16-زەرتتەۋ ماقالاسى
«باۋىرىڭ قايتا تىرىلەدى!»
«يسا [مارتاعا]: «باۋىرىڭ قايتا تىرىلەدى»،— دەدى» (جوح. 11:23).
151-ٵن ول شاقىرادى
اڭداتپا a
1. مەتيۋ دەگەن ٴبىر بالانىڭ قايتا تىرىلۋگە سەنەتىنى نەدەن بايقالدى؟
مەتيۋ دەگەن بالانىڭ اۋىر سىرقاتى بار. ول كوپ وتا جاساتقان. بىردە ول وتباسىمەن ®JW Broadcasting باعدارلاماسىن كورىپ وتىرىپ، سوڭىندا قايتا تىرىلگەن سۇيىكتى جاندارىمىزبەن قاۋىشۋ جايلى بەينەباياندى تاماشالايدى b. كورىپ بولعان سوڭ، جەتى جاسار مەتيۋ اتا-اناسىنىڭ قولىنان ۇستايدى دا: «اناشىم، اكەشىم، كوردىڭىزدەر مە، مەن ٶلىپ قالسام دا، قايتا تىرىلەمىن. سىزدەر مەنى كۇتىڭىزدەر، ٴبارى جاقسى بولادى»،— دەيدى. بالالارىنىڭ قايتا تىرىلۋگە شىن سەنەتىنىن كورىپ، اتا-اناسىنىڭ جۇرەگى ەلجىرەپ كەتتى.
2، 3. نەلىكتەن قايتا ٴتىرىلۋ جايلى ويلانىپ تۇرعانىمىز ماڭىزدى؟
2 بولاشاقتا جەر بەتىندە بولاتىن ٴتىرىلىس جايلى وقتىن-وقتىن وي جۇگىرتىپ تۇرعانىمىز ماڭىزدى (جوح. 5:28، 29). ويتكەنى اياقاستىنان ٴبىر قاتەرلى اۋرۋعا شالدىعۋىمىز نەمەسە جاقىنىمىزدان ايىرىلىپ قالۋىمىز مۇمكىن (ۋاع. 9:11؛ جاق. 4:13، 14). ال قايتا تىرىلۋگە دەگەن ٷمىت وسىنداي اۋىر جاعدايلاردا سىنباۋعا كومەكتەسەدى (سال. 1-ح. 4:13). كيەلى جازبالاردا انىق ايتىلعانداي، ەحوبا ٴبىزدى وزىمىزدەن دە جاقسى بىلەدى جانە قاتتى سۇيەدى (لۇقا 12:7). راسىمەن دە، ەگەر ول ٵربىر مارقۇمدى وزىندىك جان دۇنيەسىمەن، جادىنداعى بۇكىل ەستەلىكتەرىمەن قايتا تۇرعىزا السا، دەمەك، ٴارقايسىسىمىزدى وتە جاقسى بىلەدى! ال قايتىس بولىپ كەتسەك تە، قايتا ٴتىرىلتىپ، ماڭگى ٶمىر سيلايمىن دەگەن ۋادەسىنەن ٴبىزدى شىنىمەن دە قاتتى سۇيەتىنىن كورەمىز!
3 بۇل ماقالادان، بىرىنشىدەن، قايتا ٴتىرىلۋدىڭ بولاتىنىنا نەلىكتەن سەنىمدى ەكەنىمىزدى بىلەمىز. كەيىن وسى سەنىمىمىزدى قايراي تۇسەتىن ٴبىر وقيعانى قاراستىرامىز. بۇل ماقالاعا ارقاۋ بولعان «باۋىرىڭ قايتا تىرىلەدى» دەگەن سوزدەر ٴدال سول وقيعادان الىنىپ وتىر (جوح. 11:23). سوڭىندا وسى ٷمىتىمىزدى جالىنداتا بەرۋگە كومەكتەسەتىن كەڭەستەردى بىلەمىز.
قايتا تىرىلۋگە سەنۋگە قانداي نەگىز بار؟
4. قاي كەزدە ٴبىز بىرەۋدىڭ ۋادەسىنە سەنە الامىز؟ مىسال كەلتىرىڭىز.
4 بىرەۋدىڭ بەرگەن ۋادەسىنە سەنۋ ٷشىن ٴبىز ەكى نارسەگە كوز جەتكىزۋىمىز كەرەك: ونىڭ سونى ىستەۋگە ىقىلاستى ەكەنىنە جانە كۇشى جەتەتىنىنە. بۇعان ٴبىر قاراپايىم مىسال كەلتىرەيىك. ٷيىڭىز قانداي دا ٴبىر تابيعي اپاتتان قيراپ قالدى دەلىك. سوندا ٴبىر دوسىڭىز كەلىپ: «ۋايىمداما، ٷيىڭدى قايتا تۇرعىزىپ بەرەمىن»،— دەپ ٴسوز بەرەدى. ٴسىز ونىڭ شىن نيەتپەن ايتىپ تۇرعانىن، قاتتى كومەكتەسكىسى كەلەتىنىن كورىپ تۇرسىز. بۇعان قوسا، ونىڭ قولىنان ٴبارى كەلەتىن قۇرىلىسشى ەكەنىن، قۇرال-سايماندارىنىڭ دا بار ەكەنىن بىلەسىز. سوندىقتان ول سوزىندە تۇراتىنىنا سەنەسىز. ال ەحوبانىڭ مارقۇمداردى قايتا تىرىلتەمىن دەگەن ۋادەسىنە سەنۋگە بولا ما؟ ۋادەسىن ورىنداۋعا ونىڭ ىقىلاسى بار ما؟ وعان شىنىمەن دە كۇشى جەتە مە؟
5، 6. ەحوبا مارقۇمداردى تىرىلتۋگە ىقىلاستى ەكەنىنە نەگە سەنىمدى بولا الامىز؟
5 ەحوبانىڭ مارقۇمداردى تىرىلتۋگە ىقىلاسى بار ما؟ بار ەكەنىندە ەشقانداي كۇمان جوق. ول وسى ۋادەسىن ٶز سوزىندە ٴبىر ەمەس، بىرنەشە ادامعا جازدىرعان (يشايا 26:19؛ وشيا 13:14؛ ايان 20:11—13). ال ەحوبانىڭ ۋادەسى ەشقاشان ورىندالماي قالمايدى (ەشۋا 23:14). ەحوبا دۇنيەدەن وتكەن جانداردى تىرىلتكىسى كەلەتىنى سونشا — سول ۋاقىتتى اڭساپ كۇتەدى! بۇنى قايدان بىلەمىز؟
6 ەحوبانىڭ ادال قىزمەتشىسى ايۇپكە نازار اۋدارايىق. ول كوز جۇمسا، ەحوبا ونى قايتا كورۋدى اڭسايتىنىنا سەنىمدى بولعان (ٵيۇپ 14:14، 15). ەحوبا دۇنيەدەن وتكەن باسقا دا ادال قىزمەتشىلەرىنىڭ ٴبارىن تىرىدەي كورگىسى كەلەدى. ولاردىڭ قايتادان ٶمىر ٴسۇرىپ، مىقتى دەنساۋلىقپەن باقىتتى عۇمىر كەشكەندەرىن قالايدى. ال ەحوبانى تانىپ ۇلگەرمەي، دۇنيەدەن ٶتىپ كەتكەن ميللياردتاعان ادام شە؟ مەيىرىمى مول قۇدايىمىز ولاردى دا قايتا كورگىسى كەلەدى (ەل. ٸس. 24:15). ولار دا ونىمەن دوستاسىپ، جەردە ماڭگى ٶمىر سۇرسە ەكەن دەيدى (جوح. 3:16). راسىندا دا، ەحوبا كوز جۇمعان ادامداردىڭ ٴبارىن تىرىلتكىسى كەلەتىنىنە انىق كوزىمىز جەتەدى.
7، 8. مارقۇمداردى تىرىلتۋگە ەحوبانىڭ كۇشى جەتەتىنىنە نەگە سەنىمدىمىز؟
7 ال ەحوبانىڭ مارقۇمداردى تىرىلتەتىن كۇشى بار ما؟ ارينە! ول «قۇدىرەتى شەكسىز قۇداي» عوي! (ايان 1:8) ەشقانداي دۇشپان ەحوباعا قارسى تۇرا المايدى، ٴتىپتى ٶلىم دە (قور. 1-ح. 15:26). وسىنى بىلگەنىمىز جانىمىزدى جۇباتىپ، كۇش بەرەدى. ەكىنشى دۇنيەجۇزىلىك سوعىس كەزىندە ەمما ارنولد باۋىرلاسپەن بولعان جاعدايدى قاراستىرايىق. ول وتباسىمەن بىرگە اياۋسىز قۋعىندالىپ، كونسلاگەردە سۇيىكتى جاندارىنان ايىرىلادى. قايعىرعان قىزىن جۇباتۋ ٷشىن ەمما: «ادامدار ولگەن سوڭ ەشقاشان تىرىلمەيتىن بولسا، دەمەك ٶلىمنىڭ قۇدايدان كۇشتى بولعانى عوي؟!»— دەيدى. ال ەحوبادان كۇشتى ەش نارسە جوق! قۇداي ادامدى ٶزى جاراتىپ، وعان ٶمىر بەرگەن بولسا، البەتتە ول جاراتقانىن قايتا قالپىنا كەلتىرە الادى!
8 ەحوبا قۇداي مارقۇمداردى تىرىلتە الاتىنىنىڭ تاعى ٴبىر سەبەبى ونىڭ ەستە ساقتاۋ قابىلەتىنىڭ شەكسىز بولعانىندا. ول ٵربىر جۇلدىزدىڭ اتىن بىلەدى (يشايا 40:26). مارقۇمداردى دا ەش ۇمىتپايدى (ٵيۇپ 14:13؛ لۇقا 20:37، 38). ٴتىپتى دەسەڭىز، ولاردىڭ گەنەتيكالىق كودىن، باستان وتكىزگەن جاعدايلارىن، ەستەلىكتەرىن دە بەس ساۋساقتاي بىلەدى.
9. ەحوبا مارقۇمداردى تىرىلتەمىن دەگەن ۋادەسىندە تۇراتىنىنا نە ٷشىن سەنىمدىسىز؟
9 ەحوبانىڭ مارقۇمداردى تىرىلتۋگە ىقىلاسى دا، كۇشى دە جەتەتىنىن بىلگەندىكتەن، ٴبىز ونىڭ وسى ۋادەسى ورىندالاتىنىنا تولىق سەنىمدىمىز. بۇعان كوزىمىزدى جەتكىزەتىن تاعى ٴبىر جايت — ەحوبا مارقۇمداردى تىرىلتكەن جاعدايلار ومىردە بولعان. ول بىرنەشە ادال قىزمەتشىسىنە ولگەندەردى تىرىلتۋگە كۇش بەرگەن. سولاردىڭ ىشىندە يسا دا بار. قازىر جوحان 11 تاراۋدا بولعان وقيعاعا كوڭىل بۇرايىق.
يسانىڭ جاقىن دوسىنان ايىرىلۋى
10. يسا يورداننىڭ ارعى بەتىندە ۋاعىزداپ جۇرگەندە، بەتانيادا قانداي جاعداي بولدى جانە ول نە ىستەدى؟ (جوحان 11:1—3)
10 جوحان 11:1—3 وقىڭىز. ب.ز. 32-جىلىنىڭ اياعى، بەتانيا قالاسى. مۇندا يسانىڭ ەلازار، مارتا جانە ٴماريام دەگەن دوستارى تۇرادى (لۇقا 10:38—42). وكىنىشكە قاراي، ەلازار اۋىرىپ قالىپ، اپكەلەرى ۋايىمداي باستادى. ٴسۇيتىپ، ولار بەتانيادان جاياۋ ەكى كۇندىك جەردە، يورداننىڭ ارعى بەتىندە جۇرگەن يساعا حابارشى جىبەرەدى (جوح. 10:40). شامامەن حابارشى يساعا جەتكەن ۋاقىتتا، ەلازار كوز جۇمادى. يسا ونىڭ قايتىس بولعانىن بىلسە دە، سول جەردە تاعى ەكى كۇنگە قالىپ، سودان كەيىن عانا جولعا شىعادى. يسا بەتانياعا جەتكەندە، ەلازاردىڭ ولگەنىنە ٴتورت كۇن بولعان ەدى. ٴبىراق يسا دوستارىن شاتتىققا بولەيتىن، ال ەحوبانى داڭقتايتىن ٴبىر كەرەمەت جاساماق بولدى (جوح. 11:4، 6، 11، 17).
11. يسادان دوس بولۋعا قاتىستى نە ۇيرەنەمىز؟
11 وسى وقيعادان ناعىز دوستىقتىڭ قانداي بولاتىنىن بىلەمىز. بايقاساق، مارتا مەن ٴماريام يساعا حابارشى جىبەرگەندە، ونى بەتانياعا شاقىرتپاعان. «جاقسى كورەتىن دوسىڭىز اۋىرىپ جاتىر» دەپ جاي عانا ونى حاباردار ەتكەن (جوح. 11:3). بۇعان قوسا، يسا ەلازاردى قاشىقتان-اق تىرىلتە الاتىن ەدى. ٴبىراق ول بەتانياعا بارىپ، دوستارى مارتا مەن ٴماريامنىڭ جانىندا بولۋدى ٴجون كوردى. ٴسىزدىڭ دە كومەككە ٴزارۋ كەزىڭىزدە ايتقىزباي كەلىپ، قول ۇشىن بەرەتىن دوسىڭىز بار ما؟ دەمەك، «قيىن شاقتا ارقا سۇيەر» ناعىز دوس تاپقانىڭىز (ناق. س. 17:17). ٶزىمىز دە باسقالار ٷشىن يسا سياقتى دوس بولا بىلەيىك. ال قازىر بەتانياعا ورالىپ، وقيعانىڭ قالاي وربىگەنىنە كوڭىل بۇرايىق.
12. يسا مارتاعا قانداي ۋادە بەردى جانە نەگە بۇل بوس ٴسوز بولعان جوق؟ (جوحان 11:23—26)
12 جوحان 11:23—26 وقىڭىز. مارتا يسانىڭ بەتانياعا كەلە جاتقانىن ەستي سالا، الدىنان شىعادى. ٴسۇيتىپ، وعان: «يەم، وسىندا بولعانىڭىزدا، باۋىرىم ولمەس ەدى»،— دەيدى (جوح. 11:21). راسىندا دا، يسا ەلازاردى اۋرۋىنان ساۋىقتىرعاندا، ول ولمەس ەدى. ٴبىراق يسا ودان دا زور كەرەمەت جاساماقشى بولدى. ول مارتاعا: «باۋىرىڭ قايتا تىرىلەدى»،— دەپ ٴسوز بەردى. وسى سوزدەرىنە نەگىز كەلتىرىپ: «قايتا ٴتىرىلۋ جانە ٶمىر — مەنمىن»،— دەدى. بۇلاي ايتقان سەبەبى — قۇداي وعان ولگەندەردى قايتا تىرىلتەتىن كۇش بەرگەن. بۇعان دەيىن يسا كوز جۇمعان ٴبىر كىشكەنتاي قىزدى ارتىنشا-اق تىرىلتكەن بولاتىن، تاعى بىردە قايتىس بولعان ٴبىر جاس جىگىتتى شامامەن سول كۇنى-اق تىرىلتكەن (لۇقا 7:11—15؛ 8:49—55). ال جاتقانىنا ٴتورت كۇن بولىپ، بۇزىلا باستاعان ٴمايىتتى تىرىلتە الا ما؟
«ەلازار، شىق!»
يسا جاقىنىن جوعالتقان دوستارىنا قاتتى جانى اشىدى (13، 14-ابزاستاردى قاراڭىز)
13. جوحان 11:32—35-تارماقتاردا جازىلعانداي، ٴماريام مەن قاسىنداعى جۇرتتىڭ جىلاپ تۇرعانى يساعا قالاي اسەر ەتتى؟ (سۋرەتتى دە قاراڭىز.)
13 جوحان 11:32—35 وقىڭىز. كەيىن يسانىڭ الدىنان ٴماريام دا جۇگىرىپ شىعىپ: «يەم، وسىندا بولعانىڭىزدا، باۋىرىم ولمەس ەدى»،— دەپ، اپكەسى مارتا ايتقان سوزدەردى ايتادى. ول دا، قاسىنداعى جۇرت تا قايعى جۇتىپ، ەلازاردى جوقتاپ جىلاپ تۇرعان بولاتىن. وسىنىڭ ٴبارىن كورىپ-ەستىگەندە، يسانىڭ جۇرەگى اۋىرىپ، مۇڭايىپ كەتەدى. ول دوستارىن قاتتى اياپ كەتكەندىكتەن، كوزىنە جاس الادى. جاقسى كورەتىن ادامىڭدى جوعالتۋدىڭ قانداي اۋىر ەكەنىن تۇسىنگەندىكتەن، يسا قايعى جاسىن قۋانىش جاسىنا اينالدىرۋعا بەكىنەدى.
14. ٴماريام جىلاعاندا، كوزىنە جاس العان يسادان ەحوبا جايلى نە بىلەمىز؟
14 ٴماريام جىلاعاندا، يسانىڭ كوزىنە جاس العانىنان ەحوبانىڭ وتە جاناشىر، جۇرەگى جۇمساق قۇداي ەكەنىن بىلەمىز. ويتكەنى الدىڭعى ماقالادا ايتىلىپ كەتكەندەي، يسانىڭ وي قالپى مەن سەزىمدەرى تۋرا اكەسىنىكىندەي (جوح. 12:45). قايعىرعان دوستارىنا جانى اشىپ، يسانىڭ جىلاپ جىبەرگەنىندەي، ەحوبا دا كوزىمىزدەگى قايعى جاسىن كورگەندە، ٴبىزدى قاتتى اياپ، جانى اشيدى (ٴزاب. 56:8). وسىنداي جۇرەگى جۇمساق قۇدايىمىزبەن جاقىن دوس بولعىمىز كەلەدى، سولاي ەمەس پە؟
يسا ولىمگە بيلىگى جۇرەتىنىن كورسەتتى (15، 16-ابزاستاردى قاراڭىز)
15. جوحان 11:41—44-تارماقتاردا ايتىلعانداي، ەلازار جاتقان قابىردىڭ باسىندا قانداي جاعداي بولدى؟ (سۋرەتتى دە قاراڭىز.)
15 جوحان 11:41—44 وقىڭىز. يسا ەلازار جاتقان قابىردىڭ الدىنا كەلىپ، اۋزىنداعى تاستى الىپ تاستاۋدى بۇيىرادى. سوندا مارتا وعان قارسىلىق ٴبىلدىرىپ: «يەم، يىستەنىپ كەتكەن شىعار»،— دەيدى. ٴبىراق يسا وعان: «ەگەر سەنسەڭ، قۇدايدىڭ ۇلىلىعىن كورەسىڭ دەمەپ پە ەدىم؟»— دەيدى (جوح. 11:39، 40). سوسىن، قازىر جاسايىن دەپ جاتقان كەرەمەتى قۇدايدىڭ ارقاسىندا ەكەنىن كورسەتۋ ٷشىن، كوككە قاراپ، جۇرت الدىندا دۇعا ايتادى. كەيىن: «ەلازار، شىق!»— دەپ قاتتى داۋىستايدى. سول كەزدە ەلازار قابىردەن شىعادى. وسىلايشا يسا كەيبىرەۋلەر ٷشىن مۇمكىن ەمەس بولىپ كورىنگەن كەرەمەتتى جاسايدى c.
16. جوحان 11-تاراۋدا جازىلعان وقيعا نەگە قايتا تىرىلۋگە دەگەن سەنىمىمىزدى كۇشەيتەدى؟
16 جوحان 11-تاراۋدا باياندالعان وقيعا قايتا تىرىلۋگە دەگەن سەنىمىمىزدى كۇشەيتەدى. يسانىڭ مارتاعا: «باۋىرىڭ قايتا تىرىلەدى»،— دەگەن ۋادەسىن ەسكە الايىقشى (جوح. 11:23). اكەسى سياقتى ونىڭ دا مارقۇمدى تىرىلتە الاتىن ىقىلاسى مەن كۇشى بار. ونىڭ كوز جاسىنان ٶلىمدى دە، ٶلىم اكەلەتىن قايعىنى دا جوق قىلۋدى قالايتىنىن كورەمىز. ال ەلازاردىڭ قابىردەن شىعىپ كەلگەنىنەن يسانىڭ ولگەن ادامداردى قايتا تىرىلتۋگە قۇدىرەتتى ەكەنىن كورەمىز. سونداي-اق ونىڭ مارتاعا: «ەگەر سەنسەڭ، قۇدايدىڭ ۇلىلىعىن كورەسىڭ دەمەپ پە ەدىم؟»— دەپ ەسكەرتكەنىن ويعا الايىقشى (جوح. 11:40). راسىندا دا، بىزدە قايتا ٴتىرىلۋدىڭ بولاتىنىنا سەنۋگە سالماقتى سەبەپتەر جەتىپ ارتىلادى. وسى سەنىمىمىزدى نىعايتۋدىڭ تاعى قانداي جولدارى بار؟
قايتا تىرىلۋگە دەگەن ٷمىتتى جانداندىرا بەرىڭىز
17. كيەلى كىتاپتاعى ٴتىرىلىس وقيعالارىن وقىعاندا، نەنى ەستە ۇستاۋىمىز قاجەت؟
17 بۇرىندا بولعان تىرىلىستەر جايلى وقىپ، وي جۇگىرتىڭىز. كيەلى كىتاپتان ٴبىز قايتا تىرىلگەن سەگىز ادام جايلى بىلەمىز d. ولاردىڭ ٴارقايسىسىن قاراستىرىپ شىعۋدى ماقسات ەتىڭىز. تىرىلگەن ەرلەر، ايەلدەر مەن بالالار شىن ومىردە بولعانىن ەستە ۇستاڭىز. وي جۇگىرتىپ، وزىڭىزگە ساباقتار ٴتۇيىپ الىڭىز. ەحوبانىڭ مارقۇمداردى تىرىلتۋگە ىقىلاسى دا، قۇدىرەتى دە بار ەكەنىن ٵربىر وقيعادان كورە ٴبىلىڭىز. ال ەڭ باستىسى، يسانىڭ قايتا ٴتىرىلۋى جايلى ويلانىپ-تولعانىڭىز. ونىڭ قايتا تىرىلگەنى جۇزدەگەن كۋاگەرمەن راستالعانىن جانە سەنىمىمىزدىڭ بەرىك نەگىزى ەكەنىن ۇمىتپاڭىز (قور. 1-ح. 15:3—6، 20—22).
18. قايتا ٴتىرىلۋ جايلى اندەردىڭ بار پايداسىن كورۋ ٷشىن نە ىستەسەڭىز بولادى؟ (سىلتەمەنى دە قاراڭىز.)
18 قايتا ٴتىرىلۋ جايلى «رۋحاني اندەرىمىزدىڭ» بار پايداسىن كورىڭىز e (ەفەس. 5:19). بۇل اندەر قايتا ٴتىرىلۋدىڭ شىنىمەن دە بولاتىنىنا سەنىمىمىزدى ارتتىرىپ، وسى تاماشا ۇمىتىمىزگە جان بىتىرەدى. ولاردى تىڭداڭىزدار، شىرقاپ ۇيرەنىڭىزدەر، وتباسىلىق عيباداتتا ٵننىڭ سوزدەرىنىڭ ماعىناسىن تالقىلاڭىزدار. ٵننىڭ سوزدەرىن ساناڭىز بەن جۇرەگىڭىزگە قاشاپ جازىپ الىڭىز. سوندا باسىڭىزعا ٴبىر قيىن جاعداي ٴتۇسىپ، ٶمىرىڭىز قىل ۇستىندە تۇرعاندا، يا بولماسا جاقىن ادامىڭىزدان ايىرىلعاندا، ەحوبانىڭ رۋحى وسى ٵندى ەسىڭىزگە سالىپ، بويىڭىزعا جىگەر قۇيىپ، جۇباتادى.
19. قايتا ٴتىرىلۋدى قالاي ەلەستەتسەڭىز بولادى؟ (« ولارعا قوياتىن سۇراقتارىڭىز دايىن با؟» دەگەن قورشاۋدى قاراڭىز.)
19 كوز الدىڭىزعا كەلتىرىڭىز. ەحوبا بىزگە جاڭا دۇنيەدە جۇرگەنىمىزدى ەلەستەتەتىن قابىلەت بەرگەن. ٴبىر ايەل باۋىرلاس بىلاي دەيدى: «مەن ٶزىمنىڭ جاڭا دۇنيەدە جۇرگەنىمدى كوپ ەلەستەتەتىنىم سونشا — ول جاقتاعى راۋشان گۇلدەرىنىڭ يىسىنە دەيىن سەزەتىن دەڭگەيگە جەتتىم». ٴسىز دە كيەلى كىتاپتا اتالعان ادال كىسىلەرمەن كورىسىپ جاتقانىڭىزدى كوز الدىڭىزعا كەلتىرىڭىز. اسىرەسە كىممەن كەزدەسكىڭىز كەلەر ەدى؟ ولاردان نە جايلى سۇرايسىز؟ قايتا تىرىلگەن جاقىندارىڭىزدى دا ەلەستەتىپ كورىڭىز. ولارمەن كورىسكەندە ايتاتىن العاشقى ٴسوزىڭىزدى، قۇشاعىڭىزعا الىپ جاتقانىڭىزدى، قۋانىشتان كوزىڭىزگە جاس كەلىپ جاتقانىن دا ەلەستەتىڭىز.
20. ٵرى قاراي دا نە ىستەي بەرگەنىمىز ٴجون؟
20 ەحوبانىڭ مارقۇمداردى قايتا تىرىلتەمىن دەگەن ۋادەسىنە ٴبىزدىڭ العىسىمىز شەكسىز! ول ٶز سوزىندە تۇراتىنىنا ٴبىزدىڭ ەشقانداي كۇمانىمىز جوق. ويتكەنى بۇلاي ەتۋگە ونىڭ ىقىلاسى دا بار، كۇشى دە جەتەدى. ەندەشە، وسى ٷمىتىمىزدىڭ اقتالاتىنىنا سەنىمىمىزدى شىڭداي بەرەيىك، سوندا ەحوبا اكەمىزگە جاقىنداي تۇسەمىز. ال ول بىزگە: «جاقىندارىڭ قايتا تىرىلەدى!»— دەپ ۋادە بەرەدى.
147-ٵن ۋادە ەتىلگەن جۇماق
a جاقىنىمىز كوز جۇمعاندا، ونىڭ قايتا تىرىلەتىنىن بىلگەندىكتەن جانىمىز جۇبانىش تابادى. ٴبىراق قۇدايدىڭ وسى ۋادەسىنە نەگە سەنەتىنىمىزدى وزگەلەرگە ٴتۇسىندىرىپ بەرە الامىز با؟ قايتا ٴتىرىلۋدىڭ بولاتىنىنا دەگەن سەنىمىمىزدى قالاي كۇشەيتسەك بولادى؟ بۇل ماقالا سول جايىندا بولماق.
b بۇل — 2016-جىلدىڭ قاراشا ايىنداعى باعدارلامادا شىققان «ٶمىر ٴبىز اڭساعان» دەپ اتالاتىن بەينەبايان.
c 2008-جىل، 1-قاڭتارداعى «كۇزەت مۇناراسىنىڭ» 31-بەتىنەن (حانزۇشا) «نەگە يسا ەلازاردىڭ قابىرىنە ٴتورت كۇننەن كەيىن كەلدى؟» دەگەن تاقىرىپتى قاراڭىز.
d 2015-جىل، 1-تامىزداعى «كۇزەت مۇناراسىنىڭ» 4-بەتىندەگى (حانزۇشا) «ولىمنەن قايتا تىرىلگەن سەگىز ادام» دەگەن قورشاۋدى قاراڭىز.
e «ەحوباعا قۋانا ٵن شىرقايىق» كىتابىنان مىنا اندەردى قاراڭىز: «جۇماقتا جۇرگەنىڭدى ەلەستەت» (139-ٵن)، «زور سيعا نازار تىگەيىك» (144-ٵن)، «ول شاقىرادى» (151-ٵن). سونداي-اق jw.org تور بەكەتىندەگى اندەردەن «ٶمىر ٴبىز اڭساعان»، «جاڭا دۇنيەگە جەتەلەگەن ٷمىت»، «سەنىم كوزىمەن كورەمىن» دەگەن اندەردى كورىڭىز.
