-ح. 3:14). پەتىردىڭ سوزدەرى بويىمىزعا سەنىمدىلىك ۇيالاتادى. دەمەك، ٴبىز دە قورقىنىشىمىزدى جەڭە الامىز.
8. ادامنان قورىقپاۋدى قالاي ۇيرەنە الامىز؟ (پەتىردىڭ 1-حاتى 3:15)
8 ادامداردان قورقىپ قالماۋعا نە كومەكتەسەدى؟ پەتىردىڭ: «جۇرەكتەرىڭدە ٴماسىحتى يەمىز دەپ قاستەرلەڭدەر»،— دەگەن سوزدەرى (پەتىردىڭ 1-حاتى 3:15 وقىڭىز). بۇلاي ەتۋ ٷشىن يەمىز ٵرى پاتشامىز يسانىڭ دارەجەسى مەن بيلىگى قانداي زور ەكەنىن ويلاۋىمىز كەرەك. مۇمكىندىك تۋىپ تۇرعان ساتتە ىزگى حاباردى ايتۋعا جۇرەكسىنىپ يا قوبالجىپ تۇرساڭىز، پاتشاڭىزدى ەسىڭىزگە الىڭىز. ونىڭ كوكتە بيلىك ەتىپ وتىرعانىن، قاسىندا سان جەتپەس پەرىشتەلەردىڭ تۇرعانىن كوز الدىڭىزعا كەلتىرىڭىز. وعان «كوك پەن جەردەگى بارلىق بيلىك بەرىلگەنىن»، ول «وسى زامان اياقتالعانشا، ٵر كۇنى سىزبەن بىرگە» بولاتىنىن ۇمىتپاڭىز (مات. 28:18—20). پەتىر بىزگە سەنىمىمىزدى قورعاۋعا «ٵردايىم دايىن» جۇرۋگە كەڭەس بەرگەن. مىسالى، ٴسىز جۇمىستا، مەكتەپتە يا باسقا جەردە كۋالىك بەرگىڭىز كەلەر مە ەدى؟ وندا قاي كەزدە ۋاعىزدايتىنىڭىزدى جانە نە ايتاتىنىڭىزدى الدىن الا ويلاستىرىپ الىڭىز. ەحوباعا سەنىم ارتىپ، ودان باتىلدىق سۇراڭىز، ول سىزگە قورقىنىشتى جەڭۋگە كومەكتەسەدى (ەل. ٸس. 4:29).
«ٴبىر-ٴبىرىڭدى بارىنشا سۇيىڭدەر»
پەتىر پاۋىلدى تىڭداپ، تۇزەلدى. ٶزىنىڭ ەكى حاتىندا دا ول باۋىرلاستاردى ٴسۇيۋدى ۇيرەتىپ كەتتى (9-ابزاستى قاراڭىز)
9. ٴبىر جاعدايدا قالاي پەتىر سۇيىسپەنشىلىك تانىتپادى؟ (سۋرەتتى دە قاراڭىز.)
9 بىردەن بولماسا دا، پەتىر باۋىرلاستارىن ٴسۇيۋدى ۇيرەندى. ول يسانىڭ: «سەندەرگە جاڭا وسيەت بەرىپ وتىرمىن: ٴبىر-ٴبىرىڭدى سۇيىڭدەر. مەن سەندەردى قالاي سۇيسەم، سەندەر دە ٴبىر-ٴبىرىڭدى سولاي سۇيىڭدەر»،— دەگەنىن ٶز قۇلاعىمەن ەستىگەن بولاتىن (جوح. 13:34). بىراق كەيىن ول ياھۋدي ماسىحشىلەردەن سەسكەنىپ، باسقا ۇلتتىق باۋىرلاستارىمەن بىرگە تاماق ىشپەي قويدى. پاۋىل ونىڭ مۇنىسى ەكىجۇزدىلىك بولعانىن ايتتى (عال. 2:11—14). سوندا پەتىر ونىڭ تۇزەتكەنىنە دەن قويىپ، ساباق الدى. جازعان ەكى حاتىندا دا ول باۋىرلاستاردى سۇيەمىن دەپ قانا قويماي، سونى ىسپەن دالەلدەۋدىڭ ماڭىزدىلىعىن ايتىپ كەتتى.
10. باۋىرلاستارعا «شىنايى سۇيىسپەنشىلىك» تانىتۋ ٷشىن نە ىستەۋ كەرەك؟ ٴتۇسىندىرىڭىز. (پەتىردىڭ 1-حاتى 1:22)
10 پەتىر باۋىرلاستارىمىزعا «شىنايى سۇيىسپەنشىلىك» تانىتۋ كەرەكتىگىن ايتقان (پەتىردىڭ 1-حاتى 1:22 وقىڭىز). ال مۇنداي سۇيىسپەنشىلىك تانىتۋ ٷشىن ٴبىز «شىندىققا مويىنسۇنۋىمىز» قاجەت. شىندىققا جاتاتىن ىلىمدەردىڭ ٴبىرى — «قۇدايدىڭ ەشكىمدى الالامايتىندىعى» (ەل. ٸس. 10:34، 35). ەگەر ٴبىز قاۋىمداعى باۋىرلاستاردى تاڭداپ جاقسى كورەتىن بولساق، يسانىڭ «ٴبىر-ٴبىرىڭدى سۇيىڭدەر» دەگەن وسيەتىن ورىنداپ ٴجۇرمىز دەپ ايتا المايمىز. ارينە، جانىمىزعا ەرەكشە جاقىن تارتاتىن باۋىرلاستار دا بولادى، يسادا دا سولاي بولعان (جوح. 13:23؛ 20:2). بىراق پەتىر قاۋىمداعىلاردىڭ بارىنە دە باۋىرلاستىق سۇيىسپەنشىلىك تانىتۋعا كۇش سالۋىمىز كەرەكتىگىن ەسكەرتكەن. سوندا اركىم ٶزىن ٴبىر وتباسىنىڭ مۇشەسىندەي سەزىنەدى (پەت. 1-ح. 2:17).
11. «بارىنشا جاقسى كورۋ» دەگەن نەنى بىلدىرەدى؟
11 پەتىر: «ٴبىر-ٴبىرىڭدى بارىنشا جاقسى كورىڭدەر»،— دەپ كەڭەس بەرگەن. «بارىنشا» دەگەن ٴسوز جۇرەگىمىزدى مەيلىنشە كەڭەيتىپ، جاقسى كورۋ قيىن بولىپ تۇرعان ادامدى دا سول جۇرەگىمىزگە سيعىزۋدى بىلدىرەدى. مىسالى، ٴبىر باۋىرلاس كوڭىلىمىزگە ٴتيىپ كەتتى دەلىك. سول كەزدە بىردەن «ٵ دەسە، ٴما دەپ»، ٶش العىمىز كەلەر. بىراق كەك الۋ قۇدايعا ۇنامايتىنىن پەتىر كوكەيىنە ٴتۇيىپ الدى (جوح. 18:10، 11). سوندىقتان ول: «جاماندىققا جاماندىقپەن قايتارماڭدار، ٴتىل تيگىزگەندەردى عايباتتاماڭدار، قايتا، اق باتامەن جاۋاپ بەرىڭدەر»،— دەپ جازعان (پەت. 1-ح. 3:9). ەندەشە، ٴتىپتى ٴبىر باۋىرلاس وكپەلەتسە دە، ونى بارىنشا جاقسى كورىپ، مەيىرىمدىلىك تانىتىپ، تۇسىنىكپەن قاراي بىلەيىك.
12. ا) باۋىرلاسىمىزدى بارىنشا سۇيسەك، تاعى نە ىستەيمىز؟ ٵ) «اسا باعالى بىرلىگىمىزدى ساقتايىق» بەينەروليگىنەن وزىڭىزگە قانداي ساباق الدىڭىز؟
12 ٴبىرىنشى حاتىندا پەتىر باۋىرلاستاردى بارىنشا سۇيسەك، ٴبىر-ەكەۋىن عانا ەمەس، «كوپتەگەن كۇنانى» جابا الاتىنىمىزدى ايتقان (پەت. 1-ح. 4:8). بالكىم، وسى كەزدە پەتىر بىرنەشە جىل بۇرىن يسانىڭ بەرگەن كەشىرىمدىلىك ساباعى ەسىنە تۇسكەن بولار. سول كەزدە ول «باۋىرلاسىمدى جەتى رەت كەشىرسەم، مەنەن اسقان مەيىرىمدى ادام جوق» دەپ ويلاعان شىعار. بىراق يسا «جەتى ەمەس، جەتپىس جەتى رەتكە دەيىن»، ياعني شەكسىز كەشىرە بەرۋ كەرەكتىگىن ۇيرەتتى (مات. 18:21، 22). ەگەر قايتا-قايتا كەشىرە بەرۋ سىزگە قيىن بولسا، ەش مويىماڭىز! ەحوبانىڭ كەمەلسىز قىزمەتشىلەرىنىڭ بارلىعىنا دا بۇل قيىن بوپ جاتادى. ەڭ باستىسى، جۇرەگىڭىزدەگى رەنىشتەن ارىلىپ، باۋىرلاسىڭىزبەن تاتۋلاسۋعا قولىڭىزدان كەلگەنشە ارەكەت قىلا بەرىڭىز c.
اقساقالدار، وتاردى قامقورلاڭىزدار
13. قاۋىمدى باعۋ نەگە وڭاي ەمەس؟
13 پەتىر يسانىڭ «قوزىلارىمدى باق» دەگەن سوزدەرىن ەشقاشان ۇمىتپاعان شىعار (جوح. 21:16). اقساقال بولساڭىز، بۇل سوزدەردىڭ سىزگە دە قاتىستى ەكەنىن جاقسى تۇسىنەسىز. بىراق ۋاقىتتىڭ تاپشىلىعىنان بۇل ماڭىزدى ٸستى اتقارۋ كەيدە وڭاي ەمەس. ويتكەنى اقساقالداردىڭ ٸسى باستان اسادى: ەڭ الدىمەن، ولار وتباسىلارىن اسىراپ، ولارعا كوڭىل ٴبولىپ، رۋحاني قامدارىن جاساۋ كەرەك؛ ولار بەلسەنە ۋاعىزدايدى، سونداي-اق قاۋىم مەن كونگرەستەردە تاپسىرمالاردى دايىنداپ، ورىنداپ شىعۋعا كوپ كۇش سالادى؛ كەيبىر اقساقالدار اۋرۋحانالارمەن بايلانىس كوميتەتتەرىندە جانە جەرگىلىكتى جوبالاۋ جانە قۇرىلىس بولىمىندە قىزمەت ەتەدى.
تىرلىگى كوپ بولسا دا، قامقور اقساقالدار قۇدايدىڭ وتارىن جان-تانىمەن باعادى (14، 15-ابزاستاردى قاراڭىز)
14. اقساقالدارعا وتاردى باعۋعا نە كومەكتەسەدى؟ (پەتىردىڭ 1-حاتى 5:1—4)
14 پەتىر وزگە اقساقالداردى دا قۇدايدىڭ وتارىن باعۋعا شاقىرعان (پەتىردىڭ 1-حاتى 5:1—4 وقىڭىز). قىمباتتى اقساقال، ٴسىز دە باۋىرلاستاردى جاقسى كورەسىز، ولاردى قامقورلاعىڭىز كەلەدى. بىراق كەيدە مۇرنىڭىزدان شانشىلىپ، ابدەن قاجىعاندىقتان، مىندەتىڭىزدى ويداعىداي اتقارماي جۇرگەندەي سەزىنەرسىز. مۇندايدا نە ىستەسەڭىز بولادى؟ نە ۋايىمداپ، نە سەزىنىپ جۇرگەنىڭىزدىڭ ٴبارىن ەحوباعا ايتىڭىز. پەتىر: «كىم قىزمەت ەتسە، قۇدايدىڭ كۇشىنە سۇيەنىپ قىزمەت ەتسىن»،— دەپ جازعان (پەت. 1-ح. 4:11). باۋىرلاستارىمىزدىڭ كەزىگىپ جۇرگەن قيىندىقتارى بۇل دۇنيەدە شەشىلمەۋى مۇمكىن. بىراق ۇمىتپاڭىز، «باس باعۋشى» — يسا ٴماسىح، ول باۋىرلاستارىڭىز ٷشىن ٴسىزدىڭ قولىڭىزدان كەلمەيتىن نارسەنى ىستەي الادى. كەيبىر نارسەلەردى ول قازىر-اق ىستەپ جاتىر، ال كەيبىرىن بولاشاقتا قولعا الادى. قۇدايدىڭ سىزدەن بار كۇتەتىنى — باۋىرلاستارىڭىزدى جاقسى كورىپ، ولاردى قامقورلاعانىڭىز ٵرى ولارعا «ۇلگى-ونەگە بولعانىڭىز».
15. ٴبىر اقساقال وتاردى قالاي قامقورلاپ ٴجۇر؟ (سۋرەتتى دە قاراڭىز.)
15 كوپ جىلدان بەرى اقساقال بولىپ جۇرگەن ۋيليام باعۋ ٸسىنىڭ ماڭىزدىلىعىنا توقتالىپ كەتتى. 19-COVID پاندەمياسى باستالعاندا، ول وزگە اقساقالدارمەن كەلىسىپ، توپتارىنداعى ٵربىر جاريالاۋشىمەن اپتا سايىن حابارلاسىپ تۇرۋدى شەشەدى. بۇنىڭ سەبەبىن ول بىلاي دەپ ٴتۇسىندىردى: «كوپ باۋىرلاستار ۇيلەرىندە وقشاۋلانىپ قالعاندىقتان، جامان ويلارعا تەز-اق بەرىلىپ كەتۋى مۇمكىن ەدى». ۋيليام باۋىرلاستاردىڭ قانداي قيىندىعى بار ەكەنىن جانە نە نارسەگە مۇقتاج ەكەنىن انىقتاۋ ٷشىن ولاردى مۇقيات تىڭدايدى ەكەن. كەيىن سايتىمىزدان سول باۋىرلاستارعا كومەك بولادى-اۋ دەگەن ادەبيەتتەر مەن ۆيدەولاردى ىزدەيدى. ۋيليام تاعى بىلاي دەپ قوستى: «قازىر باعۋ ىسىنە ەرەكشە ٴمان بەرەتىن كەز. ٴبىز ادامداردى ەحوبامەن تانىستىرىپ، شىندىققا اكەلۋگە كوپ كۇش سالامىز. باۋىرلاستارىمىزعا شىندىقتا قالۋعا كومەكتەسۋ ٷشىن دە سونشالىقتى كوپ كۇش سالۋىمىز كەرەك».
ەحوبا ٴتالىمىڭىزدى اقىرىنا دەيىن جەتكىزسىن
16. پەتىردىڭ حاتتارىنان بىلگەنىمىزدى قالاي ىسكە اسىرا الامىز؟
16 بۇل ماقالادا ٴبىز پەتىردىڭ جازعان حاتتارىنداعى ساباق بولار بىرنەشە ويعا عانا توقتالدىق. تالقىلاۋ بارىسىندا قانداي دا ٴبىر تۇستارىڭىزدى جاقسارتۋدى ويلاعان شىعارسىز. مىسالى، جاڭا دۇنيەدەگى باتالار جايلى كوبىرەك وي جۇگىرتكىڭىز كەلەر. جۇمىستا، مەكتەپتە نە باسقا جاعدايدا قورىقپاي كۋالىك بەرۋگە ماقسات قويارسىز. باۋىرلاستارىمدى بارىنشا جاقسى كورەتىنىمدى قالاي كورسەتە الامىن دەپ ويلاعان بولارسىز. ال اقساقال بولساڭىز، ەحوبانىڭ وتارىن بار ىنتاڭىزبەن باعىپ-قامقورلاۋعا بەكىنگەن شىعارسىز. ٶزىڭىزدى شىنشىلدىقپەن تەكسەرە كەلە، كەمشىلىكتەرىڭىزدى بايقاساڭىز، كوڭىلىڭىز تۇسپەسىن. ىزگى يەمىز يسانىڭ كومەگىمەن ٴسىز جاقسارا الاسىز (پەت. 1-ح. 2:3). پەتىردىڭ مىنا سوزدەرى سىزگە جىگەر بولسىن: «قۇدايدىڭ ٶزى تالىمدەرىڭدى اقىرىنا دەيىن جەتكىزىپ، سەندەردى نىعايتىپ، كۇشەيتەدى، نەگىزدەرىڭدى بەرىك ەتەدى» (پەت. 1-ح. 5:10).
17. ەش بەرىسپەي، ەحوبانىڭ ۇيرەتكەندەرىن قابىلداي بەرسەك، نە نارسەگە قول جەتكىزەمىز؟
17 ٴبىر كەزدەرى پەتىر ٶزىن قۇداي ۇلىنىڭ قاسىندا تۇرۋعا لايىقسىز سەزىنگەن ەدى (لۇقا 5:8). بىراق ەحوبانىڭ جانە يسانىڭ قولداۋىمەن ەش بەرىلمەي، ٴماسىحتىڭ سوڭىنان ەرە بەردى. سونىڭ ارقاسىندا ول «يەمىز ٵرى قۇتقارۋشىمىز يسا ٴماسىحتىڭ ماڭگىلىك پاتشالىعىنا» كىردى (پەت. 2-ح. 1:11). پەتىر ٷشىن بۇدان اسقان سي جوق شىعار! ٴسىز دە پەتىر سياقتى العان باعىتىڭىزدان تايماي، ەحوبانىڭ ۇيرەتكەنىن قابىلداي بەرسەڭىز، ماڭگىلىك ٶمىر سيىن الاسىز. «سەنىمىڭىز ٷشىن سي رەتىندە جانىڭىز قۇتقارىلاتىن» بولادى (پەت. 1-ح. 1:9).
109-ٵن «ٴبىر-ٴبىرىڭدى بارىنشا جاقسى كورىڭدەر»
a بۇل ماقالادا پەتىردىڭ حاتتارىنداعى ويلار بىزگە قيىندىققا توزۋگە قالاي كومەكتەسەتىنىن تالقىلايمىز. سونداي-اق اقساقالدارعا وتاردى باعۋعا قاتىستى پايدالى كەڭەستەر دە ايتىلادى.
b پالەستيناداعى ماسىحشىلەر پەتىردىڭ ەكى حاتىن دا يەرۋساليمگە ب.ز. 66-جىلى جاسالعان العاشقى شابۋىلدان بۇرىن العان كورىنەدى.
c jw.org تور بەكەتىنەن «اسا باعالى بىرلىگىمىزدى ساقتايىق» بەينەروليگىن كورىپ شىعىڭىز.
