16-زەرتتەۋ ماقالاسى
ەحوباعا ەڭ جاقسىسىن بەرۋدەن قۋانىش تابىڭىز
«اركىم ٶز ٸس-ارەكەتىن تەكسەرسىن» (عال. 6:4).
37-ٵن ەحوباعا جان-تانىممەن قىزمەت ەتەمىن
اڭداتپا a
1. ٴبىز نەدەن ەرەكشە قۋانىش سەزىنەمىز؟
ەحوبا ٴبىزدىڭ قۋانىشتى دا باقىتتى بولعانىمىزدى قالايدى. كيەلى رۋحتىڭ جەمىسىنەن قۋانىش قاسيەتىنىڭ دە ورىن العانى وسىعان بىردەن-ٴبىر دالەل (عال. 5:22). «العاننان گورى بەرگەن باقىتتى» دەگەندەي، ٴبىز ماسىحشىلىك قىزمەتىمىزدى بارىمىزدى سالىپ اتقارعاندا جانە باۋىرلاستارىمىزعا ٴتۇرلى كومەك كورسەتىپ، قول ۇشىن سوزعاندا، ەرەكشە قۋانىشقا كەنەلەمىز (ەل. ٸس. 20:35).
2، 3. ا) عالاتتىقتارعا 6:4 تە ايتىلعانداي، قۋانىش ساقتاپ قىزمەت ەتۋگە قانداي ەكى جايت كومەكتەسەدى؟ ٵ) بۇل ماقالادا نە جايلى قاراستىرامىز؟
2 عالاتتىقتارعا 6:4 تە (وقىڭىز) ەلشى پاۋىل قۋانىشىمىزدى ساقتاپ قالۋعا سەبەپكەر بولاتىن ەكى جايتتى اتاپ ٶتتى. بىرىنشىدەن، ٴبىز ەحوباعا وزىمىزدەگى ەڭ جاقسىسىن بەرۋىمىز كەرەك جانە سولاي ەتىپ جۇرگەنىمىزگە قۋانۋىمىز كەرەك (مات. 22:36—38). ەكىنشىدەن، ٶزىمىزدى باسقالارمەن سالىستىرماۋ قاجەت. ٴبىز بارلىعىن دا ەحوبا اكەمىزدەن الدىق. سوندىقتان بىزدە بار دەنساۋلىقتىڭ، ٴبىلىمنىڭ يا قابىلەت-دارىننىڭ ارقاسىندا قانداي ىستەر اتقارىپ جۇرمەيىك، بۇل ٷشىن ەحوباعا راقمەت ايتۋىمىز كەرەك. ال ەگەر باسقا باۋىرلاس قانداي دا ٴبىر قىزمەتتى بىزدەن دە جاقسىراق اتقارىپ جاتسا، قۋانا ٴبىلۋىمىز كەرەك. ويتكەنى ول ٶزىنىڭ قابىلەتتەرىن جۇرتتىڭ كوزىنە ٴتۇسۋ ٷشىن يا پايدا كورۋ ٷشىن ەمەس، ەحوبانى ماداقتاۋ ٷشىن قولدانىپ ٴجۇر. سوندىقتان ونىمەن جارىسپاي، قايتا ٴبىر نارسەگە ۇيرەنىپ الايىق.
3 بۇل ماقالادا ٴبىز ٶزىمىز قالاعانداي كوپ قىزمەت ەتە الماي جاتساق، ەڭسەمىزدى تۇسىرمەۋگە نە كومەكتەسەتىنىن، قابىلەت-دارىنىمىزدى بارىنشا قولدانۋ ٷشىن نە ىستەي الاتىنىمىزدى جانە وزگەلەردى قالاي ۇلگى ەتە الاتىنىمىزدى قاراستىرامىز.
مۇمكىندىگىمىز شەكتەۋلى بولعاندا
ٶمىرىمىزدىڭ ٵر كەزەڭىندە ەحوباعا ەڭ جاقسىسىن بەرسەك، ول قاتتى قۋانادى (4—6 ابزاستاردى قاراڭىز) b
4. ٴبىزدىڭ نە سەبەپتى ەڭسەمىز ٴتۇسۋى مۇمكىن؟ مىسال كەلتىرىڭىز.
4 كەيبىر باۋىرلاستارعا قارتايىپ جاتقاندىقتان يا دەنساۋلىعى سىر بەرگەندىكتەن، مۇمكىندىكتەرى شەكتەلىپ قالعانىنا كونۋ قيىن بولىپ جاتادى. كەرول ەسىمدى ايەل باۋىرلاسىمىز وسىنداي كۇي كەشكەن. بۇرىن قاجەتتىلىك بار جەردە قىزمەت ەتىپ جۇرگەن كەزىندە ونىڭ 35 زەرتتەۋ ساباعى بولعان. ول سولاردىڭ بىرنەشەۋىنە ەحوباعا باعىشتالىپ، شومىلدىرۋ راسىمىنەن وتۋگە كومەكتەسكەن. سول كەزدەرى ونىڭ قىزمەتى وتە جەمىستى ەدى. ٴبىراق ول كەيىن ناۋقاستانىپ، ۇيىنەن شىعا الماي قالادى. كەرول بىلاي دەيدى: «ارينە، مەن دەنساۋلىعىما بايلانىستى باسقالار سياقتى قىزمەت ەتە المايتىنىمدى تۇسىنەمىن. سوندا دا مەن ٶزىمدى ولار سياقتى جاقسى ٴماسىحشىمىن دەپ ەسەپتەمەيمىن. قالاۋىم قانشا كۇشتى بولىپ تۇرسا دا، جاعدايىم ەش تۋرا كەلمەيدى. سوعان قاتتى قىنجىلامىن». كەرول باۋىرلاس ەحوباعا بارىن بەرىپ قىزمەت ەتكىسى كەلەدى، ونىڭ بۇل نيەتى ماقتاۋعا تۇرارلىق. ٴبىزدىڭ جاناشىر قۇدايىمىز ونىڭ بارىنشا تىرىسىپ جاتقانىنا، ارينە، وتە ريزا!
5. ا) مۇمكىندىگىمىز شەكتەلىپ قالعانىنا ٶزىمىزدى جامان سەزىنىپ جۇرسەك، نەنى ۇمىتپاۋىمىز كەرەك؟ ٵ) سۋرەتتەگى ەر باۋىرلاستىڭ ٵرقاشان دا ەحوباعا بار جاقسىسىن بەرگەنى نەدەن كورىنەدى؟
5 مىناداي ٴبىر جاعدايدى ەلەستەتەيىك: سەكسەن جاسقا كەلگەن ايەل باۋىرلاس ٶزىنىڭ قىرىق جاسىنداعىداي كوپ قىزمەت ەتە المايتىنىنا ەڭسەسى ٴتۇسىپ، جامان بولىپ وتىر. ول بارىن سالىپ قىزمەت ەتىپ جۇرسە دە، بۇعان ەحوبانىڭ كوڭىلى تولمايدى دەپ ويلايدى. ٴبىراق، راسىندا دا، بۇل سولاي ما؟ ويلاپ قاراساق، بۇل باۋىرلاس قىرىق جاسىندا ەحوباعا قالاي بارىن سالىپ قىزمەت ەتسە، سەكسەن جاسىندا دا تۋرا سولاي ەحوباعا ەڭ جاقسىسىن بەرىپ ٴجۇر. ەگەر ٴسىزدىڭ دە مۇمكىندىگىڭىز شەكتەۋلى بولعاندىقتان، كوپ قىزمەت ەتە المايتىنىڭىزعا كوڭىلىڭىز ٴتۇسىپ جۇرسە: «ال ەحوبا مەنەن نە تالاپ ەتەدى؟»— دەپ ويلانىپ كورىڭىز. ەحوبا ٴسىزدىڭ قازىرگى جاعدايىڭىزدا قولىڭىزدان نە كەلسە — سونى بار ىنتاڭىزبەن ىستەگەنىڭىزدى قالايدى. ەندەشە، «قىزمەتىمە ەحوبانىڭ كوڭىلى تولمايدى» دەگەن سياقتى ويلار كەلە باستاسا، مىنانى بىردەن ەسكە ٴتۇسىرىڭىز: ەحوباعا نەنىڭ ۇنايتىنىن شەشەتىن — ٴبىز ەمەس، ونىڭ ٶزى. ال ٴبىز شامامىز كەلگەنشە ەڭ جاقسىمىزدى بەرسەك، ول ٴبىزدى: «جارايسىڭ!»— دەپ ماقتايدى (ماتاي 25:20—23 سالىستىرىڭىز).
6. ماريا باۋىرلاستان نە ۇيرەنە الامىز؟
6 ٴبىز قولىمىزدان كەلمەيتىندى ەمەس، قولىمىزدان كەلىپ تۇرعان ىستەردى ويلايتىن بولساق، قۋانىشتى بولىپ ٴجۇرۋ وڭاي بولادى. مىسالى، ماريا ەسىمدى باۋىرلاس ٴبىر دەرتكە شالدىققاندىقتان، كوپ قىزمەت ەتۋگە شاماسى جەتپەيدى ەكەن. العاشىندا وسى ٷشىن جانى كۇيزەلىپ، ول ٶزىن تۇككە جارامسىز بولىپ قالعانداي سەزىنەدى. ٴبىراق كەيىن ول قاۋىمداعى توسەككە تاڭىلعان ٴبىر باۋىرلاستى ويىنا الىپ، سوعان كومەكتەسۋدى ۇيعارادى. «سول ايەل باۋىرلاس ەكەۋىمىز بىرگە حات جازىپ، تەلەفون ارقىلى ۋاعىزداۋعا كەلىسىپ الدىق. ونىمەن قىزمەتتەسىپ كەلگەن سايىن، باۋىرلاسىما كومەكتەسە العانىم ٷشىن كەۋدەمدى قۋانىش كەرنەپ، قاناعات سەزىنەتىن بولدىم»،— دەيدى ماريا. سول سەكىلدى نەلىكتەن بىزگە دە قولىمىزدان كەلىپ تۇرعان ىستەرگە نازار تىگىپ، قۋانىشىمىزدى ەسەلەمەسكە؟ ال ەندى كوبىرەك قىزمەت ەتۋ قولىمىزدان كەلىپ تۇرسا جانە قانداي دا ٴبىر قىزمەتتى اتقارۋدا ەرەكشە دارىندى بولساق، نە ىستەۋ كەرەكتىگىن قاراستىرىپ كورەيىك.
«سي الساڭدار، ... قولدانىڭدار»
7. ەلشى پەتىر باۋىرلاستارعا قانداي جاقسى كەڭەس بەردى؟
7 ەلشى پەتىر ٶزىنىڭ ٴبىرىنشى حاتىندا ماسىحشىلەردى سيلارىن، ياعني قابىلەت-دارىندارىن باۋىرلاستاردىڭ يگىلىگىنە جاراتىپ، ولاردى نىعايتۋعا شاقىرعان. ول بىلاي دەگەن: «ٵرقايسىسىڭ قاي مولشەردە سي الساڭدار، ونى ٴبىر-بىرىڭە قىزمەت ەتۋ ٷشىن سول مولشەردە قولدانىڭدار» (پەت. 1-ح. 4:10). ٴبىز وزگەلەر قىزعانادى يا بولماسا ۇنجىرعاسى ٴتۇسىپ كەتەدى دەپ قورقىپ، وزىمىزدە بار سيلاردى بارىنشا قولدانۋدان تارتىنىپ قالماۋىمىز كەرەك. ەگەر وسىلاي ويلاپ، بارىمىزدى سالماي قويساق، ەحوباعا ٶز جاعدايىمىزدا ەڭ جاقسىمىزدى بەرمەگەن بولار ەدىك.
8. قورىنتتىقتارعا 1-حات 4:6، 7 گە ساي، سيىمىزعا نەلىكتەن ماقتانباۋىمىز كەرەك؟
8 ٴبىز وزىمىزدەگى سيلاردى بارىنشا قولدانۋعا تىرىسۋىمىز كەرەك، ارينە. ٴبىراق ٴبىر نارسەدەن اباي بولعانىمىز ٴجون (قورىنتتىقتارعا 1-حات 4:6، 7 وقىڭىز). ٴسىز ادامدارمەن كيەلى كىتاپتى زەرتتەۋ ساباعىن شەبەر باستاي بىلەسىز دەلىك. ەندەشە، بۇل سيىڭىزدى يگىلىككە جاراتا بەرىڭىز! ٴبىراق اباي بولاتىن ٴبىر جايت — سول ٷشىن ماقتانىپ كەتپەڭىز. مىناداي ٴبىر جاعدايدى ەلەستەتىپ كورسەك بولادى: ٴسىز جاقىندا عانا قىزمەتتە ٴبىر زەرتتەۋ ساباعىن باستاپ كەتتىڭىز. ٴسۇيتىپ، وسى كەرەمەت وقيعا جايىندا ۋاعىزدايتىن توبىڭىزعا ايتىپ بەرۋگە اسىعىپ وتىرسىز. كەيىن توپپەن كەزدەسسەڭىز، باسقا باۋىرلاس ٶزىنىڭ ٴبىر ادامعا جۋرنال بەرگەنىن ايتىپ وتىر ەكەن. ٴسىز سوندا نە ىستەيسىز؟ ول باۋىرلاس جۋرنال بەرىپتى، ال ٴسىز زەرتتەۋ ساباعىن باستادىڭىز. بۇل باۋىرلاستاردى جىگەرلەندىرەتىن وقيعا بولعانمەن، ٴسىز ونى باقسا جولى ايتىپ بەرۋدى ٴجون كورەرسىز، ويتكەنى الگى جۋرنال بەرگەن باۋىرلاس ٶزىن سىزبەن سالىستىرىپ، قۋانىشى باسىلىپ قالعانىن قالاماس ەدىڭىز. بۇل ٴسىزدىڭ تاراپىڭىزدان مەيىرىمدىلىككە جاتادى. ارينە، بۇل دەگەن زەرتتەۋ ساباعىن ۇسىنۋدى دوعارۋىمىز كەرەك دەگەندى بىلدىرمەيدى. سيىڭىزدى بارىنشا قولدانا بەرىڭىز!
9. سيلارىمىزدى قالاي قولدانۋىمىز كەرەك؟
9 بىزدەگى تۋما دارىن مەن قابىلەتتىڭ بارلىعى قۇدايدىڭ بەرگەن سيى ەكەنىن ۇمىتپالىق. ٴبىز ول سيلاردى كوزگە ٴتۇسۋ ٷشىن ەمەس، قاۋىمدى نىعايتىپ، جىگەرلەندىرۋ ٷشىن قولدانۋىمىز كەرەك (ٴفىلىپ. 2:3). بويىمىزداعى كۇش-قايراتىمىز بەن قابىلەتتەرىمىزدى قۇدايدىڭ ەركىن ورىنداۋعا جۇمساي بىلسەك، ٴبىز بۇعان قۋانامىز. ٴبىراق وزگەلەردەن اسىپ تۇسكەنىمىزگە يا مىقتىلىعىمىزدى كورسەتكەنىمىزگە ەمەس، ەحوبانى ماداقتاۋ ٷشىن قولدانعانىمىزعا قۋانامىز.
10. نەگە ٶزىمىزدى وزگەلەرمەن سالىستىرۋ ورىنسىز؟
10 ساق بولماسا، باۋىرلاس ٶزىنىڭ مىقتى جاقتارىن باسقانىڭ ٵلسىز جاقتارىمەن سالىستىرا باستاۋى مۇمكىن. مىسالى، ٴبىر ەر باۋىرلاس كەرەمەت بايانداماشى شىعار. بۇل ونىڭ كۇشتى جاعى بولىپ تۇر. ٴبىراق اباي بولماسا، ىشتەي ٶزىن جوعارى ساناپ، باياندامانى ونشا ايتا المايتىن باۋىرلاسقا مەنسىنبەي قاراي باستاۋى مۇمكىن. ٴبىراق ول باۋىرلاستىڭ باسقا مىقتى جاقتارى بار شىعار. مىسالى، ول وتە قوناقجاي، بالالارىنا جاقسى تاربيە بەرەدى جانە قىزمەتتە بەلسەندىلىك تانىتادى. ارامىزدا سيلارىن ەحوباعا قىزمەت ەتۋ ٷشىن جانە وزگەلەرگە كومەكتەسۋ ٷشىن قولدانىپ جۇرگەن ٴتۇرلى باۋىرلاستاردىڭ بارىنا ريزا بولايىق!
ارامىزدا جۇرگەن باۋىرلاستاردان ۇيرەنەيىك
11. نەلىكتەن يساعا ەلىكتەۋگە تىرىسۋىمىز كەرەك؟
11 ٶزىمىزدى وزگەلەرمەن سالىستىرۋدان اۋلاق بولعانىمىزبەن، ادال ادامداردىڭ ۇلگىسىنەن وزىمىزگە كوپ ساباق ٴتۇيىپ الساق بولادى. مىسالى، يسا بىزگە كەرەمەت ۇلگى قالدىرىپ كەتكەن. ٴبىز ول سياقتى كەمەلدى بولماساق تا، ونىڭ كوركەم قاسيەتتەرى مەن كەرەمەت ىستەرىنەن كوپ نارسەگە ۇيرەنە الامىز (پەت. 1-ح. 2:21). يسانىڭ ۇلگىسىنە ەلىكتەۋگە بارىنشا تىرىسساق، ەحوباعا دەگەن ۇنامدىلىعىمىز ارتا تۇسەدى جانە ۋاعىز ىسىندە دە جەمىستى بولامىز.
12، 13. داۋىت پاتشادان نە ۇيرەنەمىز؟
12 كيەلى كىتاپتا كەمەلسىز بولسا دا، ەلىكتەۋگە تۇرارلىق ادامداردىڭ ۇلگىسى وتە كوپ (ەۆر. 6:12). مىسالى، ٴداۋىتتى الايىقشى. ەحوبا ول جايلى: «مەنىڭ كوڭىلىمنەن شىعاتىن ادام»،— دەگەن (ەل. ٸس. 13:22). ٴبىراق ٴداۋىت ٴمىنسىز بولعان جوق، ونىڭ ۇلكەن قاتەلىكتەر جىبەرگەن كەزدەرى دە بولدى. نەگە ونى سوندا دا ٴبىز ٷشىن جاقسى ۇلگى دەپ قاراستىرامىز؟ ويتكەنى ول قاتاڭ تۇزەتۋ العاندا، ٶزىن اقتاۋعا تىرىسپادى. ٴداۋىت تۇزەتۋدى قابىلداپ، ىستەگەن ىسىنە شىن وكىندى. ناتيجەسىندە ەحوبا ونى كەشىردى (ٴزاب. 51:3، 4، 10—12).
13 داۋىتتەن وزىمىزگە ساباق الۋ ٷشىن، مىنا سۇراقتار جايلى ويلانىپ كورسەك بولادى: «بىرەۋ كەڭەس بەرسە، مەن قالاي قابىلدايمىن؟ قاتەمدى بىردەن مويىندايمىن با، الدە ٶزىمنىڭ دۇرىستىعىمدى دالەلدەپ، اقتالىپ شىعامىن با؟ كىنانى بىرەۋگە جابا سالامىن با؟ قاتەلىگىمدى قايتالاماۋعا بارىنشا تىرىسامىن با؟» كيەلى كىتاپتان باسقا دا ادال كىسىلەر جايلى وقىعاندا، وسىعان ۇقساس سۇراقتاردىڭ ۇستىنەن ويلانىپ كورسەڭىز بولادى. ولار سىزدىكىندەي قيىندىقتارعا كەزىككەن بە ەكەن؟ سول كەزدە ولار قانداي كەرەمەت قاسيەتتەر تانىتقان؟ ەحوبانىڭ سول ادال قىزمەتشىسىنە قالاي ۇقساي تۇسسەڭىز بولادى؟
14. باۋىرلاستار تۋرالى ويلانساڭىز، ولاردان نە ۇيرەنە الاسىز؟
14 بۇعان قوسا، ٴبىز جاسى بار، قارتى بار — كوز الدىمىزدا جۇرگەن باۋىرلاستاردىڭ بارىنەن كوپ نارسەگە ۇيرەنە الامىز. مىسالى، ٴسىزدىڭ قاۋىمىڭىزدا قۇرداستاردىڭ قىسىمىنا يا وتباسىنىڭ قارسىلىعىنا، بولماسا ناشار دەنساۋلىققا قاراماستان ادالدىق ساقتاپ جۇرگەن باۋىرلاس بار ما؟ ٴسىز ونىڭ بويىنداعى ماقتاۋعا تۇرارلىق قانداي قاسيەتتى بايقايسىز؟ مۇمكىن، سول قاسيەتتى جاقسىراق تانىتقىڭىز كەلەتىن شىعار. ٴسىز سول باۋىرلاستىڭ ۇلگىسى جايلى ويلانا وتىرىپ، قيىنشىلىقتارىڭىزعا توتەپ بەرۋدىڭ ٴتيىمدى جولدارىن ٴبىلىپ الارسىز. ٴبىز ارامىزداعى سەنىمنىڭ كەرەمەت ۇلگىسىن كورسەتىپ جۇرگەن باۋىرلاستارعا ريزامىز. ولاردىڭ بارى قانداي كەرەمەت! (ەۆر. 13:7؛ جاق. 1:2، 3).
ٶز قىزمەتىڭىزدەن قۋانىش تابىڭىز
15. پاۋىل ەحوباعا ٵرى قاراي دا قۋانىشپەن قىزمەت ەتۋىمىزگە كومەكتەسەتىن قانداي كەڭەس بەردى؟
15 اركىم ەڭ جاقسىسىن بەرۋگە تىرىسسا، قاۋىمنىڭ ىنتىماعى مەن بىرلىگىنە ۇلەس قوسادى. قالاي؟ مىسالى، I عاسىرداعى ماسىحشىلەردە ٵرتۇرلى سيلار مەن جاۋاپكەرشىلىكتەر بولعان (قور. 1-ح. 12:4، 7—11). ٴبىراق ولار بۇل ٷشىن ٴبىر-بىرىمەن باقتالاسىپ، جىك-جىككە ٴبولىنىپ كەتپەگەن. قايتا، پاۋىل ولاردى سيلارىن «ٴماسىحتىڭ دەنەسىن نىعايتۋ ٷشىن» قولدانۋعا شاقىرعان. ال ەفەستىكتەرگە ول بىلاي دەپ جازعان: «ٵر مۇشەسى ٶز مىندەتىن دۇرىس اتقارعاندا، دەنە ٶسىپ، سۇيىسپەنشىلىك ارقىلى نىعايا تۇسەدى» (ەفەس. 4:1—3، 11، 12، 16). وسى سوزدەرگە ساي ارەكەت ەتكەن ماسىحشىلەر قاۋىمدا بىرلىك پەن تاتۋلىقتىڭ بولۋىنا اتسالىسقان. بۇگىندەگى قاۋىمدارعا دا وسىنداي تاتۋلىق پەن بىرلىك ٴتان.
16. ٴبىز نە نارسەگە نىق بەكىنۋىمىز قاجەت؟ (ەۆرەيلەرگە 6:10)
16 بۇدان بىلاي ٶزىڭىزدى وزگەلەرمەن سالىستىرماۋعا نىق بەكىنىڭىز. قايتا، يسادان كوپ نارسەگە ۇيرەنىپ، ونىڭ قاسيەتتەرىنە ەلىكتەۋگە تىرىسىڭىز. كيەلى كىتاپتا ايتىلىپ كەتكەن تۇلعالاردىڭ جانە قازىرگى كەزدەگى باۋىرلاستاردىڭ سەنىمىنە ەلىكتەڭىز. بارىنشا تىرىسا بەرسەڭىز، «ٵدىل قۇدايىمىز ەحوبا ٴسىزدىڭ ەڭبەگىڭىزدى ۇمىتپايدى» (ەۆرەيلەرگە 6:10 وقىڭىز). ەحوبا ٴسىزدىڭ جان-تانىڭىزبەن اتقارىپ جاتقان قىزمەتىڭىزگە دان ريزا ەكەنىن ٴبىلىپ، ٵرى قاراي دا قۋانىشپەن قىزمەت ەتە بەرىڭىز.
65-ٵن العا ۇمتىل!
a ٴبارىمىز دە باسقالارعا قاراپ، ٴبىر نارسەگە ۇيرەنە الامىز. ٴبىراق ٴبىر ٴقاۋىپ بار. بۇل ماقالا ٶزىمىزدى وزگەلەرمەن سالىستىرىپ، ماقتانشاق بولىپ كەتۋدەن نەمەسە، كەرىسىنشە، كوڭىلىمىزدى تۇسىرۋدەن ساقتاندىرادى. سونداي-اق قىزمەتتەگى قۋانىشىمىزدى ساقتاۋعا كومەكتەسەدى.
b سۋرەت سيپاتتاماسى: ەر باۋىرلاس جاس كەزىندە بەتەلدە قىزمەت ەتتى. كەيىن ۇيلەنىپ، ايەلىمەن بىرگە ٸزاشار بولدى. بالالى بولعاننان كەيىن، بالالارىنا ۋاعىزداۋدى ۇيرەتتى. ەندى قارتايعان شاعىندا حات جازۋ ارقىلى ۋاعىزداپ، وزىندەگى ەڭ جاقسىسىن بەرىپ جاتىر.
