23-زەرتتەۋ ماقالاسى
«ەحوبانىڭ جالىنىن» جالىنداتا بەرىڭىز!
«ماحاببات... جالىنى — لاۋلاعان وت، ەحوبانىڭ جالىنى» (تاڭ. ٵ. 8:6).
131-ٵن «قۇداي قوسقان جۇپتى»
اڭداتپا a
1. كيەلى كىتاپتا شىنايى ماحاببات نەمەن سالىستىرىلادى؟
«ماحاببات... جالىنى — لاۋلاعان وت، ەحوبانىڭ جالىنى. ماحابباتتى تاسقىن سۋلار وشىرە الماس، وزەندەر دە شايىپ جىبەرە الماس» b (تاڭ. ٵ. 8:6، 7). نە دەگەن تەڭەۋ! ٴيا، بۇدان ەرلى-زايىپتىلار مىناعان نىق سەنسە بولادى: ولاردىڭ ماحابباتتارى وتكىنشى ەمەس، باياندى بولا الادى.
2. ارالارى سالقىن تارتپاس ٷشىن ەرلى-زايىپتىلار نە ىستەۋ كەرەك؟
2 ەرلى-زايىپتىنىڭ ماحابباتى باياندى يا بايانسىز بولۋى وزدەرىنە بايلانىستى. مىسالى، دالادا وت جاعىپ وتىرساق، ول ٶشىپ قالماس ٷشىن وتىن سالىپ وتىرۋ كەرەك. ەشكىم وتىن سالماسا، وت سونەدى دە قالادى. نەكەدە دە ٴدال سولاي: ەرلى-زايىپتىنىڭ اراسىنداعى ماحاببات بەرىك ٵرى باياندى بولۋ ٷشىن، ولار وتىن سالىپ، قارىم-قاتىناستارىن نىعايتىپ وتىرۋ كەرەك. بىراق كەيدە ەرلى-زايىپتىنىڭ اراسى سالقىن تارتۋى مۇمكىن. بۇعان اقشا مەن دەنساۋلىق ماسەلەسى، بالا ٶسىرىپ، تاربيەلەۋدىڭ قيىندىقتارى سەبەپ بولىپ جاتادى. ولاي بولسا، نەكەدە «ەحوبانىڭ جالىنى» وشپەي، جانىپ تۇرۋ ٷشىن نە ىستەۋگە بولادى؟ بۇل ماقالادا اراڭىزدى جاقىنداتاتىن، باقىتىڭىزدى ارتتىراتىن ٷش نارسەنى قاراستىرامىز c.
ەحوبامەن دوستىقتارىڭىز نىعايا بەرسىن
جۇبايلار ٴجۇسىپ پەن ٴماريامعا ەلىكتەپ، ەحوبامەن قارىم-قاتىناستارىن نىعايتا بەرۋلەرى قاجەت (3-ابزاستى قاراڭىز)
3. ەحوبامەن دوستىقتارى بەكەم ەرلى-زايىپتىنىڭ نەلىكتەن ماحابباتى بەرىك بولادى؟ (ۋاعىزداۋشى 4:12) (سۋرەتتى دە قاراڭىز.)
3 «ەحوبانىڭ جالىنى» جالىنداپ تۇرۋ ٷشىن كۇيەۋى مەن ايەلى كۇش سالىپ، ەحوبامەن قارىم-قاتىناستارىن نىعايتىپ وتىرۋ كەرەك. نەلىكتەن؟ ويتكەنى جۇبايلار ٷشىن ەحوبامەن دوستىقتارى قۇندى بولسا، ونىڭ كەڭەستەرىنە قۇلاقتارى تۇرىك بولادى. ال كەڭەستەرىن قولدانسا، جارى ەكەۋىنىڭ اراسىن سۋىتاتىن قيىندىقتاردىڭ الدىن الادى، ال قيىندىق تۋعان جاعدايدا، شەشۋگە تىرىسادى (ۋاعىزداۋشى 4:12 وقىڭىز). سونداي-اق رۋحاني ادام ەحوباعا ەلىكتەيدى جانە ٶز بويىندا وعان ٴتان قاسيەتتەردى جەتىلدىرەدى (ەفەس. 4:32—5:1). ال ەگەر ەرلى-زايىپتى ٴبىر-بىرىنە مەيىرىمدى، شىدامدى، كەشىرىمدى بولسا، البەتتە ولاردىڭ ماحابباتى كوركەيە تۇسەدى. تۇرمىس قۇرعانىنا 25-جىلدان اسقان لينا بۇل ويدى بىلاي دەپ تۇيىندەدى: «رۋحاني ادامدى ٴسۇيۋ دە، قۇرمەتتەۋ دە وڭاي».
4. نەگە ەحوبا ٴماسىحتىڭ اتا-اناسى ەتىپ ٴجۇسىپ پەن ٴماريامدى تاڭدادى؟
4 قازىر كيەلى كىتاپتاعى ٴبىر وقيعانى كورەيىكشى. ەحوبا ماسىحكە اتا-انا بولاتىن ەرلى-زايىپتىنى ىزدەگەندە، نەگە ٴداۋىتتىڭ ۇرپاقتارىنىڭ ىشىنەن ٴدال ٴجۇسىپ پەن ٴماريامدى تاڭدادى؟ ويتكەنى ەكەۋىنىڭ دە ەحوبامەن جەكە دارا قارىم-قاتىناسى بولدى. نەكەگە تۇرعان سوڭ دا، ەحوباعا دەگەن سۇيىسپەنشىلىكتەرى بارىنەن بيىك تۇراتىنىن ول ٴبىلدى. جۇبايلار، سىزدەر ٴجۇسىپ پەن ٴماريامنان نە ۇيرەنە الاسىزدار؟
5. كۇيەۋلەر جۇسىپتەن نە ۇيرەنسە بولادى؟
5 ەحوبا نە ايتسا، ٴجۇسىپ سونى بۇلجىتپاي ورىنداعان. ونى جاقسى كۇيەۋ قىلعان دا — وسى قاسيەتى. ەحوبا وعان وتباسىنا قاتىستى، كەم دەگەندە، ٷش رەت نۇسقاۋ بەرگەن. بۇل ٷشىن ۇلكەن وزگەرىستەر جاساۋ كەرەك بولسا دا، ول سونىڭ ٴبارىن ەكى ايتقىزباي ورىندادى (مات. 1:20، 24؛ 2:13—15، 19—21). قۇلاق اسقاننىڭ ارقاسىندا ول ٴماريامعا قورعانىش، تىرەنىش جانە قامقورشى بولدى. ونىڭ ىستەرىن كورگەن ٴماريامنىڭ وعان دەگەن ماحابباتى مەن قۇرمەتى ارتىپ كەتكەن شىعار! قىمباتتى كۇيەۋلەر، وتباسىنا قاتىستى كەڭەستەردى كيەلى كىتاپتان ىزدەپ تابىڭىزدار، وسىلاي جۇسىپكە ەلىكتەيسىزدەر d. ٴبىراز وزگەرىستەردەن ٶتۋ كەرەك بولسا دا، سول كەڭەستەرگە قۇلاق اسساڭىز، جارىڭىزدى سۇيەتىنىڭىزدى كورسەتەسىز، شاڭىراعىڭىزدى دا بەرىك ەتەسىز. وتاسقانىنا 20-جىلدان اسقان، ٶزى ۆانۋاتۋدا تۇراتىن ٴبىر ايەل باۋىرلاس بىلاي دەيدى: «جولداسىم اقىل-كەڭەستى ەحوبادان ىزدەپ، سونى ورىنداعاندا، كوز الدىمدا ابىرويى وسەدى. ونىڭ شەشىمى دۇرىس ەكەنىنە سەنەمىن، سوندىقتان دا كوڭىلىم تىنىش».
6. ايەلدەر ٴماريامنان نە ۇيرەنسە بولادى؟
6 ٴماريامنىڭ بولسا ەحوبامەن ٶز الدىنا دوستىعى بولعان. كۇيەۋىنە تاۋەلدى بولماي، ٶز سەنىمىن ٶزى نىعايتىپ وتىرعان. ول جازبالاردى جاقسى بىلگەن e (لۇقا 1:46). وي جۇگىرتۋگە دە ۋاقىت بولگەن (لۇقا 2:19، 51). وسىنداي رۋحانيلىعىنىڭ ارقاسىندا ول تاماشا ايەل بولدى. بۇگىندە دە ٴماريامعا ەلىكتەيتىن رۋحاني ايەلدەر كوپ. مىسالى، ەميكو باۋىرلاس بىلاي دەيدى: «بويداق كەزىمدە مەنىڭ ٶز رۋحاني كەستەم بولاتىن. بىراق كۇيەۋگە شىققان سوڭ، وعان قاتتى سەنىم ارتىپ كەتتىم. ويتكەنى دۇعانى ايتاتىن دا، وتباسىلىقتى وتكىزەتىن دە — سول. بىراق ۋاقىت وتە ەحوبامەن دوستىعىمدى نىعايتۋ ٶز جاۋاپكەرشىلىگىمدە ەكەنىن ٴتۇسىندىم. ٴسۇيتىپ، ٶزىم جەكە دۇعا ايتۋعا، جازبالاردى وقىپ، وي جۇگىرتۋگە ارنايى ۋاقىت بولەتىن بولدىم» (عال. 6:5). اياۋلى ايەلدەر، ەحوبامەن دوستىقتارىڭىزدى وركەندەتىپ، وسىرە بەرىڭىزدەر. سوندا كۇيەۋلەرىڭىزدىڭ ماقتاۋى مەن ماحابباتىنا ودان بەتەر بولەنەسىزدەر (ناق. س. 31:30).
7. جۇبايلار بىرگە عيبادات ەتكەن ٴجۇسىپ پەن ٴماريامنان نە ۇيرەنسە بولادى؟
7 ٴجۇسىپ پەن ٴماريام ەكەۋى بىرلەسىپ، ەحوبامەن قارىم-قاتىناستارىن بىرگە نىعايتقان. ويتكەنى ولار ەحوباعا وتباسى بولىپ عيبادات ەتۋدىڭ وتە ماڭىزدى ەكەنىن تۇسىنگەن (لۇقا 2:22—24، 41؛ 4:16). وتباسىلارى ۇلكەيگەن سايىن بۇلاي ەتۋ قيىن بولسا دا، ولار ايتەۋىر ٴبىر امالىن تاباتىن. ٴجۇسىپ پەن ٴماريام بۇگىندەگى ەرلى-زايىپتىلار ٷشىن ناعىز ۇلگى تۇتارلىق جۇپ! سىزدەر دە بالالى-شاعالى بولساڭىزدار، جينالىپ، قاۋىمعا بارىپ-كەلۋ، ۋاقىتىلى وتباسىلىق وتكىزۋ وڭاي ەمەس شىعار. ال ەكەۋىڭىزگە جۇپ بولىپ وتىرىپ دۇعا ەتۋگە، زەرتتەۋگە ۋاقىت تابۋ تىپتەن قيىن بولار. بىراق بۇل — ۋاقىت تابۋعا تاتيتىن نارسە. ويتكەنى ەحوباعا جۇپ بولىپ عيبادات ەتسەڭىز، وعان جانە ٴبىر-بىرىڭىزگە جاقىنداي تۇسەسىز. ولاي بولسا، عيبادات ارقاشان باستى ورىندا تۇرسىن.
8. ارالارى سۋىپ جۇرگەن جۇپتار وتباسىلىق عيباداتتى بارىنشا پايدالى وتكىزۋ ٷشىن نە ىستەي الادى؟
8 ال ەگەر ارالارىڭىز ونشا بولماي جۇرسە شە؟ وتباسىلىق عيباداتتى بىرگە وتكىڭىز كەلمەيتىن شىعار. مۇندايدا نە ىستەي الاسىزدار؟ كىشكەنە-كىشكەنەدەن باستاڭىزدار. ەكەۋىڭىزگە دە ۇنايتىن قىسقا دا قىزىقتى تاقىرىپتاردى تاڭداڭىز. سوندا ارالارىڭىز قايتا جىلىپ، رۋحاني ىستەردى بىرگە ىستەۋگە تابەتتەرىڭىز اشىلادى.
بىرگە ۋاقىت وتكىزىڭىزدەر
9. نەگە كۇيەۋى مەن ايەلى ٴبىر-بىرىمەن ۋاقىت وتكىزۋلەرى ٴتيىس؟
9 ەرلى-زايىپتىلار، ارالارىڭىزداعى ماحاببات جالىنداپ تۇرۋ ٷشىن بىرگە ۋاقىت وتكىزۋ دە قاجەت. سوندا ٴبىر-بىرىڭىزدەن الشاقتاماي، جارىڭىز نە ويلاپ، نە سەزىنىپ جۇرگەنىن ٴبىلىپ جۇرەسىز (مۇس. 1-ج. 2:24). 15 جىلداي بۇرىن وتاسقان ليليا مەن رۋسلان ۇيلەنگەن سوڭ كوپ ۇزاماي-اق ٴبىر نارسەنى بايقاپتى: «ٴبىز ٶزىمىز ويلاعانداي بىرگە كوپ ۋاقىت وتكىزە المايتىنىمىزدى تۇسىندىك. جۇمىس، ٷيدىڭ شارۋاسى، كەيىن بالا-شاعا كوپ ۋاقىتىمىزدى الىپ قوياتىن. سودان ٴبىر-بىرىمىزگە ۋاقىت تاپپاساق، جىراقتاپ كەتەتىن ٴتۇرىمىز بار ەكەنىن تۇسىندىك».
10. ەفەستىكتەرگە 5:15، 16 داعى ٴپرينسيپتى جۇبايلار قالاي قولدانسا بولادى؟
10 ەرلى زايىپتىلار ٴبىر-بىرىمەن ۋاقىت وتكىزۋ ٷشىن نە ىستەۋلەرى كەرەك؟ ول ٷشىن ارنايى ۋاقىت ٴبولىپ، جوسپارلاۋ كەرەك شىعار (ەفەستىكتەرگە 5:15، 16 وقىڭىز). نيگەريادا تۇراتىن ۋزوندۋ ەسىمدى وتاعاسى بىلاي دەيدى: «مەن ىستەرىمدى جوسپارلاعاندا، ايەلىممەن وتكىزەتىن ۋاقىتتى مىندەتتى تۇردە بەلگىلەپ قويامىن. بۇل ۋاقىت مەن ٷشىن بارىنەن ماڭىزدى» (ٴفىلىپ. 1:10). ال مولدوۆادا تۇراتىن اۋداندىق باقىلاۋشىنىڭ ايەلى اناستاسيا ۋاقىتىن قالاي ٴتيىمدى پايدالاناتىنىن ايتىپ بەردى. «جولداسىم ٶز قىزمەتىن اتقارىپ جۇرگەن كەزدە، مەن ٶز شارۋالارىمدى ٴبىتىرىپ الامىن. ٴسۇيتىپ، ول بوساعاندا، مەن دە بوساپ، ەكەۋىمىز بىرگە ۋاقىت وتكىزەمىز»،— دەيدى ول. ال ۋاقىتتارىڭىز مۇلدەم سايكەس كەلمەي جاتسا، نە ىستەۋ كەرەك؟
ەكەۋىڭىز نەنى بىرلەسىپ ىستەسەڭىزدەر بولادى؟ (11، 12-ابزاستاردى قاراڭىز)
11. اقيلا مەن پريسكيلا قانداي ىستەردى بىرگە ىستەگەن؟
11 اقيلا مەن پريسكيلا جۇبايلارعا وتە جاقسى ۇلگى. بۇل جۇپتى العاشقى ماسىحشىلەر جانىنداي جاقسى كورگەن (ريم. 16:3، 4). كيەلى كىتاپتا ولاردىڭ نەكەلەرى جايلى كوپ ايتىلمايدى. بىراق ٴبىر بىلەتىنىمىز — ولار بىرگە جۇمىس ىستەگەن، ۋاعىزداعان جانە وزگەلەرگە بىرگە كومەكتەسكەن (ەل. ٸس. 18:2، 3، 24—26). تاعى ٴبىر ايتا كەتەرلىك جايت، كيەلى كىتاپتا اقيلانىڭ ەسىمى جۇرەتىن جەردە ٵردايىم پريسكيلانىڭ دا ەسىمى جۇرەدى.
12. بىرگە كوبىرەك ۋاقىت وتكىزۋ ٷشىن ەرلى-زايىپتى نە ىستەسە بولادى؟ (سۋرەتتى دە قاراڭىز.)
12 جۇبى جازىلماعان اقيلا مەن پريسكيلادان ەرلى-زايىپتىلار نە ۇيرەنسە بولادى؟ ٴسىزدىڭ اتقاراتىن ىستەرىڭىز بار، جارىڭىزدىڭ اتقاراتىن ٶز ىستەرى بار. سولاردىڭ قايسىسىن سىزدەر جەكە ەمەس، بىرلەسىپ ىستەي الاسىزدار؟ مىسالى، اقيلا مەن پريسكيلا بىرگە ۋاعىزداعان. سىزدەر دە جوسپارلاپ، بىرگە ۋاعىزعا شىعىپ تۇراسىزدار ما؟ اقيلا مەن پريسكيلا بىرگە جۇمىس ىستەگەن. ەكەۋىڭىز ٴبىر جەردە جۇمىس ىستەمەسەڭىز دە، نەگە ٷيدىڭ تىرلىگىن بىرگە ىستەمەسكە؟ (ۋاع. 4:9) بىرىگىپ ٴبىر ٸستى بىتىرگەندە، سىزدەر جۇمىلعان جۇدىرىقتاي بولاسىزدار، سويلەسۋدىڭ دە ورايى تۋادى. روبەرت پەن ليندانىڭ نەكەلەسكەنىنە 50 جىلدان استى. روبەرت بىلاي دەيدى: «ەكەۋمىز بىرگە دەمالاتىنداي ۋاقىتىمىز كوپ ەمەس. بىراق ٴبىز باسقا نارسەلەردى بىرگە ىستەيمىز. مەن ىدىس-اياق جۋىپ تۇرسام، ايەلىم قاسىمدا ٴسۇرتىپ تۇرادى. باقشادا ٴشوپ جۇلىپ وتىرسام، ايەلىم قاسىما كەلىپ، بىرگە ىستەسەدى. مەن سوعان قاتتى قۋانامىن، ويتكەنى سونداي ساتتەردە ماحابباتىمىز كۇشەيەدى».
13. ەرلى-زايىپتىلار ٴبىر-بىرىنە جاقىنداي ٴتۇسۋ ٷشىن جاي عانا بىرگە بولۋلارى جەتكىلىكتى مە؟
13 الايدا، ٴبىر ەسكەرەتىن جايت، ارالارىڭىزدى جاقىنداتا ٴتۇسۋ ٷشىن جاي عانا بىرگە بولۋ جەتكىلىكسىز. برازيليادا تۇراتىن ٴبىر ايەل بىلاي دەيدى: «قازىر كوڭىلىڭدى الاڭداتاتىن نارسەلەر وتە كوپ. سونداي كەزدە ٶزىمىزدى الداپ، «بىرگەمىز عوي، ٴبىر ۇيدە تۇرىپ جاتىرمىز عوي» دەپ ويلاۋىمىز مۇمكىن. بىراق بۇل قاتە وي ەكەن. بىرگە بولعانمەن، كوڭىلىڭ باسقا جاقتا بولسا، ول دا بولمايدى. سوندىقتان مەن جارىما ٴتيىستى كوڭىل ٴبولۋىم كەرەك ەكەن». ەرلى-زايىپتى برۋنو مەن تايز ٴبىر-بىرىنە كوڭىل بولۋگە تىرىسادى. كۇيەۋى بىلاي دەيدى: «ٴبىز بوس ۋاقىتىمىزدى بىرگە وتكىزگەن كەزدە ۇيالى تەلەفونىمىزدى ارى قويىپ، بار كوڭىلىمىزدى ٴبىر-بىرىمىزگە ارنايمىز».
14. ەرلى-زايىپتىلار بىرگە ۋاقىت وتكىزۋدى ونشا ۇناتپاسا، نە ىستەۋگە بولادى؟
14 ال ٴبىر-بىرىڭىزبەن ۋاقىت وتكىزۋ ۇناماسا شە؟ مۇمكىن سىزگە ۇنايتىن نارسە وعان ۇنامايتىن شىعار. نەمەسە ٴبىر-ٴبىرىڭىزدىڭ قىلىقتارىڭىزدى كوتەرە المايتىن شىعارسىز. مۇندايدا نە ىستەۋگە بولادى؟ وت جايلى مىسالعا ورالايىقشى. وت بىردەن لاۋلاپ جانىپ كەتپەيدى. وتتى تۇتاندىرۋ ٷشىن الدىمەن مايدا شىبىقتاردى تاستايمىز، ال ودان كەيىن ۇلكەندەۋ اعاشتاردى سالامىز. تۋرا سولاي، سىزدەر دە از-ازدان بىرگە ۋاقىت وتكىزۋدەن باستاڭىز. ەكەۋىڭىزدى ۇرىستىراتىن ەمەس، ەكەۋىڭىزگە دە ۇنايتىن ىستەرمەن اينالىسىڭىز (جاق. 3:18). وسىلاي بىرتە-بىرتە ماحابباتتارىڭىز قايتا مازدايدى.
سيلاستىقتارىڭىز جوعالماسىن
15. نە سەبەپتى نەكەدە قۇرمەت اۋاداي قاجەت؟
15 وت الاۋلاپ جانىپ تۇرۋ ٷشىن وعان وتتەگى كەرەك. تۋرا سولاي نەكەدە دە قۇرمەت اۋاداي قاجەت. وتتەگى بولماسا وتتىڭ لاپىلى تەز-اق ٶشىپ قالاتىنداي، نەكەدە دە ەكەۋارا قۇرمەت جوعالسا، ماحاببات تەز-اق سۋىپ كەتەدى. ال ٴبىر-بىرىنە قۇرمەت پەن سيلاستىق تانىتۋعا تىرىساتىن ەرلى-زايىپتىلار ارالارىنداعى ماحاببات وتىن سوندىرمەي، جالىنداتىپ وتىرادى. الايدا ٴسىز جارىڭىزدى قۇرمەتتەيمىن دەپ ويلاعانىڭىزبەن، جارىڭىز سونداي ويدا ما؟ ول ٴسىزدىڭ قۇرمەتىڭىزدى سەزە مە؟ ماسەلە وسىدا. وتاۋ قۇرعاندارىنا 25 جىلداي بولعان پەنني مەن ارەتتى تىڭداپ كورەيىكشى. ايەلى پەنني بىلاي دەيدى: «ارامىزداعى سيلاستىقتىڭ ارقاسىندا ٷيىمىز ماحاببات ورىن تەپكەن جىلى ۇياداي. ٴبىر-ٴبىرىمىزدىڭ وي-پىكىرىمىزدى قۇرمەتتەيتىندىكتەن، ۇيدە ٴبىز ٶز ويىمىزدى ەمىن-ەركىن ايتا الامىز». ەندەشە، جۇبايىڭىز ٴسىز ٷشىن سيلى ەكەنىن قالاي بىلدىرە الاسىز؟ ىبىرايىم مەن سارانىڭ ۇلگىسىنە كوڭىل بولەيىك.
ەر باۋىرلاس ايەلىن قۇلاق قويىپ تىڭداسا — سيلاعانى (16-ابزاستى قاراڭىز)
16. ىبىرايىم كۇيەۋلەرگە قانداي ۇلگى قالدىردى؟ (پەتىردىڭ 1-حاتى 3:7) (سۋرەتتى دە قاراڭىز.)
16 ىبىرايىم ايەلى سارانى قالاي سيلاي بىلگەن؟ ول ونىڭ ويىن ەسكەرىپ، سەزىمدەرىن ەلەگەن. بىردە ساراعا ٴبىر جاعداي قاتتى اۋىر ٴتيىپ، ول بار سەزىمىن ىبىرايىمعا جايىپ سالادى. ٴتىپتى ونى كىنالاپ جىبەرەدى. سوندا ىبىرايىم ىزاعا بوي الدىرىپ، وعان دۇرسە قويا بەردى مە؟ جوق، ول نەگىزى ٶز ايەلىنىڭ مويىنسۇنعىش، كۇيەۋىنە قولداۋ كورسەتەتىن ايەل ەكەنىن بىلەتىن. سوندىقتان ونى مۇقيات تىڭداپ، تۋىنداعان ماسەلەنى شەشۋگە تىرىستى (مۇس. 1-ج. 16:5، 6). ىبىرايىمنان نە ۇيرەنسەك بولادى؟ قۇرمەتتى وتاعالارى، ارينە، سىزدەردە وتباسىنا قاتىستى شەشىم قابىلداۋعا بيلىك بار (قور. 1-ح. 11:3). الايدا شەشىم قابىلداماس بۇرىن، اسىرەسە ول جۇبايىڭىزعا دا قاتىستى بولسا، ونىڭ پىكىرىن ەلەپ-ەسكەرگەنىڭىز قانداي كەرەمەت بولار ەدى! (قور. 1-ح. 13:4، 5). ال كەي كەزدەرى ايەلىڭىز سترەسكە ٴتۇسىپ، قينالىپ كەتكەندىكتەن، سىزگە ىشىندەگىسىن شىعارىپ العىسى كەلۋى مۇمكىن. سوندايدا ونىڭ سەزىمدەرىن سيلاپ، قۇلاق قويىپ تىڭدايسىز با؟ (پەتىردىڭ 1-حاتى 3:7 وقىڭىز). انجەلا مەن ٴدميترييدىڭ نەكەلەسكەنىنە 30 جىلداي بولىپ قالعان ەكەن. انجەلا بىلاي دەيدى: «كوڭىل كۇيىم بولماسا نەمەسە جاي عانا سويلەسكىم كەلىپ تۇرسا، دميتريي مەنى ارقاشان دا تىڭداۋعا دايىن. كەيدە ٴتىپتى ەموسياعا قاتتى بەرىلىپ كەتسەم دە، ول مەنى سابىرمەن تىڭداي بىلەدى». وسىلاي ول كۇيەۋىنىڭ وزىنە دەگەن قۇرمەتىن سەزەدى.
17. ايەلدەر سارادان نە ۇيرەنسە بولادى؟ (پەتىردىڭ 1-حاتى 3:5، 6)
17 ال سارا ىبىرايىمدى سيلايتىنىن قالاي كورسەتتى؟ ونىڭ شەشىمدەرىن قولداي ٴبىلدى (مۇس. 1-ج. 12:5). مىسالى، بىردە ىبىرايىم كۇتپەگەن جەردەن ٴبىر كىسىلەردى ۇيگە قوناق قىلۋدى شەشەدى. ٴسۇيتىپ، ايەلىنە ىستەپ جاتقان تىرلىگىن تاستاپ، شارا-شارا نان ٴپىسىرۋدى تاپسىرادى (مۇس. 1-ج. 18:6). سوندا سارا وعان بىردەن مويىنسۇنىپ، بىلەك سىبانا ىسكە كىرىسىپ كەتەدى. اياۋلى ايەلدەر، سىزدەر دە ساراعا ەلىكتەپ، كۇيەۋلەرىڭىزدىڭ شەشىمىن قولداي بىلىڭىزدەر. وسىلاي ەتسەڭىز، شاڭىراعىڭىزدى بەرىك ۇستايسىز (پەتىردىڭ 1-حاتى 3:5، 6 وقىڭىز). الدىنداعى ابزاستا ايتىلىپ كەتكەن دميتريي ايەلىنىڭ قۇرمەتىن قالاي سەزەدى ەكەن؟ «انجەلاعا ٴبىر ريزا بولاتىنىم، ەكەۋمىزدىڭ ويىمىز ٴبىر جەردەن شىقپاسا دا، ول مەنىڭ شەشىمدەرىمدى قۇپتاپ، مويىنسۇنۋعا تىرىسادى. ال كەيىن شەشىمىمنىڭ كەم تۇستارى شىعىپ جاتسا، ول مۇنى بەتىمە باسپايدى»،— دەيدى ول. سەنى قۇرمەتتەپ، سيلاپ تۇرعان ايەلدى قالايشا سۇيمەيسىڭ؟!
18. ارالارىنداعى ماحاببات وتىن جالىنداتا بەرسە، جۇبايلار قانداي جەمىسىن كورەدى؟
18 شايتان ماسىحشىلەردىڭ نەكەسىندەگى ماحاببات وتىن ٴسوندىرىپ تاستاعىسى كەلەدى. نەگە؟ ويتكەنى ەكەۋىنىڭ اراسى سۋي باستاسا، ولار تۇبىندە ەحوبادان دا اجىراپ كەتۋى مۇمكىن. ەندەشە، ارالارىڭىزداعى ماحاببات ٴدايىم تاڭداۋلى اندە ايتىلعان ماحابباتتاي بولسىن! مۇنداي شىنايى ماحابباتتى ەشكىم سوندىرە المايدى. ولاي بولسا، نەكەلەرىڭىزدە ەحوبانى باستى ورىنعا قويىڭىز. ٴبىر-بىرلەرىڭىزگە ۋاقىت تابىڭىز جانە جۇبايلارىڭىزدىڭ سەزىمدەرى مەن قاجەتتىلىكتەرىن ەلەپ، قۇرمەتتەي ٴبىلىڭىز. سوندا نەكەلەرىڭىز شىنايى ماحابباتتىڭ باستاۋى ەحوباعا ماداق اكەلەدى ٵرى ارالارىڭىزداعى ماحاببات وتى قاراۋسىز قالماي، ماڭگى باقي جالىنداي بەرەدى.
132-ٵن «ەندى ٴبىز ٴبىر ٴبۇتىنبىز»
a نەكە — ەحوبانىڭ ادامزاتقا سيلاعان كەرەمەت سيى. ويتكەنى نەكەدە ەكى ادام ٴبىر-بىرىنە ەرەكشە ماحابباتتارىن ٴبىلدىرىپ، ونى سەزىنە الادى. ايتسە دە كەيدە ەرلى-زايىپتىنىڭ اراسى سۋىپ كەتۋى مۇمكىن. نەكەدە بولساڭىز، وسى ماقالاداعى كەڭەستەر سىزگە ماحابباتىڭىزدى جانداندىرۋعا جانە باقىتتى بولۋعا كومەكتەسەدى.
b تۇراقتى ٵرى باياندى شىنايى ماحاببات كيەلى كىتاپتا «ەحوبانىڭ جالىنى» دەپ اتالعان، ويتكەنى مۇنداي ماحابباتتىڭ باستاۋى — ەحوبا.
c جارىڭىز كۋاگەر بولماسا دا، وسى ماقالاداعى كەڭەستەردىڭ ٴسىزدىڭ نەكەڭىزگە دە پايداسى ٴتييۋى مۇمكىن (قور. 1-ح. 7:12—14؛ پەت. 1-ح. 3:1، 2).
d ماسەلەن، jw.org سايتىندا جانە ®JW Library قوسىمشاسىندا «وتباسىڭىز بەرەكەلى بولسىن» اتتى ماقالالار توپتاماسى بار. سول جاقتان پايدالى كەڭەستەر تابا الاسىز.
