26-زەرتتەۋ ماقالاسى
ەحوبانىڭ كۇنىنە دايىن ٴجۇرىڭىز
«ەحوبانىڭ كۇنى تاپ ۇرىنىڭ تۇندە تۇسەتىنى سياقتى كەلەدى» (سال. 1-ح. 5:2).
143-ٵن قىزمەت ەتەيىك، سەرگەك جۇرەيىك، كۇتەيىك
اڭداتپا a
1. ەحوبانىڭ كۇنىنەن امان ٶتۋ ٷشىن نە ىستەۋىمىز قاجەت؟
كيەلى كىتاپتا «ەحوبانىڭ كۇنى» دەپ ەحوبا جاۋلارىن جازالاپ، ال ٶز حالقىن قۇتقارىپ قالاتىن كەزىن ايتادى. بۇرىنعى زاماندا ەحوبا جاۋلارىن جازالاپ، كۇل-تالقان ەتكەن (يشايا 13:1، 6؛ ەزەكيەل 13:5؛ سافونيا 1:8). ال ٴبىزدىڭ كەزىمىزدە «ەحوبانىڭ كۇنى» ساياسي جەتەكشىلەردىڭ ۇلى بابىلعا شابۋىلداۋىمەن باستالىپ، ارماگەددون شايقاسىمەن اياقتالادى. سول «كۇننەن» امان ٶتۋ ٷشىن بىزگە قازىردەن باستاپ دايىندالۋ كەرەك. يسا دا زور الاپاتقا «دايىن بولىڭدار» دەپ ۇيرەتكەن. بۇل تىركەس ٴبىر رەت قانا ەمەس، ۇنەمى دايىن ٴجۇرۋدى بىلدىرەدى (مات. 24:21؛ لۇقا 12:40).
2. نەلىكتەن سالونيكالىقتارعا 1-حاتتىڭ ٴبىز ٷشىن پايداسى زور؟
2 ماسىحشىلەردى ەحوبانىڭ سوتتايتىن كۇنىنە دايىن جۇرۋگە تالپىندىرۋ ٷشىن، ەلشى پاۋىل سالونيكالىقتارعا 1-حاتىندا بىرنەشە تەڭەۋ كەلتىرگەن. ارينە، ەحوبانىڭ كۇنى ٴدال سول ۋاقىتتا كەلمەيتىنىن پاۋىل بىلگەن (سال. 2-ح. 2:1—3). سوندا دا ول باۋىرلاستارىن سول كۇن تۋرا ەرتەڭ كەلەتىندەي دايىن جۇرۋگە شاقىرعان. ونىڭ بەرگەن كەڭەستەرىنىڭ ٴبىز ٷشىن دە ماڭىزى زور. ەندەشە، ەلشى پاۋىلدىڭ 1) ەحوبانىڭ كۇنى قالاي كەلەتىنى، 2) ول كۇنى كىم امان قالمايتىنى، 3) قۇتقارىلۋعا قالاي دايىن بولۋ كەرەكتىگى جايلى ايتقاندارىن قاراستىرايىق.
ەحوبانىڭ كۇنى قالاي كەلەدى؟
ەلشى پاۋىل سالونيكالىقتارعا 1-حاتىن جازعاندا، بىزگە جاقسى ساباق بولاتىن مىسالداردى كەلتىرگەن (3-ابزاستى قاراڭىز)
3. ەحوبانىڭ كۇنى قاي ماعىنادا تۇندە تۇسەتىن ۇرى سياقتى كەلەدى؟ (سۋرەتتى دە قاراڭىز.)
3 «ۇرىنىڭ تۇندە تۇسەتىنى سياقتى» (سال. 1-ح. 5:2). ەحوبانىڭ كۇنى قالاي كەلەتىنى ٷش ٴتۇرلى نارسەگە تەڭەلگەن، سونىڭ ٴبىرىنشىسى — وسى. ۇرىلار ادەتتە ٴتۇن جامىلىپ، ەشكىم كۇتپەگەن ۋاقىتتا كەلەدى ٵرى جىلدام-جىلدام قيمىلدايدى. ەحوبانىڭ كۇنى دە تاپ سولاي اياقاستىنان كەلگەن كەزدە كوپشىلىگىنىڭ باسىنا جاي تۇسكەندەي بولادى. وقيعالاردىڭ جىلدام ٶربىپ كەتكەنىنە ٴتىپتى ماسىحشىلەردىڭ ٶزى تاڭعالىپ قالۋى مۇمكىن. بىراق ولار سول كەزدە امان قالادى، ال زۇلىمدار جويىلادى.
4. ەحوبانىڭ كۇنى قاي جاعىنان تولعاققا ۇقسايدى؟
4 «جۇكتى ايەلدىڭ تولعاعى ىسپەتتى» (سال. 1-ح. 5:3). ايى-كۇنى جاقىنداعان ايەل ناقتى قاي ۋاقىتتا بوساناتىنىن بىلمەسە دە، مىندەتتى تۇردە بوساناتىنىن بىلەدى. جۇكتى ايەلدىڭ تولعاعى اياقاستى باستالىپ، قاتتى اۋىرتادى ٵرى ونى ەشكىم توقتاتا المايدى. تۋرا سولاي ٴبىز دە ەحوبانىڭ كۇنى قاشان، قاي ساعاتتا كەلەتىنىن بىلمەيمىز. بىراق مىندەتتى تۇردە كەلەتىنىنە سەنىمدىمىز. سول كەزدە زۇلىمدار ەش ويلاماعان جەردەن قۇدايدىڭ جازاسىنا تارتىلىپ، ودان ەش قاشىپ قۇتىلا المايدى.
5. نەلىكتەن زور الاپات تاڭنىڭ اتۋىنا ۇقسايدى؟
5 تاڭنىڭ اتۋى ىسپەتتى. پاۋىل ٷشىنشى مىسالىندا دا تۇندە تۇسەتىن ۇرىلار جايلى ايتقان. بىراق بۇل جولى ول ەحوبانىڭ كۇنىن ۇرىعا ەمەس، اتىپ كەلە جاتقان تاڭعا تەڭەگەن كورىنەدى (سال. 1-ح. 5:4). نەلىكتەن؟ تۇندە ٴبىر جەرگە ۇرلىققا تۇسكەن ادامنىڭ بار ويى ۇرلىق جاساۋدا بولعاندىقتان، ول ۋاقىتتىڭ سىرعىپ وتكەنىن بايقاماي قالۋى مۇمكىن. تاڭ شاپاعى جارق ەتە قالعاندا، ول ابدەن اسىپ-ساسىپ، ىستەگەنى اشكەرە بولادى. رۋحاني تۇنەكتە ٴجۇرىپ، قۇدايعا ۇنامسىز ىستەرىن قايتپاي ىستەپ جۇرگەندەر زور الاپاتتا تۋرا سول ۇرى سياقتى اشكەرە بولادى. ال بىزگە سول كۇنگە دايىن بولۋ ٷشىن، ەحوباعا ۇنامايتىن ىستەردەن بويىمىزدى اۋلاق ۇستاپ، «ٵرتۇرلى يگى، ٵدىل دە دۇرىس ىستەر جاساي» بەرۋ قاجەت (ەفەس. 5:8—12). قازىر ەحوبانىڭ كۇنى كەلگەندە قۇتقارىلمايتىن ادامداردى پاۋىل كىمگە تەڭەگەنىن كورەيىك.
ەحوبانىڭ كۇنى كەلگەندە كىمدەر امان قالمايدى؟
6. ادامداردىڭ كوبىسى قاي ماعىنادا ۇيىقتاپ ٴجۇر؟ (سالونيكالىقتارعا 1-حات 5:6، 7)
6 «ۇيىقتايتىندار» (سالونيكالىقتارعا 1-حات 5:6، 7 وقىڭىز). ەلشى پاۋىل ەحوبانىڭ كۇنى امان قالمايتىن ادامداردى ۇيىقتاپ جاتقان ادامدارعا تەڭەگەن. مۇنداي ادام اينالاسىندا نە بولىپ جاتقانىن، ۋاقىتتىڭ قالاي ٶتىپ جاتقانىن سەزبەيدى. سوندىقتان ماڭىزدى وقيعالار ٶربىپ جاتسا دا، ول ونى سەزبەي، ارەكەتسىز جاتا بەرەدى. قازىرگى الەمدە دە باسىم كوپشىلىك رۋحاني ماعىنادا ۇيىقتاپ ٴجۇر (ريم. 11:8). ولار «سوڭعى كۇندەرى» ٶمىر ٴسۇرىپ جاتقانىمىزدىڭ انىق دالەلدەرىنە جانە زور الاپاتتىڭ تاياپ قالعانىنا ەش ٴمان بەرمەيدى. الەمدى ٴدۇر سىلكىندىرگەن ەلەۋلى وقيعالار بولسا، كەيبىرى ويانىپ، پاتشالىق تۋرالى حابارعا قىزىققانداي بولادى. بىراق كوبىسى كەيىن قايتادان ۇيقىعا باتىپ كەتەدى. ال كەيبىرى سوت كۇنى كەلەتىنىنە سەنەمىن دەگەننىڭ وزىندە، ول جاقىن ارادا كەلمەيدى دەپ ويلايدى (پەت. 2-ح. 3:3، 4). الايدا ٴبىز كۇن وتكەن سايىن وياۋ ٴجۇرۋدىڭ ماڭىزدىلىعى ارتا تۇسەتىنىن جاقسى تۇسىنەمىز.
7. قۇدايدىڭ قاھارىنا ۇشىرايتىندار قاي جاعىنان ماس ادامدارعا ۇقسايدى؟
7 «ماس بولاتىندار». پاۋىل قۇدايدىڭ قاھارىنا ۇشىرايتىنداردى ماس ادامدارعا تەڭەگەن. ىشىمدىكتىڭ اسەرىنەن ساناسى تۇماندانعاندىقتان، ماس ادام اينالاسىنداعى جايتتاردى باياۋ قابىلدايدى ٵرى كوپ اقىماقتىق جاسايدى. تۋرا سولاي قۇدايدىڭ ەسكەرتۋلەرى دە زۇلىمداردىڭ ساناسىنا كىرمەيدى. ولار تۇبىندە جويىلۋعا اپاراتىن جولمەن جۇرەدى. بىراق كيەلى كىتاپتا ماسىحشىلەردىڭ قىراعى ٵرى سانالارى سەرگەك بولۋ كەرەكتىگى ايتىلعان (سال. 1-ح. 5:6). كيەلى كىتاپتى زەرتتەۋشى ٴبىر عالىمنىڭ ايتۋىنشا، ساناسى سەرگەك ادام «سابىر ساقتاپ، بايسالدى بولادى، اينالاسىنداعى جاعدايلاردى دۇرىس باعامداي بىلەدى، سوندىقتان دا دۇرىس شەشىمدەر قابىلدايدى». راسىندا دا، مىنا دۇنيەدەگى ساياسي يا قوعامدىق ماسەلەلەرگە ارالاسىپ كەتپەۋ ٷشىن، بىزگە سابىرلى دا بايسالدى بولۋ قاجەت. ەحوبانىڭ كۇنى جاقىنداعان سايىن، وسىنداي ماسەلەلەردە ادامدار ٴبىزدى ٶز جاعىنا شىعارۋ ٷشىن قىسىمعا الا تۇسەدى. بىراق بىزگە سوندايدا نە ىستەيمىن، نە ايتامىن دەپ ۋايىمداۋدىڭ قاجەتى جوق. ويتكەنى قۇدايدىڭ رۋحى بىزگە سابىر ساقتاپ، بايسالدى بولۋعا، دۇرىس شەشىم قابىلداۋعا كومەكتەسەدى (لۇقا 12:11، 12).
ەحوبانىڭ كۇنىنە قالاي دايىن بولا الامىز؟
جۇرت قاپەرسىز جۇرگەندە، ٴبىز سەنىم مەن سۇيىسپەنشىلىكتى ساۋىت قىلىپ، ال ٷمىتتى دۋلىعا ەتىپ كيىپ، ەحوبانىڭ كۇنىنە دايىن جۇرەمىز (8، 12-ابزاستاردى قاراڭىز)
8. وياۋ ٵرى قىراعى جۇرۋگە تالپىندىراتىن قاسيەتتەر سالونيكالىقتارعا 1-حات 5:8 دە نە نارسەگە تەڭەلگەن؟ (سۋرەتتى دە قاراڭىز.)
8 ساۋىت پەن دۋلىعانى كيەيىك. ەلشى پاۋىل ٴبىزدى شايقاس كيىمىن كيىپ، ساقاداي ساي تۇرعان جاۋىنگەرگە تەڭەگەن (سالونيكالىقتارعا 1-حات 5:8 وقىڭىز). جورىقتاعى جاۋىنگەر كۇننىڭ قاي مەزگىلىندە دە ۇرىسقا ارالاسۋعا دايىن تۇرۋ كەرەك. تۋرا سولاي ٴبىز دە ەحوبانىڭ كۇنىنە دايىن ٴجۇرۋ ٷشىن، سەنىم مەن سۇيىسپەنشىلىگىمىزدى ساۋىت قىلىپ، ال ٷمىتىمىزدى دۋلىعا ەتىپ تاستاماي كيىپ ٴجۇرۋىمىز كەرەك. بۇل قاسيەتتەردىڭ ٴبىز ٷشىن ماڭىزى وتە زور.
9. قالاي سەنىم ٴبىزدى قورعايدى؟
9 ساۋىت جاۋىنگەردىڭ جۇرەگىن قورعايتىنداي، سەنىم مەن سۇيىسپەنشىلىك ٴبىزدىڭ بەينەلى جۇرەگىمىزدى ساقتايدى. قالاي؟ بويىمىزدا وسى قاسيەتتەر بولسا، ەحوباعا ەشتەڭەگە قاراماستان قىزمەت ەتە بەرەمىز ٵرى يسانىڭ دا ىزىنەن تايمايمىز. سەنىمى بار ادام ەحوبا «ٶزىن شىن جۇرەكتەن ىزدەيتىندەرگە سي بەرەتىنىنە» ەش كۇماندانبايدى (ەۆر. 11:6). سەنىمىمىز بولسا، قيىنشىلىقتاردان وتۋگە تۋرا كەلسە دە، كوسەمىمىز يساعا ادالدىق ساقتاپ قالامىز. ەشبىر قيىنشىلىققا قايىسپايتىن سەنىم دامىتۋ ٷشىن، قۋعىن-سۇرگىنگە يا جوقشىلىققا قاراماستان، مىنسىزدىك ساقتاپ قالعان باۋىرلاستاردان ۇيرەنسەك بولادى. ال دۇنيەقۇمارلىقتىڭ تۇزاعىنا ٴتۇسىپ قالماس ٷشىن، پاتشالىقتى ٴبىرىنشى ورىنعا قويىپ، قاراپايىم ٶمىر ٴسۇرىپ جۇرگەن باۋىرلاستاردان ۇلگى الساق بولادى b.
10. قۇدايدى جانە ادامداردى سۇيگەنىمىز تاباندىلىقپەن ۋاعىزداۋعا قالاي كومەكتەسەدى؟
10 وياۋ ٵرى قىراعى ٴجۇرۋ ٷشىن بىزدە سۇيىسپەنشىلىكتىڭ بولعانى دا ماڭىزدى (مات. 22:37—39). قۇدايدى سۇيسەك، ەشقانداي قيىندىقتان قورىقپاي، تاباندىلىقپەن ۋاعىزدايتىن بولامىز (ٴتىم. 2-ح. 1:7، 8). بۇعان قوسا، ٴبىز ەحوباعا قىزمەت ەتپەيتىن ادامداردى دا سۇيەمىز. سوندىقتان بارىمىزدى سالىپ ۋاعىزداي بەرەمىز، ٴتىپتى تەلەفونمەن نە حات جازۋ ارقىلى كۋالىك ەتۋ كەرەك بولسا دا، اۋماعىمىزدى ٵرى قاراي وڭدەي بەرەمىز. كۇندەردىڭ كۇنىندە ولار ويىن وزگەرتىپ، ٵدىل دە دۇرىس ارەكەت ەتە باستايدى دەپ ٷمىتىمىزدى ۇزبەيمىز (ەزەك. 18:27، 28).
11. باۋىرلاستاردى جاقسى كورۋ اسىرەسە قانداي جاعدايلاردا ماڭىزدى؟ (سالونيكالىقتارعا 1-حات 5:11)
11 ٴبىز باۋىرلاستارىمىزدى دا سۇيەمىز، سوندىقتان «ٴبىر-ٴبىرىمىزدى جۇباتىپ، نىعايتىپ جۇرەمىز» (سالونيكالىقتارعا 1-حات 5:11 وقىڭىز). ٴبىر شەپتە جۇرگەن جاۋىنگەرلەر ٴبىر-ٴبىرىنىڭ رۋحتارىن قايراپ، دەمەپ وتىرادى. كەيدە قيان-كەسكى شايقاستا مايدانداس جاۋىنگەرلەر ٴبىر-ٴبىرىن بايقاماي جارالاپ قويۋى مۇمكىن. بىراق ولار مۇنى ەشقاشان ادەيى ىستەمەيدى. ٴبىز دە باۋىرلاستارىمىزدى ادەيىلەپ رەنجىتپەيمىز، ال ٶزىمىزدى رەنجىتسە، ٶش الۋدى كوزدەمەيمىز (سال. 1-ح. 5:13، 15). باۋىرلاستاردى سۇيۋگە قاۋىمدا جەتەكشىلىك ەتەتىن ەر باۋىرلاستاردى قۇرمەتتەۋ دە جاتادى (سال. 1-ح. 5:12). ەلشى پاۋىل سالونيكالىقتارعا حات جازعاندا، ونداعى قاۋىمنىڭ قۇرىلعانىنا ٴبىر جىل دا بولماعان ەدى. دەمەك، وندا تاعايىندالعان ەر باۋىرلاستار ٵلى تاجىريبە جيناي قويماعان بولار ٵرى قاتەلىكتەر جىبەرىپ تۇرعان شىعار. دەسە دە، ولار سي قۇرمەتكە لايىق ەدى. ٴبىز دە قازىردەن باستاپ اقساقالدارىمىزدى ٴسۇيىپ، قۇرمەتتەۋدى ۇيرەنە بەرۋىمىز كەرەك. ويتكەنى زور الاپات جاقىنداعان سايىن بىزگە باسشىلىقتار كوبىرەك قاجەت بولادى. ونىڭ ۇستىنە، باسقارۋشى كەڭەستەن، فيليالدان قول ٷزىپ قالساق، جەرگىلىكتى اقساقالداردىڭ باعىت-باعدارىنا ابدەن مۇقتاج بولامىز. قانداي جاعداي بولماسىن، اقساقالداردىڭ قاتەلىكتەرىنە ەمەس، ەحوبا بۇل ادال كىسىلەردى يسا ارقىلى جەتەلەپ كەلە جاتقانىنا نازار اۋدارايىق، سوندا قىراعىلىق ساقتاي الامىز.
12. ٷمىت ويىمىزدى نەدەن قورعايدى؟
12 دۋلىعا جاۋىنگەردىڭ باسىن قورعايتىنداي، قۇتقارىلۋعا دەگەن ٷمىت تە ٴبىزدىڭ وي-سانامىزدى قورعايدى، ياعني دۇرىس ويلانۋعا كومەكتەسەدى. ٷمىتىمىز مىقتى بولسا، مىنا دۇنيە نە ۇسىنباسىن — ٴبارىن تۇككە تۇرعىسىز سانايتىن بولامىز (ٴفىلىپ. 3:8). ٷمىت بىزگە سابىر ساقتاپ، سەرگەك ويلانۋعا كومەكتەسەدى. افريكادا قىزمەت ەتەتىن ۋوللەس پەن لوريندا باۋىرلاستاردىڭ جاعدايىندا سولاي بولدى. ٷش-اق اپتانىڭ ىشىندە ولاردىڭ بىرەۋى اناسىنان، بىرەۋى اكەسىنەن ايىرىلىپ قالدى. سول كەزدە 19-COVID پاندەمياسى ۇدەپ تۇرعاندىقتان، ەكەۋى جاقىندارىنا بارىپ، قاستارىندا بولا المادى. ۋوللەس باۋىرلاس بىلاي دەپ جازدى: «قاتتى قايعىرىپ، مۇڭايعاندا، قايتا ٴتىرىلۋ ٷمىتىن ويلاسام، جانىم تىنىشتىق تابادى. مەن اتا-انامىزدىڭ مىنا دۇنيەدە قينالىپ وتكەن اقىرعى كۇندەرىن ەمەس، جۇماقتا شات-شادىمان بولىپ جۇرگەن العاشقى كۇندەرىن ەلەستەتۋگە تىرىسامىن».
13. كيەلى رۋحقا كەنەلۋ ٷشىن نە ىستەسەك بولادى؟
13 «رۋحتىڭ جالىنىن وشىرمەڭدەر» (سال. 1-ح. 5:19). ەلشى پاۋىل كيەلى رۋحتى ىشىمىزدە جالىنداپ تۇرعان وتقا تەڭەگەن. بىزدە قۇدايدىڭ رۋحى بولسا، دۇرىس نارسەنى ىستەۋگە قۇلشىنىسىمىز جالىنداپ، ەحوبانىڭ ٸسىن اتقارۋعا كۇشىمىز تاسىپ تۇرادى (ريم. 12:11). ال رۋحىنا كەنەلۋ ٷشىن نە ىستەگەن ٴجون؟ ونى دۇعادا ەحوبادان سۇراساق بولادى. سونداي-اق كيەلى رۋحتىڭ جەتەلەۋىمەن جازىلعان ٴسوزىن زەرتتەسەك جانە سول رۋح باعىتتاعان ۇيىمنىڭ شارالارىنا اتسالىسساق بولادى. سوندا بويىمىزدا «كيەلى رۋحتىڭ جەمىسىن» دامىتا الامىز (عال. 5:22، 23).
«قۇداي ماعان كيەلى رۋحىن ۇزبەي بەرسىن دەسەم، سوعان ساي ارەكەت ەتەمىن بە؟» دەپ ويلانىڭىز (14-ابزاستى قاراڭىز)
14. قۇدايدىڭ رۋحىنا كەنەلە بەرۋ ٷشىن، نەدەن اۋلاق بولۋىمىز كەرەك؟ (سۋرەتتى دە قاراڭىز.)
14 قۇداي بىزگە كيەلى رۋحىن بەرگەن سوڭ، ونىڭ «جالىنىن ٶشىرىپ» الماعانىمىز ٴجون. قۇداي ونى ويى دا، ٴجۇرىس-تۇرىسى دا تازا ادامعا بەرەتىنىن ەستە ۇستايىق (سال. 1-ح. 4:7، 8). ال ەگەر جامان ويلارعا قايتا-قايتا بەرىلىپ، بارىپ سونى ىستەيتىن بولساق، ەحوبا بىزگە رۋحىن بەرمەي قويادى. كيەلى رۋحتان ايىرىلىپ قالماۋ ٷشىن، «پايعامبارلىقتارعا نەمكەتتى قاراپ» كەتپەۋىمىز دە كەرەك (سال. 1-ح. 5:20). مۇنداعى «پايعامبارلىقتار» دەگەن ەحوبانىڭ كۇنى مەن وسى زاماننىڭ اياعى جاقىنداپ قالعانىنا بايلانىستى رۋحتىڭ جەتەلەۋىمەن بەرىلگەن حابارلاردى بىلدىرەدى. ٴبىز ارماگەددون مەنىڭ كەزىمدە كەلە قويمايدى دەپ ويلاپ، سول كۇندى ويشا الىستاتپايمىز. كەرىسىنشە، سول كۇندى ەستە مىقتاپ ۇستاپ، جاقىندا كەلىپ قالادى دەپ كۇتەمىز، ياعني ٴجۇرىس-تۇرىسىمىزدى تازا ساقتايمىز جانە ٵر كۇنى «قۇدايعا شىن بەرىلگەن ادامدارعا ٴتان» ٸس-ارەكەتتەر جاسايمىز (پەت. 2-ح. 3:11، 12).
«ٴبارىن تەكسەرىڭدەر»
15. جالعان اقپارات پەن جىنداردىڭ ۇگىت-ناسيحاتىنا الدانباۋ ٷشىن نە ىستەۋىمىز كەرەك؟ (سالونيكالىقتارعا 1-حات 5:21)
15 جاقىن ارادا قۇدايدىڭ جاۋلارى «بەيبىتشىلىك پەن قاۋىپسىزدىككە» جەتكەندەرىن ايتىپ جاريالايتىن بولادى (سال. 1-ح. 5:3). جىنداردان شىققان بۇل ۇگىت-ناسيحات بۇكىل جەر بەتىنە تاراپ، كوپشىلىگىن اداستىرادى (ايان 16:13، 14). بىراق وعان الدانىپ قالماۋ ٷشىن، ٴبىز «ٴبارىن تەكسەرىپ» الۋىمىز كەرەك (سالونيكالىقتارعا 1-حات 5:21 وقىڭىز). مۇنداعى «تەكسەرۋ» دەگەن گرەك ٴسوزى التىن، كۇمىس سياقتى مەتالدىڭ تازا نە تازا ەمەستىگىن انىقتاۋ جايلى ايتقاندا قولدانىلعان. ٴبىز دە كورىپ-ەستىپ جاتقان مالىمەتتىڭ شىنايىلىعىن تەكسەرىپ، اجىراتا بىلگەنىمىز ٴجون. سالونيكالىقتاردىڭ كەزىندە بۇل ەسكەرتۋ ماڭىزدى بولسا، زور الاپات جاقىنداعان ۋاقىتتا ودان دا ماڭىزدى. بىزگە الەمدە ايتىلىپ جاتقانداردى اقىلمەن سارالاپ، ونى كيەلى كىتاپپەن جانە ەحوبانىڭ ۇيىمى ايتىپ جاتقان سوزدەرمەن سالىستىرۋ كەرەك. سول كەزدە جىنداردىڭ وتىرىگىنە، ۇگىت-ناسيحاتىنا ەش الدانبايمىز (ناق. س. 14:15؛ ٴتىم. 1-ح. 4:1).
16. ٴبىزدىڭ قانداي ٷمىتىمىز بار جانە نە ىستەۋگە بەلدى بەكەم بۋامىز؟
16 قۇدايدىڭ قىزمەتشىلەرى زور الاپاتتان توپ رەتىندە امان وتەتىنىنە ەش كۇمان جوق. ال جەكە ٴارقايسىسىمىزدى العاندا، بىزبەن ەرتەڭ نە بولاتىنىن بىلمەيمىز (جاق. 4:14). بىراق ادال بولىپ قالساق، زور الاپاتتان تىرىدەي وتسەك تە، نە وعان دەيىن قايتىس بولىپ كەتسەك تە، ەحوبا بىزگە ماڭگى ٶمىر سيلايدى. مايلانعاندار ماسىحپەن بىرگە كوكتە بولادى. ال باسقا قويلار جەردە جۇماقتا ٶمىر سۇرەدى. بارلىعىمىز سول كەرەمەت بولاشاقتان كوز تايدىرماي، ەحوبانىڭ كۇنىنە دايىن جۇرەيىك!
150-ٵن قۇتقارىلۋ ٷشىن قۇدايدى ىزدەيىك
a سالونيكالىقتارعا 1-حات 5-تاراۋدا كەلەشەكتە كەلەتىن ەحوبانىڭ كۇنىنە قاتىستى ٴتۇرلى مىسالدار مەن تەڭەۋلەر بار. ال «ەحوبانىڭ كۇنى» دەگەن قانداي كۇن؟ ول قالاي كەلەدى؟ ول كۇنى كىم قۇتقارىلىپ، كىم جويىلادى؟ وعان دايىن بولۋ ٷشىن نە ىستەۋ كەرەك؟ ەلشى پاۋىلدىڭ سوزدەرىن قاراستىرا وتىرىپ، وسى سۇراقتارعا جاۋاپ الايىق.
b «ولار دايىندىق رۋحىن تانىتتى» دەگەن ماقالالار توپتاماسىن قاراڭىز.
