وقىرمان ساۋالدارى
ٴزابۇر 12:7 ٴنى قالاي تۇسىنسەك بولادى؟
ٴزابۇر 12:1—4 تارماقتاردان «ادامزات اراسىنان ادالدار مۇلدەم جوعالدى» دەگەن سوزدەردى وقيمىز. ال ٴزابۇر 12:5—7 تارماقتاردا بىلاي دەلىنگەن:
«ەحوبا مىنانى ايتادى: «بەيشارا قانالىپ،
جارلى كۇرسىنىپ جاتقاندىقتان،
مەن ورنىمنان كوتەرىلىپ، ارەكەت ەتەمىن دە،
ولاردى جابىرلەۋشىلەرىنەن قۇتقارامىن».
ەحوبانىڭ سوزدەرى تازا،
ولار بالشىق وشاقتا جەتى رەت بالقىتىپ
تازارتىلعان كۇمىستەي.
ۋا، ەحوبا، سەن بەيشارالاردى قورعايسىڭ،
ٴارقايسىسىن وسى زۇلىم ۇرپاقتان ماڭگىگە ساقتايسىڭ».
كەيبىر كيەلى كىتاپ اۋدارمالارىندا ٴزابۇر 12:7: «ۋا، ەحوبا، سەن ولاردى قورعايسىڭ»،— دەپ اۋدارىلعان.
6-تارماقتا «ەحوبانىڭ سوزدەرى» جايلى ايتىلعاندىقتان، كەيبىر ادامدار 7-تارماقتاعى «ولاردى» دەگەن ەسىمدىكتى ەحوبانىڭ سوزدەرىنە قاتىستىرادى، ياعني ەحوبا ٶزىنىڭ سوزدەرىن «قورعايدى» دەپ تۇجىرىمدايدى. راس، قارسىلاستار كيەلى كىتاپقا تيىم سالۋعا، ونى جويۋعا قانشا رەت تىرىسسا دا، ەحوبا ونى قورعاپ كەلگەن (يشايا 40:8؛ پەت. 1-ح. 1:25).
الايدا 5-تارماقتا ەحوبا ادامداردى قورعايتىنى ايتىلعان. ٴيا، ەحوبا «بەيشارالار» مەن «قانالعانداردى» قورعاپ كەلەدى جانە ٵرى قاراي دا قورعاي بەرەدى (ٵيۇپ 36:15؛ ٴزاب. 6:4؛ 31:1، 2؛ 54:7؛ 145:20).
سوندا 7-تارماقتاعى «قورعايدى» دەگەن سوزدەر ادامدارعا قاتىستى ما، الدە قۇدايدىڭ سوزدەرىنە مە؟
ەگەر وسى تاراۋدىڭ مانماتىنىنە جاقسىلاپ قاراساق، بۇل سوزدەردىڭ ادامدارعا قاتىستى ەكەنىن تۇسىنەمىز.
ٴزابۇر 12-تاراۋدىڭ باستاپقى تارماقتارىندا ٴداۋىت «ادال جانداردىڭ» وتىرىك سويلەيتىن زۇلىمداردان جاپا شەگىپ جاتقانىن ايتقان. ال كەيىنگى تارماقتاردا ەحوبا تىلدەرىن بۇرىس، بەيپىل قولداناتىن ادامدارعا قارسى ارەكەت ەتەتىنى ايتىلادى. كەيىن ٴزابۇر جىرشىسى ەحوبانىڭ سوزدەرى تازا بولعاندىقتان، ول ٴبىزدى قۇتقاراتىنىنا سەنىمدى بولا الاتىنىمىزدى ايتقان.
دەمەك، 7-تارماقتاعى «قورعايسىڭ» دەگەن ٴسوز ادامدارعا، ياعني زۇلىمداردان جاپا شەككەن «بەيشارالارعا» قاتىستى.
ولاي بولسا، نەگە كەيبىر كيەلى كىتاپ اۋدارمالارىندا بۇل تارماق «ۋا، ەحوبا، سەن ولاردى قورعايسىڭ» دەپ اۋدارىلعان؟ «ولاردى» دەگەن ٴسوز ەۆرەي جازبالارىنىڭ سەنىمدى كوشىرمەلەرىندە كەزدەسەدى (ەۆرەي ماسورەتتىك ٴماتىن). ال گرەك سەپتۋاگينتىندە 7-تارماق «سەن ٴبىزدى قورعايسىڭ»، «سەن ٴبىزدى ساقتايسىڭ» دەپ اۋدارىلعان. «ٴبىزدى» دەگەن ەسىمدىككە قاراپ، بۇل تارماق زۇلىمداردان جاپا شەگىپ جۇرگەن ادال جاندارعا قاتىستى ەكەنىن كورۋگە بولادى. ەحوبا ولاردى «جۇگەنسىزدىكتى دارىپتەيتىن» «زۇلىم ۇرپاقتان» قورعايتىن بولادى (ٴزاب. 12:7، 8). ال ارامەي تىلىندەگى ەۆرەي جازبالارىندا (ارامەي تارگۋمدارى) بۇل تارماق بىلاي جازىلعان: «ۋا، قۇدايىم، سەن ادىلدەردى قورعايسىڭ، ٴارقايسىسىن وسى زۇلىم ۇرپاقتان ماڭگىگە ساقتايسىڭ». وسى كەلتىرىلگەن اۋدارمالار ٴزابۇر 12-تاراۋدىڭ 7-تارماعى قۇدايدىڭ سوزدەرىنە قاتىستى ەمەس ەكەنىن دالەلدەيدى.
بۇدان شىعاتىن قورىتىندى: بۇل تارماق «ادال جاندارعا» ٷمىت بەرەدى، ويتكەنى ەحوبا ولاردى قورعايدى.
