25-زەرتتەۋ ماقالاسى
اقساقالدار، گەدەوننان ۇلگى الىڭىزدار
«گەدەون... جايىندا ايتۋعا ۋاقىتىم جەتپەس ەدى» (ەۆر. 11:32).
124-ٵن ٵردايىم ادالدىق تانىتايىق
اڭداتپا a
1. پەتىردىڭ 1-حاتى 5:2 گە ساي، اقساقالدارعا قانداي مارتەبەلى ٸس جۇكتەلگەن؟
ەحوبا ٶزىنىڭ اسا باعالى قوي-قوشاقاندارىن ادال ٴماسىحشى اقساقالدارعا سەنىپ تاپسىرعان. ولار باۋىرلاستارىنا قىزمەت ەتۋدى مارتەبە سانايدى جانە «شىن قامقور باعۋشى» بولۋعا بارلارىن سالادى (ەرم. 23:4؛ پەتىردىڭ 1-حاتى 5:2 وقىڭىز). قاۋىمىمىزدا وسىنداي قامقور ەر باۋىرلاستاردىڭ بارىنا وتە ريزامىز!
2. اقساقالداردا قانداي قيىندىقتار بولۋى مۇمكىن؟
2 باعۋشىنىڭ قىزمەتىن اتقارۋ اقساقالدار ٷشىن وڭاي ەمەس. بۇنىڭ ٴبىر سەبەبى — ولاردىڭ اتقاراتىن ٸسى باستان اسادى. اقش-تا قىزمەت ەتەتىن توني دەگەن اقساقالعا جۇمىستىڭ ٴبارىن وزىنە الا بەرمەي، قاراپايىم بولۋدى ۇيرەنۋ كەرەك بولدى. «19-COVID پاندەمياسى باستالعاندا، كەزدەسۋلەردى جانە ۋاعىزدى ۇيىمداستىرۋمەن بايلانىستى تىرلىكتەردىڭ ٴبارىن ٶز موينىما الىپ الدىم. قانشا نارسە ىستەسەڭ دە، جۇمىستىڭ سوڭى كورىنبەيتىن. سودان كيەلى كىتاپتى وقۋىم، جەكە زەرتتەپ، دۇعا ەتۋىم جايىنا قالدى». كوسوۆودا تۇراتىن يلير دەگەن اقساقال باسقا جاعىنان قينالدى. سوعىس ايماعىندا جۇرگەن كەزدە وعان ۇيىمنىڭ باسشىلىعىنا مويىنسۇنۋ وڭاي بولمادى. «فيليال قاۋىپتى ايماقتاعى باۋىرلاستارعا كومەكتەسۋ كەرەكتىگىن ايتقاندا، مۇنداي باتىل ىسكە بارۋ ماعان ۇلكەن سىن بولدى. سەبەبى بەرگەن نۇسقاۋلارى ٴتيىمسىز بولىپ كورىندى ٵرى ٶزىم دە قورقىپ تۇردىم»،— دەيدى ول. ال ازيادا قىزمەت ەتەتىن تيم دەگەن ميسسيونەر جوسپارىنداعى كۇندەلىكتى ىستەردى اتقارامىن دەپ شارشاپ قالعان ەكەن. «مەنىڭ جۇيكەم توزىپ، ابدەن قاجىپ كەتكەن كەزدەرىم بولدى»،— دەيدى ول. وسى اقساقالداردىكىندەي كۇيدە جۇرگەن ەر باۋىرلاستارعا نە كومەك بولادى؟
3. گەدەون بي جايلى قاراستىرعاننىڭ ٴبارىمىز ٷشىن قانداي پايداسى بار؟
3 يسرايل ەلىنە بي بولعان گەدەون اقساقالدارعا تاماشا ۇلگى (ەۆر. 6:12؛ 11:32). ول قۇداي حالقىن كوپ قاۋىپ-قاتەردەن قورعاعان جانە ولارعا باعۋشى بولعان (بي. 2:16؛ شەج. 1-ج. 17:6). گەدەوننىڭ كەزىندەگىدەي، قازىرگى اۋمالى-توكپەلى زاماندا دا اقساقالدار قۇداي وتارىن باعۋعا تاعايىندالعان (ەل. ٸس. 20:28؛ ٴتىم. 2-ح. 3:1). ولار گەدەوننىڭ قاراپايىمدىلىعىنان، كىشىپەيىلدىلىگىنەن جانە مويىنسۇنعىشتىعىنان كوپ نارسە ۇيرەنەدى. وزىنە تاپسىرىلعان مىندەتتىڭ ٴبارىن اتقارۋ ٷشىن وعان دا قاجىرلىق كەرەك بولدى. ونىڭ ۇلگىسىن قاراستىرا وتىرىپ، اقساقالداردىڭ ەڭبەگى قانشالىقتى باعالى ەكەنىن كورەمىز. ەحوبانىڭ قويلارى ٷشىن جانىن سالىپ جۇرگەن وسى باۋىرلاستاردى ٴارقايسىسىمىز قولداپ-دەمەۋگە اسىق بولايىق (ەۆر. 13:17).
قاراپايىمدىلىق پەن كىشىپەيىلدىلىك سىنالعاندا
4. نەگە گەدەون قاراپايىم دا كىشىپەيىل بولعان دەپ ايتا الامىز؟
4 گەدەون قاراپايىم دا كىشىپەيىل جان بولعان b. ەحوبانىڭ پەرىشتەسى وعان كەلىپ، ٴيسرايلدى مادياندىقتاردىڭ ەزگىسىنەن قۇتقاراتىنىن ايتقاندا، گەدەون كىشىپەيىلدىلىكپەن: «مەنىڭ اۋلەتىم ماناسا رۋىنىڭ ىشىندە ەڭ كىشىگى. ٶزىم دە اكەمنىڭ ۇيىندە ەڭ كىشىگىمىن»،— دەدى (بي. 6:15). ول ٶزىن مۇنداي مىندەت الۋعا قابىلەتسىز ساناعانمەن، ەحوبا باسقاشا ويلادى، ويتكەنى بۇل ونىڭ قولىنان كەلەتىنىن ٴبىلدى. ەحوبانىڭ قولداپ-قۋاتتاۋىمەن ول ٶز تاپسىرماسىن كەرەمەت اتقارىپ شىقتى.
5. اقساقالداردىڭ قاراپايىمدىلىعى مەن كىشىپەيىلدىلىگى قالاي سىنالۋى مۇمكىن؟
5 اقساقالدار بارلىق جاعىنان قاراپايىم دا كىشىپەيىل بولۋعا تىرىسادى (ميحا 6:8؛ ەل. ٸس. 20:18، 19). مىسالى، قابىلەتتەرىن، جەتىستىكتەرىن ايتىپ ماقتانبايدى. يا بولماسا قاتە-كەمشىلىكتەرىن قاتتى ۋايىمداپ، ٴتۇڭىلىپ تە كەتپەيدى. بىراق كەي جاعدايلاردا ولاردىڭ وسى قاسيەتتەرى سىنالىپ جاتادى. ماسەلەن، اقساقال يىعىنا كوپ جۇك ارتىپ السا، ٴبارىن اتقارا الماي، قينالىپ قالۋى مۇمكىن. نەمەسە اتقارعان قانداي دا ٴبىر تاپسىرماسىن باۋىرلاستار سىناپ-مىنەۋى نە، كەرىسىنشە، ماقتاۋى مۇمكىن. وسىنداي جاعدايلاردا اقساقالدار گەدەونعا قالاي ەلىكتەسە بولادى؟
ادەبيەت ارباسىمەن ۋاعىزداۋدى ۇيىمداستىرعاندا نە باسقا ىستەردە قاراپايىم اقساقال گەدەونعا ەلىكتەپ، كومەك سۇراۋعا دايىن بولادى (6-ابزاستى قاراڭىز)
6. اقساقالدار گەدەوننىڭ قاراپايىمدىلىعىنان قانداي ۇلگى الادى؟ (سۋرەتتى دە قاراڭىز.)
6 كومەك سۇراڭىز. قاراپايىم ادام نە نارسەگە شاماسى جەتەتىنىن، ال نە نارسەگە جەتپەيتىنىن ەسكەرەدى. گەدەون قاراپايىم بولعاندىقتان وزگەلەردىڭ كومەگىنە جۇگىنگەن (بي. 6:27، 35؛ 7:24). پاراساتتى اقساقالدار دا سولاي ەتەدى. الدىندا ايتىلىپ كەتكەن توني باۋىرلاس بىلاي دەيدى: «مەن كىشكەنتاي كەزىمنەن، شامام جەتسىن-جەتپەسىن، جۇمىستىڭ ٴبارىن وزىمە الىپ ۇيرەنىپ قالعان ەكەنمىن. سوندىقتان وتباسىلىق عيباداتتا قاراپايىمدىلىق قاسيەتىن زەرتتەۋدى شەشتىم. وسى ورايدا ايەلىمنىڭ دە ويىن سۇرادىم. كەيىن jw.org تور بەكەتىنەن «يسا پايعامبار سياقتى باسقالاردى ۇيرەتىپ، سەنىم ارتىپ، جاۋاپكەرشىلىكپەن بولىسە بىلەيىك» دەگەن ۆيدەونى كوردىم». سودان توني باۋىرلاس باسقالاردان جاردەم سۇراپ، جۇمىسىن ۇلەستىرە باستادى. بۇل قانداي جەمىس اكەلدى؟ «قازىر قاۋىمنىڭ دا ىستەرى تىندىرىلىپ جاتىر جانە وزىمە دە رۋحاني كۇش جيناۋعا ۋاقىت قالدى»،— دەيدى ول.
7. بىرەۋ ايىپ تاققاندا، اقساقالدار گەدەونعا قالاي ەلىكتەسە بولادى؟ (جاقىپ 3:13)
7 ٴسىزدى ايىپتاعاندا، سابىرمەن جاۋاپ بەرىڭىز. بىرەۋلەر كىنا تاعىپ، ايىپتاسا، بۇل دا اقساقالداردىڭ كىشىپەيىلدىلىگى مەن قاراپايىمدىلىعىنا سىن. وسىنداي ٴبىر جاعدايدا گەدەون قالاي ارەكەت ەتكەنىنە كوڭىل بولەيىكشى. ەفرەمدىكتەر كەلىپ، اشۋلانىپ، وعان ايىپ تاققاندا، گەدەون ولارعا سابىرمەن جاۋاپ بەردى، ويتكەنى ٶزىنىڭ دە قاتەلەسەتىنىن تۇسىنسە كەرەك (بي. 8:1—3). ول اشۋعا بەرىلمەي، ەفرەمدىكتەردى كىشىپەيىلدىلىكپەن تىڭدادى. ولارعا مەيىرىممەن سويلەپ، سابالارىنا ٴتۇسىردى. وزگەلەر ايىپتاپ جاتسا، دانا اقساقالدار دا سابىرمەن تىڭداپ، ىزەتپەن جاۋاپ بەرەدى (جاقىپ 3:13 وقىڭىز). وسىلاي قاۋىمنىڭ ىنتىماعىن ساقتايدى.
8. باۋىرلاستار ماقتاعاندا، اقساقالدار قالاي ارەكەت ەتكەندەرى ٴجون؟ مىسال كەلتىرىڭىز.
8 ماداقتى ەحوباعا جاۋدىرىڭىز. مادياندىقتاردى جەڭگەنى ٷشىن يسرايلدىكتەر گەدەوندى ماقتاپ، سي-قۇرمەتكە بولەگەندە، ول ەحوباعا نازار اۋداردى (بي. 8:22، 23). تاعايىندالعان ەر باۋىرلاستار ودان نە ۇيرەنەدى؟ ولار جەتكەن جەتىستىكتەرى ٷشىن ەحوبانى ماقتاۋلارى كەرەك (قور. 1-ح. 4:6، 7). مىسالى، باۋىرلاستار اقساقالدى كەرەمەت ٴتالىم بەرەتىنى ٷشىن ماقتاسا، ول سول ٴتالىمنىڭ قۇداي سوزىنەن الىنعانىنا جانە ەحوبانىڭ ۇيىمىنان ۇيرەنىپ جاتقانىنا كوڭىل بۇرسا بولادى. اراگىدىك اقساقالدار قالاي ٴتالىم بەرىپ جۇرگەندەرى جايلى ويلانىپ تۇرعاندارى دۇرىس، ويتكەنى ولار سوزىمەن جۇرتتى تامساندىرۋدى ويلاپ كەتۋى مۇمكىن. تيماتي دەگەن باۋىرلاس اقساقال بولىپ تاعايىندالعاندا، كوپشىلىككە ارنالعان بايانداما ايتۋدى قاتتى ۇناتقان ەكەن. «مەن كىرىسپە سوزىمە كوپ ٴمان بەرىپ، كۇردەلى مىسالدار كەلتىرەتىنمىن. باياندامادان سوڭ باۋىرلاستار ادەتتە تەك سولاردى ايتىپ ماقتايتىن. سودان ولاردىڭ نازارى كيەلى كىتاپ پەن ەحوباعا ەمەس، ماعان اۋىپ كەتەتىن»،— دەيدى ول. كەيىن تيماتي بايانداما ايتۋ ٵدىسىن وزگەرتۋ كەرەكتىگىن ٴتۇسىندى (ناق. س. 27:21). قازىر باۋىرلاستار ونىڭ بايانداماسى تۋرالى قانداي ويدا؟ تيماتي بىلاي دەيدى: «ەندى باۋىرلاستار بايانداماداعى ويلاردىڭ ەحوباعا جاقىنداتا تۇسكەنىن، سىناقتا ادالدىق ساقتاۋعا جانە قيىندىققا توتەپ بەرۋگە كومەكتەسكەنىن ايتىپ بولىسەدى. مەنى ماقتاعاننان گورى وسىنداي لەبىز ايتقاندارى كوبىرەك قۋانتادى ەكەن».
مويىنسۇنۋ مەن باتىل بولۋ قيىن بولعاندا
گەدەون ايتقانعا مويىنسۇنىپ، اسكەرىنىڭ سانىن قىسقارتتى دا، بايقامپازدىق تانىتقان 300 ٸن عانا تاڭداپ الدى (9-ابزاسىن قاراڭىز)
9. قانداي جاعدايلاردا گەدەونعا باتىلدىق پەن مويىنسۇنعىشتىق قاجەت بولدى؟ (مۇقاباداعى سۋرەتتى قاراڭىز.)
9 گەدەون بي بولىپ تاعايىندالعاننان كەيىن وعان باتىلدىق پەن مويىنسۇنعىشتىق تانىتۋ كەرەك بولدى. ەحوبا وعان اكەسىنىڭ باعالعا ارناپ جاساعان قۇرباندىق ورنىن قيراتۋدى تاپسىردى. بۇنى ورىنداۋ ٷشىن ول باسىن قاتەرگە تىگۋ كەرەك ەدى (بي. 6:25، 26). ال كەيىن ەحوبا وعان جيناعان اسكەرىنىڭ سانىن ەكى رەت قىسقارتىپ تاستاۋدى ايتادى (بي. 7:2—7). سوسىن وعان ٴتۇننىڭ ٴبىر ۋاعىندا جاۋدىڭ قوسىنا شابۋىلداۋدى بۇيىرادى (بي. 7:9—11).
10. قانداي جاعدايلاردا اقساقالعا مويىنسۇنۋ قيىن بولۋى مۇمكىن؟
10 اقساقالدار «مويىنسۇنۋعا دايىن» بولۋلارى كەرەك (جاق. 3:17). مويىنسۇنعىش اقساقال جازبالاردا ايتىلعاندارعا جانە ۇيىمنىڭ باسشىلىعىنا بىردەن قۇلاق اسۋىمەن بارىنە ۇلگى كورسەتەدى. بىراق مويىنسۇنۋ قيىن جاعدايلار دا بولادى. مىسالى، نۇسقاۋلار بىرىنەن سوڭ ٴبىرى كەلىپ جاتسا يا باسشىلىق بىردەن وزگەرىپ كەتسە، ولارعا قۇلاق اسۋ وڭاي ەمەس شىعار. بالكىم، نۇسقاۋلاردىڭ كەيبىرى اقساقالعا ٴتيىمسىز بولىپ كورىنەر، يا بولماسا باس بوستاندىعىنا قاۋىپ توندىرەتىن تاپسىرما الار. وسىنداي جاعدايلاردا اقساقالدار گەدەون سياقتى قالاي مويىنسۇنعىش بولا الادى؟
11. اقساقالدارعا مويىنسۇنعىش بولۋ ٷشىن نە ىستەۋ كەرەك؟
11 نۇسقاۋلارعا مۇقيات بولىپ، قۇلاق اسىڭىز. قۇداي گەدەونعا اكەسىنىڭ قۇرباندىق ورنىن قالاي قيراتۋ كەرەكتىگىن، ەحوباعا ارنالعان قۇرباندىق ورنىن قايدا سوعۋ كەرەكتىگىن جانە قانداي مال شالۋ كەرەكتىگىن ناقتى ايتتى. گەدەون ايتىلعانعا بىردەن قۇلاق استى، دۇرىستىعىنا كۇماندانىپ جاتپادى. بۇگىندە اقساقالدار ەحوبانىڭ ۇيىمىنان ٴبىزدىڭ رۋحاني جانە تاندىك ساۋلىعىمىزبەن بايلانىستى ٴتۇرلى نۇسقاۋلار، حاتتار مەن حابارلاندىرۋلار الىپ تۇرادى. سونىڭ بارىنە ادالدىقپەن قۇلاق اسىپ جۇرگەندەرى ٷشىن ٴبىز اقساقالداردى جاقسى كورەمىز. ولاردىڭ مويىنسۇنعاندارى بۇكىل قاۋىم ٷشىن يگى (ٴزاب. 119:112).
12. ەحوبانىڭ ۇيىمىندا وزگەرىستەر بولعاندا، اقساقالدار ەۆرەيلەرگە 13:17 گە قالاي قۇلاق اسسا بولادى؟
12 وزگەرىستەرگە بەيىمدەلىڭىز. ەحوبا گەدەونعا اسكەرىنىڭ 99 پايىزدان دا استامىن قىسقارتۋدى ايتقانى ەسىڭىزدە مە؟ (بي. 7:8). گەدەون: «بۇلاي ەتۋدىڭ نە قاجەتى بار؟ تۇك شىقپاي قالسا شە؟»— دەپ ۋايىمداعان بولار. بىراق ول ٴبارىبىر دە مويىنسۇندى. بۇگىندە اقساقالدار ۇيىمداعى وزگەرىستەرگە بەيىمدەلسە، گەدەونعا ەلىكتەيدى (ەۆرەيلەرگە 13:17 وقىڭىز). مىسالى، پاتشالىق سارايى مەن كونگرەسس سارايىنىڭ قۇرىلىس جوبالارىن قارجىلاندىرۋمەن بايلانىستى 2014-جىلى بولعان وزگەرىستى الايىقشى (قور. 2-ح. 8:12—14). بۇرىندارى قانداي دا ٴبىر جەردە پاتشالىق سارايىن نە كونگرەسس سارايىن سوعۋ كەرەك بولسا، جەرگىلىكتى قاۋىم ۇيىمنان قارىزعا اقشا الىپ، كەيىن قايتارىپ بەرەتىن. ال ەندى، عيمارات سوعۋ ٷشىن قاۋىمدار اقشانى بۇكىل دۇنيەجۇزىندەگى قاۋىمداردىڭ ساداقاسىنان الادى ٵرى بۇل قاراجاتتى قايتارۋدىڭ قاجەتى جوق. وسى جاڭا شارانىڭ ارقاسىندا قاۋىم ٶز قاراجاتى از بولسا دا، عيبادات ورىندارىن تۇرعىزا الادى. باسقارۋشى كەڭەستەن كەلگەن وسى وزگەرىس جايلى بىلگەندە، حوسە دەگەن ەر باۋىرلاس بۇدان تۇك شىقپايدى دەپ ويلايدى. «ٴبىزدىڭ جاققا مۇنداي ٵدىس مۇلدەم تۋرا كەلمەيدى. بۇنداي تۇرىمىزبەن بىردە-ٴبىر پاتشالىق سارايى سوعىلمايدى»،— دەپ ويلادى ول. حوسەگە ويىن تۇزەپ، وزگەرىستى قولداۋعا نە كومەكتەستى؟ «ناقىل سوزدەر 3:5، 6 ەحوباعا سەنىم ارتۋىم كەرەكتىگىن ەسكە ٴتۇسىردى. قازىر بۇل وزگەرىستىڭ كەرەمەت جەمىسىن كورىپ جاتىرمىز. ەندى بۇرىنعىدان دا كوپ پاتشالىق سارايىن سوعا الامىز جانە دۇنيەجۇزى بويىنشا ساداقانى تەڭ بولىسكەننىڭ ارقاسىندا بۇنىڭ يگىلىگىن ٴبارىمىز كورىپ جاتىرمىز»،— دەيدى حوسە.
ىسىمىزگە تيىم سالىنسا دا، باتىل بولساق، جاقسى كۋالىك بەرە الامىز (13-ابزاستى قاراڭىز)
13. ا) گەدەون نە نارسەگە سەنىمدى بولدى؟ ٵ) اقساقالدار گەدەونعا قاي جاعىنان ەلىكتەيدى؟ (سۋرەتتى دە قاراڭىز.)
13 ەحوبانىڭ ەركىن ورىنداۋ ٷشىن باتىل بولىڭىز. گەدەون قورىقسا دا، ومىرىنە قاۋىپ ٴتونىپ تۇرسا دا، ەحوباعا مويىنسۇندى (بي. 9:17). ەحوبا ونى قولدايتىنىنا تولىق كوزى جەتكەندىكتەن، ول قۇدايدىڭ حالقىن قورعاي الاتىنىنا سەنىمدى بولدى. ىسىمىزگە تيىم سالىنعان ەلدەردە تۇراتىن اقساقالدار دا گەدەونعا ۇقسايدى. ولاردى تۇتقىنداپ، تەرگەپ، ۇرىپ-سوعۋى يا جۇمىستان ايىرۋى مۇمكىن بولسا دا، ولار باتىلدىقپەن قاۋىم كەزدەسۋلەرىن ۇيىمداستىرىپ، ۋاعىز ىسىنە جەتەكشىلىك ەتەدى c. زور الاپاتتا دا اقساقالدارعا باتىلدىق قاجەت بولادى. ويتكەنى قاۋىپتى بولسا دا، ولارعا كەيبىر نۇسقاۋلارعا مويىنسۇنۋ كەرەك بولادى. ول نۇسقاۋلار بۇرشاق سياقتى اۋىر حاباردى جاريالاۋمەن جانە ماگوگ جەرىندەگى گوگتىڭ شابۋىلىنان امان وتۋمەن بايلانىستى بولۋى مۇمكىن (ەزەك. 38:18؛ ايان 16:21).
قاجىرلىق كەرەك بولعاندا
14. گەدەونعا نەگە قاجىرلىق قاجەت بولدى؟
14 گەدەونعا بي بولىپ قىزمەت ەتۋ ٷشىن كوپ كۇش پەن قاجىرلىق قاجەت بولدى. تۇندە شايقاس ٴجۇرىپ جاتقاندا مادياندىقتار قاشىپ كەتىپ، گەدەون ەزرەحەل اڭعارىنان سوناۋ يوردان وزەنىنە دەيىن سوڭدارىنان قۋادى. ال يورداندى بويلاي بۇتالار كوپ وسسە كەرەك (بي. 7:22). گەدەون سول جەرگە كەلىپ، توقتاپ قالدى ما؟ جوق، ول 300 ساربازىمەن شارشاپ تۇرسا دا، يورداندى كەسىپ ٶتىپ، جاۋدىڭ سوڭىنان قۋا بەردى. اقىرىندا قۋىپ جەتىپ، مادياندىقتاردى تاس-تالقان ەتتى (بي. 8:4—12).
15. اقساقالدارعا قاجىرلى بولۋ كەيدە نەگە قيىن؟
15 كەيدە اقساقال قاۋىمنىڭ جانە ٶز وتباسىنىڭ قامىن جاسايمىن دەپ جانى دا، ٴتانى دە قالجىراپ، جۇيكەسى شارشاۋى مۇمكىن. وسىنداي كەزدەرى ول گەدەوننان قانداي ۇلگى السا بولادى؟
قامقور اقساقالدار كومەككە مۇقتاج باۋىرلاستاردى نىعايتا الادى (16، 17-ابزاستاردى قاراڭىز)
16، 17. گەدەونعا تاباندى بولۋعا نە كومەكتەستى جانە اقساقالدار نە نارسەگە سەنىمدى بولا الادى؟ (يشايا 40:28—31) (سۋرەتتى دە قاراڭىز.)
16 ەحوبانىڭ كۇشىنە ارقا سۇيەڭىز. گەدەون ەحوبا وعان كۇش دارىتاتىنىنا سەنىم ارتىپ ەدى، ەحوبا ونىڭ سەنىمىن اقتادى (بي. 6:14، 34). بىردە گەدەون مەن ساربازدارى ەكى مادياندىق پاتشانىڭ سوڭىنان جاياۋ قۋادى، ال ولار تۇيەلەرىنە ٴمىنىپ قاشسا كەرەك (بي. 8:12، 21). بىراق قۇدايدىڭ كومەگىمەن يسرايلدىكتەر ولاردى ٴبارىبىر قۋىپ جەتىپ، شايقاستا جەڭىپ شىعادى. اقساقالدار دا ەش «شارشامايتىن، قاجىمايتىن» ەحوباعا ارقا سۇيەسە بولادى. ەحوبا ولارعا قاجەت كەزىندە كۇش دارىتادى (يشايا 40:28—31 وقىڭىز).
17 اۋرۋحانالارمەن بايلانىس كوميتەتىندە قىزمەت ەتەتىن مەتيۋ باۋىرلاس جايلى ٴسوز قوزعايىق. ول نەنىڭ ارقاسىندا وسى قىزمەتىن تالماي اتقارىپ ٴجۇر؟ مەتيۋ بىلاي دەيدى: «بۇدان ٵرى كوتەرە المايمىن دەپ ويلاپ، كۇشىم سارقىلعان كەزدەر تالاي بولدى. سونداي كەزدەرى قۇدايعا جالبارىنىپ، باۋىرلاستارىما كومەكتەسۋ ٷشىن كۇش بەرشى، جۇيكەمدى مىقتى ەتشى دەپ سۇرايتىنمىن. سوندا فىلىپىلىكتەرگە 4:13 تەگى سوزدەردىڭ راس ەكەنىن سەزىنەتىنمىن. ەحوبانىڭ رۋحى بويىما قۋات دارىتىپ، قىزمەتىمدى تاباندىلىقپەن جالعاستىرا بەردىم». گەدەون سياقتى باعۋشىلىق قىزمەتتەرىنە شىن بەرىلگەن جانقيار اقساقالدارىمىز دا كەدەرگىلەر مەن قيىندىقتارعا كەزىگىپ جاتادى. ارينە، ولار فيزيكالىق جانە ەموسيالىق كۇشتەرىنىڭ شەگىن ٴبىلىپ، شامالارىن ەسكەرۋ كەرەك. دەسە دە ەحوبادان كۇش سۇراپ دۇعا ايتسا، ول قۇلاق اسىپ، ولاردى نىعايتاتىنىنا سەنىمدى بولا الادى (ٴزاب. 116:1؛ ٴفىلىپ. 2:13).
18. قورىتا كەتسەك، اقساقالدار گەدەوننان قانداي ۇلگى الادى؟
18 بايقاعانىمىزداي، اقساقالداردىڭ گەدەوننان ۇيرەنەرى وتە كوپ. مىسالى، موينىنا قانشا جاۋاپكەرشىلىك الاتىنىن شەشكەندە جانە بىرەۋلەر ماقتاعاندا نە ايىپتاعاندا، ولار قاراپايىمدىلىق پەن كىشىپەيىلدىلىك تانىتۋلارى كەرەك. وسى زاماننىڭ سوڭى جاقىنداعان سايىن، ولار مويىنسۇنعىش ٵرى باتىل بولۋلارى قاجەت. سونداي-اق قانداي كەدەرگى يا قيىندىق بولماسىن، قۇداي ولارعا كۇش بەرەتىنىنە سەنىمدى بولعاندارى ٴجون. وسىنداي ەڭبەكتەرى ەرەن باعۋشىلارىمىزدى ٴبىز قاتتى باعالايمىز ٵرى قۇرمەتتەيمىز (ٴفىلىپ. 2:29).
120-ٵن ٴماسىح سياقتى جۇمساق بولىڭدار
a يسرايل حالقىنىڭ تاريحىنداعى اۋىر كەزەڭدە ەحوبا گەدەونعا ٴبىر مىندەت جۇكتەدى. ول قۇدايدىڭ حالقىنا باعۋشى بولىپ، ولاردى جاۋدان قورعاۋ كەرەك ەدى. تالاي قيىندىققا قاراماستان، گەدەون ٶزىنىڭ مىندەتىن 40 جىل بويى ادال اتقاردى. بۇگىندە قۇدايدىڭ وتارىن باعۋ قيىنعا سوققاندا، اقساقالدار گەدەوننان قانداي ۇلگى السا بولادى؟ قازىر سول تۋرالى بىلەمىز.
b قاراپايىمدىلىق پەن كىشىپەيىلدىلىك ٴبىر-بىرىنە وتە ۇقساس قاسيەتتەر. قاراپايىم ادام ٶزى تۋرالى اسقاق ويلامايدى، ٶزىنىڭ شاما-شارقىن دا جاقسى بىلەدى. كىشىپەيىل ادام بولسا باسقالاردى وزىنەن جوعارى قويىپ، ٶزىن كىشى تۇتادى (ٴفىلىپ. 2:3). قاراپايىم ادام كىشىپەيىل دە بولادى.
c 2019-جىل، شىلدە ايىنداعى «كۇزەت مۇناراسىنىڭ» «ىسىمىزگە تيىم سالىنسا دا، ەحوباعا عيبادات ەتە بەرەيىك!» دەگەن ماقالاسىن قاراڭىز (10، 11-ب.، 10—13-ابز.)
