وقىرمان ساۋالدارى
يسا ۋاعىزداۋعا جىبەرگەن 70 شاكىرت نەگە يەمىزدىڭ كەشكى اسى ەنگىزىلىپ جاتقاندا ەلشىلەردىڭ اراسىندا بولماعان؟ ولار يسانى تاستاپ كەتكەن بە؟
يسا يەمىزدىڭ كەشكى اسىن ەنگىزگەن كەزدە قاسىندا 70 شاكىرتىنىڭ بولماعانىنا قاراپ، ولار يسانىڭ ىقىلاسىنان ايىرىلىپ قالدى نە ونى تاستاپ كەتتى دەپ ويلاماۋىمىز كەرەك. يسا جاي عانا وسى كەشتى ٶزىنىڭ ەلشىلەرىمەن وتكىزگىسى كەلگەن.
12 ەلشى دە، 70 شاكىرت تە يسانىڭ ٸزباسارلارى بولعان. الدىمەن، يسا شاكىرتتەرىنىڭ ىشىنەن ون ەكىسىن تاڭداپ، ولاردى «ەلشىلەر» دەپ اتاعان (لۇقا 6:12—16). يسا عاليلەيادا بولعاندا «12 ەلشىسىن شاقىرىپ الىپ،.. ولاردى قۇداي پاتشالىعى تۋرالى ۋاعىزداۋعا، اۋرۋلاردى ساۋىقتىرۋعا جىبەردى» (لۇقا 9:1—6). ال كەيىنىرەك ياھۋدەيادا جۇرگەندە، يسا «70 شاكىرتىن تاڭداپ الىپ، ولاردى... ەكى-ەكىدەن جىبەردى» (لۇقا 9:51؛ 10:1). دەمەك، ٵرتۇرلى جەرلەردە يسانىڭ ىزگى حاباردى ۋاعىزدايتىن شاكىرتتەرى بولعان.
يسانىڭ شاكىرتتەرى بولعان ياھۋديلەر، ٶز وتباسىلارىمەن بىرگە بولسا كەرەك، ٵلى دە جىل سايىن قۇتقارىلۋ مەيرامىن تويلايتىن (مۇس. 2-ج. 12:6—11، 17—20). ولەتىن ۋاقىتى تاياعاندا، يسا وسى مەيرامدى اتاپ ٶتۋ ٷشىن ەلشىلەرىمەن بىرگە يەرۋساليمگە كەلدى. ٴبىراق ول ياھۋدەياداعى، عاليلەياداعى، پەرەياداعى بارلىق شاكىرتتەرىن شاقىرىپ جاتپادى. يسا بۇل ەرەكشە كەشتى تەك ەلشىلەرىمەن عانا وتكىزگىسى كەلگەن بولسا كەرەك. ول ەلشىلەرىنە بىلاي دەگەن: «ازاپ شەگەرىمنىڭ الدىندا وسى قۇتقارىلۋ مەيرامىنىڭ اسىن سەندەرمەن جەۋدى قاتتى قالاعان ەدىم» (لۇقا 22:15).
يسانىڭ بۇل قالاۋى وتە ورىندى ەدى. ويتكەنى ول «دۇنيەنى كۇنادان ارىلتاتىن قۇدايدىڭ توقتىسى» رەتىندە جانىن قۇربان ەتكەلى جاتىر ەدى (جوح. 1:29). قۇدايعا ارنالعان قۇرباندىقتاردىڭ ٴبارى يەرۋساليمدە شالىنعاندىقتان، ول دا وسى قالادا ولمەك-ٴتىن. يسرايلدىكتەر مىسىردان ازات بولعان ٴتۇنى جەگەن توقتىمەن سالىستىرعاندا، يسانىڭ ٶلىمى اناعۇرلىم ۇلى بوستاندىققا جەتكىزبەك ەدى (قور. 1-ح. 5:7، 8). يسانىڭ ولىمىنەن كەيىن 12 ەلشى ماسىحشىلەر قاۋىمىنىڭ ىرگەتاسى بولماق ەدى (ەفەس. 2:20—22). كوڭىل بۇراتىن جايت، كيەلى قالا يەرۋساليمنىڭ «12 ىرگەتاسى بار، ٵرى ولارعا توقتىنىڭ 12 ەلشىسىنىڭ 12 ەسىمى جازىلعان» (ايان 21:10—14). بۇدان كورەتىنىمىزدەي، بۇل ادال ەلشىلەر قۇداي نيەتىنىڭ ورىندالۋىندا ماڭىزدى ٴرول اتقارماق ەدى. سوندىقتان يسانىڭ ەڭ سوڭعى قۇتقارىلۋ مەيرامىن، كەيىن ارتىنشا اتاپ وتكەن يەمىزدىڭ كەشكى اسىن نەگە 12 ەلشىسىمەن اتاپ وتكىسى كەلگەنى تۇسىنىكتى-اق.
بۇل ماڭىزدى كەشتە 70 شاكىرت تە، يسانىڭ باسقا شاكىرتتەرى دە بولعان جوق. ٴبىراق ادال بولىپ قالسا، يسا ەنگىزگەن يەمىزدىڭ كەشكى اسىنىڭ يگىلىگىن ولار دا كورمەك ەدى. الداعى ۋاقىتتا دا مايلانعان ماسىحشىلەردىڭ ٴبارى يسا سول ٴتۇنى ەلشىلەرمەن جاساسقان كەلىسىمگە قوسىلماق ەدى (لۇقا 22:29، 30).
