37-زەرتتەۋ ماقالاسى
118-ٵن «سەنىمىمىزدى نىعايتا كور»
سوڭىنا دەيىن تاباندى بولۋعا كومەكتەسەتىن حات
«العاشقى سەنىمدىلىگىمىزدى سوڭىنا دەيىن بەرىك ۇستانايىق» (ەۆر. 3:14).
نەگىزگى وي
ەۆرەيلەرگە ارنالعان حاتتاعى كەڭەستەر بىزگە وسى دۇنيەنىڭ سوڭىنا دەيىن تاباندىلىق تانىتىپ، ادال بولىپ قالۋعا كومەكتەسەدى.
1، 2. ا) ەلشى پاۋىل ەۆرەيلەرگە ارنالعان حاتىن جازعاندا ياھۋدەيادا جاعداي قانداي ەدى؟ ٵ) پاۋىلدىڭ حاتى نەگە ۋاقىتىلى بولدى؟
يەرۋساليم مەن ياھۋدەياداعى ەۆرەي ماسىحشىلەر يسانىڭ ولىمىنەن كەيىن قيىن كۇندەردى باستان كەشتى. ماسىحشىلەر قاۋىمى قۇرىلعانى سول-اق ەدى، ولار قاتتى قۋعىن-سۇرگىنگە ۇشىرادى (ەل. ٸس. 8:1). ال كەيىن شامامەن 20-جىلدان سوڭ، ٴماسىحتىڭ ٸزباسارلارى، اشتىق جايلاعاننان بولسا كەرەك، ەكونوميكالىق قيىندىقتاردان كادىمگىدەي جاپا شەكتى (ەل. ٸس. 11:27—30). دەسە دە الداعى ۋاقىتپەن سالىستىرعاندا، ب. ز. 61-جىلدارى ماسىحشىلەر ٷشىن ٴبىرشاما تىنىش ۋاقىت ەدى. سول ۋاقىتتا ولار ەلشى پاۋىلدان حات الدى. بۇل حاتتىڭ قانشالىقتى ۋاقىتىلى بولعانىن ماسىحشىلەر كەيىنىرەك ٴتۇسىندى.
2 ەۆرەيلەرگە جازىلعان حات نەگە ۋاقىتىلى بولدى؟ ويتكەنى تىنىش ۋاقىت ۇزاققا سوزىلمايتىن ەدى. يسا الدىن الا ايتقانداي، يەرۋساليمنىڭ كۇيرەيتىن ۋاقىتى تاياپ كەلە جاتتى. پاۋىل ٶز حاتىندا ماسىحشىلەرگە سول اپات كەزىندە تاباندى بولىپ قالۋعا كومەكتەسەتىن كەڭەستەر جازدى (لۇقا 21:20). ارينە، پاۋىل دا، ياھۋدەياداعى ماسىحشىلەر دە بۇل ناقتى قاشان بولاتىنىن بىلگەن جوق. دەسە دە سول ۋاقىت كەلگەنشە، ماسىحشىلەردىڭ دايىندالىپ، سەنىم، تاباندىلىق سياقتى قاسيەتتەرىن شىڭداپ الۋعا مۇمكىندىكتەرى بار ەدى (ەۆر. 10:25؛ 12:1، 2).
3. ەۆرەيلەرگە ارنالعان حات نەگە بۇگىندەگى ماسىحشىلەر ٷشىن دە پايدالى؟
3 ٴبىزدى ەۆرەي ماسىحشىلەردىڭ باسىنا تۇسكەن الاپاتتان دا زور الاپات كۇتىپ تۇر (مات. 24:21؛ ايان 16:14، 16). سوندىقتان ەحوبانىڭ پاۋىل ارقىلى سول ماسىحشىلەرگە بەرگەن كەڭەستەرى بىزگە دە پايدالى. قازىر سول كەڭەستەردىڭ كەيبىرىنە توقتالىپ وتەيىك.
«رۋحاني تولىسا بەرەيىك»
4. ياھۋدي ماسىحشىلەر قانداي قيىندىقتارعا تاپ بولدى؟ (سۋرەتتى دە قاراڭىز.)
4 ياھۋدي حالقىنان شىققان ماسىحشىلەرگە كوپ وزگەرىستەر جاساۋ كەرەك بولدى جانە بۇل ولارعا وڭايعا سوققان جوق. نەگىزى، ياھۋديلەر ەحوبانىڭ تاڭداپ العان حالقى بولعان. ەحوبانىڭ وكىلى بولعان پاتشالار يەرۋساليمنەن بيلىك جۇرگىزگەن. ال عيباداتحانا تازا عيباداتتىڭ ورتالىعى بولعان. بارلىق ادال ياھۋديلەر مۇسا زاڭىن ۇستانعان، سول زاڭداردى حالىققا ٴدىني جەتەكشىلەر ٴتۇسىندىرىپ بەرگەن. ولاردىڭ سۇندەتتەلۋگە قاتىستى، نە جەپ، نە جەمەۋگە، ٴتىپتى باسقا ۇلت ادامدارىمەن قالاي ارالاسۋعا قاتىستى زاڭدارى بولعان. ٴبىراق يسانىڭ ولىمىنەن كەيىن، مۇسا زاڭى كۇشىن جويىپ، ەحوبا عيباداتحانادا شالىنعان قۇرباندىقتاردى قابىلدامايتىن بولدى. مۇسا زاڭىن ۇستانىپ ۇيرەنىپ قالعان ياھۋدي ماسىحشىلەرگە بۇل وزگەرىستەردىڭ ٴبارىن قابىلداۋ وڭاي بولعان جوق (ەۆر. 10:1، 4، 10). ٴتىپتى تولىسقان ٴماسىحشى پەتىردىڭ وزىنە وسى وزگەرىستەرگە بەيىمدەلۋ كەيدە قيىنعا سوققان (ەل. ٸس. 10:9—14؛ عال. 2:11—14). ياھۋدي ماسىحشىلەر جاڭا ىلىمدەردى قابىلداعاندارى ٷشىن ٴدىني جەتەكشىلەردىڭ نىساناسىنا اينالدى.
ماسىحشىلەردىڭ جالعان ىلىمدەردەن باس تارتىپ، شىندىقتى بەرىك ۇستانعاندارى ماڭىزدى ەدى (4، 5-ابزاستاردى قاراڭىز)
5. ادال ماسىحشىلەر قانداي قىسىم كوردى؟
5 ەۆرەي ماسىحشىلەر ەكى تاراپتان قىسىم كوردى. بىرىنشىدەن، ياھۋدي ٴدىني جەتەكشىلەرى ولاردى جولدان تايعاندار دەپ قاراستىرىپ، قۋعىن-سۇرگىن كورسەتتى. ەكىنشىدەن، وزدەرىن ٴماسىحشىمىز دەي تۇرا، قۋدالانباۋ ٷشىن بولسا كەرەك، مۇسا زاڭىن ٵرى قاراي دا بەرىك ۇستانىپ جۇرگەندەردەن قىسىم كوردى (عال. 6:12). وسىعان قاراماستان، ادال ماسىحشىلەرگە شىندىقتى بەرىك ۇستانۋعا نە كومەكتەستى؟
6. پاۋىل ٴبىر سەنىمدەگى باۋىرلاستارىن نە ىستەۋگە تالپىندىردى؟ (ەۆرەيلەرگە 5:14—6:1)
6 ەۆرەيلەرگە ارنالعان حاتىندا پاۋىل ٴبىر سەنىمدەگى باۋىرلاستارىن قۇداي ٴسوزىن تەرەڭ زەرتتەۋگە تالپىندىردى (ەۆرەيلەرگە 5:14—6:1 وقىڭىز). پاۋىل ەۆرەي جازبالارىن قولدانىپ، باۋىرلاستارىنا ماسىحشىلىك جول ياھۋدي دىنىنەن اناعۇرلىم ۇستەم ەكەنىن ٴتۇسىندىردى a. پاۋىل باۋىرلاستاردىڭ شىندىق جايلى بىلىمدەرى مولايىپ، تۇسىنىكتەرى تەرەڭدەسە، ولار جالعان ىلىمدەردى اجىراتا ٴبىلىپ، ولاردان باس تارتا الاتىندارىن، وسىلايشا شىندىقتى بەرىك ۇستاناتىندارىن بىلگەن.
7. بۇگىندە ٴبىز قانداي جاعدايعا كەزىگۋدەمىز؟
7 ٴبىرىنشى عاسىرداعىداي قازىر دە ەحوبانىڭ ٵدىل تالاپتارىنا قايشى كەلەتىن وي-پىكىرلەر وتە كوپ. قارسىلاستارىمىز ٴبىزدىڭ كيەلى كىتاپقا نەگىزدەلگەن مورالدىق ۇستانىمدارىمىزدى سىنعا الىپ، «سەندەر قاتىگەزسىڭدەر، كوزقاراستارىڭ تار» دەپ ايىپتايدى. وسى دۇنيەنىڭ كوزقاراسى قۇدايدىڭ كەمەلدى كوزقاراسىنان بارعان سايىن الىستاپ بارادى (ناق. س. 17:15). سول سەبەپتى ٴبىز سەنىمىمىزدى السىرەتەتىن، ٴتىپتى ەحوبانى تاستاپ كەتۋگە يتەرمەلەيتىن وسى دۇنيەدەگى بۇرىس وي-پىكىرلەردى كورە ٴبىلىپ، ولاردان باس تارتۋدى ۇيرەنۋىمىز كەرەك (ەۆر. 13:9).
8. رۋحاني تولىسا بەرۋ ٷشىن نە ىستەۋىمىز كەرەك؟
8 پاۋىل ەۆرەي ماسىحشىلەردى رۋحاني تولىسا بەرۋگە شاقىرعان. ٴبىزدىڭ دە وسى كەڭەسكە قۇلاق اسقانىمىز ٴجون. ال رۋحاني تولىسۋعا شىندىق جايلى ٴبىلىمىمىزدى تەرەڭدەتۋ جانە ەحوبانىڭ كوزقاراسىن تانىتىپ ۇيرەنۋ جاتادى. بۇل پروسەسس باعىشتالىپ، شومىلدىرۋ راسىمىنەن وتكەننەن كەيىن دە جالعاسا بەرەدى. شىندىقتا جۇرگەنىمىزگە قانشا ۋاقىت بولماسىن، ٴبارىمىز دە قۇداي ٴسوزىن وقىپ، زەرتتەي بەرۋىمىز كەرەك (ٴزاب. 1:2). ەگەر جەكە زەرتتەۋگە داعدىلانساق، پاۋىل ەۆرەيلەرگە ارنالعان حاتىندا ەرەكشە ەكپىن تۇسىرگەن قاسيەتتى دامىتامىز. بۇل — سەنىم (ەۆر. 11:1، 6).
«جانىمىزدى امان ساقتاۋ ٷشىن سەنىمگە يە بولايىق»
9. ەۆرەي ماسىحشىلەرگە نەلىكتەن مىقتى سەنىم قاجەت ەدى؟
9 بۇكىل ياھۋدەيانىڭ باسىنا تۇسەتىن اپاتتان امان قالۋ ٷشىن ەۆرەي ماسىحشىلەرگە مىقتى سەنىم قاجەت ەدى (ەۆر. 10:37—39). يسا الدىن الا ەسكەرتكەندەي، يەرۋساليمدى اسكەرلەر قورشاپ العانىن كورگەندە ٸزباسارلارى تاۋلارعا قاشۋ كەرەك ەدى. يسانىڭ بۇل ەسكەرتۋى بارلىق ماسىحشىلەرگە، قالاداعىلارعا دا، قالانىڭ ماڭىنداعىلارعا دا قاتىستى بولدى (لۇقا 21:20—24). ادەتتە جاۋ شاپقاندا ادامدار قابىرعالارمەن قورشالعان قالادان قورعانىش ىزدەپ، سوندا تىعىلاتىن. ال ەندى «تاۋلارعا قاش» دەگەن نۇسقاۋ ولارعا قيسىنسىز بولىپ كورىنگەن بولۋى مۇمكىن. وسى سەبەپتەن دە ماسىحشىلەرگە زور سەنىم قاجەت ەدى.
10. مىقتى سەنىم ماسىحشىلەرگە قاي جاعىنان كومەكتەسپەك ەدى؟ (ەۆرەيلەرگە 13:17)
10 سونداي-اق ەۆرەي ماسىحشىلەرگە يسا قاۋىمدا جەتەكشىلىك ەتۋدى تاپسىرعان ادامدارعا سەنىم ارتۋ قاجەت ەدى. باسشىلىقتى قولعا العان باۋىرلاستار ولارعا تاۋعا قاشان جانە قالاي قاشۋعا قاتىستى ناقتى نۇسقاۋلار بەرگەن بولۋى مۇمكىن (ەۆرەيلەرگە 13:17 وقىڭىز). ەۆرەيلەرگە 13:17 دەگى «مويىنسۇنىڭدار» دەپ اۋدارىلعان گرەك ٴسوزى ادامنىڭ بيلىگى بولعانى ٷشىن عانا ايتقانىن ىستەۋدى بىلدىرمەيدى. بۇل ٴسوز ادامعا سەنىم ارتقاندىقتان نۇسقاۋىنا قۇلاق اسۋدى بىلدىرەدى. دەمەك، ەۆرەي ماسىحشىلەرگە الداعى اپات كەلمەي تۇرىپ جەتەكشىلىكتى قولعا العاندارعا سەنىم ارتىپ ۇيرەنۋ كەرەك ەدى. ەگەر ماسىحشىلەر ولارعا تىنىش ۋاقىتتا مويىنسۇنىپ جۇرسە، قيىن-قىستاۋ كۇندەرى دە ولارعا وڭاي مويىنسۇنباق ەدى.
11. بۇگىندەگى ماسىحشىلەرگە نەگە مىقتى سەنىم قاجەت؟
11 پاۋىلدىڭ حاتىن العان ماسىحشىلەر سياقتى، بىزگە دە زور سەنىم قاجەت. نەگە؟ كيەلى كىتاپتاعى وسى دۇنيەنىڭ اقىرى كەلەتىنى جايلى حابارعا بۇگىندە كوبىسى سەنبەيدى، ٴتىپتى كۇلكى ەتەدى (پەت. 2-ح. 3:3، 4). سونداي-اق كيەلى كىتاپتا زور الاپاتقا قاتىستى ٴبىراز جايتتار ايتىلعانمەن، بىزگە كوپ نارسە ٵلى بەيمالىم. سوندىقتان دا وسى دۇنيەنىڭ سوڭى ٴدال ۋاقىتىندا كەلەتىنىنە جانە ەحوبا سول ۋاقىتتا ٴبىزدى قالدىرمايتىنىنا دەگەن سەنىمىمىز مىقتى بولۋ كەرەك (ابق. 2:3).
12. زور الاپاتتان امان ٶتۋىمىز نە نارسەگە بايلانىستى بولادى؟
12 ٴبىز ەحوبانىڭ بۇگىندە قولدانىپ وتىرعان ارناسى «ادال دا اقىلدى قۇلعا» سەنىم ارتۋدى ۇيرەنۋىمىز كەرەك (مات. 24:45). كەزىندە ەۆرەي ماسىحشىلەر ريمدىكتەر كەلگەندە ناقتى نۇسقاۋلار العان بولۋى مۇمكىن دەگەنىمىزدەي، بىزگە دە زور الاپات باستالعان كەزدە ٶمىرىمىزدى قۇتقاراتىن ناقتى نۇسقاۋلار بەرىلۋى مۇمكىن. سوندىقتان ەحوبانىڭ ۇيىمىنا جەتەكشىلىك ەتىپ جاتقان باۋىرلاستاردىڭ نۇسقاۋلارىنا قازىردەن سەنىم ارتۋدى ۇيرەنۋىمىز قاجەت. ەگەر ولاردىڭ بەرىپ جاتقان نۇسقاۋلارىنا مويىنسۇنۋعا قازىر قينالاتىن بولساق، زور الاپات باستالعاندا ولارعا وپ-وڭاي مويىنسۇنامىز دەپ ويلامايىق.
13. ەۆرەيلەرگە 13:5 تەگى كەڭەس نەلىكتەن ورىندى بولدى؟
13 تاۋعا قاشاتىن ۋاقىت كەلگەنشە، ەۆرەي ماسىحشىلەردىڭ «اقشاقۇمار بولماي»، قاراپايىم ٶمىر سۇرە بەرگەندەرى ماڭىزدى ەدى (ەۆرەيلەرگە 13:5 وقىڭىز). ولاردىڭ كوبىسى اشتىق پەن كەدەيشىلىك جايلاعان ۋاقىتتى باستان وتكىزگەن (ەۆر. 10:32—34). كەزىندە ولار سەنىمدەرى ٷشىن ٴبىراز قيىندىقتارعا تاباندىلىقپەن توتەپ بەرگەن. دەسە دە كەيبىرەۋلەرى بايلىق ادامدى كەدەيشىلىكتەن، قاۋىپ-قاتەردەن قورعايدى دەپ ويلاي باستاعان بولۋى مۇمكىن. ٴبىراق الدا بولاتىن اپاتتان ەشقانداي اقشا دا، دۇنيە-مۇلىك تە قۇتقارا الماس ەدى. كەرىسىنشە، دۇنيە-مۇلىك كەدەرگى بولۋى مۇمكىن ەدى (جاق. 5:3). ويتكەنى بايلىقتى سۇيەتىن ادام «ٷيىم، دۇنيە-مۇلكىم» دەپ، قاشپاي قالىپ قويۋى مۇمكىن ەدى.
14. مىقتى سەنىمىمىز بولسا، اقشا مەن دۇنيە-مۇلىككە قالاي قارايمىز؟
14 وسى دۇنيەنىڭ سوڭى تاياپ قالعانىنا بەرىك سەنسەك، اقشا مەن دۇنيە-مۇلىك قۋۋدان اۋلاق بولامىز. زور الاپاتتا اقشانىڭ مۇلدەم قۇنى بولمايدى. ادامدار «كۇمىستەرىن كوشەگە لاقتىرىپ تاستايدى»، ويتكەنى «ەحوبانىڭ قاھارى لاۋلاعان كۇنى ولاردى التىندارى دا، كۇمىستەرى دە قۇتقارمايتىنىن» تۇسىنەدى (ەزەك. 7:19). ەندەشە، بار ويىمىز مەيلىنشە كوپ اقشا جيناۋ بولماسىن، قايتا، قاراپايىم، دەسە دە تارازى باسىن تەڭ ۇستاپ ٶمىر سۇرەيىك. قاراپايىم ٶمىر سۇرۋگە قاجەتسىز قارىزعا كىرۋگە ازعىرىلعاندا بەرىلىپ قالماۋ، سونداي-اق دۇنيە-مۇلكىمىزدى كۇتىپ ۇستاۋعا تىم كوپ ۋاقىت پەن كۇش جۇمساماۋ دا جاتادى. ٴبىز قولىمىزدا بار دۇنيە-مۇلكىمىز بەن زاتتارىمىزعا بايلانىپ قالۋدان دا ساق بولۋىمىز كەرەك (مات. 6:19، 24). وسى دۇنيەنىڭ اقىرى تاياپ قالعان ۋاقىتتا نە ەحوبانى، نە دۇنيە-مۇلكىمىزدى تاڭداۋعا تۋرا كەلىپ، سەنىمىمىز سىنعا الىنۋى مۇمكىن.
«تاباندى بولۋلارىڭ قاجەت»
15. ەۆرەي ماسىحشىلەرگە نەگە تاباندىلىق قاجەت ەدى؟
15 ياھۋدەياداعى جاعداي ۋشىعىپ، سەنىمدەرى سىنالعان كەزدە، ەۆرەي ماسىحشىلەرگە تاباندى بولۋ قاجەت بولدى (ەۆر. 10:36). ولاردىڭ كوبىسى ٴبىرشاما تىنىش ۋاقىتتا ماسىحشىلىكتى قابىلداعاندىقتان ٵلى قاتتى قۋعىن-سۇرگىن كورمەگەن ەدى. ارينە، ولار سەنىمدەرى ٷشىن ٴبىرشاما سىنالعان، دەسە دە پاۋىل ولاردىڭ ٵلى يسا سياقتى ولىمگە دەيىن سىنالماعاندارىن ايتتى (ەۆر. 12:4). ٴبىراق سول ۋاقىتتارى ماسىحشىلىك كەڭ تارالىپ جاتقانى ٷشىن كوپتەگەن ياھۋديلەر ودان سايىن اشۋعا بۋلىعىپ، ماسىحشىلەردى جەك كورە ٴتۇستى. مىسالى، پاۋىل وسى حاتىن جازاردان ٴبىر-ەكى جىل بۇرىن يەرۋساليمدە ۇلكەن تولقۋ بولدى. ونىڭ قالادا ۋاعىزداپ جۇرگەنىن جاقتىرماي، 40 تان استام ياھۋدي كىسى وعان قارسى ٴسوز بايلاسىپ، «پاۋىلدى ولتىرگەنشە ٴنار تاتساق، ٴبىزدى قارعىس اتسىن دەپ انت بەرىستى» (ەل. ٸس. 22:22؛ 23:12—14). وسىنداي جەككورۋشىلىك پەن ٴدىني فاناتيزمگە قاراماستان، ماسىحشىلەرگە ٵرى قاراي دا بىرگە باس قوسىپ عيبادات ەتە بەرۋ، ىزگى حاباردى ۋاعىزداۋ جانە سەنىمدەرىن نىعايتا بەرۋ قاجەت ەدى.
16. ەۆرەيلەرگە ارنالعان حات بىزگە قۋعىن-سۇرگىنگە دۇرىس قاراۋعا قالاي كومەكتەسەدى؟ (ەۆرەيلەرگە 12:7)
16 سىناقتاردا تاباندى بولۋ ٷشىن ەۆرەي ماسىحشىلەر نە ىستەۋ كەرەك ەدى؟ پاۋىل ولاردىڭ سىناقتارعا قاتىستى دۇرىس كوزقاراس تانىتقاندارىن قالادى. سوندىقتان ول سەنىمنىڭ سىنالۋى جونگە سالىنۋدىڭ ٴبىر جولى ەكەنىن ٴتۇسىندىردى (ەۆرەيلەرگە 12:7 وقىڭىز). سىنالعان، ياعني جونگە سالىنعان ادام ماسىحشىلەر ٷشىن اسا قاجەت قاسيەتتەردى شىڭدايدى. ەگەر ەۆرەي ماسىحشىلەر سىناقتاردىڭ ناتيجەسىن كوبىرەك ويدا تۇتسا، ولارعا تاباندى بولۋ جەڭىلىرەك بولماق ەدى (ەۆر. 12:11).
17. پاۋىل سىناقتاردا نەنىڭ ارقاسىندا تاباندى بولىپ قالعان؟
17 پاۋىل ەۆرەي ماسىحشىلەردى سىناقتاردا ەش بەرىلمەي تاباندى بولۋعا شاقىرعان. كىم-كىم، پاۋىلدىڭ اۋزىنان بۇل كەڭەس سالماقتى ەستىلدى. بىرىنشىدەن، پاۋىلدىڭ ٶزى كەزىندە ماسىحشىلەردى قۋدالاعان، سوندىقتان قۋدالاۋدىڭ قانشالىقتى اياۋسىز بولاتىنىن جاقسى بىلگەن. ەكىنشىدەن، ونىڭ ٶزى دە قۋعىنعا ۇشىراعان. ٴماسىحشى بولعاننان كەيىن ول سىناقتىڭ ٴتۇر-ٴتۇرىن كورگەن (قور. 2-ح. 11:23—25). سوندىقتان پاۋىل سىناقتاردا تاباندى بولۋ ٷشىن نە كەرەك ەكەنىن اۋىز تولتىرىپ ايتا العان. ول ماسىحشىلەرگە سىناققا ۇشىراعاندا وزدەرىنە ەمەس، ەحوباعا ارقا سۇيەۋدىڭ ماڭىزدىلىعىن ايتقان. پاۋىل: «ەحوبا — مەنىڭ كومەكشىم. مەن ەشتەڭەدەن قورىقپايمىن»،— دەپ باتىل ايتا العان (ەۆر. 13:6).
18. بولاشاقتا ٴبارىمىز نە نارسەگە كەزىگەمىز جانە سوعان دايىن بولۋ ٷشىن نە ىستەۋىمىز كەرەك؟
18 ٴدال قازىرگى ۋاقىتتا كەيبىر باۋىرلاستارىمىز تاباندىلىق تانىتىپ، قۋعىن-سۇرگىنگە ٴتوزىپ ٴجۇر. ولار ٷشىن دۇعا ەتىپ، قولدان كەلسە، ٸس جۇزىندە كومەكتەسىپ، ولاردى ادالدىقپەن قولداي بەرەيىك (ەۆر. 10:33). ٴبىراق كيەلى كىتاپتا ايتىلعانداي، «ٴماسىح يسانىڭ شاكىرتى رەتىندە قۇدايعا شىن بەرىلىپ ٶمىر سۇرگىسى كەلەتىندەردىڭ ٴبارى دە قۋعىندالادى» (ٴتىم. 2-ح. 3:12). سوندىقتان بارلىعىمىز دا الدا بولاتىن قيىن-قىستاۋ كۇندەرگە دايىن بولۋىمىز كەرەك. ەندەشە، ٵرى قاراي دا ەحوباعا تولىقتاي ارقا سۇيەپ، قانداي سىناققا كەزىكسەك تە، ونىڭ بىزگە تاباندى بولۋعا كومەكتەسەتىنىنە سەنىمدى بولايىق. بەلگىلەنگەن ۋاقىت كەلگەندە، ەحوبا بارلىق ادال قىزمەتشىلەرىن قيىندىقتاردان ازات ەتىپ، قۇتقارادى (سال. 2-ح. 1:7، 8).
19. زور الاپاتقا دايىن بولۋ ٷشىن نە ىستەۋىمىز كەرەك؟ (سۋرەتتى دە قاراڭىز.)
19 پاۋىلدىڭ ەۆرەيلەرگە ارنالعان حاتى ٴبىرىنشى عاسىرداعى ماسىحشىلەردى الدا بولاتىن اپاتقا دايىنداعانى ٴسوزسىز. پاۋىل باۋىرلاستارىن جازبالاردى تەرەڭ تۇسىنۋگە، بىلىمدەرىن مولايتۋعا شاقىرعان. بۇل ولارعا سەنىمدەرىن شايقالتاتىن ىلىمدەردى كورە ٴبىلىپ، ولاردان باس تارتۋعا كومەكتەسپەك ەدى. يسانىڭ جانە قاۋىمدا باسشىلىقتى قولعا العان باۋىرلاستارىڭ نۇسقاۋلارىنا بىردەن قۇلاق اسۋ ٷشىن، پاۋىل ماسىحشىلەردى مىقتى سەنىم دامىتۋعا تالپىندىرعان. ول باۋىرلاستارعا تاباندى بولۋ ٷشىن سىناقتارعا دۇرىس قاراپ، ولاردى جونگە سالىنۋدىڭ مۇمكىندىگى دەپ قاراستىرۋدىڭ ماڭىزدىلىعىن ٴتۇسىندىردى. كيەلى رۋحتىڭ جەتەلەۋىمەن جازىلعان وسى كەڭەستەرگە ٴبىز دە قۇلاق اسايىق. سوندا وسى دۇنيەنىڭ اقىرى كەلگەنگە دەيىن ادالدىقتان تايماي، تاباندى بولىپ قالامىز (ەۆر. 3:14).
ادال ماسىحشىلەر تاباندىلىقتارى ٷشىن جارىلقاندى. ولار ياھۋدەيادان قاشقان سوڭ دا بىرگە جينالۋدى جالعاستىرا بەردى. بۇدان قانداي ساباق الامىز؟ (19-ابزاستى قاراڭىز)
126-ٵن ساق ٴجۇرىپ، اياعىڭدى نىق باس
a پاۋىل ماسىحشىلىك جولدىڭ ياھۋدي دىنىنەن اناعۇرلىم ۇستەم ەكەنىن ٴتۇسىندىرۋ ٷشىن، ٴبىرىنشى تاراۋدىڭ وزىندە شامامەن جەتى رەت ەۆرەي جازبالارىنان ٷزىندى كەلتىرگەن (ەۆر. 1:5—13).
