18-زەرتتەۋ ماقالاسى
جينالىستا ٴبىر-ٴبىرىمىزدى جىگەرلەندىرە بەرەيىك
«ٴبىر-بىرىمىزگە كوڭىل بولەيىك... ٴبىر-ٴبىرىمىزدى جىگەرلەندىرە بەرەيىك» (ەۆر. 10:24، 25).
88-ٵن اق جولىڭنان تايمايىن
اڭداتپا a
1. ٴبىز قاۋىم كەزدەسۋىندە نە ٷشىن تۇسىنىكتەمە بەرەمىز؟
ٴبىز قاۋىم كەزدەسۋلەرىنە نە ٷشىن قاتىسامىز؟ ەڭ الدىمەن، ەحوبانى ماداقتاۋ ٷشىن (ٴزاب. 26:12؛ 111:1). سونداي-اق قازىرگى قيىن زاماندا ٴبىر-ٴبىرىمىزدى جىگەرلەندىرۋ ٷشىن (سال. 1-ح. 5:11). قول كوتەرىپ، تۇسىنىكتەمە بەرگەندە ٴبىز وسىنىڭ ەكەۋىنە دە قول جەتكىزەمىز.
2. كەزدەسۋلەردىڭ قاي بولىكتەرىندە تۇسىنىكتەمە بەرە الامىز؟
2 اپتا سايىن وتەتىن كەزدەسۋلەردىڭ بارىندە بىزدە تۇسىنىكتەمە بەرۋگە مۇمكىندىك بار. مىسال ٷشىن، دەمالىس كۇندەرى وتەتىن كەزدەسۋدە «كۇزەت مۇناراسىن» تالقىلاۋعا قاتىسامىز. ال «ماسىحشىلىك ٶمىرىمىز بەن قىزمەتىمىز» كەزدەسۋىندە رۋحاني اسىل تاستار، قاۋىمدا كيەلى كىتاپتى زەرتتەۋ جانە تالقىلاۋ جۇزىندە وتەتىن باسقا دا بولىكتەرىندە تۇسىنىكتەمە بەرە الامىز.
3. قاۋىم كەزدەسۋىندە قانداي قيىندىق بولۋى مۇمكىن جانە مۇندايدا ەۆرەيلەرگە 10:24، 25 قالاي كومەكتەسە الادى؟
3 تۇسىنىكتەمە بەرىپ، ەحوبانى ماداقتاۋدى جانە باۋىرلاستاردى جىگەرلەندىرۋدى ٴبارىمىز دە قالايمىز. ٴبىراق كەيبىرەۋىمىز قوبالجىپ، قول كوتەرۋگە جۇرەكسىنەمىز. ال وزگەلەر ٴجيى-ٴجيى جاۋاپ بەرۋدى قالاعانمەن، ولاردان سۇراماۋى مۇمكىن. سوندايدا نە ىستەسە بولادى؟ ەلشى پاۋىلدىڭ ەۆرەيلەرگە جازعان حاتىنا نازار اۋدارايىقشى. ول كەزدەسۋلەرىمىزدىڭ نە ٷشىن ماڭىزدى ەكەنىن ايتا كەلە، «ٴبىر-ٴبىرىمىزدى جىگەرلەندىرە بەرەيىك» دەپ شاقىرعان (ەۆرەيلەرگە 10:24، 25 وقىڭىز). دەمەك، «ٴبىر-ەكى اۋىز ٴسوزىمنىڭ ٶزى دە باۋىرلاستارىمدى جىگەرلەندىرەدى عوي» دەپ ويلاساق، تۇسىنىكتەمە بەرۋگە ىنتالىراق بولامىز. ال كوبىرەك اتسالىسقىمىز كەلگەنىمەن، بىزدەن سۇراماي جاتسا، باسقالارعا جول بەرگەنىمىزدى ويلاپ قۋانايىق (پەت. 1-ح. 3:8).
4. وسى ماقالادا قانداي ٷش جايتتى قاراستىرامىز؟
4 قول كوتەرىپ جاۋاپ بەرەتىندەر وتە از كىشىگىرىم قاۋىمدا ٴبىر-ٴبىرىمىزدى قالاي جىگەرلەندىرسەك بولادى؟ ال بۇنى تۇسىنىكتەمە بەرۋشىلەردىڭ سانى وتە كوپ ۇلكەن قاۋىمدا قالاي ىستەي الامىز؟ تۇسىنىكتەمەمىز باسقالاردى جىگەرلەندىرەتىندەي بولۋ ٷشىن نە ىستەۋگە بولادى؟ قازىر سول جايلى قاراستىرايىق.
كىشىگىرىم قاۋىمدا ٴبىر-ٴبىرىمىزدى جىگەرلەندىرەيىك
5. جاۋاپ بەرۋشىلەر از بولعاندا ٴبىر-ٴبىرىمىزدى قالاي جىگەرلەندىرە الامىز؟
5 كىشىگىرىم قاۋىمدا نە توپتا ادامدار از بولعاندىقتان، قول كوتەرىپ جاۋاپ بەرەتىندەر دە از بولادى. جۇرگىزۋشى باۋىرلاس سۇراقتى قويعاننان كەيىن بىرەۋ قول كوتەرىپ، جاۋاپ بەرگەنشە ٴبىراز كۇتىپ تە قالاتىن شىعار. بۇنداي كەزدەسۋ جىگەرلەندىرمەي، قايتا، زەرىكتىرىپ جىبەرەتىندەي كورىنەر. ەندەشە، نە ىستەسەك بولادى؟ ٴجيى-ٴجيى قول كوتەرىپ جاۋاپ بەرۋگە ىنتالى بولىڭىز. ٴسىزدىڭ ىنتاڭىز وزگەلەردىڭ دە ىنتاسىن وياتىپ، ولاردى تالقىلاۋعا جيىرەك قاتىسۋعا تالپىندىرادى.
6، 7. تۇسىنىكتەمە بەرۋگە قورىقساڭىز، قورقىنىشتى قالاي سەيىلتۋگە بولادى؟
6 قول كوتەرىپ، جاۋاپ بەرۋ تۋرالى ويلاعاندا، جۇرەگىڭىز تارسىلداپ، قوبالجيسىز با؟ وسىنداي كۇيدى كوپ باۋىرلاس باستان كەشەدى. ٴبىراق كەزدەسۋدە وتىرعاندارعا كوبىرەك جىگەر بەرۋ ٷشىن، قورقىنىشىڭىزدى سەيىلتۋدىڭ جولىن ىزدەپ كوردىڭىز بە؟
7 بۇنىڭ ٴتيىمدى جولدارى «كۇزەت مۇناراسىندا» شىققان ماقالالاردا بار b. بىرىنشىدەن، جاقسىلاپ دايىندالىڭىز (ناق. س. 21:5). مالىمەتپەن جاقسىراق تانىسىپ الساڭىز، تۇسىنىكتەمە بەرۋگە قاتتى قورىقپايسىز. ەكىنشىدەن، تۇسىنىكتەمەلەرىڭىز قىسقا بولسىن (ناق. س. 15:23؛ 17:27). قىسقا جاۋاپتى ايتىپ شىعۋ اسا ۋايىمداتپايدى. بىرنەشە ويدى قامتيتىن ۇزىن تۇسىنىكتەمەدەن گورى، ٴبىر-ەكى سويلەممەن ايتىلعاندى باسقالار جاقسى تۇسىنەدى. ال سول قىسقا تۇسىنىكتەمەڭىزدى ٶز سوزىڭىزبەن ايتساڭىز، جاقسى دايىندالعانىڭىزدى ٵرى مالىمەتتى انىق تۇسىنگەنىڭىزدى كورسەتەسىز.
8. ەحوبا بار كۇشىمىزدى سالىپ، ەڭ جاقسىسىن بەرىپ جاتقانىمىزعا قالاي قارايدى؟
8 جوعارىداعى كەڭەستەردى قولدانىپ كورسەڭىز دە، ٴبىر-ەكى تۇسىنىكتەمەدەن ارتىق ايتۋعا ٵلى دە قوبالجيسىز با؟ وندا مىناعان سەنىمدى بولىڭىز: شىن جۇرەكتەن كۇش سالىپ، قولىڭىزدان كەلگەندى ىستەپ جاتقانىڭىزدى ەحوبا باعالايدى (لۇقا 21:1—4). ول بىزدەن قولىمىزدان كەلمەيتىندى تالاپ ەتىپ، اۋىر جۇك ارتپايدى (ٴفىلىپ. 4:5). ەندەشە، شاماڭىزعا قاراي قانشا تۇسىنىكتەمە بەرە الاتىنىڭىز جايلى ويلانىپ، سوعان قول جەتكىزۋگە ۇمتىلىڭىز، جۇرەگىڭىزگە تىنىشتىق سۇراپ دۇعا ەتىڭىز. بالكىم، كەيبىرەۋىمىز قىسقا بولسا دا ٴبىر تۇسىنىكتەمە بەرۋدەن باستايتىن شىعارمىز.
ۇلكەن قاۋىمدا ٴبىر-ٴبىرىمىزدى جىگەرلەندىرەيىك
9. ۇلكەن قاۋىمداردا قانداي قيىندىق بولۋى مۇمكىن؟
9 جاريالاۋشىلارى كوپ ۇلكەن قاۋىمنىڭ ٶز قيىندىعى بار. قول كوتەرىپ، جاۋاپ بەرۋشىلەر كوپ بولعاندىقتان، ٴبىزدىڭ قولىمىز ەلەۋسىز قالىپ جاتاتىن شىعار. مىسالى، دانيەللا باۋىرلاس تۇسىنىكتەمە بەرگەندى قاتتى جاقسى كورەدى c. ول ٷشىن تۇسىنىكتەمە بەرۋ — عيباداتىنىڭ ٴبىر بولىگى، سونداي-اق باۋىرلاستاردى جىگەرلەندىرۋدىڭ، كيەلى كىتاپ شىندىقتارىنا دەگەن سەنىمىن نىعايتۋدىڭ مۇمكىندىگى. ٴبىراق دانيەللا ۇلكەن قاۋىمعا اۋىسقاندا بۇرىنعىداي ٴجيى جاۋاپ بەرە المايتىن بولدى. «كەيدە ٴتىپتى بىردە-ٴبىر رەت جاۋاپ بەرە الماي قالاتىنمىن. بۇل ماعان اۋىر ٴتيدى، ٶزىمدى ٴبىر مارتەبەدەن ايىرىلعانداي سەزىندىم. ال بىرنەشە رەت سۇراماي قويسا، ادەيى ىستەپ جاتىر ما دەپ ويلايدى ەكەنسىڭ»،— دەيدى ول.
10. ۇلكەن قاۋىمدا تۇسىنىكتەمە بەرۋدىڭ قانداي امالدارى بار؟
10 دانيەللانىڭ جاعدايى سىزگە تانىس پا؟ بالكىم، ٴسىز قولىڭىزدى ٴبىر-اق سىلتەپ، كەزدەسۋدى جاي تىڭداپ كەتسەم بولدى دەپ ويلارسىز. ٴبىراق ەش بەرىلمەڭىز، تۇسىنىكتەمە بەرۋدىڭ باسقا امالدارىن قاراستىرىڭىز. مىسالى، ٵر كەزدەسۋگە بىرنەشە تۇسىنىكتەمە دايىنداپ بارىڭىز. كەزدەسۋدىڭ باسىندا سىزدەن سۇراماسا، سوڭىنا دەيىن جاۋاپ بەرۋگە ٵلى دە مۇمكىندىگىڭىز بار. سونداي-اق زەرتتەۋگە ارنالعان «كۇزەت مۇناراسىنا» دايىندالعاندا، ٵر ابزاس ماقالانىڭ تاقىرىبىن قالاي اشاتىنىن بايقاڭىز. سوندا بۇكىل تالقىلاۋ بويى سىزدە الىپ-قوسار وي بولادى. بۇعان قوسا، تەرەڭ شىندىقتار تالقىلاناتىن ابزاستارعا جاقسىلاپ دايىندالىڭىز. ويتكەنى بۇنداي شىندىقتاردى ٴتۇسىندىرۋ قيىن بولعاندىقتان، كوپ باۋىرلاس قول كوتەرمەۋى مۇمكىن (قور. 1-ح. 2:10). وسى امالداردىڭ ٴبارىن جاساساڭىز دا، بىرنەشە كەزدەسۋ بويى سىزدەن سۇراماي قويسا شە؟ وندايدا جۇرگىزۋشى باۋىرلاسقا الدىن الا جولىعىپ، قاي سۇراققا جاۋاپ بەرگىڭىز كەلەتىنىن ايتىپ قويساڭىز بولادى.
11. فىلىپىلىكتەرگە 2:4 ٴبىزدى نە ىستەۋگە تالپىندىرادى؟
11 فىلىپىلىكتەرگە 2:4 وقىڭىز. كيەلى رۋحتىڭ جەتەلەۋىمەن پاۋىل ٴبىزدى وزىمىزدەن بۇرىن باسقالاردىڭ قامىن ويلاۋعا شاقىرعان. بۇل كەڭەستى قاۋىم كەزدەسۋىنىڭ تالقىلاۋ بولىگىندە قولدانساق بولادى. قالاي دەيسىز بە؟ باسقالار دا ٴبىز سياقتى جاۋاپ بەرگىسى كەلەتىنىن ەستە ۇستاۋمەن.
دوستارىمىزبەن ارالاسقاندا ولارعا ٴسوز بەرەتىنىمىزدەي، قاۋىم كەزدەسۋىندە دە باسقالارعا جاۋاپ بەرۋگە جول بەرەيىك (12-ابزاستى قاراڭىز)
12. كەزدەسۋلەردە باۋىرلاستاردى جىگەرلەندىرۋدىڭ جاقسى ٴبىر جولى قانداي؟ (سۋرەتتى دە قاراڭىز.)
12 مىسالى، دوستارىمىزبەن باس قوسقاندا، باسقالارعا ٴسوز بەرمەي، ٶزىمىز عانا سويلەپ وتىرمايمىز عوي؟! ٴبىز ولاردىڭ دا سويلەپ، اڭگىمەگە قوسىلىپ وتىرعانىن قالايمىز. سول سياقتى، قاۋىم كەزدەسۋلەرىندە تالقىلاۋعا باسقالار دا اتسالىسسا ەكەن دەيمىز. ويتكەنى بۇل — باۋىرلاستاردى جىگەرلەندىرۋدىڭ ەڭ جاقسى جولدارىنىڭ ٴبىرى (قور. 1-ح. 10:24). ەندەشە، ولار دا تالقىلاۋعا قاتىسۋ ٷشىن نە ىستەي الاتىنىمىزدى كورەيىك.
13. تالقىلاۋعا كوپ ادام قاتىسا الۋ ٷشىن نە ىستەسەك بولادى؟
13 بىرىنشىدەن، تۇسىنىكتەمەڭىز قىسقا بولسىن. سوندا باسقالارعا دا جاۋاپ بەرۋگە ۋاقىت قالادى. قاۋىمداعى اقساقالدار مەن تاجىريبەلى باۋىرلاستار وسى جاعىنان ۇلگى كورسەتسە بولادى. ەكىنشىدەن، تۇسىنىكتەمەڭىز قىسقا بولعانىمەن، تىم كوپ ويدى قامتىپ كەتپەسىن. ابزاستاعى بارلىق ويدى ايتساڭىز، باسقالاردىڭ الىپ-قوسارى بولماي قالادى. سونىمەن، شەگەلەي تۇسسەك، تۇسىنىكتەمەڭىز قىسقا بولسىن جانە تىم كوپ ويدى قامتۋدان اۋلاق بولىڭىز. ەگەر سۇراققا ٴبىرىنشى بولىپ جاۋاپ بەرسەڭىز، تەك ٴبىر عانا ويعا توقتالىپ وتسەڭىز بولادى.
قاۋىم كەزدەسۋىندە قانداي كەزدە قول كوتەرمەي-اق قويساق بولادى؟ (14-ابزاستى قاراڭىز) f
14. ٴجيى قول كوتەرۋىمىز كەرەك پە، جوق پا — سونى قالاي بىلسەك بولادى؟ (سۋرەتتى دە قاراڭىز.)
14 ٵلى جاۋاپ بەرمەگەن باۋىرلاستار بولسا دا، قولىمىزدى كوتەرە بەرسەك، جۇرگىزىپ تۇرعان باۋىرلاس بىزدەن قايتا-قايتا سۇراۋعا ٶزىن ٴماجبۇر سەزىنىپ قالار. باسقالاردىڭ بولسا قول كوتەرىپ، جاۋاپ بەرۋدەن بەتى قايتىپ قالۋى مۇمكىن. سوندىقتان ٴجيى-ٴجيى جاۋاپ بەرگىمىز كەلگەندە، جان-جاعىمىزدى ەسكەرىپ، پاراساتتى بولايىق (ۋاع. 3:7).
15. ا) تۇسىنىكتەمە بەرە الماي قالساق، بۇنى قالاي قابىلداعان ٴجون؟ ٵ) جۇرگىزۋشى باۋىرلاس بارلىق قاتىسۋشىلاردى ويلايتىنىن قالاي كورسەتسە بولادى؟ (« جۇرگىزۋشى باۋىرلاسقا» دەگەن قورشاۋدى قاراڭىز.)
15 تالقىلاۋدا قول كوتەرۋشىلەر كوپ بولعاندا، جاۋاپ بەرۋ مۇمكىندىگىمىز ازايا تۇسەدى. ال كەيدە جۇرگىزۋشى باۋىرلاس بىزدەن سول بويى سۇراماي كەتەدى. بۇعان كوڭىلىمىز تۇسەتىن شىعار، ٴبىراق مۇنى جۇرەگىمىزگە جاقىن المايىق (ۋاع. 7:9).
16. تۇسىنىكتەمە بەرگەندەردى قالاي جىگەرلەندىرسەك بولادى؟
16 ٶزىڭىز قالاعانداي ٴجيى جاۋاپ بەرە الماساڭىز، وزگەلەردىڭ تۇسىنىكتەمەلەرىن مۇقيات تىڭداڭىز جانە كەزدەسۋدەن كەيىن ولاردى سول ٷشىن ماقتاڭىز. ويتكەنى ٴسىزدىڭ ماقتاۋ ٴسوزىڭىز ٴدال تۇسىنىكتەمەڭىز سياقتى جىگەردىڭ كوزى بولا الادى (ناق. س. 10:21). باۋىرلاستارعا جىگەر بەرۋدىڭ تاعى ٴبىر جولى وسىنداي.
ٴبىر-ٴبىرىمىزدى جىگەرلەندىرۋدىڭ باسقا جولدارى
17. ا) اتا-انالار بالالارىنا تۇسىنىكتەمە دايىنداۋعا قالاي كومەكتەسە الادى؟ ٵ) ۆيدەودان كورگەنىمىزدەي، تۇسىنىكتەمە دايىنداۋدىڭ قانداي ٴتورت جولى بار؟ (سىلتەمەنى دە قاراڭىز.)
17 قاۋىم كەزدەسۋلەرىندە ٴبىر-ٴبىرىمىزدى جىگەرلەندىرۋدىڭ تاعى قانداي جولى بار؟ بالالارىڭىز بولسا، ولارعا جاسىنا لايىقتى تۇسىنىكتەمە دايىنداۋعا كومەكتەسىڭىز (مات. 21:16). كەيدە قاۋىمدا نەكەدەگى قيىندىقتار مەن مورالدىق ماسەلەلەر سياقتى كۇردەلى تاقىرىپتار تالقىلانادى. سوندايدا بالالار جاۋاپ بەرە الاتىن ٴبىر-ەكى عانا ابزاس بولۋى مۇمكىن. ولارعا قول كوتەرگەن سايىن سۇراي بەرمەيتىنىن ەسكەرتىپ، سەبەبىن ٴتۇسىندىرىپ قويىڭىز. سوندا بالالارىڭىزدان ەمەس، باسقالاردان سۇراپ جاتسا، ولاردىڭ كوڭىلى تۇسپەيدى (ٴتىم. 1-ح. 6:18) d.
18. تۇسىنىكتەمە بەرگەندە نەدەن اۋلاق بولۋىمىز كەرەك جانە مۇنى قالاي ىستەيمىز؟ (ناقىل سوزدەر 27:2)
18 ەحوبانى ماداقتايتىن جانە باۋىرلاستارىمىزعا جىگەر بەرەتىن تۇسىنىكتەمەنى بارلىعىمىز دايىنداي الامىز (ناق. س. 25:11). كەيدە تۇسىنىكتەمەدە باسىمىزدان وتكەن جاعدايدى قىسقاشا ايتىپ بەرەرمىز. ٴبىراق ٶزىمىز جايلى تىم كوپ ايتىپ كەتۋدەن اۋلاق بولعانىمىز ٴجون (ناقىل سوزدەر 27:2 وقىڭىز؛ قور. 2-ح. 10:18). قايتا، ەحوباعا، ونىڭ سوزىنە جانە تۇتاس حالقىنا نازار اۋدارۋعا اسىق بولايىق (ايان 4:11). ٴبىراق ابزاستىڭ سۇراعى ٶزىڭىز جايلى ايتىپ بەرۋگە شاقىرىپ تۇرسا، بۇلاي ەتۋىڭىز ورىندى. بۇنىڭ ٴبىر مىسالىن كەلەسى ابزاستىڭ سۇراعىنان بايقاۋعا بولادى.
19. ا) تالقىلاۋ كەزىندە ٴبىر-ٴبىرىمىزدى ويلاساق، ناتيجەسى قانداي بولادى؟ (ريمدىكتەرگە 1:11، 12). ٵ) تۇسىنىكتەمە بەرۋدى ٴسىز نە ٷشىن باعالايسىز؟
19 تۇسىنىكتەمە بەرۋگە قاتىستى قاتاڭ ەرەجەلەر جوق. ٴبىراق ٴبارىمىز دە تالقىلاۋدىڭ جىگەر بەرەتىندەي وتۋىنە اتسالىسا الامىز. ول ٷشىن ٴبىر جاعدايدا جيىرەك قول كوتەرىپ جاۋاپ بەرۋ كەرەك شىعار. ال باسقا جاعدايدا قانشا تۇسىنىكتەمە بەرە الساق، سونى قاناعات ەتىپ، بۇنداي مارتەبەگە باسقالار دا يە بولىپ جاتقانىنا قۋانامىز. قاۋىم كەزدەسۋلەرىندە باسقالاردىڭ مۇددەسىن وزىمىزدىكىنەن جوعارى قويساق، بارلىعى جىگەرلەنەدى (ريمدىكتەرگە 1:11، 12 وقىڭىز).
93-ٵن كەزدەسۋىمىزگە باتاڭدى بەرە كور
a قاۋىم كەزدەسۋلەرىندە تۇسىنىكتەمەمىزبەن ٴبىر-بىرىمىزگە جىگەر بەرەمىز. ٴبىراق كەيبىرەۋلەر قاتتى قوبالجىعاننان قولىن كوتەرىپ جاۋاپ بەرۋگە قينالادى. سونداي-اق، كەرىسىنشە، تۇسىنىكتەمە بەرۋدى ۇناتاتىن، كوبىرەك جاۋاپ بەرسەم ەكەن دەيتىن باۋىرلاستار دا بار. وسى ەكى جاعدايدا دا ٴبىر-ٴبىرىمىزدى ويلاپ، كەزدەسۋدە ٶزارا جىگەرلەنۋ ٷشىن نە ىستەۋگە بولادى؟ تۇسىنىكتەمەلەرىمىز باۋىرلاستاردى سۇيىسپەنشىلىككە جانە يگى ىستەرگە تالپىندىرۋ ٷشىن نە ىستەي الامىز؟ وسى ماقالادا سول تۋرالى بىلەمىز.
b مىسالى، «كۇزەت مۇناراسىنىڭ» 2019-جىل، قاڭتار ايىنداعى سانىنىڭ 8—13-بەتتەرىندە جانە 2003-جىل، 1-قىركۇيەكتە شىققان سانىنىڭ (حانزۇشا) 19—22-بەتتەرىندە.
c ەسىمى وزگەرتىلگەن.
d jw.org تور بەكەتىنەن «ەحوبانىڭ دوسى بول: جاۋاپ بەرۋگە دايىندال» دەگەن ۆيدەونى قاراڭىز.
f سۋرەت سيپاتتاماسى: ۇلكەن قاۋىمدا ٴبىر ەر باۋىرلاس الدىندا تۇسىنىكتەمە بەرگەننەن كەيىن، ەندى باسقالارعا جول بەرىپ وتىر.
