18-زەرتتەۋ ماقالاسى
رۋحاني ماقساتتار قويىپ، ولارعا جەتە بەرىڭىز
«وسىلار تۋرالى وي جۇگىرت، ٶزىڭدى سولارعا ارنا، وسىلايشا جەتىستىكتەرىڭ جۇرتتىڭ بارىنە انىق كورىنەتىن بولسىن» (ٴتىم. 1-ح. 4:15).
84-ٵن كۇشىمىزدى اياماي بەرەيىك
اڭداتپا a
1. الدىمىزعا قانداي ماقساتتار قويساق بولادى؟
شىنايى ماسىحشىلەر رەتىندە ٴبىز ەحوبانى قاتتى جاقسى كورەمىز، سوندىقتان وعان جان-تانىمىزبەن قىزمەت ەتكىمىز كەلەدى. ەگەر بارلىق قابىلەتتەرىمىز بەن مۇمكىندىكتەرىمىزدى ەحوباعا قىزمەت ەتۋگە ارناعىمىز كەلسە، العا رۋحاني ماقساتتار قويعانىمىز ٴجون b. مىسالى، ماسىحشىلەرگە ٴتان قاسيەتتەر دامىتۋعا، كادەگە جارامدى قابىلەتتەرىمىزدى ارتتىرۋعا، باۋىرلاستارعا قىزمەت ەتۋدىڭ جولدارىن تابۋعا ۇمتىلساق بولادى.
2. رۋحاني ماقساتتار قويىپ، ولارعا جەتۋ ٷشىن، نەلىكتەن بارىمىزدى سالۋىمىز كەرەك؟
2 نەلىكتەن ٴبىز رۋحاني ماقساتتارعا ۇمتىلۋىمىز كەرەك؟ ويتكەنى كوكتەگى اكەمىز ەحوباعا ۇنامدى بولعىمىز كەلەدى. قىزمەتتە قابىلەت-دارىنىمىزدى تولىق قولدانساق، ەحوبا بۇعان قاتتى قۋانادى. سونداي-اق ٴبىز باۋىرلاستارعا كوبىرەك قىزمەت ەتكىمىز كەلگەندىكتەن دە رۋحاني ماقساتتار قويامىز (سال. 1-ح. 4:9، 10). شىندىقتا جۇرگەنىمىزگە قانشا جىل بولماسىن، ٴبارىمىز دە رۋحاني تولىسا بەرگەنىمىز دۇرىس. ٴقازىر بۇنى قالاي ىستەۋگە بولاتىنىن كورەيىك.
3. تىموتەگە 1-حات 4:12—16-تارماقتاردا ەلشى پاۋىل تىموتەنى نە نارسەگە تالپىندىردى؟
3 پاۋىل تىموتەگە العاشقى حاتىن جازعان ۋاقىتتا تىموتە ٵلى دە جاس بولعانمەن، تاجىريبەلى اقساقال ەدى. دەسە دە پاۋىل ونى ٵرى قاراي رۋحاني دامي بەرۋگە تالپىندىردى (تىموتەگە 1-حات 4:12—16 وقىڭىز). وسى تارماقتاردا پاۋىل تىموتەنى ەكى نارسەدە العا باسۋعا شاقىرعان. ٴبىرىنشىسى — سۇيىسپەنشىلىك، سەنىم جانە پاك تازالىق سياقتى قاسيەتتەردى دامىتۋ. ەكىنشىسى — وقۋ، ناسيحات ايتۋ، ٴتالىم بەرۋ سياقتى قابىلەتتەردى ارتتىرۋ. وسى ماقالادا تىموتەنىڭ مىسالىنا توقتالا وتىرىپ، ٴبىز دە قولجەتىمدى ماقساتتار قويساق، ەحوباعا جاقسىراق قىزمەت ەتە الاتىنىمىزدى تۇسىنەمىز. سونداي-اق قىزمەتىمىزدى كەڭەيتۋدىڭ قانداي جولدارى بار ەكەنىن بىلەمىز.
ماسىحشىلەرگە ٴتان قاسيەتتەر دامىتىڭىز
4. فىلىپىلىكتەرگە 2:19—22-تارماقتارعا ساي، قالاي تىموتە ەحوبانىڭ جاقسى قىزمەتشىسى بولا الدى؟
4 تىموتەنى ەحوبانىڭ الدىندا باعالى قىزمەتشى ەتكەن نە نارسە؟ ونىڭ تاماشا ماسىحشىلىك قاسيەتتەرى (فىلىپىلىكتەرگە 2:19—22 وقىڭىز). پاۋىلدىڭ سوزدەرىنەن تىموتەنىڭ كىشىپەيىل، ادال، سەنىمدى ٵرى قۇلشىنىستى بولعانىن بايقايمىز. ول باۋىرلاستارعا سۇيىسپەنشىلىك كورسەتىپ، قاشان دا ولاردىڭ قامدارىن ويلاپ جۇرگەن. سول ٷشىن دە پاۋىل تىموتەنى قاتتى جاقسى كورگەن جانە ۇلكەن جاۋاپكەرشىلىكتەردى سەنىپ تاپسىرعان (قور. 1-ح. 4:17). ٴبىز دە ەحوباعا ۇنامدى قاسيەتتەر دامىتساق، ول كوكتەن بىزگە ٴسۇيسىنىپ قارايدى جانە قاۋىمعا دا كوپ پايدامىز تيەتىن بولادى (ٴزاب. 25:9؛ 138:6).
قانداي قاسيەت دامىتقىڭىز كەلەتىنىن انىقتاپ الىڭىز (5، 6-ابزاستاردى قاراڭىز)
5. ا) قانداي قاسيەت دامىتۋ كەرەكتىگىن قالاي شەشسەڭىز بولادى؟ ٵ) سۋرەتتەن كورىنەتىندەي، كوبىرەك جاناشىر بولۋدى ماقسات ەتكەن قىز باۋىرلاس سول ماقساتىنا جەتۋ ٷشىن نە ىستەپ جاتىر؟
5 ناقتى ٴبىر ماقسات قويىڭىز. دۇعا ەتە وتىرىپ، بولمىسىمدى قاي جاعىنان جاقسارتسام بولادى دەپ ويلانىڭىز. ناقتى ٴبىر قاسيەتكە توقتاپ، سونىڭ ۇستىنەن جۇمىس جاساڭىز. مىسالى، سىزگە كوبىرەك جاناشىر بولۋ كەرەك شىعار، الدە باۋىرلاستارعا كومەكتەسۋگە دەگەن ىقىلاسىڭىزدى ارتتىرۋ كەرەك بولار. نەمەسە تاتۋلىق ساقتاۋ جانە كەشىرىمشىل بولۋ جاعىنان كوبىرەك كۇش سالۋ كەرەك شىعار. ٴسىز سەنىمدى دوسىڭىزبەن سويلەسىپ، ودان قاي جاعىنان جاقسارۋىڭىزعا بولاتىنىن سۇراساڭىز بولادى (ناق. س. 27:6).
6. بەلگىلى ٴبىر قاسيەتتى دامىتامىن دەگەن ماقساتىڭىزعا جەتۋ ٷشىن، نە ىستەسەڭىز بولادى؟
6 ماقساتىڭىزعا جەتۋ ٷشىن كۇش سالىڭىز. مۇنى قالاي ىستەۋگە بولادى؟ بۇنىڭ ٴبىر جولى — شىڭداعىڭىز كەلەتىن قاسيەت تۋرالى تەرەڭ زەرتتەڭىز. مىسالى، ٴسىز كەشىرىمدى بولۋ جاعىنان جاقسارعىڭىز كەلەدى دەلىك. بۇل ٷشىن كيەلى كىتاپتاعى وزگەلەردى كەشىرگەن جانە كەشىرمەگەن ادامدار جايلى وقىپ، وي جۇگىرتسەڭىز بولادى. مىسالى، يسا مەن پارىزشىلداردى الايىق. يسا باسقالاردى كەڭپەيىلمەن كەشىرگەن (لۇقا 7:47، 48). ول ادامداردىڭ قاتەلىكتەرىنە قادالىپ قالماي، ولاردىڭ بولاشاقتا وزگەرە الاتىندارىنا سەنگەن. ال پارىزشىلدار بولسا «وزگەلەردى مەنسىنبەيتىن» (لۇقا 18:9). وسى مىسالدار جايلى وي جۇگىرتكەننەن كەيىن، ٶزىڭىزدى بىلاي تەكسەرىپ كورىڭىز: «مەن باسقالاردىڭ بويىنان نەنى كورەمىن؟ قانداي قاسيەتتەرىنە نازار اۋدارامىن؟» ەگەر بىرەۋدى كەشىرۋ قيىن بولىپ جاتسا، ونىڭ بويىنداعى جاقسى قاسيەتتەرىنىڭ ٴبارىن ٴتىزىپ جازىپ شىعىڭىز. سوسىن: «يسا بۇل ادام جايلى نە ويلار ەدى؟ ونى كەشىرەر مە ەدى؟»— دەپ ويلانىڭىز. وسىنداي زەرتتەۋدىڭ ناتيجەسىندە ول ادامعا دەگەن كوزقاراسىڭىزدى وزگەرتە الاسىز. ارينە، ٴبىزدى رەنجىتكەن ادامدى كەشىرۋ ٷشىن العاشىندا كوپ تەر توگۋ كەرەك بولار. ٴبىراق كۇش سالا بەرسەڭىز، كەشىرۋ بارعان سايىن وڭاي بولا تۇسەدى.
كادەگە جارامدى قابىلەت دامىتىڭىز
پاتشالىق سارايىندا جوندەۋ جۇمىستارىن اتقارۋدى ۇيرەنىڭىز (7-ابزاستى قاراڭىز) e
7. ەحوبا قابىلەتتى قىزمەتشىلەرى ارقىلى قانداي ىستەردى اتقارىپ جاتىر؟ (ناقىل سوزدەر 22:29)
7 ٴبىز قانداي دا ٴبىر ٸستى نە قابىلەتتى مەڭگەرىپ الۋدى دا ماقسات ەتىپ قويساق بولادى. مىسالى، ٴقازىر بەتەل عيماراتتارىن، كونگرەسس سارايلارى مەن پاتشالىق سارايلارىن سوعاتىن قىزمەتشىلەر كوپتەپ قاجەت. سونداي قۇرىلىستا جۇرگەن باۋىرلاستاردىڭ كوبىسى قۇرىلىس ٸسىن تاجىريبەلى باۋىرلاستاردىڭ قاسىندا ٴجۇرىپ ۇيرەنىپ العان. سۋرەتتەن بايقايتىنىمىزداي، ەر باۋىرلاستارمەن قاتار ايەل باۋىرلاستار دا كونگرەسس سارايلارى مەن پاتشالىق سارايلارىن كۇتىپ ۇستاۋعا قاجەت بولاتىن قابىلەتتەردى يگەرە الادى. وسىنداي ٶز ىستەرىنە شەبەر باۋىرلاستار ارقىلى «ماڭگىلىك پاتشا» ەحوبا قۇدايىمىز بەن «پاتشالاردىڭ پاتشاسى» يسا ٴماسىح كەرەمەت ىستەر اتقارىپ جاتىر (ٴتىم. 1-ح. 1:17؛ 6:15؛ ناقىل سوزدەر 22:29 وقىڭىز). ٴبىز قابىلەتتەرىمىزدى ٶز اتىمىزدى شىعارۋ ٷشىن ەمەس، ەحوبانى داڭقتاۋ ٷشىن قولدانامىز جانە سول ٷشىن دە كوپ تەر توگەمىز (جوح. 8:54).
8. ٴماسىحشى قانداي قابىلەتىن جاقسارتۋ كەرەكتىگىن قالاي بىلسە بولادى؟
8 ناقتى ٴبىر ماقسات قويىڭىز. ٴسىز قانداي قابىلەتتى شىڭداساڭىز بولادى؟ مۇنى قاۋىمىڭىزداعى اقساقالداردان نەمەسە اۋداندىق باقىلاۋشىدان دا سۇراپ بىلە الاسىز. مىسالى، ولار سىزگە سويلەۋ مەن ٴتالىم بەرۋ قابىلەتىن جاقسارتۋدى ايتسا، ٴسىز سونىڭ ىشىندە ناقتى قايسىسىمەن جۇمىس جاساسام بولادى دەپ سۇراڭىز. سوسىن ارەكەتكە كوشىڭىز. ٴقازىر مۇنى قالاي ىستەۋگە بولاتىنىن كورەيىك.
9. قانداي دا ٴبىر قابىلەتتى شىڭدايمىن دەگەن ماقساتىڭىزعا جەتۋ ٷشىن، نە ىستەسەڭىز بولادى؟
9 ماقساتىڭىزعا جەتۋ ٷشىن كۇش سالىڭىز. ٴسىز ٴتالىم بەرۋ شەبەرلىگىڭىزدى ارتتىرعىڭىز كەلەدى دەلىك. بۇل ٷشىن «وقۋ مەن ٴتالىم بەرۋ قابىلەتىن شىڭدايىق» كىتاپشاسىن تىڭعىلىقتى زەرتتەسەڭىز بولادى. ەگەر «ماسىحشىلىك ٶمىرىمىز بەن قىزمەتىمىز» كەزدەسۋىندە تاپسىرماڭىز بولسا، تاجىريبەلى باۋىرلاسقا تاپسىرماڭىزدى الدىن الا تىڭداتىپ، قاي جاعىنان جاقسارتۋعا بولاتىنىن سۇراڭىز. قاۋىمدا «قابىلەتتى باۋىرلاس» دەگەن اتقا عانا ەمەس، «تاپسىرمالارىنا جاۋاپكەرشىلىكپەن قارايتىن سەنىمدى، ىنتالى» دەگەن اتقا دا يە بولۋعا ۇمتىلىڭىز (ناق. س. 21:5؛ قور. 2-ح. 8:22).
10. ٴبىر باۋىرلاسقا قابىلەتىن دامىتۋعا نە كومەكتەسكەنىن ايتىپ بەرىڭىز.
10 ال ەگەر ٴسىز قانداي دا ٴبىر قابىلەتتى دامىتۋدى ماقسات ەتىپ، ٴبىراق بۇل نارسەدە يكەمىم از دەپ ويلاساڭىز شە؟ مۇندايدا ەش مويىماڭىز! مىسالى، گاري دەگەن باۋىرلاستىڭ وقۋ قابىلەتى وتە ناشار بولعان. ول قاۋىم الدىندا وقىعاندا، قاتتى ۇيالىپ، قىسىلاتىن. ٴبىراق ول ەش قايتپاي، وقۋىن جاقسارتا بەردى. گاري اقساقالداردىڭ جانە ادەبيەتتەردەگى كەڭەستەردىڭ ارقاسىندا ٴقازىر قاۋىم كەزدەسۋلەرىندە، اۋداندىق جانە ايماقتىق كونگرەستەردە جاپ-جاقسى بايانداما ايتىپ ٴجۇر.
11. تىموتە سياقتى كوبىرەك قىزمەت ەتۋ ٷشىن، نە ىستەي الامىز؟
11 ال تىموتەنىڭ جاعدايىنا ورالساق، ول ٴسوزدىڭ مايىن تامىزىپ سويلەيتىن كەرەمەت تالىمگەر بولىپ كەتتى مە؟ كيەلى كىتاپتا بۇل جايلى ەشتەڭە ايتىلمايدى. ٴبىراق ول پاۋىلدىڭ ۇيرەتكەندەرىنە دەن قويعاندىقتان، ٶز جاۋاپكەرشىلىكتەرىن الدەقايدا جاقسى اتقارا العانىندا ٴسوز جوق (ٴتىم. 2-ح. 3:10). سول سياقتى، ٴبىز دە قابىلەتتەرىمىزدى شىڭدايتىن بولساق، كوبىرەك جاۋاپكەرشىلىكتەر الىپ، ەحوباعا كوبىرەك قىزمەت ەتە الامىز.
وزگەلەرگە قىزمەت ەتۋدىڭ جولدارىن ىزدەڭىز
12. ٴسىز باۋىرلاستاردىڭ قانداي كومەگىن كورىپ ٴجۇرسىز؟
12 بارلىعىمىز دا باۋىرلاستاردىڭ كورسەتكەن كومەكتەرىن باعالايمىز. مىسالى، اۋرۋحاناعا ٴتۇسىپ قالساق، اۋرۋحانالارمەن بايلانىس كوميتەتتەرىنەن نەمەسە ناۋقاستارعا كومەك كورسەتۋ توپتارىنان اقساقالدار كەلسە، قۋانىپ قالامىز. يا بولماسا قيىن جاعدايعا ۇشىراعاندا، قامقور اقساقال ٴبىزدى تىڭداپ، جۇباتسا، كوڭىلىمىز جاي تاۋىپ قالادى. نەمەسە تاجىريبەلى ٸزاشار زەرتتەۋ ساباعىمىزعا قاتىسىپ، كەيىن زەرتتەۋدى جۇرگىزۋگە قاتىستى اقىل-كەڭەسىن ايتسا، ريزا بولىپ قالامىز. وسى باۋىرلاستار بىزدەرگە كومەكتەسە العاندارىنا وتە قۋانىشتى. ٴبىز دە وسىلاي وزگەلەرگە كومەكتەسىپ، قۋانىش تابا الامىز. يسا: «العاننان گورى بەرگەن باقىتتى»،— دەگەن (ەل. ٸس. 20:35). جوعارىدا ايتىلعان جولدارمەن نە باسقا جولدارمەن قىزمەتىڭىزدى كەڭەيتكىڭىز كەلسە، ماقساتىڭىزعا قالاي جەتە الاسىز؟
13. ماقسات قوياردا نەنى ەستە ۇستاعان دۇرىس؟
13 ماقساتىڭىز تىم جالپى ەمەس، ناقتى بولسىن. مىسالى، ٴسىز قاۋىمعا كوبىرەك بەرگىم كەلەدى دەپ ويلايتىن شىعارسىز. ٴبىراق بۇل ناقتى ماقسات بولماعاندىقتان، وعان قالاي جەتۋدى دە جانە جەتكەن-جەتپەگەنىڭىزدى دە بىلە المايسىز. سوندىقتان ماقساتىڭىزدى ايقىنداپ، ونى قاعازعا جازىپ قويىڭىز جانە وعان جەتۋدىڭ جولدارىن دا بەلگىلەپ الىڭىز.
14. ماقساتقا ۇمتىلعاندا، نەلىكتەن بەيىمدەلگىش بولۋىمىز كەرەك؟
14 ٴبىز قانداي دا ٴبىر ماقساتقا ۇمتىلعاندا، بەيىمدەلگىش بولعانىمىز دا ماڭىزدى. ويتكەنى ٴبىزدىڭ جاعدايىمىز وزگەرىپ، وعان ەش اسەر ەتە الماۋىمىز مۇمكىن. مىسالى، پاۋىلدىڭ سالونيكا قالاسىندا جاڭا قاۋىم قۇرعان كەزىن الايىقشى. ٴسوز جوق، ول شىندىقتا ٴتاي-ٴتاي باسىپ كەلە جاتقان ماسىحشىلەرگە رۋحاني وسۋگە كومەكتەسۋدى ماقسات ەتكەن. ٴبىراق قارسىلاستارى ونى قالادان كەتۋگە ماجبۇرلەدى (ەل. ٸس. 17:1—5، 10). ەگەر پاۋىل كەتپەسە، ول سول جەردەگى باۋىرلاستاردىڭ ٶمىرىن قاتەرگە تىگەر ەدى. ٴبىراق پاۋىل وسى جاعدايعا بەيىمدەلىپ، باسقا امالىن تاۋىپ كەتتى. ول جاڭا ماسىحشىلەردىڭ رۋحاني كۇيىن قاتايتۋ ٷشىن تىموتەنى جىبەردى (سال. 1-ح. 3:1—3). سالونيكاداعى جاڭا قاۋىم تىموتەنىڭ دايىندىق رۋحىن تانىتىپ، كومەككە كەلگەنىنە قاتتى قۋانسا كەرەك.
15. جاعدايىمىز وزگەرسە، ماقساتتارىمىزدى قالاي بەيىمدەي الامىز؟ مىسال كەلتىرىڭىز.
15 سالونيكادا پاۋىلمەن بولعان جاعدايدان قانداي ساباق الامىز؟ ٴبىز قانداي دا ٴبىر قىزمەت ٴتۇرىن اتقارعىمىز كەلگەنمەن، كەزدەيسوق جاعدايلار تۋىپ قالۋى مۇمكىن (ۋاع. 9:11). مۇندايدا قولجەتىمدى باسقا ماقساتقا ۇمتىلساق بولادى. تەد پەن حايدي دەگەن ەرلى-زايىپتى باۋىرلاستار وسىلاي ىستەدى. ولار دەنساۋلىقتارىنا بايلانىستى بەتەلدىك قىزمەتتەرىن اياقتاعان ەدى. ٴبىراق ەحوبانى جاقسى كورگەندىكتەن، قىزمەتتىڭ باسقا تۇرلەرىنە ۇمتىلا باستادى. الدىمەن، ولار تۇراقتى ٸزاشار، كەيىن ارنايى ٸزاشار بولىپ قىزمەت ەتتى. تەد باۋىرلاس اۋداندىق باقىلاۋشىنىڭ ورىنباسارى بولىپ، سول قىزمەتتى اتقارۋدى ۇيرەنىپ ٴجۇردى. ٴبىراق سول ارادا اۋداندىق باقىلاۋشىلاردىڭ جاستارىنا قاتىستى تالاپ وزگەرگەندىكتەن، تەد پەن حايديگە بۇل قىزمەتتى توقتاتۋعا تۋرا كەلدى. بۇعان كوڭىلدەرى تۇسكەنىمەن، ولار ەحوباعا قىزمەت ەتۋدىڭ باسقا دا جولدارى بار ەكەنىن ٴتۇسىندى. «ٴبىز قىزمەتتىڭ تەك ٴبىر تۇرىمەن شەكتەلمەۋدى ۇيرەندىك»،— دەيدى تەد باۋىرلاس.
16. عالاتتىقتارعا 6:4 تەن قانداي ساباق الامىز؟
16 ومىرىمىزدە بولاتىن كەي جاعدايلارعا ٴبىز ەش اسەر ەتە المايمىز. سوندىقتان قانداي دا ٴبىر قىزمەت ٴتۇرىن اتقارا الماي قالساق، ەحوباعا بۇرىنعىداي باعالى بولماي قالدىم دەپ ويلامايىق. سونداي-اق بىزدە جوق قىزمەت ٴتۇرىن اتقارىپ جۇرگەن باۋىرلاستارمەن ٶزىمىزدى سالىستىرمايىق. حايدي باۋىرلاس: «وزىڭنىڭ ٶمىرىڭدى وزگەلەردىڭ ومىرىمەن سالىستىرا باستاساڭ، جۇرەگىڭنەن قۋانىش كەتەدى ەكەن»،— دەيدى (عالاتتىقتارعا 6:4 وقىڭىز). سوندىقتان ەحوباعا جانە باۋىرلاستارىمىزعا قىزمەت ەتۋدىڭ جولدارىن تابا بىلەيىك c.
17. قانداي دا ٴبىر مارتەبەلى قىزمەتكە قول جەتكىزۋ ٷشىن، نە ىستەي الاسىز؟
17 مارتەبەلى قىزمەتتەرگە ەسىك اشىلسىن دەسەڭىز، قاراپايىم ٶمىر ٴسۇرىڭىز، مۇمكىندىگىنشە قارىز الماۋعا تىرىسىڭىز. ۇلكەن ماقساتتارعا جەتۋ ٷشىن، الدىمەن، كىشىگىرىم ماقساتتار قويىڭىز. مىسالى، بولاشاقتا تۇراقتى ٸزاشار بولىپ قىزمەت ەتكىڭىز كەلسە، ٴقازىر ۇزدىكسىز قوسالقى ٸزاشار رەتىندە قىزمەت ەتە الاسىز با؟ ال ەگەر قىزمەت كومەكشىسى بولعىڭىز كەلسە، ۋاعىزعا كوبىرەك اتسالىسىپ، قاۋىمىڭىزداعى ناۋقاستانىپ قالعان نە قارت باۋىرلاستارعا كوڭىل بولە الاسىز با؟ قانداي تاپسىرما الساڭىز دا، وعان بىلەك سىبانا كىرىسىڭىز (ريم. 12:11). قازىردەن باستاپ تاجىريبە جيناي بەرسەڭىز، بولاشاقتا مارتەبەلى قىزمەتتەردى اتقارا الاسىز.
ٴقولجەتىمدى ماقساتقا ۇمتىلىڭىز (18-ابزاستى قاراڭىز) f
18. بەۆەرلي باۋىرلاستان نە ۇيرەندىڭىز؟ سۋرەتتى دە قاراڭىز.
18 قانداي جاستا بولساق تا، رۋحاني ماقساتتار قويىپ، ولارعا جەتۋگە ەشقاشان دا كەش ەمەس. جەتپىس بەس جاستاعى بەۆەرلي دەگەن ايەل باۋىرلاستىڭ وقيعاسىن قاراستىرايىق. اۋىر سىرقاتىنىڭ كەسىرىنەن ٴجۇرىپ-تۇرۋ وعان وتە قيىن. ٴبىراق ول ەسكە الۋ كەشىنىڭ قارساڭىنداعى ناۋقانعا بارىنشا قاتىسقىسى كەلدى، ٴسۇيتىپ، ناقتى ماقساتتار قويدى. كەيىن ولارعا جەتىپ، ناۋقانعا بارىنشا قاتىسا العاندا، قۋانىشىندا شەك بولمادى! بۇنى كورگەن باسقا جاريالاۋشىلار دا قىزمەتكە كوبىرەك قاتىساتىن بولدى. كەيبىر جاعدايلار اياقتارىنا تۇساۋ بولسا دا، بارىنشا قىزمەت ەتىپ جۇرگەن قاريا باۋىرلاستارىمىزدى ەحوبا جوعارى باعالايدى (ٴزاب. 71:17، 18).
19. ٴبىز قانداي رۋحاني ماقساتتارعا ۇمتىلساق بولادى؟
19 قولجەتىمدى ماقساتتار قويىڭىز. ەحوباعا ۇنامدى قاسيەتتەر دامىتىڭىز. ەحوبا ٴسىزدى كوبىرەك قولدانا الۋى ٷشىن جانە ۇيىمعا كوبىرەك پايداڭىز تييۋ ٷشىن، قاجەتتى قابىلەتتەردى شىڭداڭىز. باۋىرلاستارعا كوبىرەك قىزمەت ەتۋدىڭ جولدارىن تابىڭىز d. سوندا ەحوبانىڭ باتاسىنىڭ ارقاسىندا، تىموتە سياقتى، ٴسىزدىڭ دە «جەتىستىكتەرىڭىز جۇرتتىڭ بارىنە انىق كورىنەتىن بولادى» (ٴتىم. 1-ح. 4:15).
38-ٵن قۇداي ساعان كۇش بەرەدى
a تىموتەنىڭ ىزگى حاباردى جاريالاۋدا ٴبىراز تاجىريبەسى بولعان. دەسە دە پاۋىل ونى بۇل ىستە قابىلەتتەرىن ارتتىرا بەرۋگە شاقىرعان. پاۋىلدىڭ كەڭەسىنە قۇلاق اسقاننىڭ ارقاسىندا تىموتە ەحوباعا دا، باۋىرلاستارعا دا كوبىرەك قىزمەت ەتە الدى. ٴسىز دە تىموتە سياقتى كوبىرەك قىزمەت ەتكىڭىز كەلە مە؟ ەندەشە، قانداي ماقساتتار قويعانىڭىز ٴجون جانە ماقسات قويىپ، وعان جەتۋدىڭ جولدارى قانداي؟
b ٴسوز ٴمانى: ەحوباعا مولىنان قىزمەت ەتىپ، ونى قۋانتۋ ٷشىن بار كۇشىمىزدى سالىپ اتقاراتىن ىستەردىڭ ٴبارى رۋحاني ماقساتتارعا جاتادى.
c «ەحوبانىڭ ەركىن ورىنداۋ ٷشىن ۇيىمداسقانبىز» كىتابىنداعى 10 تاراۋدىڭ «قاجەتتىلىك بار جەردە قىزمەت ەتۋ» دەگەن تاقىرىپشاسىن (6—9 ابز.) قاراڭىز.
d «ماڭگى باقي ٶمىردىڭ راقاتىن كورىڭىز!» كىتابىنداعى «رۋحاني العا باسا بەرىڭىز» دەگەن 60-ساباقتى قاراڭىز.
e سۋرەتتەر سيپاتتاماسى: ەر باۋىرلاس ەكى ايەل باۋىرلاسقا جوندەۋ جۇمىستارىن ۇيرەتىپ جاتىر، كەيىن ايەل باۋىرلاستار جاڭادان ۇيرەنگەن قابىلەتتەرىن قولدانىپ جاتىر.
f سۋرەتتەر سيپاتتاماسى: دەنساۋلىعىنا بايلانىستى ۇيىنەن شىعا الماي قالعان ايەل باۋىرلاس تەلەفونمەن ۋاعىزداپ، ادامداردى ەسكە الۋ كەشىنە شاقىرىپ وتىر.