19-زەرتتەۋ ماقالاسى
ايان كىتابى بىزگە قاتىستى نە اشادى؟
«وسى پايعامبارلىقتاعى سوزدەردى داۋىستاپ وقيتىن ادام... باقىتتى» (ايان 1:3).
15-ٵن ەحوبانىڭ تۇڭعىشىن ماداقتاڭدار!
اڭداتپا *
1، 2. ايان كىتابى ٴبىزدى نە ٷشىن قىزىقتىرادى؟ ٴبىر سەبەبىن كەلتىرىڭىز.
بىرەۋدىڭ فوتوالبومىن قاراعان كەزىڭىز بولعان با؟ ونداعى ادامداردىڭ كوبىسىن تانىمايتىن شىعارسىز. ٴبىراق البومنىڭ كەلەسى بەتىن اۋدارىپ قالساڭىز، كوزىڭىزگە ٴبىر سۋرەت وتتاي باسىلادى. نەگە دەيسىز عوي؟ ويتكەنى ول سۋرەتتە ٴسىز بارسىز. بۇل سۋرەتتى قولىڭىزعا الىپ، «قاشان، قاي جەردە ٴتۇسىپ ەدىم» دەپ ويلانا باستايسىز. سۋرەتتە قاسىڭىزدا تۇرعان ادامداردى دا ەسىڭىزگە تۇسىرە باستايسىز. باسقا سۋرەتتەرگە قاراعاندا بۇل سۋرەت سىزگە اسىرەسە ىستىق بولارى ٴسوزسىز.
2 ايان كىتابى دا سول سۋرەت سياقتى. بۇلاي دەۋگە، كەم دەگەندە، ەكى سەبەپ بار. بىرىنشىدەن، بۇل كىتاپ جالپى ادامزاتقا ەمەس، قۇدايدىڭ باعىشتالعان قىزمەتشىلەرى — بىزدەرگە ارنالعان. ونىڭ العاشقى تارماعى: «بۇل — قۇدايدىڭ ٶز قۇلدارىنا جۋىردا بولاتىن جايتتاردى كورسەتۋ ٷشىن يسا ماسىحكە بەرگەن ايانى»،— دەپ باستالادى (ايان 1:1). قۇدايدىڭ حالقى بولعاندىقتان، بۇل كىتاپتا ايتىلعان پايعامبارلىقتاردىڭ ورىندالۋىنا ٴبىزدىڭ قاتىسىمىز بار، بىلايشا ايتقاندا، ٴبىز سول «سۋرەتتە» بارمىز.
3، 4. ايان كىتابىنا ساي، ونداعى پايعامبارلىقتار قاشان ورىندالماق ەدى جانە بۇل ٴبىزدى نە ىستەۋگە تالپىندىرۋى كەرەك؟
3 ايان كىتابىنىڭ ٴبىزدى قىزىقتىرۋىنىڭ ەكىنشى سەبەبى ونداعى پايعامبارلىقتاردىڭ ورىندالۋ ۋاقىتىمەن بايلانىستى. ەلشى جوحان سول ۋاقىت جايلى: «كيەلى رۋحتىڭ اسەرىمەن يەمىزدىڭ كۇنىنە اپارىلدىم»،— دەگەن (ايان 1:10). شامامەن ب.ز. 96-جىلى جوحان وسى سوزدەردى جازعاندا، «يەمىزدىڭ كۇنىنە» ٵلى ۇزاق ۋاقىت بار ەدى (مات. 25:14، 19؛ لۇقا 19:12). كيەلى كىتاپتاعى پايعامبارلىققا ساي، بۇل كۇن 1914-جىلى يسا كوكتە تاققا وتىرعاندا باستالدى. سول جىلدان باستاپ ايان كىتابىنداعى قۇدايدىڭ حالقىنا قاتىستى پايعامبارلىقتار ورىندالا باستادى. دەمەك، ٴقازىر ٴبىز «يەمىزدىڭ كۇنىندە» ٶمىر ٴسۇرىپ جاتىرمىز!
4 ٴبىز وتە ەرەكشە، تاريحي كەزەڭدە ٶمىر ٴسۇرىپ جاتقاندىقتان، ايان 1:3 تەگى كەڭەسكە ەرەكشە ٴمان بەرۋىمىز كەرەك. وندا: «وسى پايعامبارلىقتاعى سوزدەردى داۋىستاپ وقيتىن ادام دا، ونى تىڭدايتىن ٵرى وندا جازىلعانداردى ورىندايتىندار دا باقىتتى، سەبەبى بەلگىلەنگەن ۋاقىت تاياپ قالدى»،— دەلىنگەن. دەمەك، ٴبىز «پايعامبارلىقتاعى سوزدەردى داۋىستاپ وقۋىمىز»، «ونى تىڭداۋىمىز» جانە «ورىنداۋىمىز» قاجەت. ەندەشە، ورىنداۋىمىز كەرەك سول سوزدەردىڭ كەيبىرەۋىنە توقتالايىق.
عيباداتىڭىز ەحوباعا ۇنامدى ەكەنىنە كوز جەتكىزىڭىز
5. ەحوباعا ۇنامدى تۇردە عيبادات ەتۋدىڭ ماڭىزدىلىعى ايان كىتابىنان قالاي كورىنەدى؟
5 يسا ماسىحشىلەر قاۋىمىندا نە بولىپ جاتقانىن وتە جاقسى بىلەتىنى ايان كىتابىنىڭ ٴبىرىنشى تاراۋىنان-اق كورىنەدى (ايان 1:12—16، 20؛ 2:1). مۇنى ونىڭ كىشى ازياداعى جەتى قاۋىمعا جىبەرگەن حابارىنان بايقايمىز. سول حابارلاردىڭ ارقاسىندا I عاسىرداعى ماسىحشىلەر عيباداتتارى ەحوباعا ۇنامدى ما، جوق پا — سوعان كوز جەتكىزگەن جانە ونى ۇنامدى ەتۋ ٷشىن ناقتى نە ىستەۋ كەرەكتىگىن دە تۇسىنگەن. يسانىڭ سول قاۋىمدارعا ايتقان سوزدەرى بۇگىندە قۇدايدىڭ بۇكىل حالقىنا دا قاتىستى. جەتەكشىمىز يسا ٴماسىح ٴبىزدىڭ دە رۋحاني كۇيىمىزدى وتە جاقسى بىلەدى. ول ٴبىزدى جەتەلەيدى، قورعايدى، ونىڭ نازارىنان ەشتەڭە تىس قالمايدى. ول ەحوبانىڭ ىقىلاسىنان ايىرىلىپ قالماۋىمىز ٷشىن نە ىستەۋىمىز كەرەكتىگىن دە بىلەدى. ٴقازىر يسانىڭ بەرگەن كەيبىر نۇسقاۋلارىنا توقتالايىق.
6. ا) ايان 2:3، 4 تەن كورىنەتىندەي، ەفەس قاۋىمى قاي جاعىنان اقسادى؟ ٵ) ٴبىز بۇدان قانداي ساباق الامىز؟
6 ايان 2:3، 4 وقىڭىز. ٴبىز العاشقى سۇيىسپەنشىلىگىمىزدى جوعالتپاۋىمىز كەرەك. يسانىڭ ەفەستەگى قاۋىمعا ايتقان حابارىنان ولاردىڭ تاباندىلىق تانىتىپ، كوپ قيىندىققا قاراماستان، ەحوباعا ۇزبەي قىزمەت ەتكەنىن كورەمىز. دەسە دە ولار العاشقى سۇيىسپەنشىلىكتەرىن جوعالتىپ العان ەدى. عيباداتتارىن ەحوبا قابىلداۋ ٷشىن، ولارعا وسى سۇيىسپەنشىلىكتەرىن قايتا جانداندىرۋ كەرەك بولدى. بۇگىندە ٴبىزدىڭ دە جاي عانا تاباندىلىق تانىتقانىمىز جەتكىلىكسىز. ٴبىزدىڭ نە ٷشىن تاباندىلىق تانىتىپ جۇرگەنىمىز دە ماڭىزدى. ەحوبا قۇداي ٴبىزدىڭ نە ىستەپ جاتقانىمىزعا عانا ەمەس، ونى نە ٷشىن ىستەپ جاتقانىمىزعا دا نازار اۋدارادى. وعان ٴبىزدىڭ نيەتىمىز، ياعني ونى سۇيگەندىكتەن جانە وعان دەگەن ريزاشىلىقتان عيبادات ەتكەنىمىز ماڭىزدى (ناق. س. 16:2؛ مار. 12:29، 30).
7. ا) ايان 3:1—3-تارماقتاردا يسا سارد قاۋىمىنداعى قانداي پروبلەما جايلى ايتتى؟ ٵ) ٴبىز نە ىستەۋىمىز كەرەك؟
7 ايان 3:1—3 وقىڭىز. ٴبىز سەرگەكتىگىمىزدى جوعالتپاۋىمىز كەرەك. ساردتاعى قاۋىم بولسا باسقا جاعىنان اقساعان. كەزىندە رۋحاني بەلسەندى بولعانمەن، ۋاقىت وتە ولاردىڭ قىزمەتى باسەڭدەپ كەتكەن. سوندىقتان يسا ول قاۋىمعا «ويانۋ» كەرەكتىگىن ايتتى. ٴبىز بۇدان قانداي ساباق الامىز؟ ارينە، ەحوبا كەزىندە اتقارعان ەڭبەگىمىزدى ۇمىتپايدى (ەۆر. 6:10). ٴبىراق سول ەڭبەگىمىزگە سەنىپ، ٴقازىر قول قۋسىرىپ وتىرعانىمىز جارامايدى. ٴبىز جاعدايىمىز وزگەرىپ، بۇرىنعىداي كوپ ىستەي الماساق تا، «يەمىزدىڭ ىسىندە» قۇلشىنىسىمىزدى جوعالتپاۋىمىز كەرەك. سوندا سوڭىنا دەيىن سەرگەك بولىپ قالامىز (قور. 1-ح. 15:58؛ مات. 24:13؛ مار. 13:33).
8. ايان 3:15—17-تارماقتاردا لاۋديكيدەگى باۋىرلاستارعا ايتىلعان سوزدەردەن ٴبىز قانداي ساباق الامىز؟
8 ايان 3:15—17 وقىڭىز. ٴبىز بار جۇرەگىمىزبەن، بار ىنتا-جىگەرىمىزبەن عيبادات ەتۋىمىز كەرەك. يسا لاۋديكيدەگى قاۋىمنىڭ «ىستىق تا، سالقىن دا ەمەس، جىلىمشى» ەكەنىن ايتقان. ولار عيباداتىنا سەلقوس قاراپ، ەنجارلىق تانىتقاندىقتان، «سورلى، بەيشارا» كۇيدە ەدى. لاۋديكيدەگى قاۋىمنىڭ ەحوبا دەگەندە جانە عيبادات دەگەندە، ىنتا-جىگەرى اسىپ-تاسىپ تۇرۋ كەرەك ەدى (ايان 3:19). ٴبىز بۇدان قانداي ساباق الامىز؟ ەگەر ىنتا-جىگەرىمىزدىڭ باسىلىپ قالعانىن بايقاساق، ەحوبا مەن ونىڭ ۇيىمى بەرىپ جاتقان رۋحاني بايلىققا ريزاشىلىعىمىزدى ارتتىرايىق (ايان 3:18). جايلى ٶمىردىڭ سوڭىنان قۋىپ، ەحوباعا دەگەن عيباداتىمىز ەكىنشى ورىنعا ٴتۇسىپ كەتپەسىن.
9. يسانىڭ پەرگام مەن تياتيراداعى ماسىحشىلەرگە ايتقان حابارىنان ٴبىز ٷشىن قانداي ٴقاۋىپ بار ەكەنىن كورەمىز؟
9 جولدانتايۋشىلاردىڭ ىلىمدەرىنەن اۋلاق بولۋىمىز كەرەك. يسا پەرگام قاۋىمىندا جالعان ىلىمدەر تاراتىپ، قاۋىمدى جىككە بولگەندەرگە قاتاڭ سوگىس ايتقان (ايان 2:14—16). ال تياتيرا قاۋىمىنداعى ماسىحشىلەردى «شايتاننىڭ تەرەڭ قۇپيالارىنا» جولاماعاندارى ٷشىن ماقتاعان جانە شىندىقتى «بەرىك ۇستانۋعا» شاقىرعان (ايان 2:24—26). وسى ەكى قاۋىمدا جالعان ىلىمدەردىڭ سوڭىنان كەتكەن ٵلسىز ماسىحشىلەر ىستەرىنە وكىنىپ، تەرىس جولدارىنان قايتۋ كەرەك ەدى. ال ٴبىزدىڭ كەزىمىز جايلى نە دەۋگە بولادى؟ ٴبىز ەحوبانىڭ كوزقاراسىنا قايشى كەلەتىن كەز كەلگەن ىلىمنەن اۋلاق بولۋىمىز كەرەك. جولدانتايۋشىلار «قۇدايشىل بولىپ كورىنەتىن» شىعار، ٴبىراق ولار «بۇنى ىستەرىمەن كورسەتپەيدى» (ٴتىم. 2-ح. 3:5). جالعان ىلىمدەردى بىردەن اجىراتىپ، ودان باس تارتقىمىز كەلسە، قۇدايدىڭ ٴسوزىن تىڭعىلىقتى زەرتتەۋىمىز كەرەك (ٴتىم. 2-ح. 3:14—17؛ ياھد. 3، 4).
10. يسانىڭ پەرگام مەن تياتيراداعى قاۋىمدارعا ايتقاندارىنان تاعى قانداي ساباق الامىز؟
10 ٴبىز ازعىندىقتىڭ ەشقانداي ٴتۇرىن جاسامايمىز، قۇپتامايمىز جانە توزبەيمىز. پەرگام مەن تياتيرا قاۋىمدارىندا تاعى ٴبىر پروبلەما بولدى. يسا ولاردى ازعىندىققا ٴتوزىپ جۇرگەندەرى ٷشىن ايىپتاعان (ايان 2:14، 20). بۇدان قانداي ساباق الامىز؟ ەحوبا ٴبىزدىڭ ازعىن ارەكەتىمىزگە كوز جۇمادى دەپ كۇتپەيىك. ٴتىپتى وعان كوپ جىلدار بويى قىزمەت ەتسەك تە جانە ۇلكەن جاۋاپكەرشىلىكتەر اتقارىپ جۇرسەك تە، ول ازعىندىققا توزبەيدى (سام. 1-ج. 15:22؛ پەت. 1-ح. 2:16). اينالامىزداعى قۇدايسىز ادامداردىڭ مورالدىق نورمالارى قانشالىقتى تومەندەسە دە، ەحوبا ٴبىزدىڭ ۇستاناتىن نورمالارىمىز جوعارى بولىپ قالا بەرەدى دەپ كۇتەدى (ەفەس. 6:11—13).
11. ٴبىز نە تۋرالى بىلدىك؟ (« الار ساباق» دەگەن قورشاۋدى دا قاراڭىز.)
11 وسى بىلگەندەرىمىزدەن قانداي قورىتىندى جاسايمىز؟ ٴبىز عيباداتىمىزدىڭ ەحوباعا ۇنامدى ەكەنىنە كوز جەتكىزىپ وتىرۋىمىز كەرەك. ەگەر عيباداتىمىزدى جارامسىز ەتەتىن ٴبىر نارسە ىستەپ جۇرسەك، ونى تەز ارادا تۇزەتەيىك (ايان 2:5، 16؛ 3:3، 16). يسا ٴى عاسىرداعى قاۋىمدارعا ايتقان حابارىندا تاعى ٴبىر ماڭىزدى جايتقا نازار اۋدارعان. ول قانداي جايت؟
قۋعىنعا توتەپ بەرۋگە ىقىلاستى بولىڭىز
شايتان كوكتەن جەرگە تاستالعان سوڭ، قۇدايدىڭ حالقىنا قالاي شابۋىلداپ كەلەدى؟ (12—16 ابزاستاردى قاراڭىز)
12. يسانىڭ سميرنا مەن ٴفيلادەلفيدەگى باۋىرلاستارعا ايتقانىنان نە ۇيرەنەمىز؟ (ايان 2:10)
12 ال ەندى يسانىڭ سميرنا مەن ٴفيلادەلفيدەگى قاۋىمدارعا ايتقان حابارىنا توقتالايىق. يسا ولارعا قۋعىن-سۇرگىننەن قورقۋدىڭ قاجەتى جوق ەكەنىن ايتتى، سەبەبى ادالدىقتارى ٷشىن ەحوبا ولارعا سي بەرمەك ەدى (ايان 2:10 وقىڭىز؛ 3:10). بۇل ٴبىزدى نەگە ۇيرەتەدى؟ ٴبىزدى قۋعىنداپ جاتسا، ەش تاڭعالماۋىمىز كەرەك جانە وعان تاباندىلىقپەن توتەپ بەرۋگە ىقىلاستى بولعانىمىز ٴجون (مات. 24:9، 13؛ قور. 2-ح. 12:10). يسانىڭ وسى ايتقاندارى ٴبىز ٷشىن نەگە ماڭىزدى؟
13، 14. ايان كىتابىنىڭ 12-تاراۋىندا ايتىلعان وقيعالار قۇداي حالقىنا قالاي اسەر ەتتى؟
13 ايان كىتابى «يەمىزدىڭ كۇنىندە»، ياعني ٴبىزدىڭ كەزىمىزدە قۇداي حالقى قۋعىندالاتىنىن ەسكەرتكەن. ونىڭ 12-تاراۋىنان قۇداي پاتشالىعى پايدا بولعاننان كەيىن كوكتە سوعىس بۇرق ەتكەنىن بىلەمىز. تاققا وتىرعان يسا ٴماسىح پەن ونىڭ اسكەرى شايتان مەن ونىڭ جىن-پەرىلەرىمەن شايقاستى (ايان 12:7، 8). ناتيجەسىندە، قۇدايدىڭ جاۋلارى ويسىراي جەڭىلىپ، جەر بەتىنە لاقتىرىلدى. سودان بەرى جەر بەتىندەگى كۇللى ادامزات قايعى-قاسىرەتتەن كوز اشپاي كەلەدى (ايان 12:9، 12). ال بۇل جاعداي قۇدايدىڭ حالقىنا قالاي اسەر ەتتى ەكەن؟
14 ايان كىتابىندا شايتان جەڭىلگەننەن كەيىن ٵرى قاراي نە ىستەگەنى تۋرالى وقيمىز. ول بۇدان بىلاي كوككە باس سۇعا الماي قالعاندىقتان، ەندى بار اشۋىن مايلانعان تامتىقتان الماق بولدى. بۇل تامتىق قۇداي پاتشالىعىنىڭ جەردەگى وكىلدەرىن ٵرى «يسا تۋرالى كۋالىك ەتىپ جۇرگەندەردى» بىلدىرەدى (ايان 12:17؛ قور. 2-ح. 5:20؛ ەفەس. 6:19، 20). ايان كىتابىنداعى وسى پايعامبارلىق قالاي ورىندالدى؟
15. ايان كىتابىنىڭ 11-تاراۋىندا ايتىلعان «ەكى كۋاگەر» كىمدەرگە نۇسقايدى جانە ولارمەن نە بولدى؟
15 شايتان قۇدايدىڭ جەردەگى جاۋلارىن قولشوقپار ەتىپ، پاتشالىقتى جاريالاۋ ىسىندە جەتەكشىلىك ەتەتىن مايلانعان ەر باۋىرلاستارعا شابۋىل جاسادى. ايان كىتابىنداعى ولتىرىلگەن «ەكى كۋاگەر» جايلى سوزدەر وسى باۋىرلاستارعا نۇسقايدى * (ايان 11:3، 7—11). 1918-جىلى جاۋاپتى ەر باۋىرلاستاردىڭ سەگىزىنە جالعان ايىپ تاعىلىپ، بارلىعى ۇزاق مەرزىمگە تۇرمەگە قامالدى. سوندا ادامي تۇرعىدان قاراعاندا، مايلانعانداردىڭ ٸسى «ٶلتىرىلىپ تاستالعانداي» بولدى.
16. 1919-جىلى قانداي كۇتپەگەن جاعداي بولدى، ٴبىراق شايتان نە ىستەۋىن قويار ەمەس؟
16 ايان 11-تاراۋداعى پايعامبارلىققا ساي، «ەكى كۋاگەر» قىسقا ۋاقىتتىڭ ىشىندە قايتا تىرىلمەك ەدى. 1919-جىلدىڭ باسىندا، ياعني مايلانعان ەر باۋىرلاستار تۇرمەگە جابىلعاننان ٴبىر جىل وتەر-وتپەس، ەشكىم كۇتپەگەن ٴبىر تاڭعالارلىق جاعداي بولدى. ولار تۇرمەدەن بوساتىلىپ، تاعىلعان ايىپتارى دا كوپ ۇزاماي الىنىپ تاستالدى. سوسىن ولار بىردەن پاتشالىق ىسىنە قايتا كىرىستى. ٴبىراق شايتاننىڭ قۇداي حالقىنا شابۋىلداۋىن قوياتىن ٴتۇرى جوق ەدى. سول ۋاقىتتان بەرى ول «وزەن» ىسپەتتى قارسىلىقتارىن بۇكىل قۇداي حالقىنا توگىپ كەلەدى (ايان 12:15). سوندىقتان دا ٵرقايسىسىمىزعا «تاباندىلىق پەن سەنىم قاجەت-اق» (ايان 13:10).
ەحوبانىڭ ىسىندە تالماي ەڭبەكتەنىڭىز
17. قۇداي حالقى شايتاننىڭ نىساناسىنا اينالسا دا، ولارعا كۇتپەگەن قانداي كومەك كەلدى؟
17 ايان كىتابىنىڭ 12-تاراۋىندا قۇداي حالقىنا كۇتپەگەن ٴبىر جەردەن كومەك كەلەتىنى تۋرالى ايتىلادى. بۇل — قۋعىن-سۇرگىندەر «وزەنىن» جۇتىپ قوياتىن «جەر» تۋرالى پايعامبارلىق (ايان 12:16). بۇل پايعامبارلىق قالاي ورىندالدى؟ شايتاننىڭ دۇنيەسىنىڭ سوت سياقتى تۇراقتى جۇيەلەرى قۇداي حالقىن قۇتقارۋعا كەلگەن جاعدايلار بولدى. ەحوبانىڭ قىزمەتشىلەرى كوپ سوتتاردا جەڭىپ شىعىپ، ٴبىرشاما ەركىندىككە قول جەتكىزدى. وسى ەركىندىكتەرىن ولار دانالىقپەن پايدالانىپ، ەحوبانىڭ ٸسىن مولىنان اتقاردى (قور. 1-ح. 16:9). بۇل ىسكە نە جاتادى؟
قۇدايدىڭ قىزمەتشىلەرى قانداي ەكى ٴتۇرلى حاباردى جاريالاپ ٴجۇر؟ (18، 19-ابزاستاردى قاراڭىز)
18. وسى سوڭعى كۇندەرى ٴبىزدىڭ اتقاراتىن ەڭ باستى ٸسىمىز قانداي؟
18 يسا وسى زاماننىڭ سوڭى كەلمەيىنشە، قۇداي حالقى «پاتشالىق جايلى ىزگى حاباردى» بۇكىل جەر بەتىندە ۋاعىزدايتىنىن ايتىپ كەتكەن (مات. 24:14). بۇل ورايدا «جەر بەتىندە تۇراتىندارعا — ٵربىر ۇلت، رۋ، ٴتىل جانە حالىققا جاريالايتىن ماڭگىلىك ىزگى حابارى بار» ٴبىر پەرىشتە نە ٴبىر توپ پەرىشتە قۇداي حالقىنا كومەككە كەلمەك ەدى (ايان 14:6).
19. ەحوبانى سۇيەتىندەر تاعى قانداي حابار جاريالاۋ كەرەك؟
19 قۇداي حالقى تەك پاتشالىق تۋرالى ىزگى حاباردى عانا جاريالامايدى. ولار ايان كىتابىنىڭ 8—10-دەيىنگى تاراۋلارىندا سيپاتتالعان پەرىشتەلەردىڭ ىسىنە دە قولداۋ كورسەتۋلەرى كەرەك. بۇل پەرىشتەلەر قۇداي پاتشالىعىن مويىندامايتىندارعا تونەتىن قاسىرەتتەردى بىرىنەن سوڭ ٴبىرىن حابارلاپ جاتقان ەدى. ەحوبا كۋاگەرلەرى دە «بۇرشاق پەن وت» سياقتى ۇكىم حابارىن جاريالاۋدا. ولار شايتاننىڭ زۇلىم دۇنيەسىندەگى ٴتۇرلى جۇيەلەرگە قۇدايدىڭ ۇكىم كەسكەنىن ايتادى (ايان 8:7، 13). وسى زاماننىڭ سوڭى تاياپ قالعانىن ادامدار ٴبىلۋ كەرەك. سوندا ومىرلەرىن تۇبەگەيلى وزگەرتىپ، «ەحوبانىڭ قاھار كۇنى» امان قالا الادى (ساف. 2:2، 3). الايدا بۇل حاباردى كوپشىلىگى جاقتىرمايدى. سوندىقتان ونى جاريالاۋ ٷشىن باتىل بولۋىمىز كەرەك. ال زور الاپاتتا ٴبىز ادامدارعا ودان دا اۋىر بولىپ تيەتىن سوڭعى ۇكىم حابارىن جاريالايتىن بولامىز (ايان 16:21).
«وسى پايعامبارلىقتاعى سوزدەردى» ورىنداڭىز
20. كەلەسى ەكى ماقالادا نە تۋرالى بىلەمىز؟
20 «وسى پايعامبارلىقتاعى سوزدەردى» ورىنداعانىمىز وتە ماڭىزدى، ويتكەنى ايان كىتابىنان بىلگەنىمىزدەي، ولاردىڭ بىزگە قاتىسى بار (ايان 1:3). الايدا قۋدالاۋعا ادال توتەپ بەرىپ، قۇدايدىڭ حابارلارىن ٵرى قاراي دا باتىل جاريالاي بەرۋگە نە كومەكتەسەدى؟ بىزگە مىنا ەكى نارسە كۇش بەرەدى: 1) ايان كىتابىندا قۇدايدىڭ جاۋلارى تۋرالى نە ايتىلعانى، 2) ادالدىق ساقتاپ قالساق، بولاشاقتا قانداي باتالارعا يە بولاتىنىمىز. بۇلار جايىندا كەلەسى ەكى ماقالادا تولىعىراق قاراستىرامىز.
32-ٵن ەحوبانىڭ جاعىنا شىق
^ ٴبىز بۇگىندە ايان كىتابىنداعى پايعامبارلىقتار ورىندالىپ جاتقان ەرەكشە ۋاقىتتا ٶمىر سۇرۋدەمىز! وسى جانە كەلەسى ەكى ماقالادا ايان كىتابىنا شولۋ جاساپ، ونداعى پايعامبارلىقتاردىڭ بىزگە قانداي قاتىسى بار ەكەنىن كورەمىز. سونداي-اق ايان كىتابىن نەگىزگە الا وتىرىپ، عيباداتىمىز ەحوباعا ۇنامدى بولىپ قالا بەرۋ ٷشىن نە ىستەۋىمىز كەرەكتىگىن بىلەمىز.
^ 2014-جىلدىڭ 15-قاراشاسىنداعى «كۇزەت مۇناراسىنىڭ» 30-بەتىندەگى «وقىرمان ساۋالدارىن» (حانزۇشا) قاراڭىز.
