15-زەرتتەۋ ماقالاسى
يسا جاساعان كەرەمەتتەردىڭ قانداي ونەگەلىك ٴمانى بار؟
«ول ەل ارالاپ، يگى ىستەر جاسادى... بارلىعىن ساۋىقتىردى» (ەل. ٸس. 10:38).
13-ٵن ٴماسىحتى ۇلگى تۇتايىق
اڭداتپا a
1. يسا العاشقى كەرەمەتىن قانداي جاعدايدا جاساعانىن سيپاتتاپ بەرىڭىز.
ٴبىزدىڭ زامانىمىزدىڭ 29 جىلىنىڭ اياعى. يسا قىزمەتىنە ەندى كىرىسكەن شاعى. ول اناسىمەن جانە كەيبىر شاكىرتتەرىمەن بىرگە نازارەتتىڭ سولتۇستىگىندەگى قانا قالاسىندا تويدا ٴجۇر. ٴماريام توي وتكىزىپ جاتقان وتباسىمەن جاقىن ارالاسقاندىقتان، قوناقتاردى كۇتۋگە جاردەمدەسىپ جۇرگەن كورىنەدى. قوناق كوپ كەلگەننەن بولسا كەرەك، تويدىڭ ورتاسىندا شاراپ تاۋسىلىپ قالادى b. ٴماريام بىردەن ۇلىنا بارىپ: «ولاردىڭ شارابى جوق»،— دەيدى (جوح. 2:1—3). سوندا يسا سۋدى «جاقسى شاراپقا» اينالدىرىپ، تاڭعاجايىپ نارسە جاسايدى. وسىلاي توي يەلەرىن مەرەكەنىڭ ٴدال ورتاسىندا ماسقارا بولۋدان ساقتاپ قالادى (جوح. 2:9، 10).
2، 3. ا) يسا كەرەمەتتەر جاساي الاتىن كۇشىن قالاي پايدالاندى؟ ٵ) يسانىڭ كەرەمەتتەرىن قاراستىرعانىمىز نەگە ماڭىزدى؟
2 يسا جەردە قىزمەت ەتكەندە بۇدان دا كوپ كەرەمەتتەر جاسادى c. ول وسىنداي قابىلەتىن حالىقتىڭ يگىلىگىنە جاراتىپ، ونداعان مىڭ ادامعا كومەكتەسكەن. مىسالى، ونىڭ بىردە 5000، كەيىن 4000 ەر كىسىنى عاجايىپ تۇردە تاماقتاندىرعانىن الايىقشى. وسى ەكى-اق جاعدايدىڭ وزىندە، ايەلدەر مەن بالالاردى قوسقاندا، ادام سانى 27000 نان اسىپ تۇسكەن (مات. 14:15—21؛ 15:32—38). سول ەكى وقيعادا يسا كوپ اۋرۋلاردى دا ساۋىقتىرعان (مات. 14:14؛ 15:30، 31). كورمەيتىندەر كورىپ، سال ادامدار اتتاي شاۋىپ، سەبەتتەگى تاماق عاجايىپ تۇردە كوبەيگەندە، جۇرت قايران قالدى!
3 يسا جاساعان كەرەمەتتەردىڭ بەرەر ٴتالىمى مول. قاي جاعىنان ولار ٴبىزدىڭ سەنىمىمىزدى نىعايتادى؟ كەرەمەتتەرىن جاساعاندا يسا قالاي كىشىپەيىل ٵرى جاناشىر بولدى؟ ٴبىز وعان قالاي ەلىكتەي الامىز؟ قازىر سول تۋرالى قاراستىرايىق.
ەحوبا مەن يسا جايلى بىلەمىز
4. يسانىڭ كەرەمەتتەرىنەن كىمدى جاقىن تانيمىز؟
4 يسا جاساعان كەرەمەتتەردەن ونىڭ ٶزىن عانا ەمەس، ەحوبانى دا جاقىننان تانىپ، سەنىمىمىز نىعايادى. ويتكەنى وعان كەرەمەتتەر جاساۋعا كۇش بەرگەن — ەحوبانىڭ ٶزى. ەلشىلەردىڭ ىستەرى 10:38 دە: «قۇداي يسانى كيەلى رۋحىمەن جانە قۇدىرەتىمەن مايلادى. سودان ول ەل ارالاپ، يگى ىستەر جاسادى جانە ٸبىلىس قيناعان ادامداردىڭ بارلىعىن ساۋىقتىردى، ويتكەنى قۇداي وعان جار بولدى»،— دەلىنگەن. سونداي-اق يسانىڭ بارلىق ٴسوزى مەن ىسىنەن، سونىڭ ىشىندە كەرەمەتتەرىنەن دە، ەحوبانىڭ وي قالپى مەن سەزىمدەرىن تانيمىز. سەبەبى ول اكەسىنىڭ قاسيەتتەرىن اينىتپاي تانىتقان (جوح. 14:9). ەندەشە، يسانىڭ كەرەمەتتەرىنەن سەنىم نىعايتارلىق ٷش جايتتى بىلەيىك.
5. يسانى كەرەمەتتەر جاساۋعا تالپىندىرعان نە؟ (ماتاي 20:30—34)
5 بىرىنشىدەن، يسا مەن ەحوبا ٴبىزدى قاتتى سۇيەدى. سوندىقتان دا جەردە قىزمەت ەتكەنىندە يسا ادامداردىڭ ازابىن جەڭىلدەتۋ ٷشىن كەرەمەتتەر جاساعان. ەكى زاعيپ كىسى ودان ايعايلاپ كومەك سۇراعان جاعدايدى الايىقشى (ماتاي 20:30—34 وقىڭىز). يسا ولاردى «اياپ كەتتى» دە، كوزدەرىن كورەتىن ەتتى. وسى جەردە «اياپ كەتتى» دەپ اۋدارىلعان گرەك ٴسوزى ادامنىڭ ٸشى-باۋىرى ەزىلىپ، قاتتى جانى اشۋىن بىلدىرەدى. ادامداردى سۇيگەندىكتەن، وسىلاي جانى اشىعان يسا ازاپتارىنا قاراپ تۇرا الماي، الاپەستەردى ايىقتىرعان، اشىققاندارىن تاماقتاندىرعان (مات. 15:32؛ مار. 1:41). راسىندا دا، جاناشىر قۇدايىمىز ەحوبا مەن ونىڭ ۇلى يسا ٴبىزدى قاتتى سۇيەدى ٵرى قينالعانىمىزدا بىرگە قينالادى (لۇقا 1:78؛ پەت. 1-ح. 5:7). ادامزاتتى زار يلەتكەن بۇكىل جاماندىق پەن ازاپتان قۇتقاراتىن كەزدى ولار اڭساپ كۇتىپ وتىر!
6. ەحوبا يساعا قانداي كۇش بەردى؟
6 ەكىنشىدەن، قۇداي يساعا ادامزاتتىڭ كەز كەلگەن قيىندىعىن شەشە الاتىن كۇش بەرگەن. يسا جاساعان كەرەمەتتەرى ارقىلى ادامدار ەشقاشان ٶز كۇشىمەن شەشە المايتىن ماسەلەلەردى شەشە الاتىنىن كورسەتتى. مىسالى، ول ٴبىز كورىپ جاتقان بۇكىل قايعى-قاسىرەتتىڭ تۇپكى سەبەبىن، ياعني كۇنانى جانە ودان تۋاتىن اۋرۋ مەن ٶلىمدى جويا الادى (مات. 9:1—6؛ ريم. 5:12، 18، 19). جاساعان كەرەمەتتەرى ونىڭ «ٴتۇرلى اۋرۋ-سىرقاۋدان» ايىقتىرىپ، ٴتىپتى ولگەندەردى تىرىلتە الاتىنىن دالەلدەدى (مات. 4:23؛ جوح. 11:43، 44). سونداي-اق ونىڭ جويقىن داۋىلدى دا، زۇلىم رۋحتاردى دا باعىندىرا الاتىن كۇشى بار (مار. 4:37—39؛ لۇقا 8:2). كوكتەگى اكەمىز ەحوبا ۇلىنا وسىنداي اسقان قۇدىرەت دارىتقانى كوڭىلىمىزگە جاي بەرەدى ەمەس پە؟!
7، 8. ا) يسانىڭ كەرەمەتتەرىنە قاراپ، نە نارسەگە كوزىمىز انىق جەتەدى؟ ٵ) ٴسىز جاڭا دۇنيەدە ورىندالاتىن قاي كەرەمەتتى اسىعا كۇتەسىز؟
7 ۇشىنشىدەن، قۇداي پاتشالىعىنىڭ تۇسىندا قۇدايدىڭ ۋادەلەرى مىندەتتى تۇردە ورىندالاتىنىنا كوزىمىز انىق جەتەدى. يسا جەردە ادام بولىپ ٴجۇرىپ وسىنداي كەرەمەتتەر ىستەگەن بولسا، كوكتە قۇداي پاتشالىعىنىڭ پاتشاسى رەتىندە بۇدان دا زورىن جاسايدى. كەلەشەكتە ٴماسىحتىڭ بيلىگىنىڭ تۇسىندا بۇكىل جەر بەتىندەگى ٶمىر قانداي بولاتىنىن ەلەستەتەيىكشى. يسا ادامزاتقا تۇساۋ سالىپ وتىرعان بۇكىل اۋرۋدان، مۇگەدەكتىك پەن كەمتارلىق اتاۋلىدان ارىلتقاندا، بويىمىزعا ٵل-قۋات ٴبىتىپ، دەنساۋلىعىمىز مىقتى بولادى (يشايا 33:24؛ 35:5، 6؛ ايان 21:3، 4). اش قالامىن دەپ قورىقپايمىز، ەشقانداي تابيعي اپاتتىڭ دا زاردابىن شەكپەيمىز (يشايا 25:6؛ مار. 4:41). قابىردەگىلەر قايتا تىرىلگەندە، جاقىندارىمىزدىڭ الدىنان شىعىپ، قۋانا قارسى الامىز (جوح. 5:28، 29). ال ٴسىز كەلە جاتقان جاڭا دۇنيەدە ورىندالاتىن قاي كەرەمەتتى اسىعا كۇتىپ ٴجۇرسىز؟
8 يسانىڭ كەرەمەتتەرىنەن ونىڭ اسقان كىشىپەيىلدىلىگى مەن جاناشىرلىعىن كورەمىز. وسى قاسيەتتەرىن ٴبىز دە ۇلگى تۇتقانىمىز جاقسى. ەندەشە ونىڭ جاساعان ەكى كەرەمەتىن قاراستىرايىق. الدىمەن، قاناداعى ۇيلەنۋ تويىنان باستايمىز.
كىشىپەيىلدىلىككە ۇيرەنەمىز
9. يسا ۇيلەنۋ تويىندا نە ىستەدى؟ (جوحان 2:6—10)
9 جوحان 2:6—10 وقىڭىز. قانادا وتكەن تويدا يسا سۋدى شاراپقا اينالدىرۋعا مىندەتتى مە ەدى؟ جوق. كيەلى كىتاپتا «ٴماسىح سۋدى شاراپقا اينالدىراتىن بولادى» دەگەن پايعامبارلىق جازىلماعان. سوندا بۇل كەرەمەتتى يسا نە ٷشىن جاسادى؟ ونىڭ توي وتكىزىپ جاتقان وتباسىنا، اسىرەسە جاس جۇبايلارعا، جانى اشىسا كەرەك. ەگەر ٶز تويىڭىزدىڭ ٴدال ورتاسىندا سۋسىن مەن ىشىمدىك تاۋسىلىپ قالسا، نە سەزىنەر ەدىڭىز؟ قوناقتاردان ۇيالىپ، ىڭعايسىز جاعدايعا قالار ەدىڭىز عوي. جاس جۇبايلار دا وسىلاي سەزىنىپ قالماس ٷشىن، يسا قاناداعى تويدا كەرەمەت جاسادى: 390 ليتر سۋدى وتە ساپالى شاراپقا اينالدىرىپ، اسقان جومارتتىق تانىتتى. وسىلاي يسا ولار قالعان شاراپتى كەيىن دە قولدانسىن نەمەسە ساتىپ، اقشاسىن كادەلەرىنە جاراتسىن دەگەن شىعار. داستارقانعا شاراپ كەلگەندە، جاس جۇبايلاردىڭ جۇرەكتەرى ورنىنا ٴتۇسىپ، قاتتى قۋانىپ كەتكەندەرىندە ٴسوز جوق!
جەتىستىكتەرىڭىزگە ماقتانباي، يسا سياقتى بولىڭىز (10، 11-ابزاستاردى قاراڭىز) e
10. جوحاننىڭ 2-تاراۋىندا ايتىلعان وقيعانىڭ قانداي ماڭىزدى تۇستارى بار؟ (سۋرەتتى دە قاراڭىز.)
10 جوحاننىڭ 2 تاراۋىندا باياندالعان وسى وقيعانىڭ تەرەڭ ٴمانى بار تۇستارىنا نازار اۋدارايىقشى. بايقادىڭىز با، يسا تاس قۇمىرالاردى سۋعا ٶزى تولتىرماي، قىزمەت كورسەتۋشىلەردى جۇمساعان (6، 7-تارماقتار). سۋدى شاراپقا اينالدىرعان سوڭ دا، ونى اساباعا ٶزى اپارماي، قىزمەتشىلەردى جىبەرگەن. يسا جۇرتتىڭ كوزىنە ٴتۇسۋدى كوكسەمەگەن (8 تارماق). ونىڭ توستاعانعا شاراپ قۇيىپ الىپ، قوناقتاردىڭ الدىندا: «مەنىڭ جاڭا عانا جاساعان شارابىمنان الىپ وتىرىڭىزدار!»— دەپ ماقتانىپ تۇرعانىن ەلەستەتۋدىڭ ٶزى قيىن.
11. يسانىڭ كەرەمەتىنەن نە ۇيرەنەمىز؟
11 وسى جاعدايدا يسادان ۇيرەنەتىن قاسيەتىمىز — كىشىپەيىلدىلىك. بۇل كەرەمەتىنە يا بولماسا جاساعان باسقا دا ىستەرىنە ماقتانۋ وعان مۇلدە جات بولعان. ول كىشىپەيىلدىلىكپەن بارلىق ماداق-ماراپاتتى اكەسىنە جاۋدىرۋدان تالماعان (جوح. 5:19، 30؛ 8:28). يسانى ۇلگى ەتسەك، ٴبىز دە ٶزىمىزدى كىشى تۇتىپ، جەتىستىكتەرىمىزگە ماقتانبايمىز. ەحوبا ٷشىن قانداي قىزمەت اتقارساق تا، ٶزىمىزدى كوتەرمەلەمەي، وزىنە قىزمەت ەتۋ مارتەبەسىن سيلاعان تاماشا قۇدايىمىزدى داڭقتايىق (ەرم. 9:23، 24). ونى وزىنە تيەسىلى ماداققا بولەيىك. راسىندا دا، ەحوبانىڭ دەمەۋىنسىز ٴبىز ەشتەڭەگە دە قول جەتكىزە الماس ەدىك! (قور. 1-ح. 1:26—31).
12. يسانىڭ كىشىپەيىلدىلىگىنە تاعى قالاي ەلىكتەسەك بولادى؟ مىسال كەلتىرىڭىز.
12 يسانىڭ كىشىپەيىلدىلىگىن ۇلگى ەتۋدىڭ تاعى ٴبىر جولىن قاراستىرايىق. مىنانداي ٴبىر جاعدايدى الايىقشى: ٴسىز — اقساقالسىز. قاۋىمىڭىزداعى ٴبىر جاس قىزمەت كومەكشىسىنە العاش رەت كوپشىلىككە ارنالعان بايانداما ايتۋ كەرەك. سودان ٴسىز كوپ ۋاقىتىڭىزدى ارناپ، وعان بايانداماسىن دايىنداۋعا كومەكتەسەسىز. ناتيجەسىندە ول باياندامانى مايىن تامىزىپ ايتىپ، قاۋىم ٴبىر سەرپىلىپ قالادى. جينالىس بىتكەن سوڭ، ٴبىر باۋىرلاس سىزگە كەلىپ: «بۇگىن ٴبىر كەرەمەت بايانداما بولدى، ٴيا؟»— دەيدى. سول كەزدە: «ارينە، بارىمىزدى سالىپ كومەكتەسىپ، ەكى جاقتاپ الىپ شىقتىق قوي»،— دەيسىز بە؟ نەمەسە: «شىنىندا دا جاقسى بايانداما بولدى، وعان وتە ريزامىن»،— دەيسىز بە؟ ٴيا، كىشىپەيىل ادام بىرەۋگە جاساعان جاقسىلىعىن ايتىپ، وزىنە ماراپات تىلەمەيدى. قايتا، ەحوبا ونىڭ ەڭبەگىن كورىپ تۇرعانىن جانە باعالايتىنىن قاناعات تۇتادى (مات. 6:2—4؛ ەۆر. 13:16 سالىستىرىڭىز). يساعا ەلىكتەپ، ٶزىن كىشى تۇتاتىن باۋىرلاس قاشاندا ەحوباعا ۇنامدى بولىپ، ونىڭ كوڭىلىنەن شىعادى (پەت. 1-ح. 5:6).
جاناشىر بولۋدى ۇيرەنەمىز
13. ناين قالاسىنا كىرىپ بارا جاتقاندا يسا نە كوردى جانە ول نە ىستەدى؟ (لۇقا 7:11—15)
13 لۇقا 7:11—15 وقىڭىز. ەندى يسانىڭ جەردەگى قىزمەتىنىڭ ورتا شەنىندە بولعان وقيعانى ەلەستەتەيىك. يسا عاليلەياداعى ناين قالاسىنا بارا جاتتى. بۇل — وسىدان 900 جىلداي ۋاقىت بۇرىن ەلىشە ٴبىر ايەلدىڭ ۇلىن قايتا تىرىلتكەن شۋنەم قالاسىنا جاقىن جەر (پات. 2-ج. 4:32—37). يسا قالا قاقپاسىنا جەتىپ قالعاندا، قالىڭ توبىردىڭ ٴبىر ٴمايىتتى جەرلەۋگە اپارا جاتقانىن كوردى. اسىرەسە ايانىشتىسى، قايتىس بولعان جىگىت جەسىر ايەلدىڭ جار دەگەندە جالعىز بالاسى ەكەن. ٴبىراق وسى قارالى كۇنى بۇل ايەل جالعىز قالماي، قالىڭ توبىرمەن بىرگە كەلە جاتتى. سول كەزدە يسا ولاردى توقتاتىپ، قايعى جامىلعان انا ٷشىن ٴبىر كەرەمەت جاسادى: ونىڭ جالعىز ۇلىن ٴتىرىلتىپ بەردى! بۇل — ىزگى حابارلاردا يسانىڭ ادامدى قايتا تىرىلتكەنى جايلى جازىلعان ٷش وقيعانىڭ العاشقىسى.
قايعى جۇتقان جاندارعا جاناشىرلىق كورسەتىپ، يساعا ەلىكتەڭىز (14—16-ابزاستاردى قاراڭىز)
14. لۇقا 7-تاراۋدا باياندالعان وقيعانىڭ قانداي ماڭىزدى تۇستارى بار؟ (سۋرەتتى دە قاراڭىز.)
14 لۇقا 7-تاراۋداعى وقيعانىڭ ماڭىزدى تۇستارىنا نازار اۋدارىپ وتەيىكشى. بايقاساڭىز، يسا جەسىر ايەلدى الدىمەن «كوردى»، سوسىن «اياپ كەتتى» (13-تارماق). يسا ونىڭ ۇلىنىڭ ٴمايىتىنىڭ الدىندا ەگىلە جىلاپ كەلە جاتقانىن بايقاعان شىعار. بۇنى كورگەندە يسانىڭ جۇرەگى ەزىلىپ، جانى اشىپ كەتتى. يسا «بايعۇس-اي» دەپ، ارى قاراي كەتە بەرمەي، جاناشىرلىعىن ىسىمەن كورسەتتى. ول ايەلگە: «جىلاماڭىز»،— دەپ، جىلى ۇنمەن جۇباتىپ ايتقانى ٴسوزسىز. ٴسۇيتىپ، ٶزى نيەت ٴبىلدىرىپ، وعان جاقسىلىق جاسادى: جالعىز ۇلىن قايتا ٴتىرىلتىپ، »اناسىنا تابىس ەتتى» (14، 15-تارماقتار).
15. يسانىڭ جاساعان كەرەمەتىنەن قانداي ساباق الامىز؟
15 يسانىڭ جەسىر ايەلدىڭ ۇلىن تىرىلتكەنىنەن نە ۇيرەنەمىز؟ جاقىنىنان ايىرىلعان ادامدارعا جاناشىر بولۋدى. ارينە، ٴبىز يسا سياقتى ولگەن ادامدى تىرىلتە المايمىز. ٴبىراق بايقامپاز بولۋ ارقىلى قايعىرعان جاندارعا جاناشىرلىق كورسەتۋدى ۇيرەنە الامىز. ٶزىمىز نيەت ٴبىلدىرىپ، ولارعا جۇبانىش بولاتىن جىلى ٴسوزىمىزدى ايتىپ يا قانداي دا ٴبىر جاقسىلىق جاساساق بولادى d (ناق. س. 17:17؛ قور. 2-ح. 1:3، 4؛ پەت. 1-ح. 3:8). ٴتىپتى ٴبىر-ەكى اۋىز ٴسوزىمىز نە جىلۋلىق كورسەتكەنىمىزدىڭ ٶزى ولاردىڭ جاندارىنا مەدەت بولادى.
16. سۋرەتتە بەينەلەنگەندەي، جاقىندا بالاسىن جوعالتقان انامەن بولعان جاعدايدان نە ۇيرەندىڭىز؟
16 ومىردە بولعان ٴبىر جاعدايدى قاراستىرايىق. ٴبىراز جىلدار بۇرىن پاتشالىق سارايىندا قايتا ٴتىرىلۋ جايلى ٵندى ايتىپ جاتقاندا، ايەل باۋىرلاسىمىز قارسى بەتتە جىلاپ تۇرعان باسقا ايەل باۋىرلاستى كورىپ قالادى. ول جاقىندا عانا قىزىنان ايىرىلعان ەدى. سوندا الگى باۋىرلاس بىردەن ونىڭ قاسىنا بارىپ، يىعىنان قۇشاقتاپ، ٵندى بىرگە ايتىپ شىعادى. قىزىنان ايىرىلعان باۋىرلاس سول كۇنى قاۋىمعا بارعانىنا قاتتى قۋانىپ، بىلاي دەدى: «اياۋلى باۋىرلاستارىما جۇرەگىم ەلجىرەپ، سۇيىسپەنشىلىگىم تاسىپ كەتتى. ٴبىزدىڭ تىرەنىشىمىز، مىنە، وسى باۋىرلاستارىمىز. جان داۋاسىن وسى پاتشالىق سارايىنا كەلىپ تابامىز». «رۋحى كۇيرەگەن» جاندارعا دەمەۋ بولۋ ٷشىن جاساعان تيتتەي جاقسىلىعىمىزدىڭ ٶزىن ەحوبا بايقايدى ٵرى باعالايدى (ٴزاب. 34:18 ٴسىلت).
جەكە زەرتتەۋگە كەرەمەت تاقىرىپ
17. بۇل ماقالادان نە بىلدىك؟
17 ىزگى حابارلاردا جازىلعان يسانىڭ كەرەمەتتەرىن جەكە زەرتتەسەك، كوپتەگەن جىگەرلى ويلارعا قانىق بولامىز. ولاردان ەحوبا مەن يسانىڭ ٴبىزدى قانشالىقتى سۇيەتىنىن، يسا بۇكىل ادامزاتتىڭ قيىندىقتارىن شەشە الاتىنىن بىلەمىز جانە قۇداي پاتشالىعىندا مول باتاعا كەنەلەتىن ۋاقىتتىڭ جاقىن قالعانىنا كوزىمىز انىق جەتەدى. سونداي-اق وسى وقيعالاردى زەرتتەگەندە، يسانىڭ قانداي قاسيەتتەرىنە ەلىكتەي الاتىنىڭىزدى دا ويلانا وتىرىڭىز. ولاي بولسا، جەكە زەرتتەۋدە يا وتباسىلىق عيباداتتا يسانىڭ باسقا دا كەرەمەتتەرىن قاراستىرۋدى جوسپارلاڭىز. زەرتتەۋ بارىسىندا وزىڭىزگە مارجانداي ساباقتاردى تەرىپ الىپ، كەيىن باسقالارمەن دە بولىسە ٴجۇرىڭىز. بۇل كەرەمەتتەي جىگەرلى اڭگىمەگە ۇلاسارى ٴسوزسىز! (ريم. 1:11، 12).
18. كەلەسى ماقالادا نە تۋرالى بىلەمىز؟
18 يسا مارقۇم ادامدى تىرىلتكەن ٷش جاعدايدىڭ ٷشىنشىسى ونىڭ قىزمەتىنىڭ اياعىنا تامان بولدى. بۇل قايتا ٴتىرىلۋ الدىڭعى ەكەۋىنەن وزگەشە بولدى، ويتكەنى ول ٶزىنىڭ جاقىن دوسىن ٴتىرىلتتى ٵرى بۇنى ەرەكشە جاعدايدا جاسادى. كەلەسى ماقالادا يسانىڭ وسى كەرەمەتىنەن نە ۇيرەنەتىنىمىزدى جانە قايتا تىرىلۋگە دەگەن سەنىمىمىزدى قالاي نىعايتۋعا بولاتىنىن بىلەمىز.
20-ٵن سەن ۇلىڭدى قيدىڭ
a كيەلى كىتاپتان يسانىڭ دولى تەڭىزدى قالاي باسقانىن، اۋرۋلاردى ساۋىقتىرعانىن، ٴتىپتى ولگەن ادامدى تىرىلتكەنىن وقىعاندا، ەرەكشە اسەرگە بولەنەمىز. الايدا بۇل كەرەمەتتەر جاي قىزىق ٷشىن ەمەس، ەحوبا مەن يسا تۋرالى ٴتالىم الىپ، سەنىمىمىزدى نىعايتۋ ٷشىن جازىلعان. سونداي-اق بۇل وقيعالار ٴبىزدى بەلگىلى ٴبىر قاسيەتتەرگە تاربيەلەيدى.
b كيەلى كىتاپتى زەرتتەيتىن ٴبىر عالىم بىلاي دەيدى: «كيەلى كىتاپتا اتالعان ەلدەردە قوناقتى جاقسىلاپ كۇتىپ الۋ قاسيەتتى بورىش سانالعان. ولار داستارقانعا جەتكىلىكتى مولشەردەن اسىرىپ، ارتىعىمەن اس قوياتىن. اسىرەسە ۇيلەنۋ تويىندا داستارقانى وسىلاي اسىپ-تاسىپ تۇرسا، ٷي يەسى قوناقجاي سانالاتىن».
c ىزگى حابارلاردا يسانىڭ 30 دان اسا كەرەمەتى جازىلعان. ولاردىڭ سانى ودان دا كوپ، سەبەبى كەيدە كيەلى كىتاپتا ونىڭ كەرەمەتتەرى جەكەلەنبەي، جالپىلاي ايتىلعان. مىسالى، بىردە وعان «بۇكىل قالا» كەلىپ، ول «تالاي ناۋقاستى ايىقتىرعان» (مار. 1:32—34).
d جاقىنىن جوعالتقان جانداردى قالاي جۇباتۋ كەرەكتىگى جايىندا 2016-جىلعى «كۇزەت مۇناراسىنىڭ» 3-ٴنومىر سانىنداعى (حانزۇشا) «جوقتاپ جۇرگەندەردى جۇباتىڭىز» دەگەن ماقالاسىنان وقىپ كورىڭىز.
e سۋرەت سيپاتتاماسى: جاس جۇبايلار مەن قوناقتار جاقسى شاراپتىڭ قىزىعىن كورىپ جاتىر، يسا بولسا ارتقى جاقتا تۇر.
