20-زەرتتەۋ ماقالاسى
دۇعامىزدى جاقسارتايىق
«وعان... جۇرەك سىرلارىڭدى اقتارىڭدار» (ٴزاب. 62:8).
45-ٵن جۇرەك تولعانىسى
اڭداتپا a
ٴبىز ەحوباعا جۇيەلى تۇردە دۇعا ايتىپ، ٶمىرىمىزدىڭ ٴتۇرلى جاعدايلارىندا اقىل سۇراساق بولادى (1-ابزاستى قاراڭىز)
1. ەحوبا ٴبىزدى نە ىستەۋگە شاقىرادى؟ (سۋرەتتى دە قاراڭىز.)
قينالعان ساتتە كىمنەن جۇبانىش ىزدەپ، كىمنەن اقىل سۇرايمىز؟ ارينە، ەحوبادان. «ۇدايى دۇعا ەتىڭدەر»،— دەپ ەحوبانىڭ ٶزى شاقىرىپ وتىر (سال. 1-ح. 5:17). ٴيا، ٴبىز وعان ەش قىمسىنباي دۇعا ەتىپ، اقىل سۇراي الامىز (ناق. س. 3:5، 6). ويتكەنى جومارت قۇداي ەحوبا قانشا رەت دۇعا ايتساق تا، ٴبىزدى شەكسىز تىڭداۋعا دايىن.
2. بۇل ماقالادا نە جايلى ٴسوز قوزعايمىز؟
2 جاراتقانعا ٴتىل قاتىپ، ونىمەن سويلەسە الاتىنىمىز ٴبىز ٷشىن نەتكەن قىمبات سي! بىراق مىنا قاربالاس دۇنيەدە دۇعا ەتۋگە ۋاقىت تاپپاي جاتاتىنىمىز راس. بۇدان بولەك، دۇعاداعى ٴسوزىمىز جۇتاڭداپ بارا جاتقانىن بايقايتىن شىعارمىز. قۋانىشىمىزعا وراي، بىزدە كيەلى جازبالار بار. ولار بىزگە قوزعاۋ سالادى جانە اقىل-كەڭەس بەرەدى. الدىمەن، وسى ماقالادا يسانىڭ دۇعاعا قالاي ۋاقىت بولگەنىن قاراستىرامىز. ال سوسىن، دۇعامىزدى قانداي بەس جايت بايىتاتىنىن كورەمىز.
يسا دۇعا ايتۋ ٷشىن ارنايى ۋاقىت بولگەن
3. يسا دۇعا جايلى نەنى جاقسى بىلگەن؟
3 ەحوبا ٷشىن دۇعا قانشالىقتى قىمبات ەكەنىن يسا جاقسى بىلگەن. جەرگە كەلمەس بۇرىن ول اكەسىنىڭ تالاي ادال جانداردىڭ دۇعاسىنا جاۋاپ بەرگەنىن ٶز كوزىمەن كورگەن. مىسالى، ەحوبا حاننانىڭ، ٴداۋىتتىڭ جانە ٸلياستىڭ جۇرەكجاردى دۇعالارىنا جاۋاپ بەرگەندە، يسا ونىڭ قاسىندا بولعان (سام. 1-ج. 1:10، 11، 20؛ پات. 1-ج. 19:4—6؛ ٴزاب. 32:5). مىنە، سوندىقتان دا يسا شاكىرتتەرىنە ەحوباعا قايتا-قايتا جانە سەنىمدىلىكپەن دۇعا ەتۋدى ۇيرەتكەن (مات. 7:7—11).
4. يسانىڭ دۇعالارى تۋرالى بىزگە نە ٴمالىم؟
4 يسا ٶز دۇعالارىمەن بىزگە جاقسى ۇلگى قالدىردى. جەردە قىزمەت ەتكەن شاعىندا ول ەحوباعا ۇنەمى دۇعا ەتىپ جۇرەتىن. دۇعا ايتۋ ٷشىن وعان ارنايى ۋاقىت ٴبولۋ كەرەك بولعان. ويتكەنى ونىڭ ٸسى باسىنان اساتىن جانە ٵردايىم قاسىندا ادامدار قاۋمالاپ جۇرەتىن (مار. 6:31، 45، 46). وڭاشادا دۇعا ايتۋ ٷشىن ول تاڭ اتپاي ەرتە تۇراتىن (مار. 1:35). ال ٴبىر ماڭىزدى شەشىم قابىلدار الدىندا يسا تۇنىمەن دۇعا ايتقان (لۇقا 6:12، 13). ولەر الدىنداعى ٴتۇنى دە ول قايتا-قايتا دۇعا ايتتى. ويتكەنى ول وزىنە جۇكتەلگەن تاپسىرمانىڭ ەڭ قيىنىن ابىرويمەن اتقارۋدى ويلادى (مات. 26:39، 42، 44).
5. يسانى قاي جاعىنان ۇلگى ەتە الامىز؟
5 يسادان نە ۇيرەنەمىز؟ تىرلىگىمىز باسىمىزدان اسسا دا، دۇعا ايتۋعا ۋاقىت تابۋىمىز كەرەك. بۇل ٷشىن يسا سياقتى تاڭەرتەڭ ەرتە تۇرساق بولادى نەمەسە تۇندە كەشىرەك جاتساق بولادى. وسىلاي ۋاقىت تاپقان كەزدە ٴبىز ەحوباعا دۇعانىڭ قادىرىن تۇسىنەتىنىمىزدى كورسەتەمىز. لين ەسىمدى ايەل باۋىرلاس دۇعا ايتا الاتىنىمىز جايلى بىلگەندە قانداي اسەر العانىن ايتىپ بەردى. «مەن ەحوباعا كەز كەلگەن ۋاقىتتا دۇعا ايتا الاتىنىمىزدى ٴبىلدىم. سول كەزدە «ەحوبا تۋرا ٴبىر دوس سياقتى ەكەن عوي» دەپ ويلادىم. ٴسۇيتىپ، دۇعالارىمدى جاقسارتقىم كەلىپ كەتتى»،— دەيدى لين. ٴبىزدىڭ دە قالاۋىمىز — وسى. ەندەشە، دۇعاعا قوزعاۋ بولاتىن نەگىزگى بەس نارسەنى قاراستىرىپ كورەيىك.
دۇعانى بايىتار بەس جايت
6. ايان 4:10، 11 گە ساي، ەحوبا نە نارسەگە لايىق؟
6 ەحوبانى داڭقتاڭىز. ەلشى جوحان ٴبىر تاڭعاجايىپ اياندا كوكتە ەحوباعا عيبادات ەتىپ جاتقان 24 اقساقالدى كوردى. ولار قۇدايدىڭ «داڭققا، قۇرمەت پەن كۇش-قۇدىرەتكە لايىق» ەكەنىن ايتىپ ماداقتاپ جاتتى (ايان 4:10، 11 وقىڭىز). ادال پەرىشتەلەردە دە ەحوبانى داڭقتايتىن سەبەپتەر وتە كوپ. نەگە؟ پەرىشتەلەر ەحوبانىڭ قاسىندا بولعاندىقتان، ونى وتە جاقسى تانىپ-بىلگەن. ولار ەحوبانىڭ ٵربىر ىسىنەن كەرەمەت قاسيەتتەرىن كورگەندە، وعان ەرىكسىز ماداقتارىن جاۋدىرادى (ٵيۇپ 38:4—7).
7. ەحوبانى نە ٷشىن ماداقتاساق بولادى؟
7 ٴبىز دە پەرىشتەلەر سياقتى ەحوبانى دۇعامىزدا ماداقتاپ، ونى جاقسى كورەتىنىمىزدى ايتىپ، وعان العىسىمىزدى بىلدىرەيىك. كيەلى كىتاپتى وقىپ-زەرتتەگەندە، ەحوبانىڭ تاماشا قاسيەتتەرىنە نازار اۋدارىڭىز (ٵيۇپ 37:23؛ ريم. 11:33). قاي قاسيەتى ٴسىزدى ەرەكشە تامساندىردى، ٴسىزدى قانداي ەرەكشە سەزىمگە بولەدى — سونى ەحوباعا ايتىپ بەرىڭىز. بۇعان قوسا، ەحوبانىڭ جەكە ٴسىز ٷشىن جانە بۇكىل باۋىرلاستىق ٷشىن جاساپ جاتقان جاقسىلىقتارىن ايتىپ ماداقتاڭىز. راسىمەن دە، ول ۇنەمى ٴبىزدى قامقورلاپ، قورعاپ وتىرادى ەمەس پە؟! (سام. 1-ج. 1:27؛ 2:1، 2).
8. ەحوباعا العىس ايتاتىن كەيبىر نارسەلەر قانداي؟ (سالونيكالىقتارعا 1-حات 5:18)
8 ەحوباعا العىس ايتىڭىز. ونىڭ ٴبىز ٷشىن جاساعان جاقسىلىعى كوپ قوي. سول ٷشىن قالاي العىس ايتپاي تۇرا الامىز؟! (سالونيكالىقتارعا 1-حات 5:18 وقىڭىز). بىزدەگى بۇكىل يگى سيلاردىڭ ٴبارى، تۇپتەپ كەلگەندە، ەحوبادان (جاق. 1:17). مىسالى، كوركىنە كوز تويماس تابيعاتى ٷشىن، قىزىقتى دا قىلىقتى جاراتىلىستارى ٷشىن راقمەت ايتساق بولادى. سونداي-اق بىزگە سيلاعان ٶمىرى، وتباسىمىز، دوس-جاراندارىمىز جانە ٷمىتىمىز ٷشىن دە العىس ايتايىق. ال وزىمەن دوس بولۋ مارتەبەسىن سيلاعانى ٷشىن العىسىمىز تىپتەن شەكسىز!
9. ەحوباعا ريزاشىلىق ٴبىلدىرۋ ٷشىن نەگە كەيدە كۇش سالۋ كەرەك؟
9 ەحوبانىڭ جەكە بىزگە جاساپ جاتقان جاقسىلىقتارىنا العىس ٴبىلدىرۋ ٷشىن، كۇش سالىپ، ويلانۋ كەرەك بولار. ويتكەنى جان-جاعىمىزدى العىستان جۇرداي ادامدار قورشاعان. ولار قولدا بارلارىنا ريزا بولۋدىڭ ورنىنا، الا بەرسەم ەكەن دەيدى. ەگەر وسىنداي وي قالىپ بىزگە دە سىڭگەن بولسا، وندا دۇعادا تەك سۇراي بەرەتىن بولامىز. بۇنىڭ الدىن الۋ ٷشىن ەحوبانىڭ بار جاقسىلىعىنا ريزاشىلىعىمىزدى وسىرە بەرەيىك ٵرى ونى ٴبىلدىرىپ وتىرايىق (لۇقا 6:45).
ەحوباعا العىس ٴبىلدىرىپ جۇرسەك، قيىندىققا توزە الامىز (10-ابزاستى قاراڭىز)
10. ريزاشىل بولعانى كيون-سۋك باۋىرلاسقا قيىن جاعدايدا قالاي كومەكتەستى؟ (سۋرەتتى دە قاراڭىز.)
10 ريزاشىل بولساق، قيىندىقتارعا ٴتوزۋ اناعۇرلىم جەڭىل بولادى. 2015-جىل، 15-قاڭتارداعى «كۇزەت مۇناراسىندا» كيون-سۋك دەگەن ايەل باۋىرلاسىمىزدىڭ وقيعاسى جازىلعان ەدى. وعان دارىگەرلەر وكپەسىندە اسقىنىپ كەتكەن ىسىك بار ەكەنىن ايتادى. «بۇل اۋرۋ مەنى ەسەڭگىرەتىپ تاستادى. مەن ٶزىمدى بارىنەن ايىرىلعانداي سەزىندىم، بويىمدى ۇرەي بيلەدى»،— دەيدى ول. كيون-سۋك باۋىرلاسقا وسى اۋىر جاعدايدى كوتەرۋگە نە كومەكتەستى؟ ول كۇندە جاتار الدىندا ٷي توبەسىندەگى اشىق الاڭعا شىعىپ، ەحوباعا سول كۇنگى بەس نارسەگە داۋىستاپ راقمەت ايتاتىن. سوندا ۋايىمى باسىلىپ، ەحوبانى قانشالىقتى جاقسى كورەتىنىن بىلدىرۋگە اسىعاتىن. ول ەحوبانىڭ قيىن جاعدايداعى ادال قىزمەتشىلەرىنە تىرەك بولاتىنىن ٶزى سەزىنىپ كوردى جانە ومىرىمىزدە قيىندىقتان گورى ەحوبانىڭ باتالارى كوپ ەكەنىن ٴتۇسىندى. بىزدە دە، قاتتى قينالىپ جاتقان كۇننىڭ وزىندە، ەحوباعا العىس ٴبىلدىرۋدىڭ سەبەپتەرى كوپتەپ تابىلادى. سولار ٷشىن دۇعادا العىس ٴبىلدىرىپ وتىرساق، قيىندىقتارعا ٴتوزۋ جەڭىل بولادى جانە ٴتۇڭىلىپ كەتپەي، سابىرلىق ساقتاي الامىز.
11. يسا كوككە ورالعان سوڭ، ونىڭ شاكىرتتەرىنە نەگە باتىلدىق كەرەك بولدى؟
11 ەحوبادان ۋاعىزداۋعا باتىلدىق سۇراڭىز. كوككە كوتەرىلمەس بۇرىن يسا شاكىرتتەرىنە ٶزى جايلى «يەرۋساليمدە، بۇكىل ياھۋدەيا مەن ساماريادا جانە جەردىڭ قيىر شەتىنە دەيىن» كۋالىك ەتۋدى تاپسىرىپ كەتتى (ەل. ٸس. 1:8؛ لۇقا 24:46—48). سودان كوپ ۇزاماي ياھۋدي ٴدىني جەتەكشىلەرى ەلشى پەتىر مەن جوحاندى ۇستاپ الىپ، جوعارعى كەڭەستىڭ الدىنا اپارادى. ولارعا بۇدان بىلاي ۋاعىزداماۋدى ەسكەرتىپ، ٴتىپتى سەس كورسەتەدى (ەل. ٸس. 4:18، 21). سوندا پەتىر مەن جوحان نە ىستەدى؟
12. ەلشىلەردىڭ ىستەرى 4:29، 31 گە ساي، شاكىرتتەر نە ىستەدى؟
12 پەتىر مەن جوحان سەس كورسەتكەن ٴدىني جەتەكشىلەرگە بىلاي دەيدى: «قۇدايدى ەمەس، سىزدەردى تىڭداعانىمىز ونىڭ الدىندا ٴجون بولار ما ەكەن؟ مۇنى وزدەرىڭىز ويلاپ كورىڭىزدەر. ال ٴبىز كورىپ-ەستىگەنىمىز جايلى ٷنسىز قالا المايمىز» (ەل. ٸس. 4:19، 20). بوساتىلعاننان كەيىن ەكەۋى وزگە شاكىرتتەرگە بارادى دا، ٴبارى بىرگە دۇعا ايتىپ، ەحوبانىڭ ەركىن ورىنداي بەرۋگە نىق بەكىنەدى. دۇعادا قۇدايدان: «قۇلدارىڭا ٴسوزىڭدى باتىل جاريالاي بەرۋگە كۇش دارىتا كور»،— دەپ سۇرايدى. ال ەحوبا ولاردىڭ جۇرەكتەن شىققان بۇل وتىنىشتەرىنە جاۋاپ بەرەدى (ەلشىلەردىڭ ىستەرى 4:29، 31 وقىڭىز).
13. دجين-حيۋك باۋىرلاستان قانداي ۇلگى الامىز؟
13 بيلىك باسىنداعىلار تيىم سالسا دا ۋاعىزداي بەرۋىمىزبەن شاكىرتتەردىڭ ۇلگىسىنە ەلىكتەسەك بولادى. بەيتاراپ بولعانى ٷشىن تۇرمەگە جابىلعان دجين-حيۋك دەگەن ەر باۋىرلاستىڭ مىسالىنا كوڭىل بولەيىك. تۇرمەدە وعان جالعىز ادامدىق كامەرادا وتىرعان تۇتقىندارعا قىزمەت كورسەتۋ تاپسىرىلادى. الايدا كامەراداعىلارمەن وسى جۇمىستان باسقا نارسە جايلى، سونىڭ ىشىندە كيەلى كىتاپ تۋرالى دا، سويلەسۋگە بولمايتىن. سوندا دا دجين-حيۋك ەشبىر مۇمكىندىكتى جىبەرمەي باتىل ۋاعىزداۋ ٷشىن ٵرى مۇنى ابايلاپ ىستەۋ ٷشىن دۇعادا كومەك سۇرايدى (ەل. ٸس. 5:29). «ەحوبا ماعان جاۋاپ بەرىپ، باتىلدىق پەن دانالىق دارىتتى. سونىڭ ارقاسىندا كامەرانىڭ الدىندا كوپ كىسىمەن بەس مينۋتتىق كيەلى كىتاپ زەرتتەۋ ساباعىن باستادىم. تۇندە ولارعا حات جازىپ، كەلەسى كۇنى تاراتىپ كەتەتىنمىن»،— دەيدى ول. ەحوبا بىزگە دە قىزمەتىمىزدى اتقارۋعا كومەكتەسەتىنىنە سەنىمدى بولايىق. وعان دجين-حيۋك باۋىرلاس سياقتى دۇعا ايتىپ، دانالىق پەن باتىلدىق سۇرايىق.
14. قيىندىقتارعا توتەپ بەرۋگە نە كومەكتەسەدى؟ (ٴزابۇر 37:3، 5)
14 ەحوبادان قيىندىققا توتەپ بەرۋگە كومەك سۇراڭىز. ارامىزدا جان اۋرۋىنا نە ٴتان اۋرۋىنا شالدىققان، جاقىنىن جوعالتقان، قۋعىن كورىپ جاتقان نەمەسە وتباسىلىق قيىندىقتارعا ۇشىراعان باۋىرلاستار بار. پاندەميانىڭ نە سوعىستىڭ سالدارى ولاردىڭ جاعدايىن ودان سايىن ۋشىقتىرىپ جاتىر. وسىنداي قيىندىقتار كورىپ جاتساڭىز، ەحوباعا ىشىڭىزدەگىنىڭ ٴبارىن ايتىپ دۇعا ەتىڭىز. وعان جاعدايىڭىزدىڭ قىر-سىرىن ايتىپ، جان دوسىڭىزبەن سويلەسكەندەي سويلەسىڭىز. ەحوبا ٴسىزدىڭ «يگىلىگىڭىز ٷشىن ارەكەت ەتەتىنىنە» ەش كۇماندانباڭىز (ٴزابۇر 37:3، 5 وقىڭىز).
15. «قيىنشىلىقتا تاباندى بولۋعا» دۇعا قالاي كومەكتەسەدى؟ مىسال كەلتىرىڭىز.
15 ۇدايى دۇعا ەتسەك، «قيىنشىلىقتا تاباندى بولامىز» (ريم. 12:12). ەحوبا قىزمەتشىلەرىنىڭ باسىنان نە ٶتىپ جاتقانىن بىلەدى. ولاردىڭ «كومەك سۇراعان ۇندەرىن ەستيدى» (ٴزاب. 145:18، 19). مىسالى، 29 جاسار كريستي دەگەن ٸزاشار قىز باۋىرلاستى الايىق. ونىڭ دەنساۋلىعى كۇرت ناشارلاي باستايدى. سودان قاتتى جان كۇيزەلىسىنە ٴتۇسىپ كەتەدى. كەيىن اناسىنىڭ جازىلمايتىن دەرتكە شالدىققانىن بىلەدى. «ٵربىر كۇننىڭ اۋىرتپالىعىن كوتەرۋگە كۇش بەرە گور دەپ ەحوباعا تالماي دۇعا ەتىپ ٴجۇردىم. جينالىستاردى قالدىرماي، جەكە زەرتتەۋىمدى تاستاماي، رۋحاني كەستەمدى مىقتاپ ۇستاندىم. ٶمىرىمنىڭ اۋىر ساتتەرىن دۇعانىڭ ارقاسىندا كوتەردىم. ەحوبا ٵردايىم جانىمدا ەكەنىن ٴبىلۋدىڭ وزىنەن ۇلكەن جۇبانىش الاتىنمىن. دەرتىمنەن بىردەن ايىعىپ كەتپەسەم دە، ەحوبا جانىما تىنىشتىق پەن سابىرلىق سيلاپ، دۇعاما جاۋاپ بەرەتىن»،— دەيدى كريستي. «ەحوبا وزىنە شىن بەرىلگەندەردى سىناقتان قالاي قۇتقارۋدى... بىلەدى»، وسىنى ۇمىتپالىق (پەت. 2-ح. 2:9).
ازعىرىلىپ قالماۋ ٷشىن 1) ەحوبادان كومەك سۇراڭىز، 2) دۇعاڭىزعا ساي ارەكەت ەتىڭىز، 3) ەحوبامەن دوستىعىڭىزدى بەرىك ەتە ٴتۇسىڭىز (16، 17-ابزاستاردى قاراڭىز)
16. ازعىرۋلارعا بەرىلمەۋ ٷشىن نەگە ەحوبانىڭ كومەگى كەرەك؟
16 ازعىرۋلارعا بەرىلىپ قالماۋ ٷشىن ەحوبادان كومەك سۇراڭىز. بارلىعىمىز كەمەلسىزبىز، سوندىقتان دۇرىس ەمەس نارسەنى جاساپ قويماس ٷشىن، ۇنەمى كۇرەسەمىز. شايتان بولسا وسى كۇرەستە جەڭىلىپ قالۋىمىز ٷشىن بارىن سالادى. مىسالى، لاس ويىن-ساۋىقتارمەن ويىمىزدى ارامداعىسى كەلەدى. وسىلاي ويىمىز ارامدالعان سوڭ، جۇرەگىمىز ارامدالىپ، تۇبىندە اۋىر كۇنا جاساپ قويۋىمىز مۇمكىن (مار. 7:21—23؛ جاق. 1:14، 15).
17. «ازعىرىلۋىما جول بەرمە» دەپ دۇعا ەتكەن سوڭ، قالاي ارەكەت ەتكەن ٴجون؟ (سۋرەتتى دە قاراڭىز.)
17 بۇرىس قالاۋعا بەرىلمەۋ ٷشىن ەحوبانىڭ كومەگى كەرەك. ۇلگىلى دۇعادا يسا «ازعىرىلۋىمىزعا جول بەرمەي، زۇلىمنان ساقتاي كور» دەپ سۇراۋدى ايتقان (مات. 6:13). ەحوبا بىزگە كومەكتەسكىسى كەلەدى. بىراق ول ٷشىن ودان دۇعادا كومەك سۇراۋىمىز كەرەك جانە دۇعامىزعا ساي ارەكەت ەتۋىمىز دە كەرەك. مىسالى، شايتاننىڭ دۇنيەسىندە كوپشىلىككە جاعىمدى، بىراق تەرىس وي-پىكىرلەر كوپ. سولاردىڭ اسەرىن شەكتەۋ ٷشىن، ناقتى ارەكەتتەر جاسايىق (ٴزاب. 97:10). سونداي-اق كيەلى كىتاپتى وقىپ-زەرتتەۋ ارقىلى سانامىزدى تازا ويلارعا تولتىرايىق. قاۋىم كەزدەسۋلەرىنە بارعانىمىز، قىزمەتكە شىققانىمىز دا وي-سانامىزدى ساقتايدى. ال ەحوبا ٶز كەزەگىندە «شامادان تىس سىنالۋلارىڭا جول بەرمەيمىن» دەپ ۋادە ەتەدى (قور. 1-ح. 10:12، 13).
18. بارلىعىمىز نە ىستەۋىمىز قاجەت؟
18 وسى سوڭعى كۇندەردەگى قيىن ۋاقىتتا ەحوباعا ادالدىق ساقتاۋ ٷشىن، بۇرىنعىدان دا كوبىرەك دۇعا ەتۋ كەرەك. ەحوباعا كۇندە شىن جۇرەكتەن دۇعا ايتۋعا ۋاقىت ٴبولىڭىز. ول ٴسىزدىڭ «جۇرەك سىرلارىڭىزدى» تىڭداعىسى كەلەدى (ٴزاب. 62:8). دۇعادا ونى داڭقتاڭىز، جاساعان بار جاقسىلىعىنا راقمەت ايتىڭىز. قىزمەتتە باتىل بولۋعا كومەك سۇراڭىز. باسىڭىزعا تۇسكەن قيىندىقتارعا توتەپ بەرۋگە، ازعىرۋلارعا بەرىلمەۋگە كۇش سۇراڭىز. ەحوباعا ۇدايى دۇعا ەتۋگە ەش نارسە دە، ەشكىم دە كەدەرگى بولماسىن. ال ەحوبا دۇعالارعا قالاي جاۋاپ بەرەدى؟ بۇل جايىندا كەلەسى ماقالادا بىلەمىز.
42-ٵن قۇداي قىزمەتشىسىنىڭ دۇعاسى
a ٴبىز دۇعالارىمىزدى اياۋلى دوسىمىزعا جازعان جۇرەكجاردى حاتتاي بولسا ەكەن دەيمىز. الايدا كەيدە دۇعا ايتۋعا ۋاقىت تاپپايمىز جانە نە ايتاتىنىمىزدى بىلمەي قينالامىز. بۇل ماقالادا وسى ەكى ماسەلەگە نازار اۋدارىلادى.
