21-زەرتتەۋ ماقالاسى
ايان كىتابى بولاشاعىمىزعا قاتىستى نە اشادى؟
«اۋمين! يەمىز يسا، كەلە كور!» (ايان 22:20).
142-ٵن ٷمىتىمىز جالىنداي بەرسىن
اڭداتپا *
1. ادامدار قانداي ماڭىزدى شەشىم قابىلداۋ كەرەك؟
بۇگىندە ٵربىر ادام ەكى جولدىڭ بىرەۋىن تاڭداۋ كەرەك. باسقا ٷشىنشى جول جوق. دەمەك، ولار الەمنىڭ زاڭدى بيلەۋشىسى دەپ ەحوبا قۇدايدى مويىنداي ما، الدە ونىڭ قاس جاۋى شايتان ٸبىلىستىڭ جاعىنا شىعا ما — وسىنى شەشۋلەرى كەرەك. ولاردىڭ بولاشاقتارى وسى تاڭداۋلارىنا قاراي شەشىلەدى (مات. 25:31—33، 46). «زور الاپاتتا» ولارعا نە قۇتقارىلۋدىڭ، نە جويىلۋدىڭ تاڭباسى سالىنادى (ايان 7:14؛ 14:9—11؛ ەزەك. 9:4، 6).
2. ا) ەۆرەيلەرگە 10:35—39-تارماقتار ٴبىزدى نە ىستەۋگە تالپىندىرادى؟ ٵ) ايان كىتابى بىزگە قاي جاعىنان كومەكتەسەدى؟
2 ەۆرەيلەرگە 10:35—39 وقىڭىز. ٴسىز ەحوبانىڭ بيلىگىن قولداۋدى شەشكەن بولساڭىز، وتە دۇرىس ىستەدىڭىز. ەندى باسقا ادامدارعا دا دۇرىس شەشىم قابىلداۋعا كومەكتەسكىڭىز كەلەتىن شىعار. بۇل ٷشىن ايان كىتابىنداعى مالىمەتتى قولدانا الاسىز. بۇل كىتاپ ەحوباعا قارسى شىققانداردى نە كۇتىپ تۇرعانىن، ال ونىڭ بيلىگىن ادالدىقپەن قولدايتىندارعا قانداي باتالار توگىلەتىنىن اشادى. ٴبىز وسى شىندىقتاردى جاقسىلاپ زەرتتەگەنىمىز ٴجون. سوندا ەحوباعا ٵرى قاراي دا قىزمەت ەتە بەرۋگە مىقتاپ بەكىنەمىز. بۇعان قوسا، باسقا ادامدارعا دا دۇرىس شەشىم قابىلداپ، سودان تايماۋعا كومەكتەسە الامىز.
3. بۇل ماقالادا نە تۋرالى قاراستىرامىز؟
3 وسى ماقالادا مىنا سۇراقتارعا جاۋاپ الامىز: قۇدايدىڭ بيلىگىن قولدايتىنداردى نە كۇتىپ تۇر؟ ال ايان كىتابىندا ايتىلعان ال قىزىل جىرتقىش اڭدى قولدايتىندار شە، ولارمەن نە بولادى؟
ادالدىق ساقتاعانداردى نە كۇتىپ تۇر؟
4. ەلشى جوحان اياندا كوكتە يسانىڭ قاسىندا تۇرعان قانداي توپتى كوردى؟
4 ەلشى جوحان اياندا ەحوبانىڭ بيلىگىن قولدايتىن جانە ماڭگىلىك ومىرگە يە بولاتىن ەكى توپتى كوردى. ٴبىرىنشى توپتاعىلاردىڭ سانى — 144000 (ايان 7:4). ولار يسامەن بىرگە كوكتە ۇكىمەت قۇرۋ ٷشىن جەردەن تاڭداپ الىنعان. بۇل ۇكىمەت جەر بەتىنە بيلىك جۇرگىزەتىن بولادى (ايان 5:9، 10؛ 14:3، 4). جوحان اياندا ولاردىڭ يسامەن بىرگە كوكتەگى سيون تاۋىندا تۇرعانىن كورگەن (ايان 14:1).
5. 144000 نىڭ قالعاندارىمەن جاقىندا نە بولادى؟
5 144000 دى قۇرايتىن ادامدار ەلشىلەردىڭ زامانىنان باستاپ تاڭدالىپ كەلگەن (لۇقا 12:32؛ ريم. 8:17). ال سوڭعى كۇندەرى ەلشى جوحان جەر بەتىندە ولاردىڭ تەك ازعاناسى قالاتىنىن ايتىپ كەتكەن. وسى «قالعاندارى» زور الاپاتتىڭ الدىندا ەحوبانىڭ ىقىلاسىنا يە ەكەندەرىن بىلدىرەتىن سوڭعى «بەلگىلەرىن» الادى (ايان 7:2، 3؛ 12:17). زور الاپاتتان كەيىن كوپ ۇزاماي ولار 144000 نىڭ قاتارىن تولتىرۋ ٷشىن كوككە اپارىلادى. وسىلاي ولار يسامەن بىرگە قۇداي پاتشالىعىنىڭ بيلەۋشىلەرى بولادى (مات. 24:31؛ ايان 5:9، 10).
6، 7. ا) ەلشى جوحان تاعى قانداي توپتى كوردى جانە ولار جايىندا نە بىلەمىز؟ ٵ) نەگە ايان كىتابىنىڭ 7-تاراۋى مايلانعان تامتىق پەن «ۇلى جاماعاتتى» قىزىقتىرۋى كەرەك؟
6 كوكتەگى توپتان كەيىن جوحان «ۇلى جاماعاتتى» كوردى. 144000 مەن سالىستىرعاندا، بۇل توپتىڭ سانى «ادام بالاسى ساناي المايتىنداي» كوپ ەدى (ايان 7:9، 10). جوحان ولار جايىندا: «بۇلار زور الاپاتتان وتكەندەر. ولار شاپاندارىن توقتىنىڭ قانىنا جۋىپ اعارتتى»،— دەگەن (ايان 7:14). «ۇلى جاماعات» زور الاپاتتان امان وتكەننەن كەيىن جەر بەتىندە ٶمىر كەشىپ، مول باتاعا كەنەلەدى (ٴزاب. 37:9—11، 27—29؛ ناق. س. 2:21، 22؛ ايان 7:16، 17).
7 كوكتە نە جەردە ٶمىر سۇرۋگە ۇمىتتەنبەيىك، ٴبىز ٶزىمىزدى ايان 7-تاراۋداعى «سۋرەتتەن» كورەمىز بە؟ كورگەنىمىز ٴجون. بۇل قۇدايدىڭ قىزمەتشىلەرىنەن تۇراتىن ەكى توپ ٷشىن دە كەرەمەت ۋاقىت بولماق! سول كەزدە ەحوبانىڭ بيلىگىن قولداعانىمىزعا شەكسىز قۋاناتىن بولامىز. ايان كىتابىندا زور الاپات تۋرالى تاعى نە ايتىلادى؟ (مات. 24:21).
قۇدايعا قارسى شىعاتىنداردى نە كۇتىپ تۇر؟
8. زور الاپات قالاي باستالادى جانە كوپ ادام سول كەزدە نە ىستەيدى؟
8 الدىڭعى ماقالادا ايتىلعانداي، جۋىردا وسى دۇنيەنىڭ ساياسي جۇيەسى ۇلى بابىلعا — دۇنيەجۇزىلىك جالعان دىندەر يمپەرياسىنا تاپ بەرەدى (ايان 17:16، 17). وسىلاي زور الاپات باستالادى. سول كەزدە ادامدار ەحوباعا عيبادات ەتۋگە اعىلىپ كەلەتىن بولادى دەپ ايتا الامىز با؟ وكىنىشكە قاراي، جوق. قايتا، ولار ايان كىتابىنىڭ 6-تاراۋىندا ايتىلعانداي، سول ٴبىر قيىن شاقتا «تاۋلاردان»، ياعني وسى دۇنيەنىڭ ساياسي جانە ساۋدا-ساتتىق جۇيەلەرىنەن پانا ىزدەيتىن بولادى. ولار قۇداي پاتشالىعىن قولداماعاندىقتان، ەحوبا ولاردى جاۋ دەپ قابىلدايدى (لۇقا 11:23؛ ايان 6:15—17).
9. زور الاپاتتا ەحوبانىڭ حالقى قالايشا ەرەكشەلەنىپ تۇرادى جانە بۇنىڭ ناتيجەسىندە نە بولادى؟
9 زور الاپاتتىڭ سول ٴبىر قىسىلتاياڭ شاعىندا ەحوبانىڭ ادال قىزمەتشىلەرى جۇرتتان قاتتى ەرەكشەلەنەتىن بولادى. جەر بەتىندە ەحوباعا قىزمەت ەتەتىن جانە «جىرتقىش اڭدى» قولدامايتىن جالعىز توپ سولار بولادى (ايان 13:14—17). بۇل ەحوبانىڭ قارسىلاستارىنىڭ اشۋىنا ٴتيىپ، ناتيجەسىندە وداقتاسقان حالىقتار دۇنيەجۇزى بويىنشا ەحوبانىڭ حالقىنا شابۋىلدايتىن بولادى. ولاردىڭ قاباعان يتتەي جۇلقىنىپ شىعۋى كيەلى كىتاپتا «ماگوگ جەرىندەگى گوگتىڭ» شابۋىلى دەپ اتالعان (ەزەك. 38:14—16).
10. ايان 19:19—21-تاماقتارعا ساي، ماگوگ جەرىندەگى گوگ شابۋىلداعاندا، ەحوبا نە ىستەيدى؟
10 ماگوگ جەرىندەگى گوگ لاپ قويعاندا، ەحوبا قالاي ارەكەت ەتەدى؟ ول: «مەنىڭ قاھارىم وتتاي لاۋلايدى»،— دەيدى (ەزەك. 38:18، 21—23). ايان 19-تاراۋدا ايتىلعانداي، ەحوبا ٶزىنىڭ حالقىن قورعاپ، ال جاۋلارىن جايپاپ سالۋ ٷشىن ٶزىنىڭ ۇلىن جىبەرەدى. سول كەزدە يسا ادال پەرىشتەلەر مەن 144000 نان تۇراتىن «كوكتەگى اسكەرلەرىن» باستاپ، سوعىسقا اتتانادى (ايان 17:14؛ 19:11—15). بۇل سوعىستىڭ ناتيجەسى قانداي بولادى؟ ەحوباعا قارسى شىققان ادامدار مەن ۇيىمداردىڭ ٴبارى تۇپتامىرىمەن جويىلادى! (ايان 19:19—21 وقىڭىز).
سوعىستىڭ ارتى تويمەن بىتەدى
11. ايان كىتابىندا سيپاتتالعان ەڭ ماڭىزدى وقيعا قانداي؟
11 قۇدايدىڭ جاۋلارى جەر بەتىنەن تىپ-تيپىل جويىلعان سوڭ، ادال جاندار امان قالعاندارىنا شات-شادىمان بولادى! بۇكىل جەر بەتى قۋانا شاتتاناتىن بولادى! ۇلى بابىل جويىلعاندا، كوكتە دە وسىنداي زور قۋانىش بولادى. الايدا كوكتەگىلەردى بۇدان دا ۇلكەن قۋانىش كۇتىپ تۇر (ايان 19:1—3). بۇل — ايان كىتابىندا سيپاتتالعان ەڭ ماڭىزدى، ەڭ اسەرلى وقيعا، ياعني «توقتىنىڭ ۇيلەنۋ تويى»! (ايان 19:6—9).
12. ايان 21:1، 2 دە ايتىلعانداي، توقتىنىڭ تويى قاشان بولادى؟
12 توقتىنىڭ ۇيلەنۋ تويى قاشان بولادى؟ ارماگەددون سوعىسىنىڭ الدىندا 144000 مايلانعان كوككە تۇگەل جينالعاندا ما؟ جوق (ايان 21:1، 2 وقىڭىز). بۇل توي ارماگەددون سوعىسى اياقتالىپ، قۇدايدىڭ جاۋلارى تۇگەلىمەن جويىلعاننان كەيىن بولادى (ٴزاب. 45:3، 4، 13—17).
13. توقتىنىڭ ۇيلەنۋ تويى نەنى بىلدىرەدى؟
13 قىز بەن جىگىت قوسىلعاندا، جاڭا نەكە پايدا بولاتىنىنداي، پاتشا يسا ٴماسىح پەن «قالىڭدىعى» — 144000 بەينەلى ماعىنادا ۇيلەنگەندە، جاڭا ۇكىمەت پايدا بولادى. بۇل ۇكىمەت جەر بەتىنە 1000 جىل بيلىك ەتەدى (ايان 20:6).
سالتاناتتى قالا جانە ٴسىزدىڭ بولاشاعىڭىز
ايان 21-تاراۋدا «كوكتەن، ياعني قۇدايدان، ٴتۇسىپ كەلە جاتقان» جاڭا يەرۋساليم قالاسى سيپاتتالادى. مىڭجىلدىقتا ول مويىنسۇنعىش ادامزاتقا مول باتاسىن توگەدى (14—16-ابزاستاردى قاراڭىز).
14، 15. ايان 21 تاراۋدا 144000 پاتشا نەگە تەڭەلگەن؟ (مۇقاباداعى سۋرەتتى قاراڭىز.)
14 ايان 21-تاراۋدا 144000 پاتشا «جاڭا يەرۋساليم» دەپ اتالاتىن وتە ادەمى، سالتاناتتى قالاعا تەڭەلەدى (ايان 21:2، 9). بۇل قالانىڭ «12 ىرگەتاسى بار، ٵرى ولارعا توقتىنىڭ 12 ەلشىسىنىڭ ەسىمدەرى» جازىلعان. ەلشى جوحان وسى ىرگەتاستارعا ەرەكشە نازار اۋداردى، ويتكەنى ولاردىڭ بىرەۋىندە ونىڭ دا اتى جازىلىپ تۇردى. جوحان ٷشىن بۇل نەتكەن ۇلى مارتەبە ەدى! (ايان 21:10—14؛ ەفەس. 2:20).
15 بۇل قالا باسقا ەشقانداي قالاعا ۇقسامايتىن. ونىڭ باستى كوشەسى ساف التىننان سالىنىپ، قاقپالارى 12 مەرۋەرتتەن جاسالعان ەدى. قابىرعاسى مەن ىرگەتاسى اسىل تاستارمەن بەزەندىرىلىپتى. سونداي-اق قالانىڭ ۇزىندىعى، ەنى مەن بيىكتىگى بىردەي ەكەن (ايان 21:15—21). دەسە دە قالاعا ٴبىر نارسە جەتىسپەيتىندەي كورىندى. جوحان بىلاي دەيدى: «قالادان عيباداتحانانى كورمەدىم. سەبەبى ونىڭ عيباداتحاناسى — قۇدىرەتى شەكسىز ەحوبا قۇداي جانە توقتى. قالاعا جارىق ٴتۇسىرۋ ٷشىن كۇن مەن ايدىڭ دا قاجەتى جوق، ويتكەنى قۇدايدىڭ داڭقتى نۇرى ونى جارقىراتىپ تۇردى، ال توقتى — ونىڭ شىراعى» (ايان 21:22، 23). جاڭا يەرۋساليمدى قۇرايتىندار ەحوبانىڭ الدىنا تىكەلەي بارا الادى. سوندىقتان بۇدان بىلاي ولارعا عيباداتحانانىڭ قاجەتى جوق (ايان 22:3، 4). سونداي-اق ولاردى قۇدايعا قاسيەتتى قىزمەت اتقارۋدا باس ٴدىني قىزمەتكەرلەرى يسا جەتەلەپ جۇرەدى (ەۆر. 7:27). وسى ماعىنادا ەحوبا مەن يسا — سول قالاداعى عيباداتحانا.
«وزەن» مەن «اعاشتار» بەينەلەيتىن شارالاردىڭ يگىلىگىن كىمدەر كورەدى؟ (16، 17-ابزاستاردى قاراڭىز)
16. قۇداي پاتشالىعىنىڭ مىڭجىلدىق بيلىگى تۇسىندا ادامدارمەن نە بولادى؟
16 مايلانعاندار جاڭا يەرۋساليم جايلى ويلانعاندا، جۇرەكتەرى تەبىرەنەدى. ٴبىراق بۇل قالا جەردە ٶمىر سۇرۋگە ۇمىتتەنەتىندەردى دە قىزىقتىرادى. قۇداي پاتشالىعىنىڭ مىڭجىلدىق بيلىگى تۇسىندا جاڭا يەرۋساليم جەرگە سانسىز كوپ باتاسىن توگەدى. ەلشى جوحان بۇل باتالاردىڭ «ٶمىر سۋىنىڭ وزەنىندەي» اعىپ جاتقانىن كورگەن. بۇل وزەننىڭ ەكى جاعالاۋىندا دا «ٶمىر اعاشتارى» ٶسىپ تۇردى. «اعاشتاردىڭ جاپىراقتارى حالىقتاردى ساۋىقتىراتىن» (ايان 22:1، 2). سول ۋاقىت كەلگەندە، جەر بەتىندەگى ٵربىر ادام وسى شارالاردىڭ يگىلىگىن كورە الادى. مويىنسۇنعىش ادامداردىڭ بارلىعى بىرتە-بىرتە كەمەلدىلىككە جەتەدى. بۇدان بىلاي اۋرۋ، قايعىرۋ، جىلاپ-سىقتاۋ بولمايدى (ايان 21:3—5).
17. ايان 20:11—13-تارماقتاردان كورەتىنىمىزدەي، مىڭجىلدىق بيلىك كەزىندە توگىلەتىن باتالاردىڭ يگىلىگىن كىمدەر كورەدى؟
17 وسى كەرەمەت شارالاردىڭ يگىلىگىن ٴبىرىنشى بولىپ كىمدەر كورەدى؟ ارماگەددوننان وتكەن ۇلى جاماعات پەن جاڭا دۇنيەدە تۋىلاتىن بالالار. سونداي-اق ايان كىتابىنىڭ 20 تاراۋىندا مارقۇمداردىڭ تىرىلەتىنى ايتىلادى (ايان 20:11—13 وقىڭىز). بۇرىندا قايتىس بولىپ كەتكەن «ادىلدەر» مەن ەحوبا تۋرالى ٴبىلىم الۋعا مۇمكىندىگى بولماعان «ادىلەتسىزدەر» ومىرگە قايتا ورالادى (ەل. ٸس. 24:15؛ جوح. 5:28، 29). ال ٶز جولىنان قايتپاي، ەحوباعا قىزمەت ەتۋ مۇمكىندىگىنەن باس تارتىپ كەتكەندەر مىڭجىلدىق بيلىك كەزىندە تىرىلمەيدى. ويتكەنى ولار ٴتىرى كەزدەرىندە بەرىلگەن مۇمكىندىكتى قولدانباي، جۇماق ورناعان جەر بەتىندە ٶمىر سۇرۋگە لايىقسىز ەكەندەرىن كورسەتتى (مات. 25:46؛ سال. 2-ح. 1:9؛ ايان 17:8؛ 20:15).
سوڭعى سىناق
18. مىڭ جىلدىڭ اياعىندا جەر بەتىندەگى ٶمىر قانداي بولادى؟
18 مىڭ جىلدىڭ سوڭىندا جەر بەتىندە تۇرىپ جاتقان ادامداردىڭ ٴبارى كەمەلدى بولادى. ادام اتانىڭ كۇناسى بۇدان بىلاي ەشكىمنىڭ بويىنا وتپەيتىن بولادى (ريم. 5:12). ونىڭ كۇناسى الىپ كەلگەن قارعىس تولىعىمەن كۇشىن جويادى. وسى ماعىنادا 1000-جىلدىڭ اياعىندا جەر بەتىندەگىلەر كەمەلدى ادامدار رەتىندە «قايتا تىرىلەدى» (ايان 20:5).
19. سوڭعى سىناق نە ٷشىن كەرەك؟
19 شايتان كەمەلدى يسانى مىنسىزدىگىنەن تايدىرۋعا تىرىسقاندا، ول ەش بەرىلمەگەن. يسا بارلىق سىناقتان سۇرىنبەي ٶتتى. الايدا شايتان تۇڭعيىقتان بوساتىلعاندا، كەمەلدى ادامدار دا سولاي ٴمىنسىز بولىپ قالا ما ەكەن؟ بۇل سۇراققا 1000-جىلدىڭ سوڭىندا ٵربىر ادام ٶزى جاۋاپ بەرەدى (ايان 20:7). سوڭعى سىناقتان ادال وتكەندەر ناعىز ازاتتىققا قول جەتكىزىپ، ماڭگى ٶمىر سۇرەدى (ريم. 8:21). ال بۇلىكشىلەر شايتانمەن جانە ونىڭ جىن-پەرىلەرىمەن بىرگە ٴبىرجولا قۇرىپ جوق بولادى (ايان 20:8—10).
20. ايان كىتابىنداعى جانتەبىرەنتەرلىك پايعامبارلىقتاردى قاراستىرعاننان كەيىن قانداي سەزىمدەسىز؟
20 ايان كىتابىنا شولۋ جاساپ وتكەننەن كەيىن قانداي سەزىمدەسىز؟ بولاشاعىمىزعا قاتىستى كەرەمەت پايعامبارلىقتار ورىندالعاندا ٶمىر ٴسۇرىپ جاتقان كەزىڭىزدى ەلەستەتىپ، تولقىپ كەتكەن بولارسىز. سونداي-اق قۇلشىنىسىڭىز ارتىپ، باسقالاردى دا تازا عيبادات ەتۋگە شاقىرعىڭىز كەلىپ كەتكەن شىعار (ايان 22:17). بولاشاقتا بولاتىن وقيعالاردى اسىعا كۇتە ٴجۇرىپ، ٴبىز دە ەلشى جوحان سياقتى: «اۋمين! يەمىز يسا، كەلە كور!»— دەيمىز (ايان 22:20).
27-ٵن قۇداي بالالارىنىڭ پاش ەتىلۋى
^ بۇل — ايان كىتابىنا نەگىزدەلگەن توپتامانىڭ سوڭعى ماقالاسى. مۇندا ٴبىز ەحوباعا ادالدىق ساقتاپ قالعانداردىڭ بولاشاعى جارقىن بولاتىنىن، ال قۇدايدىڭ بيلىگىن مويىنداماعاندار ماسقارا بولىپ جويىلاتىنىن بىلەمىز.
