24-زەرتتەۋ ماقالاسى
رۋحاني ماقساتىڭىزعا جەتە الاسىز!
«جاقسىلىق جاساۋدان ەش تالمايىق. سەبەبى شارشاپ قالماساق، ٶز ۋاقىتىندا ونىڭ ٶنىمىن ورامىز» (عال. 6:9).
84-ٵن كۇشىمىزدى اياماي بەرەيىك
اڭداتپا a
1. كوبىمىزگە نە قيىن؟
قويعان رۋحاني ماقساتىڭىزعا جەتۋ قيىن بولعان با؟ b ٴبىرازىمىزدا سولاي بولعان. مىسالى، فيليپ باۋىرلاس جيىرەك ٵرى تەرەڭ دۇعا ايتۋعا ماقسات قويعان، بىراق ەش ۋاقىت تابا الماعان. ال ەريكا باۋىرلاس بولسا ۋاعىزعا ارنالعان كەزدەسۋلەرگە كەشىكپەۋدى ماقسات ەتكەن. بىراق سول كەزدەسۋلەردىڭ بارلىعىنا دەرلىك كەشىگىپ بارعان. توماش باۋىرلاس كيەلى كىتاپتى باستان-اياق وقىپ شىعامىن دەپ بىرنەشە رەت بەل بۋادى. «مەن كيەلى كىتاپتى قىزىعىپ وقىمايتىنمىن. ونى تۇگەل وقۋعا ٷش رەت وقتالسام دا، ۇشەۋىندە دە مۇسانىڭ 3-جازباسىنا كەلىپ تىرەلىپ قالا بەرەتىنمىن»،— دەيدى ول.
2. رۋحاني ماقساتىمىزعا جەتە الماي جۇرسەك، نەگە ۇنجىرعامىزدى تۇسىرمەگەن ٴجون؟
2 قويعان رۋحاني ماقساتىڭىزعا ٵلى دە جەتە الماي كەلە جاتساڭىز، «مەنەن تۇك شىقپايدى» دەپ ويلاۋعا اسىقپاڭىز. سەبەبى كىشىگىرىم ماقساتتىڭ وزىنە دە جەتۋ وڭاي بولا بەرمەيدى. وعان كوپ كۇش پەن ۋاقىت كەرەك. ماقساتىڭىزعا ٵلى دە جەتكىڭىز كەلەتىنىنىڭ ٶزى ەحوبامەن دوس بولۋدى باعالايتىنىڭىزدى، وعان قولدا بار ەڭ جاقسىڭىزدى بەرگىڭىز كەلەتىنىن اڭعارتادى. ٶز ماقساتىڭىزدىڭ جولىندا ارەكەتتەنىپ جاتقانىڭىزعا ەحوبا كوكتەن سۇيسىنەدى جانە قولىڭىزدان كەلمەيتىندى ەشقاشان تالاپ ەتپەيدى (ٴزاب. 103:14؛ ميحا 6:8). سوندىقتان پاراساتتى بولىپ، قولجەتىمدى ماقساتتارعا ۇمتىلىڭىز. ال ماقساتىڭىز ونسىز دا سونداي بولسا، وعان جەتۋگە نە كومەكتەسەدى؟ قازىر سونىڭ جولدارىن بىلەيىك.
ىستىق ىقىلاس — العا سۇيرەيتىن كۇش
دۇعادا ىستىق ىقىلاس سۇراڭىز (3، 4-ابزاستاردى قاراڭىز)
3. ىستىق ىقىلاس بىزگە نە ٷشىن كەرەك؟
3 ىقىلاس بولماسا، رۋحاني ماقساتقا جەتۋ وتە قيىن. ويتكەنى ىستىق ىقىلاس — ادامدى ماقسات-مۇراتىنا جەتەلەيتىن مىقتى قالاۋ، قوزعاۋشى كۇش. ول جەلكەندى قايىقتى دىتتەگەن جەرىنە ايداپ اپاراتىن جەلگە ۇقسايدى. جەل ۇزدىكسىز سوقسا، قايىقشى مىندەتتى تۇردە كوزدەگەن مەكەنىنە جەتەدى. ال جەل قاتتى سوقسا، ول جىلدام جەتەدى. ٴبىزدىڭ دە ىقىلاسىمىز تاسىپ تۇرسا، وندا ماقساتىمىزعا مىندەتتى تۇردە جەتەمىز. سالۆادوردا تۇراتىن داۆيد بىلاي دەيدى: «قۇلشىنىسىڭ تاسىپ تۇرسا، تىنىش وتىرعىزبايدى ەكەن. ەشبىر كەدەرگىگە قاراماي، جانىڭدى سالىپ ۇمتىلا بەرەسىڭ». ەندەشە، ىقىلاسىمىزدى قالاي كۇشەيتسەك بولادى؟
4. دۇعادا نە سۇراساق بولادى؟ (فىلىپىلىكتەرگە 2:13) (سۋرەتتى دە قاراڭىز.)
4 دۇعادا ىقىلاس سۇراڭىز. كەيدە ٴبىز كەيبىر ماقساتتارعا ٶزىمىزدى مىندەتتى سەزىنگەندىكتەن ۇمتىلىپ جاتامىز، بىراق ەشقانداي ىقىلاسىمىز بولماۋى مۇمكىن. وندايدا ەحوبا سىزگە كيەلى رۋحىمەن ماقساتىڭىزعا جەتۋگە ىستىق ىقىلاس بەرە الادى (فىلىپىلىكتەرگە 2:13 وقىڭىز). مىسالى، ۋگاندادا تۇراتىن نورينا دەگەن ايەل باۋىرلاس كيەلى كىتاپ زەرتتەۋ ساباعىن باستاۋدى ماقسات ەتەدى. بىراق ول ۇستازدىق ەتۋگە جارامايمىن دەپ ويلاعاندىقتان، زەرتتەۋ ساباعىن باستاۋعا ىقىلاسى بولمايدى. ەحوبا وعان قالاي كومەكتەستى؟ نورينا بىلاي دەيدى: «مەن ەحوباعا كۇندە دۇعا ايتىپ، زەرتتەۋ ساباعىن باستاۋعا دەگەن قۇلشىنىسىمدى جالىنداتا كورشى دەپ سۇرادىم. كەيىن ٶز تاراپىمنان دا ارەكەت ەتىپ، ٴتالىم بەرۋ قابىلەتىمدى شىڭداي ٴتۇستىم. بىرنەشە اي وتە بايقاسام، ىقىلاسىم اجەپتەۋىر ارتىپ قالىپتى. سول جىلى ەكى اداممەن كيەلى كىتاپتى زەرتتەۋ ساباعىن باستادىم».
5. نە تۋرالى وي جۇگىرتكەنىمىز ىقىلاسىمىزدى ارتتىرادى؟
5 ەحوبانىڭ سىزگە جاساعان جاقسىلىقتارى تۋرالى ويلانىڭىز (ٴزاب. 143:5). ەلشى پاۋىل ەحوبانىڭ وعان تانىتقان راقىمى جايلى ويلانعاندىقتان، اۋىر ەڭبەك ەتۋگە تالپىنعان (قور. 1-ح. 15:9، 10؛ ٴتىم. 1-ح. 1:12—14). ٴسىز دە ەحوبانىڭ جاساعان جاقسىلىقتارى تۋرالى كوبىرەك ويلانساڭىز، ماقساتىڭىزعا جەتۋگە دەگەن قۇلشىنىسىڭىز ارتادى (ٴزاب. 116:12). گوندۋراستا تۇراتىن ٴبىر ايەل باۋىرلاس تۇراقتى ٸزاشار بولامىن دەگەن ماقساتىنا قالاي جەتتى؟ ول بىلاي دەيدى: «ەحوبا مەنى قانشالىقتى سۇيەتىنى جايلى ويلاندىم. ول مەنى ٶزىنىڭ حالقىنا قوستى جانە قامىمدى ويلاپ، قورعاپ كەلەدى. وسىلاي ويلانعاننىڭ ارقاسىندا ەحوباعا دەگەن سۇيىسپەنشىلىگىم تاسىپ، قويعان ماقساتىما جەتەم دەگەن ىقىلاسىم دا ارتا ٴتۇستى».
6. ىقىلاسىمىزدى ارتتىرۋعا تاعى نە كومەكتەسەدى؟
6 ماقساتىڭىزعا جەتكەندە توگىلەتىن باتالارعا نازار تىگىڭىز. كەشىكپەۋدى ماقسات ەتكەن ەريكا باۋىرلاس ەسىڭىزدە مە؟ ول بىلاي دەيدى: «ۋاعىزداۋ قىزمەتىنە ارنالعان كەزدەسۋگە كەشىكپەي باراتىن بولسام، باۋىرلاستارمەن امانداسىپ، ارالاسار ەدىم. سونداي-اق قىزمەتىمدى قۋانىشپەن اتقارۋعا، تيىمدىلىگىن ارتتىرۋعا كومەكتەسەتىن اقىل-كەڭەستەر ەستىر ەدىم. بىراق كەشىگىپ بارعاندىقتان، وسىنىڭ بارىنەن قۇر قالىپ جۇرگەن ەكەنمىن». وسىلاي ەريكا ۋاقىتىلى كەلۋدىڭ پايداسى جايلى ويلانعاندىقتان، قويعان ماقساتىنا جەتكەن ەكەن. ال ٴسىز ٶز ماقساتىڭىزعا جەتسەڭىز، قانداي باتالارعا كەنەلەسىز؟ مىسالى، ٴسىز كيەلى كىتاپ وقۋدى، دۇعاڭىزدى جاقسارتۋدى ماقسات ەتسەڭىز، ناتيجەسىندە ەحوبامەن دوستىعىڭىز قالاي نىعاياتىنىن ويلاڭىز (ٴزاب. 145:18، 19). ال قانداي دا ٴبىر قاسيەت دامىتۋعا ۇمتىلساڭىز، وزگەلەرمەن قارىم-قاتىناسىڭىز قالاي جاقساراتىنىن ويلاڭىز (قول. 3:14). قانداي دا ٴبىر ماقساتقا نە ٷشىن جەتكىڭىز كەلەتىنىن ٴتىزىپ جازىپ قويىڭىز. اراگىدىك سول تىزىمگە قاراپ تۇرىڭىز. ويتكەنى توماش باۋىرلاستىڭ ايتۋىنشا، «ماقساتىمىزعا نە ٷشىن جەتكىمىز كەلەتىنىنىڭ سەبەپتەرى نەعۇرلىم كوپ بولسا، وعان جەتۋ ٷشىن سوعۇرلىم كۇش سالا بەرەمىز».
7. حۋليو مەن ايەلىنە ماقساتتارىنا جەتۋگە نە كومەكتەستى؟
7 ىقىلاسىڭىزدى ارتتىراتىن ادامدارمەن ارالاسىڭىز (ناق. س. 13:20). حۋليو مەن ونىڭ ايەلى قىزمەت اياسىن كەڭەيتۋدى ماقسات ەتكەن. وسى ماقساتتارىنا جەتۋگە ولارعا دوستارى كومەكتەسكەن ەكەن. حۋليو بىلاي دەيدى: «ٴبىز العا قويعان ماقساتىمىزدى قولدايتىن، جىگەرىمىزدى قايرايتىن باۋىرلاستارمەن دوستاستىق. ولارمەن ماقساتىمىز جايلى سويلەسىپ تۇراتىنبىز. بىزدىكىندەي ماقساتقا جەتكەندەرى ٶز اقىلدارىن ايتىپ، تاجىريبەلەرىمەن بولىسەتىن. اراگىدىك جاعدايىمىزدى ٴبىلىپ، ماقساتىمىز جايلى سۇراپ تۇراتىن. رۋحىمىز ٴسونىپ بارا جاتسا، قاناتتاندىرىپ قوياتىن».
ىقىلاس بولماسا، قايتكەن دۇرىس؟
ماقساتىڭىزعا قاراي ارەكەتتەنىڭىز (8-ابزاستى قاراڭىز)
8. ىقىلاس پايدا بولعانىن كۇتىپ وتىرساق، ماقساتىمىزعا جەتە الامىز با؟ ٴتۇسىندىرىڭىز. (سۋرەتتى دە قاراڭىز.)
8 شىنى كەرەك، ماقساتقا جەتۋ ٷشىن ارەكەتتەنۋگە كەيدە ەش ىقىلاسىمىز بولماي تۇرادى. ىقىلاسىمىز بولماسا، ەندى ەشقايدا قوزعالا المايمىز دەگەن ٴسوز بە؟ جەلكەندى قايىق پەن جەل تۋرالى مىسالعا قايتا ورالايىقشى. جەل ەكپىندەپ سوقسا، قايىقتى دىتتەگەن جەرىنە قاراي ۇشىرىپ الا جونەلەدى. كەيدە ول باياۋلاۋ سوعىپ، ال كەيدە مۇلدەم تىمىرسىق بولىپ قالادى. سوندايدا قايىقشىلار جەل سوققانىن كۇتىپ، قول قۋسىرىپ وتىرا بەرە مە؟ ادەتتە قايىقتا جەلكەننەن بولەك، قوزعالتقىش نە ەسكەك بولادى. قايىقشى سولاردىڭ بىرەۋىن قولدانىپ، العان باعىتىنا قاراي جۇزە بەرەدى. جەل سياقتى ٴبىزدىڭ ىنتا-ىقىلاسىمىز دا بىردە تاسىسا، بىردە باسىلىپ قالادى. كەيبىر كۇندەرى ارەكەتتەنۋگە مۇلدەم زاۋقىمىز بولمايدى. سوندايدا شابىت كۇتىپ وتىرا بەرسەك، ماقساتىمىزعا سول كۇيى جەتپەي كەتۋىمىز مۇمكىن. سوندىقتان ماقساتىمىزدىڭ جولىندا تالاپتانىپ، ارەكەت ەتە بەرگەنىمىز ٴجون. بۇل ٷشىن، ارينە، ٶزىمىزدى تارتىپكە سالۋ كەرەك بولاتىن شىعار. بىراق كوپ ۇزاماي بۇنىڭ جاقسى جەمىسىن كورەسىز. تومەندە وسى جايىندا كەيبىر پايدالى كەڭەستەردى قاراستىرامىز، بىراق الدىمەن ٴبىر سۇراققا توقتالايىق.
9. ەشقانداي ىقىلاسىمىز بولماسا دا، ماقساتقا جەتۋ جولىندا ارەكەت ەتە بەرگەنىمىز دۇرىس پا؟
9 الايدا ەحوبا ٴبىزدىڭ وعان قۋانىشپەن قىزمەت ەتكەنىمىزدى قالايدى عوي (ٴزاب. 100:2؛ قور. 2-ح. 9:7). ەندەشە، قويعان رۋحاني ماقساتىمىزعا جەتۋگە ىقىلاسىمىز بولماسا دا، ٶزىمىزدى كۇشتەپ ارەكەتتەنگەنىمىز دۇرىس پا؟ مىسالعا ەلشى پاۋىلدى الايىقشى. ول: «دەنەمدى ۇرعىلاپ، وزىمە قۇل ىسپەتتى باعىندىرۋدامىن»،— دەگەن (قور. 1-ح. 9:25—27). دەمەك، پاۋىلدىڭ دۇرىس نارسەنى ىستەۋگە ەشقانداي قالاۋى بولماسا دا، ول ٶزىن تارتىپكە سالىپ، كۇشتەگەن. وسىلاي اتقارعان قىزمەتىنە ەحوبا ريزا بولدى ما؟ ارينە! ەحوبا ونىڭ قاجىرلى ەڭبەگىن جارىلقاپ، سي بەردى (ٴتىم. 2-ح. 4:7، 8).
10. ىقىلاسىمىز بولماعاندا دا كۇش سالا بەرۋدىڭ قانداي پايداسى بار؟
10 تۋرا سولاي، ىقىلاسىمىز بولماسا دا، ماقساتىمىزعا قاراي ۇمتىلىپ جاتقانىمىزدى كورىپ، ەحوبا بىزگە ريزا بولادى. سول ٸستىڭ ٶزىن سۇيمەي تۇرساق تا، ەحوبانى سۇيگەندىكتەن ارەكەت ەتىپ جاتقانىمىزعا ول قۋانادى. ەلشى پاۋىلدى جارىلقاعانداي، ەحوبا ٴبىزدىڭ دە ەڭبەگىمىزگە باتاسىن بەرەدى (ٴزاب. 126:5). ال ونىڭ باتاسىنا كەنەلگەندە، ىقىلاسىمىز ويانا باستايدى. پولشادا تۇراتىن ليۋسينا دەگەن ايەل باۋىرلاس بىلاي دەيدى: «كەيدە مەنىڭ، اسىرەسە شارشاپ تۇرعاندا، ۋاعىزعا شىعۋعا اياعىم تارتپاي تۇرادى. سوعان قاراماستان قىزمەتكە شىقسام، ەحوبادان سي الىپ قايتامىن، بۇل — قۋانىش سەزىمى». ەندەشە، ىقىلاسىمىز بولماعاندا ناقتى نە ىستەۋگە بولاتىنىن كورەيىك.
11. ەحوبا ۇستامدىلىعىمىزدى شىڭداۋعا قالاي كومەكتەسەدى؟
11 دۇعادا ۇستامدىلىق سۇراڭىز. ۇستامدىلىق ٶزىڭنىڭ سەزىمدەرىڭ مەن ارەكەتتەرىڭدى قاداعالاۋدى بىلدىرەدى. بۇل قاسيەت جاماندىققا بارماۋ ٷشىن عانا ەمەس، جاقسى ارەكەتتى ىستەۋ ٷشىن دە قاجەت. اسىرەسە ول ٸس قيىن بولسا نەمەسە ونى اتقارۋعا ىقىلاسىمىز بولماسا، ٶزىمىزدى قاداعالاۋ كەرەك بولىپ جاتادى. ۇستامدىلىق كيەلى رۋحتىڭ جەمىسىنە كىرەتىندىكتەن، بويىڭىزدا وسى قاسيەتتى دامىتۋعا ەحوبادان كيەلى رۋح سۇراڭىز (لۇقا 11:13؛ عال. 5:22، 23). جوعارىدا اتالىپ كەتكەن داۆيد باۋىرلاس وسىلاي ەتكەن. ول جۇيەلى تۇردە جەكە زەرتتەۋدى قولعا العىسى كەلگەن. «مەن ٶزىمدى قاداعالاي الۋ ٷشىن ەحوبادان ۇستامدىلىق سۇرادىم. ەحوبانىڭ كومەگىمەن وزىمە جەكە زەرتتەۋ باعدارلاماسىن قۇرىپ، سودان اينىماي كەلەمىن»،— دەيدى ول.
12. ۋاعىزداۋشى 11:4 تەگى ٴپرينسيپتىڭ رۋحاني ماقساتتارعا قانداي قاتىسى بار؟
12 ورايى تۇسكەنىن كۇتىپ وتىرماڭىز. مىنا دۇنيەدە ٴبارى كەرەمەت بولىپ، قولايلى جاعداي تۋاتىن كەز ەشقاشان بولمايدى. ونداي جاعدايدى كۇتىپ جۇرە بەرسەك، ماقساتىمىزعا سول كۇيى جەتە المايمىز (ۋاعىزداۋشى 11:4 وقىڭىز). دەنيەل دەگەن ەر باۋىرلاس بىلاي دەيدى: «ٴساتى تۋعانىن كۇتسەڭ، كۇتىپ جۇرە بەرەسىڭ. سوندىقتان ەشتەڭەگە قاراماي، باستاۋ كەرەك». ۋگاندادا تۇراتىن پول دەگەن ەر باۋىرلاس جوسپارلاعانىڭدى نەگە كەيىنگە ىسىرا بەرمەۋ كەرەكتىگىن تاعى بىلاي ٴتۇسىندىردى: «ەشبىر قيىندىققا قاراماستان باستاساڭ، ەحوبا قوشتاپ، ەڭبەگىڭە باتاسىن توگەدى. ال باستاماساق، ول نەنى قوشتايدى؟!» (مالح. 3:10).
13. از-ازدان باستاعاننىڭ پايداسى قانداي؟
13 از-ازدان باستاڭىز. نەگە كەيدە ماقساتىمىزعا قاراي جىلجۋعا ەش زاۋقىمىز سوقپايدى؟ ويتكەنى ول قول جەتپەس بيىك بەلەستەي كورىنەتىن شىعار. ەندەشە، ونى كىشىگىرىم بولشەكتەرگە ٴبولىپ تاستاڭىز. مىسالى، قانداي دا ٴبىر قاسيەت دامىتقىڭىز كەلسە، ونى كىشىگىرىم ىستەردە تانىتۋدان باستاڭىز. ال ەگەر كيەلى كىتاپتى تۇگەل وقىپ شىعۋدى ماقسات ەتسەڭىز، از-ازدان وقۋدان باستاساڭىز بولادى. كىرىسپە ابزاستاردا ايتىلعان توماش بىلاي دەيدى: «بۇكىل كيەلى كىتاپتى ٴبىر جىلدا وقىپ شىعامىن دەپ وزىمە تىم كوپ الىپ قويىپپىن. مەنىڭ وقۋ قارقىنىم ودان باياۋلاۋ ەكەن. ٴسۇيتىپ، مەن باسقاشا ادىسكە كوشتىم: كۇنىنە بىرنەشە ابزاس قانا وقىپ، وي جۇگىرتەتىن بولدىم. كەلە-كەلە ماعان وقۋ ۇناي باستادى». ىقىلاسى ارتقان سايىن، توماش كوبىرەك وقيتىن بولدى. اقىر سوڭىندا ول كيەلى كىتاپتى تۇگەل وقىپ ٴبىتىرىپ، ماقساتىنا جەتتى c.
ساتسىزدىككە ساعىڭىز سىنباسىن
14. ٴبىز قانداي ساتسىزدىكتەرگە ۇشىراۋىمىز مۇمكىن؟
14 ٴبىراق، مويىندايتىن ٴبىر جايت، ىقىلاسىمىز قانشا كۇشتى بولسا دا نە ٶزىمىزدى قانشا تارتىپكە سالساق تا، ماقساتقا جەتۋ جولىندا ساتسىزدىكتەر بولىپ تۇراتىنى راس. مىسالى، ٴبىر «كەزدەيسوق جاعدايعا» تاپ بولىپ، ماقساتىمىزعا ۋاقىت بولە الماي قالامىز (ۋاع. 9:11). نەمەسە باسىمىزعا ٴبىر قيىنشىلىق ٴتۇسىپ، كۇش-جىگەرىمىز تاۋسىلىپ جاتادى (ناق. س. 24:10). ال بىردە بويىمىزداعى پەندەشىلىك ماقساتىمىزعا جەتۋگە كەدەرگى بولىپ، اياقتان شالادى (ريم. 7:23). يا بولماسا دىڭكەمىز قۇرىپ، شارشاپ تۇرامىز (مات. 26:43). وسىنداي ساتسىزدىكتەرگە مويىماۋ ٷشىن نە ىستەۋىمىز كەرەك؟
15. ساتسىزدىكتەرگە بولا ماقساتىمىزبەن قوش ايتىسۋ كەرەك پە؟ ٴتۇسىندىرىڭىز. (ٴزابۇر 145:14)
15 ساتسىزدىكتەرگە بولا ماقساتىڭىزدان باس تارتپاڭىز. كيەلى كىتاپتا ٴبىزدى سۇرىندىرەتىن قيىندىقتار مەن كەدەرگىلەر قايتا-قايتا بولاتىنى ايتىلعان. بىراق وندا ەحوبانىڭ كومەگىمەن باس كوتەرىپ، قايتادان تۇرا الاتىنىمىز دا جازىلعان (ٴزابۇر 145:14 وقىڭىز). الدىندا ايتىلىپ كەتكەن فيليپ باۋىرلاس بىلاي دەيدى: «جەتىستىك دەگەنىڭ — ەش سۇرىنبەۋ دەگەن ٴسوز ەمەس. بۇل — سۇرىنسەڭ دە تۇرىپ، بەت العان جولىڭمەن ٵرى قاراي جۇرە بەرۋ». داۆيد باۋىرلاس بولسا بىلاي دەيدى: «ساتسىزدىكتەر مەنى توقتاتقانىن قالامايمىن. قايتا، بۇنى ەحوبانى سۇيەتىنىمدى دالەلدەۋدىڭ كەزى دەپ سانايمىن». سۇرىنگەن ساتتەرىڭىزگە قاراماي العا جىلجي بەرسەڭىز، ەحوباعا ۇنامدى بولعىڭىز كەلەتىنىن دالەلدەيسىز. بۇنى كورىپ، ەحوبا قاتتى قۋانادى!
16. ساتسىزدىكتەر نەنى اڭعارتۋى مۇمكىن؟
16 ساتسىزدىكتەردەن ساباق الىڭىز. ونىڭ نەدەن بولعانىن تۇسىنۋگە تىرىسىپ، قايتالاماۋ ٷشىن نە ىستەسەم بولادى دەپ ويلانىڭىز (ناق. س. 27:12). ال كەيبىر جاعدايلاردا ساتسىزدىكتەر قويعان ماقساتىمىزدىڭ شامامىزعا ساي ەمەس ەكەنىن كورسەتۋى مۇمكىن. وندايدا ماقساتىڭىزدى قايتادان سارالاپ كورىڭىز. بالكىم، ٴسىزدىڭ جاعدايىڭىزدا ول، راسىندا دا، قولجەتىمسىز شىعار d. ونداي ماقساتقا جەتپەگەنىڭىز ٷشىن ەحوبا ٴسىزدى ەش جازعىرمايدى (قور. 2-ح. 8:12).
17. بۇعان دەيىن جەتكەن ماقساتتاردى نەگە ەستە ۇستاۋ كەرەك؟
17 وسىعان دەيىنگى جەتىستىكتەرىڭىزگە قۋانىڭىز. كيەلى كىتاپتا: «قۇداي ادىلەتسىز ەمەس. ول اتقارعان... ەڭبەكتەرىڭدى ۇمىتپايدى»،— دەلىنگەن (ەۆر. 6:10). ەندەشە، بۇنى ٴسىز دە ۇمىتپاڭىز. وسىعان دەيىن قانشا ماقساتقا جەتكەنىڭىزدى ويلاڭىزشى. مىسالى، ەحوبامەن دوستاستىڭىز، باسقا ادامدارعا ول تۋرالى ايتتىڭىز جانە شومىلدىرۋ راسىمىنەن ٶتتىڭىز. سول ماقساتتارعا ۇمتىلىپ، تۇبىندە قول جەتكىزگەنىڭىزدەي، قازىرگى ماقساتىڭىزعا دا بىرتىندەپ جاقىنداي بەرەسىز (ٴفىلىپ. 3:16).
جول-جونەكەي قۋانا ٴبىلىڭىز (18-ابزاستى قاراڭىز)
18. ماقساتىمىزعا جەتۋ جولىندا نەنى نازاردان تىس قالدىرماۋ قاجەت؟ (سۋرەتتى دە قاراڭىز.)
18 قايىقشى تۇبىندە ٶزىنىڭ دىتتەگەن جەرىنە جەتەتىندەي، ەحوبانىڭ كومەگىمەن ٴسىز دە ٶز ماقساتىڭىزعا قول جەتكىزە الاسىز. بىلەسىز بە، قايىقشىلار جول-جونەكەي ساپارىنان دا ٴلاززات الادى ەكەن. تۋرا سولاي ٴسىز دە ماقساتىڭىزعا جەتۋ جولىندا ەحوبانىڭ ٴسىزدى قالاي قولداپ، باتاسىن بەرىپ جاتقانىن كورىپ، قۋانا ٴبىلىڭىز (قور. 2-ح. 4:7). العان بەتىڭىزدەن ەش قايتپاڭىز. تۇبىندە ٴسىزدى بۇدان دا زور باتالار كۇتىپ تۇر! (عال. 6:9).
126-ٵن ساق ٴجۇرىپ، اياعىڭدى نىق باس
a كوبىمىز رۋحاني ماقساتتارعا ۇمتىلامىز. بىراق كەيدە ماقسات قويۋىن قويعانمەن، جەتۋ قيىن بولىپ كەتەدى. وسىندايدا كومەكتەسەتىن قانداي جاقسى كەڭەستەر بار؟ قازىر سول تۋرالى بىلەيىك.
b ٴسوز ٴمانى: رۋحاني ماقسات — ەحوباعا كوبىرەك قىزمەت ەتۋ ٷشىن جانە ونى قۋانتۋ ٷشىن قول جەتكىزگىڭىز كەلەتىن يا جاقسارتقىڭىز كەلەتىن كەز كەلگەن نارسە. مىسالى، قانداي دا ٴبىر قاسيەتتى دامىتۋ نەمەسە كيەلى كىتاپتى وقۋ، جەكە زەرتتەۋ، ۋاعىزداۋ سياقتى عيباداتقا جاتاتىن ىستەردى شىڭداۋ.
c «تەوكراتيالىق قىزمەت مەكتەبىندە ٴبىلىم الامىز» كىتابىنىڭ 10، 11-بەتتەرىندەگى 5-ابزاستى قاراڭىز.
d 2008-جىل، 15-شىلدەدەگى «كۇزەت مۇناراسىنىڭ» (حانزۇشا) «اقىلعا قونىمدى ماقساتتار قويساڭ، قۋانىشتى بولاسىڭ» دەگەن ماقالاسىنان تولىعىراق بىلە الاسىز.
